I. NAFARROAKO FORU KOMUNITATEA
1.1. XEDAPEN OROKORRAK
1.1.1. Foru Legeak eta Legegintzako Foru Dekretuak
18/2007 FORU LEGEA, azaroaren 13koa, alderdi politikoei 1.218.371 euroko kreditu berezia ematekoa, Nafarroako Parlamenturako 2007ko hauteskundeetako gastuak finantzatzeko dirulaguntza gisa.
NAFARROAKO GOBERNUKO LEHENDAKARIA NAIZEN HONEK
Aditzera ematen dut Nafarroako Parlamentuak onetsi duela honako
FORU LEGEA, ALDERDI POLITIKOEI 1.218.371 EUROKO KREDITU BEREZIA EMATEKOA, NAFARROAKO PARLAMENTURAKO 2007KO HAUTESKUNDEETAKO GASTUAK FINANTZATZEKO DIRULAGUNTZA GISA.
Nafarroako Parlamentuko hauteskundeak arautzen dituen azaroaren 17ko 16/1986 Foru Legeak bere 44. artikuluan ezarri duenaren arabera, Nafarroako Foru Komunitateak dirulaguntzak emanen dizkie alderdi politiko, federazio, koalizio eta hautesle-elkarteei, hauteskundeetako gastuak finantzatzeko.
Foru lege beraren 48. artikuluak xedatuaren arabera, Nafarroako Gobernuak, Comptos Ganberak hauteskundeetako kontabilitateei buruzko txostena igorri eta ondoko hilabetean, foru lege baten proiektua aurkeztuko dio Nafarroako Parlamentuari, esleitu beharreko dirulaguntzen zenbatekoa hartzen duen kreditu berezia emateko; aipatu dirulaguntzak, aldiz, Parlamentuak proiektua onetsi eta ondoko hogeita hamar eguneko epean ordaindu beharko dira.
Foru lege honen xedea hauxe da: indarra duen hauteskunde araudian ezarritako agindua betetzea, 2007ko maiatzaren 27an Nafarroako Parlamenturako egindako hauteskundeek sortutako gastuak finantzatzen laguntzearren.
1. artikulua. Alderdi politiko, federazio, koalizio edo hautesle-elkarteentzako dirulaguntza gisa 1.218.371 euroko kreditu berezia ematea onetsi da, 2007ko maiatzaren 27an Nafarroako Parlamenturako egin ziren hauteskundeen gastuak finantzatzeko. Aipatu kredituaren zenbatekoa 2007ko Nafarroako Aurrekontu Orokorren kontusail honi aplikatuko zaio: 010001-00001-4819-921100; izena, "Alderdi politikoentzako dirulaguntzak".
2. artikulua. Kreditu berezi hori 2007ko Nafarroako Aurrekontu Orokorretako "Aurreko ekitaldietako superabitaren aplikazioa" izeneko 112000-11400-8700-000000 kontusailean izandako dirusarrera handiagoen kargura finantzatuko da.
Azken xedapena.-Foru lege honek Nafarroako ALDIZKARI OFIZIALean argitara eman eta biharamunean hartuko du indarra.
Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako ALDIZKARI OFIZIALean berehala argitara eta "Estatuko Aldizkari Ofizialera" igor dadila agintzen dut eta herritar eta agintariei bete eta betearaz dezatela manatzen diet.
Iruñean, 2007ko azaroaren 13an.-Nafarroako Gobernuko lehendakaria, Miguel Sanz Sesma.
Iragarkiaren kodea: F0717570
