Iragarkia

30. ALDIZKARIA - 2007ko martxoaren 9a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

41/2007 FORU AGINDUA, otsailaren 20koa, Nekazaritza, Abeltzaintza eta Elikadura kontseilariak emana, ordainketa bakarreko araubidean sartzeko eskabide bakarraren aurkezpena arautzen duena, nekazaritzako zenbait produkturi eremuagatik ordaindu beharrekoetarako, abeltzaintzako primetarako, eskualdeen kalte-ordainetarako eta nekazaritzako ingurumenaren arloko 2007ko kanpainako laguntzetarako. Halaber, eskubideak lagatzeko komunikazioak aurkezteko eta erreserba nazionalerako eskubideak eskatzeko arauak ezarri dira.

Kontseiluak, 2003ko irailaren 29ko 1782/2003 EE Erregelamenduaren bidez, Europar Batasunaren Nekazaritza Politikaren barruan zuzeneko laguntzarako araubideei buruzko orotariko xedapenak ezarri eta nekazariei laguntzeko zenbait araubide sortu zituen. Batzordeak, 2004ko apirilaren 21eko 795/2004 EB Erregelamenduaren bidez, 1782/2003 EE Erregelamenduan aurreikusten den ordainketa bakarra aplikatzeko xedapenak ezarri zituen. Batzordeak, 2004ko apirilaren 21eko 796/2004 EB Erregelamenduaren bidez, 1782/2003 Erregelamenduan aurreikusiriko baldintzak, moduluak eta kudeaketa eta kontrol sistema integratua aplikatzeko xedapenak ezarri zituen. Batzordeak, 2004ko urriaren 29ko 1973/2004 EB Erregelamenduaren bidez, 1782/2003 EE Erregelamendua aplikatzeko xedapenak ezarri zituen, erregelamendu horretako IV eta IV bis tituluetan aurreikusiriko laguntza araubideari eta lehengaiak lortzeko ekoizpenetik kendu ziren lurren erabilerari buruz.

Abenduaren 30eko 1617/2005 Errege Dekretuaren bidez ordainketa bakarreko araubidearen barruan nekazariei eskubideak emateko modua arautu zen. Abenduaren 30eko 1618/2005 Errege Dekretuak, ordainketa bakarraren araubidearen eta nekazaritza eta abeltzaintzari zuzenean laguntzeko bestelako araubideen gainekoak, Estatuaren arautegi oinarrizkoa ezartzen du, Kontseiluaren irailaren 29ko EE 1782/2003 Erregelamenduan ezarritako laguntzei aplikagarri zaiena. Bi errege dekretuak maiatzaren 5eko 549/2006 Errege Dekretuaren eta abenduaren 22ko 1582/2006 Errege Dekretuaren bidez aldatu ziren.

Bestaldetik, Kontseiluak, 2005eko irailaren 20ko 1698/2005 EE Erregelamenduaren bidez, Nekazaritza Bermatzeko Europako Funtsa-FEADERen bidez landa garapenerako Europar Batasunaren laguntzari buruzko arauak ezarri zituen. Batzordeak, 2006ko abenduaren 15eko 1974/2006 EB Erregelamenduaren bidez, 1698/2005 Erregelamendua aplikatzeko xedapenak ezarri zituen. Batzordeak, 2006ko abenduaren 7ko 1975/2006 EB Erregelamenduaren bidez, 1698/2005 EE Erregelamendua aplikatzeko xedapenak ezarri zituen landa garapenerako laguntza neurriak hartzeko kontrol prozeduraren eta baldintzen aplikazioari buruz.

Azkenik, urriaren 2ko 67/2006 Foru Dekretuan, Nekazaritza Bermatzeko Europako Funtsaren (FEAGA) eta Nekazaritza Aldeen Garapenerako Nekazaritzaren Europako Funtsaren (FEADER) bidez finantzatzen diren gastuak Nafarroako Foru Komunitatean ordaintzen dituen erakundea onetsi eta horren antolamendua eta funtzionamendua ezarri zen. Dekretuko azken xedapenetako bigarrenak baimena eman zion Nekazaritza, Abeltzaintza eta Elikadura kontseilariari, bere eskumenen barruan, behar diren xedapen guztiak emateko foru dekretua garatu eta betearazteko, bereziki, nekazaritzarako Europako funtsekin osorik edo hein batean finantzatzen diren dirulaguntzei buruzko arauak ezartzeko.

Nekazaritza, Abeltzaintza eta Elikadura kontseilariak, otsailaren 8ko 29/2007 Foru Aginduaren bidez, FEAGAk finantzaturiko laguntzak kudeatzeko prozedura ezarri zuen, eta Nekazaritza, Abeltzaintza eta Elikadura kontseilariak, otsailaren 8ko 30/2007 Foru Aginduaren bidez, FEADERekin batera landa garapenerako finantzaturiko laguntzak tramitatzeko prozedura ezarri zuen.

Foru agindu honen bidez, arautegi horrek ezartzen duen esparruan honako hauek egiteko baldintzak ezarri zituen: ordainketa bakarrerako eskaerarako, nekazaritzako zenbait produkturi eremuagatik ordaindu beharrekoetarako, abeltzaintzako primetarako, eskualde menditsu eta behartsuen kalte-ordainak eta nekazaritzako ingurumenaren arloko 2007ko kanpainako laguntzetarako. Halaber, eskubideak lagatzeko komunikazioak aurkezteko eta ordainketa bakarreko araubidearen barruan erreserba nazionalerako eskubideak eskatzeko arauak ezarri dira.

Horrenbestez, eta Nafarroako Gobernuari eta lehendakariari buruzko abenduaren 3ko 14/2004 Foru Legearen 41. artikuluak ematen dizkidan ahalmenak erabiliz,

AGINDU DUT:

ATARIKO TITULUA

Xedapen orokorrak

1. artikulua. Helburua eta aplikazio eremua.

Foru agindu honen xedea Nafarroako Foru Komunitatean laguntza hauek eskatzeko 2007ko kanpainarako eskabide bakarra aurkezteko arauak ezartzea da:

1. Ordainketa bakarreko araubideari dagokion ordainketa banandua.

2. 1782/2003 EE Erregelamenduaren bidez ezarririko nekazaritzako zenbait produktutarako ordainketa elkartu eta berariazkoak:

a) Belarki-labore batzuen ekoizleei lur eremuaren arabera egin beharreko ordainketak. Labore horiek IX. eranskinean aipatu eta 10. kapituluan ezarritakoak dira.

b) Arroz-ekoizleei hektareako emateko laguntza berariazkoa, 3. kapituluan ezarria.

c) Gari gogorraren kalitateari hektareako emateko laguntza berariazkoa, 1. kapituluan ezarria.

d) Proteaginosoetarako prima, 2. kapituluan ezarria.

e) Labore energetikoetarako laguntza, 5. kapituluan ezarria.

f) Fruitu oskoldunetarako laguntza, eremuaren araberakoa, 4. kapituluan ezarria.

g) Hazi-ekoizpenerako laguntza, 9. kapituluan ezarria.

h) Olibadietarako laguntza, 10 ter kapituluan ezarria.

i) Tabakorako laguntza, 10 quater kapituluan ezarria.

j) Tabakorako laguntza osagarria, 69. artikuluaren aplikazioaren ondorioz.

k) Fruitu oskoldunetarako laguntzak, Europar Batasunarenak eta Foru Komunitatearenak.

l) Azukrea ekoizteko laguntza.

3. 1782/2003 EE Erregelamenduaren bidez ezarririko abeltzaintzarako ordainketa elkartu eta berariazkoak:

a) Behi ume-hazleak dituzten ekoizleendako prima, 125. artikuluan ezarria.

b) Abereak hiltzeko prima, 130. artikuluan ezarria.

c) Ardi eta ahuntz aziendaren ekoizleendako prima, 113. artikuluan ezarria.

d) Ardi eta ahuntz bakoitzeko prima osagarria, 114. artikuluan ezarria.

e) Bazkatokiaren justifikazioa, 69. artikuluan ezarritako azienda-dentsitatea neurtzeko.

f) Kontseiluaren 2003ko irailaren 29ko 1782/2003 EE Erregelamenduaren 69. artikulua aplikatzearen ondorioz, Europar Batasunaren Nekazaritza Politika garatzeko Espainiako Programa Nazionalari behi aziendaren sektorean egin beharreko ordainketak:

f.1. Behi ume-hazleak dituzten abeltegiendako ordainketa osagarriak.

f.2. Ofizialki aitortutako kalitateko behikiaren ekoizpenerako ordainketa osagarria.

f.3. Ordainketa osagarria esnearen sektorean.

4. Landa garapenerako laguntzak, Kontseiluaren 1698/2005 EE Erregelamenduan ezarriak, Nafarroako Landa Garapenerako 2007/2013 urteetarako Programaren esparruan.

a) Nafarroako eskualde menditsuendako eta eskualde behartsuendako kalte-ordaina, otsailaren 12ko 32/2007 Foru Aginduaren bidez arautua.

b) Nekazaritza ekologikorako laguntza, otsailaren 12ko 33/2007 Foru Aginduan arautua.

c) Abeltzaintza ekologikorako laguntza, otsailaren 12ko 35/2007 Foru Aginduan arautua.

d) Galzorian dauden hemengo arrazak babestu eta sustatzeko laguntza, otsailaren 12ko 36/2007 Foru Aginduaren bidez arautua.

5. Landa garapenerako laguntzak, Kontseiluaren 1257/1999 EE Erregelamenduan ezarriak, Nafarroako Landa Garapenerako 2000/2006 urteetarako Programaren esparruan, eta Nekazaritza, Abeltzaintza eta Elikadura kontseilariak otsailaren 10eko 41/2006 Foru Aginduaren bidez arautuak:

a) Nekazaritza ekologikorako laguntzen urteko azken ordainketa.

b) Ekoizpen integraturako laguntzen urteko azken ordainketa.

c) Abeltzaintza ekologikorako laguntzen urteko ordainketa.

d) Galzorian dauden hemengo arrazak babesteko eta sustatzeko laguntzen urteko ordainketa.

e) Nekazaritzako ingurumenaren arloko laguntzak. Laguntza horiek Ingurumen, Lurraldearen Antolamendu eta Etxebizitza Departamentuko kontseilariaren azaroaren 6ko 1526/2003 Foru Aginduan jaso dira.

6. Halaber, eskubideak lagatzeko komunikazioak eta erreserba nazionalerako eskubideen eskaerak arautzen dira, ordainketa bakarreko araubideari dagokionez.

2. artikulua. Laguntzen onuradunak.

1. 1. artikuluan aipatzen diren laguntzak osorik edo hein handi batean Nafarroako Foru Komunitatean kokaturik dauden ustiategien titularrek hartzen ahalko dituzte eta eremurik gabeko ustiategien titularrek, abere gehienak Nafarroako Foru Komunitatean badituzte.

2. Ordainketa bakarrarengatik, eremuengatik eta abeltzaintzako primengatik laguntza eskabideak beste autonomia erkidego batean aurkeztu behar dituzten titularrek, 1. artikuluko 4. eta 5. ataletan landa garapenerako aipatzen diren laguntzak lortu nahi badituzte, Nafarroan aurkeztu beharko dute eskaera bakarra, Nafarroan dituzten eremu eta abereak adieraziz, dirulaguntzen xede izan nahi dutenak.

3. artikulua. Eskabide bakarraren edukia.

1. artikuluan aipatzen den edozein laguntza eskatzeko, ustiategiaren titularrak laguntzarako eskabide bakarra eskatu beharko du, eduki hau izanen duena:

1. Laguntza bakoitzaren eskabide espresua, eremuei loturiko laguntzen xede diren esparruak adieraziz.

2. Ustiategiko lurzatiak 2007ko otsailaren 1ean indarra duen erreferentziako lurzatiarekin eta NELIGS esparruarekin adierazi beharko dira, egoera hauetan daudenak izan ezik:

a) Lurzatiak berrantolatzeko prozesuen menpe dauden lurzatiak, lurretan mugaturik badaude eta 2007ko otsailaren 1ean NELIGSen ageri ez badira, kasuan kasuko lurzati berrantolamenduaren poligonoaren zenbakiari 70 gehituz adieraziko dira. Lurzatiko zenbakia lurzati berrantolamenduko bera izanen da. Izarbeibar I lurzati berrantolamenduaren eremuan, alde hartako 11 udalerriren parte hartzen baitu, berrantolamenduko lurzatiek bat eginen dute 301 udalerri zenbakiarekin.

b) Herri aprobetxamendurako bazkatokiak 99. poligonoarekin adieraziko dira eta kasuan kasuko toki entitateak ematen duen ziurtagirian ageri dena izanen da lurzatiaren zenbakia.

c) Korralizak eta ardi eta ahuntz aziendarendako bazka aprobetxamenduak edo eskualde menditsu eta behartsuetako kalte-ordainetarako laguntzen xede diren bazkatokiak, haien esleipena udalei eta kontzejuei badagokie: udalaren edo lurralde entitatearen kodea eta 1.000 poligonoarekin adieraziko dira. Lurzati zenbakian toki entitateak korralizan ezarritako zenbakia adieraziko da.

d) Partikular bati dagozkion lurren bazka-aprobetxamendua, katastroko lurzati asko ukitzen baditu, ardi eta ahuntz aziendarako bazka-eremu gisa adierazten badira, edo eskualde menditsu edo behar- tsuendako kalte-ordainerako laguntzen esparruan, udalaren edo lurralde entitatearen kodearekin eta 2.000 poligonoarekin adieraziko dira. Lurzatiak errentatzaileendako zenbaki korrelatibo banarekin adieraziko dira.

3. Ordainketa bakarreko araubideko laguntza eskatuz gero, edukitako eskubideak erabili nahi diren lurzatien adierazpena. Ordainketa bakarraren xede diren eremuek edukitako eskubide guztiak ukitzen ez badituzte, titularrak laguntzaren xede diren eskubideen zerrenda aurkezten ahalko du. Horrelakorik ezean, 13. artikuluan xedatu bezala eginen da.

4. Urbasa eta Andimendiko bazkatokien aprobetxamenduaren kasuan, eskatzaileek hauek adierazi beharko dituzte: zer azienda mota den, zenbat abelburu diren eta noiz egonen diren bazkatzen toki horietan. Nekazaritza, Abeltzaintza eta Elikadura Departamentuak erabakiko du eskatzaile bakoitzari zer bazka-eremu dagokion, guztira zenbat azienda larriko abelburu dauden eta eskatzaileak adierazitako azienda larriko abelburu kopurua aztertutakoan.

5. Eremuengatik edo elkarte baten abereengatik kalte-ordaina eskatzen duten eskatzaileek kasuan kasuko elkartearen identifikazio fiskalerako kodea eta bertan zer ehunekotan hartzen duten parte adierazi beharko dute.

6. Laguntza hauetakoren bat eskatzen duten titularrek eskabidean aitortu beharko dituzte ekoizpen unitate guztiak: ardi eta ahuntz aziendarako primarako, behi ume-hazleen eta behi azienda hiltzeko primetarako eta behi aziendaren sektoreko ordainketa osagarrietarako

4. artikulua. Eskabideen aurkezpena.

1. Eskabideak telematika bidez aurkeztuko dira, Nekazaritza, Abeltzaintza eta Elikadura Departamentuarekin lankidetza hitzarmena izenpetu duten entitate laguntzaileetan.

Halaber, ezarririko ereduan aurkezten ahalko dira, Nekazaritza, Abeltzaintza eta Elikadura Departamentuko eskualdeetako eta barrutietako bulegoetan, Nafarroako Gobernuko Erregistro Orokorrean, edo Herri Administrazioen Araubideari eta Administrazio Prozedura Erkideari buruzko azaroaren 26ko 30/1992 Legearen 38. artikuluko 4. idatz-zatian aipatzen diren tokietan.

2. Eskabideak aurkezteko epea eremuagatik nekazaritzako zenbait produkturi ordaindu beharrekoari eta Europar Batasunak abeltzaintzarako ematen dituen zenbait laguntzari buruzko Estatuko arautegian ezartzen dena izanen da eta 2007ko otsailaren 1ean hasiko da.

3. Abereak hiltzeko primaren eskabideak eredu normalizatuan aurkeztuko dira. Eredu hori Nekazaritza, Abeltzaintza eta Elikadura Departamentuaren bulego nagusietan, eskualdeetakoetan eta barrutietakoetan eta 2. idatz-zatian aipatzen diren tokietan egonen da eskuragarri. Laguntzak abereak hil eta hurrengo lau hilabeetan eskatu beharko dira eta Estatuko oinarrizko arautegian aipatzen diren epeetan, alegia, 2007ko otsailaren 1etik eskabide bakarra aurkezteko epea bukatu arte, 2007ko ekainaren 1etik ekainaren 30era, 2007ko irailaren 1etik irailaren 30era eta 2007ko abenduaren 1etik 2008ko urtarrilaren 15era.

4. Eskabideekin batera foru agindu honen II. eranskineko agiriak aurkeztuko dira.

5. artikulua. Eskaeraren aldaketa.

1. Batzordearen 796/2994 EB Erregelamenduko 15. artikuluan xedaturikoaren arabera, titularrek eskabidea maiatzaren 31 arte aldatzen ahalko dute, zehapenik gabe, baina orduz geroztik ez da aldaketarik onartuko.

2. Titularrari bere eskabide bakarrean akatsak daudela jakinaraziz gero edo tokian berean kontrol bat burutzeko asmoa adierazirik kontrol horrek akatsak nabarmentzen baditu, ez dira aurreko atalean aipatzen diren aldaketak baimenduko, akatsak ukitzen dituen nekazaritza lurzatiei dagokienez.

6. artikulua. Epez kanpo aurkeztea.

1. Epea bukatu eta hurrengo 25 egun naturaletan eskabideak onartuko dira. Kasu horretan Batzordearen 796/2004 EB Erregelamenduko 21. artikuluan ezarririko portzentajeetan gutxituko dira zenbatekoak.

2. Atzerapena 25 egun naturaletik gorakoa bada, eskabidea ez da onartuko.

3. 1. atalean aipatzen den gutxitzea kontratu edo adierazpenen eta bestelako agiri edo frogen aurkezpenari ere aplikatzen ahalko zaio, kasuan kasuko laguntza ez onartzeko zergatikoak baldin badira, Batzordearen 796/2004 EB Erregelamenduko 12. eta 13. artikuluetan xedaturikoaren arabera.

4. Ezinbesteko kasuetan eta salbuespenezko gorabeheretan ez da gutxitzerik aplikatuko.

7. artikulua. Laguntza eskabideak kentzea.

1. Laguntza eskabideak noiznahi ere kentzen ahalko dira, osorik edo hein batean.

2. Hala ere, titularrarari bere eskabide bakarrean akatsak daudela jakinaraziz gero edo tokian berean kontrol bat burutzeko asmoa adierazirik kontrol horrek akatsak nabarmentzen baditu, ez da baimenik emanen haiek ukituriko laguntza eskabidea kentzeko.

3. Eskabideak osorik edo hein batean kentzean, titularra eskabidea aurkeztu baino lehen zegoen bezala geldituko da.

8. artikulua. Eremuen eta haien erabileren gorabeheren jakinarazpena.

1. Eskatzaileak beharturik daude idatziz jakinaraztera Nekazaritza, Abeltzaintza eta Elikadura Departamentuari beren ustiategian gertatzen diren gorabeherak, hauen berri izan bezain laster, gorabehera horiek laguntzak eskuratzeko baldintzak ez betetzea badakarte, bereziki:

a) Nekazaritzako laboreei dagokienez, adieraziriko laboreek emaitzarik ez izatea eta basa faunaren, abereen, eguraldiaren, belar gaiztoen eta abarren eraginez laboreetan izan daitezkeen gorabeherak.

b) Nekazaritzako Lurzatien Informazio Geografikorako Sistema-NELIGSen esparruen erabilerarekin ados ez egonez gero, aldatzeko eskaera aurkeztuko da Nekazaritza, Abeltzaintza eta Elikadura Departamentuko kontseilariaren maiatzaren 30eko 89/2005 Foru Aginduan ezarritako moduan eta epeetan. Haren bidez, NELIGSen erregulazioa eta bera Nafarroan kudeatzeko arauak ezarri ziren.

c) Urbasan eta Andimendin bazkatzen diharduten azienda larriko abelburuei dagokienez, aprobetxamendu hori hasiera batean adierazirikoek baino abelburu gutxiagok egiten badute, ukituriko abeltzainek jakinarazi beharko dute zenbatek eginen duten aprobetxamendu hori.

2. Eskatzaileek gorabehera horiek jakinaraztean laguntzaren eskabidea benetako egoerara egokituko da. Batzordearen 796/2004 EB Erregelamenduko II. zatiaren IV. Tituluan aipatzen diren murrizketa eta salbuespenak laguntzaren eskabideen zati batzuei ez zaizkie aplikatuko baldin eta ekoizleek idatziz jakinarazten badiote Nekazaritza, Abeltzaintza eta Elikadura Departamentuari laguntzaren eskabidea ez dela zuzena edo okertu dela, betiere ekoizleei aldez aurretik Nekazaritza, Abeltzaintza eta Elikadura Departamentuak bertan kontrolatzeko asmoaren edo beren eskabideko akatsen berri eman ez badie.

3. Ez ereiteko jakinarazpenak eta aldaketak Nekazaritza, Abeltzaintza eta Elikadura Departamentuak prestatuko dituen orri edo inprimakietan aurkeztuko dira, 4. artikuluan aipatzen diren bulego eta erregistroetan.

9. artikulua. Onuradunen betebeharrak.

Laguntzei buruzko arautegikoez gain, onuradunek betebehar hauek bete beharko dituzte:

a) Eman eta hartutako dirulaguntzak direla eta, Nekazaritza, Abeltzaintza eta Elikadura Departamentuak egiten dituen egiaztapenak oro onartzea.

b) Nekazaritza, Abeltzaintza eta Elikadura Departamentuari betebeharrak egiaztatzeko eskatzen dizkien agiriak oro luzatzea.

c) Helburu bereko beste dirulaguntza publiko batzuk eskatu izanaren berri ematea Nekazaritza, Abeltzaintza eta Elikadura Departamentuari.

d) Behitegiaren liburua eguneratua izatea eta behi azienda identifikatu eta erregistratzeari buruzko arauetan ezarritako jakinarazpen epeak betetzea.

e) Artegiko eta ahuntzegiko liburua eguneratua izatea.

f) Lurzatietan laborea edo haren hondarrak irailaren 10a arte uzteko, ekilore, soia eta gariaren kasuan, eta ekainaren 30a arte gainerako laboreetan.

10. artikulua. Kontrolak.

Foru agindu honetan aipatzen diren laguntzen eskatzaileek onuartuak izateko kontrol eta betebeharra onartu beharko dituzte, bai administratiboak, bai tokian tokikoak, laguntzei buruzko arautegian ezartzen direnak.

11. artikulua. Itzulketak, ez-betetzeak eta zehapenak.

1. Foru agindu honetan aipatzen diren laguntzei buruzko itzulketak, ez-betetze eta zehapenak Europar Batasuneko arautegian eta Dirulaguntzei buruzko azaroaren 9ko 11/2005 Foru Legean xedaturikoarekin bat etorriko dira.

2. Arau-hausteak zehazteko eta zehapenak ezartzeko zehapen prozedura administratiboa abenduaren 9ko 369/1997 Foru Dekretuan ezarritakoa izanen da, haren bidez onetsi baitzen nekazaritza, abeltzaintza eta elikadura arloetako zehapenak jartzeko administrazio prozedura.

I. TITULUA

Zuzeneko ordainketak

I. KAPITULUA

Xedapen orokorrak

12. artikulua. Bazkatokiaren eremua.

Foru agindu honetan aipatzen diren laguntzak kalkulatzeko, Kon- tseiluaren 1782/2003 EE Erregelamenduko 131.2.b) artikuluan ezarri dena joko da bazkatokitzat. Halaber, zuhaixkez hornitutako larreen eremuaren erdia eta zuhaitzez hornitutako larreen laurdena ere joko dira bazkatokitzat, NELIGSean halakoxetzat hartuak baidra.

Udalek edo beste edozein erakunde eskudunek eragozpenak dituztenenan sartzeko edo erabiltzeko eremuak ez dira aintzakotzat hartuko, ez eta aprobetxamendu hori Antolamendu Proiektuetan, Kudeaketarako Plan Teknikoetan edo horien aldaketetan xedatzen denarekin ez datorrenean ere.

II. KAPITULUA

Ordainketa bakarreko araubideari dagokion ordainketa banandua

13. artikulua. Laguntzarako eskubideak, ordainketa bakarra lortzeko.

1. Ordainketa bakarraren eskabidearen xede den laguntzarako eskabide oro hektarea onargarri batekin frogatu beharko da.

2. Kendu beharreko lurzatiak lehenbizi lurzatiak kentzeko eskatzaileak dituen eskubideak betearazteko erabiliko dira. Bataz betezkoa baino etekin txikiagoa duten udalerrietako lurzatietatik hasiko da, eskualdekatze planaren arabera. Gero eskubide normalak betearazteko eta lurzatiak borondatez kentzeko laguntza eskatzeko.

3. Nekazariak dituen banakako eskubideak ordainketa bakarreko araubidearen xede diren lurzatietan honelaxe aplikatuko dira: lehenbizi, zenbateko unitaterik handiena dutenak, bero balio txikiagoak dituztenak, gero 2006an erabili ez zirenak eta azkenik erreserba nazionalekoak.

4. Eskubide bereziak dituzten eskatzaileek, eremuan erabili nahi badituzte, espresuki adierazi beharko dute eta haiek laguntzarako eskubide normaltzat joko dira.

5. Eskubide bereziengatik ordainketa bakarra eskatzen duten nekazariak 1. atalean aipatzen den eginbeharretik salbuetsiko dira, erreferentziako aldian jardueraren %50ari eusten diotenena, abelburu nagusietan adierazirik.

14. artikulua. Eskubideak lagatzeko jakinarazpenak.

1. Eskubideak laga izan dituzten nekazariek Nekazaritza, Abeltzaintza eta Elikadura Departamentuari eskabide bakarrean jakinarazi beharko diote, honek onartzeko. Lagatzaileak (saltzaile edo errentatzaileak) eta lagapen-hartzaileak (erosle eta errenta-hartzaileak) sinatu beharko dute jakinarazpena. Halaber, deialdiaren I. eranskinean aipatzen diren agiriak aurkeztu beharko dira.

2. Ulertuko da lagapena ezadostaunik gabe onartu dela, jakinazpena egiten denetik sei hilabetera, Nekazaritza, Abeltzaintza eta Elikadura Departamentuak ez badu arrazoirik eman bere ezadostasuna adierazteko.

15. artikulua. Erreserba Nazionaleko eskubideetarako eskaera.

1. Nekazariek Erreserba Nazionaleko eskubideak eskatzen ahalko dituzte, 1617/2005 Errege Dekretuko 9bis artikuluan ezarririko baldintzak betetzen badituzte. Errege dekrtu horrek nekazari berriak, edozein esku-hartze publikoren menpeko ustiategiak, epai irmoak edo egintza administratibo irmoak ukitzen ditu.

2. Horretarako, eskabidea eskabide bakarrarekin batera aurkeztu beharko da, deialdi honen eranskinean aipatzen diren agiriekin.

16. artikulua. Eskabideak kentzea.

1. Hiru urtez erabiltzen ez den laguntza eskubide oro erreserba nazionalari atxikiko zaio, ezinbesteko kasuetan edo salbuespenezko inguruabarretan izan ezik.

2. Eskuarki, erreserba nazionaletik datozen eskubideak ezin izanen dira laga bost urtez, esleitzen direnetik hasita, eta bost urteko planaren urte bakoitzean erabili beharko dira.

17. artikulua. eremu onargarriak laguntza eskubide arrunten ordainketa justifikatzeko.

1. Laguntzarako eskubide arrunten aplikaziorako, onargarriak izanen dira 1618/2005 Errege Dekretuaren 12. artikuluko eremuak. Hona hemen batzuk:

a) NELIGSen alor edo olibadi bezala ageri direnak.

b) NELIGSen lur iraunkor gisa ageri direnak, abeltzaintzako primetatik datozen ordainketa bakarreko eskubideak lortu zituzten nekazarien edo gaur egun abelburuak dauzkaten nekazarien kasuetan. Kasu horietan, lur horiek ez dira adieraziko eremutzat hartuko ez Batzordearen EE 796/2004 Erregelamenduaren 50.2 artikuluaren ondorioetarako ez 1618/2005 Errege Dekretuaren 19. artikuluaren araberako eskubide erabilpenaren ondorioetarako.

2. Ez dira eremu onargarririk izanen laguntza eskubide arrunten ordainketa justifikatzeko.

a) Labore iraunkorrek hartuak, 1618/2005 Errege Dekretuaren 12.1 artikuluan aipatutakoak ez diren beste batzuk.

b) Oihanak eta nekazaritzakoak ez diren jardueretan erabilitakoak.

18. artikulua. Laguntza eskubide arruntak aplikatzen diren lurzatien erabilera.

1. Laguntza eskubide arruntak aplikatzen diren lurzatien erabilerak:

a) Nekazaritzako edozein jarduera, bai eta, ordainketa elkartuak eta belarkietarako laguntza berariazkoak eskatuz gero, haien xede diren labore lurrak ere.

b) Lur landugabeak; kasu honetan nekazaritza eta ingurumen aldetik lurzorua egoera onean mantendu beharko da, baldintzei buruzko arauekin bat.

2. Haatik, debeku hauek dira:

a) Frutak, barazkiak eta fekulatarako ez diren patatak ekoiztea, ekainaren 30a arte. Ekainaren 1etik aurrera fruten eta barazkien bigarren mailako laborantzak egiten ahalko dira.

b) Labore iraunkorrak jartzea.

19. artikulua. eremu onargarriak kentzeko laguntza eskubideak justifikatzeko.

1. Onartzen ahalko dira 1618/2005 Errege Dekretuaren 15.a) artikuluko lur eremuak. Hona hemen batzuk:

a) 2003ko NELIGSen labor-lur mota bezala ageri dena, 2007ko NELIGSen bere horretan badirau, 2007ko kanpainarako.

b) 2003ko NELIGSen aipatzen diren lurretatik, zainzuriekin, masustak eta mugurdiak landatzen dituztenak, 2007ko NELIGSen alor gisa agertzen badira, 2007ko kanpainarako.

c) 1995eko ekainaren 28aren ondoren aurkezturiko eskabidearen arabera basoberrituriko eremuak.

2. Labore lurrak kentzeko eskubideen ordainketaren justifikaziorako ez dira onartuko 2003ko NELIGSen edo 2007ko NELIGSen erabilera hauekin agertzen diren hektareak:

a) Labore iraunkorrak.

b) Oihanak eta nekazaritzakoak ez diren jardueratan erabilitakoak.

20. artikulua. Kenduriko lurren betebeharrak.

Kentzeko eskubideak pagatu direla frogaturik daukaten lurzatiak nekazaritza eta ingurumen arloko egoera onean mantenduko dira, lurgorriaren bidez, 22. artikuluan azaltzen den praktikaren arabera, edo elikagaiak sortzen ez diren laboreen bidez.

III. KAPITULUA

Eremurako ordainketa elkartuak eta laboreendako berariazkoak

21. artikulua. Ureztalurrak.

Diru hori hartu ahal izateko, ureztaketa lurtzat hartuko dira foru agindu honetako 4. artikuluan eskabideak aurkezteko aipatzen den muga-egunean NELIGSen ureztaketa esparruetan dauden nekazaritzako lurzatiak.

Bestetik, ureztalurtzat hartuko dira ureztaketa-lur bihurtzeko prozeduretan edo lurzatien berrantolamendu prozeduretan sarturiko nekazaritzako lurzatiak, katastroan hala agertzen direnak edo etorkizunean hala izatekoak direnak, Nekazaritza, Abeltzaintza eta Elikadura Departamentuak aurreko lerroaldeko data baino lehen hasi bazituen.

22. artikulua. Ohiko lugorria eta kentzeko lurrak.

1. Laguntza eskatzaileek ohiko lugorrien indizeak errespetatu beharko dituzte 1618/2005 Errege Dekretuaren I. eranskinean agindu bezala, ustiategi mota hauek salbuetsirik:

a) 2005eko kanpainan nekazaritza ekologikoko lehorreko belarkietarako laguntzen kontzesioa indarrean duten titularrak.

b) Kate-ordainetarako laguntzak 2007ko kanpainan eskuratzeko baldintza guztiak betetzen dituzten titularrak.

c) 2005eko kanpainan ustiategiean nekazaritzako praktikak egitea eta ohiko lugorriren indizea eskualdeari dagokiona baino txikiagoa duten titularrak.

Egungo egoeraren aldean beren burua kaltetuta ikusten ahal duten titularrak alde batera utzita, ustiategi mota horietan, ohiko luberri indize hauek ezarri dira: "Erriberagoiena-Aragoi" VI. eskualdeko azalen kasuan, 0 indizea; eta "Erriberabarrena" VII. eskualdekoetan, 30 indizea.

2. Lugorriko eta kendu beharreko lurrak laborantzarako baldintzetan mantenduko dira eta belar gaiztoak agertzea saihestuko, metodo hauetako bat erabiliz:

a) Laborantzako ohiko praktikak.

b) Gutxieneko lur-lantzea.

c) Landare-estaldura egokia mantentzea, edo

d) Baimenduta dauden herbizidak erabiltzea, arrisku txikikoak eta hondar-eraginik gabeak.

Gainera, lugorriak abereak larratuz mantentzen ahalko dira.

Elkarren segidako bi kanpainatan edo gehiagotan lugorri bihurtzeko edo laborantzatik kentzeko diren lurzatietan, bigarren urtetik hasita mantentze-lanak urtean behin egin beharko dira gutxienez.

23. artikulua. Borondatezko erretiratzearen portzentajea.

Ekoizleak gogoz kontra ustiategiaren egituran sarturiko aldaketengatik lurrak kentzeko ehunekoa gainditzeari buruzko 1618/2005 Errege Dekretuaren 31.2 artikuluarekin bat, baimena ematen da, Villafrancako eta Zarrakazteluko berrantolamenduak ukituriko ureztaketa-lurzatietan, 2006ko kanpainarako lurrak kentzeko ehunekoa kalte-ordainen xede den eremuaren %50 izan dadin gehienez ere.

24. artikulua. Soiaren laborantzako hazien dosia.

Soiaren laborantzan erabiltzeko gutxieneko dosia 350.000 hazi/hektareako da.

25. artikulua. Fruitu oskoldunetarako laguntza.

1. 1618/2005 Errege Dekretuaren 38.2 artikuluak aipatzen duen koefiziente zuzentzailea aplikatzea beharrezkoa bada, laguntza bat emanen da Nafarroako Gobernuaren 2007ko aurrekontu orokorren kargura, koefiziente zuzentzaileak eragindako murrizketaren adinakoa, betiere aurrekontuetan horretan erabiltzeko dirurik baldin badago eta, 120,75 euro/hektareako, gehienez ere.

2. Aurreko ataleko mugen barnean, ogibide nagusia nekazaritza duten titularren eremuetarako laguntza osagarri bat emanen da, 60,375 euro/hektareako, gehienez ere.

26. artikulua. Olibadi lurzatien kategoria.

Nafarroako Foru Komunitateko olibadi guztiak gizarte intereseko olibadien kategorian sartuko dira eta Nafarroako Foru Komunitateari dagokion zenbateko osoa esleituko zaie, 1618/2005 Errege Dekretuaren IX. eranskinean ageri dena.

27. artikulua. Olibadietarako laguntza berariazkoaren zenbatekoa, gutxi gorabeherakoa.

Nafarroako Foru Komunitateko olibadien kasuan, olibadi hektarea onargarri bakoitzeko laguntzaren batez besteko zenbatekoa 65 euro/hektareako da.

28. artikulua. Hazi ziurtatuetarako laguntzak.

Hazietarako laguntzak eskatzen dituzten nekazariek edo enpresa ekoizleek espresuk eskatu beharko dute eskabide bakarrean eta, halaber, kontratuaren kopiari berari edo, enpresen kasuan, laborantza adierazpenari erantsi. Kontratuek edo adierazpenek bat etorri beharko dute eskabide bakarrarekin.

29. artikulua. Tabakoa landatzeko laguntzak.

Laguntza hori eskatzen ahalko dute tabako gordina ekoizten duten nekazariek, baldin eta 2000, 2001 eta 2002an tabakoaren lehen eraldaketarako enpresei tabakoa emateagatik primaren bat jaso badute eta, era berean, 2002ko urtarrilaren 1etik 2005eko abenduaren 31ra bitarte ekoizpen kuotak hartu dituztenek. Ekoizleak, edo tabako ekoizleen batasun aitortu batek, eta lehen graduko eraldatzaileak 2007ko otsailaren 15a baino lehen sinatu beharko dute laborantza kontratu bat.

IV. KAPITULUA

Abeltzaintzako primak

30. artikulua. Abeltegiko abereen mantentzea.

1. Ardi eta ahuntz aziendarendako, behi ume-hazleendako primetarako eta behi ume-hazleak dituzten abeltegiendako prima osagarrirako eskubidea izateko, ekoizleak bere abeltegian mantendu beharko ditu, atxikialdietan, eskabidean aipatzen diren abere guztiak. Ardi eta ahuntz kasuan, atxikialdia 100 egunekoa izanen da eskabidea aurkezteko epea bukatu eta biharamunetik hasita. Behi ume-hazleendako primetarako eta behi ume-hazleak dituzten abeltegiendako ordainketa osagarrietarako atxikialdiak sei hilabetekoak izanen dira, eskabidea aurkeztu eta biharmanunetik aurrera. Ordainketa osagarriak kobratu ahal izateko, abeltegiko abere karga gehienez ere 1,5 abelburu larri hekteareako izanen da. Behi ume-hazleendako primak ez du abere dentsitatearen gaineko inolako baldintzarik bete beharko.

2. Behi ume-hazleen ekoizleendako primaren eskabidean eta behi ume-hazleak dauzkaten abeltegietarako ordainketa osagarriaren eskabidean, behi ume-hazleen portzentajea gutxienez ere primaren xede izan daitezkeen abere guztien %60koa izanen da eta txahalak gehienez ere %40 izanen dira. Ehuneko hauei atxikialdi osoan eutsiko zaie.

3. Behi ume-hazleen primen kasuan, ondoko hauek hartuko dira agintaritza eskudunari jakinarazitako abere-galeratzat:

a) Xede honekin idatziz egindakoak, Abeltzaintza Zerbitzuan, bajaren berri izan eta 10 egun balioduneko epean. Bertan azalduko da taldearen bizitzan berezko edo ezinbesteko arrazoiengatik gertatutako baja den, edo primari uko egin zaiolako izan den.

b) Abeltegian hildako abereak SIMOGAN datu baseari jakinaraziko zaizkio, jakin eta 10 egun balioduneko epean.

c) Nafarroan kokaturiko abeltegietan, abereak abeltegia utzi duenean, idatziz ez ezik abereen datu base informatizatuari jakinaraziz ere uko egiten ahalko zaio eskabideari hein batean.

d) Behi ume-hazleak dauzkaten abeltegietarako ordainketa osagarriaren eskabidean ulertuko da epe barruan SIMOGANi jakinarazitako primen xede izan daitezkeen abereen aldaketak Administrazioko organo eskudunari jakinarazi zaizkiola.

e) Primarako aitortzen den behi edo txahal baten ordez, atxikialdian hiltzen bada, beste behi edo txahal bat sartzen ahalko da, baldin eta aldaketa horrekin ere behi ume-hazleen ehuneko horietan behar den kopuruari eusten bazaio. Atxikialdiko ordezpen horiek 20 eguneko epean gertatuko dira, aberea hil edo txahalaren ordez behia ekartzen denetik hasita, beste abeltegi batetik ekartzen direnean. Balioko dute SIMOGANi 7 eguneko epean jakinaraziz gero, gertatzen denetik hasita eta abeltegiaren liburuan gertaeraren ondoko hurrengo hiru egunen barruan jaso badira.

4. Ahuntz azienda ekoizten dutenendako primaren eskabidean.

a) Atxikialdian zenbat ahuntz hil diren, primaren xede diren abereen artetik, hori jakin eta 10 egun balioduneko epean jakinarazi beharko da idatziz.

b) Halaber, atxikialdiko ordezpen horiek 10 eguneko epean gertatuko dira, aberea ateratzen denetik hasita, eta beranduenik ere gertatu ondoko hirugarren egunean inskribaturik egon beharko dute ekoizlearen erregistroan eta atxikialdiko ordezpen horren berri eman, hurrengo 5 egunen barruan gehienez ere, agintaritza eskudunari.

c) Ardi-esnea esnekitarako merkaturatzen duten ekoizleen kasuan, eskatutako ardi eta ahuntzak atxikialdian ordeztu ahal izanen dira, espezie bereizketarik gabe, banako-eskubideen mugen barnean, eskatutako laguntza jasotzeko eskubidea galdu gabe.

31. artikulua. Kalitateko haragiaren ekoizpenerako ordainketa osagarriak.

Behi haragiaren sektoreko ordainketa osagarrietan, ofizialki aitortutako kalitateko behikiaren ekoizpenerako ordainketa osagarria emanen zaie behikiaren abeltzainei, ofizialki aitortutako haragiaren kalitate sistema hauetako batean hildako behi bakoitzeko:

a) Jatorrizko deitura babestuak eta adierazpen geografiko babestuak.

b) Abeltzaintza ekologikoa edo integratua.

c) Behikiaren etiketak, arau orokorretan ezarritakoak baino baldintza zorrotzagoak betetzen dituela adierazteko.

32. artikulua. Esnearen sektorerako ordainketa osagarriak.

Ordainketa osagarriak esnearen sektorean esnetarako behitegiak dituzten abeltzainendako izanen dira, betiere, eskabidearekin batera eskatzen badute beren borondatez Higiene praktika egokien jarraibideetan azaldutako sisteman sartzea, 1618/2005 Errege Dekretuaren XIX. eranskinean jaso bezala.

III. TITULUA

Nekazaritza garatzeko laguntzak

33. artikulua. Nafarroako Nekazaritzako Ustiategien Erregistroko inskripzioa.

1. Nafarroako Foru Komunitateak kofinantzatutako laguntzak eskuratu ahal izateko, nahitaezkoa da Nafarroako Nekazaritzako Ustiategien Erregistroan izena emana egotea.

2. Laguntzak kudeatzen dituen organoak Nafarroako Nekazaritzako Ustiategien Erregistroan begiratuko ditu bazkideen eta haiek sozietateetan duten ehunekoen gaineko datuak, bai eta ogibide nagusia nekazaritza izatearen frogagiria ere, foru agindu honetan aipatzen diren laguntzak tramitatu ahal izateko.

3. Nafarroako Nekazaritzako Ustiategien Erregistroari buruzko Foru Legearen testu bategina onetsi zuen uztailaren 2ko 150/2002 Legegintzako Foru Dekretuaren 6. artikuluko 1 zenbakiko a) letran xedaturikoaren arabera, ustiategien titularrek erregistroan inskribatzea eska dezakete foru agindu honetan aipatzen den laguntza-eskaera bakarra egiten duten unean.

34. artikulua. Kalte-ordaina.

Eskatzailearen errenta osoa 2005eko ekitaldiari dagokio.

35. artikulua. Nafarroako Landa Garapenerako 2000-2006 Planaren ondoriozko laguntzen iraupena.

Nekazaritza ekologikorako, abeltzaintza ekologikorako eta galzorian dauden hemengo arrazak mantendu eta sustatzeko Nafarroako Landa Garapenerako 2000-2006 Planaren ondoriozko laguntzen onuradunek, kontzesioa betetzeko urteren bat falta bazaie, aukera hauek izanen dituzte:

a) Bete gabe dituzten urteetarako laguntzen urtero ordaintzea edo konpromisoa betebeharrak betetzen dituen beste titular bati eskualda dakizkiola eskatzea. Nekazaritza ekologikorako eta ekoizpen integraturako laguntzetan, laguntza pagatzeko, Nekazaritza, Abeltzaintza eta Elikadura kontseilariak otsailaren 10ean eman 41/2006 Foru Aginduan xedaturikoa hartuko da kontuan.

b) Nafarroako Landa Garapenerako 2000-2006 Planaren ondoriozko laguntzei uko egitea eta Nafarroako Landa Garapenerako 2007-2013 Plan berriaren barruan laguntza araubide berriari atxikitzea eskatzea, gutxienez ere bost urtez, laguntza horiei buruzko Nafarroako arautegiarekin bat.

XEDAPEN GEHIGARRIAK

Lehena._Landa garapenerako laguntzak.

1. artikuluko 4. atalean landa garapenerako aipatzen diren laguntzak eman eta pagatu ahal izateko, Nafarroako Landa Garapenerako 2007-2013 Plan berria onetsi beharko da.

Bigarrena._Entitate laguntzaileak.

1. Dirulaguntzei buruzko azaroaren 9ko 11/2005 Foru Legeko 10. artikuluko 3. idatz-zatian aipatzen diren pertsonek eskatzen ahalko dute 2007ko kanpainarako eskabide bakar telematikoa aurkezteko entitate laguntzaileak izatea, betebehar hauek betetzen badituzte:

a) Pertsona juridikoak izatea, beharrezkoak diren erregistroetan behar bezala inskribatuak, edo pertsona fisikoak izatea, jarduera ekonomikoen gaineko zerga pagaturik daukatenak.

b) Erakunde bat daukatela frogatzea, lana burutzeko langile eta baliabideak dauzkana.

2. Eskatzaileek erantzukizuneko aitorpen bat aurkeztu beharko du, dioena 11/2005 Foru Legeko 13. artikuluan aipatzen diren debekuetariko batean ere ez dagoela. Administrazioak ahalmena izanen du aurkezten diren adierazpen edo frogak egiazkoak direla ikertzeko.

3. Entitate laguntzaileek 11/2005 Foru Legeko 12. artikuluan aipatzen diren betebeharrak bete beharko dituzte.

4. Eskabideak aurkezteko epea 15 egunekoa izanen da, foru agindu hau argitaratzen denetik hasita, eta Nekazaritza, Abeltzaintza eta Elikadura Departamentuan aurkeztu beharko dira. Lankidetza hitzarmeneko baldintzak Nekazaritza, Abeltzaintza eta Elikadura Departamentuko bulego guztietan hartzen ahalko dira.

Hirugarrena._Abeltegiek abereak hiltzeko primen araubidean parte hartzea.

Abereak hiltzeko primen kudeaketa eta haien kontrola errazteko, abereak hiltzeko primen araubidean laguntzaile gisa parte hartu nahi duten Nafarroako Foru Komunitateko hiltegiek, aurreko kanpainetan eskatu ez badute, aldez aurretik, parte hartzen dutela jakinarazi beharko diote Nekazaritza, Abeltzaintza eta Elikadura Departamentuko Abeltzaintza Zerbitzuari, Estatuko oinarrizko arautegian aurreikusiriko moduan, eta Zerbitzu horrek ezartzen dituen kontrolen menpe jarri beharko dute eta kontrol horiekin elkarlanean aritu.

AZKEN XEDAPEN BAKARRA

Indarra hartzea

Foru agindu honek Nafarroako ALDIZKARI OFIZIALean argitaratu eta biharamunean hartuko du indarra.

Iruñean, 2007ko otsailaren 20an._Nekazaritza, Abeltzaintza eta Elikadura kontseilaria, José Javier Echarte Echarte.

ERANSKINA

Eskabidearekin batera aurkeztu beharreko agiriak

1. Xehetasun orokorrak

a) Pertsona fisikoak izanez gero, NANaren fotokopia, eta pertsona juridikoak izanez gero, IFKrena.

b) Banku-ziurtagiria, jatorrizkoa, eskabidean aipatzen den kontu korrontea edo libreta eskatzailearena dela frogatzen duena.

c) Eskabidea titularrak ez bestek izenpetzen duenean, haren baimen espresua. Eskatzailea adinez txikia bada, haren legezko ordezkari edo tutoreak espresuki bere baimena eman beharko du.

2. Eremuagatik eman beharreko laguntzen eskabideko eta bazkatokien adierazpeneko agiri osagarriak.

a) Krokis akotatuak, gehienbat lurzatien zedulak, kalte-ordainen xede diren edo bazkatokitzat aitortzen diren nekazaritzako lurzatiak non dauden adierazten dutenak, nekazariak NELIGS esparru oso baten adierazpena egiten ez duenean.

b) Bazkatokiak ekoizle batek baino gehiagok batera aprobetxatzen dituztenean, eremu horren jabeak edo legezko administratzaileak luzatzen duen ziurtagiria edo, herrilurrak izanez gero, toki entitateek luzatua, non jasoko diren beren menpeko lurzati esleituak.

c) Ardi eta ahuntz aziendarendako korralizetako bazka-aprobetxamenduaren kasuan, kalte-ordainei dagokienez, kasuan kasuko toki entitateak edo finken jabeak eman beharreko ziurtagiria. Bertan aprobetxamendu mota hauen eremuak emanen dira:

_Zuhaitz-larreak.

_Zuhaixka-larreak.

_Bazkalekuak.

_Lugorriak eta galondoak.

d) Hazi egiaztatua erosi izanaren fakturaren kopia, laguntza lihorako eta zuntzetarako kalamurako eskatzen denean edo gari gogorraren kalitaterako osagarria edo laguntza berariazkoa eskatzen denean. Azken kasu honetan lotearen zenbakia zehaztuko da.

e) Lehenbiziko hartzaileak edo lehenbiziko eraldatzaileak sinatutako kontratuaren kopia, baldin eta ekoizpenetik kendu eta orain elikagai ez den beste labore baterako erabiltzen diren lurzatietarako dirulaguntza eskatzen bada.

f) Lehen eraldatzailearekin izenpeturiko kontratuaren kopia, landaketa energetikoetarako laguntzak eskatuz gero.

g) Laguntzak hazi-ekoizpenerako aurkeztu badira, laboreen adierazpenaren kopia bat aurkeztuko da edo, halakorik bada, edo ugalketa-kontratuarena 2353/2004 Errege Dekretuko 43.2 artikuluan adierazitako datetan.

h) Olibondoak kendu edo landatu baina NELIGSen datu basean zehazten ez badira, eremua identifikatzeko krokis bat erantsiko da. Horretan adieraziko da errotik kendutako zuhaitzak (X) non zeuden, bai eta landatu direnak (o) eta jarduketa eguna ere.

i) Tabakorako laguntzak eskatuz gero, laborantza kontratuaren kopia edo erregistroko zenbakiaren aipamena.

3. Abeltzaintzako primak eskatzeko agiri osagarriak.

a) Artegien eta ahuntzegien kasuan, lurzatiak katastroaren arabera identifikatu gabe adierazten badituzte, jabearekin izenpeturiko kontratua edo entitateak luzatutako ziurtagiria aurkeztu behar da, aprobetxamendurako baimena ematen duena alegia. Jabetza partikularrak izanez gero, errentan utziriko eremua osatzen duten lurzati guztien identifikazioa. Agirian jasoko da lurzati horiek, artzantzarako erabiltzeari dagokionez, ez dituela beste ezein nekazarik erabiltzen.

b) Artegiko liburua, eskaeraren egunean gaurkotua: balantze orriarekin edo sarrera eta irteeren orriarekin.

c) Abereak hiltzeko primaren eskabidearen kasuan, behi-azienda identifikatzeko 2. agiriak aurkeztuko dira. Agiri horiek administrazioak zigilatu eta segituan emanen zaizkio bueltan eskatzaileari.

d) Behi aziendaren abeltegia Nafarroatik kanpoan badago, abeltegiko liburua.

e) Sei hilabetetik zortzi hilabetera bitarteko zekorrak hiltzeko primen eskabideetan, Espainian hilez gero, hiltegiaren ziurtagiria, aberearen, jabearen, hiltze egunaren, hiltegiaren eta kanalean duen pisuaren datuak dauzkana.

f) Abereak hiltzeko primak eskatzeko eskabideen kasuan (Espainiatik kanpo hilak direnean edo Espainiatik kanpora bidaltzekoak):

_Espainiatik kanpoan baina Europar Batasuneko estatu batean hilak baldin badira, hiltze-ziurtagiria aurkeztu beharko da eta horrekin batera behi aziendaren identifikazio-agiriaren 2. alea. Administrazio Publikoak izenpetu eta eskatzaileari itzuliko dio. Kanalaren pisua frogatu behar izanez gero, hilketa-ziurtagirian jaso beharko da.

_Abereak Europar Batasunetik kanpoko estatu batean saltzekoak baldin badira, Europar Batasuneko aduanetatik atera izanaren froga aurkeztu beharko da eta horrekin batera Nazioarteko Osasun Ziurtagiria, prima eskatzeko abereen zerrenda daramana, horrela frogatuko baita agiriz haien esportazioa.

g) Behi aziendaren sektorean, ordainketa osagarriak eskatzen dituztenen lehen graduko ahaideen zerrenda, 1618/2005 Errege Dekretuaren 80.3 artikuluan ezarritako aldaketa aplikatzeko, beren eskaerak berriro aztertuak izatea nahi badute. Familia liburuak ere aurkeztuko dira, eskatzaileak alegatutako ahaidetasuna frogatzeko.

4. Kalte-ordaina eskatzeko agiri osagarriak.

a) Egoitza-ziurtagiria, kasuan kasuko toki entitateak luzatua, zeinetan aipatuko baita zenbateko antzinatasuna duen udal erroldan.

b) Nekazari kooperatiba bateko bazkide dela frogatzen duten agiriak, hala bada.

c) Ustiategian nekazaritzako produktuak eraldatzen dituztela frogatzen duten agiriak, hala bada (jarduerarako lizentzia, produktuen etiketa ezaugarriak...).

d) Artegien eta ahuntzegien kasuan, belarkietarako bazkatokiak adierazten direnean lurzatiak katastroaren arabera identifikatu gabe, jabeak edo entitateak luzatutako ziurtagiria aurkeztu behar da, aprobetxamendurako baimena ematen duena alegia. Ziurtagiri horretan bereiz agerraraziko dira eremu guztiak: larrea, zuhaixka-larrea, zuhaitz-larrea, galondoa eta lugorria.

5. Nekazaritzako ingurumenaren arloko laguntzak ordaintzeko eskabidearen agiri osagarriak.

Kontzesioa osorik edo hein batean eskualdatuz gero, eskualdaketaren agiria, behar bezala betea aurkeztu beharko da. Horretan agertuko dira: saltzailearen izen-deiturak, haren NANa edo IFK, eroslearen izen-deiturak, haren NANa edo IFK eta erosleak epeak diraueino mantentzeko konpromisoa hartzen duen eremua, labore multzoen araberakoa.

6. Galzorian dauden hemengo arrazak babesteko laguntza eskaeren agiri osagarriak.

Landa Garapenerako 2007-2013 Plan berriaren arabera beste konpromiso bati atxikitzen zaizkion abeltzaineek ziurtagiri edo txostena aurkeztu beharko dute, albaitari batek luzatua, non abeltegiak abereen ongizate arauak betetzen dituela adieraziko baita.

7. Eskubideak lagatzeko agiri osagarriak.

7.1. Transferentzia mota frogatzen duten agiriak:

7.1.1. Lurrik gabeko eskubideen sal-erosketa edo behin betiko lagapena:

_Eskubideak lagatzeko eskaera, eskatzaileak eta lagatzaileak sinatua.

7.1.2. Eskubide lurdunen sal-erosketa edo behin betiko lagapena:

_Eskubideak lagatzeko eskaera, eskatzaileak eta lagatzaileak sinatua.

_Lurren sal-erosketako kontratua, publikoa edo pribatua, zerga guztiak kitaturik.

7.1.3. Eskubide lurdunen errentamendua.

_Eskubideak lagatzeko eskaera, eskatzaileak eta lagatzaileak sinatua.

_Lurrak errentan uzteko kontratua, zerga guztiak kitaturik, edo Nafarroako Gobernuaren landa errentamenduen erregistroan inskribatua.

7.1.4. Jaraunspenak, nortasun juridikoaren aldaketak, bategiteak eta bereizketak:

Eskaturiko inguruabarra modu fede-emailean frogatzen duten agiri publikoak (jaraunspena onartzeko eskritura, IFK berriaren fotokopia, bategite edo bereizte agiri publikoak).

7.1.5. Errentamendua garaia baino lehen bukatzea:

_Erabakia frogatzen duten agiriak edo errentamendua garaia baino lehen bukatzeko zergatikoa.

7.2. Nekazarien eta ustiategiaren baldintzak frogatzen dituzten agiriak:

7.2.1. Nekazari profesionala izatea.

7.2.1.1. Nafarroako nekazaritzako ustiategien Erregistroan ogibide nagusia duen nekazari gisa inskribaturik egon ezik:

_Ogibide nagusia nekazaritza duela frogatzea, 2005eko errentaren aitorpenaren kopia aurkeztuz, eta, bidezko bada, Nekazaritzako Ustiategiak Modernizatzeko uztailaren 4ko 19/1989 Legeko 2. artikuluko 5. idatz-zatian aipatzen diren jarduera osagarriak egin direla frogatzen duten agiriak.

_Gizarte Segurantzako nekazaritza araubide berezian bere konturako langile gisa alta emanda dagoela frogatzen duen agiria, edo bere konturako langileen edo autonomoen araubide berezian, bere nekazaritza jarduera zein den.

7.2.1.2. Elkarte gisako nekazaritzako ustiategia Nafarroako nekazaritzako ustiategian inskribaturik ez badago:

_Nafarroako nekazaritzako ustiategien erregistroari buruzko foru legearen testu bategina onesten duen uztailaren 2ko 150/2002 Legegintzako Foru Dekretuko 11. artikuluan eskatzen diren betebeharrak betetzen dituela frogatzea.

7.2.2. Lanean hasten den nekazaria izatea.

_Titularraren eta, bidezko bada, ezkontidearen 2005eko errentaren aitorpenaren kopia, erosle edo lagapen-hartzailearen ezkontidea ez dela nekazaria egiaztatzeko eta, nekazaria bada, senar-emazteen araubide ekonomikoa ez dela irabazpidea.

_Eroslea edo lagapen-hartzailea Gizarte Segurantzako nekazaritza araubide berezian bere konturako langile gisa alta emanda dagoela frogatzen duen agiria, edo bere konturako langileen edo autonomoen araubide berezian, bere nekazaritza jarduera zein den.

_Erosle edo lagapen-hartzaileak 2007rako kanpainan eskabide bakarra aurkeztu ezik, frogatu beharko du nekazaritza ustitategiaren titularra edo titularkidea dela.

8. Erreserba nazionalerako eskubideak eskatzeko agiri osagarriak.

8.1. Nekazari berriak:

_Eskatzailea Gizarte Segurantzako Nekazarien Araubide Berezian bere kontu dagoela frogatzen duen agiria edo nekazaritzan aritzeagatik bere kontura diharduten langileen edo langile autonomoen Araubide Berezian, nekazaritzan hasi zenez geroztik, eta betiere eskabide bakarra aurkezteko epea bukatzean.

_Eskatzailearen eta, bidezko bada, ezkontidearen 2005eko errentaren aitorpenaren kopia, eskatzailearen ezkontidea ez dela nekazaria egiaztatzeko eta, nekazaria bada, senar-emazteen araubide ekonomikoa ez dela irabazpidea.

_Nekazari berria izateaz gain, nekazari gaztea izanez gero, NANaren kopia.

_Eskatzailea sozietate bat baldin bada, osaera eskrituren kopia edo sozietateko bazkideak zehazten dituen beste agiri bat, bazkide guztiak nekazari berriak direla egiaztatzeko.

8.2. Edonolako esku-hartze publikoari buruzko berregituratze edo garatze programen menpe dauden eremuetan ustiategiak dituzten nekazariak.

_Lurzati berrantolamenduari buruzko behin betiko erabakia hartu zeneko eguna, eremua lurzati berrantolamenduagatik edo ureztalurrak lehorreko bihurtzeagatik gutxitu dela frogatzeko.

_Erreserba nazionalaren azken esleipenean kuotaren edo ardi eskubideen esleipena frogatzen duen agiri publikoa.

8.3. Eskubideak hartzeko edo zenbatekoa gehitzeko legitimaturiko nekazariak, epai irmo baten edo egintza administratibo irmo baten ondorioz:

_Ordainketa bakarraren eskubideen zenbatekoaren esleipena edo gehitzea dakarren epai irmo edo egintza administratibo irmoaren kopia.

Iragarkiaren kodea: F0703186