36. ALDIZKARIA - 2007ko martxoaren 23a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

420/2007 EBAZPENA, otsailaren 23koa, Nafarroako Enplegu Zerbitzuko zuzendari kudeatzaileak emana. Honen bidez onesten da Nafarroako Foru Komunitatean lanean ari diren langileen prestakuntzarako sektorearteko programa-kontratuak izenpetzeko dirulaguntza publikoen deialdia, dirulaguntza horiek emateko arauak ezartzen dituen uztailaren 30eko TAS/2783/2004 Agindua aplikatuz.

Etengabeko lanbide prestakuntzaren azpisistema arautzen duen abuztuaren 1eko 1046/2003 Errege Dekretuaren helburua da etengabeko prestakuntza, haren funtzionamenduaren araubidea, finantzaketa eta azpisistemaren antolaketaren eta parte-hartzearen egitura arautzea. Dekretu horretan ezarritakoa oinarritzat harturik, uztailaren 30eko TAS/2783/2004 Agindua eman zen, programa-kontratuetarako dirulaguntza publikoak arautzeko.

Aipatu errege dekretuan aurreikusitako etengabeko prestakuntzarako ekimenen artean langileen prestakuntzarako programa-kontratuak daude. Programa-kontratu hauek izenpetuz finantzatzen diren etengabeko prestakuntza planen xedea da lanean ari diren langileei lan bizitzan zehar beharko duten kualifikazioa ematea, enpresek unean-unean dituzten premietarako egokiak diren ezagutzak eta praktikak beregana ditzaten, eta ahalbidetzea bateragarriak izan daitezen lehiakortasun handiagoa izatea eta lanean ari den langilearen lanbide trebetasuna eta banakako sustapena, zerbitzutan ari diren enpresak bitartekari izan beharrik gabe.

Etengabeko prestakuntza lehentasunezko balio estrategikoa da aldaketa teknologiko, ekonomiko eta sozialeko prozesuetan eta, beraz, enpleguan eta gizarte kohesioan egonkortasuna lortzeko funtsezko lanabesa.

Lan eta Gizarte Aferen Ministerioak 2004ko uztailaren 30ean emandako Aginduaren bitartez, lanean ari diren langileen prestakuntzarako programa-kontratuak izenpetzeko dirulaguntza publikoen deialdiaren arauak finkatu ziren. Haren 4. atalean ezarritakoari jarraikiz, bidezkoa da Nafarroako Foru Komunitatean deialdia egitea sektorearteko programa-kontratuetarako etengabeko prestakuntzarako planak egiteko dirulaguntzak emateko.

Plan hauetan ageri diren prestakuntzaren arloko ekintzak Europako Gizarte Funtsaren finantzazioa ere badute. Zehazki, enpresa txiki eta ertainetako langileei ematen zaien prestakuntzaren finantzazioan parte hartzen da. Deialdi honen oinarria Europako Batzordearen 2003/361/EB Gomendioa da, enpresa txiki eta ertainen definizioari buruzkoa, arlo horretan malgutasun eta kudeaketarako erraztasun handiagoa eskaintzen baititu.

Nafarroako Enplegu Zerbitzuko Zuzendaritza Kontseiluak aldeko txostena eman ondoren eta Nafarroako Enplegu Zerbitzuaren estatutuek, apirilaren 29ko 148/1998 Foru Dekretuaren bidez onetsitakoek emandako eskurantzak erabiliz,

EBATZI DUT:

1. Nafarroako Foru Komunitatean etengabeko prestakuntza planak sektorearteko programa-kontratuak izenpetuz finantzatzeko dirulaguntza publikoen deialdia onestea.

2. Deialdia zuzenduko duten arauak onestea. Ebazpen honi atxikirik daude.

3. 5.142.000 euroko gastua baimentzea, Nafarroako Enplegu Zerbitzuaren 2007ko gastuen aurrekontuko "Prestakuntzarako programa-kontratuak, Europako Gizarte Funtsa" izeneko 882002-84200- 4819-242104 kontusailaren kargura, ebazpen honek dakartzan konpromisoei aurre egiteko.

Kopuru horretatik Europako Gizarte Funtsak 3.805.080 euro finantzatuko ditu.

4. Ebazpen hau eta eranskinak Nafarroako Enplegu Zerbitzuko Etengabeko Prestakuntzaren Atalera eta Kontabilitate Zentrora igortzea.

5. Ebazpen honek ez du administrazio bidea agortzen, eta bere aurka gora jotzeko errekurtsoa jar daiteke, Industria eta Teknologia, Merkataritza eta Lan kontseilariari igorria, argitaratu eta biharamunetik hilabeteko epean.

6. Ebazpen hau eta eranskinak Nafarroako ALDIZKARI OFIZIALean argitaratzea.

Iruñean, 2007ko otsailaren 23an._Nafarroako Enplegu Zerbitzuko zuzendari kudeatzailea, Susana Labiano Bastero.

I. ERANSKINA

Europako Gizarte Funtsarekin batera finantzatuta erregioan sektorearteko programa-kontratuak izenpetuz etengabeko prestakuntza planak finantzatzeko deialdi publikoaren arauak

Lehen araua._Xedea eta helburua.

Bat._Deialdi honen xedea da Nafarroako Foru Komunitatean etengabeko prestakuntza planak sektorearteko programa-kontratuak izenpetuz finantzatzeko dirulaguntzak ematea, uztailaren 30eko TAS/2783/2004 Aginduan ezarritako arauekin bat.

Bi._Etengabeko prestakuntzako planek, deialdi honekin finantzatzen direnek, xedea dute lanean ari diren langileen trebetasunak eta kualifikazioak hobetzea eta lanbide eguneratze eta espezializazioa bultzatzea, edozein dela ere langilearen jardueraren sektorea edo arloa.

Hiru._Nafarroako Foru Komunitatean, sektorearteko prestakuntza planak egiteko programa-kontratuak izenpetu ahalko dira langileei prestakuntza emateko jarduera ekonomikoaren hainbat sektoretako trebetasun zeharkakoetan eta horizontaletan.

Lau._Izenpetu beharreko programa-kontratuak honakoari lotu beharko zaizkio: langileak prestatzeko programa-kontratuak egiteko dirulaguntzak emateko arauak ezartzen dituen uztailaren 30eko TAS/2783/2004 Aginduko I kapituluko hirugarren atalean ezarritakoari, etengabeko lanbide prestakuntzaren azpisistema arautzen duen abuztuaren 1eko 1046/2003 Errege Dekretua garatuz.

Programa-kontratu bakoitzean zehaztuko dira Europako Gizarte Funtsak finantzaturiko dirulaguntzaren zatia eta prestatu beharreko langileen artetik lehentasunezko taldeetakoa izan behar den gutxieneko portzentajea.

Bost._Programa-kontratuei atxikitako prestakuntza planak egiteko epea 2007ko urtarrilaren 1ean hasi eta 2008ko apirilaren 30ean bukatuko da.

Sei._Sektorearteko programa-kontratuak izenpetu eta dagozkien dirulaguntzak emateko lehiakortasun, publizitate eta objektibotasunaren printzipioei jarraikiko zaie.

Bigarren araua._Dirulaguntzen zenbatekoa eta Europako Gizarte Funtsarekin batera finantzatzea.

Eman beharreko dirulaguntzak gehieneko zenbateko bat izanen dute programa-kontratu bakoitzerako, uztailaren 30eko TAS/2783/2004 Aginduan ezarritako ekonomia moduluekin bat, dirulaguntza emateko eta ordaintzeko ondorioetarako.

Era berean, programa-kontratuak izenpetzeko eman beharreko dirulaguntza zehazteko, hauexek hartuko dira kontuan: dagoen aurrekontua, deialdi honetako zazpigarren arauan ezarritako irizpideak aplikatuz plan bakoitzak erdietsitako balorazioa eta Europako Gizarte Funtsarekin batera finantzaturiko kopurua.

Hirugarren araua._Entitate onuradunak.

Bat._Arau hauetan ezarritako dirulaguntzak eskatzen ahalko dituzte ordezkaritza handiena duten sektorearteko enpresaburuen erakundeek eta sindikatuek.

Bi._Dirulaguntzei buruzko azaroaren 17ko 38/2003 Legeko 11. artikuluko 2. idatz-zatian ezarritakoarekin bat, dirulaguntza-ematearen arauan dauden programa eta jarduerak _oso-osorik zein zati batean_ burutzeko konpromisua hartzen duten onuradunaren kideek, era berean onuraduntzat hartuko dira.

Hiru._Ezin izanen dira onuraduntzat hartu Dirulaguntzei buruzko azaroaren 17ko 38/2003 Legeko 13. artikuluko 2. eta 3. idatz-zatietan ezarritako inguruabarretako batean diren pertsonak zein entitateak.

Dirulaguntzaren eskaerarekin batera erantzukizuneko adierazpena aurkeztuz frogatuko da inguruabar horietako batean ez izatea .

Laugarren araua._Programa-kontratuek garaturiko prestakuntza jarduerak onuradunak diren langileak, lehentasuna duten elkarteak, prestakuntzaren eskaera, iraupena, eta ziurtatzea.

Bat._Langileak prestatzeko programa-kontratuak egiteko dirulaguntzak emateko arauak ezartzen dituen uztailaren 30eko TAS/2783/2004 Aginduko I kapituluko seigarren idatz-zatian ezarritakoarekin bat, etengabeko lanbide prestakuntzaren azpisistema arautzen duen abuztuaren 1eko 1046/2003 Errege Dekretua eta errege dekretu horren 3.2 artikulua garatuz, programa horietan parte hartzen ahalko dute honako langileek:

a) Enpresa pribatuetan edo enpresa entitate publikoetan zerbitzua ematen duten eta Gizarte Segurantzan lanbide prestakuntza kotizatzen duten soldatapeko langileak.

b) Ondoko egoeretako batean dauden langileak:

_Aldizkako langile finkoak lanik gabeko aldietan.

_Prestakuntza aldian langabezira pasatzen diren langileak.

_Baimenduriko espedienteagatik langabezi aldian enplegu erregulaziora pasatzen diren langileak.

c) Nekazarien Araubide Berezian, Autonomoen Araubide Berezian, Itsasoko Araubide Berezian eta Gizarte Segurantzako beste batzuetan diren langileak, lanbide prestakuntzagatik kotizatzen ez dutenak.

d) Kooperatiba, lan sozietate eta ekonomia sozialaren bestelako enpresa eta entitateetako bazkide-langileak edo laneko bazkideak.

Administrazio publikoetako langileen artetik, plan bakoitzean parte hartzen dutenen %10ek soilik parte hartzen ahalko dute sektorearteko planetan.

Bi._Europako Batzordeak programak onesteko harturiko erabakiekin bat, etengabeko prestakuntza jasotzeko lehentasuna duten kolektibotzat hartuko dira honakoak:

_Enpresa txiki eta ertainetako langileak (bereziki 50 langile baino gutxiagokoak).

_Emakumeak.

_Ezintasunak dituzten pertsonak.

_45 urtetik gorakoak eta kualifikazio gabeko langileak.

Enpresa txiki eta ertainak dira 250 pertsona baino gutxiago dituztenak, urteko bolumena 50 milioi eurokoa baino handiagoa ez dutenak edo urteko balantze orokorra 43 milioi eurotik gorakoa ez dutenak, eta, gainera, independentzia irizpidea betetzen dutenak, mikroenpresen, enpresa txikien eta enpresa ertainen definizioari buruz Batzordeak 2003ko maiatzaren 6an emandako Gomendioan ezarritakoaren arabera edo Europar Batasunak unean ematen duen definizioaren arabera.

Enpresa independientetzat hartzen da baldin eta haren kapitalaren edo boto eskubideen %25 edo gehiago ETE ez den beste enpresa batena edo batzuena ez bada.

Hiru._Arau hauetan aipatu langileek prestakunta planetan eskaintzen diren prestakuntza jardueretan parte hartzen ahalko dute, Kontratu-programa duten entitateek emandako eskabidea erabiliz, II. eranskinean ezarritako edukiak bilduko dituena.

Parte hartzeko eskabideak dirulaguntzak jasotzen dituzten entitateek zainduko dituzte eta kontrolerako organoen eskura egonen dira beti.

Lau._Langileak aukeratzeko arduraduna entitate onuraduna edo/eta prestakuntza ekintzak ematen dituena izanen da, prestakuntza planaren lehentasunei eta objektibotasunaren eta berdintasunaren irizpideei jarraikiz. Halaber, hautapen hori egiteko kontuan hartuko dira Europako Gizarte Funtsak kofinantzatzen dituen jardueretan ezarritako lehentasunezko kolektiboak eta neurri aktiboak, uztailaren 30eko TAS/2783/2004 Aginduaren zazpigarren atalean ezarritakoari jarraikiz.

Bost._Langile berak ezin izanen du prestakuntza plan bereko 270 prestakuntza ordu baino gehiago jaso, aurrekontu ekitaldi bakoitzean, uztailaren 30eko TAS/2783/2004 Aginduaren zazpigarren atalean ezarritakoari jarraikiz, ez bada salbuespeneko muga duen ekintza bakarrean parte hartzen duela. Era berean, ezin izanen du bitan edo gehiagotan parte hartu prestakuntza ekintza berean.

Sei._Entitate onuradunak parte-hartzaile bakoitzari, prestakuntza bukatu badu, prestakuntza ekintza egin izana egiaztatzen duen diploma bat emanen dio, gutxienez ere ondoko hauek biltzen dituena: ekintzaren izena, zein zentrok eman duen, prestakuntza edukiak, zein egunetan egin den eta jaso diren prestakuntza orduak eta kasuan-kasuan zehaztuko da ikastaroa presentziala ala urrutikoa izan den.

Aurreko lerroaldean aipatu egiaztatzeko diplomek gutxienez Nafarroako Enplegu Zerbitzuaren logotipoa eta Europako Gizarte Funtsaren ikurra izan beharko dituzte agerian, inolaz ere izanen ez direnak entitate sustatzailearen edo antolatzailearen izena baino neurri txikiagokoak. Betiere proportzioak eta jatorrizko gama kromatikoa errespetatuko dira.

Ziurtagiriak parte-hartzaileei emateko edo igortzeko gehieneko epea bi hilabetekoa da, parte hartu duten prestakuntza programa bukatzen den egunetik aurrera.

Bosgarren araua._Eskaerak, agiriak eta aurkezteko epeak.

Bat._Programa-kontratuak izenpetzearen bidez etengabeko prestakuntza planak finantzatzeko dirulaguntzen eskabideak Nafarroako Enplegu Zerbitzuan aurkeztuko dira, eredu normalizatuak erabiliz; entitate eskatzaileek eredu horien aplikazio informatikoa aurkitzen ahalko dute Enpleguan Prestatzeko Estatuko Fundazioaren web orrian. Entitate horiek eskabidearen eta prestakuntza planaren bi ale (disketean) eta paperezko kopia bana aurkeztuko dute.

Era berean, inprimaki normalizatuetan honakoak aurkeztuko dira:

a) Programa-kontratuari loturiko entitateak. Haietako bakoitzak hartu dituen konpromisoak eta kudeatuko duen zenbatekoa adierazita.

b) Programa-kontratua egiten laguntzen duten entitateak, entitate onuradunari lotuak dauden entitateak adierazita, halakorik bada.

Eskabideak, Herri Administrazioen Araubide Juridikoari eta Administrazio Prozedura Erkideari buruzko Legeko 38.4 artikuluan aipatu erregistro eta bulegoetan ere aurkez daitezke.

Bi._Eskabideak aurkezteko epea hilabetekoa izanen da, deialdi honek indarra hartzen duen egunetik hasita.

Hiru._Eskabidearekin batean joanen diren agiri eta argibideak.

a) Eskabidearekin batera uztailaren 30eko TAS/2783/2004 Aginduaren hamahirugarren ataleko bigarren puntuan aipatzen den dokumentazioa aurkeztuko da, hala nola egin beharreko prestakuntza plana.

Aurrekoaz gain, Nafarroako Enplegu Zerbitzuak espedientea ebazteko beharrezkotzat jotzen duen beste edozein agiri edo informazio osagarri eskatzen ahalko du.

Ez da beharrezkoa izanen agiri horiek aurkeztea lehendik Nafarroako Enplegu Zerbitzuan baldin badaude. Halakoetan eskatzaileak Herri Administrazioen Araubide Juridikoari eta Administrazio Prozedura Erkideari buruzko Legeko 35. artikuluko f) atalean ezarritakoari heltzen ahal dio, baina Etengabeko Prestakuntzaren Atalean zein espediente zenbakirekin tramitatu ziren esan beharko da.

b) Eskabidean datu hauek azalduko dira gutxienez:

_Eskatzailearen izena eta sozietate izena; entitate eskatzailearen identifikazio fiskalerako txartelaren fotokopiaren bitartez egiaztatua.

_Eskabidea egiten duen legezko ordezkari baimenduaren identifikazioa eta sinadura, ordezkaritza hori ahalordeen notario-eskrituraren edo zuzenbidean onartzen ahal den beste edozein baliabideren bitartez frogatuko da.

_Eskatzailearen aitorpena, eskaeran emandako informazioa eta datuak benetakoak direla dioena, eta, hala denean, dirulaguntza ematen duen organoa baimentzea Foru Ogasunari eskatzeko zerga betebeharrak beteak dituen jakiteko datuak.

c) Eskabidearekin batera aurkezten den prestakuntza planak uztailaren 30eko TAS/2783/2004 Aginduaren zortzigarren ataleko bigarren puntuan aipatutako informazioa azaldu beharko du gutxienez, eta harekin batera ondoko dokumentuak aurkeztuko dira, TAS/2783/2004 Aginduaren hamalaugarren artikuluan aipatutako dokumentazio tekniko gisara, eskatzaileak ezarritako inprimaki normalizatuetan bete beharrekoa:

I. eranskina. Plana osatzen duten prestakuntza ekintza bakoitzaren laburpen-orria, eredu normalizatuan zehazten diren xehetasunekin.

II. eranskina. Eskatzaileak plan hori kudeatzeko gaitasun teknikoa duela frogatzen duen memoria, gutxienez ondoko datu hauek bilduko dituena: prestakuntza planak eta prestakuntzarako bestelako jarduerak egiten azken hiru urteetan izandako esperientzia, entitate eskatzaileak eta, horrelakorik egonez gero, prestakuntza plana garatzen duen entitateak dituen baliabide teknikoak eta materialak aipatuta, hala nola aurreko deialdietan izandako betetze maila.

d) Entitate batek ezin izanen du eskatu deialdi honen kargura programa-kontratu bat baino gehiago izenpetzeko.

Entitate batek muga hori gainditzen baldin badu, eskatu dituen azken planak ezetsiko zaizkio. Planek aurkezpen data bera baldin badute, langile kopuru txikiena dituzten horiek ezetsiko dira.

Seigarren araua._Errekerimenduak eta tramitera ez onartzea.

Bat._Dirulaguntzarako eskabidea aurkeztu ondoren, deialdi honetan aipatzen diren baldintzak betetzen ez badituzte, interesatuei eskatzen ahalko zaie akatsak zuzen ditzaten, 10 eguneko epean, errekerimendua jaso eta biharamunetik hasita, behar diren informazioak edo agiriak aurkez ditzaten, eta adieraziko zaie halaber, hala egin ezean eskabideari uko egin diotela ulertuko dela, eta espedientea artxibatzeko ebazpena emanen da, Herri Administrazioen Araubideari eta Administrazio Prozedura Erkideari buruzko azaroaren 26ko 30/1992 Legeko 71. artikuluarekin bat.

Errekerimenduak planeko prestakuntza ekintzetakoren bat edo batzuk ukituz gero, ekintza horiek baztertuko dira planetik, eta gainerakoa tramitatuko da, horretarako behar diren baldintzak eta betebeharrak betetzen baditu.

Bi._Aurrekoa gorabehera, ez dira tramitera onartuko deialdian ezarritako epean aurkezten ez diren eskabideak; era berean, horrelakoetan ez da akatsak zuzentzeko aukerarik izanen, eta artxibatu eginen dira.

Zazpigarren araua._Balorazio irizpideak.

Bat._Programa-kontratuak izenpetzearen bidez etengabeko prestakuntzako planen balorazio teknikoa egiteko, kontuan hartuko dira ondoko irizpide hauek:

a) Plana osatzen duten prestakuntza ekintzei dagokienez:

_Helburuen definizioa.

_Prestakuntza ekintzen edukiak. Balorazio handiagoa emanen zaie "alfabetatze informatikoko" edo "ingurumeneko sentsibilizazioko" moduluren bat hartzen duten prestakuntza ekintzei, haien iraupena 10 ordukoa baino luzeagoa ez bada.

_Aurreikusitako instalazioak, baliabide didaktikoak eta materialak.

_Ikasketen jarraipena, ebaluazioa eta kontrola egiteko baliabideak.

_Prestakuntza ekintzak ziurtatzeko modua.

Atal honetako edukiek balorazio osoaren %40 osatuko dute.

b) Entitate eskatzaileak plana gauzatzeko gaitasuna duela egiaztatzen duen agiria, kontuan harturik aurreko esperientziak eta plana burutzeko eskura dituen baliabide pertsonal eta materialak, bertakoak zein kanpokoak.

Atal honetako edukiek balorazio osoaren %20 osatuko dute.

c) Planeko prestakuntza ekintzak bat datozen sektore arteko esparruaren beharrekin, prestakuntza ekintzetan lehentasunak ezartzeko hartuko diren irizpideen arabera. Irizpide horiek Enplegurako Prestakuntzaren Estatuko Fundazioaren web orrian argitaratuko dira.

Irizpide horrek %40 balioko du balorazio osoari begiratuta, honela banaturik:

Lehentasun handiena duten egintzei 25 puntu emanen zaizkie, 10 puntu lehentasun ertainekoei eta 5 lehentasun txikiena dutenei.

Bi._Balorazio teknikoaren puntuazioaren erdia baino gehiago lortzen duten prestakuntza planak finantzatuko dira.

Zortzigarren araua._Organo eskudunak eta emateko prozedura.

Bat._Deialdi honetan aipatzen diren dirulaguntzak lehia irekiaren bidez emanen dira, Dirulaguntzei buruzko azaroaren 17ko 38/2003 Lege Orokorreko 22. artikuluan xedatzen denaren arabera.

Bi._Laguntzak emateko prozeduraren instrukzioa Nafarroako Enplegu Zerbitzuko Etengabeko Prestakuntzaren Atalari dagokio.

Hiru._Nafarroako Enplegu Zerbitzuko zuzendari kudeatzailea da deialdi honetako eskaerak ebazteko eskumena duen organoa.

Lau._Emandako dirulaguntzen jarraipena, kontrola eta likidazioa egiteko eta datu-baseen mantentze eta babes lanetarako, Enpleguan Prestatzeko Hiruko Fundazioaren edo espedienteen instrukzioan haren ordez aritzen den organoaren laguntza teknikoa egonen da.

Bost._Prestakuntza planaren balorazioaren emaitzekin eta dirulaguntza behin zehaztuta, deialdi honen bigarren arauan xedatutakoa aplikatzearen ondorioz, eta espedientea eta aginduzkoak diren txostenak ikusi ondoren, organo instruktoreak ebazpen proposamena eta sinatu beharreko kontratu-programaren proposamena eginen ditu, abuztuaren 1eko 1046/2003 Errege Dekretuko 15. artikuluan xedaturikoa arautuko duena.

Organo instruktoreak aurkeztutako ebazpenaren proposamena ikusirik, Nafarroako Enplegu Zerbitzuko zuzendari kudeatzaileak espedientearen gaineko ebazpena emanen du.

Sei._Prozedurako ebazpena eman eta jakinarazteko epea lau hilabetekoa izanen da gehienez, deialdi honen ondorioetarako datatik hasita. Epe hori ebazpenik eman gabe bukatzen bada, eskabidea ezetsitzat joko da.

Zazpi._Dirulaguntza emateko ebazpenari programa-kontratua eta kasuan kasuko prestakuntza plana erantsiko zaizkio.

Zortzi._Eskaeren gaineko ebazpenen kontra gora jotzeko errekurtsoa aurkezten ahalko da, Nafarroako Foru Komunitateko administrazioari buruzko abenduaren 3ko 15/2004 Foru Legean eta Herri Administrazioen Araubideari eta Administrazio Prozedura Erkideari buruzko azaroaren 26ko 30/1992 Legeko VII. tituluan jasotako moduan.

Bederatzigarren araua._Entitate onuradunen eginbeharrak.

Arau hauetan, Dirulaguntzei buruzko azaroaren 17ko 38/2003 Lege Orokorrean, uztailaren 30eko 2783/2004 Ministerio Aginduan eta aplika daitezkeen gainerako arauetan ezarritako eginbeharren kalterik gabe, entitate onuradunek honako eginbeharrak dituzte:

Bat._Prestakuntza ekintzetan parte hartzen dutenendako doakotasuna egon beharra errespetatzea.

Bi._Prestakuntza ekintzak egiteko izan diren dirusarrera eta gastu guztiak kontu bereizi edo berariazko epigrafe batean identifikatzea, guztietan "etengabeko prestakuntza" erreferentzia jarrita.

Hiru._Nafarroako Enplegu Zerbitzuak, Europar Batasunak eta Etengabeko lanbide prestakuntzaren azpisistema arautzen duen abuztuaren 1eko 1046/2003 Errege Dekretuko 23. artikuluan ezarritako kontrol organoek sustaturiko prestakuntza ekintzak ebaluatu, kontrolatu eta jarraitzeko eginkizunetan modu aktiboan laguntzea, eskatzen diren datuak eta informazioa uneoro emanez.

Horretarako, prestakuntza plana abian jarri, bete eta justifikatzeko prozesuari buruzko dokumentazioa eta informazioa zentroan gorde beharko da EGFren ikuskapen eta kontrolaren eskura edo eskumena duten beste administrazioen eskura, gutxienez lau urteko epean. Epe hori onuradunak frogagiriak aurkezteko ezarririko epea bukatzen denean hasiko da.

Europar Batasuneko funtsekin batera finantzaturiko ekintzen kasuan, Europar Batasuneko arauetan xedatu bezala eginen da.

Lau._Dirulaguntzaren xede den jarduera diru publikoaz finantzatu dela eta Europako Gizarte Funtsarekin batera finantzatu dela adieraztea, egiturazko funtsetan parte hartzeko Europar Batasuneko estatuek informazioaz eta publizitateaz egin beharreko jarduerei buruzko maiatzaren 30eko 1159/2000 EE Erregelamenduan informazio eta publizitate neurriei buruz xedaturikoa betez.

Entitate onuradunek beren jakinarazpen, argitalpen, material didaktiko eta ziurtagiri guztietan gutxienez Nafarroako Enplegu Zerbitzuaren logotipoa eta Europako Gizarte Funtsaren ikurra izan beharko dituzte agerian, inolaz ere izanen ez direnak entitate sustatzailearen edo antolatzailearen izena baino neurri txikiagokoak. Betiere proportzioak eta jatorrizko gama kromatikoa errespetatuko dira.

Onuraduna ez da aipatu diren betebeharretatik salbuetsita egonen, prestakuntza ekintzen garapenean hirugarren pertsona fisiko edo juridikoekin partzialki kontratatzen bada.

Hamargarren araua._Prestakuntzaren betetzea eta haren hasieraren jakinaraztea.

Bat._Onuradunak uztailaren 30eko TAS/2783/2004 Aginduan, Dirulaguntzei buruzko azaroaren 17ko 38/2003 Lege Orokorrean eta deialdi honetan xedaturikoa kontuan hartuz garatuko du prestakuntza plana.

Bi._Prestakuntzarako talde edo ekintza hasi baino 2 egun natural lehenago, Nafarroako Enplegu Zerbitzuari eta Enplegurako Prestakuntzaren Estatuko Fundazioari jakinarazi behar zaie non, zer egunetan eta zer ordutan eginen den. Jakinarazpen horretarako S-10 eredua erabiliko da, Enplegurako Prestakuntzarako Estatuko Fundazioaren webgunean dagoena(www.fundaciontripartita.org). Jakinarazpena egin ondotik, aldaketa edo bertan behera gelditzea Nafarroako Enplegu Zerbitzuari jakinarazi beharko zaio S-10 eredua erabiliz, taldea/ekintza hasteko data baino lehenago, salbu eta toki, egun nahiz ordutegi aldaketa edo etetea eta berriz hastea eragin duten arrazoiak justifikatuak eta garaiz aurreikusi ezinak badira, edo taldea/ekintza gauzatzen ari dela gertatzen bada.

Kasu horietan, onuradunak aldaketaren berri izan orduko jakinarazi beharko du.

Halaber, prestakuntzarako ekintza edo taldea hasi eta gehienez ere hiru egunera, hori barne, eta betiere prestakuntza orduen %25 irakatsi baino lehen, Nafarroako Enplegu Zerbitzura eta Enplegurako Prestakuntzaren Estatuko Fundaziora partaideen zerrenda igorriko beharko da. Horretarako S-20 eredua erabiliko da, webgune horretatik eskuratzen ahalko dena. Zerrenda horren kopia kontrol organoen esku utzi beharko da egun hartaz geroztik.

Hasierako jakinarazpen horiek telematika bidez eginen zaizkio Enplegurako Prestakuntzaren Estatuko Fundazioari, transmisiorako behar diren segurtasun betebeharrak barne; jakinarazpenak onuradunak laguntza onartzen duen egunetik aitzina hasten diren talde edo ekintza guztiei buruzkoak izanen dira.

Hamaikagarren araua._Kostuak frogatzeko jarraibideak eta likidazioa.

Kostuak frogatzeko eta dirulaguntzak likidatzeko, uztailaren 30eko TAS/ 2783/2004 Aginduko hogeita bigarren eta hogeita hirugarren idatz-zatietan xedatu bezala eginen da.

Jarraibideak Nafarroako Enplegu Zerbitzuko zuzendari kudeatzaileak onetsiko ditu ebazpen bidez eta, horrelakorik ezean, Estatuko Enplegu Zerbitzu Publikoaren Zuzendaritza Nagusiak onetsitakoek arautuko dute atal hau.

Hamabigarren araua._Prestakuntzaren kontrol, ebaluazio eta jarraipen plana.

Bat._Uztailaren 30eko TAS/ 2783/2004 Aginduko hogeita seigarren idatz-zatian xedaturikoa deusetan galarazi gabe, Nafarroako Enplegu Zerbitzuak, bere eskumenen barruan, arau honen bidez finantzaturiko ekintzak ebaluatu, kontrolatu eta jarraitzeko eginkizunak egiten ahalko ditu. Horretarako, entitate onuradunei edozein agiri eskatu eta kanpo auditoria egiten ahalko die, Nafarroako Enplegu Zerbitzuaren arabera, eginkizun horiek burutzeko bidezko bada.

Era berean, Nafarroako Enplegu Zerbitzuak egindako prestakuntza guztiaren kanpoko ebaluazioa egiten ahalko du, etengabeko prestakuntzaren azpisistema hobetzeko xedearekin.

Bi._Entitate onuradunak planaren bukaeraren ziurtagiriarekin batera, prestakuntza ekintza talde bakoitzaren memoria-ebaluazioa aurkeztuko du. Memoria-ebaluazio hori ikastaroaren azalpena eta ebaluazioa izanen da, ondoko atalei buruzko informazioa bilduko duela:

_Identifikazio datuak: Programa-kontratua, prestakuntza ekintza, izena, taldea.

_Parte-hartzaileen gaineko datu estatistikoak: kontan hartuta sexua, bukatu dituzten ikasketen maila, lanbide kategoria, lan-kontratu mota, ikastaroko gaiari buruz aldez aurretik duten ezagupen maila.

_Parte-hartzaileek kurtsoaren kalitateari buruz egindako balorazioaren gaineko datuak, "Kalitatea ebaluatzeko galdetegia", arau honen hirugarren puntuan aipatzen dena, erabilita.

_Ikastaro bakoitzaren laburpena eta ondorioak.

Hiru._Parte-hartzaileek prestakuntza ekintzen kalitatea ebaluatuko dute. Ebaluaziorako "Kalitatea ebaluatzeko galdetegia" erabiliko da. Horrek informazioko eremu berezi hauek, gutxienez ere, hartuko ditu:

_Prestakuntza ekintzaren balorazio orokorra.

_Edukiak: prestakuntzako behar eta asmoetara egokitzen diren, eta edukien erabilgarritasuna langilearen ibilbide profesionalean.

_Irakasleak: zein maila duten, prestakuntza, espezializazioa eta komunikazioa kontuan hartuta.

_Baliabide didaktikoak: erabilitako baliabideen balorazioa eta edukietara nola egokitzen diren.

_Baliabide teknikoak: haien eskuragarritasuna, egokitasuna eta funtzionamendu egoera.

_Instalazioak: haien argitasuna, zabaltasuna, aireztapena, ezaugarrri klimatikoak eta irisgarritasuna.

_Antolaketa: prestakuntza taldea nola osatzen den, homogeneitatea, ikasle kopurua, aldez aurretik jasotako informazioa, ordutegia eta iraupena.

Ebaluazio horiek entitate onuradunendako duten balioa ezertan ukatu gabe, entitateek, memoria-ebaluazioarekin batera, ebaluazioen oholak emanen dituzte, egindako prestakuntza ekintzaren kalitatea aztertzeko.

Kalitatea ebaluatzeko ikasleek bete dituzten galdetegiak entitateak gordeko ditu.

Hamahirugarren araua._Laguntzen bateragarritasuna.

Nafarroako Enplegu Zerbitzuko zuzendari kudeatzaileak ebazpena emandakoan eta entitate onuraduna zerga betebeharrak eta Gizarte Segurantzari dagozkionak eguneratuak dituela egiaztatu ondoren, dirulaguntzaren %100eko aurrerakina ordainduko da, onuraduna titularra duen kontu korrontera, onuradunak jakinarazitakora, eginiko bankuko transferentzia bidez.

Entitate onuradunek dirulaguntzarekin batera eskatzen ahal dute aldez aurretik ordaintzeko, behar bezala egiaztaturik.

Hamalaugarren araua._Jarraipenerako Batzorde Mistoa.

Bat._Garatu beharreko prestakuntza planean sarturiko etengabeko prestakuntzako ekintzak zabaldu, ebaluatu eta haien jarraipena egiteko eta hura ulertzean sor litezkeen zalantzak argitzeko, programa-kontratu bakoitzean Jarraipenerako Batzorde Misto bat izendatuko da, Nafarroako Enplegu Zerbitzuak hautaturiko hiru kidek eta programa-kontratua izenpetu duen entitate onuradunak hautaturiko hiru kidek osatuko dutena.

Bi._Nafarroako Enplegu Zerbitzuak izendaturiko kide bat izanen da batzorde horretako lehendakaria.

Hiru._Jarraipenerako Batzorde Mistoa gutxienez ere sei hilabetean behin bilduko da eta, modu berezian, aldeetariko edozeinek eskatzen duenean. Bilera hauen berri emanen zaie Enpleguan Prestatzeko Hiruko Fundazioari.

Lau._Batzorde horrek eginkizun hauek izanen ditu:

a) Prestakuntza planaren garapena aztertu eta baloratzea.

b) Hala bada, onetsiriko prestakuntza planen aldaketak onestea, kontu tekniko edo formalak badira. Aldaketak eragina badu prestakuntza ekintza bakoitzean parte hartu behar zuten partaideen kopuruan, aldaketa hori lehentasunezko talde bereko prestakuntza ekintzen artean egiten ahalko da bakarrik eta lehentasunezko taldeen parte-hartzearen ehunekoari eutsi beharko zaio.

Dena dela, erabaki horiek hartzeko, alde bakoitzeko kideen gehiengoa beharko da.

c) Prestakuntza ekintzak burutu eta ebaluatzean lorturiko emaitzak aztertzea.

Hamabosgarren araua._Azpikontratazioa.

Bat._Entitate onuradunak behingoagatik eta oso-osorik, eta arau hauetan ezarri bezala, programa-kontratuko xedea den prestakuntza jarduera azpikontratatzen ahalko du.

Onuradunak programa-kontratuarekin loturiko entitate laguntzaileekin ituntzen ahalko du prestakuntza plan osoa edo haren zati bat egitea, honako baldintza hauek betetzen badira:

_Beren helburuen artean prestakuntzarekin zerikusia duten jarduerak garatzen dituzten entitateak badira.

_Kontratazioa merkatuko baldintza normalen pean egitea.

_Aldez aurretik organo emailearen baimena eskuratzea.

Behin ere ez da kontraturik eginen beste batzuekin, jarduera garestituz gero eta haren edukiari baliorik erantsi ezik.

Bi._Hirugarrenekin itundutako jarduera dirulaguntzaren %20 baino handiagoa denean eta zenbateko hori 60.000 eurotik gorakoa, kontratua agiri idatzi baten bidez formalizatu beharko da eta organo emaileak aldez aurretik baimendu beharko du, programa-kontratuan hala ez badakar. Baimen hori lortzeko, entitate onuradunak idazki bidez eskatu beharko du; organo emaileak 15 eguneko epean emanen du ebazpena. Aipatu epea organo emaileak ezer ere adierazi gabe bukatzen bada, baimena emantzat joko da.

Ezin izanen da, inolaz ere, kontratu bat zatikatu haren zenbatekoa gutxitzeko eta baldintza hori betetzea saihesteko.

Hiru._Edonola ere, onuradunei eta kontratistei aplikatzekoak izanen dira Dirulaguntzei buruzko azaroaren 17ko 38/2003 Lege Orokorraren 29. artikuluan jasotzen diren mugak eta betebeharrak.

Hamaseigarren araua._Datuen babesa.

Entitate eskatzaileeek eta entitate onuradunek jakinarazten dieten informazioa datuak babesteko indarra duen arautegiaren menpe egonen da.

Hamazazpigarren araua._Aplikatzekoak diren arauak.

Bat._Oinarri hauetako deialdian parte hartzeak berarekin dakar arauak oso-osorik eta bete-betean onartzea.

Bi._Arau hauetan ezarri ez den guztia ondokoei lotuko zaie: lanean ari diren langileen prestakuntzarako programa-kontratuak izenpetzeko dirulaguntzak arautzen dituen uztailaren 30eko 2783/2004 Ministerio Aginduari; Etengabeko lanbide prestakuntzaren azpisistema arautzen duen abuztuaren 1eko 1046/2003 Errege Dekretuari; Dirulaguntzei buruzko Lege Orokorreko Arautegia onesten duen uztailaren 21eko 887/2006 Errege Dekretuari, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeari, urtarrilaren 13ko 4/1999 Legeak aldatua, baita honako erregelamenduei ere: ekainaren 21eko 1260/1999 Kontseiluarena, uztailaren 12ko 1784/99 Europako Parlamentuarena, maiatzaren 30eko 1159/2000 Batzordearena, uztailaren 28ko 1685/2000 Batzordearena, abenduaren 27ko 448/2004 Batzordearen Erregelamendua eta martxoaren 10eko 448/2004 Batzordearena, 1685/2000 Erregelamendua aldatzen duena, Egiturazko Funtsen bidez kofinantzatutako eragiketen gastuen finantzaketari buruzko Kontseiluaren 1260/1999 Erregelamendua aplikatzeko xedapenak ezartzen dituena eta 1145/2003 Erregelamendua indargabetetzen duena, maiatzaren 6ko 2003/361/EB Batzordearen Gomendioari eta aplika daitezkeen gainerako arauei.

Hemezortzigarren araua._Epeak.

Herri Administrazioen Araubideari eta Administrazio Prozedura Erkideari buruzko Legeko VI. tituluko I. kapituluarekin bat, deialdi honetan adierazitako epe guztiak luzaezinak dira, eta egun baliodunek osatuak, non ez den kontrakoa xedatzen espresuki.

Hemeretzigarren araua._Hiruko Fundazioa.

Enplegurako Prestakuntzaren Estatuko Fundazioa eratu bitartean, deialdi honetan hari buruz egiten diren aipamenak Enplegurako Prestakuntzaren Hiruko Fundazioari buruzkoak direla ulertuko da.

Era berean, Enplegurako Prestakuntzaren Estatuko Fundazioaren web-orriaz egiten diren aipamenak Enplegurako Prestakuntzaren Hiruko Fundazioaren web-orriari buruzkoak direla ulertuko da (www.fundaciontripartita.org).

Hogeigarren araua._Emandako dirulaguntzen publizitatea.

Dirulaguntzei buruzko Foru Legeko 15. artikuluan xedatutakoarekin bat, Nafarroako Enplegu Zerbitzuak webgunean (www.empleo.navarra.es) jarriko ditu emandako dirulaguntzak, eta bertan azalduko dira deialdia, aurrekontuko zein programari eta kredituri egotzi zaizkien, onuraduna, zenbatekoa eta dirulaguntzaren xedea.

II. ERANSKINA

Eskabidea, 2007. urtean Etengabeko Prestakuntza Planeko Programa-kontratuan parte hartzeko

Espedientearen zenbakia:

Prestakuntza plana eskatzen duen entitatea:

Prestakuntzarako jarduketa (izena eta zenbakia):

Prestakuntza jarduketan parte hartzeko interesa azaldu:

LANGILE/PARTE-HARTZAILEAREN DATUAK

Deiturak eta izena:

Helbidea: .................................. Herria: ............ PK ......... ............. Telefonoa:

IFZ: ..................... Gizarte Segurantzako afiliazio-zenbakia: ....../

Adina: ..... Sexua: .... Ezgaitasuna: f BAI f EZ. Zein herrialdetan jaio den:

IKASKETAK:

f Ikasketarik gabea f LHI f BBB/UBI Batxilergoa

f Lehen ikasketak f LHII/Erdi Mailako Zikloa f Diplomatura

f Eskola graduatua f Goi mailako zikloa f Lizentziatura

f DBH

ARLO FUNTZIONALA: KATEGORIA:

f Zuzendaritza f Zuzendaritzakoa

f Administrazioa f Erdi mailako karguduna

f Merkataritzakoa f Teknikaria

f Mantentzekoa f Langile kualifikatua

f Produkziokoa f Kualifikatu gabeko langilea

Taldeak (1) (Kodea adierazi):

EGUN ZEIN ENTITATETAN ARITZEN DEN:

ETE (2): f Ez ETE: f

Sektorea / hitzarmena: ......................................... CNAE zenbakia: ...../

Sozietatearen izena:

Gizarte Segurantzako afiliazio-zenbakia: ................................... I.F.K.:

Lantokiko helbidea:

Herria: .......................................................... P.K.:

Behean sinatu duenak adierazten du, deialdi honi dagokionez, ez dela parte hartzen ari eskatutako prestakuntza jarduketa bezalako bestelako jarduketetan.

Era berean, eta Datu Pertsonalak Babesteari buruzko abenduaren 13ko 15/1999 Lege Organikoaren eta aplikatu beharreko gainerako arauetan xedatutakoaren arabera, baimena ematen du agiri honetan agertzen diren datu pertsonalak hartu eta eskabidea kudeatzeko informatika bidez erabiltzeko eta Nafarroako Enplegu Zerbitzuak jasotako prestakuntzaren jarraipen, kontrol eta ebaluazioa egiteko.

(Eskatzailearen sinadura)

Eguna: .....................

Edozein datu ez betetzeak ikaslea ikastarotik kanpo geratzea ekarriko du.

(1) Kodeen zerrenda: AO araubide orokorra, ALF aldizkako langile finkoak lanik gabeko aldietan, EE enplegu erregulazioa lanik gabeko aldietan, NEK nekazarien araubide berezia, AU autonomoen araubide berezia, AP administrazio publikoa, EL etxeko langilea, PL prestakuntza aldian langabezira pasatzen diren langileak, LHB Langileen Estatutuko 2. artikuluan aipatutako lan harreman berezietako langileak, GSHB Gizarte Segurantzarekin hitzarmen berezia duten langileak.

(2) Enpresa txiki eta ertainak izanen dira 250 langile baino gutxiagoko plantilla izan, kopurua Batzordearen maiatzaren 6ko 2003/361/EB Gomendioaren eranskineko 5. eta 6. artikuluekin eta eranskinarekin bat kalkulaturik eta azken ekitaldi itxiari dagokionez, eta gomendio horretako gainerako baldintzak betetzen dituztenak.

Legezko abisua

1. Prestakuntza ikastaro baterako eskabidearekin batera aurkeztutako datu pertsonalak tratatuko dituzte Nafarroako Enplegu Zerbitzuak eta eskainitako ikastaroak eman behar dituzten entitateek, ikastaroak antolatu eta eman ahal izateko.

2. Lehen aipatu eskabidea aurkeztean, interesatuak baimena ematen du haren datu pertsonalak hirugarrenei emateko, bakar bakarrik estatistika, azterlan edo irizpenak egiteko, zuzenean loturik badaude Nafarroako Enplegu Zerbitzuaren eskumen eta helburuekin, bereziki Enplegu Behatokiari dagozkion horiekin.

3. Datuak eskuratu, zuzendu eta ezabatzeko eta horien aurka jotzeko eskubideaz baliatzeko Nafarroako Enplegu Zerbitzura jo beharko da (Arcadio María Larraona, 1, 31008 Iruña), hura baita eskabidearekin batera emandako datu pertsonalak tratatzeko ardura duen erakunde autonomoa.

4. Edonola ere, datu pertsonalak tratatu eta komunikatzeko Datu Pertsonalak Babesteari buruzko abenduaren 13ko 15/1999 Lege Organikoan ezarritako araubidearen pean jokatuko da.

Iragarkiaren kodea: F0703377