Iragarkia

74. ALDIZKARIA - 2006ko ekainaren 21a

I. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Plantilla Organikoa, Lan Eskaintza Publikoa, oposizioak eta lehiaketak

DEIALDIA, Funtzio Publikoaren zuzendari nagusiak maiatzaren 29an emandako 1380/2006 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko Estatistikako erdi mailako tituludun izateko 2 lanpostu huts oposizio bidez betetzekoa.

Funtzio Publikoaren zuzendari nagusiak, maiatzaren 29ko 1380/2006 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko Estatistikako erdi mailako tituludun izateko 2 lanpostu oposizio bidez betetzeko deialdia onetsi du.

Hautapen prozesua ondoko hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsi zena, aipatu estatutua garatu eta burutzeko Sarrera Erregelamendua, gainerako aplikazio arauak eta deialdi honetako oinarriak.

1._Deialdiaren xedea.

1.1. Deialdi honen xedea da Estatistikako erdi mailako diplomadun izateko 2 lanpostu oposizio bidez betetzea, funtzionarioen araubidekoak eta B mailakoak, Iruñean aritzekoak, txanda hauetan banatuak:

_Lanpostu bat txanda irekian.

_Lanpostu bat igoera txandan.

1.2. Hauek dira eskaintzen diren lanpostu hutsak:

_Lanpostu bat Ekonomia eta Ogasun Departamentuan, plantilla organikoan 7220 zenbakia duena.

_Lanpostu bat Nekazaritza, Abeltzaintza eta Elikadura Departamentuan, plantilla organikoan 7227 zenbakia duena.

1.3. Hautaprobak gainditzeko eskatzen den gutxieneko puntuaziora ez iristeagatik, bete gabe gelditzen bada igoera txandako lanpostu hutsa, txanda irekikoari gehituko zaio.

Bestaldetik, igoera txandan hutsik dauden lanpostuak baino izangai gehiagok gainditzen badute, txanda horretan lanpostuak eskuratzen ez dituztenek aukera izanen dute txanda irekiko lanpostu hutsak eskuratzeko, txanda horretako izangaiekin lehian eta eskuratutako azken puntuazioaren arabera.

Era berean, txanda irekiko lanpostua eskuratzeko aukera izanen dute, aurreko lerroaldean adierazitako moduan, deialdiko 7.2 oinarrian agiriak aurkezteko ezartzen den epea bukatzen denean deialdiko 2.1.2 oinarriko eskakizun berariazkoak betetzen ez dituzten igoera txandako izangaiek.

1.4. Lanpostuek B mailako lansariak izanen dituzte, uztailaren 4ko 158/1984 Foru Dekretuaren bidez onetsitako Lansarien Behin-behineko Erregelamenduan eta, kasuan kasu, aplikatu beharreko gainerako xedapenetan ezarritakoari jarraikiz.

1.5. Halaber, deialdi honen bidez hautaprobak gainditu bai baina lanposturik lortzen ez duten izangaiekin aldi baterako kontratatuak izateko izangaien zerrenda bat osatu nahi da, 10. arauan xedaturikoarekin bat.

2._Betebeharrak.

2.1. Oposizio honetan onartuak izateko, izangaiek, eskabideak aurkezteko epea amaitzen den egunean eta agiriak aurkezteko epearen barrenean (deialdiaren 7.2 atalean adierazia), eta lanpostuaren jabetza hartu arte, baldintza hauek bete beharko dituzte:

2.1.1. Izangai guztiek bete beharreko baldintzak.

a) Espainiarra izatea, edo Europar Batasuneko beste estatu batekoa, edo, Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, espainiarren eta Europar Batasuneko beste estatuetako edo aipatu nazioarteko itunek ukitutako estatuetako herritarren ezkontideek hartzen ahal dute parte; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira edo, gorakoak izanik, haien kontura biziz gero.

b) Adin nagusikoa izatea eta erretiroko adina ez izatea.

c) Unibertsitateko Diplomadun, Ingeniari Tekniko edo Arkitekto Tekniko titulua edo titulu baliokidea edukitzea, edo aipatu titulua eskuratzeko baldintza guztiak betetzea eskabideak aurkezteko epea amaitzen den egunean, edo Lizentziatura, Ingeniaritza edo Arkitekturako lehenengo hiru ikasturteak osorik gaindituak izatea.

Atzerrian lorturiko tituluak badira, homologazioaren egiaztagiria eduki beharko da.

d) Bete behar dituen eginkizunetan aritzeko adinako gaitasun fisiko eta psikikoa izatea.

e) Eginkizun publikoetan aritzeko desgaitu edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute beren Estatuko Funtzio Publikoan sartzea eragozten dien diziplina zehapenik edo zigor penalik ez dutela.

2.1.2. Igoera txandako izangaiek bete beharreko baldintza berariazkoak.

Igoera txandako izangaiek, aurreko idatz-zatian adierazitako betebeharrez gain, hauek bete beharko dituzte:

a) Nafarroako edozein Administrazio Publikotako langile finkoa izatea, edo Nafarroako Foru Komunitateko Administrazioari transferitutako Justizia Administrazioaren zerbitzuei atxikitako langile finkoa, eta jatorrizko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa izatea.

c) Administrazio Publikoetan bost urteko antzinatasun onartua izatea, Nafarroako Polizia Kidegoetako kideen kasuan izan ezik, horiek frogatu beharko baitute zortzi urtez eman dituztela zerbitzuak kidego horietan.

Nafarroako Administrazio Publikoetan lan egiten duten langileen Estatutuaren xedapen gehigarrietatik zortzigarrenean ezarri dena aplikatuz, igoera txandan esku hartzeko baldintzak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

2.2. Deialdiko 3.3 arauko bigarren puntuan aipatzen den salbuespena salbuespen, izendatuak izateko proposatzen diren izangaiek deialdiko 7.2 idatz-zatian ezarritako epean eta moduan frogatu beharko dituzte betebehar horiek.

3._Eskabideak.

3.1. Deialdian parte hartzeko eskabideak Nafarroako Gobernuko Lehendakaritza, Justizia eta Barne Departamentuko Erregistro Orokorrean (Karlos III.aren etorbidea, 2, atalondoa, 31002 Iruña) edo erregistro horretako beste edozein bulegotan (zerrenda 2005eko 33. Nafarroako ALDIZKARI OFIZIALean argitaratu zen, martxoaren 18an) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legeko 38.4 artikuluan adierazitako bideren bat erabiliz, deialdia Nafarroako ALDIZKARI OFIZIALean argitaratu eta biharamunetik hogeita hamar egun naturaleko epean.

Eskabideak deialdi honen eranskinean dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuko Argibide Bulegoan dago eskuragarri. Interneten bidez ere lortzen ahal da, www.navarra.es helbidean, bai argitaratzen deneko Aldizkari Ofizialetik abiatuta, bai Zerbitzuen Katalogoko Enplegu Publikoan dagoen deialdiaren aiputik abiatuta.

3.2. Ezgaitasun aitortua duten lehiatzaileek, ariketak egin ahal izateko denbora edo baliabideetan egokitzapenik behar badute, zilegi izanen dute eskabidean eskatzea, eta hartarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Horrekin batera, legeen arabera ezgaitasunen bat dutela frogatzeko agiriaren kopia konpultsatua ere aurkeztu beharko dute, organo eskudunak emana.

3.3. Eskabideari, behar bezala bete ondoren, agiri hauek erantsiko zaizkio:

Bat._Espedientea formalizatzeko eta azterketa eskubideetarako 18 euro ordaindu izanaren ziurtagiria. Azterketa eskubideen tasa ordaindu izanaren agiria aurkezten ez bada, izangaia baztertu eginen da.

Sistema hauetako bat erabiliz ordaintzen ahalko da tasa hori:

_Behar bezala betetako ordainketa gutuna erabiliz; Foru Komunitateko Administrazioak Nafarroako finantza entitateetan dituen kontuetan sartuko da dirua. Arestian aipatutako webgunean, deialdiaren iragarkian, ordainketa gutuna eredua ageri da.

_Sarrera esku-dirutan edo bankuko transferentzia bidez eginez, Banestoko (Banco Español de Crédito) 00308124 87 0870002271 kontuan; horrelakoetan ordain-agirian datu hauek jarri beharko dira:

.Izangaiaren izen-deiturak.

.NAN/IFZ.

.Ordainketa zein kontutan egiten den, haren zenbakia.

.Kontzeptua: Oposizioak.

.Deialdiaren xede den lanpostua.

Frogagirian datu horietako bat falta baldin bada, izangaia baztertu eginen da.

Honako hauek ez dute tasarik ordaindu beharko:

a) %33ko edo gehiagoko ezgaitasun aitortua dutela frogatzen duten pertsonek, organo eskudunak luzaturiko jatorrizko agiriaren edo behar bezala konpultsaturiko fotokopiaren bidez.

b) Hautaproben deialdia egin aurretik hilabete batez edo luzaroago lan-eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon den bitartean eskainitako inolako lan egokiri uko egin ez izana eta lanbide sustapen, prestakuntza edo eraberritze ekintzetan parte hartzeari uko egin ez izana, justifikaturiko kasuetan izan ezik, eta, horrez gainera, lanbide arteko gutxieneko soldatatik gorako den dirusarrerarik ez izatea hilabetero.

Lan eskatzailea dela frogatzeko, Enplegu Bulegoak emandako agiria aurkeztu beharko da. Bertan, lan-eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ez eta lan-igoera, prestakuntza edo eraberritze ekintzetan parte hartzeari ere, justifikaturiko kasuetan izan ezik.

Hilero lanbide arteko gutxieneko soldatatik gorako errentarik ez duela interesatuaren adierazpenaren bidez frogatuko da. Adierazpen eredua Nafarroako Gobernuko Informazio Bulegoan eskuratzen ahalko da, edo bestela internet bidez, arestian emandako helbidean.

Bi._Deialdian igoera txandan parte hartu nahi duten izangaiek, Nafarroako Foru Komunitateko Administrazioa ez den Nafarroako beste Administrazio Publiko bateko langile finkoak badira, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finkoak, lehengoaz gainera, deialdi honetako 2.1.2 arauan jasotzen diren eskakizunak betetzen dituztela frogatzen duen agiria gehitu beharko diote eskabideari.

3.4. Eskabideak aurkezteko epea ezin izanen da luzatu.

3.5. Eskabidean atzematen diren akats materialak edo egitezkoak ofizioz edo interesatuak eskaturik zuzentzen ahalko dira, noiznahi ere.

4._Izangaien onarpena eta erreklamazioak.

4.1. Eskaerak aurkezteko epea bukaturik, Funtzio Publikoaren zuzendari nagusiak ebazpena emanen du izangai onartu eta baztertuen behin-behineko zerrenda onesteko, eta Nafarroako ALDIZKARI OFIZIALean argitara dadila aginduko du.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, akatsik egin badute, zuzentzeko.

4.3. Erreklamazioetarako epea bukatutakoan eta horiek ebatzita, Funtzio Publikoaren zuzendari nagusiak onartu eta baztertuen behin betiko zerrenda onesten duen ebazpena emanen du, eta Nafarroako ALDIZKARI OFIZIALean argitara dadila aginduko.

4.4. Izangaiei egotziriko arrazoiengatik baztertzen direnei ez zaizkie azterketa egiteko eskubideak itzuliko.

5._Epaimahai kalifikatzailea.

5.1. Epaimahaiak kide hauek izanen ditu:

_Mahaiburua: José Angel Zubiaur Carreño jauna, Ekonomi eta Ogasun Departamentuko Ekonomia eta Europako Aferen zuzendari nagusia.

_Ordezkoa: Amaya Larequi Górriz andrea, Nekazaritza, Abeltzaintza eta Elikadura Departamentuko Informazio eta Kudeaketa Ekonomikoaren Zerbitzuko zuzendaria.

_Mahaikidea: Laura Arnedo Ajona andrea, erdi mailako teknikaria (estatistikaria), Nafarroako Estatistika Institutuko Ekoizpen Estatistikoaren Atalari atxikia.

_Ordezkoa: Pedro Bandrés Oscoz jauna, Nafarroako Estatistika Institutuko Estatistikaren Koordinazio eta Zabalkunderako Ataleko burua.

_Mahaikidea: Francisco Javier Cerveto Peña jauna, Nekazaritza, Abeltzaintza eta Elikadura Departamentuko Nekazaritzako Estatistikaren eta Azterlanen Bulegoko burua.

_Ordezkoa: Miguel Donézar Díez de Ulzurrun jauna, Nekazaritza, Abeltzaintza eta Elikadura Departamentuko Nekazaritzako Baliabideak Ebaluatzeko Ataleko burua.

_Mahaikidea: Administrazio Erroko Langileen Batzordearen ordezkari bat, batzordeak berak proposatua.

_Ordezkoa: Administrazio Erroko Langileen Batzordearen ordezkari bat, batzordeak berak proposatua.

_Mahaikide idazkaria: Marina Sagaseta López andrea, erdi mailako teknikaria (estatistikaria), Nafarroako Estatistika Institutuko Ekoizpen Estatistikoaren Atalari atxikia.

_Ordezkoa: Pablo Cebrián Jiménez jauna, Nafarroako Estatistika Institutuko Ekoizpen Estatistikoaren Ataleko burua.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Organo kolegiatuaren eraketak eta jardunak balio izateko, mahaiburuak eta mahaikide idazkariak edo haien ordezkoek bertan egon beharko dute.

5.3. Epaimahaiko kideek parte hartzeari uko egin beharko diote eta deialdia egin duen organoari hala jakinarazi, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Foru Legean horretarako aurreikusiak dauden egoerak gertatzen direnean.

Izangaiek, halaber, zilegi izanen dute mahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren inguruan sortzen diren arazo guztiak.

5.5. Epaimahaiak aholkulari adituen laguntza izan dezake, proba batzuetan nahiz guztietan laguntzeko. Aholkulari horiek beren espezialitate teknikoetan baizik ez dira ariko eta horietan bakarrik emanen diote laguntza epaimahaiari.

6._Oposizioa nola eginen den.

6.1. Oposizioa 2007ko urtarrilean hasiko da. Onartu eta baztertuen behin betiko zerrenda onesten duen ebazpenean berean finkatuko dira probak hasteko tokia, eguna eta ordua.

Ondoren, epaimahaiak jakinaraziko ditu gainerako probak egiteko iragarkiak, erregelamenduz.

6.2. Oposizioak ariketa hauek izanen ditu:

a) Lehenbizikoa: Bi zati izanen ditu:

Lehen zatia: ariketa praktikoa izanen da, II. eranskineko 1etik 36ra bitarteko gaien edukiari buruzkoa.

Bigarren zatia: idatziz azaldu behar da deialdiko II. eranskinean 1etik 36ra bitarte zenbakiturik dauden gaietako bat, zozketaz erabakia.

Epaimahaiak, ariketa hasi aurretik, zenbat denbora izanen den adieraziko du; ezin izanen da izan, betiere, ordubete baino gehiago lehen zatirako eta ordubete baino gehiago bigarrenerako.

b) Bigarrena: bi zati izanen ditu honek ere:

Lehen zatia: bi ariketa praktiko egin beharko dira. Lehenbizikoa II. eranskineko gai zerrendaren 37tik 47ra bitarteko gaien edukiari buruzkoa, eta bigarrena 48tik 56ra bitarteko gaien edukiari buruzkoa.

Bigarren zatia: II. eranskineko gai zerrendaren 37tik 73ra bitarteko gaietako bat, zozketaz erabakia, idatziz azaldu beharko da.

Epaimahaiak, ariketa hasi aurretik, zenbat denbora izanen den adieraziko du; ezin izanen da izan, betiere, 2 ordu baino gehiago lehen zatirako eta ordubete baino gehiago bigarrenerako.

Halaber, ariketak egitean oposizioko parte-hartzaileen anonimatua babesteko beharrezko neurriak hartuko ditu.

6.3. Oposizioko ariketetan gehienez ere 200 puntu lortu ahalko dira eta ariketen arabera honela banatuko dira:

Lehen ariketa:

_Lehen zatia: gehienez 50 puntu. Baztertu eginen dira gutxienez 25 puntu lortzen ez dituzten izangaiak.

_Bigarren zatia: gehienez 50 puntu. Baztertu eginen dira 25 puntu lortzen ez dituzten izangaiak.

Bigarren ariketa:

_Lehen zatia:

_Lehen ariketa praktikoa: gehienez 25 puntu.

_Bigarren ariketa praktikoa: gehienez 25 puntu.

Baztertu eginen dira bi ariketa praktikoen artean 25 puntu lortzen ez dituzten izangaiak edo bietakoren batean 0 puntu lortzen dutenak.

_Bigarren zatia: gehienez 50 puntu. Baztertu eginen dira gutxienez 25 puntu lortzen ez dituzten izangaiak.

6.4. Ariketak zuzendu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo proba edo ariketa egiteko tokia, eguna eta ordua, gutxienez 48 ordu lehenago.

6.5. Ariketa bakoitzerako dei bakarra eginen da. Izangaiek nortasun agiri nazionala, pasaportea edo gida-baimena eraman beharko dute. Azterketara agertzen ez direnak edo arestian aipatutako agirietako baten bidez beren nortasuna egiaztatzen ez dutenak oposiziotik baztertuko dira.

6.6. Hauta-probak egiteko, ezgaitasun aitorturen bat dutenentzat bidezkoak diren denbora eta baliabide egokitzapenak eginen dira, eskabidean azaldutakoaren arabera.

7._Probak gainditu dituztenen zerrenda, izendapen proposamena eta agirien aurkezpena.

7.1. Hautaprobak amaiturik, epaimahaiak jendaurrean jarriko du probak gainditu dituztenen zerrenda, oposizioan lortutako kalifikazioekin, Nafarroako Gobernuaren iragarki oholean. Gero, zerrenda hori Funtzio Publikoaren zuzendari nagusiari igorriko dio, deialdiko lanpostuen kopuruaren barruan sartzen diren eta probak puntuazio altuenekin gainditu dituzten izangaiak izendatzeko proposamenarekin eta espediente osoarekin batera. Proposamen hori Nafarroako ALDIZKARI OFIZIALean argitaratuko da.

Berdinketa izanez gero, lehen ariketan puntuazio altuagoa erdiesten duenaren alde jokatuko da. Eta balirau, bigarren ariketaren lehenbiziko zatian lorturiko puntuazioa hartuko litzateke kontuan.

7.2. Izendapen proposamena Nafarroako ALDIZKARI OFIZIALean argitaratu ondoko 30 egun naturaleko epean, proposatutako izangaiek inprimaki berariazko batzuk jaso eta honako agiri hauek aurkeztu behar dituzte Funtzio Publikoaren Zuzendaritza Nagusian:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiak:

a) Nortasun Agiri Nazionalaren bi fotokopia konpultsatu, edo izangaiaren hiritartasuna eta nortasuna frogatzen dituen beste agiri baliokideren batenak.

b) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.

c) Laneko Arriskuei Aurrea hartzeko Atalak emandako txostena, interesatuak karguan aritzea eragotziko liokeen eritasun edo akats fisiko edo psikikorik ez duela frogatzeko.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

d) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizi ez izanaren zinpeko aitorpena.

Izangaiek Espainiako herritartasuna ez badute, agiria aurkeztu beharko dute, beren Estatuko Funtzio Publikoan sartzea eragozten dien diziplina zehapenik edo zigor penalik ez dutela adierazteko.

e) Zin egin edo hitz ematea, Nafarroako Foru Eraentza errespetatu, Konstituzioari eta Legeei men egin eta karguari dagozkion eginkizunak zuzen beteko dituela.

f) Funtzio Publikoaren Zuzendaritza Nagusiak eskatzen dizkion gainerako agiriak.

Deialdi hau egin ez duen Nafarroako beste Administrazio Publikoren bateko langile finko, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finko diren izangaiek, gainera, aurreko administrazioko espediente pertsonalean ageri diren inguruabar eta aurrekari guztiak frogatzen dituen ziurtagiria aurkeztu beharko dute, hots, sarrerari, antzinatasunari, mailari, egoera administratiboari eta abarrei buruzkoa.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiak:

a) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.

b) Funtzio Publikoaren Zuzendaritza Nagusiak eskatzen dizkion gainerako agiriak.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barrenean, eta aski justifikaturik dauden ezinbesteko kasuak salbuetsiz, arestiko agiriak aurkezten ez dituztenak ezin izanen dira izendatu, eta ordurako egintza guztiak baliorik gabe geldituko dira, euren eskabidearen faltsukeria dela eta, legokiekeen erantzunbeharra galarazi gabe.

7.4. Aurreko atalean aurreikusitakoa gertatuz gero, Funtzio Publikoaren zuzendari nagusiak probak gainditu dituztenen zerrendan, 7.1. atalean aipatutakoan, hurrengoa den izangaiarekin beteko du baja, eta horrekin ere aurreko ataletan adierazitako moduan jokatuko da.

8._Lanpostu hutsak hautatzea.

8.1. Aurreko oinarrian xedatu dena betetzen duten lehiatzaileek Funtzio Publikoaren Zuzendaritza Nagusiak hartarako jartzen dien epean aditzera eman beharko dute eskaintzen zaizkien lanpostuetatik zein hautatzen duten. Aukeratu beharreko lanpostuak hasieran deitutakoak izanen dira, edo beste batzuk, zerbitzuaren beharrei jarraikiz horiek aldatzea erabakitzen bada.

8.2. Hautaprobak igoera txandaren bidez gainditzen dituzten izangaiek, 8.3 ataleko bigarren lerroaldean aipatutako kasuan izan ezik, lehentasuna izanen dute deialdiko lanpostu hutsak aukeratzerakoan, txanda horretakoak ez diren izangaien aurretik.

8.3. Lanpostu hutsak aukeratzeko orduan, %33ko edo handiagoko minusbaliotasun aitortua duten izangaiek lehentasuna izanen dute txanda irekiko izangaien aurretik.

Izangai minusbaliaturik bada, eta horrek eragina badu lanpostu bat edo bestea hautatzeko, aukeratzen hasi aurretik, minusbaliotasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

9._Izendapena, lanpostuen esleipena eta jabetza hartzea.

9.1. Funtzio Publikoaren zuzendari nagusiak, ebazpen baten bitartez, aurreko oinarrietan ezarritakoa betetzen duten izangaiak Nafarroako Foru Komunitatearen Administrazioko funtzionario izendatuko ditu, Estatistikako erdi mailako tituludunen lanetan aritzeko. Ebazpen horren bidez lanpostuen esleipena ere eginen da.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko dituzte izendatuak, indarra duten xedapenek ezartzen dituzten eskubide eta betebehar guztiak dituztela. Gizarte Segurantzako araubide orokorrean inskribatu eta kidetuko dira, araubide horretan aurreikusitakoaren babesean.

Aurrekoa gorabehera, Nafarroako Administrazio Publikoen Zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein bahituretxetako eskubide pasiboen araubidekoak direnen kasuan, bi aukera izanen dituzte: Nafarroako Foru Komunitateko Administrazioko bahituretxean segitzea, martxoaren 5eko 10/2003 Foru Legearen bidez arauturiko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Izendatzen diren izangaiek destinoko herrian izan beharko dute bizilekua, bertan helbidea egiazki kokatuz. Administrazio organo eskudunek destinoa aldatzen ahalko dute, aplikatzekoa den arautegian ezarritakoarekin bat.

9.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

9.5. Izendapena Nafarroako ALDIZKARI OFIZIALean argitaratuko da eta izangai izendatuak hilabeteko epean jabetu beharko du bere lanpostuaz, izendapenaren jakinarazpenetik kontatzen hasita.

Aipatu epean eta behar bezain ongi arrazoitutako kasuetan izan ezik, izangairen batek ez baldin badu lanpostua bere egiten, Foru Komunitateko Administrazioaren funtzionario izateko eskubide guztiak galduko ditu. Hala bada, 7.4 atalean ezarritakoari jarraikiko zaio.

9.6. Izangai bat funtzionario bihurtu eta lanpostuan batere aritu gabe zuzenean eta berak eskatuta borondatezko eszedentzia ematen bazaio jabetza hartzearen egunetik bertatik, data hartan beste Administrazio Publiko batean ari delako, kasuko lanpostu hutsa ere beteko da deialdiko 7.4 atalak agintzen duen moduan.

9.7. Aurreko bi ataletan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10._Aldi baterako kontratuetarako izangaien zerrenda.

10.1. Nafarroako Administrazio Publikoan sartzeko Erregelamenduaren 42. artikuluan, lanpostuak aldi baterako betetzeko kudeaketa arauak onetsi zituen Lehendakaritza, Justizia eta Barne kontseilariaren azaroaren 14ko 146/2005 Foru Aginduan eta oinarri honexetan ezarritako prozedurari jarraikiz, aldi baterako kontrataziorako izangaien zerrenda hauek sortuko dira:

_Probak gainditu bai baina lanposturik lortu ez duten izangaien zerrenda.

_Hautapen prozesuaren ariketa guztiak gainditu ez dituzten izangaien zerrenda.

10.2. Epaimahaiaren espedientea jasota, Funtzio Publikoaren zuzendari nagusiaren ebazpen baten bidez, hautapen prozesua gaindituta ere lanposturik gabe gelditu diren izangaiei eta deialdian ezarritako azkenaurreko ariketa gainditu dutenei hamar egun balioduneko epea emanen zaie, ebazpena argitaratu eta biharamunetik hasita, ondoko dokumentazio hau aurkezteko:

Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, sartzeko prozesuan parte hartzeko eskabideak aurkezteko epean titulua eskuratzeko moduan egoten dela frogatzen duen ziurtagiria.

Ebazpen hau Nafarroako ALDIZKARI OFIZIALean argitaratuko da, eta langileen zerrendak Nafarroako Gobernuko iragarki-oholean (Karlos III.aren etorbidea, 2, atalondoa, Iruña).

Eskatzen diren agiriak aipatu epean aurkezten ez dituztenak (aski justifikatutako ezinbesteko kasuetan izan ezik) eta eskatutako baldintzak betetzen ez dituztenak ez dira sartuko aldi baterako kontratuetarako izangaien zerrendan, eta deialdian parte hartzeagatiko eskubide guztiak galduko dituzte, deusetan ukatu gabe, betiere, parte hartzeko eskabidea faltsutzeagatik legokiekeen erantzukizuna.

10.3. Sartzeko prozeduraren eskabideak aurkezteko epea bukatzen den egunerako bete beharko dira baldintzak, eta hauta-probek dirauteino eta kontratazioaldiak iraun bitarte bete beharko dira.

10.4. Dokumentazioa aurkezteko epea bukaturik, Funtzio Publikoaren zuzendari nagusiaren ebazpen baten bidez, aldi baterako kontratuetarako izangaien zerrenda hauek onetsiko dira eta Nafarroako Gobernuaren iragarki oholean argitaratuko (Karlos III.aren etorbidea, 2, ataria, Iruña):

a) Probak gainditu bai baina lanposturik lortu ez duten izangaien zerrenda.

b) Deialdiaren azkenaurreko ariketa gainditu bai baina lanposturik gabeko gaindituen zerrendan ez daudenen zerrenda.

10.5. Hauxe izanen da aldi baterako kontratazioen zerrendaren ordena: oposizioa gainditu bai baina lanposturik lortu ez dutenen kasuan, hautapen prozesuan lortutako puntuazioaren arabera; gainerako izangaien kasuan, gainditutako ariketetan lortutako puntuazioen batura. Berdinketarik dagoenean nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

11._Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da Funtzio Publikoaren zuzendari nagusiari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdi honen eta bere arauen kontra eta arauak aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barne kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik kontatuta.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2006ko maiatzaren 29an._Funtzio Publikoaren zuzendari nagusia, Alberto Andérez González.

I. ERANSKINA

Eskabidea

Izena: ........................, adinez nagusia. Nortasun Agiri Nazionala (edo balio bereko beste agiriren bat): ...................... Jaioteguna: ................. Sorterria: .................. (.................). Nazionalitatea: ............... Helbidea: kalea: .............., herria: ............., probintzia: ......., posta kodea: ........, eta ........ telefonoa (........... laneko telefonoa)

AZALTZEN DU:

Nafarroako Foru Komunitateko Administrazioaren eta haren erakunde autonomoen zerbitzuko .............. izateko ...............lanpostu ....................bidez betetzeko deialdian parte hartzeko onartu izatea eskatzen dudala, ondoko txandan (deialdia ...... zenbakiko Nafarroako ALDIZKARI OFIZIALean argitaratu zen, .........(e)an):

f Txanda irekia

f Igoera txanda*

f Minusbaliatuendako txanda*

Hauta-probak gainditzen ez baditut, lanpostuak behin-behinekoz betetzeko aukeraz baliatu nahi dudala, honako esparruotako batean:

f Administrazio-erroa*

f Nafarroako Osasun Zerbitzua-Osasunbidea*

f Nafarroako Gizarte Ongizatearen Institutua*

(Esparruetako bakar bat aukeratu daiteke)

Ez dudala karguan aritzea galarazten didan eritasun edo akats fisiko edo psikikorik.

Indarra duten xedapenetan ezarritako ezintasunik ez dudala.

Ez naizela diziplinako espediente bidez ezein administrazio publikoren zerbitzutik kanpo utzia izan eta ez nautela eginkizun publikoak betetzeko gaitasunik gabe utzi.

Deialdian eskatzen den titulazioaren jabe naizela.

Azterketa eskubideak ordaindu ditudala deialdian ezarritako moduan eta horren gordekina erantsi dudala, edo erantsitako agirien bidez frogatzen dudala tasa ordaintzetik salbuetsita nagoela.

Eskabideak aurkezteko epearen azken egunean beharkizun guztiak betetzen ditudala.

f Ezgaitasuna dudala eta, beraz, behar ditudan egokitzapenak eskatzen ditudala, haietarako arrazoiak adierazita. (Beste orri batean azaldu behar dira eskatzen diren egokitzapenak eta haietarako arrazoiak).

f Ezgaitasuna frogatzen duen agiria aurkezten dudala, erakunde eskudun batek emana.

f Euskararen gaitasunaren agiria edo ofizialki baliokidea den beste titulu bat aurkezten dudala*

f Euskara maila neurtzeko proba egitea eskatzen dudala*

f Frantseseko eta ingeleseko nahikotasun frogak egitea eskatzen dudala (*)

Horrenbestez,

Eskabide hau ontzat hartu eta aipatu deialdian onartua izatea eskatzen dut.

Iruñean,........(e)ko .........................aren ............(e)an.

(Sinadura)

(*) Bidezkoa bada.

NAFARROAKO GOBERNUA. LEHENDAKARITZA, JUSTIZIA ETA BARNE DEPARTAMENTUA.

FUNTZIO PUBLIKOAREN ZUZENDARITZA NAGUSIA.

II. ERANSKINA

Gai zerrenda

1._Estatistika.

1.1. Ideia nagusiak eta aplikazio eremuak.

1.2. Unitate estatistikoak.

1.3. Karaktere kualitatibo eta kuantitatiboak.

1.4. Aldagai diskretu eta jarraituak.

2._Determinanteak.

2.1. Sistema linealak ebazteko determinanteen sorburua.

2.2. Bigarren ordenako determinanteak.

2.3. Hirugarren ordenako determinanteak.

2.4. Sarrusen erregela.

2.5. Cramerren formula.

2.6. N ordenako determinanteak.

2.7. Determinanteen ezaugarriak.

2.8. Kalkulu metodo praktikoa.

3._Matrizeak.

3.1. Definizioak.

3.2. Matrizeen biderketa.

3.3. Matrize baten determinantea.

3.4. Menpekotasun lineala. Matrize baten lerruna.

3.5. Alderantzizko matrizea.

4._Konbinatoria.

4.1. Bariazioak.

4.2. Permutazioak.

4.3. Aldakuntzak.

5._Probabilitateen teoria.

5.1. Probabilitatearen definizioak.

5.2. Baldintzazko probabilitatea, gertaera independenteak eta menpekoak.

5.3. Gertaera elkar-baztertzaileak.

5.4. Probabilitatearen banaketak.

6._Ausazko aldagai dimentsiobakarrak.

6.1. Aldagai aleatorioa.

6.2. Banaketa funtzioa.

6.3. Ausazko aldagai diskretuak.

6.4. Ausazko aldagai jarraituak.

6.5. Banaketa trunkatuak.

6.6. Ausazko aldagai dimentsiobakarren transformazioak.

7._Maiztasunen banaketa dimensiobakarrak.

7.1. Aldagai estatistikoak.

7.2. Maiztasunen banaketak.

7.3. Irudikapen grafikoak.

8._Banaketa bidimentsiokoak.

8.1. Kontzeptu orokorrak.

8.2. Korrelazio taula.

8.3. Banaketa bidimentsioko baten momentuak.

8.4. Independentzia estatistikoa.

9._Posizio neurriak.

9.1. Batez besteko aritmetikoa.

9.2. Batez besteko geometrikoa.

9.3. Batez besteko harmonikoak.

9.4. Mediana.

9.5. Moda.

9.6. Posizio neurri ez-zentralak: kuartil, dezil eta pertzentilak.

9.7. Batez bestekoen arteko erlazioak.

10._Barreiadura neurriak.

10.1. Desbiderapen ertaina.

10.2. Ibilbidea.

10.3. Bariantza.

10.4. Desbiderapen tipikoa.

10.5. Barreiadura neurri erlatiboak.

11._Forma-neurriak eta kontzentrazioa.

11.1. Forma-neurriak: asimetria eta kurtosia.

11.2. Kontzentrazio neurriak: Giniren indizea eta Lorenzen kurba.

12._Zenbaki indizeak.

12.1. Indize bakunak.

12.2. Indize konplexuak.

12.3. Prezioen indizeak.

12.4. Ekoizpen indizeak.

13._Puntuzko estimazioa: Estimatzaileen ezaugarriak.

13.1. Estimatzaileen kontzeptua.

13.2. Estimatzaileen ezaugarriak: alboragabetasuna, eraginkortasuna, sendotasuna eta askitasuna.

13.3. Estimatzaile aldagaitzak eta estimatzaile sendoak.

14._Erregresio eta koerlazio lineal bakuna.

14.1. Doikuntza egiteko irizpideak.

14.2. Lerrozuzen baten minimo karratuen bidezko doikuntza.

14.3. Mugatze eta koerlazio koefizientea.

14.4. Aurresatea.

15._Erregresio lineal anizkoitza.

15.1. Plano baten doitzea minimo karratuen bidez.

15.2. Mugatze-koefiziente anizkoitza.

15.3. Mugatze-koefiziente partziala.

15.4. Multilerrokidetasunaren arazoa.

16._Atributu estatistikak.

16.1. Bi atributuren analisia eta gehiagorena.

16.2. Kontingentzia taulak.

16.3. Homogeneotasun eta independentzia kontrastea.

16.4. Lerrunen araberako koerlazioa.

17._Inferentzia estatistikoa.

17.1. Populazioa eta lagina. Deskribapen eta inferentzia estatistikoa.

17.2. Hipotesien estimazio eta egiaztapena.

18._Laginketa.

18.1. Laginketa: beharkizunak eta inplikazioak.

18.2. Laginketa metodoak.

18.3. Ausazko laginketa sinplea.

18.4. Ausazko laginketa sistematikoa.

18.5. Ausazko laginketa geruzatua.

18.6. Mordokako eta esparrukako laginketa.

18.7. Epekako laginketa.

18.8. Laginketa ez-ausazkoak edo erdi-ausazkoak.

19._Ikerketa estatistiko baten plangintza.

19.1. Ikerketa estatistikoaren faseak.

19.2. Ikerketaren helburu eta xedea.

19.3. Irispidea eta estaldura.

19.4. Galde-sortak.

19.5. Datu-bilketarako metodoak.

19.6. Taula estatistikoak.

19.7. Ekintzen antolamendu eta kontrola.

20._Faltako datuak eta balio atipikoak.

20.1. Datu absenteen tratamentua.

20.2. Balio atipikoen detekzioa.

21._Bariantzaren azterketa.

21.1. Bariantzaren analisien definizioa (ANOVA).

21.2. ANOVA eredu motak faktorearen kategorien arabera.

21.3. Kobariantzaren analisia (KOBANA).

22._Datu-ateratzea.

22.1. Sare neuronalak.

22.2. Erabaki zuhaitzak.

22.3. Algoritmo genetikoak.

22.4. Cluster analisia.

23._Analisi faktoriala.

23.1. Ereduaren diseinua.

23.2. Analisi faktorialeko kasuak.

23.3. Faktoreen estimazioa eta doikuntzaren balorazioa.

23.4. Faktoreen interpretazioa.

23.5. Analisien balidazioa.

24._Korrespondentzien analisia.

24.1. Korrespondentzien analisiaren egitura orokorra.

24.2. Korrespondentzien analisiko kasuak.

24.3. Estimazioa eta doikuntzaren balorazioa.

24.4. Korrespondentzien analisiaren interpretazioa.

25._Analisi diskriminatzailea.

25.1. Analisi diskriminatzailaren diseinua.

25.2. Analisi diskriminatzailearen balizko kasuak.

25.3. Eredu diskriminatzailearen estimazioa eta doikuntzaren balorazioa.

25.4. Interpretazioa.

25.5. Ereduaren balidazioa.

26._Erregresio logistikoa.

26.1. Ereduaren diseinua.

26.2. Erregresio logistikoaren balizko kasuak.

26.3. Ereduaren estimazioa eta doikuntzaren balorazioa.

26.4. Interpretazioa.

26.5. Ereduaren balidazioa.

27._Serie kronologikoen sarrera.

27.1. Aurresateko metodoen sailkapena.

27.2. Deskonposaketa metodoak.

27.3. Balizko kasuak, serie kronologikoen osagaien analisian.

27.4. Aurresanak eta aurresanen ebaluazioa.

28._Joeraren analisia.

28.1. Batez besteko konstantearen eredua.

28.2. Joera linealaren eredua.

28.3. Joera esponentzialaren eredua.

29._Urtarokotasunaren analisia.

29.1. Desurtarokotzea: batez besteko mugikorrari arrazoi ematearen metodoa.

29.2. Holt-Wintersen metodoa.

30._Eredu linealak denbora-serieetan.

30.1. Eredu autorregresiboak (AR).

30.2. Batez besteko mugikorren ereduak (MA).

30.3. Eredu mistoak (ARMA).

30.4. Prozesu ez geldikorrak.

31._Denbora-serieak identifikatzeko eskema orokorra.

31.1. Box-Jenkinsen metodologiaren eskema orokorra.

31.2. Geldikortasun analisia.

31.3. Urtaropekoak ez diren denbora-serieen azpian diren prozesu estokastiko geldikorrak.

31.4. Urtaropekoak diren denbora-serieen azpian diren prozesu estokastiko geldikorren identifikazioa.

32._Denbora-serieen estimazio, balidazio eta aurresatea.

32.1. Estimazioa.

32.2. Balidazioa.

32.3. Aurresatea.

32.4. Eredu hoberena.

33._Erregresio lineal orokorraren eredua.

33.1. Ereduaren zehaztapena.

33.2. Estimazioa.

33.3. Inferentzia.

33.4. Aurresatea.

33.5. Minimo karratu murriztuak.

34._Erregresio lineal orokorraren ereduaren hedapenak.

34.1. Aldagai itxurazkoak eta aldaketa estrukturala.

34.2. Multikolinealtasuna.

34.3. Zehaztapen errorea: aldagai garrantzitsuak ez aipatzea eta garrantzirik gabeak sartzea.

35._Erregresio lineal orokortuaren eredua.

35.1. Minimo karratu murriztuak (MKM).

35.2. Minimo karratu orokortuak (MKO).

35.3. Minimo karratu orokortu bideragarriak. (MKOB).

35.4. Itxuraz loturarik gabeko ekuazio sistemak.

35.5. Heterozedastizitatea.

35.6. Autokorrelazioa.

36._Informazioaren oinarrizko tratamentua: datu baseak.

36.1. Informazio sistema: kontzeptua eta osagaiak.

36.2. Datu baseen kontzeptua, atarikoak.

36.3. Datu baseen ezaugarri nagusiak.

36.4. Datu baseen abantaila eta desabantailak.

36.5. Datuen biltegiratzea.

37._Makroekonomiaren atarikoak.

37.1. Funtsezko kontzeptuak.

37.2. Magnitude makroekonomiko nagusiak: BPG, BEG, Errenta Nazionala.

37.3. Aldagai makroekonomikoen arteko harremanak.

37.4. Eskaintza eta eskaera agregatuak.

37.5. Politika makroekonomikoa.

38._Ekonomiaren bilakaera eta egungo egoera Nafarroan.

38.1. Magnitude ekonomiko nagusien bilakaera.

38.2. Lan merkatua.

39._Nafarroako kanpo merkataritza.

39.1. Kanpo merkataritzaren bilakaera.

39.2. Kanpo merkataritzaren gaurko egoera.

39.3. Faktore esanguratsuak kanpo merkataritzan.

40._Kontu nazionalak.

40.1. Kontuak.

40.2. Kontabilitate saldoak.

40.3. Finantza-eragiketak, kapital kontua eta kontu korronteko balantza.

41._Kontu erreginalak.

41.1. Kontabilitate esparru erregionala: unitateak, eragiketak eta kontuak.

41.2. Erregionalizazio metodoak.

41.3. Kontabilitate erregionala eta input-output taulak Nafarroan.

42._Hiruhileko kontuak.

42.1. Hiruhileko koadro makroekonomikoa.

42.2. Hiruhileko kontuen kontabilitate erregelak.

42.3. Hiruhilekotze metodoak.

42.4. Nafarroako hiruhileko kontabilitatea.

43._Input-output analisia.

43.1. Input-output taularen eskema.

43.2. Input-output taularen elementuak.

43.3. Koefiziente teknikoak.

44._Input-output markoa eta bere osagaiak SEC-95aren esparruan.

44.1. Erakunde analisia eta adarkako analisia.

44.2. Input-output esparrua.

44.3. Sorburu eta xede taulak.

44.4. Taula simetrikoa.

45._Analisi erregionalaren aplikazioak.

45.1. Industrien arteko loturak.

45.2. Cheney eta Watanaberen koefizienteak.

45.3. Rasmussenen koefizienteak.

45.4. Streiten koefizienteak.

45.5. Koefizienteen muga nagusiak.

46._Nekazaritzaren eta abeltzaintzaren arloetako bilakaera eta egungo egoera.

46.1. Nekazaritzaren bilakaera eta egungo egoera.

46.2. Abeltzaintzaren bilakaera eta egungo egoera.

47._Nekazaritzako elikagaien industriaren bilakaera eta egungo egoera.

48._Populazioaren estatistika eta demografiaren atarikoak.

48.1. Populazio baten eta bere egituraren osagai nagusiak.

48.2. Kohesio eta agregazio prozesuak populazioetan.

48.3. Demografiaren kontzeptu nagusiak.

48.4. Gertaera eta egitura demografikoen neurketak.

49._Hazkunde demografikoaren neurketak.

49.1. Hazkundearen neurketa.

49.2. Populazioaren hazkunde aldakorra eta eredu logistikoa.

49.3. Hazkunde demografikoaren osagai natural eta migraziozkoak.

49.4. Tasa gordinak, populazio ertaina, bizitako urteak.

50._Heriotza tasa.

50.1. Heriotza-tasaren neurketa.

50.2. Heriotza-tasaren taula.

50.3. Neurketa metodo zeharrekoak.

50.4. Haurren heriotza-tasa.

50.5. Oso zaharren heriotza-tasa.

50.6. Nafarroako heriotza-tasa.

51._Jaiotza, ugalkortasun eta ezkontza-tasak.

51.1. Jaiotza-tasaren kontzeptua eta ezaugarriak.

51.2. Ugalkortasun-tasaren neurketa.

51.3. Ezkontza-tasaren neurriak.

51.4. Bilakaera eta gaurko egoera Nafarroako Foru Komunitatean.

52._Migrazio mugimenduak.

52.1. Migrazioaren definizioa.

52.2. Migrazioaren analisi demografikoa.

52.3. Migrazio ereduak.

52.4. Migrazioen kausa eta ondorioak.

52.5. Migrazioa Nafarroan.

53._Proiekzio demografikoak.

53.1. Definizioak eta kontzeptuak.

53.2. Estrapolazio metodoak.

53.3. Osagaien metodoa.

54._Populazioaren ezaugarriak.

54.1. Aspektu orokorrak.

54.2. Osaera sexuaren arabera.

54.3. Osaera adinaren arabera.

54.4. Osaera sexu eta adinaren arabera.

54.5. Jarduera ekonomikoaren araberako ezaugarriak.

55._Etxeen egitura eta dinamika.

55.1. Definizioak eta kontzeptuak.

55.2. Etxeen egitura eta tamaina: adierazleak eta neurri problemak.

55.3. Bizitza-zikloaren kontzeptua.

55.4. Etxeen egitura eta tamainen aldaketaren kausa eta ondorioak.

56._Populazioaren bilakera eta egoera Nafarroan.

56.1. Biztanleriaren bilakaera.

56.2. Egungo egoera.

57._Espainiako 1978ko Konstituzioa.

57.1. Estatuko aginteak.

57.2. Koroa.

57.3. Gorte Nagusiak.

57.4. Gobernua eta Administrazioa.

57.5. Botere judiziala Konstituzioan.

58._Zuzenbide Publikoaren iturburuak.

58.1. Legeak eta lege motak.

58.2. Lege dekretuak.

58.3. Legegintzako foru dekretuak.

58.4. Nazioarteko itunak.

59._Administrazio Zuzenbidearen iturburuak.

59.1. Erregelamendua eta erregelamenduzko ahalmena.

59.2. Erregelamendu motak.

59.3. Erregelamenduzko ahalmenaren mugak eta haren kontrola.

60._Administrazio egintza (I): kontzeptua, motak eta osagaiak.

61._Administrazio egintza (II): baldintzak, eraginkortasuna, deuseztasuna eta deuseztagarritasuna.

62._Administrazio prozedura erkidea (I).

62.1. Kontzeptua eta izaera.

62.2. Hasiera, antolamendua, instrukzioa eta bukaera.

63._Administrazio prozedura erkidea (II). Administrazio errekurtsoak: printzipio orokorrak eta motak.

64._Nafarroako Parlamentua edo Gorteak: eraketa, antolakuntza eta eginkizunak.

65._Nafarroako Gobernuari eta Lehendakariari buruzko Foru Legea.

66._Nafarroako Foru Komunitateko Administrazioari buruzko Foru Legea.

67._Nafarroako Foru Komunitateko Arartekoa.

67.1. Comptos Ganbera.

67.2. Nafarroako Kontseilua.

68._Nafarroako Administrazio Publikoen zerbitzuko Langileen Estatutua (I).

68.1. Langile motak.

68.2. Funtzionario publikoen hautapena.

68.3. Funtzionario izaera eskuratzea eta galtzea.

69._Nafarroako Administrazio Publikoen zerbitzuko Langileen Estatutua (II).

69.1. Administrazio karrera.

69.2. Administrazio egoerak.

69.3. Lanpostuak betetzea.

69.4. Ordainsariak.

70._Nafarroako Ogasun Publikoa: Nafarroako Ogasun Publikoaren eskubide eta betebeharrak.

70.1. Nafarroako Aurrekontu Orokorrak: edukia eta onespena; gastuen sailkapen ekonomikoa; betearaztea eta likidazioa.

71._Nafarroako Administrazio Publikoen kontratuak: araubide juridikoa.

71.1. Administrazio kontratu ohikoenak: kontzeptua eta motak.

71.2. Kontratuak esleitu, hobetu, sinatu, bete, aldatu eta iraungitzeko arau orokorrak.

72._Datu pertsonalen babesa Europan eta Espainian.

72.1. Printzipioak.

72.2. Pertsonen eskubideak.

72.3. Datuen babesari buruzko agentzia.

72.4. Datuen nazioarteko mugimenduak.

73._Estatistikako plangintza.

73.1. Ekainaren 27ko 11/1997 Foru Legea, Nafarroako Estatistikari buruzkoa.

73.2. Nafarroako estatistika planak.

Oharra:

Gai guztiak deialdi hau Nafarroako ALDIZKARI OFIZIALean argitaratzen denean indarra duen legeriari jarraikiz baloratuko dira, baina egun horren ondoren onetsitako arau aldaketen ekarpenak baloratzen ahalko ditu epaimahaiak.

Iragarkiaren kodea: F0609751