27. ALDIZKARIA - 2007ko martxoaren 2a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

8/2007 FORU AGINDUA, urtarrilaren 30ekoa, Vianako Printzea Erakundea-Kultura eta Turismo kontseilariak emana, "Nafarroako udaletan eta kontzejuetan aritzen diren kultur kudeaketako teknikarien prestakuntzarako laguntzak" izeneko deialdia aurrera eramateko 3.000,00 euroko gastua baimendu, laguntzak arautzen dituzten xedapenak onetsi eta Nafarroako ALDIZKARI OFIZIALean argitaratzeko agindua ematen duena.

Ikusirik Kultura Zuzendaritza Nagusiko Kultur Ekintza Zerbitzuaren txostena, eta Nafarroako udaletan aritzen diren kultur teknikarien prestakuntzan laguntzeko asmoz, 3.000,00 euroko gastua baimentzen da, "Nafarroako udaletan eta kontzejuetan aritzen diren kultur kudeaketako teknikarien prestakuntzarako laguntzak" izeneko deialdia aurrera eramateko; halaber, laguntzak arautzen dituzten xedapenak onetsi eta Nafarroako ALDIZKARI OFIZIALean argitaratzeko agindua ematen da.

Horrenbestez, Vianako Printzea Erakundea-Kultura eta Turismo Departamentuaren egitura organikoa ezarri zuen maiatzaren 16ko 73/2005 Foru Dekretuak ematen dizkidan eskurantzak erabiliz,

AGINDU DUT:

1. 2007ko aurrekontuko "Udalen kultur ekitaldietarako laguntzak" izeneko A20002-A2510-4609-335100 kontusailaren kargura, 3.000,00 euroko gastua egiteko baimena ematea. Gastu hori "Nafarroako udaletan eta kontzejuetan aritzen diren kultur kudeaketako teknikarien prestakuntzarako laguntzak" izeneko deialdirako da.

2. "Nafarroako udal eta kontzejuetan aritzen diren kultur kudeaketako teknikarien prestakuntzarako laguntzak" izeneko deialdia arautzen duten arauak onetsi eta Nafarroako ALDIZKARI OFIZIALean argitaratzeko agindua ematea.

Iruñean, 2007ko urtarrilaren 30ean._Vianako Printzea Erakundea-Kultura eta Turismo Departamentuko kontseilaria, Juan Ramón Corpas Mauleón.

I. ERANSKINA

Nafarroako udal eta kontzejuetan aritzen diren kultur kudeaketako teknikarien prestakuntzarako laguntzak

ARAUAK

1._Xedea eta helburua.

Nafarroako Gobernuko Vianako Printzea Erakundea-Kultura eta Turismo Departamentuak deialdi hau egiten du Nafarroako udal eta kontzejuetan aritzen diren kultur kudeaketako teknikariek 2007ko urtarrilaren 12tik azaroaren 25era bitarte kultur kudeaketaren arloko prestakuntza jarduerak egiteko dirulaguntzak emateko, horrela haien garapen profesionala sustatuz.

2._Aurrekontua eta laguntzaren diru kopurua.

Dirulaguntza hauek, gehienez ere 3.000,00 euro, Kultura Zuzendaritza Nagusiaren gastuen aurrekontuko A20002-A2510-4609-335100 kontusailaren kargura finantzatuko dira.

3._Dirulaguntzen pilaketa eta bateragarritasuna.

Vianako Printzea Erakundea-Kultura eta Turismo Departamentuaren diru-ekarpena bateragarria izanen da Nafarroako Gobernuko beste departamentu batzuek, beste administrazio publiko batzuek, beste entitate publiko edo pribatuek edo partikularrek ematen dituzten dirulaguntza guztiekin. Dirulaguntzen zenbatekoa ezin da inola ere izan, bakarrik edo beste dirulaguntza, laguntza, dirusarrera edo berezko baliabide batzuekin baturik, onuradunak egin beharreko jardueraren kostua baino handiagoa.

4._Onuradunak eta betebeharrak.

4.1. Deialdi honetako dirulaguntzak eskuratu nahi dituzten udalek eta kontzejuek ondoko betebeharrak izanen dituzte:

a) Kultur kudeaketako teknikariak edukitzea, lan kontratudun finkoak izan edo funtzionarioak izan, gutxienez lanaldi erdian kultur kudeaketara emanak, eta 6. puntuan ezarritako dokumentazioa aurkeztea 5. puntuan finkatutako epean.

b) Kultura Zuzendaritza Nagusiko Kultur Ekintza Zerbitzuak diruz lagundutako programa eta datuak egiaztatzeko eskatzen duenean, hori onartzea.

c) Deialdi honetan diruz lagundutako programa egiteko erabiltzea dirulaguntza, ez beste edozertarako.

d) Programa aurrera eramatean egiten diren aldaketen berri ematea lehenbailehen. Proiektuan edozein aldaketa sartzeko Vianako Printzea Erakundea-Kultura eta Turismo Departamentuko kontseilariaren adostasuna behar da, eta honek baimena emanen du baldin eta aldaketak onetsitako programa funtsean aldatzen ez badu.

e) Diruz lagundutako prestakuntza ekintzaren gastu osoa justifikatzea, 10. puntuan azaldu bezala.

5._Eskabideak aurkeztea.

5.1. Eskabideak eta eskatutako dokumentazioa aurkezteko epea hilabetekoa izanen da, arau hauek Nafarroako ALDIZKARI OFIZIALean argitaratu eta biharamunetik hasita.

5.2. Laguntzaren eskabideak, deialdi honetako I. eranskinean ageri den ereduarekin bat, Vianako Printzea Erakundea-Kultura Departamentuko Erregistroan aurkeztuko dira (Navarrería, 39, 31001 Iruña), edo ekainaren 24ko 137/2002 Foru Dekretuan aipatzen den edozein erregistrotan. Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeko 38.4 artikuluan ezarritako moduan ere igortzen ahal dira eskabideak. Azken kasu honetan 848 42 46 24 faxean jakinarazi beharko da kasuan kasuko postetxean aurkeztu direla agiriak, epearen barruan igorri direla frogatzen duen agiria erantsiz.

6._Eskatutako dokumentazioa.

6.1. Eskabideekin batera ondoko agiriak aurkeztu beharko dira:

a) Laguntza eskatzen duen toki entitatea.

b) Kultur kudeaketako teknikariaren izendapenaren edo harekin sinatutako kontratuaren fotokopia konpultsatua, kultur kudeaketan aritzeko orduen kopurua zehaztuta (lanaldi erdia, osoa edo dagokiona).

c) Entitate eskatzailearen adierazpena, laguntzaren onuradun izateko debekuetan ez dagoela dioena, Dirulaguntzei buruzko azaroaren 9ko 11/2005 Foru Legeko 13. artikuluko 7. idatz-zatiarekin bat.

d) Teknikariak egin gogo duen prestakuntza ekintzaren deskribapena, xehetasun eta guzti. Horrekin batera egitaraua, zentroa, irakasleak, ordu kopurua edo denbora tartea, etab. aipatuko dira.

e) Aurrekontua, sailka adierazia: matrikula, joan-etorriak eta egonaldia (ostatua eta mantenua).

f) Zerga betebeharrak eta Gizarte Segurantzari dagozkionak egunean izatearen ziurtagiriak.

6.2. Dirulaguntzaren eskabidea oso-osorik beteta egon ez edo eskaera baloratzeko aspektu garrantzitsuren bat behar bezala egiaztaturik ez badago, eskatzaileari akats edo hutsunea zuzentzeko eskatuko zaio. Horretarako, gehienez ere 10 egun balioduneko epea emanen zaio, hori jakinarazi eta ondoko egunetik hasita.

7._Instruitu eta ebaluatzeko organo eskudunak.

7.1. Kultur Ekintza Zerbitzua da laguntzak emateko prozedura instruitzeko organo eskuduna.

7.2. Eskabideak baloratzeko batzorde bat osatuko da. Kultura zuzendari nagusia izanen da batzordeburua. Batzordeak, gainera, kide hauek izanen ditu: Kultur Ekintza Zerbitzuko zuzendaria, Kultur Jardueren Ataleko burua, Kultur Sustapenaren Bulegoko burua eta Kultur Jardueren Atalari atxikitako teknikari bat. Bere erabakia hobeki oinarritzeko, batzordeak eskatzaileei eskatzen ahalko dizkie behar dituen agiri osagarri guztiak eta kanpoko adituen aholkularitza ere eskatzen ahalko du.

7.3. Kultur Ekintzako Zerbitzuak, Ebaluazio Batzordearen akta ikusirik, deialdiaren gainean ebazteko proposamena aurkeztuko du.

8._Balorazio irizpideak.

8.1. Laguntzak esleitzeko, irizpide hauek hartuko dira kontuan:

a) Prestakuntza ekintzaren maila eta bestelako ezaugarriak, gehienez 5 puntu.

b) Prestakuntza zentroaren esperientzia eta kualifikazioa, gehienez 2 puntu.

c) Prestakuntza arloek Kultura Ekintza Zerbitzuaren programekin duten zerikusia, gehienez 2 puntu.

d) Dirulaguntza jasoko duten teknikarien kualifikazio profesionala, gehienez puntu bat.

8.2. Laguntza hartu ahal izateko gutxienez ere 5 puntu lortu beharko dira.

9._Laguntza emateko ebazpena.

9.1. Laguntzak eman edo ukatzeko erabakia Nafarroako Gobernuko Vianako Printzea Erakundea-Kultura kontseilariak hartuko du foru agindu bidez. Deialdiaren diru kopurua, osorik edo parte bat, eman gabe utzi liteke. Erabakia gehienez ere hiru hilabeteko epean hartuko da, eskabideak aurkezteko epea bukatzen denetik hasita.

9.2. Deialdia ebazten duen foru agindua Vianako Printzea Erakundea-Kultura eta Turismo Departamentuko iragarki oholean argitaratuko da, eta laguntzen onuradunak diren toki entitateei jakinaraziko zaie.

9.3. Laguntzaren zenbatekoa prestakuntza programak lortzen duen puntuazioaren araberakoa izanen da, betiere onartzen den aurrekontuaren %50 gehienez. Udalak gainerako zatia hartu beharko du bere gain.

9.4. Dirulaguntza jakinarazi ondotik, toki entitateek idatziz adierazi beharko dute zenbatekoarekin ados daudela, jakinarazpena jaso eta 15 eguneko epean, eta hitza emanen dute berek ordainduko dutela aurrekontuaren eta emandakoaren arteko aldea. Epe hori pasatu eta idatziz adostasuna adierazi ezean, laguntzari uko egiten diotela ulertuko da.

9.5. Arau hauek betearazteko ematen diren egintzen aurka administrazioarekiko auzi-errekurtsoa jartzen ahalko da, Nafarroako Auzitegi Nagusiko Administrazioarekiko Auzien Salari zuzendua, bi hilabeteko epean, errekurtsoaren xede den egintza jakinarazi edo argitaratu eta biharamunetik hasita. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legeko 44. artikuluan aurreikusitako moduan eta epean.

10._Ordainketa, eta justifikatzeko epea eta modua.

10.1. Laguntzak bi epetan ordainduko dira: %50a 9.4 puntuan aipatutako adostasuna jasotakoan, eta gainerako %50a jarduera bukatu eta gero, Kultur Ekintza Zerbitzuak adostasun txostena emandakoan.

10.2. Bigarren epea ordaintzeko baldintza izanen da ondoko frogagiriak 2007ko azaroaren 30a baino lehen aurkeztea:

a) Diruz lagundutako prestakuntza-ekintzari buruzko memoria, kultur teknikariak prestatua. Jarduerak nolako interesa izan duen adierazi beharko du eta jasotako prestakuntzaren erabilgarritasuna neurtzeko baliagarri izan daitekeen informazioa.

b) Udaleko idazkariaren edo kontu-hartzailearen ziurtagiria, alkateak ontzat emana, onartutako prestakuntza programaren gaineko honako datu hauek azaltzen dituena:

1._Ordainketaren kontabilitate agiriaren zenbakia.

2._Gastuaren kontabilizazio agiriaren zenbakia.

3._Gastua justifikatzeko agiriak eta entitatea (Toki entitateei frogagiri gisa aurkezten zaizkien fakturak maiatzaren 17ko 205/2004 Foru Dekretuaren arabera egin beharko dira. Dekretu horren bidez, fakturatu beharrak arautzen dituen erregelamendua onetsi zen).

4._Zenbatekoa (BEZa barne).

10.3. Dirulaguntza hartu duen programaren gastu osoa justifikatu beharko da. Onartutako programan ageri zen gastua baino gutxiago justifikatzen bada, dirulaguntza murriztuko da, laguntzaren portzentaje berberak mantentzeko.

10.4. Onuradunari, diruz lagunduriko prestakuntza ekintza burutu dela behar bezala frogatu ezik, aurrerakin gisa kobraturiko dirua itzul dezala eskatuko zaio, osorik edo parte bat, proportzionaltasun printzipioari jarraikiz.

11._Arau-hausteak eta zehapenak.

11.1. Arau-hauste eta zehapenei dagokienez, Nafarroako Foru Komunitatearen eta haren erakunde autonomoen dirulaguntzak eman eta kontrolatzeko araubide orokorra erregulatzen duen azaroaren 9ko 11/2005 Foru Legeko 42. eta 43. artikuluetan ezarritakoari jarraikiz jokatuko da.

11.2. Zehapen prozedura Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean ezarritakoa izanen da.

12._Dirulaguntzen araubide orokorra.

Deialdiko arau hauetan aipatzen diren laguntzak Dirulaguntzei buruzko azaroaren 9ko 11/2005 Foru Legean xedaturikoarekin bat etorriko dira.

II. ERANSKINA

Eskabide eredua

...................................... jaun/andreak, NAN/IFZ ............, helbidea ..................... kalean duenak, ............ udalerrian, ............ telefono zenbakia, bere izenean edo ...................................... jaunaren/andrearen izenean (ezabatu egia ez dena), NAN/IFZ ........................., helbidea ..................... kalean duenak, ............ udalerrian, ............ telefono zenbakia, hura ordezkatuz,

"Nafarroako udal eta kontzejuetan aritzen diren kultur kudeaketako teknikarien prestakuntzarako laguntzak" eskuratzeko eskabidea, .........(e)ko ........aren ......(eko) ..../200.... Foru Aginduaren bidez onetsiriko arauei jarraituz (Nafarroako ALDIZKARI OFIZIALa ..... zk., 200...(e)ko ...............aren ....(e)koa).

Hona hemen aurkezten ditudan agiriak:

1._Kultur kudeaketako teknikariaren izendapenaren edo harekin sinatutako kontratuaren fotokopia konpultsatua.

2._Entitate eskatzailearen adierazpena, laguntzaren onuradun izateko debekuetan ez dagoela dioena, Dirulaguntzei buruzko azaroaren 9ko 11/2005 Foru Legeko 13. artikuluko 7. idatz-zatiarekin bat.

3._Teknikariak egin gogo duen prestakuntza ekintzaren deskribapena, xehetasun eta guzti. Horrekin batera egitaraua, zentroa, irakasleak, ordu kopurua edo denbora tartea, etab. aipatuko dira.

4._Aurrekontua, sailka adierazia: matrikula, joan-etorriak eta egonaldia (ostatua eta mantenua).

5._Zergen arloko betebeharrak eta Gizarte Segurantzari dagozkionak beteak izatearen ziurtagiriak.

Datu Pertsonalak Babesteari buruzko abenduaren 13ko 15/1999 Lege Organikoarekin bat dator. Lorturiko datuak dirulaguntzetarako deialdi honen espedientea tramitatzeko erabiliko dira bakar-bakarrik. Interesatuek aurka egiteko eta datuak eskuratu, zuzendu eta ezabatzeko eskubidea erabiltzen ahalko dute.

Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeko hemezortzigarren xedapen gehigarriko 3. idatz-zatian aurreikusitakoaren ondorioetarako, eskabidea aurkezteak berarekin dakar interesatuak organo kudeatzaileari baimena ematea Zerga Administrazioaren Estatuko Agentziak, Nafarroako Zerga Ogasunak eta Gizarte Segurantzaren Diruzaintza Orokorrak luzatu beharreko ziurtagiriak eskatzeko.

...........(e)n, 200....(e)ko .......aren ....(e)an.

(Sinadura)

NAFARROAKO GOBERNUA. VIANAKO PRINTZEA ERAKUNDEA-KULTURA ETA TURISMO DEPARTAMENTUA.

Iragarkiaren kodea: F0701714