27. ALDIZKARIA - 2006ko martxoaren 3a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

313/2006 EBAZPENA, otsailaren 15ekoa, Industria eta Merkataritza zuzendari nagusiak emana, Nafarroako Kontsumitzaileen eta Erabiltzaileen elkarteei dirulaguntzak emateko 2006ko deialdia onesten duena.

Espainiako Konstituzioaren 51. artikuluak ezartzen du botere publikoek kontsumitzaile eta erabiltzaileen defentsa bermatuko dutela, haien segurtasuna, osasuna eta legezko interes ekonomikoak prozedura eragingarrien bidez babestuz, eta, halaber, kontsumitzaileen eta erabiltzaileen informazioa eta heziketa bultzatu eta haiek sortzen dituzten elkarteak lagundu eta entzun eginen dituztela dagozkien gaien inguruan, legeek ezartzen duten neurrian.

Kontsumitzaileen eta Erabiltzaileen Defentsarako uztailaren 19ko 26/1984 Lege Orokorraren arabera, kontsumitzaile eta erabiltzaileen elkarteak kolektibo horien interesak babesteko baliabideak dira, eta bertan aipatzen da laguntza eta dirulaguntzak jasotzen ahal dituztela.

Halaber, Dirulaguntzei buruzko azaroaren 9ko 11/2005 Foru Legeak Nafarroako Aurrekontu Orokorren kontura ematen diren dirulaguntzen araubide juridikoa ezarri zuen.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz.

EBATZI DUT:

1. Nafarroako kontsumitzaile eta erabiltzaileen elkarteei dirulaguntzak emateko 2006ko deialdia onestea.

2. Deialdiko arauak onestea. Arau horiek ebazpen honen eranskinean azaltzen dira.

3. Ebazpen honen ondoriozko konpromisoei aurre egiteko 134.800 euroko gastua onestea, 2006ko gastuen aurrekontuetako 860001 81510 4819 492300 kontusailaren kargura.

4. Ebazpen hau eta dagokion eranskina Nafarroako ALDIZKARI OFIZIALean argitaratzea.

Ebazpen honen aurka gora jotzeko errekurtsoa jar daiteke, Industria eta Teknologia, Merkataritza eta Lan kontseilariari zuzendua, argitaratu eta biharamunetik hilabeteko epean.

Iruñean, 2006ko otsailaren 15ean._Industria eta Merkataritza zuzendari nagusia, Enrique Díaz Moreno.

NAFARROAKO KONTSUMITZAILE ETA ERABILTZAILEEN ELKARTEEI DIRULAGUNTZAK EMATEKO 2006KO DEIALDIKO ARAUAK

1. araua. Xedea.

Dirulaguntza hauen xedea da kontsumitzaile eta erabiltzaileen elkarteek kontsumitzaile eta erabiltzaileak babesteko egiten duten jarduera bultzatzea 2006. urtean.

2. araua. Dirulaguntza har dezaketen jarduerak eta diru-zenbatekoa.

1. Dirulaguntza har dezaketen jarduerak eta dagozkien diru-zenbatekoak hauek dira:

1.1. Elkartearen eginkizunak betetzeko behar diren funtzionamendu-gastuak: bulegoetako mantentze-lanak, posta zerbitzua, telekomunikazioak, bulegoko materiala, web-gunea prestatu edo mantentzeko gastuak, informatikako material suntsigarria. Elkarteak kontsumitzaileei argibideak emateko udal bulego baten ardura esleitua baldin badu, haren gastuak deialdi honen kanpoan geldituko dira, bai eta erakundeei ematen dizkien zerbitzu ordainduak ere.

Gastu horietatik 100eko 80 ordainduko da gehienez.

1.2. Elkarteko langileen eta haien joan-etorrien gastuak. Elkarteko langileen gastua bi zatitan aurkeztuko da: alde batetik, elkartean berean ematen dituzten orduak eta, bestetik, elkarteak kudeatzen duen kontsumitzaileei argibideak emateko udal bulego batean ematen dituztenak. Joan-etorrien gastuei dagozkien diru kopuruak ezin izanen dira kontzeptu horretarako Nafarroako Gobernuak bere langileentzat ezarritako ordainsariak baino handiagoak izan.

Gastu horietatik 100eko 80 ordainduko da, gehienez.

1.3. Laguntza juridikoaren gastuetatik 100eko 80 ordainduko da, gehienez ere.

1.4. Erakunde, topagune eta abarretan kontsumitzaile eta erabiltzaileen izenean parte hartzeko gastuetatik 100eko 80 ordainduko da, gehienez ere.

1.5. Kontsumitzaile eta erabiltzaileen defentsarako burututako berariazko jarduketek sortu duten defizita. Horrelakotzat hartuko dira ondoko hauek bakarrik:

1.5.1. Eduki nagusia kontsumo arloa duten aldizkari, liburuxka eta argitalpenen edizioa.

1.5.2. Kontsumitzaile eta erabiltzaileak informatu eta prestatzeko jardunaldi, ikastaro, mintzaldi edo beste edozein jarduera antolatzea. Hedabideen bidez burutzen diren jarduera guztiak ere sartuko dira.

1.5.3. Kontsumo gaiei buruzko azterlan berariazkoak egitea, gero argitaratzen badira edo zabalkunde irekia ematen bazaie.

Jarduerak sortzen dituen dirusarreren eta hura egiteko izandako kanpoko gastu behar bezala justifikatuen arteko aldea defizit lagungarritzat joko da.

Sorturiko defizitaren 100eko 100 finantzatuko da.

2. Lehenbiziko lau kontzeptuetan, elkarteak bere funtsekin berdindu beharko du falta den dirua eta hori behar bezala justifikatuko du, diru-zenbatekoa, jatorria eta jardueretan nola aplikatu den azalduz.

3. Dirulaguntza, lehenbizi, berariazko jarduketetarako aplikatuko da, gero funtzionamendu gastuetarako, langileen gastuetarako, laguntza juridikoaren gastuetarako eta, azkenik, topagune eta erakundeetan parte hartzekoetarkao, aipatutako mugekin betiere.

3. araua. Onuradun izateko baldintzak.

1. Kontsumitzaileen eta erabiltzaileen elkarteek Dirulaguntzei buruzko Foru Legearen 13. artikuluan ezarritako baldintza orokorrak bete beharko dituzte.

2. Horiez gainera, elkarteek ondoko baldintza berariazko hauek ere bete beharko dituzte:

a) Legearen arabera eratuak eta kontsumitzaile eta erabiltzaileen elkarteen erregistroan inskribaturik egotea.

b) Helbide soziala Nafarroan izatea.

c) Jarduera nagusia Nafarroako kontsumitzaile eta erabiltzaileen defentsa izatea.

d) Kontsumoari buruzko aholkularitza juridikoa emateko behar bezalako gaitasuna duen pertsona bat izatea gutxienez.

e) 2005. urtean gutxienez 100 bazkide izatea, kuotak ordainduta dituztenak.

f) Jendea hartzeko bulego bat izatea, astean gutxienez 30 orduz irekita.

g) Irabazi asmorik ez izatea, eta bazkideen artean irabazi asmoa duen pertsona juridikorik ez izatea.

h) Kontsumitzaile eta erabiltzaileei ondasun edo zerbitzuak ematen dizkieten enpresen laguntza edo dirulaguntzarik ez jasotzea, ez zuzenean, ez zeharka.

i) Ondasun, produktu edo zerbitzuen merkataritzako publizitaterik ez egitea.

4. araua. Baldintzak frogatzeko modua eta noiz arte bete behar diren.

1. Dirulaguntzei buruzko Foru Legearen 13. artikuluko 2. eta 3. idatz-zatietan onuradun izateko adierazita dauden debekuetatik bat ere ez duela justifikatzeko, eskatzaileak erantzukizuneko aitorpena egin dezake, deusetan galarazi gabe Administrazioak aurkezten diren aitorpenak edo justifikazioak egiazkoak ote diren ikertzeko duen ahalmena.

2. Aurreko arauan adierazitako berariazko baldintzak egiaztatzeko, elkarteko idazkariaren edo, bestela, presidentearen ziurtagiria aurkeztu beharko da.

3. Balditza horiek 2006. urte osoan bete beharko dira.

5. araua. Eskaerak aurkezteko epea eta eskatzen den dokumentazioa.

1. Eskaera, elkarteko presidenteak sinatua, deialdi hau Nafarroako ALDIZKARI OFIZIALean argitaratu eta biharamunetik hasita 15 egun naturaleko epean aurkeztu beharko da, dela Industria eta Teknologia, Merkataritza eta Lan Departamentuaren Erregistroan (Tomás Caballero parkea, 1, Iruña), dela Herri Administrazioen Araubide Juridikoari eta Administrazio Publiko Erkideari buruzko Legearen 38.4 artikuluan ezarritako tokietan.

2. Dokumentazioa posta bulego batean aurkezten bada, gutunazal ireki batean egin beharko da, lehenengo orriko goiko aldean bulegoaren izena, eguna, tokia eta ordua (minutu eta guzti) adierazi ahal izateko. Datu horiek guztiak gordekinean ere azaldu beharko dira (abenduaren 3ko 1829/1999 Errege Dekretuaren 31. artikulua).

3. Eskaerarekin batera ondoko agiri hauek aurkeztu beharko dira:

a) Dirulaguntzei buruzko Foru Legearen 13. artikuluko 2. eta 3. idatz-zatietan onuradun izateko adierazita dauden debekuetatik bat ere ez duela adierazteko erantzukizuneko aitorpena.

b) Elkarteko idazkariaren ziurtagiria, edo, bestela, presidentearena, ondoko datu hauek azaltzen dituena:

_Zuzendaritza batzordeak laguntza eskatzeko hartutako erabakia.

_Deialdi honetako 3. arauan ezarritako baldintzak betetzen direla.

_Elkartearen liburu ofizialetan inskribaturik izanik, 2005eko abenduaren 31n kuota guztiak ordainduta dituzten bazkideen kopurua, zer kuota ordaindu behar duten eta 2005. urtean kuotengatik guztira jasotako dirua.

_Elkartearen bulegoen zerrenda, helbidea, jendearentzat irekirik egoteko asteko egun-orduak eta haien ardura duten pertsonen identifikazioa, baita hilero lanean ematen dituzten egun eta orduak ere.

_Elkartean lanean diharduten langileen izenen zerrenda, haien hilabeteko dedikazioa barne (ordu kopurua hilean).

_2006. urtean beste erakunde batzuetatik jasotako dirulaguntzak.

c) 2005ean egindako jarduerei buruzko txostena. Lehenbiziko atalean, "Jarduera orokorrak" izenarekin, beren bulegoetan jasotako eta tramitatutako kontsulta, erreklamazio eta salaketen kopurua azalduko dute, bai eta zein arbitraje elkartetan parte hartu duten, kontsumitzaileei argibideak emateko zenbat udal bulego dituzten esleiturik, zein erakunde eta topagunetan parte hartu duten eta bestelako jarduerak, hurrengo ataletan aipatzen ez direnak. Bigarren atalean, "Berariazko jarduerak" izenarekin, 2. arauko 1.5 idatz-zatian aurreikusitakoak aipatuko dira, haien edukia eta exekuzio maila (argitaratutako aleen kopurua, azterlanen zabalkundea, etab.) zehazturik.

d) 2005eko abenduaren 31ko egoera-balantzea eta urte bereko irabazi eta galeren kontua; horretan dirusarrerak honela zehaztuko dira: bazkideen kuotak, erakundeei emandako zerbitzuengatik jasotako dirua, Nafarroako Gobernuaren dirulaguntza eta bestelako dirulaguntza edo dohaintzak. Gastuak honela bereizita aurkeztuko dira: funtzionamendu gastuak (mantentze-lanetakoak, langileenak eta abar zehazturik), 2. arauko 1.5. idatz-zatian aurreikusitako jarduerek sortzen dituzten gastuak eta bestelakoak.

e) 2006ko aurrekontua, 2005. urteko irabazi eta galeren konturako eskatutako xehetasun berberak azaltzen dituena.

f) 2006an egin beharreko jardueren programa, 2005. urteko memoriarako eskatutako xehetasun berberak azaltzen dituena.

g) Laguntzak lehen aldiz eskatuz gero, elkartearen estatutuen kopia kautotua aurkeztuko da.

6. araua. Dirulaguntzak esleitzeko irizpideak.

Dirulaguntzak banatzeko erabiliko diren irizpide objektiboak hauexek dira:

1. Bazkideek 2005eko ekitaldian pagaturiko kuoten ondoriozko dirusarrerak: % 35.

2. 2005. urtean, elkarteak jendea hartzeko zenbat bulego izan dituen astean 30 ordu irekita: % 20. Jendea hartzeko ordutegia hortik beherakoa bada, kalkulu proportzionala eginen da.

3. 2005. urtean elkartearen bulegoetan edo batez ere elkartearentzat lan egin duten pertsonen kopurua eta haien titulazioa, lan egoera eta lanaldia: % 10. Langile bakoitzak kontsumitzaileei argibideak emateko udal bulegoetan hilean ematen dituen orduen kopurua adierazi beharko da, horiek ez baitira konputatuko.

4. 2. arauko 1.5. idatz-zatian aipatzen diren jardueren programa, aurreko urtean burutua: % 35.

7. araua. Ebazteko organo eskudunak eta epeak.

1. Kontsumo Zerbitzuko zuzendariak eskaerak baloratuko ditu 6. arauan ezarritako irizpideei jarraikiz.

Ebaluatu ondoren, laguntzak emateko proposamena Industria eta Merkataritza zuzendari nagusiari igorriko zaio. Proposamenean adieraziko da elkarte onuradunek dirulaguntza jasotzeko baldintza guztiak betetzen dituztela, bai, halaber, bakoitzari eman beharreko diru-kopurua eta diru hori lagungarri diren kontzeptuen arabera nola banatu den.

2. Dirulaguntzak emateari buruz ebazteko eskumena Industria eta Merkataritza zuzendari nagusiari dagokio. Ebazpena bi hilabeteko epean eman eta jakinarazi beharko du, eskaerak aurkezteko epea bukatzen denetik hasita.

Epe horretan ebazpen espresurik jakinarazten ez badu, eskaera ezetsi egin dela ulertuko da.

Aurkeztutako eskaeraren berariazko edo ustezko ezespenaren aurka zilegi izanen da gora jotzeko errekurtsoa jartzea, Industria eta Teknologia, Merkataritza eta Lan kontseilariari zuzendua, administrazio prozedura erkideari buruzko legeriari jarraikiz.

8. araua. Onuradunek bete beharrekoak eta ez betetzearen ondorioak.

1. Kontsumitzaileen eta erabiltzaileen elkarteek Dirulaguntzei buruzko Foru Legearen 9. artikuluan ezarritako baldintza orokorrak bete beharko dituzte.

Zerga arloko eta Gizarte Segurantzarekiko betebeharren ordainketan egunean dagoela egiaztatzeko, eskabidean berean baimena eman beharko zaio Industria eta Teknologia, Merkataritza eta Lan Departamentuari behar diren datuak kontsulta ditzan, laguntza emateko ebazpenaren proposamena egiten den unean onuraduna zerga arloko eta Gizarte Segurantzarekiko betebeharren ordainketan egunean ote dagoen egiaztatzeko.

2. Horrez gain, laguntza onartzen zaien kontsumitzaileen eta erabiltzaileen elkarteek betebehar hauek izanen dituzte:

_Zer helburutarako ematen den laguntza, hartarako erabiltzea.

_8. eta 9. artikuluetan aipatutako frogagiriak Kontsumo Zerbitzura igortzea, hiru hilabetetik behin.

_Kontsumitzaileei eta erabiltzaileei doako informazio orokor eta oinarrizkoa ematea beren eskubideez eta eskubide horiek defendatzeko moduaz.

_Industria eta Teknologia, Merkataritza eta Lan Departamentuarekin elkarlanean aritzea, kontsumitzaile eta erabiltzaileak babesteko jarduketak egiteko. Horri dagokionez, argitaratzen dituen argitalpen, esku-orri edo argibide guztien hiru ale gutxienez bidali beharko ditu aipatu departamentura.

_Emandako dirulaguntzen jarraipena eta kontrola behar bezala egiteko beharrezkotzat jotzen diren datuak, dokumentazioa eta frogagiriak bidaltzea departamentu horretara.

_Elkarte onuradunek behar bezala iragarri beharko dute laguntza jaso duten programek, jarduerek, inbertsioek edo jarduketek finantzazio publikoa izan dutela.

3. Arau hauetan edo Dirulaguntzei buruzko Foru Legean ezarritako betebeharrak urratuz gero, elkarteak onartutako dirulaguntza kobratzeko eskubidea galdu eta, kasua bada, dirua itzuli beharko du.

4. Deialdi hau, gainera, Dirulaguntzei buruzko Foru Legeko IV. tituluan ezarritako arau-hauste eta zehapenen araubidearen menpe dago.

9. araua. Gastuen justifikazioa eta ordainketa.

1. Hala gastuak nola ordainketak 2006. urtea bukatu aitzin egin behar dira.

2. Gastuen eta haiek ordaindu izanaren ziurtagiriek ondoko baldintza hauek bete beharko dituzte:

_Dirulaguntza zein kontzepturengatik eman zen, haien arabera taldekatuta aurkeztuko dira, bakoitzak bere zenbakia duela. Gainera, kontzeptu bakoitzeko agirien zerrenda bat erantsiko da, non azalduko baitira emandako zenbaki korrelatiboa, hornitzailea, agirian ageri den kontzeptua, diru-zenbatekoa eta ordainketaren eguna.

_Agiriak jatorrizkoak edo Administrazioak kautotutako kopiak izanen dira.

_Gastuak justifikatzeko, fakturak erabiliko dira, baldin eta legeak haiek ematera behartzen badu, baita haien ordain-agiriak ere, hala nola gordekinak eta bankuko letra eta karguak.

_Langileen gastuak justifikatzeko, nominak eta kotizazio orriak aurkeztuko dira.

_Fakturak edo nominak ez diren frogagirietan argi eta garbi azalduko da zer ordaintzen den, hartzailea nor den, IFZ edo IFK barne, dagozkien atxikimendu fiskalak eta, behar baldin bada, BEZa.

_Bidaiak justifikatzeko, garraioari, egonaldiari eta mantenuari dagozkien gordekin eta fakturak aurkeztuko dira.

10. araua. Dirulaguntza justifikatu eta ordaintzeko epeak.

1. Egiaztagiriak aurkezteko eta dirulaguntza ordaintzeko, irizpide hauek hartuko dira kontuan:

_Laguntza ematearekin batera, dirulaguntzaren 100eko 25 ordainduko da, aurrerakin gisa.

_Apiril, uztail eta urriaren lehenbiziko 15 egunetan, aurreko hiruhilekoan egindako jardueren ziurtagiriak aurkeztuko dira eta horiek egiaztatu ondoren dagokiona ordainduko da, dirulaguntza osoaren % 25 gehienez.

_Azkeneko ordainketa egiteko, laugarren hiruhilekoan egindako gastuen egiaztagiriak 2006ko abenduaren 18a baino lehen aurkeztu beharko dira.

2. Aurreko hiruhilekoetan gastu gehiegi justifikatuz gero, horiek aintzat hartuko dira emandako aurrerakina erregularizatzeko. Laugarren hiruhilekoan justifikatzen diren gastuak ez badira aurrerakina berdintzeko adinakoak, hau da laguntza osoaren % 25 adinakoak, jasotako soberako dirua itzuli beharko da.

3. Justifikatutako arrazoiak direla-eta, Kontsumo Zerbitzuan eskatu ondoren betiere, kontzeptu batengatik jasotako diru guztia edo zati bat kontzesioko ebazpenean ageri den beste baterako erabiltzen ahalko da, baldin eta laguntza handitu nahi zaion kontzeptuari emandako gehieneko zenbatekoaren 100eko 50 gainditzen ez bada.

Nolanahi ere, ezin izanen da inola ere 2. arauko 1.5. idatz-zatian aurreikusitako berariazko jarduerei dagokien diru-zenbatekoa desbideratu.

11. araua. Laguntzen bateragarritasuna.

Deialdi honetako dirulaguntzak bateragarriak dira xede berarekin beste edozein erakundek ematen dituen bestelako dirulaguntzekin.

Dena dela, bestelako dirulaguntzak jaso ondoren 2. arauan ezarritako gehieneko portzentajeak gainditzen badira, soberakina Nafarroako Foru Komunitateko Administrazioari itzuli beharko zaio.

12. araua. Gora jotzeko errekurtsoa.

Arau hauen aurka gora jotzeko errekurtsoa jar daiteke, Industria eta Teknologia, Merkataritza eta Lan kontseilariari zuzendua, argitaratu eta biharamunetik hilabeteko epean.

13. araua. Emandako dirulaguntzen publizitatea.

Dirulaguntzei buruzko Foru Legearen 15. artikuluan xedatutakoarekin bat, Kontsumo Zerbitzuak Industria eta Teknologia, Merkataritza eta Lan Departamentuaren webgunean jendaurrean jarriko ditu emandako dirulaguntzak, ondokoak zehaztuta: deialdia, laguntza zein programa eta aurrekontu-kredituri egotziko zaion, onuradunak, emandako diru-kopurua eta dirulaguntzaren helburua.

Iruñean, 2006ko otsailaren 15ean._Industria eta Merkataritza zuzendari nagusia, Enrique Díaz Moreno.

Iragarkiaren kodea: F0602910