Iragarkia

74. ALDIZKARIA - 2006ko ekainaren 21a

I. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Plantilla Organikoa, Lan Eskaintza Publikoa, oposizioak eta lehiaketak

DEIALDIA, Funtzio Publikoaren zuzendari nagusiak maiatzaren 29an emandako 1379/2006 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko mendi ingeniari izateko 2 lanpostu oposizio bidez betetzekoa.

Funtzio Publikoaren zuzendari nagusiak, maiatzaren 29ko 1379/2006 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko mendi ingeniari izateko 2 lanpostu oposizio bidez betetzeko deialdia onetsi du.

Hautapen prozesua ondoko hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsi zena, aipatu estatutua garatu eta burutzeko Sarrera Erregelamendua, gainerako aplikazio arauak eta deialdi honetako oinarriak.

1._Deialdiaren xedea.

1.1. Deialdi honen xedea mendi ingeniari izateko 2 lanpostu huts oposizio bidez betetzea da. Funtzionarioen araubidekoak dira, A mailakoak. Plantilla organikoan 6862 eta 6866 zenbakiak dituzte eta Ingurumen, Lurraldearen Antolamendu eta Etxebizitza Departamentuko Ingurumen Zuzendaritza Nagusiari atxikiak dira. Iruñean aritzekoak dira eta txanda hauetan banaturik daude:

_1 lanpostu, txanda irekian.

_1 lanpostu, igoera txandan.

1.2. Hautaprobak gainditzeko eskatzen den gutxieneko puntuaziora ez iristeagatik, bete gabe gelditzen bada igoera txandako lanpostu hutsa, txanda irekikoari gehituko zaio.

Bestaldetik, igoera txandan hutsik dauden lanpostuak baino izangai gehiagok gainditzen badute, txanda horretan lanpostua eskuratzen ez dutenek aukera izanen dute txanda irekiko lanpostu hutsa eskuratzeko, txanda horretako izangaiekin lehian eta eskuratutako azken puntuazioaren arabera.

Era berean, txanda irekiko lanpostua eskuratzeko aukera izanen dute, aurreko lerroaldean adierazitako moduan, deialdiko 7.2 oinarrian agiriak aurkezteko ezartzen den epea bukatzen denean deialdiko 2.1.2 oinarriko eskakizun berariazkoak betetzen ez dituzten igoera txandako izangaiek.

1.3. Lanpostuek A mailako lansariak izanen dituzte, uztailaren 4ko 158/1984 Foru Dekretuaren bidez onetsitako Lansarien Behin-behineko Erregelamenduan eta, kasuan kasu, aplikatu beharreko gainerako xedapenetan ezarritakoari jarraikiz.

1.4. Halaber, deialdi honen bidez hauta-probak gainditu bai baina lanposturik lortzen ez duten izangaiekin aldi baterako kontratatuak izateko izangaien zerrenda bat osatuko da, deialdi honetako 10. arauan xedaturikoarekin bat.

2._Betebeharrak.

2.1. Oposizio honetan onartuak izateko, izangaiek, eskabideak aurkezteko epea amaitzen den egunean eta agiriak aurkezteko epearen barrenean (deialdiaren 7.2 atalean adierazia) eta lanpostuaren jabetza hartu arte, baldintza hauek bete beharko dituzte (2.1.1 idatz-zatiko d) letran aipatzen dena, B motako ibilgailuak gidatzeko baimena, deialdiko 7.2 arauan agiriak aurkezteko ezartzen den epean eduki behar da hasieran):

2.1.1. Izangai guztiek bete beharreko baldintzak.

a) Espainiarra izatea, edo Europar Batasuneko beste estatu batekoa, edo, Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, espainiarren eta Europar Batasuneko beste estatuetako edo aipatu nazioarteko itunek ukitutako estatuetako herritarren ezkontideek hartzen ahal dute parte; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira edo, gorakoak izanik, haien kontura biziz gero.

b) Adin nagusikoa izatea eta erretiroko adina ez izatea.

c) Mendi ingeniariaren titulua edo baliokidea izatea, edo eskaerak aurkezteko epea bukatzen den egunean titulu hori eskuratzeko moduan egotea.

Atzerrian lorturiko tituluak badira, homologazioaren egiaztagiria eduki beharko da.

d) B motako ibilgailuak gidatzeko baimena izatea.

e) Bete behar dituen eginkizunetan aritzeko adinako gaitasun fisiko eta psikikoa izatea.

f) Eginkizun publikoetan aritzeko desgaitu edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute beren Estatuko Funtzio Publikoan sartzea eragozten dien diziplina zehapenik edo zigor penalik ez dutela.

2.1.2. Igoera txandako izangaiek bete beharreko baldintza berariazkoak.

Igoera txandako izangaiek, aurreko idatz-zatian adierazitako betebeharrez gain, hauek bete beharko dituzte:

a) Nafarroako edozein Administrazio Publikotako langile finkoa izatea, edo Nafarroako Foru Komunitateko Administrazioari transferitutako Justizia Administrazioaren zerbitzuei atxikitako langile finkoa, eta jatorrizko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa izatea.

c) Administrazio Publikoetan bost urteko antzinatasun onartua izatea, Nafarroako Polizia Kidegoetako kideen kasuan izan ezik, horiek frogatu beharko baitute zortzi urtez eman dituztela zerbitzuak kidego horietan.

Nafarroako Administrazio Publikoetan lan egiten duten langileen Estatutuaren xedapen gehigarrietatik zortzigarrenean ezarri dena aplikatuz, igoera txandan esku hartzeko baldintzak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

2.2. Deialdiko 3.3 arauko bigarren puntuan aipatzen den salbuespena salbuespen, izendatuak izateko proposatzen diren izangaiek deialdiko 7.2 idatz-zatian ezarritako epean eta moduan frogatu beharko dituzte betebehar horiek.

3._Eskabideak.

3.1. Deialdian parte hartzeko eskabideak Nafarroako Gobernuko Lehendakaritza, Justizia eta Barne Departamentuko Erregistro Orokorrean (Karlos III.aren etorbidea, 2, atalondoa, 31002 Iruña) edo erregistro horretako beste edozein bulegotan (zerrenda 2005eko 33. Nafarroako ALDIZKARI OFIZIALean argitaratu zen, martxoaren 18an) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legeko 38.4 artikuluan adierazitako bideren bat erabiliz, deialdia Nafarroako ALDIZKARI OFIZIALean argitaratu eta biharamunetik hogeita hamar egun naturaleko epean.

Eskabideak deialdi honen eranskinean dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuko Argibide Bulegoan dago eskuragarri. Interneten bidez ere lortzen ahal da, www.navarra.es helbidean, bai argitaratzen deneko Aldizkari Ofizialetik abiatuta, bai Zerbitzuen Katalogoko Enplegu Publikoan dagoen deialdiaren aiputik abiatuta.

3.2. Ezgaitasun aitortua duten lehiatzaileek, ariketak egin ahal izateko denbora edo baliabideetan egokitzapenik behar badute, zilegi izanen dute eskabidean eskatzea, eta hartarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Horrekin batera, legeen arabera ezgaitasunen bat dutela frogatzeko agiriaren kopia konpultsatua ere aurkeztu beharko dute, organo eskudunak emana.

3.3. Eskabideari, behar bezala bete ondoren, agiri hauek erantsiko zaizkio:

Bat._Espedientea formalizatzeko eta azterketa eskubideetarako 25 euro ordaindu izanaren ziurtagiria. Azterketa eskubideen tasa ordaindu izanaren agiria aurkezten ez bada, izangaia baztertu eginen da.

Sistema hauetako bat erabiliz ordaintzen ahalko da tasa hori:

_Behar bezala betetako ordainketa gutuna erabiliz; Foru Komunitateko Administrazioak Nafarroako finantza entitateetan dituen kontuetan sartuko da dirua. Arestian aipatutako webgunean, deialdiaren iragarkian, ordainketa gutuna eredua ageri da.

_Sarrera esku-dirutan edo bankuko transferentzia bidez eginez, Banestoko (Banco Español de Crédito) 00308124 87 0870002271 kontuan; horrelakoetan ordain-agirian datu hauek jarri beharko dira:

.Izangaiaren izen-deiturak.

.NAN/IFZ.

.Ordainketa zein kontutan egiten den, haren zenbakia.

.Kontzeptua: Oposizioak.

.Deialdiaren xede den lanpostua.

Frogagirian datu horietako bat falta baldin bada, izangaia baztertu eginen da.

Honako hauek ez dute tasarik ordaindu beharko:

a) %33ko edo gehiagoko ezgaitasun aitortua dutela frogatzen duten pertsonek, organo eskudunak luzaturiko jatorrizko agiriaren edo behar bezala konpultsaturiko fotokopiaren bidez.

b) Hautaproben deialdia egin aurretik hilabete batez edo luzaroago lan-eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon den bitartean eskainitako inolako lan egokiri uko egin ez izana eta lanbide sustapen, prestakuntza edo eraberritze ekintzetan parte hartzeari uko egin ez izana, justifikaturiko kasuetan izan ezik, eta, horrez gainera, lanbide arteko gutxieneko soldatatik gorako den dirusarrerarik ez izatea hilabetero.

Lan eskatzailea dela frogatzeko, Enplegu Bulegoak emandako agiria aurkeztu beharko da. Bertan, lan-eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ez eta lan-igoera, prestakuntza edo eraberritze ekintzetan parte hartzeari ere, justifikaturiko kasuetan izan ezik.

Hilero lanbide arteko gutxieneko soldatatik gorako errentarik ez duela interesatuaren adierazpenaren bidez frogatuko da. Adierazpen eredua Nafarroako Gobernuko Informazio Bulegoan eskuratzen ahalko da, edo bestela internet bidez, arestian emandako helbidean.

Bi._Deialdian igoera txandan parte hartu nahi duten izangaiek, Nafarroako Foru Komunitateko Administrazioa ez den Nafarroako beste Administrazio Publiko bateko langile finkoak badira, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finkoak, lehengoaz gainera, deialdi honetako 2.1.2 arauan jasotzen diren eskakizunak betetzen dituztela frogatzen duen agiria gehitu beharko diote eskabideari.

3.4. Eskabideak aurkezteko epea ezin izanen da luzatu.

3.5. Eskabidean atzematen diren akats materialak edo egitezkoak ofizioz edo interesatuak eskaturik zuzentzen ahalko dira, noiznahi ere.

4._Izangaien onarpena eta erreklamazioak.

4.1. Eskaerak aurkezteko epea bukaturik, Funtzio Publikoaren zuzendari nagusiak ebazpena emanen du izangai onartu eta baztertuen behin-behineko zerrenda onesteko, eta Nafarroako ALDIZKARI OFIZIALean argitara dadila aginduko du.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, akatsik egin badute, zuzentzeko.

4.3. Erreklamazioetarako epea bukatutakoan eta horiek ebatzita, Funtzio Publikoaren zuzendari nagusiak onartu eta baztertuen behin betiko zerrenda onesten duen ebazpena emanen du, eta Nafarroako ALDIZKARI OFIZIALean argitara dadila aginduko.

4.4. Izangaiei egotziriko arrazoiengatik baztertzen direnei ez zaizkie azterketa egiteko eskubideak itzuliko.

5._Epaimahai kalifikatzailea.

5.1. Epaimahaiak kide hauek izanen ditu:

_Mahaiburua: Enrique Eraso Centelles jauna, Ingurumen, Lurraldearen Antolamendu eta Etxebizitza Departamentuko Biodibertsitatea Zaintzeko Zerbitzuko zuzendaria.

_Ordezkoa: Pedro Zuazo Onagoitia jauna, Ingurumen, Lurraldearen Antolamendu eta Etxebizitza Departamentuko Ingurumenaren Integrazioko Zerbitzuko zuzendaria.

_Mahaikidea: Fermín Olabe Velasco jauna, Ingurumen, Lurraldearen Antolamendu eta Etxebizitza Departamentuko Oihanak kudeatzeko Ataleko burua.

_Ordezkoa: Miguel Aulló Aldunate jauna, Ingurumen, Lurraldearen Antolamendu eta Etxebizitza Departamentuko Ingurumenaren gaineko Eragina Aztertu eta Lehengoratzeko Ataleko burua.

_Mahaikidea: Gregorio Oyaregui Arriada jauna, Ingurumen, Lurraldearen Antolamendu eta Etxebizitza Departamentuko Pirinioetako Eskualdeko Bulegoko burua.

_Ordezkoa: Yolanda Val Hernández andrea, Ingurumen, Lurraldearen Antolamendu eta Etxebizitza Departamentuko mendi ingeniaria.

_Mahaikidea: Administrazio Erroko Langileen Batzordearen ordezkari bat, batzordeak berak proposatua.

_Ordezkoa: Administrazio Erroko Langileen Batzordearen ordezkari bat, batzordeak berak proposatua.

_Mahaikide idazkaria: Félix Armendáriz Martínez jauna, Ingurumen, Lurraldearen Antolamendu eta Etxebizitza Departamentuko Ingurumeneko Araubide Juridikoaren Ataleko burua.

_Ordezkoa: María José Alvarez Los Arcos andrea, Ingurumen, Lurraldearen Antolamendu eta Etxebizitza Departamentuko idazkari tekniko nagusia.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Organo kolegiatuaren eraketak eta jardunak balio izateko, mahaiburuak eta mahaikide idazkariak edo haien ordezkoek bertan egon beharko dute.

5.3. Epaimahaiko kideek parte hartzeari uko egin beharko diote eta deialdia egin duen organoari hala jakinarazi, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Foru Legean horretarako aurreikusiak dauden egoerak gertatzen direnean.

Izangaiek, halaber, zilegi izanen dute mahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren inguruan sortzen diren arazo guztiak.

5.5. Epaimahaiak aholkulari adituen laguntza izan dezake, proba batzuetan nahiz guztietan laguntzeko. Aholkulari horiek beren espezialitate teknikoetan baizik ez dira ariko eta horietan bakarrik emanen diote laguntza epaimahaiari.

6._Oposizioa nola eginen den.

6.1. Oposizioa 2007ko martxoan hasiko da. Onartu eta baztertuen behin betiko zerrenda onesten duen Ebazpenean berean finkatuko dira probak hasteko tokia, eguna eta ordua.

Ondoren, epaimahaiak jakinaraziko ditu gainerako probak egiteko iragarkiak, erregelamenduz.

6.2. Oposizioak ariketa hauek izanen ditu:

Lehenbizikoa: gai zerrendako gaiei buruzko 80 galdera idatziz erantzutea. Galdera bakoitzarentzat erantzun batzuk emanen dira aukeran baina bat bakarra izanen da egokia. Erantzun hutsak zehatuko dira. Epaimahaiak ariketa hori egiteko izangaiek zenbat denbora duten adieraziko du haren hasieran.

Bigarrena: bi gai, bata gai zerrendako lehen zatitik eta bestea bigarrenetik zozketaz aukeratua, idatziz azaltzea. Hori egiteko izangaiek bost ordu izanen dute.

Hirugarrena: bi gai, bata gai zerrendako hirugarren zatitik eta bestea laugarrenetik zozketaz aukeratua, idatziz azaltzea. Hori egiteko izangaiek bost ordu izanen dute.

Laugarrena. Landa-lan bateko tokian edo ikasgelan, gai zerrendako arloei buruzko kasu praktiko bat burutzea. Ariketaren hasieran, egiteko zenbat denbora dagoen adieraziko du Epaimahaiak.

Lehenbiziko ariketa plika sistemaren bidez eginen da.

Izangaiek bigarren eta hirugarren ariketak irakurriko dituzte epaimahaiaren aurrean, jendaurreko ekitaldi batean.

Epaimahaiak laugarren ariketa egitean oposizioko partaideen anonimatua babesteko beharrezko neurriak hartuko ditu.

6.3. Oposizioko ariketen balorazioan 100 puntu eman daitezke gehienez ere, honela banatuak:

Lehenbizikoa: gehienez 20 puntu.

Bigarrena: 15na puntu, 30 puntu guztira, gehienez ere.

Hirugarrena: 15na puntu, 30 puntu guztira, gehienez ere.

Laugarrena. gehienez 20 puntu.

6.4. Oposizioko ariketak kanporagarriak izanen dira. Lehenbiziko eta laugarren ariketetan bazterturik geldituko dira gehieneko puntuazioaren erdira iristen ez diren izangaiak. Bigarren eta hirugarren ariketetan bazterturik geldituko dira ariketa horietako gaietariko bakoitzean puntuazioaren erdira iristen ez diren izangaiak.

6.5. Ariketak zuzendu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo proba edo ariketa egiteko tokia, eguna eta ordua, gutxienez 48 ordu lehenago.

6.6. Ariketa bakoitzerako dei bakarra eginen da. Izangaiek nortasun agiri nazionala, pasaportea edo gida-baimena eraman beharko dute. Azterketara agertzen ez direnak edo arestian aipatutako agirietako baten bidez beren nortasuna egiaztatzen ez dutenak oposiziotik baztertuko dira.

6.7. Hauta-probak egiteko, ezgaitasun aitorturen bat dutenentzat bidezkoak diren denbora eta baliabide egokitzapenak eginen dira, eskabidean azaldutakoaren arabera.

7._Probak gainditu dituztenen zerrenda, izendapen proposamena eta agirien aurkezpena.

7.1. Hautaprobak amaiturik, epaimahaiak jendaurrean jarriko du probak gainditu dituztenen zerrenda, oposizioan lortutako kalifikazioekin, Nafarroako Gobernuaren iragarki oholean. Gero, zerrenda hori Funtzio Publikoaren zuzendari nagusiari igorriko dio, deialdiko lanpostuen kopuruaren barruan sartzen diren eta probak puntuazio altuenekin gainditu dituzten izangaiak izendatzeko proposamenarekin eta espediente osoarekin batera. Proposamen hori Nafarroako ALDIZKARI OFIZIALean argitaratuko da.

Berdinketa izanez gero, laugarren ariketan puntuazio altuagoa erdiesten dutenen alde jokatuko da. Hori eginda, berdinketak oraindik badirau, bigarren eta hirugarren ariketetan lorturiko puntuazioak hartuko dira kontuan, hurrenkera horrexetan.

7.2. Izendapen proposamena Nafarroako ALDIZKARI OFIZIALean argitaratu ondoko 30 egun naturaleko epean, proposatutako izangaiek inprimaki berariazko batzuk jaso eta honako agiri hauek aurkeztu behar dituzte Funtzio Publikoaren Zuzendaritza Nagusian:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiak:

a) Nortasun Agiri Nazionalaren bi fotokopia konpultsatu, edo izangaiaren hiritartasuna eta nortasuna frogatzen dituen beste agiri baliokideren batenak.

b) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.

c) B motako ibilgailuak gidatzeko baimenaren fotokopia konpultsatua.

d) Laneko Arriskuei Aurrea hartzeko Atalak emandako txostena, interesatuak karguan aritzea eragotziko liokeen eritasun edo akats fisiko edo psikikorik ez duela frogatzeko.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

e) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizi ez izanaren zinpeko aitorpena.

Izangaiek Espainiako herritartasuna ez badute, agiria aurkeztu beharko dute, beren Estatuko Funtzio Publikoan sartzea eragozten dien diziplina zehapenik edo zigor penalik ez dutela adierazteko.

f) Zin egin edo hitz ematea, Nafarroako Foru Eraentza errespetatu, Konstituzioari eta Legeei men egin eta karguari dagozkion eginkizunak zuzen beteko dituela.

g) Funtzio Publikoaren Zuzendaritza Nagusiak eskatzen dizkion gainerako agiriak.

Deialdi hau egin ez duen Nafarroako beste Administrazio Publikoren bateko langile finko, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finko diren izangaiek, gainera, aurreko administrazioko espediente pertsonalean ageri diren inguruabar eta aurrekari guztiak frogatzen dituen ziurtagiria aurkeztu beharko dute, hots, sarrerari, antzinatasunari, mailari, egoera administratiboari eta abarrei buruzkoa.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiak:

a) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.

b) B motako ibilgailuak gidatzeko baimenaren fotokopia konpultsatua.

c) Funtzio Publikoaren Zuzendaritza Nagusiak eskatzen dizkion gainerako agiriak.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barrenean, eta aski justifikaturik dauden ezinbesteko kasuak salbuetsiz, arestiko agiriak aurkezten ez dituztenak ezin izanen dira izendatu, eta ordurako egintza guztiak baliorik gabe geldituko dira, euren eskabidearen faltsukeria dela eta, legokiekeen erantzunbeharra galarazi gabe.

7.4. Aurreko atalean aurreikusitakoa gertatuz gero, Funtzio Publikoaren zuzendari nagusiak probak gainditu dituztenen zerrendan, 7.1. atalean aipatutakoan, hurrengoa den izangaiarekin beteko du baja, eta horrekin ere aurreko ataletan adierazitako moduan jokatuko da.

8._Lanpostu hutsak hautatzea.

8.1. Aurreko oinarrian xedatu dena betetzen duten lehiatzaileek Funtzio Publikoaren Zuzendaritza Nagusiak hartarako jartzen dien epean aditzera eman beharko dute eskaintzen zaizkien lanpostuetatik zein hautatzen duten. Aukeratu beharreko lanpostuak hasieran deitutakoak izanen dira, edo beste batzuk, zerbitzuaren beharrei jarraikiz horiek aldatzea erabakitzen bada.

8.2. Hautaprobak igoera txandaren bidez gainditzen dituzten izangaiek, 8.3 ataleko bigarren lerroaldean aipatutako kasuan izan ezik, lehentasuna izanen dute deialdiko lanpostu hutsak aukeratzerakoan, txanda horretakoak ez diren izangaien aurretik.

8.3. Lanpostu hutsak aukeratzeko orduan, %33ko edo handiagoko minusbaliotasun aitortua duten izangaiek lehentasuna izanen dute txanda irekiko izangaien aurretik.

Izangai minusbaliaturik bada, eta horrek eragina badu lanpostu bat edo bestea hautatzeko, aukeratzen hasi aurretik, minusbaliotasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

9._Izendapena, lanpostuen esleipena eta jabetza hartzea.

9.1. Funtzio Publikoaren Zuzendari Nagusiak, ebazpen bidez, Nafarroako Foru Komunitateko Administrazioko funtzionario izendatuko ditu aurreko oinarrietan ezarritakoa betetzen duten hautagaiak, mendi ingeniari lanpostuan aritzeko, eta lanpostu hutsak esleituko dizkie.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko dituzte izendatuak, indarra duten xedapenek ezartzen dituzten eskubide eta betebehar guztiak dituztela. Gizarte Segurantzako araubide orokorrean inskribatu eta kidetuko dira, araubide horretan aurreikusitakoaren babesean.

Aurrekoa gorabehera, Nafarroako Administrazio Publikoen Zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein bahituretxetako eskubide pasiboen araubidekoak direnen kasuan, bi aukera izanen dituzte: Nafarroako Foru Komunitateko Administrazioko bahituretxean segitzea, martxoaren 5eko 10/2003 Foru Legearen bidez arauturiko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Izendatzen diren izangaiek destinoko herrian izan beharko dute bizilekua, bertan helbidea egiazki kokatuz. Administrazio organo eskudunek destinoa aldatzen ahalko dute, aplikatzekoa den arautegian ezarritakoarekin bat.

9.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

9.5. Izendapena Nafarroako ALDIZKARI OFIZIALean argitaratuko da eta izangai izendatuak hilabeteko epean jabetu beharko du bere lanpostuaz, izendapenaren jakinarazpenetik kontatzen hasita.

Aipatu epean eta behar bezain ongi arrazoitutako kasuetan izan ezik, izangairen batek ez baldin badu lanpostua bere egiten, Foru Komunitateko Administrazioaren funtzionario izateko eskubide guztiak galduko ditu. Hala bada, 7.4 atalean ezarritakoari jarraikiko zaio.

9.6. Izangai bat funtzionario bihurtu eta lanpostuan batere aritu gabe zuzenean eta berak eskatuta borondatezko eszedentzia ematen bazaio jabetza hartzearen egunetik bertatik, data hartan beste Administrazio Publiko batean ari delako, kasuko lanpostu hutsa ere beteko da deialdiko 7.4 atalak agintzen duen moduan.

9.7. Aurreko bi ataletan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10._Aldi baterako kontratuetarako izangaien zerrenda.

10.1. Nafarroako Administrazio Publikoan sartzeko Erregelamenduaren 42. artikuluan, lanpostuak aldi baterako betetzeko kudeaketa arauak onetsi zituen Lehendakaritza, Justizia eta Barne kontseilariaren azaroaren 14ko 146/2005 Foru Aginduan eta oinarri honexetan ezarritako prozedurari jarraikiz, aldi baterako kontrataziorako izangaien zerrenda hauek sortuko dira:

_Probak gainditu bai baina lanposturik lortu ez duten izangaien zerrenda.

_Hautapen prozesuaren ariketa guztiak gainditu ez dituzten izangaien zerrenda.

10.2. Epaimahaiaren espedientea jasota, Funtzio Publikoaren zuzendari nagusiaren ebazpen baten bidez, hautapen prozesua gaindituta ere lanposturik gabe gelditu diren izangaiei eta deialdian ezarritako azkenaurreko ariketa gainditu dutenei hamar egun balioduneko epea emanen zaie, ebazpena argitaratu eta biharamunetik hasita, ondoko dokumentazio hau aurkezteko:

a) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, sartzeko prozesuan parte hartzeko eskabideak aurkezteko epean titulua eskuratzeko moduan egoten dela frogatzen duen ziurtagiria.

b) B motako ibilgailuak gidatzeko baimenaren kopia konpultsatua.

Ebazpen hau Nafarroako ALDIZKARI OFIZIALean argitaratuko da, eta langileen zerrendak Nafarroako Gobernuko iragarki-oholean (Karlos III.aren etorbidea, 2, atalondoa, Iruña).

Eskatzen diren agiriak aipatu epean aurkezten ez dituztenak (aski justifikatutako ezinbesteko kasuetan izan ezik) eta eskatutako baldintzak betetzen ez dituztenak ez dira sartuko aldi baterako kontratuetarako izangaien zerrendan, eta deialdian parte hartzeagatiko eskubide guztiak galduko dituzte, deusetan ukatu gabe, betiere, parte hartzeko eskabidea faltsutzeagatik legokiekeen erantzukizuna.

10.3. Sartzeko prozeduraren eskabideak aurkezteko epea bukatzen den egunerako bete beharko dira baldintzak, eta hauta-probek dirauteino eta kontratazioaldiak iraun bitarte bete beharko dira.

10.4. Dokumentazioa aurkezteko epea bukaturik, Funtzio Publikoaren zuzendari nagusiaren ebazpen baten bidez, aldi baterako kontratuetarako izangaien zerrenda hauek onetsiko dira eta Nafarroako Gobernuaren iragarki-oholean argitaratuko (Karlos III.aren etorbidea, 2, atalondoa, Iruña):

_Probak gainditu bai baina lanposturik lortu ez duten izangaien zerrenda.

_Deialdiaren azkenaurreko ariketa gainditu bai baina lanposturik gabeko gaindituen zerrendan ez daudenen zerrenda.

10.5. Hauxe izanen da aldi baterako kontratazioen zerrendaren ordena: oposizioa gainditu bai baina lanposturik lortu ez dutenen kasuan, hautapen prozesuan lortutako puntuazioaren arabera; gainerako izangaien kasuan, gainditutako ariketetan lortutako puntuazioen batura. Berdinketarik dagoenean nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

11._Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da Funtzio Publikoaren zuzendari nagusiari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdi honen kontra, oinarrien kontra eta haien aplikazio egintzen kontra, epaimahaiak hartutakoak izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barne kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik kontatzen hasita.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2006ko maiatzaren 29ean._Funtzio Publikoaren zuzendari nagusia, Alberto Andérez González.

I. ERANSKINA

Eskabidea

Izena: ..........................., adinez nagusia. Nortasun Agiri Nazionala (edo balio bereko beste agiriren bat): ........................ Jaioteguna: .................. Sorterria: ................... (......................). Nazionalitatea: ................. Helbidea: kalea: .............., herria: ............., probintzia: ......., posta kodea: ........, eta ........ telefonoa (........... laneko telefonoa)

AZALTZEN DU:

Nafarroako Foru Komunitateko Administrazioaren eta haren erakunde autonomoen zerbitzuko .............. izateko ...............lanpostu ....................bidez betetzeko deialdian parte hartzeko onartu izatea eskatzen dudala, ondoko txandan (deialdia ...... zenbakiko Nafarroako ALDIZKARI OFIZIALean argitaratu zen, .........(e)an):

f Txanda irekia

f Igoera txanda*

f Minusbaliatuendako txanda*

Hauta-probak gainditzen ez baditut, lanpostuak behin-behinekoz betetzeko aukeraz baliatu nahi dudala, honako esparruotako batean:

f Administrazio-erroa*

f Nafarroako Osasun Zerbitzua-Osasunbidea*

f Nafarroako Gizarte Ongizatearen Institutua*

(Esparruetako bakar bat aukeratu daiteke)

Ez dudala karguan aritzea galarazten didan eritasun edo akats fisiko edo psikikorik.

Indarra duten xedapenetan ezarritako ezintasunik ez dudala.

Ez naizela diziplinako espediente bidez ezein administrazio publikoren zerbitzutik kanpo utzia izan eta ez nautela eginkizun publikoak betetzeko gaitasunik gabe utzi.

Deialdian eskatzen den titulazioaren jabe naizela.

Azterketa eskubideak ordaindu ditudala deialdian ezarritako moduan eta horren gordekina erantsi dudala, edo erantsitako agirien bidez frogatzen dudala tasa ordaintzetik salbuetsita nagoela.

Eskabideak aurkezteko epearen azken egunean beharkizun guztiak betetzen ditudala.

f Ezgaitasuna dudala eta, beraz, behar ditudan egokitzapenak eskatzen ditudala, haietarako arrazoiak adierazita. (Beste orri batean azaldu behar dira eskatzen diren egokitzapenak eta haietarako arrazoiak).

f Ezgaitasuna frogatzen duen agiria aurkezten dudala, erakunde eskudun batek emana.

f Euskararen gaitasunaren agiria edo ofizialki baliokidea den beste titulu bat aurkezten dudala*

f Euskara maila neurtzeko proba egitea eskatzen dudala*

f Frantseseko eta ingeleseko nahikotasun frogak egitea eskatzen dudala (*)

Horrenbestez,

Eskabide hau ontzat hartu eta aipatu deialdian onartua izatea eskatzen dut.

Iruñean,........(e)ko .........................aren ............(e)an.

(Sinadura)

(*) Bidezkoa bada.

NAFARROAKO GOBERNUA. LEHENDAKARITZA, JUSTIZIA ETA BARNE DEPARTAMENTUA.

FUNTZIO PUBLIKOAREN ZUZENDARITZA NAGUSIA.

II. ERANSKINA

Gai zerrenda

Lehen zatia

1. gaia._Espainiako 1978ko Konstituzioa. Estatuko aginteak. Koroa. Gorte Nagusiak. Gobernua eta Administrazioa. Botere judiziala Konstituzioan.

2. gaia._Zuzenbide Publikoaren iturburuak: legeak eta lege motak. Lege dekretuak. Legegintzako foru dekretuak. Nazioarteko itunak.

3. gaia._Administrazio Zuzenbidearen iturburuak: erregelamendua eta erregelamenduzko ahalmena. Erregelamendu motak. Erregelamenduzko ahalmenaren mugak eta haren kontrola.

4. gaia._Administrazio egintza (I): kontzeptua, motak eta osagaiak.

5. gaia._Administrazio egintza (II): Baldintzak, eraginkortasuna, deuseztasuna eta deuseztagarritasuna.

6. gaia._Administrazio prozedura erkidea (I): kontzeptua eta izaera. hasiera, antolamendua, instrukzioa eta bukaera.

7 gaia._Administrazio prozedura erkidea (II). Administrazio errekurtsoak: printzipio orokorrak eta motak.

8. gaia._Nafarroako Parlamentua edo Gorteak: eraketa, antolakuntza eta eginkizunak.

9. gaia._Nafarroako Gobernuari eta lehendakariari buruzko Foru Legea.

10. gaia._Nafarroako Foru Komunitateko Administrazioari buruzko Foru Legea.

11. gaia._Nafarroako Foru Komunitateko arartekoa. Comptos Ganbera. Nafarroako Kontseilua.

12. gaia._Nafarroako Administrazio Publikoen zerbitzuko Langileen Estatutua (I): langile motak. Funtzionario publikoen hautapena. Funtzionario izaera eskuratzea eta galtzea.

13. gaia._Nafarroako Administrazio Publikoen zerbitzuko Langileen Estatutua (II): Administrazio karrera. Administrazio egoerak. Lanpostuak betetzea. Ordainsariak.

14. gaia._Nafarroako Ogasun Publikoaren Araubidea. Nafarroako Ogasun Publikoaren eskubide eta betebeharrak. Nafarroako Aurrekontu Orokorrak: edukia eta onespena; gastuen sailkapen ekonomikoa; betearaztea eta likidazioa.

15. gaia._Nafarroako Administrazio Publikoen kontratuak: araubide juridikoa. Administrazio kontratu ohikoenak: kontzeptua eta motak. Kontratuak esleitu, hobetu, sinatu, bete, aldatu eta iraungitzeko arau orokorrak.

16. gaia._Datu pertsonalen babesa Europan eta Espainian. Printzipioak. Pertsonen eskubideak. Datuen babesari buruzko agentzia. Datuen nazioarteko mugimenduak.

17. gaia._Dirulaguntzei buruzko azaroaren 9ko 11/2005 Foru Legea: Xedapen orokorrak eta laguntzak eman eta kudeatzeko prozedurak.

18. gaia._Nafarroako Foru Komunitateak ingurumenaren arloan dituen eskumenak. Ingurumen, Lurraldearen Antolamendu eta Etxebizitza Departamentua: Ingurumen Zuzendaritza Nagusiaren antolaketa, egitura eta eginkizunak.

19. gaia._Martxoaren 22ko 4/2005 Foru Legea, Ingurumena babesteko esku hartzeari buruzkoa: edukiaren egitura eta azterketa.

20. gaia._Abenduaren 31ko 13/1990 Foru Legea, Nafarroako oihan ondarea babestu eta garatzeari buruzkoa: edukiaren egitura eta azterketa.

21. gaia._Martxoaren 5eko 2/1993 Foru Legea, basa fauna eta haren habitatak babestu eta kudeatzeari buruzkoa: edukiaren egitura eta azterketa. Ondorengo aldaketak.

22. gaia._Ekainaren 17ko 9/1996 Foru Legea, Nafarroako naturguneei buruzkoa: edukiaren egitura eta azterketa.

23. gaia._Abuztuaren 2ko 29/1985 Legea, urei buruzkoa: Estatuaren uraren jabego publikoa. Uraren administrazio publikoa. Plangintza hidrologikoa. Jabego publiko hidraulikoaren erabilera.

24. gaia._Europako Parlamentuaren eta Kontseiluaren 2000ko urriaren 23ko 2000/60/EE Zuzentaraua, uren gaineko politikaren arloan Europako Batasunerako jarduketa eremu komuna ezartzen duena.

25. gaia._2001/42/EE Zuzentaraua. Politikak, planak eta programak estrategikoki ebaluatzea, ingurumenari dagokionez.

26 gaia._Kontseiluaren 2005eko irailaren 20ko 1698/2005 Erregelamendua, Nekazaritza aldeen garapenerako Nekazaritzaren Europako Funtsaren bitartez kudeatzen diren nekazaritzaren garapenerako laguntzei buruzkoa (FEADER).

27. gaia._2003/4/EE Zuzentaraua, Europako Parlamentuarena eta Kontseiluarena, 2003ko urtarrilaren 28koa, ingurumenari buruzko informazioa jendeari emateari buruzkoa.

28. gaia._Kontseiluaren 92/43/EEE Zuzentaraua, 1992ko maiatzaren 21ekoa, natur habitatak eta basa fauna eta flora zaintzeari buruzkoa. Kontseiluak 1979ko apirilaren 2an eman 79/409/EEE Zuzentaraua, basa hegaztiak zaintzekoa.

29. gaia._Mendiei buruzko azaroaren 21eko 43/2003 Legea: Administrazio publikoen eskumenak. Mendi pribatuen araubidea. Oihanen kudeaketa orekatua. Mendien zainketa eta babesa.

Bigarren zatia

1. gaia._Nafarroako natur inguruneen azalpen laburra. Geografia fisikoa. Geologia. Edafologia. Klimatologia. Biogeografia.

2. gaia._Fagus sylvatica Nafarroan. Haren basoen garrantzia, osaera eta banaketa. Espeziearen ezaugarri kultural nagusiak. Basogintza.

3. gaia._Quercus robur Nafarroan. Haren basoen garrantzia, osaera eta banaketa. Espezieen ezaugarri kultural nagusiak. Basogintza.

4. gaia._Q. petraea Nafarroan. Haren basoen garrantzia, osaera eta banaketa. Espezieen ezaugarri kultural nagusiak. Basogintza.

5. gaia._Quercus faginea, Quercus pubescens eta Quercus ilex Nafarroan. Haren basoen garrantzia, osaera eta banaketa. Espezie horien ezaugarri kultural nagusiak. Haien zuhaiztien kudeaketa.

6. gaia._Pinus sylvestris Nafarroan. Haren basoen garrantzia, osaera eta banaketa. Espeziearen ezaugarri kultural nagusiak. Basogintza.

7. gaia._Pinus halepensis Nafarroan. Garrantzia eta banaketa. Espeziearen ezaugarri kultural nagusiak. Haren zuhaiztiak kudeatzeko proposamenak.

8. gaia._Abies alba Nafarroan. Haren basoen garrantzia, osaera eta banaketa. Ezaugarri kultural nagusiak. Basogintza.

9. gaia._Pinus nigra ssp. Nafarroan: Haren zuhaiztien garrantzia eta banaketa. Espezieen ezaugarri kultural nagusiak. Basogintza.

10. gaia._Pinus radiata Nafarroan. Haren zuhaiztien garrantzia eta banaketa. Zuhaiztien osasun egoera. Espeziearen ezaugarri kultural nagusiak. Oihangintza eta perspektibak.

11. gaia._Picea abies eta Sequoia sempervirens. Haien garrantzia eta banaketa Nafarroan. Espezieen ezaugarri kultural nagusiak. Basogintza.

12. gaia._Pseudotsuga menziesii, Larix sp. Haien garrantzia eta banaketa Nafarroan. Espezieen ezaugarri kultural nagusiak. Basogintza.

13. gaia._Castanea sativa Nafarroan. Banaketa. Ezaugarri kultural nagusiak. Laborantzako txandak eta teknikak. Gaztainadien endekatzea Nafarroan.

14. gaia._Castanea sativa Nafarroan. Banaketa. Ezaugarri kultural nagusiak. Laborantzako txandak eta teknikak.

15. gaia._Fraxinus excelsior. Banaketa. Ezaugarri kultural nagusiak. Zuhaizti natural eta artifizialen oihangintza.

16. gaia._Acer pseudoplatanus, Acer campestre. Banaketa. Ezaugarri kultural nagusiak. Zuhaizti natural eta artifizialen oihangintza.

17. gaia._Prunus avium. Banaketa. Ezaugarri kultural nagusiak. Zuhaizti natural eta artifizialen oihangintza.

18. gaia._Juglans regia. Banaketa. Ezaugarri kultural nagusiak. Zuhaizti natural eta artifizialen oihangintza.

19. gaia._Ibai ertzetako basoak erdialdean eta hegoaldean. Garrantzia, osaera eta banaketa. Baso horiek osatzen dituzten zuhaitz espezie nagusien ezaugarri kultural nagusiak. Ibarbaso naturalei aplikatu beharreko aprobetxamendu eta kudeaketarako irizpideak. Oihan sistema hauei atxikitako fauna.

20. gaia._Ibai ertzetako basoak Nafarroako iparraldean: Alnus glutinosa. Ezaugarri kulturalak. Oihan sistema hauei aplikatzeko aprobetxamendu eta zainketa irizpideak. Ibai ertzetako fauna: Igaraba, bisoia eta Pirinioko ur-satorra; haien habitaten betebehar ekologikoak eta kudeaketa.

21. gaia._Populikultura. Klonak lortzeko modua. Erabiliriko klonen ezaugarriak. Landaketak egiteko lanak, basogintzako tratamenduak eta makaldiak zaintzea. Mozteko irizpideak.

22. gaia._Zuhaixkak eta sasiak Nafarroan. Espezie nagusiak. Banaketa, bilakaera eta erabilerak. Garrantzi ekologikoa.

23. gaia._Nafarroako larre natural nagusien sailkapena. Natur larreetako lekadun eta gramineo espezie nagusiak: ezaugarri paszikolak.

24. gaia._Natur larreen hobekuntza. Ustiatzeko metodoak. Larreak eta zelaiak sortzea. Abelbideak.

25. gaia._Basoberritzeak. Oihanetako landareak erro hutsetan eta ontzietan landatzea. Ugaltzeko oihanetako materialen salerosketa eta kanpoko kalitatea, Nafarroan erabiltzen diren espezieak bereziki nabarmenduz. Abiapuntuko eskualdeak Nafarroako basoberritzeari dagokionez.

26. gaia._Basoberritzeak. Basoberritzea egiteko era: landareztatu baino lehenagoko tratamenduak, zoruaren prestakuntza, landaketa, ereintza eta zainketa osagarriak.

Hirugarren zatia

1. gaia. _Espezieen banaketa lurrean. Oztopo naturalak. Aniztasunaren kontzeptua. Aniztasunaren neurketak. Aniztasuna, antolatzeko neurria.

2. gaia._Goi-mendiko fauna: Basoilarra, ipar-mozoloa, elur-eperra, eper grisa eta sarrioa. Azalpen laburra, haien habitaten betebehar ekologikoak eta kudeaketa.

3. gaia._Basoetako fauna: Pizidoak: okil gibelnabarra eta okil ertaina. Kiropteroak: Barbastella barbastellus. Mikrougaztunak: muxar grisa. Hartz arrea. Oreina. Orkatza. Anfibioak: baso-igel jauzkaria. Azalpen laburra, haien habitaten betebehar ekologikoak eta kudeaketa.

4. gaia._Estepako fauna: basoiloa, atalarra, ganga eta ganga azpibeltza. Azalpen laburra eta betebehar ekologikoak. Haien habitaten kudeaketa integrala. Habitata endekatzeko arrazoi nagusiak eta lehengoratzea.

5. gaia._Hegazti harrapariak: ugatza, Bonelli arranoa, miru gorria, aztore arrunta eta urubi arrunta. Azalpen laburra eta betebehar ekologikoak. Arrisku faktoreak eta zaintzeko jardunbideak Nafarroan.

6. gaia._Ehiza larriko espezieen kudeaketa: oreina, orkatza eta basurdea. Biologia, ekologia, polulazioen zenbaketa. Produktibitatea. Habitataren edukiera kalkulatzea. Kalteak. Ehizaren kudeaketa.

7. gaia._Ehiza txikiko espezieen kudeaketa: eperra, erbia eta untxia. Biologia, ekologia, polulazioen zenbaketa. Produktibitatea. Habitataren edukiera kalkulatzea. Hibridoak sortzea. Kalteak. Ehizaren kudeaketa.

8. gaia._Espezie migratzaileen kudeaketa: usoa, oilagorra, usapala eta galeperra. Biologia, ekologia, estatusa. Populazioen egoeraren eta joeren ebaluazioa. Produktibitatea. Migrazioa. Ehizaren kudeaketa.

9. gaia._Ehiza antolatzeko planak. Planen edukia. Ehizako inbentarioa. Zentsu motak. Plangintza. Aprobetxamendurako plana eta hobekuntzak.

10. gaia._Arrantza: salmonidoen antolaketa eta kudeaketa Nafarroan.

11. gaia._Ur moteletako eta urtegietako arrainen antolaketa eta kudeaketa eta Nafarroan dauden karramarroena.

12. gaia._Ibaietako habitata hobetzeko teknikak. Ur-emari ekologikoen balioespena. Arrainen pasabideak eta zurubiak. Ibaietako arrantzaren kudeaketa.

13. gaia._Basoetako patologia: Nafarroako onddo patogenoen espezie nagusiak. Sintomatologia, kutsatu eta hedatzeko bideak, kalteak, kontrolatzeko metodoak.

14. gaia._Radiata pinuen pinudiei lotutako oihan patologia Nafarroan. patogeno nagusiak. Kontrolatzeko eta errotik kentzeko neurriak. Pinudien kudeaketa. Araudi berariazkoa.

15. gaia._Basoetako izurriteak: "Izurrite" kontzeptua. Plagizidak, feromonak, mikroorganismoak. Izurriteen aurkako borroka integratua.

16. gaia._Basoetako izurriteak: Thaumetopoea pytiocampa Schiff., Hylobius abietis, Ips acuminatus, Ips sedentatus eta Ploeomyzus passerinii. Espezieen deskripzioa. Haien zikloak. Garrantzia, kalteak, kontrol metodoak.

17. gaia._Basoetako izurriteak: Neodiprion sertifer Geoffr., Dyorictria splendidella eta Dyorictria abietela, Lymantria monacha, Lymantria dispar, Tortrix viridiana L., Abraxas pantaria L. eta Bursaphelenchus xilophila. Haien zikloak. Garrantzia, kalteak, kontrol metodoak.

18. gaia._Oihanetako hobekuntza genetikoa. Oihanetako hobekuntza genetikoaren arazoak. Oihanetako espezieak hobetzeko oinarriak. Hobetzeko metodoak. Oihangintzari aplikatutako hobekuntza genetikoa. Klonazioa. Ugaltze begetatiboa. Klon bakarreko zuhaiztien sorreraren ondoriozko arazoak.

19. gaia._Basoetako edafologia: Zorua. Zoruaren ezaugarriak eta aukerak. Ehundura. Alterazio konplexua: buztinak. Zoruaren zatiki organikoa. Humusa eta motak. Humusgintza.

20. gaia._Zoruaren egitura. Motak. Mikroegitura. Porositatea. Zoruko eguratsa.

Zoruko ura: Erak. Gaitasun kapilarra. Ur erabilgarria. Zoruko ur sistema.

22. gaia._Lurzoruaren temperatura. Profil termikoak. Edafoklima. Konplexu zurgagarria. Aldatzeko gaitasuna. Aldatzeko katioiak. Asetasun gradua.

23. gaia._Zoruaren azidotasuna eta PH. Zoruaren elikagaien erak. Erreserba mineral eta organikoen garrantzi erlatiboa. Nitrogenoaren zikloa.

24. gaia._Basoetako hidrologia: Arroetako isurialdeak. Arroko isurialde baten parametro fisikoak. Drainatze sareari loturiko parametro fisikoak.

25. gaia._Lurzorua eta landaretza. Euria, infiltrazioa, lurrintzea eta isurketa. Landaretzaren eragina faktore horietan.

26. gaia._Uraren higadura. Higaduraren tresnak, faktoreak eta erak. Zoruaren galeraren ekuazio unibertsala. Arro baten endekatzea. MUSLE eredua. Metodologia integratuak.

27. gaia._Lurzoruaren erabileren esleipena eta higadura kontrolatzeko landaretza iraunkorraren garrantzia. Higaduraren egoera Nafarroan: gaur egun dagoena eta geroan izan litekeena.

28. gaia._Zuzentzeko hidroteknia. Zeharkako lanak. Luzerako lanak eta bideratzekoak. Arroen plangintza agrohidrologikoa.

29. gaia._Basoetako suteak: Suteen zergatikoak. Areagotzen dituzten gorabeherak. suteen ondorioak. Sua: motak, zabaltzeko erak eta faktoreak. Arrisku indizeak.

Laugarren zatia

1. gaia._Zuhaitzen neurketak: diametroak, azalaren lodiera, adina, hazkundea, zirkunferentziak eta garaiera neurtzeko prozedura eta aparatuak. Botatako zuhaitzen enborren araberako kubikazioa. Zutik dirauten zuhaitzak kubikatzeko aparatuak. Enbor pilatuen kubikazioa.

2. gaia._Zuhaiztien egitura eta ezaugarriak. Zuhaizti erregularrak eta irregularrak. Haien eredu matematikoak. Zuhaiztietako batez besteko zuhaitzak. Zuhaitzen batez besteko garaierak eta garaiera nagusiak. Zuhaitzen arteko aldeen eta lerdentasunaren erlazioak.

3. gaia._Zuhaiztien hazkundearen definizioa. Zuraren ekoizpenaren balioespena. Ekoizpen taulak. Ekoizpen taulak nola egiten eta erabiltzen diren. Eredu dinamikoak.

4. gaia._Baso garai irregularra. Baso garai irregularraren tratamenduak, bana-banakoak eta zuhaztien araberakoak. Espezieak, aplikatzeko baldintzak eta prozedurak.

5. gaia._Mendi garai erregularra eta erdi erregularra. Lehengoratzeko mozketak. Sasi-garbiketak eta bananketak: helburua, motak, aplikazioa, pisua, txandaketa eta intentsitatea. Inauste artifiziala.

6. gaia._Mendietako oihangintza. Mediterraneoko oihangintza eta oihanetako suteei aurrea hartzeko oihangintza. Baso zaharrak berreskuratu eta mantentzeko oihangintza.

7. gaia._Zuhaiztien azterketa: kopuruaren araberako inbentarioa. Banan-banan kontatuzko inbentarioa. Laginkako inbentarioa. Laginketa motak. Populazioa eta lagina. Laginaren aldagaiak eta tamaina. Laginketaren eremuak. Laginketaren akatsak eta emaitzen baliozkotasun maila.

8. gaia._Mendien antolamendua: Izakinen zenbatespena bolumenean. Kalkulua zuhaitz ereduen arabera, koefiziente morfikoen arabera, sarrera bateko eta gehiagoko ekuazioen arabera, zuhaiztietako ekuazioen arabera eta ekoizpen taulen arabera. Hazkundeen balioespena.

9. gaia._Mendien antolamendua: Plangintza: Edukia. Plan Orokorra: zehaztu beharreko oihanen ezaugarriak eta dasokratikoak, mozteko irizpideak, lehenagoratu beharreko eremua zehaztea. Plan Berezia: aprobetxamenduak, erabileraren hobekuntzak eta planak, balantze ekonomikoa.

10. gaia._Mendiak antolatzeko metodoak: edukieraren araberako banaketa, unaden arabera antolatzeko metodoa. Aplikatzeko baldintzak, aplikatzeko espezieak, abantailak eta eragozpenak, bietako bakoitzaren oihan-ezaugarriak eta ezaugarri dasokratikoak.

11. gaia._Mendiak antolatzeko metodoak: tarte mugikorraren metodoa, zuhaizti irregularretarako metodoak. Aplikatzeko baldintzak, aplikatzeko espezieak, abantailak eta eragozpenak, bietako bakoitzaren oihan-ezaugarriak eta ezaugarri dasokratikoak.

12. gaia._Zurgintzaren merkatua eta sal-erosketa Nafarroan eta haren ingurunean: eskaintza, eskaria, espezieak eta besterentzeko erak. Oihanetako bestelako produktuen aprobetxamendua eta mobilizazioa.

13. gaia._Oihanetako ziurtapena. Ziurtatze sistemak. Sistemen arteko konparazioak. Ziurtapena lortzeko prozesuak.

14. gaia._Naturguneetako erabilera publikoa. Q kalitate marka. Erabilera publikorako planak, edukiak eta xedeak.

15. gaia._Oihanen ustiapena: aprobetxamenduaren faseak, baliabideak eta metodoak. Oihanetako makinek mendiko lanetan duten eragina. Oihangintzako makinak mendian erabiltzeko murriztapenak. Alternatibak.

16. gaia._Oihanbideak: oihanbide motak. Bidearen zeharkako sekzioa. Luzetarako profila. Zamatze-tokiak. Zelaitze-lanak. Oihanetan erabiltzeko zoladurak. Fabrikako obrak. Bideak egiteko makinak. Ekintza horien gutxi gorabeherako kostuak.

Oharra:

Gai guztiak deialdi hau Nafarroako ALDIZKARI OFIZIALean argitaratzen denean indarra duen legeriari jarraikiz baloratuko dira, baina egun horren ondoren onetsitako arau aldaketen ekarpenak baloratzen ahalko ditu epaimahaiak.

Iragarkiaren kodea: F0609750