56. ALDIZKARIA - 2007ko maiatzaren 4a

I. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Plantilla Organikoa, Lan Publikoaren Eskaintza, oposizioak eta lehiaketak

DEIALDIA, Funtzio Publikoaren zuzendari nagusiak apirilaren 16ko 1219/2007 Ebazpenaren bidez onetsia. Ebazpen horren bidez Nafarroako Foru Komunitateko eta haren erakunde autonomoetako administrari, telefonista-ofizial eta koordinazioko operadore-ofizial izateko 130 lanpostu, C maila edo taldekoak, oposizio-lehiaketa bidez barne igoera murriztuan betetzeko deialdia onetsi da.

Funtzio Publikoaren zuzendari nagusiak, apirilaren 16ko 1219/2007 Ebazpenaren bidez, Nafarroako Foru Komunitateko eta haren erakunde autonomoetako administrari, telefonista-ofizial eta koordinazioko operadore-ofizial izateko 130 lanpostu, C maila edo taldekoak, oposizio-lehiaketa bidez barne igoera murriztuan betetzeko deialdia onetsi du.

1._Arau orokorrak.

1.1. Deialdi honen xedea Nafarroako Foru Komunitateko eta haren erakunde autonomoetako administrari, telefonista-ofizial eta koordinazioko operadore-ofizial izateko 130 lanpostu, C maila edo taldekoak, oposizio-lehiaketa bidez barne igoera murriztuan betetzea da. Horietarik honako hauek erreserbatzen dira:

_126 euskaraz jakitea merezimendu gisa baloratu behar ez den lanpostuak betetzen dituzten izangaiendako (euskaraz jakitea betebeharra duten lanpostuak barne).

_1 euskal eremuko lanpostuetan aritzen diren izangaientzat. Euskaraz jakin beharrik ez dauka.

_3 eremu mistoko izangaientzat, non euskaraz jakitea merezimendutzat jo behar den, plantilla organikoan halaxe ageri baita.

1.2. Hautaprobak gainditu ondoren, administrari, telefonista-ofizial edo koordinazioko operadore-ofizial izateko lanpostuetan aritzeko izendatzen direnak C maila edo taldean sartuko dira, maila edo talde horri dagozkion sariak kobratuko dituzte eta lehen atxikirik zeuden esparru berean iraunen dute.

1.3. Barne igoera honetan parte hartzeak ez du behin ere aldatuko langileek mailaz igo baino lehen zuten funtzionario, estatutupeko edo kontratupeko araubide juridikoa. Eskubide pasiboen eta osasun laguntzaren araubide berari atxikiko zaizkio.

Baldintza horretatik salbuetsita daude Estatuko Administraziotik Nafarroako Foru Komunitatera transferitutako funtzionarioak, Mufacen afiliatu eta, beraz, Estatuaren Klase Pasiboen Araubidearen menpe daudenak. Horiek, mailaz igotzean, nahitaez araubidea utziko dute eta Gizarte Segurantzaren Araubide Orokorrean afiliatuko dira.

1.4. Administrari, telefonista-ofizial edo koordinazioko operadore-ofizial izateko lanpostua lortzen duten langileak lehengo eginkizun berberetan arituko dira, baina, horietaz gainera, maila edo talde berriari dagozkionak ere esleitzen ahalko zaizkie.

2._Izangaiek bete beharreko baldintzak.

Oposizio-lehiaketa honetan onartuak izateko, izangaiek ondoren azaltzen diren baldintzak bete beharko dituzte eskabideak aurkezteko epea bukatzen den egunean eta baita izendapena egiten denean ere:

a) Nafarroako Foru Komunitateko eta haren erakunde autonomoetako langile finkoa izatea.

b) Administrari laguntzaile edo horren antzeko, telefonista edo koordinazioko operadore laguntzaile izateko lanpostu baterako izendatuak izatea eta borondatezko edo nahitaezko eszedentzian ez egotea.

c) Batxilergoko titulua edo Lanbide Heziketako Bigarren Mailako titulua edo baliokidea izatea eta administrazio publikoetan bost urteko antzinatasuna frogatzea; edo aipatu administrazioetan zortzi urteko antzinatasuna frogatzea.

3._Eskabideak.

3.1. Deialdian parte hartzeko eskabideak Nafarroako Gobernuko Lehendakaritza, Justizia eta Barne Departamentuko Erregistro Orokorrean (Karlos III.aren etorbidea, 2, atalondoa, 31002 Iruña) edo erregistro horretako beste edozein bulegotan (zerrenda 2007ko 14. Nafarroako ALDIZKARI OFIZIALean argitaratu zen, urtarrilaren 31n) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legeko 38.4 artikuluan adierazitako bideren bat erabiliz, deialdia Nafarroako ALDIZKARI OFIZIALean argitaratu eta biharamunetik hogeita hamar egun naturaleko epean.

Eskabideak deialdi honetako eranskinean argitaratutako ereduari jarraikiz aurkeztuko dira eta horietan izangaiek adierazi beharko dute eskatutako baldintza guztiak betetzen dituztela eskabideak aurkezteko epea akitzen den egunerako. Eredu hori Nafarroako Gobernuko Erregistro Orokorrean dago eskuragarri. Interneten bidez ere lortzen ahal da, www.navarra.es helbidean, bai argitaratzen deneko Aldizkari Ofizialetik abiatuta, bai Zerbitzuen Katalogoko Enplegu Publikoan dagoen deialdiaren aiputik abiatuta.

3.2. Ezgaitasun aitortua duten lehiatzaileek, ariketak egin ahal izateko denbora edo baliabideetan egokitzapenik behar badute, zilegi izanen dute eskabidean eskatzea, eta hartarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Horrekin batera, legeen arabera ezgaitasuna dutela frogatzeko organo eskudunak ematen duen agiriaren fotokopia konpultsatua ere aurkeztu beharko dute.

3.3. Eskabideari, behar bezala bete ondoren, agiri hauek erantsiko zaizkio:

a) Nafarroako Foru Komunitateko Administrazioaren kontuan 12 euro ordaindu izana frogatzen duen agiria. Kopuru horrekin espedientea irekitzeko tasa eta azterketa-eskubideak ordainduko dira.

100eko 33ko edo hortik gorako ezgaitasuna duten pertsonak tasa horretatik salbuetsiak daude, hori frogatzen badute.

Salbuetsita dagoela frogatu ezean, tasa ordaintzen ez badu, izangaia baztertu eginen da.

b) Deialdiko 2.1.c) atalean aipatzen den tituluaren kopia konpultsatua, deialdia argitaratzean zortzi urteko antzinatasun aitortua eduki ezik.

c) Izangaiek deialdiko 6.3 atalaren eta II. eranskinaren arabera alegatzen dituzten merezimendu guztiak frogatzen dituzten jatorrizko agiriak edo haien fotokopia behar bezala konpultsatuak, Administrazio Publikoetan emandako zerbitzu publikoak frogatzen dituztenenak izan ezik, horiek dei egin duen organoak epaimahaiak zuzenean emanen baitizkio.

Izangaiek merezimenduak alegatu eta egiaztatuko dituzte baremoko puntuazio eskemari jarraikiz.

4._Izangaien onarpena eta erreklamazioak.

4.1. Eskaerak aurkezteko epea bukaturik, Funtzio Publikoaren zuzendari nagusiak ebazpena emanen du izangai onartu eta baztertuen behin-behineko zerrenda onesteko, eta Nafarroako ALDIZKARI OFIZIALean argitara dadila aginduko du.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, akatsik egin badute, zuzentzeko.

4.3. Erreklamazioetarako epea bukatutakoan eta horiek ebatzita, Funtzio Publikoaren zuzendari nagusiak onartu eta baztertuen behin betiko zerrenda onesten duen ebazpena emanen du, eta Nafarroako ALDIZKARI OFIZIALean argitara dadila aginduko.

5._Epaimahaia.

5.1. Epaimahaiak kide hauek izanen ditu:

Batzordeburua: Gregorio Eguílaz Gogorza, Lehendakaritza, Justizia eta Barne Departamentuko Funtzio Publikoaren Antolamenduko Zerbitzuko zuzendaria.

Ordezkoa: Carlos Arrieta Del Valle, Lehendakaritza, Justizia eta Barne Departamentuko Gizarte Prestazioen Zerbitzuko zuzendaria.

Mahaikidea: José Luis Ruiz Ciruelos, Osasunbidea-Nafarroako Osasun Zerbitzuko Langileriaren eta Lan Harremanen zuzendariordea.

Ordezkoa: Miguel Angel Porres Azcona, Osasunbidea-Nafarroako Osasun Zerbitzuko Langileriaren Kudeaketa, Sarrera eta Barne Igoerarako Zerbitzuko burua.

Mahaikidea: Alberto Viana Górriz, sistema informatikoetako erdi mailako teknikaria, Ekonomia eta Ogasun Departamentuari atxikia.

Ordezkoa: Juan María Garaicoechea Muñoa, sistema informatikoetako erdi mailako teknikaria, Ekonomia eta Ogasun Departamentuari atxikia.

Mahaikidea: Francisco Javier Ibero Gutiérrez, sistema informatikoetako erdi mailako teknikaria, Ekonomia eta Ogasun Departamentuari atxikia.

Ordezkoa: Jesús Angel Olóriz Larrea, sistema informatikoetako erdi mailako teknikaria, Ekonomia eta Ogasun Departamentuari atxikia.

Mahaikidea: Blanca Antoñana Sáinz, goi mailako tituluduna, Nafarroako Administrazio Publikoaren Institutuari atxikia.

Ordezkoa: Ricardo Zalduendo Pitillas, Nafarroako Administrazio Publikoaren Institutuko Psikologia Ataleko burua.

Mahaikidea: José María Gracia Galilea, Hezkuntza Departamentuko Giza Baliabideen Zerbitzuko zuzendaria.

Ordezkoa: Ana Loitegui Zugasti, Hezkuntza Departamentuko Langileria Ataleko burua.

Mahaikidea: Langileen ordezkariek izendatu beharrekoa.

Ordezkoa: Langileen ordezkariek izendatu beharrekoa.

Mahaikidea: Langileen ordezkariek izendatu beharrekoa.

Ordezkoa: Langileen ordezkariek izendatu beharrekoa.

Mahaikide idazkaria: Carlos Sarasíbar Subiza, Lehendakaritza, Justizia eta Barne Departamentuko Langileriaren Hautapen eta Araubidearen atalburua.

Ordezkoa: María Teresa Pérez Rodrigo, Lehendakaritza, Justizia eta Barne Departamentuko gizarte graduatua.

Hautaprobak egiten hasi aitzin eratuko da epaimahaia.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Organo kolegiatuaren eraketak eta jardunak balio izateko, mahaiburuak eta idazkariak edo haien ordezkoek bertan egon beharko dute.

5.3. Epaimahaiko kideek ez dute parte hartuko, eta organo dei egileari horren berri emanen diote, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretakoaren batean baldin badaude.

Izangaiek, halaber, zilegi dute mahaikideak errefusatzea, egoera horietako bat gertatzen denean.

5.4. Epaimahaiak aholkulari adituen laguntza izan dezake proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta horietan bakarrik emanen diote laguntza epaimahaiari.

6._Oposizio-lehiaketaren nondik norakoak.

6.1. Oposizio-lehiaketa bi alditan eginen da, lehiaketaldia lehenbizi eta oposizioaldia gero, arau hauetan zehazten den gisara.

6.2. Oposizioa 2007ko urrian hasiko da. Izangai onartu eta baztertuen behin betiko zerrenda onesten duen ebazpen berean zehaztuko da ariketa hasteko lekua, eguna eta ordua.

6.3. Lehiaketaldia.

6.3.1. Deialdiko 3.3 arauan agindutakoaren arabera, merezimendu guztiak, Administrazio Publikoetan egindako zerbitzuenak izan ezik (organo dei-egileak epaimahaiari zuzenean igorriko baitizkio) agiri bidez alegatu eta frogatuko ditu izangai bakoitzak oposizio-lehiaketa honetan parte hartzeko eskabidea aurkeztean.

6.3.2. Alegatu eta egiaztaturiko merezimenduak deialdi honen II. eranskinean azaldu baremoari jarraikiz kalifikatu eta puntuatuko ditu epaimahaiak.

6.3.3. Lehiaketaldian gehienez ere 43,30 puntu lortzen ahalko dira, honelaxe banaturik:

_Titulu akademikoak: gehienez 6 puntu.

_Emandako zerbitzuak: gehienez 25 puntu.

_Prestakuntza jarduerak: gehienez 5 puntu.

_Hizkuntzak: gehienez 7,40 puntu.

6.3.4. Epaimahaiak ezin izanen du inolaz ere kontuan hartu alegatu gabeko eta agirien bidez frogatu gabeko merezimendurik, ezta atal bakoitzerako baremoan aipatzen den gehieneko puntuazioa baino altuagorik eman ere.

6.3.5. Epaimahaiak lehiakideek alegatu eta frogatutako merezimenduen gaineko azalpen eta datuak eskatzen ahalko ditu noiznahi.

6.3.6. Merezimenduen kalifikazioa bukatu ondoren, epaimahaiak argitara emanen du Nafarroako Gobernuko iragarki oholean lehiatzaile bakoitzak lortutako puntuazioa, eta hamar eguneko epea ezarriko du erreklamazioetarako, merezimenduen balorazioaren gainean eskubidekotzat jotzen duten guztia alega dezaten.

Erreklamazioak aurkezteko epe hori bukatu eta epaimahaiak horiek ebatzi ondoren, prozedurari berari jarraikiz argitaratutako da izangaiek lehiaketaldian lortutako puntuazioa, gero oposizioaldian lortzen denari gehituko zaiona, horrela oposizio-lehiaketan izandako puntuazio osoa aterako baita.

6.4. Oposizioaldia.

6.4.1. Oposizioaldian ariketa bakar bat izanen da. 90 galdera erantzun beharko dira. Galdera bakoitzak erantzun batzuk izanen ditu, baina bat bakarrik izanen da zuzena.

Galderak deialdiaren III. eta IV. eranskinetako arloez izanen dira eta gaitasun administratiboez ere bai, honelaxe banaturik: 30 informatikaz, 40 kudeaketa administratiboaz eta zuzenbideaz eta 20 gaitasun administratiboez.

Epaimahaiak ariketa hori egiteko zenbat denbora dagoen adieraziko du haren hasieran.

6.4.2. Oposizioko ariketa ez da baztergarria izanen eta gehienez ere 60 puntu ematen ahalko zaizkio.

6.4.3. Epaimahaiak Nafarroako Gobernuko iragarki oholean argitaratuko ditu ariketaren kalifikazioak.

6.4.4. Ariketa bakoitzerako deialdi bakarra eginen da. Izangaiek aldean izan beharko dute Nortasun Agiri Nazionala, gidabaimena edo epaimahaiaren iritziz identifikaziorako balio duen beste agiriren bat. Azterketara agertzen ez direnak edo arestian aipatutako agirietako baten bidez beren nortasuna egiaztatzen ez dutenak oposiziotik baztertuko dira.

6.4.5. Hautaproba egiteko, eskaera egin duten ezgaitasun aitortua dutenendako posible eta bidezkoak diren denbora eta baliabide egokitzapenak eginen dira, eskabidean azaldutakoaren arabera.

7._Probak gainditzen dituztenen zerrenda eta izendapen proposamena.

7.1. Oposizioaldiko ariketa kalifikatu ondoren, epaimahaiak Nafarroako Gobernuko iragarki oholean paratuko ditu deialdiko 11. atalean aipatzen diren hiru zerrendak, guztira lorturiko puntuen hurrenkerari jarraituz, bakoitzak lehiaketaldian eta oposizioaldian lorturiko puntuak baturik, eta Funtzio Publikoaren zuzendari nagusiari igorriko dio puntu gehien lortzen dituzen izangaiak izendatzeko proposamena, betiere ere deialdiko 130 lanpostuetan sartzen badira, deialdiko 1.1 atalean ezarririko banaketa kontuan hartuz.

Berdinketarik gertatuz gero, lehiaketaldiaren barruan, Administrazio Publikoetan emandako zerbitzuei buruzko atalean puntu gehien lortu dituzten izangaien alde joko da. Berdinketak badirau, oposizioaldian puntu gehien lortu dituen izangaiaren alde joko da.

8._Izendapena eta jabetza hartzea.

8.1. Funtzio Publikoaren zuzendari nagusiak izendapen proposamenean ageri diren izangaiak izendatuko ditu administrari, telefonista-ofizial eta koordinazioko operadore-ofizialen lanpostuetan aritzeko eta, bidezko bada, egin beharreko kontratazioak erabakiko ditu.

8.2. Izendapena Nafarroako ALDIZKARI OFIZIALean argitaratuko da eta biharamunean sortuko ditu ondorio ekonomiko eta administratiboak. Ondorio guztietarako, ulertuko da egun horretantxe jabetu zirela nor bere lanpostuaz, espresuki inolako ekitaldirik egin beharrik gabe.

9._Aurkezturiko agiriak jasotzea.

9.1. Hautagaiek, baldin eta erreklamazio edo errekurtsorik jartzen ez bada, aurkeztu dituzten agiriak berreskuratu ahal izanen dituzte, halaxe eskatu ondotik. Agiriak eramateko eskaera hiru hilabeteko epean aurkezten ahalko da, izendapenerako ebazpena Nafarroako ALDIZKARI OFIZIALean argitaratu eta bertze hiru hilabeteren buruan.

9.2. Aurreko atalean ezarritako epea agiriak berreskuratu gabe bukatzen bada, ulertuko da izangaiak uko egin diola agiriak eskuratzeari; horretarako eskubidea galduko du eta agiriak suntsituko dira.

9.3. Erreklamazio edo errekurtsoren bat aurkeztu baldin bada, agiri horiek gorde eginen dira, ikuskatu eta aztertzeko. Agiri horiek berreskuratzen ahal dira erreklamazioaren edo errekurtsoaren tramitazioak horretarako aukera ematen duenean.

10._Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da Funtzio Publikoaren zuzendari nagusiari zuzenduta, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdi honen eta bere arauen kontra eta arauak aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barne kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik kontatuta.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat, eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2007ko apirilaren 16an._Funtzio Publikoaren zuzendari nagusia, Alberto Andérez González.

I. ERANSKINA

Eskabide eredua

Eskaria, Nafarroako Foru Komunitatearen eta haren erakunde autonomoen zerbitzuko administrari, telefonista-ofizial eta koordinazioko operadore-ofizial izateko 130 lanpostu huts oposizio-lehiaketaren bidezko barne igoera murriztuaren bitartez betetzeko deialdian, .....(e)ko ..... Nafarroako ALDIZKARI OFIZIALean argitaratu zen hartan, parte hartzeko.

1 Norberaren datuak:

Izen-deiturak

NAN zenbakia.

Gaur egungo helbidea

Posta kodea

Herria

1. telefonoa: .............. 2. telefonoa: .............. Lantokiko telefonoa

2 Datu administratiboak:

a) (X batez adierazi bidezko dena).

f Nafarroako Foru Komunitatearen Administrazioko funtzionarioa.

f Nafarroako Foru Komunitatearen Administrazioko estatupeko langilea.

f Nafarroako Foru Komunitatearen Administrazioko lan kontatudun finkoa.

b) Gaur egungo lanpostua:

c) Administrari laguntzaile, telefonista edo koordinazioko operadore laguntzaile lanpostuan duen egoera administratiboa (x batez adierazi bidezko dena)

f Jardunean (jarduneko zerbitzuarekin parekaturiko egoera bada, zehaztu).

f Zerbitzu berezietan

f Eszedentzia berezian haurrak zaintzeko.

d) Gaur egungo destinoa edo administrari laguntzaile, telefonista edo koordinazioko operadore laguntzaileen lanpostuko azkena.

Departamentua

Zerbitzua

Atala

Bulegoa

Erakunde autonomoa

Unitatea

Herria

3 Izenpetzen duenak, bere erantzukizunpean, adierazten du deialdi honetan parte hartzeko eskatzen diren betebehar guztiak betetzen dituela, eskabideak aurkezteko epea bukatzen den egunean.

4 Bide honetatik hartzen du parte barne igoera murriztuan (bidezko dena adierazi):

f Titulazioa eta bost urteko antzinatasun aitortua.

f Zortzi urteko antzinatasun aitortua.

5 f Ezgaitasuna duela, zehazten diren egokitzapenak eskatzen dituela, adierazten diren arrazoiengatik (beste orri batean arrazoiak eta eskatzen diren egokitzapenak zehaztuko dira) eta legeen arabera ezgaitasuna dutela frogatzeko organo eskudunak ematen duen agiria aurkezten duela.

6 Eskabidearekin batera onartua izateko deialdiko 3.3 arauan eskatzen diren agiriak eta alegatu eta lehiaketaldian baloratzen ahal diren merezimendu guztien frogak aurkezten dituela.

Horrenbestez,

Eskatzen du Nafarroako Foru Komunitatearen eta haren erakunde autonomoen zerbitzuko administrari, telefonista-ofizial edo koordinazioko operadore-ofizial izateko 130 lanpostu huts oposizio-lehiaketaren bidezko barne igoera murriztuaren bitartez betetzeko deialdian onartua izatea.

Iruñean, 2007ko .........................aren .........(e)an.

Sinadura

FUNTZIO PUBLIKOAREN ZUZENDARI NAGUSIA.

II. ERANSKINA

Merezimenduak baloratzeko baremoa

1._Titulu akademikoak:

a) Goi mailako ikasketa titulazio ofizialak: 3 puntu, titulu bakoitzeko.

b) Erdi mailako ikasketa titulazio ofizialak: 2 puntu, titulu bakoitzeko.

c) Aurrekoak ez beste ikasketa titulazio ofizialak, epaimahaiak baloratu beharrekoak: gehienez 3 puntu.

Merezimendu gisa alegatu eta baremoaren barrenean balorazio zehatza duten titulu akademikoak lortzeko beharrezkoak diren maila apalagoko tituluak ez dira baloratuko. Halaber, 2.1.e) arauarekin bat, deialdian parte hartzeko betebehartako balio duen titulua ere ezin baloratuko da.

Lehenbiziko atal honi dagokion puntuazioa gehienez ere 6 puntu izanen da.

2. Administrazio Publikoetan egindako zerbitzuak.

Atal honetan baloratuko dira izangai bakoitzak deialdia argitaratzen den egunean, antzinatasuna zehazteko, zerbitzu egiten aitortuak dituen urteak. Urte bakoitzeko puntu bat.

Zerbitzu urteen kopurua ez bada osoko zenbaki bat, izangaiei egokituko zaie egin dituzten zerbitzu egunei proportzioan dagokien puntuazioa.

Bigarren atal honi dagokion puntuazioa gehienez ere 25 puntu izanen da.

3. Prestakuntza jarduerak:

Egin beharreko lanpostuarekin loturiko prestakuntza ekintzak, erakunde edo zentro publikoek eta unibertsitateek antolatuak: 0,10 puntu, kreditu akademiko edo horren baliokide bakoitzeko (10 ikastordu), eta gehienez ere 5 puntu.

Oharrak:

1. Baloratu beharreko ikastaroetan, irakastorduen zatikiak hainbanatuko dira.

2. Irakastorduen kopurua agertzen ez duten ziurtagiriei kreditu bateko balorazioa emanen zaie.

3. Ikasturte bateko iraupena agertzen duten ziurtagiriei 12 kredituko balorazioa emanen zaie.

4. Erakunde antolatzaileari buruzko betebeharrak betetzen ez badituzte ere, Administrazioak agindurik edo oniritzirik eginak diren prestakuntza ekintzetan parte hartzea puntuazio berarekin baloratuko da. Horien artean, espresuki, sindikatuek Administrazio Publikoetako Etengabeko Prestakuntzarako Itunen barruan antolatuak sartuko dira.

5. Titulu akademiko bat eskuratzeko ikasketak, ez dira atal honetan baloratuko.

4. Hizkuntzak jakitea.

_Frantsesez, ingelesez edo alemanez jakitea: gehienez 1,80 puntu hizkuntza bakoitzeko.

_Euskaraz jakitea: 2 puntu gehienez ere, lanpostua euskal eremuan duten izangaiak izanez gero, euskaraz jakitea merezimendu gisa baloratu behar denean; eta 1,90 puntu gehienez ere, lanpostua eremu mistoa duten izangaiak izanez gero, euskaraz jakitea merezimendu gisa baloratu behar denean.

Ondorio horietarako, bakarrik Hizkuntza Eskola Ofizial batek luzaturiko Gaitasun Agiria edo ofizialki baliokidea den titulua edukitzea baloratuko da, aurreko ataletan adierazten den gehieneko puntuazioa emanen baita.

Titulurik eduki ezik, Hizkuntza Eskola Ofizialean gaindituriko maila bakoitzagatik gehieneko puntuazioaren bosten bat emanen da. Euskararen kasuan, Nafarroako Gobernuak antolatutako ikastaroetan gainditutako urrats bakoitzeko 1/12 emanen da.

Izangai bakoitzak lau hizkuntza horietan zer dakien baloratzeko, Nafarroako Administrazio Publikoaren Institutuak antolatutako azterketak egiten ahal ditu; bortz zailtasun maila izanen dira, eta hizkuntza bakoitzari ematen ahal zaion gehieneko balorazioaren bortzen bat emanen zaio maila bakoitzari.

III. ERANSKINA

Informatika

1._Funtsezko kontzeptuak oinarrizko informatikaz: hardwarea, softwarea eta sistema eragileak. Funtsezko kontzeptuak Internetez eta posta elektronikoaz.

2._Funtsezko kontzeptuak Windows XPz. Mahaigaina eta bere elementuak; programen administratzailea; Windows esploradorea; kontrol-panela, inprimagailuak; "hasi" botoia; "hasi" karpeta; tresna-barra; "exekutatu" komandoa; laguntza; sarean lan egitea; erabiltzaile kontuak.

3._Testu-prozesadoreak: oinarrizko kontzeptuak. Microsoft Word XP: lan esparrua; idatzi eta idaztea; testu formatua; orrialdea diseinatu eta konposatzea; estiloak; xantiloiak; tresnak; taulak; artxiboak administratzea; korrespondentzia konbinatzea; eremuekin lan egitea; inprimatzea; makroak (oinarrizko maila).

4._Kalkulu orriak: oinarrizko kontzeptuak. Microsoft Excel XP: oinarrizko kontzeptuak; laneko liburuak; orrialdeak; gelaxkak; gelaxkak eta komandoak hautatzea; datuak sartzea; formulak eta loturak sortzea; eginkizunak erabiltzea; kalkuluko orrialde bat editatzea; formatuak; grafikoak; inprimatzea; makroak (oinarrizko maila).

5._Datu baseak: oinarrizko kontzeptuak. Microsoft Access XP: oinarriak; taulak; kontsultak; inprimakiak; txostenak; inprimakiak; makroak (oinarrizko maila).

IV. ERANSKINA

Kudeaketa Administratiboa eta Zuzenbidea

1. gaia._Espainiako 1978ko Konstituzioa. Oinarrizko eskubideak: Bermeak. Konstituzio Auzitegia. Erregearen eginkizunak Konstituzioaren arabera. Gorte Nagusiak. Estatuaren antolakuntza lurraldeen arabera.

2. gaia._Nafarroako Foru Erakundeak: Nafarroako Parlamentua edo Gorteak. Parlamentuak Gobernua kontrolatzeko duen eginkizuna. Nafarroako Comptos Ganbera: izaera eta eginkizunak. Nafarroako Kontseilua. Nafarroako Foru Komunitateko Arartekoa.

3. gaia._Nafarroako gobernuari eta haren lehendakariari buruzko abenduaren 3ko 14/2004 Foru Legea: egitura eta edukiaren azterketa.

4. gaia_Nafarroako Foru Komunitateko Administrazioari buruzko abenduaren 3ko 15/2004 Foru Legea: egitura eta edukiaren azterketa.

5. gaia._Nafarroako Foru Komunitateko Administrazioaren zerbitzuan dauden langileak. Funtzionarioak, estatutupeko langileak eta lan-kontratudunak: haien araubide juridikoaren gaineko oinarrizko ideiak.

6. gaia._Nafarroako Ogasun Publikoari buruzko Foru Legea: Xedapen orokorrak. Nafarroako aurrekontu orokorrak: edukia, prestatu, onetsi eta luzatzea; kredituak eta haien aldaketak; aurrekontuak exekutatu eta likidatzea.

7. gaia._Nafarroako Administrazio Publikoen kontratuak. Xedapen orokorrak. Aitzineko jarduketak. Esleitzea eta formalizatzea. Esleitzeko bideak. Kontratuak bete, aldatu, bertan behera utzi eta iraungitzea.

8. gaia._Administrazio Publikoen jarduera: arau orokorrak. Baldintzak eta epeak. Egintza administratiboen betebeharrak. Egintza administratiboen eraginkortasuna: Jakinarazpenak eta argitalpenak.

9. gaia._Administrazio prozedurei buruzko xedapen orokorrak: prozeduraren abiaraztea, antolamendua, instrukzioa, amaiera eta betearazpena.

10. gaia._Administrazio errekurtsoak: Printzipio orokorrak. Gora jotzeko errekurtsoa. Berraztertzeko errekurtsoa. Berraztertzeko errekurtsoa. Administrazioarekiko auzi-errekurtsoa.

Oharra: Izangaiek Nafarroako Administrazio Publikoetan aplikatzekoa den eta deialdi hau Nafarroako ALDIZKARI OFIZIALean argitaratzean indarra duen Espainiako eta Foru Komunitateko arautegiarekin bat garatu beharko dute gaitegi hau

Iragarkiaren kodea: F0706660