I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
55/2006 FORU AGINDUA, martxoaren 1ekoa, Vianako Printzea Erakundea-Kultura eta Turismo Departamentuko kontseilariak emana, Museoen Zerbitzuan aritzeko lau prestakuntza bekaren deialdia onetsi eta ebaluazio batzordea hautatzen duena.
Kultura Zuzendaritza Nagusiko Museoen Zerbitzuak txosten bat aurkeztu du eta bertan proposatu Museoen Zerbitzuan aritzeko lau prestakuntza bekaren deialdia eta hura arautuko duten oinarriak onets daitezela.
Nafarroako Foru Komunitateko Administrazioan eta haren erakunde autonomoetan prestakuntzarako bekak emateko araubide orokorra ezartzen duen apirilaren 19ko 172/2004 Foru Dekretuak emandako ahalmenak erabiliz.
AGINDU DUT:
1. Lau bekatarako deialdia egitea, lizentziadunek, Nafarroako Gobernuko Museoen Zerbitzuaren bidez, museoen antolaketaren eta funtzionamenduaren gaineko ezagutza teoriko eta praktikoa jaso eta prestakuntza akademikoa osa dezaten.
2. Deialdia arautuko duten oinarriak onestea.
3. Eskabideak baloratuko dituen batzordeko kideak izendatzea:
Batzordeburua: Carmen Valdés Sagüés andrea, Kultura Zuzendaritza Nagusiko Museoen Zerbitzuko zuzendaria.
Batzordekidea: Miguel Angel Hurtado Alfaro jauna, Nafarroako Museoaren Ataleko burua.
Batzordekidea: Francisco Javier Zubiaur Carreño jauna, Museoetako goi mailako teknikaria, Nafarroako Museoaren Atalari atxikia.
Batzordekidea: Ana Elena Redín Armañanzas andrea, goi mailako teknikaria, Nafarroako Museoaren Atalari atxikia.
4. 35.100 euroko gastu orokorra baimentzea. Horietatik, 26.325 euro, 2006ko apiriletik abendura bitarte erabiltzeko izanen dira eta 2006ko aurrekontuko "Bekadunak" izeneko A20003 A2300 4800 333100 kontusailaren bidez ordainduko dira. Gainerakoa, 8.775 euro, 2007ko urtarriletik martxora bitarte erabiltzeko, 2007ko kontusailaren kargura.
5. Deialdi hau Nafarroako ALDIZKARI OFIZIALean argitara dadila agintzea.
Iruñean, 2006ko martxoaren 1ean._Vianako Printzea Erakundea-Kultura eta Turismo Departamentuko kontseilaria, Juan Ramón Corpas Mauleón.
E R A N S K I N A
Nafarroako Gobernuko Museoen Zerbitzuan aritzeko lau prestakuntza beka emateko deialdiaren oinarriak. Deialdia honako arau hauen menpe egonen da: apirilaren 19ko 172/2004 Foru Dekretua, 2004ko maiatzaren 12ko Nafarroako ALDIZKARI OFIZIALean argitaratua (57. zk.), Nafarroako Foru Komunitateko Administrazioaren eta haren erakunde autonomoen prestakuntza bekak emateko araubide orokorra ezartzen duena, eta ekainaren 9ko 8/1997 Foru Legea, 1997ko ekainaren 20ko Nafarroako ALDIZKARI OFIZIALean argitaratua (74. zk.), Nafarroako Foru Komunitateko Administrazioaren eta haren erakunde autonomoen dirulaguntzak eman, kudeatu eta kontrolatzeko araubide orokorra ezartzen duena.
1._Prestakuntza beken helburua.
Deialdiko prestakuntza beken helburua lizentziadunen prestakuntza akademikoa osatzea da, Nafarroako Museoen Zerbitzuaren bidez museoen antolaketaren eta funtzionamenduaren gaineko ezagutza teoriko eta praktikoa jasoz.
2._Beka kopurua.
Deialdian lau prestakuntza beka eskaintzen dira.
3._Beken iraupena.
Prestakuntza beka bakoitza hamabi hilabete artekoa izan daiteke, gozatzen hasten denetik hasita. Dena dela, kasuko unitate administratiboak eskatzen baldin badu, organo eskudunak zilegi izanen du beka beste hamabi hilabeterako luzatzea, baina gehienez ere hiru urtez luzatuko da, hasierako aldia eta luzapenak barne.
4._Bekaren dotazio ekonomikoa, ordaintzeko modua eta Administrazioarekiko harremana.
4.1. Prestakuntza beka bakoitzak 8.775 euro izanen ditu urtean. Zenbateko hori aldian-aldian aldatu edo eguneratuko da, Lehendakaritza, Justizia eta Barne kontseilariaren foru agindu baten bidez.
4.2. Beka hilean behin ordainduko da, dagokion zatia, hilaren bukaeran.
4.3. Bekadunei ematen zaien dirua ez da soldata edo lansaritzat hartuko, dirulaguntza publikotzat baizik.
4.4. Beka erabiltzea eta bekaduna izatea ez da zerbitzuak ematea, eta egoera horrek ez dakar berarekin lan harremana, administratiboa edo estatutupekoa sortzea Nafarroako Foru Komunitateko Administrazioarekin edo haren erakunde autonomoekin, ez eta antzeko eskubiderik lortzea ere. Administrazioak ez du konpromisorik hartuko beka bukatutakoan bekaduna bere plantillan sartzeko.
4.5. Prestakuntza bekadunei agintzen zaizkien lan edo jarduerak Museoen Zerbitzuko funtzionarioek edo langile kontratatuek gainbegiratuko dituzte, horiek izanen baitira lan horien erantzuleak. Bekadunek ezin izanen dituzte funtzionario publikoen eginkizunak bete edo beretzat hartu, ez eta hirugarrenen aurrean Administrazio Publikoaren kide, ordezkari edo agente gisa agertu ere.
4.6. Praktikaldiak iraun bitartean bekadunek hogeita hamar atseden egun izanen dituzte, hilabete bakoitzeko 2,5 egun natural.
4.7. Gainera, bekadunek prestakuntzarako behar diren joan-etorriak eginen dituzte.
4.8. Organo eskudunak prestakuntzarako bekaldia eten ahalko du onuradunaren gaixotasun edo istripu kasuetan, bai eta ezinbesteko arrazoiak edo behar bezala justifikatutako bestelako gorabeherak daudenean ere. Etenaldiak beharrezkotzat jotzen den denbora iraunen du eta haren ondorioak arrazoi bakoitzaren araberakoak izanen dira.
5._Bekadunek bete beharreko baldintzak eta horiek egiaztatzeko modua.
5.1. Beka bat lortu ahal izateko, betebehar hauek izanen dira:
a) Adinez nagusia izatea.
b) Espainiako herritarra izatea edo Europar Batasuneko estaturen batekoa edo, Europar Batasunak izenpetu eta Espainiako Estatuak berretsitako nazioarteko itunen arabera, langileen joan-etorri askea aplikatzen duen estaturen batekoa. Dena den, Espainiako nazionalitatea ez dutenek gaztelaniaz behar adina badakitela frogatu beharko dute.
c) Jarduteko gaitasun osoa izatea eta Nafarroako Foru Komunitatearen eta haren erakunde autonomoen laguntza eta dirulaguntza publikoak jasotzeko desgaitua ez egotea.
d) Bizitokia Nafarroan izatea, deialdiaren eguna baino urte bat lehenagotik gutxienez.
e) Unibertsitateko titulu ofiziala edo baliokidea izatea, Espainiako agintariek emana edo baliozkotua, arlo hauetakoren batean: Historia, Artearen Historia, Giza Zientziak, Pedagogia, Psikopedagogia, Hezkuntzaren Zientziak, Dokumentazioa eta Arte Ederrak.
f) Eskatutako titulu hori prestakuntza bekarako deialdia egin aurreko hiru urteen barrenean eskuratua izatea.
5.2. Betebehar horiek egiaztagirien bidez eta idatziz frogatu beharko dira, prestakuntza beka jasotzeko eskaera aurkeztearekin batera. Hori guztia Nafarroako Gobernuaren Erregistro Orokorreko bulegoetan (Karlos III.aren etorbidea, 2, Iruña) edo Vianako Printzea Erakundea-Kultura eta Turismo Departamentuko erregistroan (Navarreria kalean, 39. zk., 31001 Iruña) aurkeztu beharko da, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aipatutako bideetako bat erabiliz. Hauek dira aurkeztu beharreko agiriak:
a) Parte hartzeko eskabidea, oinarri hauetan ezarritako epean eta moduan aurkeztua (ikus 7. puntua).
b) Nortasun Agiri Nazioanala eta, beharrezkoa bada, udaleko erroldatze agiria, eskaera aurkeztu aurreko urte osoan Nafarroan bizi izan dela egiaztatzeko.
c) Unibertsitateko ikasketa espedientearen ziurtagiria, ikasturte bakoitzeko ikasgai guztien kalifikazioekin.
d) Izangaiaren "curriculum vitae-a", ikasketa osagarriak, ikastaroak, argitalpenak, lortutako bekak, egindako ikerlanak eta izangaiari egokiak iruditzen zaizkion gainerako jarduera edo merezimendu guztiak adierazten dituena. Agertutako merezimenduak jatorrizko edo ofizialki konpultsatutako agiri egokien bidez behar dira egiaztatu.
5.3. Prestakuntza bekak jasotzeko eskabidea aurkezteak berarekin dakar eskatzaileak deialdiaren arauak onartzea.
6._Eskatzaileek aurkeztutako merezimenduak baloratzeko modua eta irizpideak.
6.1. Vianako Printzea Erakundea-Kultura eta Turismo Departamentuko kontseilariak izendatuko duen ebaluazio batzordeak hautatuko ditu bekadunak. Batzordeak aurkezten diren eskaerak aztertu eta baloratuko ditu eta horretarako beharrezkotzat jotzen dituen txostenak eskatu ahalko ditu. Baloratu ondoren, bekak puntu gehien ateratzen dutenei ematea proposatuko du, ondoko baremoan oinarrituz:
_Ikasketa espedientea: gehienez ere 10 puntu.
_Ikastaroetan, biltzarretan, jardunaldietan, sinposiumetan, mintegietan eta antzekoetan parte hartu izana: gehienez ere 5 puntu.
_Argitalpenak, hitzaldiak, lankidetza bekak, ikerkuntzarako bekak, etab.: gehienez ere 5 puntu.
Azken bi ataletan aipatutako ikasketa edo ikastaroak, argitalpenak, bekak, etab., historiaz, arkeologiaz, artearen historiaz, bibliotekonomiaz, dokumentazioaz, pedagogiaz, museologiaz edo zaharberritzeaz direnean soilik baloratuko dira, horiexek baitira Nafarroako Museoan aplikatzen diren arloak.
6.2. Prestakuntza beken banaketa Vianako Printzea Erakundea-Kultura eta Turismo Departamentuko kontseilariak onetsiko du, foru agindu bidez.
6.3. Onuradun bakoitzari ofizialki jakinaraziko zaio prestakuntzarako beka eman zaiola eta, jardunean hasi aurretik, interesatuak idatziz adierazi beharko du onartzen duela.
7._Eskaera egiteko eta eskatutako baldintzak frogatzeko epeak.
Prestakuntza bekak deialdi hau Nafarroako ALDIZKARI OFIZIALean argitara eman eta ondoko hamabost egun naturaleko epean eskatu ahal dira.
8._Ebaluazio Batzordearen osaera.
Vianako Printzea Erakundea-Kultura eta Turismo Departamentuko kontseilariak izendatu beharreko ebaluazio batzordea kide hauek osatuko dute: Batzordeburua, Carmen Valdés Sagüés andrea, Kultura Zuzendaritza Nagusiko Museoen Zerbitzuko zuzendaria. Batzordekideak: Miguel Angel Hurtado Alfaro jauna, Nafarroako Museoaren Ataleko burua; Francisco Javier Zubiaur Carreño jauna, Museoetako goi mailako teknikaria, Nafarroako Museoaren Atalari atxikia, eta Ana Elena Redín Armañanzas andrea, goi mailako teknikaria, Nafarroako Museoaren Atalari atxikia.
9._Ebazpena jakinarazteko modua eta epea.
9.1. Bekadunak hautatzeko prozeduraren ebazpena interesatuei jakinaraziko zaie administrazio prozedura erkideari buruzko legerian ezarritako moduan, eta jendaurrean jarriko da Nafarroako Museoko eta Vianako Printzea Erakundea-Kultura eta Turismo Departamentuko iragarki oholetan.
9.2. Prozedura ebazteko hiru hilabeteko epea bukatzen baldin bada berariazko ebazpena jakinarazi edo argitaratu gabe, eskabidea administrazioaren isiltasunaren bidez ezetsi dela ondorioztatu ahalko da.
10._Prestakuntza jarduerak zein unitate administratiboren zuzendaritzapean eginen diren eta zein loketan, eta prestakuntza jarduera horien nondik-norakoak.
10.1. Prestakuntza praktikak Vianako Printzea Erakundea-Kultura eta Turismo Departamentuko Kultura Zuzendaritza Nagusiko Museoen Zerbitzuari atxikita egonen dira, eta Nafarroako Museoan bertan eginen dira (Iruñeko Santo Domingo kaleko 47an).
10.2. Bekadunak, praktikaldiak iraun bitartean, arlo hauetako bati atxikiko zaizkio:
_Nafarroako Museoko fondoen kontserbazio eta erakusketako arloa.
_Nafarroako Museoko jarduera artistiko eta kulturalen arloa.
_Nafarroako Museoko didaktikaren arloa.
_Museoen Zerbitzuko Zuzendaritza.
10.3. Eskatutako titulazioa edo goragokoa duen tutore batek zuzendu eta gainbegiratuko du bekadunen jarduera. Tutore hori Museoen Zerbitzuak izendatuko du bertan ari diren funtzionarioen artetik.
10.4. Tutoreak egin beharreko lanak aginduko ditu, programatu eta bekadunek beren eginbehar orokor eta berariazkoak betetzen dituzten begiratuko du.
11._Prestakuntzako praktiken hasiera eta iraupena. Prestakuntza bekari uko egitea.
11.1. Prestakuntza beka jasotzen duenak Nafarroako Museoen Zerbitzuko Zuzendaritzak adierazten duen egunean hasi beharko du jardunean. Horrela egiten ez badu, onuradunak bekari behin betikoz uko egiten diola ulertuko da, non eta organo eskudunak ezinbesteko arrazoiak edo behar bezala justifikatutako beste edozein gorabehera ikusten ez dituen.
11.2. Bekadunak hogeita hamar orduko jardunaldia izanen du astean, lanegun oro 8:00etatik 14:00ak arte.
11.3. Bekadunak, jardunean hasten denean, eta Nafarroako Ogasun Publikoko zergaduna bada, ziurtagiri bat aurkeztu beharko du zerga betebeharrak egunean dituela egiaztatzeko, bai eta zinpeko aitorpen edo promesa, helburu bererako bestelako departamentu, administrazio edo erakunde publiko nahiz pribatuen laguntza publiko bateraezinik ez dela jasotzen ari frogatzeko.
11.4. Edozein arrazoi dela-eta, onetsitako bekari uko egiten bazaio, Nafarroako Gobernuko Kultura Zuzendaritza Nagusiko Museoen Zerbitzuari jakinarazi behar zaio, idatziz.
11.5. Horrelako kasuetan, organo eskudunak hala erabakita, Ebaluazio Batzordeak prestaturiko puntuazioaren araberako zerrendan hurrengo denari deituko zaio, bekaldia bukatu bitartean jardun dezan. Bigarren onuradun hori bekaduntzat hartuko da ondorio guztietarako, deusetan galarazi gabe lehenengo bekadunak uko egin arte zituen betebeharrak.
12._Bekadunaren berariazko betebeharrak, eskubideak eta administrazioaren aurrean duen erantzukizuna.
12.1. Honako hauek dira bekadunak prestakuntzaldian dituen betebehar orokorrak:
a) Beka emateko arrazoitzat jo den prestakuntza jarduera egitea eta hori frogatzea. Prestakuntzaren administrazio unitate arduradunak lan eta txostenak aurkezteko eskatu ahalko du, bekadunaren errendimenduaren jarraipena eta ebaluazioa egiteko.
b) Beka emateko betebehar eta baldintzak betetzea.
c) Eskumena duten organoek eman den bekaren inguruan egin ditzaketen egiaztapen lan guztiak onartzea.
d) Xede berarekin eskatu edo jaso diren bestelako beka edo dirulaguntzen berri ematea beka eman duen organoari.
e) Nafarroako Ogasun Publikoarekiko beharkizunen ordainketan egunean dagoela frogatzea.
f) Museoen Zerbitzuari jakinaraztea harturiko bekari espresuki uko egiten diola, jarduna utzi baino hamabost egun natural lehenago gutxienez.
g) Beka dela-eta eginiko jardueraren zuzeneko ondorioa den edozein argitalpenetan bekaduna dela adieraztea.
h) Zein erakundetan jarduten duen, bertako barne edo funtzionamendu araubidea betetzea.
i) Prestakuntzaldia bukaturik, gehienez ere hilabeteko epean, eginiko lanen memoria igorri beharko du Museoen Zerbitzura, baita lorturiko ezagutza teknikoari buruzko balorazioa ere.
12.2. Bekadunen eskubideak:
a) Bekadunek, prestakuntza egiten ari direneko administrazio publikoarekin duten harreman juridikoa ezertan aldatu gabe, eskubidea izanen dute zerbitzu eta bidaien arabera izaten dituzten gastuengatik funtzionarioei dagozkien ordain berberak jasotzeko.
b) Orobat, bekadunek administrazio publikoaren kalte-ordaina jasotzeko eskubidea izanen dute, zerbitzu publikoen funtzionamenduaren ondorioz kalteak edo lesioak dituztenean, ezinbesteko kasuetan izan ezik. Administrazioaren ondare erantzukizuna administrazio bidetik eskatuko da.
c) Bekadunarekin harremana duen administrazio publikoa izanen da prestakuntza jardueretan bekadunak hirugarrenei sortzen dizkien kalteen erantzulea, baina administrazio horrek zilegi izanen du dolo, erru edo zabarkeria larriagatik bekadunari dagokiokeen erantzukizuna eskatzea.
Horretarako, beharrezkoa baldin bada, arlo horretako eskumenak dituen kontseilariak edo organoak aseguru poliza bat sinatuko du, Nafarroako Foru Komunitateko Administrazioko eta haren erakunde autonomoetako prestakuntzako bekadun guztiek tratamendu juridiko bera izan dezaten.
c) Asistentzia eta aprobetxamenduaren ziurtagiria jasotzeko eskubidea izanen dute, Musoen Zerbitzuan egindako prestakuntzaldian jasotako jakintza eta ezagutzaren araberakoa. Vianako Printzea Erakundea-Kultura eta Turismo Departamentuko Idazkaritza Teknikoak eginen du ziurtagiri hori.
13._Bateraezintasunak.
Prestakuntza beka jasotzeak bateraezintasun hauek izanen ditu:
a) Bekako prestakuntza jardueran aritzea galaraz diezaiokeen ezgaitasun fisikoa edo bestelako gaixotasunen bat izatea.
b) Museo, Liburutegi eta Agiritegietan lanbide praktikak egiteko Nafarroako Gobernuak emandako bekez inoiz baliatu direnek ezin dituzte beka hauek eskatu.
c) Onuraduna prestakuntzarako jarduera bat egiteko beste beka edo dirulaguntza bateragarri bat jasotzen ari denean, guztira jasotako zenbatekoa ezin izanen da 13.000 eurotik gorakoa izan, dela bakarka dela administrazio beraren, beste administrazio publiko baten, beste erakunde publiko edo pribatu baten edo Espainiako nahiz atzerriko partikular baten beste beka edo dirulaguntzekin baturik.
Prestakuntza beka emateko kontuan hartu diren baldintzak ezertan aldatzen badira eta betiere aldi berean hauekin ezin bateratu den beste dirulaguntzarik eskuratzen bada, deuseztatu edo aldatu eginen da kontzesiorako ebazpena.
14._Ez-betetzeak.
Bekadunak bere gain hartutako betebehar eta eginkizunak betetzen ez baditu, haiek egiten ardurarik jartzen ez badu, errendimendu eta aprobetxamendu eskasa badu edo lanak kalitate gabekoak badira, beka aldi bateko edo betiko kentzea erabakiko du organo eskudunak, dagokion administrazio unitateak proposaturik eta interesatuari entzunaldia eman ondoren; horrekin batera dotazio ekonomikoaren zati proportzionala ere galduko du, eska daitezkeen itzuleren, berandutza interesen eta ezar litezkeen zehapenen kalterik gabe, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Foru Legeari jarraikiz.
15._Deialdiko oinarrien kontra jar daitezkeen administrazio errekurtsoak.
15.1. Aurkeztutako eskaeraren berariazko edo ustezko ezespenaren aurka zilegi izanen da gora jotzeko errekurtsoa jartzea, Nafarroako Gobernuari zuzendua, administrazio prozedura erkideari buruzko legeriari jarraikiz.
15.2. Oinarri hauetan ezarrita ez dagoen orotan, Nafarroako Foru Komunitateko Administrazioaren eta haren erakunde autonomoen prestakuntzarako bekak emateko araubide orokorra ezartzen duen apirilaren 19ko 172/2004 Foru Dekretuan xedatutakoa aplikatuko da (2004ko 57. Nafarroako ALDIZKARI OFIZIALa, maiatzaren 12koa).
16._Behar diren aurrekontu-kredituak.
Museoen Zerbitzurako lau prestakuntza beka emateak guztira sortuko duen 35.100 euroko gastutik 26.325 euro Nafarroako Gobernuak 2006ko aurrekontuetan ezartzen duen "Bekadunak" izeneko A20003 A2300 4800 333100 kontusailaren kargura ordaindu ahalko dira, eta gainerakoa, 8.775 euro, 2007ko izen bereko kontusailaren kargura, kontzeptu berarekin.
Iragarkiaren kodea: F0603935
