I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
762/2007 EBAZPENA, martxoaren 14koa, Industria eta Merkataritza zuzendari nagusiak emana, teknologoak Nafarroako zentro teknologikoetan, unibertsitateetan eta enpresetan prestatzeko beken xede izanen diren I+G+b proiektuak hautatzeko deialdia onesten duena.
Nafarroan kokatuta dauden enpresen lehia-gaitasuna bultzatzeko laguntza esparrua ezartzen duen maiatzaren 23ko 208/1991 Foru Dekretuak ezarritakoarekin bat, Industria eta Teknologia, Merkataritza eta Lan Departamentuak 2007. eta 2008. urteetan teknologoak prestatzeko beka deialdi bat onetsi nahi du.
Horregatik, Berriztapen eta Teknologia Zerbitzuak deialdi bat egitea proposatu du teknologoak Nafarroako zentro teknologikoetan, unibertsitateetan eta enpresetan prestatzeko beken xede izanen diren I+G+b proiektuak hautatzeko.
Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz.
EBATZI DUT:
1. Teknologoak Nafarroako zentro teknologikoetan, unibertsitateetan eta enpresetan prestatzeko beken xede izanen diren I+G+b proiektuak hautatzeko deialdia onestea.
2. Deialdiko oinarriak onestea. Oinarri horiek ebazpen honen eranskinean ageri dira.
3. Ebazpen hau Nafarroako ALDIZKARI OFIZIALean argitaratzea, orok jakin dezan.
Ebazpen honen aurka gora jotzeko errekurtsoa jar daiteke, Industria eta Teknologia, Merkataritza eta Lan kontseilariari zuzendua, argitaratu eta biharamunetik hilabeteko epean.
Iruñean, 2007ko martxoaren 14an._Industria eta Merkataritza zuzendari nagusia, Enrique Díaz Moreno.
ERANSKINA
Teknologoak Nafarroako zentro teknologikoetan, unibertsitateetan eta enpresetan prestatzeko beken xede izanen diren I+G+b proiektuak hautatzeko deialdiko oinarriak
1. oinarria. Xedea.
Deialdi honen xedea da teknologoak Nafarroako zentro teknologikoetan, unibertsitateetan eta enpresetan prestatzeko beken xede izanen diren I+G+b proiektuak hautatzeko baldintzak ezartzea.
2. oinarria. Iraupena.
Bekadunak gehienez hiru urtez arituko dira hautatzen den I+G+b proiektu bakoitzean, bekadun bakoitzak bertan ematen duen denbora gorabehera.
3. oinarria. Entitate eskatzaileen betebeharrak.
Nafarroan dauden zentro teknologikoek, unibertsitateek eta enpresek egin dezakete teknologoak prestatzeko beken xede izanen diren I+G+b proiektuak hautatzeko eskaera.
4. oinarria. Eskabideen aurkezpena.
Eskabideak aurkezteko epea deialdi hau Nafarroako ALDIZKARI OFIZIALean argitaratu eta biharamunean hasi eta 2008ko abenduaren 31n bukatuko da, hori barne.
Eskabidearen eredua Berriztapen eta Teknologia Zerbitzuan (Tomás Caballero Parkea, 1, Iruña) eta Nafarroako Gobernuko argibide bulegoetan (Karlos III.aren etorbidea, 2, Iruña) jaso daiteke, edo Internet sarean: http://www.cfnavarra.es/industria (Berriztapen eta Teknologia), http://www.plantecnologico.com eta bekak kudeatzeko entitate laguntzaileen web-orrietan.
Eskabideak Industria eta Teknologia, Merkataritza eta Lan Departamentuko erregistroan aurkeztuko dira (Tomás Caballero parkea, 1, Iruña), edo Herri Administrazioen Araubide Juridikoari eta Administrazio Prozedura Erkideari buruzko Legearen 38.4 artikuluan adierazitako lekuetako batean.
Eskabidea posta bulego batean aurkezten bada, gutunazal ireki batean egin beharko da, lehenengo orriko goiko aldean bulegoaren izena, eguna, tokia eta ordua (minutu eta guzti) adierazi ahal izateko. Datu horiek guztiak gordekinean ere azaldu beharko dira.
5. oinarria. Eskaerak ebaluatzeko irizpideak.
Aurkezten diren eskaerak Berriztapen eta Teknologia Zerbitzuak baloratuko ditu, irizpide hauen arabera:
Eskatzailea zentro teknologiko edo unibertsitate bat bada:
_Entitate eskatzailearen izaera.
_Proposamenaren kalitatea.
_Ikerketa taldeari onartutako bekadun kopurua.
_Proiektuaren alderdi berritzailea.
Eskatzailea enpresa bat baldin bada:
_Enpresaren tamaina.
_Proposamenaren kalitatea.
_Enpresari onartutako bekadun kopurua.
_Proiektuaren alderdi berritzailea.
Bekadunen bat esleitua izanen duten I+G+b proiektuak hautatu ondoren, Berriztapen eta Teknologia Zerbitzuak bekak kudeatzeko entitate laguntzaileei dokumentazioa igorriko die, bekadunak hautatzeko prozesua egiten has daitezen, entitate bakoitzak eskatzen duen profilaren arabera.
Kontzesio horren berri Industria eta Teknologia, Merkataritza eta Lan Departamentuaren web-orrian jakinaraziko du (Berriztapena eta Teknologia/teknologoen prestakuntza), eskatzaileek uneoro jakin dezaten eskuragai dauden bekak.
6. oinarria. Entitateen betebeharrak.
Hautatzen diren I+G+b proiektuen entitate arduradunek betebehar hauek izanen dituzte:
1. Prestakuntza bekaren onuraduna lantokian onartzea.
2. Bekadunaren ordutegia finkatzea, zentroaren funtzionamenduaren araberakoa baina, aldi berean, bekadunak bere prestakuntza akademikoa segitzeko egokia.
3. "Ebaluazio txostena" izeneko dokumentua betetzea. Horren eredua beka kudeatzen duen entitateari igorriko zaio bekaldia bukatutakoan, praktikak oro har nola joan diren baloratu ahal izateko.
4. Entitate kudeatzaileari igortzea bekadunek hilean egindako jardueren gaineko justifikazioa.
5. Proiektua zuzen gauzatzen dela bermatzeko egiaztatze-lanak erraztea. Horretarako, egiten diren lanei buruzko datu, agiri eta txostenak aurkeztu beharko ditu.
6. Prestakuntza bekaren xede den proiektuari kalte larria eragin diezaiokeen edozein gorabeheraren berri ematea departamentuari.
7. oinarria. Prestakuntza ekintzaren ondoriozko kalteak.
Hautatzen diren proiektuen ardura duten zentro teknologiko, unibertsitate edo enpresak izanen dira bekadunak bere prestakuntza jarduera egiten duen bitartean sor ditzakeen kalte guztien erantzuleak.
8. oinarria. Oinarrien aurkako errekurtsoa.
Oinarri hauen aurka gora jotzeko errekurtsoa jar daiteke, Industria eta Teknologia, Merkataritza eta Lan kontseilariari zuzendua, argitaratu eta biharamunetik hilabeteko epean.
Iragarkiaren kodea: F0704755
