I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
16/2007 EBAZPENA, irailaren 21ekoa, Antolaketaren, Kalitatearen eta Berrikuntzaren zuzendari nagusiak emana, Nafarroako Hezkuntza Bereziko ikastetxe publikoetako ikasleen guraso elkarteei (GE) laguntzak emateko prozedurari dagokion deialdia onesten duena, 2007ko irailetik abendura bitartean lanaldi bakarreko egunetan jantokiko zerbitzuaren kudeaketa osagarria egiteko.
Dibertsitate, Kultura-aniztasun eta Immigraziorako Zerbitzuko zuzendariak adostasun txostena aurkeztu du, Hezkuntza Bereziko ikastetxe publikoetan, lanaldi bakarreko egunetan, jantokiko zerbitzua berregituratzeko dirulaguntza ematea onets dadin. Laguntza hauen xedea da, proposatu bezala zerbitzua zabalduz, ikasturteko egun guztietan ohiturak bermatzea oso espazio egituratuetan, langileen parte-hartzearekin eta laguntza egonkorrarekin.
Dirulaguntzei buruzko azaroaren 9ko 11/2005 Foru Legea ikusirik, eta Nafarroako Foru Komunitateko Administrazioa arautzen duen abenduaren 3ko 15/2004 Foru Legearen 22.1. artikuluko d) letrak ematen dizkidan ahalmenak erabiliz, Nafarroako Foru Komunitateko Administrazioaren oinarrizko egitura organikoa ezartzen duen abuztuaren 20ko 57/2007 Foru Dekretuaren 5.2 artikuluari loturik,
EBATZI DUT:
1. Nafarroako Hezkuntza Bereziko ikastetxe publikoetako ikasleen guraso elkarteei (GE) laguntzak emateko prozedurari dagokion deialdia onestea, 2007ko irailetik abendura bitartean lanaldi bakarreko egunetan jantokiko zerbitzuaren kudeaketa osagarria egiteko.
2. Deialdia arautuko duten oinarriak onestea. Oinarriok ebazpen honen eranskinean ageri dira.
3. Deialdia ebazten duen ebazpenean emanen diren laguntzak ordaintzeko, baimentzea 24.708,03 euroko gastua (BEZa barne), 2007ko gastuen aurrekontutik, "Hezkuntza Berezirako Bekak eta dirulaguntzak" izeneko 423001-41610-4809-322400 kontusailaren kontura. Diru kopuru hori handitu ahalko da kontusailaren aurrekontua handituz gero.
4. Ebazpen hau eta bere eranskina Nafarroako ALDIZKARI OFIZIALean argitaratzea eta Hezkuntza Bereziko ikastetxe publikoetako ikasleen guraso elkarteei (GE) jakinaraztea.
5. Ebazpen hau eta bere eranskina igortzea Dibertsitate, Kultura-aniztasun eta Immigraziorako Zerbitzuari, Ikastetxeen eta Ikasketetarako Laguntzen Zerbitzuari, Zerbitzuak Ikuskatzeko eta Ikuskapen Teknikorako Zerbitzuari, Giza Baliabideen Zerbitzuari, Nafarroako Hezkuntza Bereziko ikastetxe publikoei eta beren ikasleen guraso elkarteei (GE), behar diren ondorioak izan ditzan.
Iruñean, 2007ko irailaren 21ean._Antolaketaren, Kalitatearen eta Berrikuntzaren zuzendari nagusia, Teresa Aranaz Jiménez.
ERANSKINA
Oinarriak
1._Helburua eta aplikazio eremua.
Deialdi honen xedea da Hezkuntza Bereziko ikastetxe publikoetako ikasleen gurasoen elkarteei dirulaguntza ematea 2007ko irailetik abendura bitarterako. Dirulaguntza horren bidez jantokiko zerbitzuaren kudeaketa osagarria ordainduko da, zati batean, aipatu Hezkuntza Bereziko ikastetxeetan jardun bakarreko egunetan (2007ko iraileko eskola egunetan eta urritik abendura bitarteko asteazken guztietan), Nafarroako Foru Komunitateko erroldan diren ikasleentzako.
2._Entitateen betebeharrak.
2.1. Deialdi honen ondorioetarako, Hezkuntza Bereziko ikastetxeetako ikasleen gurasoen elkarteek (GE) baldintza hauek bete behako dituzte:
a) Legez eratutako pertsona juridikoa izan eta dagokion erregistroan inskribatua egotea.
b) Irabazi asmorik ez izatea.
c) Egoitza izatea Nafarroako Foru Komunitatean. Oinarri honetako a) atalak aipatzen duen erregistroko inskripzioaren bidez egiaztatu beharko da hori.
d) Helburuak bete ahal izateko egitura egokia eta giza baliabide eta baliabide material nahikoak izatea eta proposaturiko helburuak lortzeko behar den esperientzia eta gaitasun operatiboa frogatzea.
e) Nafarroako Foru Ogasunarekiko eta Gizarte Segurantzarekiko zor guztiak kitatuak izatea.
f) Aldez aurretik helburu berberako dirulaguntzarik jaso badu, erakundeak egiaztatu egin beharko du betetzen dituela proiektuarentzako dirulaguntzak eman zituzten ebazpenetan ezarritako beharkizunak.
3._Jantokiko zerbitzua zabaltzeko dirulaguntzetarako eskaerak egiteko betebeharrak.
3.1. Dirulaguntza jasotzeko, proiektuek baldintza hauek bete beharko dituzte:
a) Deialdi honen lehenbiziko oinarriaren printzipioetara egokitzea.
b) Gurasoen Elkarteak erantzukizun zibileko aseguru bat kontratatzea jantokiko zerbitzuaren berregituraketaren ondorioz ikasle guztiak ikastetxeetan diren orduetarako.
c) Familiek onartzea jantokiko zerbitzuaren berregituraketaren ondorioz izanen den garraioaren ordutegiaren aldaketa, zerbitzu hori ez bikoizteko xedez.
d) Dirulaguntzek zati batean ordainduko dituzte jantokiko zerbitzuari dagozkion menuetarako eta langileentzako (arduradunak, administraria eta zaintzaileak) gastuak.
e) Lanaldi bakarreko egunetan jantokiko zerbitzua Hezkuntza Bereziko ikastetxeen baliabideekin eta lanaldi zatikatuko gainerako egunetan menuez hornitzen duten enpresen baliabideekin eginen da. Horrela, lanaldi bakarreko egunetako jantokiko zerbitzua gainerako egunetako baldintza berdinetan eskainiko dela bermatuko da.
4._Eskaerak aurkezteko epea.
4.1. Hezkuntza Bereziko ikastetxe publikoetako ikasleen gurasoen elkarteek eskaera aurkezteko duten epea 10 egun naturalekoa izanen da, gurasoen elkarteei deialdi honen berri eman eta biharamunetik hasita.
4.2. Eskaerak Nafarroako Gobernuko Erregistro Orokorrean aurkeztuko dira edo Hezkuntza Departamentuko Erregistroan (Santo Domingo kalea, 8), edo, bestela, Herri Administrazioen Araubideari eta Administrazio Prozedura Erkideari buruzko Legearen 38. artikuluko 4. idatz-zatian aipatzen diren tokietako edozeinetan.
5._Agiriak.
5.1. Eskabide orokorraren inprimakia, gurasoen elkartea legez ordezkatzen duen pertsonak sinatua eta agiri hauekin batera:
5.1.1. Elkarteari buruzko dokumentazio orokorra (Hezkuntza Departamentuaren esku ez balego edo dokumentazioaren edukia aldatuko balitz):
a) Elkarte edo entitatearen estatutuak.
b) Legezko helbidea.
c) Legezko ordezkariaren kredentzialak.
d) Inskripzioen ziurtagiriak:
_Nafarroako Gobernuko Lehendakaritza, Justizia eta Barne Departamentuko Elkarteen Erregistroko inskripzioaren egiaztagiria.
_Nafarroako Gobernuko Eskola eta Lanbide Irakaskuntzaren Zuzendaritza Nagusiko Hezkuntza Bereziko Ikastetxeen Erregistroko inskripzioaren egiaztagiria.
_Izaera juridikoa dela medio, dagokion beste edozein inskripzioren egiaztagiria.
e) Identifikazio fiskaleko txartela.
5.1.2. Entitate edo elkartearen jarduera orokorraren gaineko agiriak:
Jardun bakarreko egunetan jantokiko zerbitzua zabaltzeko proiektu orokorra, oinarri hauetako 1. puntuan adierazitako aldiari dagozkion dirusarreren eta gastuen aurrekontu osoarekin batera.
5.1.3. Dirulaguntza eskatzen den jantokiko zerbitzuari buruzko dokumentazioa.
a) Dirulaguntza zein jantokitarako eskatu, jantoki horretako zerbitzuaren deskribapena.
_Izena.
_Helburuak.
_Eginen diren jarduerak.
_Aplikatzeko egutegia.
_Giza baliabideak (zehaztu langile kontratatuak, _arduraduna, administraria eta zaintzaileak_ edo boluntarioak...).
_Finantza baliabideak (dirusarreren eta gastuen aurrekontua, aurreikusitako finantzabideak ...).
_Hezkuntza Departamentuari eskaturiko zenbatekoa.
_Ebaluazioaren aurreikuspena (adierazleak ....).
b) Laguntza transferentzia bidez jasotzeko eskaera.
5.1.4. Onuradun izateko baldintzak betetzen direla frogatzeko behar den dokumentazioa.
_Elkartearen legezko ordezkariaren aitorpen idazkia, Dirulaguntzei buruzko Foru Legearen 13. artikuluko beharkizun orokorrak betetzen dituela azalduz.
_Diruz lagundutako jarduerak finantzatzeko jaso diren dirulaguntzei buruzko aitorpena.
6._Balorazioa.
6.1. Eskaeren tramitazioa Hezkunta Departamentuan eginen da, Hezkuntza Premia Berezien Atalean, eta bertan egiaztatuko da aurreko artikuluetan aipatutako baldintzak betetzen direla.
a) Eskaerak aipatu diren baldintzak betetzen ez baditu, Hezkuntza Premia Berezien Atalak entitate interesdunari hots eginen dio, hamabost egun balioduneko epean, okerra zuzen dezan, eta hala egin ezean, eskaera bertan behera geldituko da, Herri Administrazioen Araubide Juridikoari eta Administrazio Prozedura Erkideari buruzko Legearen 42. artikuluak ezarritako moduan ebazpena eman ondotik.
b) Ez da dirulaguntza eskaerarik tramitatuko, baldin eta txosten teknikoak eta ekonomikoak aurkeztu ez badira eta, halakorik balego, aurreko aldiko dirulaguntzaren gastuaren fakturak ekarri ez badira.
c) Batzorde tekniko batek balioetsiko ditu eskaerak. Batzordea hauek osatuko dute: Dibertsitate, Kultura-aniztasun eta Immigraziorako Zerbitzuko zuzendaria, Hezkuntza Premia Berezien Ataleko burua, Programa Berariazkoen Bulegoko burua eta Hezkuntza Premia Berezien Atalari atxikitako teknikari bat. Batzorde horrek laguntzak eman behar dituen organo eskudunari igorriko dio ebazpen proposamena.
7._Balorazio irizpideak.
7.1. Balorazio irizpideak hauek izanen dira:
a) Proposatzen diren helburuak beteko direla bermatzeko azpiegitura aski izatea.
b) Jantokiko zerbitzuaren berregituraketa dela eta, Klaustroak eta Eskola Kontseiluak irakasleen eta langileen ordutegian egin lezaketen berrantolaketa onartzea, orain arteko baldintza berberetan egin dadin.
c) Eskatzailearen ibilbidea dirulaguntzaren xede diren programetan.
d) Aurreko aldietan egindako programen eraginkortasuna, hala bada.
e) Aurkeztutako eskaera kopurua.
7.2. Eskaerak arestian aipatu irizpideei jarraikiz balioetsiko dira.
7.2.1. Zerbitzuaren egilea den aldetik, gurasoen elkartean hauek aztertuko dira: bere egitura, curriculuma, kaudimena, kudeaketarako gaitasuna eta Hezkuntza Bereziko ikastetxearekin duen koordinazioa.
7.2.2. Eskainitako zerbitzua:
Zerbitzuaren alderdi teknikoak balioetsiko dira, hots, oinarrien, helburuen, jardueren, espero diren emaitzen, baliabideen, kalitatearen adierazleen eta egiaztatzeko aldagarrien arteko egokitzapen zuzena eta koherentzia. Halaber, aurkezpena, idazkera eta aurrekontuen xehetasunak ere aintzat hartuko dira.
8._Instrukzioa.
8.1. Batzorde teknikoak ofizioz ebaluatuko ditu eskaerak, deialdian balioesteko ezarritako irizpideei, moduei eta lehentasunei jarraikiz, eta behin-behineko ebazpen proposamena prestatuko du. Interesdunei jakinaraziko zaie eta 10 eguneko epea izanen du alegazioak aurkezteko.
8.2. Batzorde teknikoak interesdunek ateratako alegazioak eta aldaketak aztertu ondotik, behin betiko ebazpenaren proposamena eginen du.
8.3. Behin-behineko ebazpenak ez du eskubiderik sortzen onuradunaren alde administrazioarekiko, harik eta behin betiko ebazpena jakinarazten zaion arte.
9._Ebazpenak.
9.1. Aurkeztutako eskaerak Eskola eta Lanbide Irakaskuntzaren zuzendari nagusiak ebatziko ditu, eta, laguntzarik badago, bertan zehaztuko da xedea, zenbatekoa, ordaintzeko modua eta laguntza noiz eta nola justifikatu.
9.2. Eskaerak ukatutzat joko dira, horiek aurkezteko epea bukatu eta handik 6 hilabetera ebazpen espresurik ematen ez bada.
9.3. Eskaeraren berariazko edo presuntziozko ezespenaren aurka zilegi izanen da gora jotzeko errekurtsoa jartzea, Hezkuntza kontseilariari zuzendua, administrazio prozedura erkideari buruzko legerian xedatutakoari jarraikiz.
10._Dirulaguntzaren ordainketa.
Dirulaguntza bi zatitan ordainduko da. Lehenbizikoa, jarduera hastean, bi hilabeteko jarduna garatzeko lehen bi hilabeteetako gastuei dagokien zenbatekoarekin eta, bigarrena, epe hori bukatzean, gainerako zenbatekoarekin; beharrezkoa izanen da jasotako zatiaren %100eko gastuen agiri ekonomikoak justifikatzea, dirulaguntzaren hurrengo ordainketa egiteko.
11._Gastuen egiaztagiriak.
11.1. Diruz lagundutako jarduera bukatzean, jasotako dirulaguntzari ezarritako gastu guztiak justifikatu egin beharko dira, jarduera bukatu arte, eta agiri zenbakia, kontzeptua, igorlea, data eta zenbatekoa zehaztu beharko dira. Zerrenda horrekin batera frogagiriak joanen dira, eta banku jardueraren laburpenen kopien, ordainagirien eta fakturen fotokopiak behar bezala konpultsatuko dira eta haietan zehazturik agertuko dira emailearen datuak, jasotzailearenak, eguna, azalpena eta prezioa.
11.2. Diruz lagundutako jarduera bukatu ondoren zerbitzuaren betetzeari buruzko txostena aurkeztu eta dokumentazio hau azaldu beharko da:
a) Elkartearen jantokiko zerbitzuaren gaineko txostena eta azken ekitaldiko dirusarreren eta gastuen balantze orokorra.
b) Lanaldi bakarreko egunetan jantokiko zerbitzuari buruzko txosten teknikoa, honako xehetasunak azalduz:
_Zerbitzuaren eraginkortasuna. Zerbitzua zabaltzeko programan jarritako helburuen eta lortutako emaitzen arteko konparazioa, eta egindakoaren eta aurreikusitakoaren arteko aldea.
_Eragingarritasuna. Lortutako emaitzen ebaluazioa, erabilitako baliabide tekniko eta ekonomikoak kontuan hartuz.
_Jantokiko zerbitzua zabaltzeak ikastetxean, ikasleengan eta familiengan izandako eragina aztertzea.
_Jantokiko zerbitzuaren estrategiak ebaluatzea, ikuspuntu edo erantzun egokiena hautatu ote den ikusteko.
c) Jardun bakarreko egunetara jantokiko zerbitzua zabaltzeari buruzko balantze ekonomikoa, dirusarrera guztiak zehazturik (batez ere honako hauek emandakoak: Nafarroako Gobernua, Nafarroako udalak, autonomia erkidegoak eta beste udal batzuk, Gizarte Gaietarako Ministerioa, Europar Batasuna, eta abar, familiek ordaindutako kuoten ekarpena, elkartearen beraren funtsak eta dirulaguntza pribatuak); eta gastu guztiak, kontzeptu hauetan banaturik:
_Langileak (arduraduna, administraria eta zaindariak).
_Menuak.
d) Egindako jantokiko zerbitzuaren zabaltzearen dirusarreren eta gastuen zerrenda, Nafarroako Gobernuaren dirulaguntzari aplikatua, agiri zenbakia, emailea, azalpena, eguna eta zenbatekoa zehazturik. Zerrenda horren froga gisa dagozkion egiaztagiriak izanen dira, hau da, faktura adostuen eta bankuko kontu-laburpenen fotokopia konpultsatuak eta, betiere, emailearen eta jasotzailearen datuak, eguna, kontzeptua eta prezioa.
e) Beste edozein dokumentazio grafiko edo idatzizko, borondatez eman nahi dena, diruz lagundutako zerbitzuaren exekuzioa edo martxa onaren berri emateko.
12._Betebeharrak eta ez-betetzeak.
12.1. Jardun bakarreko egunetan Hezkuntza Bereziko ikastetxe publikoetan jantokiko zerbitzu osagarria kudeatzeko dirulaguntza ematen zaien entitateek betebehar hauek izanen dituzte:
a) Zerbitzua dirulaguntza ematean ezarritako baldintzetan gauzatzea.
b) Deialdi honen 10. oinarriak aipatzen dituen txostenak aurkeztea, proiektua burutu bitartekoak eta bukaerakoak.
c) Organo emaileari erakustea beharkizunak eta baldintzak betetzen direla; orobat, hari frogatzea dirulaguntza emateko edo dirulaguntza jasotzeko arrazoi izan diren jarduera eta helburua egin eta bete direla.
d) Dirulaguntzak ematen dituen ebazpenaren proposamena egin baino lehen, Gizarte Segurantzarekiko zorrak kitatuak eta zerga guztiak pagatuak dituztela frogatzea.
e) Programaren zabalkundean eta publizitatean dirulaguntza nork eman duen adieraztea. Zabalkunde idatzia edo grafikoa egiten bada, Hezkuntza Departamentuaren logotipoa paratu beharko da, eta dirulaguntza jaso duen entitatearen logotipoaren neurri berean eta ikusteko baldintza berberetan.
f) Hezkuntza Departamentuari dirulaguntza emateko kontuan hartu diren ezaugarrietan, beharkizunetan eta baldintzetan egin beharreko aldaketa guztiak egiteko baimena eskatzea, eta jakinaraztea beste edozein organismok edo erakunde pribatuk zein publikok xede berarekin emandako dirulaguntzen zenbatekoa.
g) Jasotako dirua itzultzea, programa gauzatu ezin bada edo dirulaguntza ematean ezarritako baldintzak bete ezin badira, edo justifikatu ezina itzultzea, dena justifikatzerik ez badago; horrekin batera, berandutzagatiko korritua eskatuko zaio dirulaguntza ordaintzen denetik, Nafarroako Ogasun Publikoari buruzko abenduaren 26ko 8/1988 Foru Legearen 19. artikuluak xedatzen duenaren arabera.
13._Azpikontratazioa.
Laguntza jasotzen duten gurasoen elkarteek lagunduriko jarduera osoa betetzeko azpikontratazioa egin ahalko dute, Dirulaguntzei buruzko azaroaren 9ko 11/2005 Foru Legearen 26. artikuluan ezarritako baldintzak aintzat hartuz.
14._Errekurtsoak.
Deialdi honen oinarrien aurka eta bere aplikazio egintzen aurka gora jotzeko errekurtsoa jarri ahalko da, Nafarroako Gobernuko Hezkuntza kontseilariari zuzendua, jakinarazi eta biharamunetik hasita hilabeteko epean, Herri Administrazioen Araubideari eta Administrazio Prozedura Erkideari buruzko Legearen 114. eta 115. artikuluetan ezarritakoari jarraikiz.
15._Aplikatu beharreko arauak.
Deialdi hau Dirulaguntzei buruzko azaroaren 9ko 11/2005 Foru Legeak ezartzen duenari loturik eman da.
16. _Emandako dirulaguntzen publizitatea.
Dirulaguntzei buruzko Foru Legearen 15. artikuluan xedatutakoarekin bat, Dibertsitate, Kultura-aniztasun eta Inmigraziorako Zerbitzuak Departamentuaren webgunean jendaurrean jarriko ditu emandako dirulaguntzak, ondoko hauek zehaztuta: deialdia, laguntza zein programa eta aurrekontu-kredituri egotziko zaion, onuraduna, emandako diru kopurua eta dirulaguntzaren helburua.
Iragarkiaren kodea: F0714954
