60. ALDIZKARIA - 2006ko maiatzaren 19a

I. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Plantilla Organikoa, Lan Eskaintza Publikoa, oposizioak eta lehiaketak

DEIALDIA, Funtzio Publikoaren zuzendari nagusiak martxoaren 2an emandako 1110/2006 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko erdi mailako liburuzain-teknikari izateko 6 lanpostu huts oposizio bidez betetzekoa.

Funtzio Publikoaren zuzendari nagusiak, maiatzaren 2ko 1110/2006 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko erdi mailako liburuzain-teknikari izateko 6 lanpostu oposizio bidez betetzeko deialdia onetsi du.

Hautapen prozesua ondoko hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsi zena, aipatu estatutua garatu eta burutzeko Sarrera Erregelamendua, gainerako aplikazio arauak eta deialdi honetako arauak.

1._Deialdiaren xedea.

1.1. Deialdi honen xedea erdi mailako liburuzain-teknikari izateko 6 lanpostu huts oposizio bidez betetzea da. Vianako Printzea Erakundea-Kultura eta Turismo Departamentuari atxikiak dira, Iruñekoak aritzekoak dira eta plantilla organikoan zenbaki hauek dituzte: 7277, 7555, 31062, 36036, 36778 eta 36779. Txanda hauetan banaturik daude:

_3 lanpostu txanda irekian.

_3 lanpostu igoera txandan.

1.2. Igoera txandako lanpostuak hutsik geldituz gero, izangaiek hautapen probak gainditzeko behar den gutxieneko puntuazioa atera ez dutelako, txanda irekikoei gehituko zaizkie.

Bestaldetik, igoera txandan hutsik dauden lanpostuak baino izangai gehiagok gainditzen badute, txanda horretan lanpostuak eskuratzen ez dituztenek aukera izanen dute txanda irekiko lanpostu hutsak eskuratzeko, txanda horretako izangaiekin lehian eta eskuratutako azken puntuazioaren arabera.

Era berean, txanda irekiko lanpostuak eskuratzeko aukera izanen dute, aurreko lerroaldean adierazitako moduan, 7,2. arauan agiriak aurkezteko ezartzen den epea bukatzen denean deialdiko 2.1.2 arauko eskakizun berariazkoak betetzen ez dituzten igoera txandako izangaiek.

1.3. Lanpostuek B mailako lansariak izanen dituzte, uztailaren 4ko 158/1984 Foru Dekretuaren bidez onetsitako Lansarien Behin-behineko Erregelamenduan eta, kasuan kasu, aplikatu beharreko gainerako xedapenetan ezarritakoari jarraikiz.

1.4. Halaber, deialdi honen bidez hautaprobak gainditu bai baina lanposturik lortzen ez duten izangaiekin aldi baterako kontratatuak izateko izangaien zerrenda bat osatu nahi da, 10. arauan xedaturikoarekin bat.

2._Betebeharrak.

2.1. Oposizio honetan onartuak izateko, izangaiek, eskabideak aurkezteko epea amaitzen den egunean eta agiriak aurkezteko epearen barrenean (deialdiaren 7.2 atalean adierazia) eta lanpostuaren jabetza hartu arte, baldintza hauek bete beharko dituzte:

2.1.1. Izangai guztiek bete beharreko baldintzak.

a) Espainiarra izatea, edo Europar Batasuneko beste estatu batekoa, edo, Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, espainiarren eta Europar Batasuneko beste estatuetako edo aipatu nazioarteko itunek ukitutako estatuetako herritarren ezkontideek hartzen ahal dute parte; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira edo, gorakoak izanik, haien kontura biziz gero.

b) Adin nagusikoa izatea eta erretiroko adina ez izatea.

c) Bibliotekonomia eta Dokumentazioko lizentzia edo baliokidea izatea, edo eskaerak aurkezteko epea bukatzen den egunean titulu hori eskuratzeko moduan egotea.

Atzerrian lorturiko tituluak badira, homologazioaren egiaztagiria eduki beharko da.

d) Bete behar dituen eginkizunetan aritzeko behar den gaitasun fisiko eta psikikoa izatea.

e) Eginkizun publikoetan aritzeko desgaitu edo gabetua ez egotea eta Administrazio Publikoren baten zerbitzutik bereizia ez izatea.

Espainiako hiritartasuna ez duten izangaiek frogatu beharko dute beren Estatuko Funtzio Publikoan sartzea eragozten dien diziplina zehapenik edo zigor penalik ez dutela.

2.1.2. Igoera txandako izangaiek bete beharreko baldintza berariazkoak.

Igoera txandako izangaiek, aurreko idatz-zatian adierazitako betebeharrez gain, hauek bete beharko dituzte:

a) Nafarroako edozein Administrazio Publikotako langile finkoa izatea, edo Nafarroako Foru Komunitateko Administrazioari transferitutako Justizia Azministrazioaren zerbitzuei atxikitako langile finkoa, eta jatorrizko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa izatea.

c) Administrazio Publikoetan bost urteko antzinatasun onartua izatea, Nafarroako Polizia Kidegoetako kideen kasuan izan ezik, horiek frogatu beharko baitute zortzi urtez eman dituztela zerbitzuak kidego horietan.

Nafarroako Administrazio Publikoetan lan egiten duten langileen Estatutuaren xedapen gehigarrietatik zortzigarrenean ezarri dena aplikatuz, igoera txandan esku hartzeko baldintzak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

2.2. Deialdiko 3.3. arauko bigarren puntuan aipatzen den salbuespena salbuespen, izendatuak izateko proposatzen diren izangaiek deialdiko 7.2 idatz-zatian ezarririko epean eta moduan frogatu beharko dituzte betebehar horiek.

3._Eskabideak.

3.1. Deialdian parte hartzeko eskabideak Lehendakaritza, Justizia eta Barne Departamentuko Erregistro Orokorrean (Karlos III.aren etorbidea, 2, atalondoa, 31002 Iruña) edo erregistro horretako beste edozein bulegotan (zerrenda 2005eko 33. Nafarroako ALDIZKARI OFIZIALean argitaratu zen, martxoaren 18an) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legeko 38.4 artikuluan adierazitako bideren bat erabiliz, deialdia Nafarroako ALDIZKARI OFIZIALean argitaratu eta biharamunetik hogeita hamar egun naturaleko epean.

Eskabideak deialdi honen eranskinean dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuko Argibide Bulegoan dago eskuragarri. Interneten bidez ere lortzen ahal da, www.navarra.es helbidean, bai argitaratzen deneko Aldizkari Ofizialetik abiatuta, bai Zerbitzuen Katalogoko Enplegu Publikoan dagoen deialdiaren aiputik abiatuta.

3.2. 3.2. Ezgaitasun aitortua duten lehiatzaileek, ariketak egin ahal izateko denbora edo baliabideetan egokitzapenik behar badute, zilegi izanen dute eskabidean eskatzea, eta hartarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Horrekin batera, legeen arabera ezgaitasuna dutela frogatzeko organo eskudunak ematen duen agiriaren fotokopia konpultsatua ere aurkeztu beharko dute.

3.3. Eskabideari, behar bezala bete ondoren, agiri hauek erantsiko zaizkio:

Bat._Nafarroako Foru Komunitateko Administrazioaren kontuan 18 euro ordaindu izana frogatzen duen agiria. Kopuru horrekin espedientearen formalizazioa eta azterketa eskubideak ordainduko dira.

Azterketa eskubideak ordaindu izanaren ordainagiria aurkezten ez bada, izangaia baztertu eginen da.

Honako hauek ez dute tasarik ordaindu beharko:

a) Ehuneko 33ko edo gehiagoko ezgaitasun aitortua dutela frogatzen duten pertsonek, organo eskudunak luzaturiko jatorrizko agiriaren edo behar bezala konpultsaturiko fotokopiaren bidez.

b) Hauta-proben deialdia egin aurretik hilabete batez edo luzaroago lan-eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon den bitartean eskainitako inolako lan egokiri uko egin ez izana eta lanbide sustapen, prestakuntza edo eraberritze ekintzetan parte hartzeari uko egin ez izana, justifikaturiko kasuetan izan ezik, eta, horrez gainera, lanbide arteko gutxieneko soldatatik gorako den dirusarrerarik ez izatea hilabetero.

Lan eskatzailea dela frogatzeko, Enplegu Bulegoak emandako agiria aurkeztu beharko da. Bertan, lan-eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ez eta lan-igoera, prestakuntza edo eraberritze ekintzetan parte hartzeari ere, justifikaturiko kasuetan izan ezik.

Hilero lanbide arteko gutxieneko lansaritik gorako errentarik ez duela interesatuaren adierazpenaren bidez frogatuko da. Adierazpen eredua Nafarroako Gobernuko Informazio Bulegoan eskuratzen ahalko da, edo bestela internet bidez, arestian emandako helbidean.

Bi._Deialdian igoera txandan parte hartu nahi duten izangaiek, Nafarroako Foru Komunitateko Administrazioa ez den Nafarroako beste Administrazio Publiko bateko langile finkoak badira, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finkoak, lehengoaz gainera, deialdi honetako 2.1.2. arauan jasotzen diren eskakizunak betetzen dituztela frogatzen duen agiria gehitu beharko diote eskabideari.

3.4. Eskabideak aurkezteko epea ezin izanen da luzatu.

3.5. Eskabidean atzematen diren akats materialak edo egitezkoak ofizioz edo interesatuak eskaturik zuzentzen ahalko dira, noiznahi ere.

4._Izangaien onarpena eta erreklamazioak.

4.1. Eskaerak aurkezteko epea bukaturik, Funtzio Publikoaren zuzendari nagusiak ebazpena emanen du izangai onartu eta baztertuen behin-behineko zerrenda onesteko, eta Nafarroako ALDIZKARI OFIZIALean argitara dadila aginduko du.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, akatsik egin badute, zuzentzeko.

4.3. Erreklamazioetarako epea bukatutakoan eta horiek ebatzita, Funtzio Publikoaren zuzendari nagusiak onartu eta baztertuen behin betiko zerrenda onesten duen ebazpena emanen du, eta Nafarroako ALDIZKARI OFIZIALean argitara dadila aginduko.

4.4. Izangaiei egotziriko arrazoiengatik baztertzen direnei ez zaizkie azterketa egiteko eskubideak itzuliko.

5._Epaimahaia.

5.1. Epaimahaiak kide hauek izanen ditu:

_Batzordeburua: Camino Paredes Giraldo, Vianako Printzea Erakundea-Kultura eta Turismo Departamentuko Kultura zuzendari nagusia.

_Ordezkoa: Javier Itúrbide Díaz, Vianako Printzea Erakundea-Kultura eta Turismo Departamentuko Liburutegi Zerbitzuko zuzendaria.

_Mahaikidea: Juan Francisco Elizari Huarte, Vianako Printzea Erakundea-Kultura eta Turismo Departamentuko Nafarroako Liburutegi Nagusiaren Ataleko burua.

_Ordezkoa: María del Carmen Martínez Pérez, Vianako Printzea Erakundea-Kultura eta Turismo Departamentuko Informazio Sistemen Bulegoko burua.

_Mahaikidea: Concepción Vidaurre Donamaría, Vianako Printzea Erakundea-Kultura eta Turismo Departamentuko Fondo Dokumentala Kudeatzeko Bulegoko burua.

_Ordezkoa: Lorenzo Otazu Ripa, Vianako Printzea Erakundea-Kultura eta Turismo Departamentuko goi mailako liburuzain-teknikaria.

_Mahaikidea: Administrazio Erroko Langileen Batzordearen ordezkari bat, batzordeak berak proposatua.

_Ordezkoa: Administrazio Erroko Langileen Batzordearen ordezkari bat, batzordeak berak proposatua.

_Mahaikide idazkaria: Pilar Zapico Revuelta, Vianako Printzea Erakundea-Kultura eta Turismo Departamentuko Araubide Juridikoaren Ataleko burua.

_Ordezkoa: José Miguel Gamboa Baztán, Vianako Printzea Erakundea-Kultura eta Turismo Departamentuko Turismoaren Antolamendu Ataleko burua.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Organo kolegiatuaren eraketak eta jardunak balio izateko, mahaiburuak eta mahaikide idazkariak edo haien ordezkoek bertan egon beharko dute.

5.3. Epaimahaiko kideek ez dute parte hartuko, eta organo dei egileari horren berri emanen diote, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretakoren batean baldin badaude.

Izangaiek, halaber, zilegi izanen dute mahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren arauak ulertu eta aplikatzeko moduaren inguruan sortzen diren arazo guztiak.

5.5. Epaimahaiak aholkulari adituen laguntza izan dezake, proba batzuetan nahiz guztietan laguntzeko. Aholkulari horiek beren espezialitate teknikoetan baizik ez dira ariko eta horietan bakarrik emanen diote laguntza epaimahaiari.

6._Oposizioa nola eginen den.

6.1. Oposizioa 2006ko urrian hasiko da. Onartu eta baztertuen behin betiko zerrenda onesten duen ebazpenean berean finkatuko dira probak hasteko tokia, eguna eta ordua.

Ondoren, epaimahaiak jakinaraziko ditu gainerako probak egiteko iragarkiak, erregelamenduz.

6.2. Oposizioak ariketa hauek izanen ditu:

Lehenbizikoa: Gai zerrendaren lehen zatiaz ehun galdera erantzun beharko dira. Galderek launa erantzun izanen dituzte, baina haietariko bat bakarrik egonen da ongi. Ariketa egiteko izangaiek hiru ordu izanen dute.

Bigarrena: Gai zarrendaren lehen zatitik zozketaz aterako diren hiru gairen artetik lehiatzaileek aukeratuko dituzten bi garatu beharko dituzte, gehienez ere hiru orduan.

Hirugarrena: Deialdiaren xede den lanpostuari dagozkion eginkizunez eta gai zerrendaren lehen zatiko gaiez epaimahaiak proposatuko dituen hiru kasu praktiko konpondu beharko dira idatziz.

Epaimahaiak ariketa hori egiteko izangaiek zenbat denbora duten adieraziko du haren hasieran.

Laugarrena: Gai zerrendako bigarren zatitik zozketa bidez aukeratuko den gai bat azaldu beharko da idatziz ordu bat hogeita hamar minutuan.

Bigarren, hirugarren eta laugarren ariketak plika sistemaren bidez eginen dira.

6.3. Oposizioko ariketen balorazioan 100 puntu eman daitezke gehienez ere, honela banatuak:

Lehenbizikoa: gehienez 30 puntu.

Bigarrena: 30 puntu gehienez, 15 puntu gai bakoitzerako.

Hirugarrena: 30 puntu gehienez, 10 puntu kasu praktiko bakoitzerako.

Laugarrena: gehienez 10 puntu.

6.4. Oposizioko ariketak kanporagarriak izanen dira. Lehenbizikoan 18 puntu gutxienez lortzen ez dituzten lehiatzaileak baztertuko dira. Bigarrenean eta hirugarrenean, ariketa bakoitzeko puntuen erdiak lortzen ez dituztenak. Eta laugarrenean, puntu bat ere lortzen ez dutenak. Halaber, bazterturik geldituko da bigarren ariketako edozein gaitan edo hirugarren ariketako edozein kasutan 0 puntuko kalifikazioa ematen zaiona.

6.5. Ariketak zuzendu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo proba edo ariketa egiteko tokia, eguna eta ordua, gutxienez 48 ordu lehenago.

6.6. Ariketa bakoitzerako dei bakarra eginen da. Izangaiek nortasun agiri nazionala, pasaportea edo gida-baimena eraman beharko dute. Azterketara agertzen ez direnak edo arestian aipatutako agirietako baten bidez beren nortasuna egiaztatzen ez dutenak oposiziotik baztertuko dira.

6.7. Hautapen-probak egiteko, ezgaitasun aitorturen bat dutenentzat bidezkoak diren denbora eta baliabide egokitzapenak eginen dira, eskabidean azaldutakoaren arabera.

7._Probak gainditu dituztenen zerrenda, izendapen proposamena eta agirien aurkezpena.

7.1. Hautaprobak amaiturik, epaimahaiak jendaurrean jarriko du probak gainditu dituztenen zerrenda, oposizioan lortutako kalifikazioekin, Nafarroako Gobernuaren iragarki oholean. Gero, zerrenda hori Funtzio Publikoaren zuzendari nagusiari igorriko dio, deialdiko lanpostuen kopuruaren barruan sartzen diren eta probak puntuazio altuenekin gainditu dituzten izangaiak izendatzeko proposamenarekin eta espediente osoarekin batera. Proposamen hori Nafarroako ALDIZKARI OFIZIALean argitaratuko da.

Berdinketa izanez gero, lehen ariketan puntuazio altuagoa erdiesten duenaren alde jokatuko da. Hori eginda, berdinketak oraindik badirau, bigarren eta hirugarren ariketetan lorturiko puntuazioak hartuko dira kontuan, hurrenkera horrexetan.

7.2. Izendapen proposamena Nafarroako ALDIZKARI OFIZIALean argitaratu ondoko 30 egun naturaleko epean, proposatutako izangaiek inprimaki berariazko batzuk jaso eta honako agiri hauek aurkeztu behar dituzte Funtzio Publikoaren Zuzendaritza Nagusian:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiak:

a) Nortasun Agiri Nazionalaren bi fotokopia konpultsatu, edo izangaiaren hiritartasuna eta nortasuna frogatzen dituen beste agiri baliokideren batenak.

b) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.

c) Laneko Arriskuei Aurrea hartzeko Atalak emandako txostena, interesatuak karguan aritzea eragotziko liokeen eritasun edo akats fisiko edo psikikorik ez duela frogatzeko.

Elbarritasunen bat alegatu duten izangaiek, gainera, elbarritasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

d) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizi ez izanaren zinpeko aitorpena.

Izangaiek Espainiako herritartasuna ez badute, agiria aurkeztu beharko dute, beren Estatuko Funtzio Publikoan sartzea eragozten dien diziplina zehapenik edo zigor penalik ez dutela adierazteko.

e) Zin egin edo hitz ematea, Nafarroako Foru Eraentza errespetatu, Konstituzioari eta Legeei men egin eta karguari dagozkion eginkizunak zuzen beteko dituela.

f) Funtzio Publikoaren Zuzendaritza Nagusiak eskatzen dizkion gainerako agiriak.

Deialdi hau egin ez duen Nafarroako beste Administrazio Publikoren bateko langile finko, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finko diren izangaiek, gainera, aurreko administrazioko espediente pertsonalean ageri diren inguruabar eta aurrekari guztiak frogatzen dituen ziurtagiria aurkeztu beharko dute, hots, sarrerari, antzinatasunari, mailari, egoera administratiboari eta abarrei buruzkoa.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiak:

a) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.

b) Funtzio Publikoaren Zuzendaritza Nagusiak eskatzen dizkion gainerako agiriak.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barrenean, eta aski justifikaturik dauden ezinbesteko kasuak salbuetsiz, arestiko agiriak aurkezten ez dituztenak ezin izanen dira izendatuak izan, eta ordurako egintza guztiak baliorik gabe geldituko dira, euren eskabidearen faltsukeria dela eta, legokiekeen erantzunbeharra galarazi gabe.

7.4. Aurreko atalean aurreikusitakoa gertatuz gero, Funtzio Publikoaren zuzendari nagusiak probak gainditu dituztenen zerrendan, 7.1. atalean aipatutakoan, hurrengoa den izangaiarekin beteko du baja, eta horrekin ere aurreko ataletan adierazitako moduan jokatuko da.

8._Lanpostu hutsak hautatzea.

8.1. Aurreko oinarrian xedatu dena betetzen duten lehiatzaileek Funtzio Publikoaren Zuzendaritza Nagusiak hartarako jartzen dien epean aditzera eman beharko dute eskaintzen zaizkien lanpostuetatik zein hautatzen duten. Aukeratu beharreko lanpostuak hasieran deitutakoak izanen dira, edo beste batzuk, zerbitzuaren beharrei jarraikiz horiek aldatzea erabakitzen bada.

8.2. Hautaprobak igoera txandaren bidez gainditzen dituzten izangaiek, 8.3 ataleko bigarren lerroaldean aipatutako kasuan izan ezik, lehentasuna izanen dute deialdiko lanpostu hutsak aukeratzerakoan, txanda horretakoak ez diren izangaien aurretik.

8.3. Lanpostu hutsak aukeratzeko orduan, 100eko 33ko edo handiagoko minusbaliotasun aitortua duten izangaiek lehentasuna izanen dute txanda irekiko izangaien aurretik.

Izangai minusbaliaturik bada, eta horrek eragina badu lanpostu bat edo bestea hautatzeko, aukeratzen hasi aurretik, minusbaliotasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

9._Izendapena, lanpostuen esleipena eta jabetza hartzea.

9.1. Funtzio Publikoaren zuzendari nagusiak, ebazpen baten bitartez, aurreko oinarrietan ezarritakoa betetzen duten izangaiak Nafarroako Foru Komunitatearen Administrazioko funtzionario izendatuko ditu, erdi mailako liburuzain-teknikarien lanetan aritzeko. Ebazpen horren bidez lanpostuen esleipena ere eginen da.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko dituzte izendatuak, indarra duten xedapenek ezartzen dituzten eskubide eta betebehar guztiak dituztela. Gizarte Segurantzako araubide orokorrean inskribatu eta kidetuko dira, araubide horretan aurreikusitakoaren babesean.

Aurrekoa gorabehera, Nafarroako Administrazio Publikoen Zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein bahituretxetako eskubide pasiboen araubidekoak direnen kasuan, bi aukera izanen dituzte: Nafarroako Foru Komunitateko Administrazioko bahituretxean segitzea, martxoaren 5eko 10/2003 Foru Legearen bidez arauturiko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Izendatzen diren izangaiek destinoko herrian izan beharko dute bizilekua, bertan helbidea egiazki kokatuz. Administrazio organo eskudunek destinoa aldatzen ahalko dute, aplikatzekoa den arautegian ezarritakoarekin bat.

9.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

9.5. Izendapena Nafarroako ALDIZKARI OFIZIALean argitaratuko da eta izangai izendatuak hilabeteko epean jabetu beharko du bere lanpostuaz, izendapenaren jakinarazpenetik kontatzen hasita.

Aipatu epean eta behar bezain ongi arrazoitutako kasuetan izan ezik, izangairen batek ez baldin badu lanpostua bere egiten, Foru Komunitateko Administrazioaren funtzionario izateko eskubide guztiak galduko ditu. Hala bada, 7.4 atalean ezarritakoari jarraikiko zaio.

9.6. Izangai bat funtzionario bihurtu eta lanpostuan batere aritu gabe zuzenean eta berak eskatuta borondatezko eszedentzia ematen bazaio jabetza hartzearen egunetik bertatik, data hartan beste Administrazio Publiko batean ari delako, kasuko lanpostu hutsa ere beteko da deialdiko 7.4 atalak agintzen duen moduan.

9.7. Aurreko bi ataletan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10._Aldi baterako kontratuetarako izangaien zerrenda.

10.1. Nafarroako Administrazio Publikoan sartzeko Erregelamenduaren 42. artikuluan, lanpostuak aldi baterako betetzeko kudeaketa arauak onetsi zituen Lehendakaritza, Justizia eta Barne kontseilariaren azaroaren 14ko 146/2005 Foru Aginduan eta arau honexetan ezarritako prozedurari jarraikiz, aldi baterako kontrataziorako izangaien zerrenda hauek sortuko dira:

_Probak gainditu bai baina lanposturik lortu ez duten izangaien zerrenda.

_Hautapen prozesuaren ariketa guztiak gainditu ez dituzten izangaien zerrenda.

10.2. Epaimahaiaren espedientea jasota, Funtzio Publikoaren zuzendari nagusiaren ebazpen baten bidez, hautapen prozesua gaindituta ere lanposturik gabe gelditu diren izangaiei eta deialdian ezarritako azkenaurreko ariketa gainditu dutenei hamar egun balioduneko epea emanen zaie, ebazpena argitaratu eta biharamunetik hasita, ondoko dokumentazio hau aurkezteko:

_Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, sartzeko prozesuan parte hartzeko eskabideak aurkezteko epean titulua eskuratzeko moduan egoten dela frogatzen duen ziurtagiria.

Ebazpen hau Nafarroako ALDIZKARI OFIZIALean argitaratuko da, eta langileen zerrendak Nafarroako Gobernuko iragarki-oholean (Karlos III.aren etorbidea, 2, atalondoa, Iruña).

Eskatzen diren agiriak aipatu epean aurkezten ez dituztenak (aski justifikatutako ezinbesteko kasuetan izan ezik) eta eskatutako baldintzak betetzen ez dituztenak ez dira sartuko aldi baterako kontratuetarako izangaien zerrendan, eta deialdian parte hartzeagatiko eskubide guztiak galduko dituzte, deusetan ukatu gabe, betiere, parte hartzeko eskabidea faltsutzeagatik legokiekeen erantzukizuna.

10.3. Sartzeko prozeduraren eskabideak aurkezteko epea bukatzen den egunerako bete beharko dira baldintzak, eta hauta-probek dirauteino eta kontratazioaldiak iraun bitarte bete beharko dira.

10.4. Dokumentazioa aurkezteko epea bukaturik, Funtzio Publikoaren zuzendari nagusiaren ebazpen baten bidez, aldi baterako kontratuetarako izangaien zerrenda hauek onetsiko dira eta Nafarroako Gobernuaren iragazki-oholean argitaratuko (Karlos III.aren etorbidea, 2, atalondoa, Iruña):

a) Probak gainditu bai baina lanposturik lortu ez duten izangaien zerrenda.

b) Deialdiaren azkenaurreko ariketa gainditu bai baina lanposturik gabeko gaindituen zerrendan ez daudenen zerrenda.

10.5. Hauxe izanen da aldi baterako kontratazioen zerrendaren ordena: oposizioa gainditu bai baina lanposturik lortu ez dutenen kasuan, hautapen prozesuan lortutako puntuazioaren arabera; gainerako izangaien kasuan, gainditutako ariketetan lortutako puntuazioen batura. Berdinketarik dagoenean nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

11._Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da Funtzio Publikoaren zuzendari nagusiari zuzenduta, errekurtsoaren xede den egintza argitaratu edo jakinarazi eta biharamunetik, hilabeteko epean.

Deialdi honen eta bere arauen kontra eta arauak aplikatzeko egintzen kontra, epaimahaiak hartutakoak izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barne kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik kontatuta.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2006ko maiatzaren 2an._Funtzio Publikoaren zuzendari nagusia, Alberto Andérez González.

I. ERANSKINA

Eskabidea

Izena: ..............................., adinez nagusia. Nortasun Agiri Nazionala: (edo balio bereko beste agiriren bat). Sorteguna: ............... Sorterria: ................ (.............). Nazionalitatea: ......................., Helbidea: ................ (kalea, zenbakia), ............. herria, ............. probintzia, ............... posta kodea, eta ....... telefonoa (........... laneko telefonoa) duena,

Honako hau azaltzen dut:

Nafarroako Foru Komunitateko Administrazioaren eta bere erakunde autonomoen zerbitzuko .............. izateko ......... lanpostu ................... bidez betetzeko deialdian parte hartzeko onar nazatela eskatzen dudala, behean aipatzen den txandan (deialdia ...... Nafarroako ALDIZKARI OFIZIALean argitaratu zen, .......(e)an).

f Txanda irekia.

f Igoera txanda.*

f Ezgaitasunen bat dutenendako txanda.*

Hautaprobak gainditzen ez baditut, lanpostuak behin-behinekoz betetzeko aukeraz baliatu nahi dudala, honako esparruetako batean:

f Administrazio-erroa.*

f Osasunbidea-Nafarroako Osasun Zerbitzua.*

f Nafarroako Gizarte Ongizatearen Institutua.*

(Esparruetako bakar bat aukeratu daiteke).

Ez dudala karguan aritzea galarazten didan eritasun edo akats fisiko edo psikikorik.

Indarra duten xedapenetan ezarritako ezintasunik ez dudala.

Ez naizela diziplinako espediente bidez ezein administrazio publikoren zerbitzutik kanpo utzia izan, eta, era berean, ez nautela eginkizun publikoak betetzeko gaitasunik gabe utzi.

Deialdian eskatzen den titulazioaren jabe naizela.

Azterketa eskubideak ordaindu ditudala deialdian ezarritako moduan eta horren gordekina erantsi dudala, edo erantsitako agirien bidez frogatzen dudala tasa ordaintzetik salbuetsita nagoela.

Eskabideak aurkezteko epearen azken egunean beharkizun guztiak betetzen ditudala.

f Ezgaitasuna dudala eta, beraz, behar dituen egokitzapenak eskatzen ditudala, haietarako arrazoiak adierazita. (Beste orri batean azaldu behar dira eskatutako egokitzapenak eta haietarako arrazoiak).

f Ezgaitasuna frogatzen duen agiria aurkezten dudala, erakunde eskudun batek emana.

f Euskararen gaitasunaren agiria edo ofizialki baliokidea den beste titulu bat aurkezten dudala*.

f Euskara maila jakiteko proba egitea eskatzen dudala*.

f Frantseseko eta ingeleseko nahikotasun frogak egitea eskatzen dudala*.

Horrenbestez,

Eskabide hau ontzat hartu eta aipatu deialdian onartua izatea eskatzen dut.

Iruñean, .......(e)ko ............aren .....(e)an.

(Sinadura)

(*) Bidezkoa bada.

NAFARROAKO GOBERNUA. LEHENDAKARITZA, JUSTIZIA ETA BARNE DEPARTAMENTUA. FUNTZIO PUBLIKOAREN ZUZENDARITZA NAGUSIA.

II. ERANSKINA

Gai zerrenda

LEHEN ZATIA

1. gaia._Liburuak eta liburutegiak Erdi Aroan.

2. gaia._Moldiztegiaren asmakizuna.

3. gaia._Liburuak eta liburutegiak XVI. mendean.

4. gaia._Liburuak eta liburutegiak XVII. mendean.

5. gaia._Irakurzaletasuna Espainian: XVI. eta XVII. mendeak.

6. gaia._Liburuak eta liburutegiak XVIII. mendean.

7. gaia._Irakurzaletasuna Espainian: XVIII. mendea.

8. gaia._Liburuak eta liburutegiak XIX. mendean.

9. gaia._Irakurzaletasuna Espainian XIX. mendetik gaur arte.

10. gaia._Liburuak eta liburutegiak XX. mendean.

11. gaia._Liburugintza eta liburuen merkataritza Espainian gaur egun. Kasu eman bereziki liburutegi publikoen sistemei eskainiriko jokabide, merkataritza zerbitzu eta argibide zerbitzuei.

12. gaia._Bibliografia: kontzeptua, helburuak eta bilakaera historikoa.

13. gaia._Bibliografia motak.

14. gaia._Espainiako bibliografiak.

15. gaia._Nafarroako bibliografia: bildumak, gaur egungo egoera, garatzeko proposamenak eta hedapena.

16. gaia._Aldizkarien historia. Sorrera eta garapena. Haien egoera Nafarroan.

17. gaia._XXI. mendeko aldizkariak: kontzeptua, motak eta euskarriak. Haien egoera Nafarroan.

18. gaia._Liburutegietako zerbitzua. Liburutegi motak.

19. gaia._Eskoletako liburutegiak: kontzeptua, eginkizunak eta zerbitzuak. Haien egoera Nafarroan.

20. gaia._Unibertsitateetako liburutegiak: kontzeptua, eginkizunak eta zerbitzuak. Haien egoera Nafarroan.

21. gaia._Liburutegi espezializatuak: kontzeptua, eginkizunak eta zerbitzuak. Haien egoera Nafarroan.

22. gaia._Liburutegi nazionalak: kontzeptua, eginkizunak eta zerbitzuak. Liburutegi Nazionala. Legezko gordailua. Autonomia erkidegoetako liburutegiak.

23. gaia._Liburutegi publikoak: bilakaera historikoa, kontzeptua, eginkizunak eta zerbitzuak.

24. gaia._UNESCOren Agiria liburutegi publikoez (1994). Helburuak, edukia, norberaren iritzia.

25._IFLA/UNESCO jarraibideak liburutegi publikoen zerbitzua garatzeko. Kultura Ministerioa (2002). Haien aplikazioa Nafarroako liburutegi publikoen sisteman.

26. gaia._Liburutegi publikoko erakina: eraikuntza kontuak, sarbideak, instalazioak, guneen eta zerbitzuen definizioa, segurtasun neurriak, seinaleak, altzariak eta ekipamendu teknologikoak.

27. gaia._Bildumak liburutegi publikoetan: plangintza, hautapena, erosketa, mantentze-lanak eta garapena. Nafarroako Liburutegi Publikoen Sistemarako liburuak suntsitzeko irizpideen proposamena.

28. gaia._Liburutegi publikorako funtsen erosketa bereziak. Dohantzen eta trukaketen kudeaketa.

29. gaia._Aldizkarien erosketak, harpidetzen, erreklamazioen eta erabiltzaileendako argideen kudeaketa. Banakako eta taldekako erosketak.

30. gaia._Funts dokumentalen erosketa zentralizatua liburutegi publikoen sistema batean: helburuak, antolaketa, esparrua, langileak, baliabideak, aurrekontuaren eta estatistiken kontrola, ebaluazio sistemak. Nafarroako liburutegi publikoen sistemen aipamena.

31. gaia._Funts bibliografikoen prozesu teknikoa eta antolaketa: erregistroa, katalogazioa eta sailkapena.

32. gaia._Mintzaira dokumentalak: aurkibideak, arloen idazpuruak, tesauroa, laburpena.

33. gaia._Deskripzio bibliografikoa: kontzeptua eta eginkizuna. ISBD, AACR. Deskripzio komertziala eta bibliofragikoa: ISBN eta ISSN.

34. gaia._Katalogatzeko arauak. Kultura Ministerioaren edizio bategin eta zuzendua (1995): 1. eta 2. kapituluen egitura eta edukiak.

35. gaia._Katalogatzeko arauak. Kultura Ministerioaren edizio bategin eta zuzendua (1995): 3tik 11ra bitarteko kapituluen egitura eta edukiak.

36. gaia._Katalogatzeko arauak. Kultura Ministerioaren edizio bategin eta zuzendua (1995): 12tik 17ra bitarateko kapituluen egitura eta edukiak.

37. gaia._MARC formatua, erregistro bibliografikoak trukatzeko. Ibermarc formatua.

38. gaia._Liburutegiak kudeatzeko sistema automatizatuak.

39. gaia._Katalogo kolektiboak: kontzeptua, helburuak, baliabideak, zerbitzuak eta ebaluazioa.

40. gaia._Nafarroako Liburutegi Publikoen sistemako katalogo kolektiboa: sendotasunak eta ahultasunak, aukerak eta mehatxuak.

41. gaia._Kultura Ministerioaren Liburutegi Publikoetarako arlokako idazpuruen zerrenda (1993). Egitura eta edukiak.

42. gaia._Liburuak sailkatzeko sistemak. CDU delakoa, Espainiako edizioak, egitura eta edukiak.

43. gaia._Agiriak eskuratzeko liburutegi publikoko zerbitzuak: kontsulta eta mailegua.

44. gaia._Liburutegien arteko elkarlana: liburutegi sistemak, nazioarteko lankidetza.

45. gaia._Liburutegien arteko maileguak. Antolatu, funtzionatu eta ebaluatzeko proposamena Nafarroako Liburutegi Publikoen sisteman.

46. gaia._Informazio eta erreferentziarako liburutegi publikoko zerbitzuak: helburuak, antolaketa, esparrua, langileak, baliabideak, ebaluazio sistemak. Nafarroako Liburutegi Nagusiari aplikatzeko modua.

47. gaia._Informazioaren teknologia berriak eta haien aplikazioa liburutegi publikoetan. Nafarroako liburutegi publikoei aplikatzeko modua: sendotasunak eta ahultasunak, aukerak eta mehatxuak.

48. gaia._Kultura Ministerioaren irizpideak internet eskuratzeko (2005). Aplikatu eta garatzeko proposamenak Nafarroako liburutegi publikoen sisteman.

49. gaia._Liburutegi publikoen sistema bateko intranet eraiki, antolatu, funtzionatu, gaurkotu eta ebaluatzea. Nafarroako liburutegi publikoei aplikatzeko modua.

50. gaia._Liburutegi publikoen sistema bati buruzko interneteko atari bat eraiki, antolatu, funtzionatu, gaurkotu eta ebaluatzea. Nafarroako liburutegi publikoei aplikatzeko modua.

51. gaia._"Galdetu, liburutegiak erantzunen dizu eta" zerbitzua. Antolaketa, funtzionamendua, sendotasunak eta ahultasunak, aukerak eta mehatxuak.

52. gaia._Liburutegi Publikoen sistema batean Erabiltzaileei Laguntzeko Zerbitzua: antolaketa, funtzionamednua, baliabideak eta ebaluazioa.

53. gaia._Liburutegi publikoak integrazio soziokulturalerako zentroak diren aldetik. Gizarteko gutxiengoendako eta etorkinendako laguntza.

54. gaia._Erabiltzaileen prestakuntza liburutegi publikoetan: helburuak, programak, baliabideak eta ebaluatzeko prozedurak. Erabiltzaileak prestatzeko programaren proposamen bat Nafarroako Liburutegi Publikoen sisteman.

55. gaia._Erabiltzaileen iritzia: Nafarroako liburutegi publikoetako erabiltzaileen iradokizun, kontsulta eta erreklamazioak hartu, baloratu eta erantzuteko modua. Haien aplikazioaren azterketa Nafarroako liburutegi publikoen sisteman.

56. gaia._Liburutegiak eta irakurzaletasuna sustatzeko jarduerak. Programatu, kudeatu eta ebaluatzeko proposamena Nafarroako Liburutegi Publikoen sisteman.

57. gaia._Irakurle elkarteak eta liburutegi publikoak: helburuak, baliabideak, metologia eta ebaluazioa. Antolatu eta garatzeko proposamenak Nafarroako liburutegi publikoen sisteman.

58. gaia._Ikus-entzunezkoak liburutegi publikoetan: gaur egungo egoera eta epe ertainerako aurreikuspenak eskaintzan eta eskarian. Nafarroako Liburutegi Publikoen Sistemara ikus-entzunezkoez hornitzeko irizpideen proposamena.

59. gaia._Datu baseak: ekoizleak, banatzaileak eta erabiltzaileak. Ezarri, garatu eta ebaluatzeko proposamena Nafarroako Liburutegi Publikoen sisteman.

60. gaia._Agiriak kopiatzeko zerbitzua liburutegi publikoetan. Prozedura teknikoak. Kopiagintza eta jabetza intelektuala.

61. gaia._Liburutegi publikoak eta herrien oroimena. Herrietako gaiak hautatzea: gaikako esparrua, agiriak zehaztu, erosi, antolatu eta zabaltzea.

62. gaia._Liburutegi birtualak. Helburua, baliabideak, zabaltzeko prozedurak. Ezartzeko proposamenak Nafarroako Liburutegi Publikoen sistemari dagokionez.

63. gaia._Ondare digitala eta autonomia erkidegoetako liburutegiak. Definizioa, legezko kontuak, helburuak, zainketa eta lan egiteko metodoak. Nafarroako Liburutegi Nagusiari aplikatzeko modua.

64. gaia._Bibliobus zerbitzua. Abian jartzeko oinarrizko irizpideak, Kultura Ministerioak emanak (2002). Nafarroan ezartzeko proposamenak: helburuak, antolaketa, esparrua, langileak, baliabideak eta ebaluazio prozedurak.

65. gaia._Kalitateko Plana eta liburutegiak: kalitate sistemak, helburuak, prozedurak, hobetzeko proiektuak eta adierazleak. Nafarroako liburutegi publikoen sistemari aplikatzeko proposamena.

66. gaia._Liburutegi Publikoen II. Biltzar Nazionala (Salamanka 2004). Ekarpenik adierazgarrienak, sendotasunak eta ahultasunak.

67. gaia._Liburutegiei buruzko legeak eta haien antolaketa Espainian: Estatuko eta autonomia erkidegoetako esparruak.

68. gaia._Liburutegien antolaketa Espainian: Estatuko eta autonomia erkidegoetako esparruak.

69. gaia._Nafarroako Liburutegi Publikoei buruzko Legea (2002). Sendotasunak eta ahultasunak, aukerak eta mehatxuak.

70. gaia._Nafarroako Liburutegi Publikoen sistema. Gaur egungo egoera, antolaketa eta funtzionamendua. Espainiako liburutegi publikoen beste sistema batzuekiko antzak eta ezberdintasunak.

71. gaia._Irakurleendako txartel bakarra liburutegi publikoen sistema batean: sendotasunak eta ahultasunak, aukerak eta mehatxuak. Nafarroako Liburutegi Publikoen sistemaren kasua.

72. gaia._Liburutegi publikokoetako liburuzainak Espainian: lan araubidea, eginkizunak eta eskurantzak. Haien egoera Nafarroan.

73. gaia._Langileen etengabeko prestakuntza liburutegi publikoetan: helburuak, prozedurak, programak eta baliabideak. Liburutegi publikoen sistema bateko liburutegi publikoetako langileen etengabeko prestakuntzarako programa bat epe ertainera ezartzeko proposamena.

74. gaia._Udalen eta autonomia administrazioaren arteko hitzarmenak liburutegi publikoak kudeatzeko. Haien egoera Nafarroan.

75. gaia._Irakurketa Mapa liburutegi publikoen sistema baten plangintza estrategikorako tresna den aldetik. Irakurketa Mapa baterako proposamenak Nafarroan.

76. gaia._Zerbitzuen Zerrenda eta liburutegi publikoak. Nafarroako Liburutegi Publikoen Sistemako Zerbitzuen Zerrendarako proposamenak.

77. gaia._Nafarroako Liburutegia Nafarroako Liburutegi Publikoei buruzko Legearen arabera (2002).

78. gaia._Nafarroako Liburutegia eta Antzinako Funtsa: helburuak, antolaketa, funtzionamendua, baliabideak eta haren jarduerak ebaluatzeko prozedurak.

79. gaia._CCPBE delakoa.

80. gaia._Zinematekak: helburuak, programak, antolaketa, funtzionamendua, baliabideak eta haren jarduerak ebaluatzeko prozedurak. Nafarroako Zinemateka Nafarroako Liburutegia osatzen duen zerbitzua den aldetik.

BIGARREN ZATIA

1._Espainiako 1978ko Konstituzioa: Estatuko aginteak. Koroa. Gorte Nagusiak. Gobernua eta Administrazioa. Botere judiziala Konstituzioan.

2._Zuzenbide Publikoaren iturburuak: legeak eta horien motak. Lege dekretuak. Legegintzako foru dekretuak. Nazioarteko Itunak.

3._Administrazio Zuzenbidearen iturburuak: erregelamendua eta erregelamenduzko ahalmena. Erregelamendu motak. Erregelamenduzko ahalmenaren mugak eta haren kontrola.

4._Administrazio egintza (I): kontzeptua, motak eta osagaiak.

5._Administrazio egintza (II): baldintzak, eraginkortasuna, deuseztasuna eta deuseztagarritasuna.

6._Administrazio prozedura erkidea (I). kontzeptua eta izaera. Hasiera, antolamendua, instrukzioa eta bukaera.

7._Administrazio prozedura erkidea (II). Administrazio errekurtsoak: printzipio orokorrak eta motak.

8._Nafarroako Parlamentua edo Gorteak: eraketa, antolakuntza eta eginkizunak.

9._Nafarroako Gobernuari eta Lehendakariari buruzko Foru Legea.

10._Nafarroako Foru Komunitateko Administrazioari buruzko Foru Legea.

11._Nafarroako Foru Komunitateko Arartekoa. Comptos Ganbera. Nafarroako Kontseilua.

12._Nafarroako Administrazio Publikoen zerbitzuko Langileen Estatutua (I). Langile motak. Funtzionario publikoen hautapena. Funtzionario izaera eskuratzea eta galtzea.

13._Nafarroako Administrazio Publikoen zerbitzuko Langileen Estatutua (II). Administrazio karrera. Administrazio egoerak. Lanpostuak betetzea. Lansariak.

14._Nafarroako Ogasun Publikoa: Nafarroako Ogasun Publikoaren eskubide eta betebeharrak. Nafarroako Aurrekontu Orokorrak: edukia eta onespena; gastuen sailkapen ekonomikoa; betearaztea eta likidazioa.

15._Nafarroako Administrazio Publikoen kontratuak: araubide juridikoa. Administrazio kontratu ohikoenak: kontzeptua eta motak. Kontratuak esleitu, hobetu, sinatu, bete, aldatu eta iraungitzeko arau orokorrak.

16._Datu pertsonalak babesteko Lege Organikoa: datuak babesteko printzipioak; pertsonen eskubideak.

Oharra:

Gai guztiak deialdi hau Nafarroako ALDIZKARI OFIZIALean argitaratzen denean indarra duen legeriari jarraikiz baloratuko dira, baina epaimahaiak egun horren ondoren onetsitako arau-aldaketen aipamenak baloratzen ahalko ditu.

Iragarkiaren kodea: F0607732