Iragarkia

77. ALDIZKARIA - 2006ko ekainaren 28a

I. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Plantilla Organikoa, Lan Eskaintza Publikoa, oposizioak eta lehiaketak

DEIALDIA, Funtzio Publikoaren zuzendari nagusiak ekainaren 5ean emandako 1480/2006 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen Lan Harremanetako diplomatu izateko 2 lanpostu oposizio bidez betetzekoa.

Funtzio Publikoaren zuzendari nagusiak, ekainaren 5eko 1480/2006 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko Lan Harremanetako diplomatu izateko 2 lanpostu oposizio bidez betetzeko deialdia onetsi du.

Hautapen prozesua ondoko hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsi zena, aipatu estatutua garatu eta burutzeko Sarrera Erregelamendua, gainerako aplikazio arauak eta deialdi honetako oinarriak.

1._Deialdiaren xedea.

1.1. Deialdi honen xedea nekazaritzako Lan Harremanetako diplomatu izateko 2 lanpostu oposizio bidez betetzea da, funtzionarioen araubidekoak eta B mailakoak, txanda hauetan banatuak:

_1 lanpostu txanda irekian.

_1 lanpostu igoera txandan.

1.2. Hauek dira eskaintzen diren lanpostu hutsak:

_1 Lehendakaritza, Justizia eta Barne Departamentuan. Plantilla organikoko zenbakia: 7444. Iruñean aritzekoa.

_1 Osasunbidea-Nafarroako Osasun Zerbitzuan, Tuterako Osasun Barrutian. Plantilla organikoko zenbakia: 68646. Tuteran aritzekoa.

1.3. Igoera txandako lanpostuak hutsik geldituz gero, izangaiek hautapen probak gainditzeko behar den gutxieneko puntuazioa atera ez dutelako, txanda irekikoei gehituko zaizkie.

Bestaldetik, igoera txandan hutsik dauden lanpostuak baino izangai gehiagok gainditzen badute, txanda horretan lanpostua eskuratzen ez dutenek aukera izanen dute txanda irekiko lanpostu hutsa eskuratzeko, txanda horretako izangaiekin lehian eta eskuratutako azken puntuazioaren arabera.

Era berean, txanda irekiko lanpostuak eskuratzeko aukera izanen dute, aurreko lerroaldean adierazitako moduan, 7.2. arauan agiriak aurkezteko ezartzen den epea bukatzen denean deialdiko 2.1.2 arauko eskakizun berariazkoak betetzen ez dituzten igoera txandako izangaiek.

1.4. Lanpostuek B mailako lansariak izanen dituzte, uztailaren 4ko 158/1984 Foru Dekretuaren bidez onetsitako Lansarien Behin-behineko Erregelamenduan eta, kasuan kasu, aplikatu beharreko gainerako xedapenetan ezarritakoari jarraikiz.

1.5. Halaber, deialdi honen bidez hauta-probak gainditu bai baina lanposturik lortzen ez duten izangaiekin aldi baterako kontratatuak izateko izangaien zerrenda bat osatu nahi da, deialdi honetako 3., 10., 11., 12. eta 13. oinarrietan xedaturikoarekin bat.

2._Betebeharrak.

2.1. Oposizio honetan onartuak izateko, izangaiek, eskabideak aurkezteko epea amaitzen den egunean eta agiriak aurkezteko epearen barrenean (deialdiaren 7.2 atalean adierazia) eta lanpostuaren jabetza hartu arte, baldintza hauek bete beharko dituzte:

2.1.1. Izangai guztiek bete beharreko baldintzak.

a) Espainiarra izatea, edo Europar Batasuneko beste estatu batekoa, edo, Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, espainiarren eta Europar Batasuneko beste estatuetako edo aipatu nazioarteko itunek ukitutako estatuetako herritarren ezkontideek hartzen ahal dute parte; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira edo, gorakoak izanik, haien kontura biziz gero.

b) Adin nagusikoa izatea eta erretiroko adina ez izatea.

c) Lan harremanetako diplomatura edo baliokidea izatea, edo eskaerak aurkezteko epea bukatzen den egunean titulu hori eskuratzeko moduan egotea.

Atzerrian lorturiko tituluak badira, homologazioaren egiaztagiria eduki beharko da.

d) Bete behar dituen eginkizunetan aritzeko adinako gaitasun fisiko eta psikikoa izatea.

e) Eginkizun publikoetan aritzeko desgaitu edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute beren Estatuko Funtzio Publikoan sartzea eragozten dien diziplina zehapenik edo zigor penalik ez dutela.

2.1.2. Igoera txandako izangaiek bete beharreko baldintza berariazkoak.

Igoera txandako izangaiek, aurreko idatz-zatian adierazitako betebeharrez gain, hauek bete beharko dituzte:

a) Nafarroako edozein Administrazio Publikotako langile finkoa izatea, edo Nafarroako Foru Komunitateko Administrazioari transferitutako Justizia Administrazioaren zerbitzuei atxikitako langile finkoa, eta jatorrizko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa izatea.

c) Administrazio Publikoetan bost urteko antzinatasun onartua izatea, Nafarroako Polizia Kidegoetako kideen kasuan izan ezik, horiek frogatu beharko baitute zortzi urtez eman dituztela zerbitzuak kidego horietan.

Nafarroako Administrazio Publikoetan lan egiten duten langileen Estatutuaren xedapen gehigarrietatik zortzigarrenean ezarri dena aplikatuz, igoera txandan esku hartzeko baldintzak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

2.2. Deialdiko 3.4 arauko bigarren puntuan aipatzen den salbuespena salbuespen, izendatuak izateko proposatzen diren izangaiek deialdiko 7.2 atalean ezarritako epean eta moduan frogatu beharko dituzte betebehar horiek.

3._Eskabideak.

3.1. Deialdian parte hartzeko eskabideak Nafarroako Gobernuko Lehendakaritza, Justizia eta Barne Departamentuko Erregistro Orokorrean (Karlos III.aren etorbidea, 2, atalondoa, 31002 Iruña) edo erregistro horretako beste edozein bulegotan (zerrenda 2006ko 65. Nafarroako ALDIZKARI OFIZIALean argitaratu zen, maiatzaren 31n) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legeko 38.4 artikuluan adierazitako bideren bat erabiliz, deialdia Nafarroako ALDIZKARI OFIZIALean argitaratu eta biharamunetik hogeita hamar egun naturaleko epean.

Eskabideak deialdi honen eranskinean dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuko Argibide Bulegoan dago eskuragarri. Interneten bidez ere lortzen ahal da, www.navarra.es helbidean, bai argitaratzen deneko Aldizkari Ofizialetik abiatuta, bai Zerbitzuen Katalogoko Enplegu Publikoan dagoen deialdiaren aiputik abiatuta.

3.2. Ezgaitasun aitortua duten lehiatzaileek, ariketak egin ahal izateko denbora edo baliabideetan egokitzapenik behar badute, zilegi izanen dute eskabidean eskatzea, eta hartarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Horrekin batera, legeen arabera ezgaitasunen bat dutela frogatzeko agiriaren kopia konpultsatua ere aurkeztu beharko dute, organo eskudunak emana.

3.3. Hautapen prozesuko ariketa guztiak gainditzen ez dituzten hautagaiekin zerrenda batzuk osatuko dira, ondoren aldi baterako kontratazioak egiteko. Horretarako, parte hartzaileek deialdiko eskabidean berean adierazi beharko dute kontratazio zerrendetatik zeinetan nahi duten sartu.

Xede horrekin, parte hartzaileek eskabidean agertzen diren kudeaketa esparruetako bakarra hautatu beharko dute, Nafarroako Osasun Zerbitzuko zerrendetan, Nafarroako Gizarte Ongizatearen Institutukoetan edo Nafarroako Foru Komunitateko Administrazioaren gainerako departamentu (Administrazio erroa) eta erakunde autonomokoetan sartuak izateko. Kudeaketa esparru bat baino gehiago hautatuz gero, edo parte hartzeko eskabidean atal hori betetzen ez bada, Administrazio erroko zerrendetan besterik ez dutela parte hartu nahi ulertuko da.

3.4. Eskabideari, behar bezala bete ondoren, agiri hauek erantsiko zaizkio:

Bat._Espedientea formalizatzeko eta azterketa eskubideetarako 18 euro ordaindu izanaren ziurtagiria. Azterketa eskubideen tasa ordaindu izanaren agiria aurkezten ez bada, izangaia baztertu eginen da.

Sistema hauetako bat erabiliz ordaintzen ahalko da tasa hori:

_Behar bezala betetako ordainketa gutuna erabiliz; Foru Komunitateko Administrazioak Nafarroako finantza entitateetan dituen kontuetan sartuko da dirua. Arestian aipatutako webgunean, deialdiaren iragarkian, ordainketa gutunaren eredua ageri da.

_Sarrera esku-dirutan edo bankuko transferentzia bidez eginez, Banestoko (Banco Español de Crédito) 00308124 87 0870002271 kontuan; horrelakoetan ordain-agirian datu hauek jarri beharko dira:

_Izangaiaren izen-deiturak.

_NAN/IFZ.

_Ordainketa zein kontutan egiten den, haren zenbakia.

_Kontzeptua: oposizioak.

_Deialdiaren xede den lanpostua.

Frogagirian datu horietako bat falta baldin bada, izangaia baztertu eginen da.

Honako hauek ez dute tasarik ordaindu beharko:

a) %33ko edo gehiagoko ezgaitasun aitortua dutela frogatzen duten pertsonek, organo eskudunak luzaturiko jatorrizko agiriaren edo behar bezala konpultsaturiko fotokopiaren bidez.

b) Hauta-proben deialdia egin aurretik hilabete batez edo luzaroago lan-eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon den bitartean eskainitako inolako lan egokiri uko egin ez izana eta lanbide sustapen, prestakuntza edo eraberritze ekintzetan parte hartzeari uko egin ez izana, justifikaturiko kasuetan izan ezik, eta, horrez gainera, lanbide arteko gutxieneko soldatatik gorako den dirusarrerarik ez izatea hilabetero.

Lan eskatzailea dela frogatzeko, Enplegu Bulegoak emandako agiria aurkeztu beharko da. Bertan, lan-eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ez eta lan-igoera, prestakuntza edo eraberritze ekintzetan parte hartzeari ere, justifikaturiko kasuetan izan ezik.

Hilero lanbide arteko gutxieneko soldatatik gorako errentarik ez duela interesatuaren adierazpenaren bidez frogatuko da. Adierazpen eredua Nafarroako Gobernuko Informazio Bulegoan eskuratzen ahalko da, edo bestela internet bidez, arestian emandako helbidean.

Bi._Deialdian igoera txandan parte hartu nahi duten izangaiek, Nafarroako Foru Komunitateko Administrazioa ez den Nafarroako beste Administrazio Publiko bateko langile finkoak badira, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finkoak, lehengoaz gainera, deialdi honetako 2.1.2. arauan jasotzen diren eskakizunak betetzen dituztela frogatzen duen agiria gehitu beharko diote eskabideari.

3.5. Eskabideak aurkezteko epea ezin izanen da luzatu.

3.6. Eskabidean atzematen diren akats materialak edo egitezkoak ofizioz edo interesatuak eskaturik zuzentzen ahalko dira, noiznahi ere.

4._Izangaien onarpena eta erreklamazioak.

4.1. Eskaerak aurkezteko epea bukaturik, Funtzio Publikoaren zuzendari nagusiak ebazpena emanen du izangai onartu eta baztertuen behin-behineko zerrenda onesteko, eta Nafarroako ALDIZKARI OFIZIALean argitara dadila aginduko du.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, akatsik egin badute, zuzentzeko.

4.3. Erreklamazioetarako epea bukatutakoan eta horiek ebatzita, Funtzio Publikoaren zuzendari nagusiak onartu eta baztertuen behin betiko zerrenda onesten duen ebazpena emanen du, eta Nafarroako ALDIZKARI OFIZIALean argitara dadila aginduko.

4.4. Izangaiei egotziriko arrazoiengatik baztertzen direnei ez zaizkie azterketa egiteko eskubideak itzuliko.

5._Epaimahaia.

5.1. Epaimahaiak kide hauek izanen ditu:

_Mahaiburua: Javier Ugalde Adín jauna, Lehendakaritza, Justizia eta Barne Departamentuko Lehendakaritza Zuzendaritza Nagusiko Zigor Aferen Ataleko burua.

_Ordezkoa: María Angeles Domene Sáez andrea, Lehendakaritza, Justizia eta Barne Departamentuko Funtzio Publikoaren Zuzendaritza Nagusiko Langileriaren Kudeaketarako Zerbitzuko zuzendaria.

_Mahaikidea: Carlos Sarasíbar Subiza jauna, Lehendakaritza, Justizia eta Barne Departamentuko Funtzio Publikoaren Zuzendaritza Nagusiko Langileriaren Hautapen eta Araubidearen Ataleko burua.

_Ordezkoa: Luis Láinez Urra jauna, Lehendakaritza, Justizia eta Barne Departamentuko Funtzio Publikoaren Zuzendaritza Nagusiko Klase Pasiboen Bulegoko burua.

_Mahaikidea: Jesús Vélaz Echarri jauna, gizarte graduatua eta Zuzenbidean lizentziatua, Lehendakaritza, Justizia eta Barne Departamentuko Barne Zuzendaritza Nagusiari atxikia.

_Ordezkoa: Lorenzo Apezteguía Bravo jauna, Lehendakaritza, Justizia eta Barne Departamentuko Funtzio Publikoaren Zuzendaritza Nagusiko Laneko Arriskuei Aurrea Hartzeko Ataleko burua.

_Mahaikidea: Administrazio Erroko Langileen Batzordearen ordezkari bat, batzordeak berak proposatua.

_Ordezkoa: Administrazio Erroko Langileen Batzordearen ordezkari bat, batzordeak berak proposatua.

_Mahaikide idazkaria: Emilia Luna Goñi andrea, Lehendakaritza, Justizia eta Barne Departamentuko Funtzio Publikoaren Zuzendaritza Nagusiko Gizarte Segurantzaren Bulegoko burua.

_Ordezkoa: Teresa Pérez Rodrigo andrea, Lehendakaritza, Justizia eta Barne Departamentuko Funtzio Publikoaren Zuzendaritza Nagusiko gizarte graduatua.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Organo kolegiatuaren eraketak eta jardunak balio izateko, mahaiburuak eta mahaikide idazkariak edo haien ordezkoek bertan egon beharko dute.

5.3. Epaimahaiko kideek ez dute parte hartuko, eta organo dei egileari horren berri emanen diote, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretakoren batean baldin badaude.

Izangaiek, halaber, zilegi izanen dute mahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren inguruan sortzen diren arazo guztiak.

5.5. Epaimahaiak aholkulari adituen laguntza izan dezake, proba batzuetan nahiz guztietan laguntzeko. Aholkulari horiek beren espezialitate teknikoetan baizik ez dira ariko eta horietan bakarrik emanen diote laguntza epaimahaiari.

6._Oposizioa nola eginen den.

6.1. Oposizioa 2007ko otsailean hasiko da. Izangai onartu eta baztertuen behin betiko zerrenda onesten duen ebazpen berean zehaztuko da probak hasteko lekua, eguna eta ordua.

Ondoren, epaimahaiak jakinaraziko ditu gainerako probak egiteko iragarkiak, erregelamenduz.

6.2. Oposizioak ariketa hauek izanen ditu:

Lehenbizikoa: deialdiaren II. eranskineko gaiak oinarri hartuta egindako 60 galdera erantzun beharko da idatziz. Epaimahaiak ariketa hori egiteko izangaiek zenbat denbora duten adieraziko du haren hasieran.

Bigarrena: Lanaren eta Gizarte Segurantzaren Zuzenbide Substantiboari eta Prozesalari buruzko bi kasu praktiko edo gehiago ebatzi beharko dira, lau orduan gehienez. Ariketa honetan zilegi izanen da kasu horiei loturiko agiriak idatz ditzatela eskatzea.

Hirugarrena: zozketaz aterako diren bi gairen gainean idatzi beharko da, gehienez ere lau orduz; gai bat zerrendako II. zatikoa izanen da eta bestea, III. zatikoa.

Laugarrena: teorikoa. Gai-zerrendako I. zatiko gaien artean zozketaz aukeratutako bi gai idatziz azaltzea, gehienez lau orduz.

6.3. Oposizioko ariketen balorazioan 100 puntu eman daitezke gehienez ere, honela banatuak:

Lehenbizikoa: gehienez 45 puntu. Galdera bakoitzak gehienez ere 0,75 puntuko balorazioa izanen du.

Bigarrena: gehienez 25 puntu. Kasu bakoitzak 12,5 puntu izanen ditu gehienez.

Hirugarrena: gehienez 20 puntu. Gai bakoitzean gehienez 10 puntuko balorazioa ematen ahal da.

Laugarrena: gehienez 10 puntu. Gai bakoitzean gehienez 5 puntuko balorazioa ematen ahal da.

6.4. Oposizioko ariketak kanporagarriak izanen dira. Bazterturik geldituko dira horietako ariketaren batean gutxienez gehieneko puntuazioaren erdia lortzen ez duten izangaiak. Halaber, bazterturik geldituko da bigarren, hirugarren edo laugarren ariketetako gai edo kasuetako edozeinetan 0 puntuko kalifikazioa ematen zaiona.

6.5. Lehenbiziko eta bigarren ariketak plika sistemaren bidez eginen dira. Hirugarren eta laugarren ariketak jendaurreko ekitaldian irakurriko dizkiote izangaiek epaimahai kalifikatzaileari.

6.6. Ariketak zuzendu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo proba edo ariketa egiteko tokia, eguna eta ordua, gutxienez 48 ordu lehenago.

6.7. Ariketa bakoitzerako dei bakarra eginen da. Izangaiek nortasun agiri nazionala, pasaportea edo gidatzeko baimena eraman beharko dute. Azterketara agertzen ez direnak edo arestian aipatutako agirietako baten bidez beren nortasuna egiaztatzen ez dutenak oposiziotik baztertuko dira.

6.8. Hauta-probak egiteko, ezgaitasun aitorturen bat dutenentzat bidezkoak diren denbora eta baliabide egokitzapenak eginen dira, eskabidean azaldutakoaren arabera.

7._Probak gainditu dituztenen zerrenda, izendapen proposamena eta agirien aurkezpena.

7.1. Hauta-probak amaiturik, epaimahaiak jendaurrean jarriko du probak gainditu dituztenen zerrenda, oposizioan lortutako kalifikazioekin, Nafarroako Gobernuaren iragarki oholean. Gero, zerrenda hori Funtzio Publikoaren zuzendari nagusiari igorriko dio, deialdiko lanpostuen kopuruaren barruan sartzen diren eta probak puntuazio altuenekin gainditu dituzten izangaiak izendatzeko proposamenarekin eta espediente osoarekin batera. Proposamen hori Nafarroako ALDIZKARI OFIZIALean argitaratuko da.

Berdinketa izanez gero, lehen ariketan puntuazio altuagoa erdiesten duenaren alde jokatuko da. Hori eginda, berdinketak oraindik badirau, bigarren eta hirugarren ariketetan lorturiko puntuazioak hartuko dira kontuan, hurrenkera horrexetan.

7.2. Izendapen proposamena Nafarroako ALDIZKARI OFIZIALean argitaratu ondoko 30 egun naturaleko epean, proposatutako izangaiek inprimaki berariazko batzuk jaso eta honako agiri hauek aurkeztu behar dituzte Funtzio Publikoaren Zuzendaritza Nagusian:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiak:

a) Nortasun Agiri Nazionalaren bi fotokopia konpultsatu, edo izangaiaren hiritartasuna eta nortasuna frogatzen dituen beste agiri baliokideren batenak.

b) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.

c) Laneko Arriskuei Aurrea hartzeko Atalak emandako txostena, interesatuak karguan aritzea eragotziko liokeen eritasun edo akats fisiko edo psikikorik ez duela frogatzeko.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

d) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizi ez izanaren zinpeko aitorpena.

Izangaiek Espainiako herritartasuna ez badute, agiria aurkeztu beharko dute, beren Estatuko Funtzio Publikoan sartzea eragozten dien diziplina zehapenik edo zigor penalik ez dutela adierazteko.

e) Zin egin edo hitz ematea, Nafarroako Foru Eraentza errespetatu, Konstituzioari eta Legeei men egin eta karguari dagozkion eginkizunak zuzen beteko dituela.

f) Funtzio Publikoaren Zuzendaritza Nagusiak eskatzen dituen gainerako agiriak.

Deialdi hau egin ez duen Nafarroako beste Administrazio Publikoren bateko langile finko, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finko diren izangaiek, gainera, aurreko administrazioko espediente pertsonalean ageri diren inguruabar eta aurrekari guztiak frogatzen dituen ziurtagiria aurkeztu beharko dute, hots, sarrerari, antzinatasunari, mailari, egoera administratiboari eta abarrei buruzkoa.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiak:

a) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.

b) Funtzio Publikoaren Zuzendaritza Nagusiak eskatzen dituen gainerako agiriak.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barrenean, eta aski justifikaturik dauden ezinbesteko kasuak salbuetsiz, arestiko agiriak aurkezten ez dituztenak ezin izanen dira izendatu, eta ordurako egintza guztiak baliorik gabe geldituko dira, euren eskabidearen faltsukeria dela eta, legokiekeen erantzunbeharra galarazi gabe.

7.4. Aurreko atalean aurreikusitakoa gertatuz gero, Funtzio Publikoaren zuzendari nagusiak probak gainditu dituztenen zerrendan, 7.1. atalean aipatutakoan, hurrengoa den izangaiarekin beteko du baja, eta horrekin ere aurreko ataletan adierazitako moduan jokatuko da.

8._Lanpostu hutsak hautatzea.

8.1. Aurreko arauan xedatu dena betetzen duten lehiatzaileek Funtzio Publikoaren Zuzendaritza Nagusiak hartarako jartzen dien epean aditzera eman beharko dute eskaintzen zaizkien lanpostuetatik zein hautatzen duten. Aukeratu beharreko lanpostuak hasieran deitutakoak izanen dira, edo beste batzuk, zerbitzuaren beharrei jarraikiz horiek aldatzea erabakitzen bada.

8.2. Hauta-probak igoera txandaren bidez gainditzen dituzten izangaiek, 8.3 ataleko bigarren lerroaldean aipatutako kasuan izan ezik, lehentasuna izanen dute deialdiko lanpostu hutsak aukeratzerakoan, txanda horretakoak ez diren izangaien aurretik.

8.3. Lanpostu hutsak aukeratzeko orduan, %33ko edo handiagoko minusbaliotasun aitortua duten izangaiek lehentasuna izanen dute txanda irekiko izangaien aurretik.

Ezgaitasuna duen izangairik bada, eta horrek eragina badu lanpostu bat edo bestea hautatzeko, aukeratzen hasi aurretik, minusbaliotasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

9._Izendapena, lanpostuen esleipena eta jabetza hartzea.

9.1. Funtzio Publikoaren zuzendari nagusiak, ebazpen baten bitartez, aurreko oinarrietan ezarritakoa betetzen duten izangaiak Nafarroako Foru Komunitatearen Administrazioko funtzionario izendatuko ditu, Lan Harremaneko diplomatu lanetan aritzeko. Ebazpen horren bidez lanpostuen esleipena ere eginen da.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko dituzte izendatuak, indarra duten xedapenek ezartzen dituzten eskubide eta betebehar guztiak dituztela. Gizarte Segurantzako araubide orokorrean inskribatu eta kidetuko dira, araubide horretan aurreikusitakoaren babesean.

Aurrekoa gorabehera, Nafarroako Administrazio Publikoen Zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein bahituretxetako eskubide pasiboen araubidekoak direnen kasuan, bi aukera izanen dituzte: Nafarroako Foru Komunitateko Administrazioko bahituretxean segitzea, martxoaren 5eko 10/2003 Foru Legearen bidez arauturiko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Izendatzen diren izangaiek destinoko herrian izan beharko dute bizilekua, bertan helbidea egiazki kokatuz. Administrazio organo eskudunek destinoa aldatzen ahalko dute, aplikatzekoa den arautegian ezarritakoarekin bat.

9.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

9.5. Izendapena Nafarroako ALDIZKARI OFIZIALean argitaratuko da eta izangai izendatuak hilabeteko epean jabetu beharko du bere lanpostuaz, izendapenaren jakinarazpenetik kontatzen hasita.

Aipatu epean eta behar bezain ongi arrazoitutako kasuetan izan ezik, izangairen batek ez baldin badu lanpostua bere egiten, Foru Komunitateko Administrazioaren funtzionario izateko eskubide guztiak galduko ditu. Hala bada, 7.4 atalean ezarritakoari jarraikiko zaio.

9.6. Izangai bat funtzionario bihurtu eta lanpostuan batere aritu gabe zuzenean eta berak eskatuta borondatezko eszedentzia ematen bazaio jabetza hartzearen egunetik bertatik, data hartan beste Administrazio Publiko batean ari delako, kasuko lanpostu hutsa ere beteko da deialdiko 7.4 atalak agintzen duen moduan.

9.7. Aurreko bi ataletan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10._Aldi baterako kontratuetarako izangaien zerrenda.

10.1. Nafarroako Administrazio Publikoan sartzeko Erregelamenduaren 42. artikuluan, lanpostuak aldi baterako betetzeko kudeaketa arauak onetsi zituen Lehendakaritza, Justizia eta Barne kontseilariaren azaroaren 14ko 146/2005 Foru Aginduan eta arau honexetan ezarritako prozedurari jarraikiz, aldi baterako kontrataziorako izangaien zerrenda hauek sortuko dira:

_Probak gainditu bai baina lanposturik lortu ez duten izangaien zerrenda, komuna Foru Komunitateko Administrazioko departamentu eta erakunde autonomo guztientzat.

_Hautapen prozesuko ariketa guztiak gainditu ez dituzten izangaien zerrenda, parte hartzeko eskabidean aukeratutako esparruaren arabera.

10.2. Probak gainditu bai baina lanposturik lortu ez duten izangaien zerrendak.

Probak gainditu arren lanposturik lortu ez duten izangaiekin Funtzio Publikoaren Zuzendaritza Nagusiak zerrenda bat osatuko du, ondoren aldi baterako kontratazioak egiteko, deialdi honetako 11. oinarrian ezarritako prozedurari jarraikiz. Lehendakaritza, Justizia eta Barne kontseilariaren azaroaren 14ko 146/2005 Foru Aginduan xedatutako arauen arabera kudeatuko du.

Halaber, zerrenda hori Osasunbidea-Nafarroako Osasun Zerbitzuko eta Nafarroako Gizarte Ongizatearen Institutuko organo eskudunei igorriko die, esparru bakoitzeko arauei jarraikiz kudea dezaten.

10.3. Hautapen prozesuko ariketa guztiak gainditzen ez dituzten hautagaiak.

Deialdiko hamaikagarren oinarrian ezarritako prozedurarekin bat, Funtzio Publikoaren Zuzendaritza Nagusiak aldi baterako kontratazioak egiteko izangaien zerrenda bat osatuko du deialdiko azkenaurreko ariketa gainditu eta Administrazio erroko zerrenda hautatu duten izangaiekin.

Era berean, Funtzio Publikoaren Zuzendaritza Nagusiak Osasunbidea-Nafarroako Osasun Zerbitzuko eta Nafarroako Gizarte Ongizatearen Institutuko organo eskudunei igorriko die hautapen prozesuko ariketa guztiak gainditu ez eta esparru horietako kontratazio-zerrendak aukeratu dituztenen zerrenda, aldi baterako kontratazioetarako, deialdi honetako 12. arauan ezarritako prozedurari jarraikiz.

11._Administrazio erroan aldi baterako kontratatzeko izangaien zerrendak osatzeko prozedura.

11.1. Epaimahaiaren espedientea jasota, Funtzio Publikoaren zuzendari nagusiaren ebazpen baten bidez, hautapen prozesua gaindituta ere lanposturik gabe gelditu diren izangaiei eta deialdian ezarritako azkenaurreko ariketa gainditu eta Administrazio-erroko kontratazio-zerrenda aukeratu dutenei, hamar laneguneko epea emanen zaie, ebazpena argitaratu eta biharamunetik hasita, ondoko dokumentazio hau aurkezteko:

Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, sartzeko prozesuan parte hartzeko eskabideak aurkezteko epean titulua eskuratzeko moduan egoten dela frogatzen duen ziurtagiria.

Ebazpen hau Nafarroako ALDIZKARI OFIZIALean argitaratuko da, eta langileen zerrendak Nafarroako Gobernuko iragarki oholean (Karlos III.aren etorbidea, 2, atalondoa, Iruña).

Eskatzen diren agiriak aipatu epean aurkezten ez dituztenak (aski justifikatutako ezinbesteko kasuetan izan ezik) eta eskatutako baldintzak betetzen ez dituztenak ez dira sartuko aldi baterako kontratuetarako izangaien zerrendan, eta deialdian parte hartzeagatiko eskubide guztiak galduko dituzte, deusetan ukatu gabe, betiere, parte hartzeko eskabidea faltsutzeagatik legokiekeen erantzukizuna.

11.2. Sartzeko prozeduraren eskabideak aurkezteko epea bukatzen den egunerako bete beharko dira baldintzak, eta hautaprobek dirauteino eta kontratazioaldiak iraun bitarte bete beharko dira.

11.3. Dokumentazioa aurkezteko epea bukaturik, Funtzio Publikoaren zuzendari nagusiaren ebazpen baten bidez, aldi baterako kontratuetarako izangaien zerrenda hauek onetsiko dira eta Nafarroako Gobernuaren iragarki-oholean argitaratuko (Karlos III.aren etorbidea, 2, atalondoa, Iruña):

a) Probak gainditu bai baina lanposturik lortu ez duten izangaien zerrenda.

b) Deialdiko azken ariketa gainditu ez eta Administrazio erroko kontratazio zerrendak aukeratu dituztenak.

11.4. Hauxe izanen da aldi baterako kontratazioen zerrendaren ordena: oposizioa gainditu bai baina lanposturik lortu ez dutenen kasuan, hautapen prozesuan lortutako puntuazioaren arabera; gainerako izangaien kasuan, gainditutako ariketetan lortutako puntuazioen batura. Berdinketarik dagoenean nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

12._Osasunbidea-Nafarroako Osasun Zerbitzuan aldi baterako kontratatzeko izangaien zerrendak osatzeko prozedura.

Funtzio Publikoaren Zuzendaritza Nagusiak probak gainditu bai baino lanposturik lortu ez dutenen zerrendak eta hautapen prozesuko ariketa guztiak gainditu ez eta esparru horretako kontratazio-zerrendak aukeratu dituztenenak igorri ondoren, Osasunbidea-Nafarroako Osasun Zerbitzuko organo eskudunek beren kudeaketa esparruko aldi baterako kontratazioetarako izangaien zerrendak onetsiko dituzte, 2001eko urtarrilaren 9ko Akordioan erakunde autonomo horretako osasun zentro eta establezimenduetan aldi baterako langileak hautatzeko ezarritakoarekin bat. Akordio hori 2001eko 101. Nafarroako ALDIZKARI OFIZIALean argitaratu zen, abuztuaren 20an.

Horretarako, Nafarroako Osasun Zerbitzuak hamar egun balioduneko epea emanen die interesatuei, zentroa hautatu, iraunaldi laburreko zerrendetan egon nahi dutela adierazi eta aipatu erakunde autonomoak zehazten dituen gainerako inguruabarrak betetzeko.

Oinarri honen arabera osatzen diren zerrendak Osasunbidea-Nafarroako Osasun Zerbitzuak kudeatuko ditu, langileak hautatzeko 2001eko urtarrilaren 9ko Akordioan ezarritakoari jarraikiz.

13._Nafarroako Gizarte Ongizatearen Institutuan aldi baterako kontratatzeko izangaien zerrendak osatzeko prozedura.

Funtzio Publikoaren Zuzendaritza Nagusiak probak gainditu bai baino lanposturik lortu ez dutenen zerrendak eta hautapen prozesuko ariketa guztiak gainditu ez eta esparru horretako kontratazio-zerrendak aukeratu dituztenenak igorri ondoren, Nafarroako Gizarte Ongizatearen Institutuko organo eskudunek beren kudeaketa esparruko aldi baterako kontratazioetarako izangaien zerrendak onetsiko dituzte, erakunde autonomo horretan 2000ko urtarrilaren 17ko Akordioan aldi baterako kontratazioetarako langile zerrenden kudeaketari buruz ezarritakoarekin bat.

Horretarako, Nafarroako Gizarte Ongizatearen Institutuak hamar egun balioduneko epea emanen die interesatuei, zentroa edo eskualdea hautatu eta aipatu erakunde autonomoak zehazten dituen gainerako inguruabarrak betetzeko.

Oinarri honen arabera osatzen diren zerrendak Nafarroako Gizarte Ongizatearen Institutuak kudeatuko ditu, aldi baterako langileen zerrendak kudeatzeko 2000ko urtarrilaren 17ko Akordioan ezarritakoari jarraikiz.

14._Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da Funtzio Publikoaren zuzendari nagusiari zuzenduta, errekurtsoaren xede den egintza argitaratu edo jakinarazi eta biharamunetik, hilabeteko epean.

Deialdi honen eta bere arauen kontra eta arauak aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barne kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik kontatuta.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2006ko ekainaren 5ean._Funtzio Publikoaren zuzendari nagusia, Alberto Andérez González.

I. ERANSKINA

Eskabidea

Izena: ........................., adinez nagusia. Nortasun Agiri Nazionala: .............. (edo balio bereko beste agiriren bat). Sorteguna: ................ Sorterria: .................. (..................). Nazionalitatea: .................. Helbidea: ................... (kalea, zenbakia), ............. herria, ............. probintzia, ............... posta kodea, eta ........ telefonoa (........... laneko telefonoa).

Honako hau azaltzen dut:

Nafarroako Foru Komunitateko Administrazioaren eta bere erakunde autonomoen zerbitzuko .............. izateko ...............lanpostu ....................bidez betetzeko deialdian parte hartzeko onar nazatela eskatzen dudala, behean aipatzen den txandan (deialdia ...... Nafarroako ALDIZKARI OFIZIALean argitaratu zen, ...............(e)an).

f Txanda irekia

f Igoera txanda*

f Ezgaitasunen bat dutenendako txanda*

Hauta-probak gainditzen ez baditut, lanpostuak behin-behinekoz betetzeko aukeraz baliatu nahi dudala, honako esparruotako batean:

f Administrazio erroa*

f Osasunbidea-Nafarroako Osasun Zerbitzua*

f Nafarroako Gizarte Ongizatearen Institutua*

(Esparruetako bakar bat aukeratu daiteke)

Ez dudala karguan aritzea galarazten didan eritasun edo akats fisiko edo psikikorik.

Indarra duten xedapenetan ezarritako ezintasunik ez dudala.

Ez naizela diziplinako espediente bidez ezein administrazio publikoren zerbitzutik kanpo utzia izan eta ez nautela eginkizun publikoak betetzeko gaitasunik gabe utzi.

Deialdian eskatzen den titulazioaren jabe naizela.

Azterketa eskubideak ordaindu ditudala deialdian ezarritako moduan eta horren gordekina erantsi dudala, edo erantsitako agirien bidez frogatzen dudala tasa ordaintzetik salbuetsita nagoela.

Eskabideak aurkezteko epearen azken egunean beharkizun guztiak betetzen ditudala.

Ezgaitasuna dudala eta, beraz, behar ditudan egokitzapenak eskatzen ditudala, haietarako arrazoiak adierazita. (Beste orri batean azaldu behar dira eskatzen diren egokitzapenak eta haietarako arrazoiak).

Ezgaitasuna frogatzen duen agiria aurkezten dudala, erakunde eskudun batek emana.

Euskararen gaitasunaren agiria edo ofizialki baliokidea den beste titulu bat aurkezten dudala*

Euskara maila jakiteko proba egitea eskatzen dudala*

Frantseseko eta ingeleseko nahikotasun frogak egitea eskatzen dudala.*

Horrenbestez,

Eskabide hau ontzat hartu eta aipatu deialdian onartua izatea eskatzen dut.

Iruñean,........(e)ko .........................aren ............(e)an.

(Sinadura)

(*) Bidezkoa bada.

NAFARROAKO GOBERNUA. LEHENDAKARITZA, JUSTIZIA ETA BARNE DEPARTAMENTUA. FUNTZIO PUBLIKOAREN ZUZENDARITZA NAGUSIA.

II. ERANSKINA

Gai-zerrenda

I. zatia

Arau orokorrak

1. gaia._Espainiako 1978ko Konstituzioa. Atariko titulua. Funtsezko eskubideak eta eginbeharrak. Oinarrizko askatasun eta eskubideen bermeak. Eskubideen eta askatasunen etendura. Konstituzio Auzitegia eta Arartekoa.

2. gaia._Estatuko burutza: Koroa. Estatuaren botereak Espainiako Konstituzioan: Gorte Nagusiak, Gobernua eta Administrazioa, Botere Judiziala.

3. gaia._Estatuko lurralde antolaketa. Autonomia Erkidegoak. Eskumenen banaketa Estatuaren eta Autonomia Erkidegoen artean. Estatuak Autonomia Erkidegoen gainean duen kontrola.

4. gaia._Administrazio Zuzenbidearen iturburuak. Legea: kontzeptua eta betebeharrak. langile motak. Nazioarteko Itunak. Legegintzaren delegazioa eta haren kontrola. Lege-dekretuak. Arauen hierarkiaren printzipioa.

5. gaia._Administrazioaren erregelamendu-ahalmena. Erregelamendua: kontzeptua eta motak. Erregelamendu-ahalmenaren mugak eta haren kontrola.

6. gaia._Europar Batasuna: sormen prozesua. Eraketa Itunak: printzipioak eta ildo nagusiak. Europar Batasunaren izaera juridikoa. Espainia Europar Batasunean sartzeko prozesua: Sartzeko Agiria eta Ituna. Europar Agiri Bakuna. Europar Batasunaren Ituna. Konstituzioaaren Ituna. Europar Batasuneko erakundeak.

7. gaia._Europar Batasuneko Zuzenbidea. Haren iturburuak. Jatorrizko zuzenbidea: Itunen balio konstituzionala. Zuzenbide eratorria: Erregelamenduak eta zuzentarauak. Erabakiak, gomendioak eta irizpenak. Europar Batasuneko Zuzenbideak Estatuko ordenamendu juridikoan duen eraginkortasuna.

8. gaia._Europar Batasuneko askatasunak. Pertsonen, salgaien, zerbitzuen eta kapitalen zirkulazio librea. Lehiatzeko askatasuna. Politika ekonomikoa eta soziala. Europar Batasunaren finantzaketa.

9. gaia._Administrazio egintza: kontzeptua, motak eta osagaiak. Administrazio egintzen eraginkortasuna. Baliozkotasunaren ustea. Eraginkortasunerako baldintzak. Isiltasun administratiboa. Bete beharra eta etendura. Egintza administratiboak betetzea.

10. gaia._Egintza administratiboaren baliogabetasunaren teoria. Egintza deusezak eta deuseztagarriak. Egintza administratiboa baliozkotzea. Bide administratiboko egintzen berrikuspena. Ofiziozko berrikuspena. Nafarroako Foru Komunitateko Administrazioari buruzko abenduaren 3ko 15/2004 Foru Legearen aipamen berezia.

11. gaia._Administrazio prozedura: hasiera, antolaketa, instrukzioa eta amaiera. Nafarroako legediaren aipamen berezia.

12. gaia._Errekurtso administratiboak: Printzipio orokorrak. Gora jotzeko errekurtsoa. Berraztertzeko errekurtsoa. Berrikusteko errekurtso berezia. Akzio zibilak eta lan-akzioak erabili aurreko erreklamazioak. Nafarroako Foru Komunitateko Administrazioari buruzko abenduaren 3ko 15/2004 Foru Legearen aipamen berezia.

13. gaia._Administrazioarekiko auzi-errekurtsoa. Alderdiak. Administrazioarekiko auzi-errekurtsoaren xedea. Epaia eta horren betearaztea. Kaltegarritasunezko deklarazioa.

14. gaia._Nafarroako Parlamentua edo Gorteak. Osaera, antolakuntza eta eginkizunak. Parlamentuak Gobernua kontrolatzeko duen eginkizuna.

15. gaia._Nafarroako Gobernua. Osaera, izendapena, eratzea eta kargu-uztea. Eskurantzak eta eskumenak. Funtzionamendua. Laguntza eta sostengu organoak. Erantzukizun politikoa, Parlamentuaren kontrola eta Parlamentuaren desegitea

16. gaia._Nafarroako Gobernuko lehendakaria. Hautapena, izendapena, ordezkapena, kargu-uztea eta aldaketa. Eskurantzak.

17. gaia._Nafarroako Foru Komunitateko Administrazioa. Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritako printzipio orokorrak. Herritarren eskubideak Foru Komunitateko Administrazioarekiko harremanetan. Foru Administrazioaren antolaketa: irizpide nagusiak eta egitura organikoa, organo kolegiatuak eta administrazio organoen eskumenak.

18. gaia._Nafarroako Foru Komunitateko arartekoa. Comptos Ganbera. Nafarroako Kontseilua.

19. gaia._Nafarroako Administrazio Publikoen zerbitzuko Langileen Estatutua (I): aplikazio eremua eta salbuespenak. Langile motak. Nafarroako Foru Komunitateko Administrazioko langileak: funtzionario izaera eskuratzea eta galtzea. Administrazio egoerak. Oinarrizko eskubide eta betebeharrak: lansariak, batera ezintasunak eta administrazio karrera.

20. gaia._Nafarroako Administrazio Publikoen zerbitzuko Langileen Estatutua (II): lanpostuak betetzea. Langileen aldi baterako kontratazioa Nafarroako Foru Komunitateko Administrazioan. Nafarroako Foru Komunitateko Administrazioaren eta haren erakunde autonomoen zerbitzuko langileen prestakuntza eta hobekuntza.

21. gaia._Nafarroako Foru Komunitateko irakasleak eta osasuneko langileak. Araubide juridikoa.

22. gaia._Nafarroako administrazio publikoen montepioetako funtzionarioen eskubide pasiboen araubide iragankorrari buruzko martxoaren 5eko 10/2003 Foru Legea.

23. gaia._Nafarroako Ogasun Publikoaren Araubidea: Nafarroako Ogasun Publikoaren eskubide eta betebeharrak. Nafarroako Aurrekontu Orokorrak: edukia eta onespena; gastuen sailkapen ekonomikoa; betearaztea eta likidazioa.

24. gaia._Kontratazio administratiboa Nafarroan. Kontratu publikoen izaera juridikoa. Kontratuen osagaiak. Subjektuak. Kontratu publikoen xedea eta arrazoiak.

25 gaia._Datu pertsonalak babesteko Lege Organikoa: datuak babesteko printzipioak; pertsonen eskubideak.

26. gaia._Nafarroako Foru Komunitateko Administrazioaren eta haren erakunde autonomoen dirulaguntzei buruzko araubide orokorra. Azaroaren 9ko 11/2005 Foru Legeari buruzko aipamen berezia.

27. gaia._Lanbide prestakuntza enplegurako zerbitzu publikoetan. Maiatzaren 3ko 631/1993 Errege Dekretua, Etengabeko Lanbide Heziketaren eta Sarbidearen Plan Nazionala arautzen duena. Abuztuaren 1eko 1046/2003 Errege Dekretua, Etengabeko Lanbide Heziketaren Azpisistema arautzen duena.

28. gaia._Lan arriskuei aurrea hartzea (I): azaroaren 8ko 31/1995 Legea, Laneko arriskuen prebentzioari buruzkoa eta urtarrilaren 17ko 39/1997 Errege Dekretua, Aurre neurrietako zerbitzuen erregelamendua onesten duena: egitura eta edukiaren azterketa.

29. gaia._Lan arriskuei aurrea hartzea (II): apirilaren 20ko 135/1998 Foru Dekretua, laneko arriskuei aurrea hartzeko araudia Foru Komunitateko Administrazioaren eta haren erakunde autonomoen eremurako egokitzen duena: egitura eta edukiaren azterketa.

II. zatia

Lanaren eta Gizarte Segurantzaren Zuzenbide Substantiboa eta Prozesala

1. gaia._Lan-zuzenbidea. Lan-zuzenbidearen iturburuak. Lan-zuzenbidearen konstituzionalizazioa. Legea eta Erregelamendua. Lan-ohitura. Administrazio jurisprudentzia eta ebazpenak.

2. gaia._Arauen aplikazioa Iturburuen hierarkia. Antolamendu hierarkikoaren printzipioak: Gutxieneko arauaren printzipioa. Arau mesedegarrien printzipioa. Interpretazioa. Lan-zuzenbidearen integrazioa.

3. gaia._Lan hitzarmen kolektiboak. Kontzeptua eta eraginkortasuna. Izaera juridikoa. Negoziazio unitateak. Konkurrentzia. Edukia. Indarraldia. Legitimazioa. Negoziazio batzordea.

4. gaia._Hitzarmen kolektiboak. Tramitazioa. Indarraldia. Aplikazioa eta interpretazioa. Atxikipen hitzarmenak eta luzapen aktak. Lan hitzarmenen inpugnazioa. Hitzarmen kolektiboen Batzorde Aholku-emaile Nazionala.

5. gaia._Lan gatazkak. Motak. Konpontzeko prozedurak. Greba eta enpresaburuek sustatutako itxiera.

6. gaia._Lan-kontratua. Kontzeptua eta izaera. Lan kontratuaren subjektuak: langilea eta enpresaburua. Lan-kontratuaren sorrera. Probaldia. Kontratazio motak eta haien eraginak. Lan-kontratuko probaldia.

7. gaia._Lanaldi partzialeko kontratuak, kontratu finko jarraigabeak eta errelebo-kontratuak. Erretiroa hartzeko adina aurreratzeagatiko ordezkapena.

8. gaia._Lan-kontratu mugagabea. Kontratazio mugagabea sustatzeko kontratua. Iraupen mugatuko kontratuak.

9. gaia._Enplegua sustatzeko programak. Esparrua, pizgarriak, bazterketak eta itzulketak. Langile ezinduak eta 60 urte edo gehiagokoak kontratatzeko pizgarriak. Hobariak, amatasunaren, familia-harreraren eta haurdunaldiagatiko arriskuen kasuetan. Europako Gizarte Funtsaren laguntzak.

10. gaia._Soldata. Kontzeptua. Izaera juridikoa. Motak. Likidazioa eta ordainketa: tokia, denbora, modua eta soldatari buruzko dokumentazioa. Soldataren egitura. Lanbidearteko Gutxieneko Soldata. Ondorio Askotarako Errentaren Adierazle Publikoa.

11. gaia._Soldataren bermeak: soldata-kredituaren lehentasunezko izaera. Soldatak Bermatzeko Fondoa: ezaugarriak, eginkizunak eta laguntzen tramitazioa. Konkurtsoari buruzko Legearen eragina lan harremanetan.

12. gaia._Lanaldia. Laneko gehieneko denboraren muga orokorrak eta bereziak. Aparteko orduak. Asteko atsedenaldia eta jaiegunak. Lan egutegia. Oporrak. Lizentzia eta baimenak. Eszedentziak.

13. gaia._Enpresaren ondorengotza; enpresaren subrogazioa eta erantzukizuna. Langileen lagapena. Enpresaren erantzukizuna lanen edo zerbitzuen azpikontrataren kasuan.

14. gaia._Mugikortasun funtzionala. Lantokian mailaz igotzea eta lanbide sailkapena. Mugigarritasun geografikoa. Motak. Lan-kontratuaren funtsezko aldaketak. Lan-kontratuaren etendurak.

15. gaia._Enpresaburuaren diziplina-ahalmena. Lan-kontratuaren amaiera. Lan-kontratutik sortutako akzioen preskripzioa eta iraungipena.

16. gaia._Diziplinako kaleratzea. Ondorioak eta kalte-ordainak. Lan-kontratua amaitzea arrazoi ekonomikoengatik, teknikoengatik, antolaketako nahiz produzkioko arrazoiengatik. Kontratua amaitzea ezinbesteko arrazoiengatik. Enplegu erregulazioko espedienteak.

17. gaia._Lan-kontratua kausa objektiboengatik amaitzea: ondorioak eta kalte-ordainak. Lan-kontratua amaitzeko bestelako arrazoiak.

18. gaia._Araubide juridiko sindikala. Sindikatuen ordezkaritza. Ekintza sindikala. Ordezkaritza organoak. Eskumenak eta bermeak.

19. gaia._Adin txikikoen lana. Emakumeen lana: bereizkeriarik ezaren printzipioa. Emakumeen lanaren baldintza bereziak.

20. gaia._Atzerritarren lana Espainian. Kontzeptua. Atzerritarren eskubideak eta askatasunak. Araubide juridikoa: Espainian sartu eta hortik ateratzea, atzerritarren egoera, lan baimenak eta araubide bereziak, lan egiteko baimenen tasak.

21. gaia._Lan prozedura. Jurisdikzio ahalmenaren erabilera. Gaitasun eta legitimazio prozesala. Ordezkaritza eta defentsa prozesalak. Soldatak Bermatzeko Fondoak epaiketetan parte hartzea. Jarduketa prozesalak. Prozesua saihestea.

22. gaia._Prozesu arrunta: prestakuntzako egintzak eta aurreneurriak. Salaketa, adiskidetzea eta epaiketa. Frogak. Epaia.

23. gaia._Prozesu motak. Kaleratzeen eta zehapenen arloko prozesuak. Estatuak kaleratzeagatiko epaiketetan tramitazioko soldatak ordaintzeko erreklamazioa. Lan-kontratua kausa objektiboengatik eta bestelakoengatik amaitzearen ondoriozko prozesuak.

24. gaia._Prozesu motak. Gizarte Segurantzako prozesuak. Ofiziozko prozedura. Bestelako prozesu motak.

25. gaia._Inpugnazio bideak: probidentzia eta autoen aurkako errekurtsoak. Erregutze-errekurtsoa. Kasaziozko errekurtsoa. Berrikusteko errekurtsoa.

26. gaia._Epaiak betearaztea. Behin betiko betearaztea: xedapen orokorrak eta kasu bereziak. Behin-behinekoz beteraztea.

III. zatia

Gizarte Segurantza

1. gaia._Gizarte Segurantzaren garapen historikoa Espainian: etapak. Gizarte Segurantzari buruzko Lege Orokorraren testu bategina. Gizarte Segurantzaren Sistema Finkatu eta Arrazionalizatzeari buruzko Legea. Gizarte Segurantzaren Sistemaren egitura. Haren antolaketa araubideetan. Araubide berezien sailkapena eta zerrenda.

2. gaia._Sistema aplikatzeko eremu subjektiboa. Araubide berezia aplikatzeko eremu subjektiboa: arau orokorra, eransteak eta baztertzeak. Atzerritarrak.

3. gaia._Enpresen inskripzioa, afiliazioa, langileen altak eta bajak Gizarte Segurantzaren sistema orokorrean. Altari parekatutako egoerak. Egintza okerren ondorioak.

4. gaia._Kotizazioa. Kuota: kontzeptua eta izaera juridikoa. Subjektu behartuak eta subjektu erantzuleak. Kotizatu beharraren sorrera eta iraupena. Gizarte Segurantzaren hitzarmen berezia. Preskripzioa. Kredituen lehentasuna eta jaso behar ez zen dirua itzultzea.

5. gaia._Kotizazio oinarriak. Kontzeptua eta salbuespenak. Kotizazio oinarriak zehaztea. Kotizazioa enplegu-aniztasuna, lanaldi partzialeko lana, aldi baterako ezintasuna eta langabezia subsidiatua dagoenean. Lansaririk kobratu gabe altan jarraitzea.

6. gaia._Kotizazio tasa bakarra. Langabezirako kotizazioa. Soldatak Bermatzeko Fondoa eta Lanbide Heziketa. Egoera baztertuak direla-eta, kuota gutxitzea. Kuotaren hobariak eta murriztapenak. Kotizazio gehigarria aparteko orduengatik. Kotizazioa lan-istripuen eta lanbide-gaixotasunen araubideari.

7. gaia._Kotizazioa eta dirubilketa. Dirubilketa borondatezko aldian: kuotak likidatzeko epeak, tokia eta modua. Ordainketa geroratzea eta zatikatzea. Erregelamenduzko epean kotizaziorik ez izatea: zorren erreklamazioa eta kuoten likidazio aktak, errekarguak.

8. gaia._Derrigorrezko dirubilketa. Arau erregulatzaileak. Titulu exekutiboak. Premiamenduei aurkatzeko arrazoiak. Bahitura. Bahitutako ondasunak besterentzea. Hirugarrengotzak. Derrigorrezko Dirubilketa Unitateen aipamen laburra.

9. gaia._Babes-ekintza. Prestazioen edukia eta sailkapena. Bateraezintasunak. Lan-istripuaren eta lan-gaixotasunaren kontzeptua.

10. gaia._Osasun laguntza. Onuradunak. Modalitateak. Botika prestazioak. Onuradunek botiken prezioan parte hartzea.

11. gaia._Aldi baterako ezintasunaren babesa: kontzeptua, onuradunak eta zenbatekoa. Sorrera, iraupena eta iraungipena. Amatasunaren babesa. Haurdunaldiko arriskuen babesa.

12. gaia._Ezintasun iraunkorraren babesa: mailak. Sorrera, iraupena eta iraungipena. Zenbatekoa. Ezintasunik ez dakarten lesio iraunkorrak. Ezintasun iraunkorraren kalifikazioa eta berrikuspena. Zergari lotu gabeko ezintasun pentsioak.

13. gaia._Erretiroaren babesa. Gertaera eragilea. Prestazioaren zenbatekoa. Lanarekiko bateraezintasuna, etendura eta bukaera. Erretiro aurreratuak eta aurre-erretiroa. Erretiro partziala. Zergari lotu gabeko erretiroagatiko pentsioa.

14. gaia._Heriotzaren eta biziraupenaren babesa. Alarguntzagatiko prestazioak, zurztasunagatikoak eta familiakoentzako prestazioak. Prestazioen zenbatekoa. Bateragarritasuna eta bukaera. Lan-istripuei eta lanbideko eritasunei buruzko berariazko arauak. Familaren babesa: prestazio motak, betebeharrak eta zenbatekoa. Onuradunak. Gizarte Segurantzako zerbitzuen aipamen laburra.

15. gaia._Gizarte Segurantzaren entitate kudeatzaileak eta zerbitzu komunak. Aurrekari historikoak. Gizarte Segurantzako Institutu Nazionala: antolaketa eta eginkizunak. Gizarte Segurantzako Diruzaintza Orokorra: antolaketa eta eginkizunak.

16. gaia._Kudeaketarako lankidetza. Lan-istripuen eta lanbide-gaixotasunen mutualitateak. Eraketa, antolakuntza eta eginkizunak. Enpresen nahitaezko eta borondatezko lankidetza.

17. gaia._Langabeziaren babesa. Kontzeptua eta motak. Aplikazio esparrua. Babes-ekintza. Legezko langabezia egoeraren eta hura frogatzeko moduen aipamen berezia.

18. gaia._Langabeziagatiko prestazioa: onuradunak. Eskubidea sortzeko betebeharrak. Eskubideraren iraupena, zenbatekoa, berriz eskuratzea eta amaiera.

19. gaia._Langabeziagatiko subsidioa: onuradunak. Eskubidea sortzeko betebeharrak. Subsidioaren iraupena eta zenbatekoa. Eskubidea berriz eskuratzea.

20. gaia._Prestazioen finantzaketa eta kudeaketa. Langabezi-prestazioaren tramitazioa eta ordainketa: arau orokorrak eta berariazkoak. Ordainketa bakarraren aukera.

21. gaia._Langabeziaren babesa. Enpresaburuen eta langileen betebeharrak. Enpresaburuen eta langileen erantzukizuna: enpresaren erantzukizuna eskatzeko prozedura eta zuzengabean jasotako diru kopuruaren itzulketa.

22. gaia._Ikuskatzailetzaren prozedura gizarte legeen arau-hausteen arloan. Arau-hausteen aktak. Legezko baldintzak. Tramitazioa. Premiamendu bidezko dirubilketaren prozedura arau-hausteen arloan.

23. gaia._Ikuskatzailetzaren prozedura Gizarte Segurantzaren arloan. Likidazio aktak. Legezko baldintzak. Tramitazioa. Likidaziorako errekerimenduak eta proposamenak.

Iragarkiaren kodea: F0610129