27. ALDIZKARIA - 2006ko martxoaren 3a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

41/2006 FORU AGINDUA, otsailaren 10ekoa, Nekazaritza, Abeltzaintza eta Elikadura kontseilariak emana, 2006rako ordainketa bakarreko erregimenean sartzeko eskabide bakarra onesten duena ondokoetarako: ordainketa bakarrerako eskaera, nekazaritzako zenbait produkturi azaleragatik ordaindu beharrekoak, abeltzaintzako primak, eskualde behartsuen kalte-ordainak eta nekazaritza eta ingurumen arloetako 2006ko kanpainako laguntzak.

Abenduaren 30eko 1618/2005 Errege Dekretuak, ordainketa bakarraren erregimenaren eta nekazaritza eta abeltzaintzari zuzenean laguntzeko bestelako erregimenen gainekoak, Estatuaren araudi oinarrizkoa ezartzen du, Kontseiluaren irailaren 29ko (EK) 1782/2003 Erregelamenduan ezarritako laguntzei aplikagarri zaiona; bertan ezartzen dira Europar Batasunaren Nekazaritza-politikaren esparruan apligakarri diren zuzeneko laguntzen araubideetako xedapen komunak eta zenbait laguntza-araubide abiarazten dira; horrez gain aldatzen dira (EEE) 2019/93, (EE) 1452/2001, (EE) 1453/2001, (EE) 1454/2001, (EE) 1868/94, (EE) 1251/99, (EE) 1254/99, (EE) 1673/2000, (EEE) 2358/1971 eta (EE) 2529/2001 Erregelamenduak. Ordainketa bakarreko erregimena 2006tik aurrera aplikatuko da.

Kanpaina honetako eskabide bakarrean, nekazariek ordainketa bakarreko erregimenean onartuak izateko eskatzen ahalko dute. Horretarako kontuan hartuko dira apirilaren 15eko APA/1171/2005 Agindua, ordainketa bakarraren erregimena aplikatzearen xedez nekazarien behin-behineko datuak eta identifikazioa eguneratzeari buruzkoa, bai eta abenduaren 30eko 1617/2005 Errege Dekretua ere, haren bidez arautzen baita nekazariei ordainketa bakarreko eskubideak ematea. Erregimen hori ezartzen da Kontseiluaren 2003ko irailaren 29ko (EE) 1782/2003 Erregelamenduan eta apirilaren 21eko 795/2004 Erregelamenduan, xedapen aplikagarriak garatzen baititu.

(EE) 1782/2003 Erregelamenduaren 29. artikuluan, baldintza artifizialen sorrera dela-eta ezarritako ordainketa murrizteko klausula garatu behar da. Klausula hori, Estatu mailan, 1617/2005 Errege Dekretuaren 7. artikuluan ere islatu da. Bestelako egoeratan aplikatzea galarazi gabe, arautu behar dira, bereziki, titularrek eskubideak jaso badituzte soilik nekazaritzako jardueren ondoriozko laguntzetatik, eta baldin eta eskubide horiek erabili nahi badituzte orain arte ustiapeneko nekazaritza jardueraren parte izan ez diren eta orain ere ez diren lurretan, esate baterako, larre iraunkorretan.

Abenduaren 30eko 1618/2005 Errege Dekretuak, ordainketa bakarraren erregimenaren eta nekazaritza eta abeltzaintzari zuzenean laguntzeko bestelako erregimenen gainekoak, bere 23. artikuluan, baimena eman die Autonomia Erkidegoei ustiapenen arabera lugorri indize diferenteak aplikatzeko. Nafarroako lehorreko lurren oinarrizko azalera ez gainditzea oinarri hartuta, komenigarria litzateke aukera hori ondokoetan aplikatzea haien jarduerari laguntzeari begira: eskualde behartsuetan egoteagatik zailtasun bereziak dituzten ustiapenak; ingurumenarekiko errespetu berezia duten ustiapenak, batez ere nekazaritza ekologikoa; eta aurreko kanpainetan beren eskualdeko ohiko lugorriaren indizea baino lur azalera handiagoa landu dutela frogatzen duten ustiapenak.

Azaleraren araberako laguntzei, elkartuei zein berariazkoei, dagokienez, kontuan hartu behar da Batzordearen urriaren 29ko (EE) 1973/2004 Erregelamendua, haren bidez ezarri baitziren Kontseiluaren (EK) 1782/2003 Erregelamendua aplikatzeko xedapenak.

Olibadietako azalerengatik ematen den laguntza dela-eta, laguntza hori presaka aplikatu behar izan baita, eta hobeki aztertuko delakoan, Nafarroako Foru Komunitateko olibadi guztiak kategoria bakar batean sartzea erabaki da.

Laguntza horiei guztiei aplikatuko zaizkie (EE) 1782/03 Erregelamenduko eta Batzordearen apirilaren 21eko (EE) 796/2004 Erregelamenduko xedapenak, baldintzei, modulazioa eta kudeaketari eta kontrol sistema integratuari buruzkoak; azken erregelamendu horren bidez Europar Batasunaren nekazaritza-politikaren alorrean laguntza zuzeneko araubideei aplikagarri zaizkien xedapen komunak ezarri eta nekazarientzako laguntza-araubide batzuk sortu ziren. Bi erregelamendu horietatik sortutako bai Espainiako bai Nafarroako araudia ere aplikatuko zaie. Baldintzei dagokienez, kontuan hartu behar da Europar Batasunaren Nekazaritzarako politikaren zuzeneko laguntzen baldintzak betetzeko abenduaren 23ko 2352/2004 Errege Dekretua, bai eta Nafarroako Foru Komunitateko berariazko araudia ere.

Kontseiluaren maiatzaren 17ko 1257/1999 Erregelamenduak, zeinak arautzen baitu zer laguntza emanen diren Nekazaritza Bideratu eta Bermatzeko Europako Funtsa-FEOGAtik eta zenbait erregelamendu indargabetzen eta aldatzen, araubide bat ezartzen du eskualde behar- tsuei eta ingurumen aldetik mugak dituzten horiei Europar Batasunaren laguntzak emateko eta nekazaritza eta ingurumena zaintzeko zenbait neurri bultzatzeko, aipatu Funtsaren Berme Atalarekin batera finantzaturik. Nafarroako Nekazaritza Garatzeko 2000-2006 Programan ere aurreikusiak daude neurri horiek (2000ko irailaren 14an Batzordearen Erabakiz onetsia baita, C(2000) 2660 zenbakia duela). Programa hori Batzordeak C(2004) 4587 Erabakiaren bidez aldatu aldatu zuen azkenekoz, 2004ko azaroaren 19an.

Abenduaren 29ko 721/2003 Foru Dekretuak Nafarroako eskualde behartsuetako kalte-ordain konpentsatzaileak eman, kudeatu eta kontrolatzeko araubide orokorra arautzen du.

Nekazaritza, abeltzaintza eta herrien garapenaren arloko laguntza hauek Nafarroako Foru Komunitatean 2006ko ekitaldian aplikatu ahal izateko beharrezkoa da alderdi batzuk garatzea laguntzak eskatu, izapidatu, ebatzi, ordaindu eta kontrolatzeko.

Horrenbestez, Nafarroako Gobernuari eta lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskumenak erabiliz,

AGINDU DUT:

I. KAPITULUA

Xedapen orokorrak

1. artikulua. Helburua eta aplikazio eremua.

Foru agindu honek xede du Nafarroako Foru Komunitateko lurralde eremuan ondokoen aplikaziorako xedapenak ezartzea: ordainketa bakarra, ordainketa bananduak eta berariazkoak, abeltzaintzarako laguntzak, ekoizpen integraturako laguntzak, nekazaritza ekologikorako laguntzak, Nafarroako eskualde behartsuetako kalte-ordainak eta nekazaritzarako ingurumen neurriak.

2. artikulua. Ordainketa bakarra.

Ordainketa bakarra dela-eta honako alderdi hauek arautu dira:

a) Ordainketa bakarreko erregimenean onartua izateko eskaera.

b) Erreserba Nazionaleko eskubideetarako eskaera.

c) Laguntza eskubideak berreskuratzeko eskaera.

d) 2006an ordainketa bakarreko laguntza jasotzeko eskaera.

3. artikulua. Alorretarako ordainketa elkartuak eta berariazkoak.

(EE) 1782/2003 Erregelamenduan ezarritako laboreentzako ordainketa elkartuei eta berariazkoei dagokienez, ondokoa arautu da:

a) Belarki-labore jakin batzuen ekoizleei lur azaleraren arabera egin beharreko ordainketak. Labore horiek IX. eranskinean zerrendatu eta 10. kapituluan ezarritakoak dira.

b) Arroz-ekoizleei hektareako emateko laguntza berariazkoa, 3. kapituluan ezarria.

c) Gari gogorraren kalitateari, proteaginosoei eta labore energetikoei hektareako emateko laguntza berariazkoak, 1., 2., eta 5., kapituluetan hurrenez hurren ezarriak.

d) Fruitu oskoldunei emateko laguntza, azaleraren araberakoa, 4. kapituluan ezarria.

e) Hazi-ekoizpenerako laguntza, 9. kapituluan ezarria.

f) Olibadietarako laguntza, 10 ter kapituluan ezarria.

g) Tabakorako laguntza, 10 ter kapituluan ezarria.

h) Tabakorako laguntza osagarria, 69. artikuluaren aplikazioaren ondorioz.

4. artikulua. Abeltzaintzarako laguntzak.

(EE) 1782/2003 Erregelamenduan ezarritako abeltzaintzarako ordainketa elkartuei eta berariazkoei dagokienez, ondokoak hartu dira aintzat:

a) Behi ume-hazleak dituzten ekoizleentzako prima, 125. artikuluan ezarria.

b) Abereak hiltzeko prima, 130. artikuluan ezarria.

c) Ardi eta ahuntz aziendaren ekoizleentzako prima, 113. artikuluan ezarria.

d) Ardi eta ahuntz bakoitzeko prima osagarria, 114. artikuluan ezarria.

e) Bazkatokiaren justifikazioa, azienda-dentsitatearen faktorea neurtzeko, behi ume-hazleak dituzten ustiapenei ordainketa osagarria egiteari begira.

f) Kontseiluaren 2003ko irailaren 29ko (EE) 1782/2003 Erregelamenduaren 69. artikulua aplikatzearen ondorioz, Europar Batasunaren Nekazaritza Politika garatzeko Espainiako Programa Nazionalari behi aziendaren sektorean egin beharreko ordainketak:

_Behi ume-hazleak dituzten ustiapenentzako ordainketa osagarriak. Haien helburua da behi ume-hazleak dituzten nekazariei osagarri bat ordaintzea, ingurumenari begira onuragarriak diren abeltzaintzako jarduerak sustatzearren.

_Ofizialki aitortutako kalitateko behikiaren ekoizpenerako ordainketa osagarria.

_Ordainketa osagarria esnearen sektorean. Haren helburua da esnetarako behi aziendaren ustiapenak dituzten nekazariei zerbait ordaintzea, esne gordinaren kalitatea hobetzearren.

5. artikulua. Nekazaritza garatzeko laguntzak.

Foru agindu honek baldintzak ezarri ditu ondoko laguntzetarako eskaerak aurkezteko: Kontseiluaren (EK) 1257/1999 Erregelamenduan aipatzen direnak eta Nafarroako Nekazaritza Garatzeko 2002/2006 Programan sartuak.

a) Ekoizpen integratua sustatzeko laguntzen urteko ordainketa.

b) Nekazaritza ekologikorako laguntzen urteko ordainketa.

c) Nafarroako eskualde behartsuetako kalte-ordain konpentsatzaileak eman eta pagatzea, Nafarroako eskualde behartsuetarako konpentsazioko kalteordainak eman, kudeatu eta kontrolatzeko araubide orokorra arautzeari buruzko abenduaren 29ko 721/2003 Foru Dekretuan ezarri bezala.

d) Abeltzaintza ekologikorako nekazaritzako ingurumen arloko laguntzak, Nekazaritza, Abeltzaintza eta Elikadura kontseilariaren 2002ko azaroaren 11ko Foru Aginduan ezarriak.

e) Desagertzeko zorian dauden hemengo arrazak babestu eta sustatzeko laguntzak, Nekazaritza, Abeltzaintza eta Elikadura kontseilariak apirilaren 26an emandako 63/2004 Foru Aginduaren bidez aldatutako kontseilari beraren 2000ko irailaren 11ko Foru Aginduan bilduak.

f) Nekazaritza eta ingurumen arloetako laguntzen urteko ordainketa. Laguntza horiek Ingurumen, Lurraldearen Antolamendu eta Etxebizitza Departamentuko kontseilariaren azaroaren 6ko 1526/2003 Foru Aginduan jaso dira.

6. artikulua. Definizioak.

Foru agindu honen ondorioetarako, Europar Batasuneko arautegian eta Espainiako oinarrizko arautegian diren definizioez gain, ondoko hauek erabiliko dira:

1. "Ustiapenaren titularraren errenta osoa": 2004ko ekitaldiko Pertsona Fisikoen Errentaren gaineko Zergaren aitorpeneko zerga-oinarriaren zati orokorra. Aurrekoa gorabehera, ustiapenaren titularraren errenta osoa ebaluatzeko, zilegi izanen da azken bost urteetako hirutan Pertsona Fisikoen Errentaren gaineko Zergaren aitorpenen zerga-oinarriaren zati orokorraren batez bestekoa hartzea. Azken ekitaldia ere sartuko da bost urteko talde horretan.

2. "Zuhaixka-larrea": zuhaixka eta sasiak dituen lurra, azaleraren % 20 baino gehiago hartzen dutena, gutxienez ere azaleraren % 50 larrerako baldin bada. NELIGSen katalogoan zuhaixka-larrea izena jasoko du. Aprobetxamendua zuzenean bakarrik erabiliko dute abereek zenbait urtez. Kalte-ordain konpentsatzaileak eta dentsitatea kalkulatzeko, zuhaixka-larretzat jotzen den azaleraren erdia larretzat hartuko da.

3. "Zuhaitz-larrea": oihan eta bazka aprobetxamenduko azalera, abereentzako irekia, zuhaixkarik gabeko lurrarekin, abereak bertan bazkatzeko erabili izan baldin bada. NELIGSen katalogoan zuhaitz-larrea izena jasoko du. Abereek bakarrik zuzenean aprobetxatzen dute. Kalte-ordainak eta dentsitatea kalkulatzeko zuhaitz-larretzat jotzen den azaleraren % 25 larretzat hartuko da. Udalek edo beste edozein erakunde eskudunek eragozpenak dituztenenan sartzeko edo erabiltzeko zuhaitz azalerak ez dira aintzakotzat hartuko, ez eta aprobetxamendu hori Antolamendu Proiektuetan, Kudeaketarako Plan Teknikoetan edo horien aldaketetan xedatzen denarekin ez datorrenean ere.

4. "Ohiko lugorria" eta "galondoak": berezko landaredia, nekazaritzako lurretan agertzen dena, lurra urtebete edo gehiago erabili gabe uzten denean, eta belarki labore baten hondarrak. Aziendak zuzenean bazkatzekoa izaten da. Kalte-ordainak eta dentsitatea kalkulatzeko "ohiko lugorria" eta "galondoak" motako lurren azaleraren % 15 larretzat hartuko da.

5. "Abeltzaintza ekologikoa": behi (zezenketako azienda kanpo), ardi, ahuntz eta behor espezieetako abeltzaintza, ustiapen kudeaketa iraunkorraren bidez baliabide naturalen, uraren, lurzoruaren eta paisaiaren babesa bultzatzen duena, nekazaritza ekologikoa duten lurretan oinarritua, 2002ko azaroaren 11ko Foru Aginduan azaldu bezala, izan ere, Nekazaritza, Abeltzaintza eta Elikadura kontseiluaren agindu horren bidez ezartzen dira abeltzaintza ekologikorako laguntzak.

6. "Hiru metroko zerrenda": NELIGS (SIGPAC) esparru bat edo nekazaritzako lurzati bat (azken hori lehena baino txikiagoa bada) osorik inguratzen duen zerrendaren zabalera da, non uzta bildu gabe utzi behar den nekazaritzako ingurumenari buruzko laguntzen B Kontratuaren beharkizunak betetzeari dagokionez kontuan hartua izateko.

7. "NELIGS": Europar Batasuneko laguntzen onurak, azalerarekin zerikusia dutenak, jaso ditzaketen lurzatiei buruzko informazio geografikoa jasotzen duen sistema, eta lurrari buruzko eta nekazaritzako aprobetxamendu jakinetarako lurzati eta esparruei buruzko euskarri grafikoa duena.

8. "Erreferentziako lurzatia": geografikoki mugatutako azalera, identifikazio bakarrekoa, NELIGSetik hartua.

9. "NELIGS eremua": NELIGSaren barnean nekazaritzako erabilera bakarrekotzat zehazturiko lurzati baten barneko lur azalera mugakideetako bakoitza.

10. "Baldintzak": irailaren 29ko Kontseiluaren (EK) 1782/2003 Erregelamenduaren arabera, zuzeneko ordainketak jasotzen dituzten nekazariek bete beharreko nekazaritza eta ingurumeneko legezko kudeaketa-beharkizunak.

7. artikulua. Behin-behineko eskubideen jakinarazpena.

Nekazaritza, Abeltzaintza eta Elikadura Departamentuak apirilaren 15eko 1171/2005 APA Aginduaren arabera identifikatutako nekazariei ordainketa bakarreko behin-behineko eskubideen berri emanen die. Interesa izan arren jakinarazpena jasotzen ez duen pertsona orok departamentu horren edozein bulegotan eskatzen ahalko du.

8. artikulua. Ordainketa bakarreko erregimenean onartua izatea.

Ordainketa bakarreko erregimenean onartuak izatea eskatzen ahalko dute kasu hauetakoren batean dauden nekazariek:

a) Behin-behineko eskubideen titularrak diren nekazariak, apirilaren 15eko 1171/2005 APA Aginduaren arabera identifikatuak.

b) Apirilaren 15eko 1171/2005 APA Aginduaren arabera identifikatuta ez dauden nekazariak, baldin eta behin-behineko eskubideen titularra den nekazari batengandik ustiapen bat edo haren parte bat jaso badute.

c) Erreserba nazionaletik eskubideen esleipena jasotzen ahal duten nekazariak.

d) 2006ko kanpainaren eskaera bakarrean eskubideak beste nekazari batzuei laga nahi dizkieten nekazariak.

9. artikulua. Erreserba nazionalean sartzea.

Erreserba nazionaleko eskubideak eskatzen ahalko dituzte abenduaren 30eko 1617/2005 Errege Dekretuaren 9.1 artikuluan ezartzen diren kasuetako batean dauden nekazariek. Dekretu horren bidez arautzen da ordainketa bakarreko eskubideen esleipena nekazarientzat. Hona hemen kasuok:

a) Esne ekoizleak, betiere, ezinbesteko kasuetan, erreferentziako banakako kopurua errentan eman badute 2006ko martxoaren 31 baino lehenagoko hamabi hilabetean.

b) Hildako edo erretiratutako nekazari baten lurrak, erreferentzia aldian hirugarren bati errentan emanak zituenak, jasotzen dituzten nekazariak.

c) 2004ko maiatzaren 15a bitarte inbertsioak egin dituzten, bere gaitasun produktiboa handituz, edo lurrak eskuratu dituzten nekazariak.

d) Erreferentzia aldiaren amaieratik 2004ko maiatzaren 15a bitarte lurrak, bost urterako edo gehiagorako, errentan hartu dituzten edo errentan hartutako lurrak 2004ko maiatzaren 15a baino lehen eskuratu dituzten nekazariak.

e) Ekoizpena berbideratzeko programa nazionaletan parte hartu duten nekazariak, erreferentzia aldian eta 2004ko maiatzaren 15a bitarte.

f) Laguntza eskubideak jasotzeko edo dituzten eskubideen balioa handitzeko, epai judizialen bidez edo administrazio egintza irmoen bidez, legitimatuta dauden nekazariak.

g) Jarduera 2002an, edo beranduenez ere 2004ko maiatzaren 15ean, hasi eta 2002an laguntzarik jaso ez duten nekazari berriak.

h) Lehen instalazioa 2004ko maiatzaren 16tik aurrera egin duten nekazari gazteak.

i) Berregituratze edo garapen programetarako eremuetako ustiapenak dituzten nekazariak.

10. artikulua. Eskubideen lagapena.

Eskubideak berreskuratzeko eskaera bat aurkeztu beharko dute honako nekazariok: saldu, errentan eman edo zuzenbidearen arabera onartutako beste edozein bide erabiliz, eskubideak, lurzoru gisa, jasotzen dituztenak, betiere, Europar Batasuneko arauetan eta 1617/2005 Errege Dekretuan ezarritakoari jarraikiz.

11. artikulua. Laguntzen onuradunak.

1. Nafarroan laguntzak eskuratzeko eskabide bakarra aurkeztu beharko dute foru agindu honetako laguntzak jaso nahi dituzten titularrek, baldin eta beren ustiapena edo haren parte bat Foru Komunitatean badago edo, lurrik izan ezean, abere gehienak dituzten lekuan. Gauza bera eginen dute lehortzeko bazketarako azaleren adierazpena egitera behartuak diren ekoizleek.

2. Eskabide bakarra aurkeztu beharko dute Nafarroan, halaber, bertan bizi eta azaleretarako laguntza eta abeltzainentzako primetarako eskabideak beste autonomia erkidego batean aurkeztera behartuak diren titularrek, baldin eta eskuratu nahi badituzte, soilik, Nafarroako lurrei dagozkien nekazaritza garatzeko laguntzak. Kasu horretan, bestelako laguntzarik eskatzen ez dutela azaldu beharko dute.

12. artikulua. Nafarroako Nekazaritzako Ustiategien Erregistroko inskripzioa.

1. Nafarroako Foru Komunitateak kofinantzatutako laguntzak eskuratu ahal izateko, nahitaezkoa da Nafarroako Nekazaritzako Ustiategien Erregistroan izena emana egotea.

2. Laguntzak kudeatzen dituen organoak Nafarroako Ustiategien Erregistroan begiratuko ditu bazkideen eta haiek sozietateetan duten ehunekoen gaineko datuak, bai eta ogibide nagusia nekazaritza izatearen frogagiria ere, foru agindu honetan aipatzen diren laguntzak izapidatu ahal izateko.

3. Nafarroako Nekazaritzako Ustiategien Erregistroari buruzko Foru Legearen testu bategina onetsi zuen uztailaren 2ko 150/2002 Legegintzako Foru Dekretuaren 6. artikuluko 1 zenbakiko a) letran xedaturikoaren arabera, ustiategien titularrek erregistroan inskribatzea eska dezakete foru agindu honetan aipatzen den laguntza-eskaera egiten duten unean.

13. artikulua. Eskabide bakarra.

1. Foru agindu honetako edozein laguntza eskatzeko, bai eta ordainketa bakarreko erregimenean onartua izan edo erreserba nazionaleko eskubideak edo eskubideak berreskuratzeko eskatu ahal izateko ere, ustiapenaren titularrak laguntzarako eskabide bakarra aurkeztu beharko du.

2. Eskabidean ondoko datuak agertuko dira: eskatzaileak dituen ordainketa bakarreko behin-behineko eskubideak zerrendatuta, ordainketa bakarreko zenbat eskubide eskatu diren eta zer motatakoak diren, ustiategiko nekazaritza-lurzatiak eta zer laboretarako eskatzen den laguntza, azienda-dentsitatearen faktorea neurtzeko aitortutako bazka idortuen eta bazkatokien azalerak, eta abere guztiak (behi azienda, ardi eta ahuntz azienda eta behor azienda), foru agindu honetan ezartzen den moduan eta epean.

3. Dena den, bazkatokiaren adierazpena galarazi gabe, behi azienda hiltzeko laguntza eskatzen dutenek bereizirik eskatu beharko dute.

4. Urbasa eta Andimendiko bazkatokien aprobetxamenduaren kasuan, eskatzaileek hauek adierazi beharko dituzte: zer azienda mota den, zenbat abelburu diren eta noiz egonen diren bazkatzen toki horietan. Nekazaritza, Abeltzaintza eta Elikadura Departamentuak erabakiko du eskatzaile bakoitzari zer bazka-eremu dagokion, guztira zenbat azienda larriko abelburu dauden eta eskatzaileak deklaratutako azienda larriko abelburu kopurua aztertutakoan.

14. artikulua. Erreserba Nazionaleko eskubideetarako eta eskubideen berreskupenerako eskaera.

Eskabide bakarrean erreserba nazionaleko eskubideak eskatuz gero, foru agindu honetako eranskinean ezartzen den agiri berariazkoak erantsi beharko dira.

15. artikulua. Ordainketa bakarreko eskabidea.

1. Nekazariak espresuki eskatu beharko du 2006ko kanpainaren ordainketa bakarreko laguntza.

2. Laguntza hau eskatzearren lurzatietan eskubideak aitortzen badira, kasu bakoitzean eskatzen den eskubide mota adierazi beharko da: "kentzekoa", "arruntak", "bereziak" (azaleraren bidez justifikatzen direnak), edo "erreserbakoak".

16. artikulua. Lurzatien aitorpena.

Ustiategiko lurzati guztiak aipatu behar dira. Bai ordainketa bakarreko laguntzarako bai gainerako laguntza elkartuetarako, 2005eko urtarrilaren 1ean indarra duen erreferentziako lurzatiarekin eta NELIGS esparruarekin deklaratu beharko dira, egoera hauetan daudenak izan ezik:

a) Lurzati berrantolamenduko prozesuan dauden lurzatiak, berrantolamenduaren ondoriozko lurzatiak lurrean mugatuak badira eta 2006ko otsailaren 1erako NELIGSen erregistraturik ez badaude, haien deklaraziorako 70 gehituko zaio dagokion lurralde berrantolamenduko poligonoari. Lurzatiaren zenbakia lurzati berrantolamenduko bera izanen da. Izarbeibar I lurzati berrantolamenduaren eremuan, alde hartako 11 udalerriren parte hartzen baitu, berrantolamenduko lurzatiek bat eginen dute 301 udalerri zenbakiarekin.

b) Aprobetxamendu bateraturako bazkatokiak 99. poligonoarekin deklaratuko dira eta kasuan kasuko toki entitateak ematen duen ziurtagirian ageri dena izanen da lurzatiaren zenbakia.

c) Korralizak eta ardi eta ahuntz aziendarendako bazka aprobetxamenduak edo mendialdeko eta eskualde behartsuetako ordainetarako laguntzen xede diren bazkatokiak, haien esleipena udalei eta kontzejuei badagokie: Poligonoan 1.000 adieraziko da. Lurzati zenbakian toki entitateak korralizan ezarritako zenbakia adieraziko da.

e) Lurrak bazkarako aprobatxatzea, haiek ematea partikular bati badagokio eta katastroko lurzati asko biltzen badituzte, ardi eta ahuntz aziendarentzako bazkatokitzat jotzen badira, edo mendialdeko eta eskualde behartsuetako ordainetarako: udalerria. Kasuan kasuko udal edo lurralde entitatearen kodea. 2.000. poligonoa. Lurzatia. Zenbaki korrelatiboa errentatzaile bakoitzarentzat.

17. artikulua. Eskabide bakarraren beste eduki batzuk.

1. Kalte-ordain konpentsatzailea eskatzen duten titularrek, abeltegi bat edo gehiago badute, abereak identifikatu ahal izateko, ustiapen bakoitzaren zenbakia deklaratu beharko dute bakarrik. Kasuan kasuko laguntza kalkulatzeko oinarritzat hartuko da ondoko abereen zentsua:

a) Behi aziendarako, 2006ko eskaerak aurkezteko epea bukatzen denean SIMOGAN datu basean dagoena.

b) Behor aziendarako, SIMOGAN datu basean eskaerak aurkezteko epea bukatzen denean dagoen kopurutik eta 2006ko eskabide bakarrean aitortutako kopurutik txikiena.

c) Ardi eta ahuntz aziendarako, kanpaina honetako eskaera bakarrean deklaratu dena.

2. Azalerengatik edo elkarte baten abereengatik ordaina eskatzen duten eskatzaileek kasuan kasuko elkartearen IFK eta bertan zer ehunekotan hartzen duten parte adierazi beharko dute.

3. Ondoko laguntza hauetakoren bat eskatzen duten titularrek eskabidean nahitaez aitortu beharko dituzte ekoizpen unitate guztiak: behi ume-hazleen eta behi azienda hiltzeko primak eta behi aziendaren sektoreko ordainketa osagarriak

4. Ardi aziendako abeltzainek beren ustiategiaren azalera guztia deklaratu beharko dute kasu guztietan. Orobat, eskualde behartsurako laguntza osagarria eskuratu nahi dutenek espresuki eskatu beharko dute eskabide bakarra aurkezten dutenean.

18. artikulua. Eskabideak aurkezteko eredua eta tokia.

1. Eskabideak deialdi honetarako ezarritako ereduaren arabera aurkeztu beharko dira; eta Nekazaritza, Abeltzaintza eta Elikadura Departamentuko bulego nagusietan, eskualdeetakoetan eta barrutietakoetan egonen dira eskuragarri.

2. Eskabide bakarra eta, kasua izanez gero, azienda hiltzeko primarako eskabidea aurkeztuko dira Nekazaritza, Abeltzaintza eta Elikadura Departamentuko eskualdeetako eta barrutietako bulegoetan, Nafarroako Gobernuko Erregistro Orokorrean, edo Herri Administrazioen Araubideari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aipatzen diren tokietako edozeinetan.

19. artikulua. Eskabideak aurkezteko epeak.

1. Laguntzetarako eskaerak, behi azienda hiltzeko prima izan ezik, ordainketa bakarreko erregimena eta nekazaritza eta abeltzaintzari zuzenean laguntzeko bestelako erregimenak aplikatzeari buruzko abenduaren 30eko 1618/2005 Errege Dekretuan ezarritako epean aurkeztuko dira, otsailaren 1etik aurrera.

2. Behi azienda hiltzeko primaren eskaerak berariazko eskabideetan aurkeztuko dira, haiek hil eta hurrengo lau hilabeteetan, Estatuko oinarrizko arautegian aipatzen diren epeetan, alegia, 2006ko otsai- laren 1etik martxoaren bigarren ostiralera bitarte, 2006ko ekainaren 1etik 30era bitarte, 2006ko irailaren 1etik 30era bitarte eta 2006ko abenduaren 1etik 2007ko urtarrilaren 15era bitarte.

20. artikulua. Eskubideen lagapena Administrazioari jakinarazi beharko zaio 2007ko kanpainako eskaerei begira.

2006ko kanpainako behin betiko eskubideak ezarritakoan, eskubideak beste nekazari bati lagatu nahi dizkioten nekazari titularrek, 2007ko kanpainako laguntza eskatzeko, Nekazaritza Zerbitzuari jakinarazi beharko diote, azaroaren 1etik 2007ko eskabide bakarra aurkezteko azken eguna baina zortzi aste lehenagoko epean.

21. artikulua. Azaleren eta haien erabileren gorabeheren jakinarazpena.

1. Eskatzaileak beharturik daude idatziz jakinaraztera Nekazaritza, Abeltzaintza eta Elikadura Departamentuari beren ustiategian gertatzen diren gorabeherak, hauen berri izan bezain laster, gorabehera horiek laguntzak eskuratzeko baldintzak ez betetzea badakarte, eta bereziki:

a) Nekazaritzako laboreei dagokienez, deklaraturiko laboreek emaitzarik ez izatea eta basa faunaren, abereen, eguraldiaren, belar gaiztoen eta abarren eraginez laboreetan izan daitezkeen gorabeherak.

b) NELIGSen sailkapenaren ondorioetarako lurzatien erabilera aldatuz gero, aldatzeko eskaera aurkeztuko da Nekazaritza, Abeltzaintza eta Elikadura Departamentuko kontseilariaren maiatzaren 30eko 89/2005 Foru Aginduan ezarritako moduan eta epeetan. Haren bidez, Nekazaritzako Lurzatien Informazio Geografikorako Sistemaren (NELIGS) erregulazioa eta bera Nafarroan kudeatzeko arauak ezarri ziren.

c) Urbasan eta Andimendin bazkatzen diharduten azienda larriko abelburuei dagokienez, aprobetxamendu hori hasiera batean deklaraturikoek baino abelburu gutxiagok egiten badute, ukituriko abeltzainek jakinarazi beharko dute zenbatek eginen duten aprobetxamendu hori.

2. Ekoizleek gorabehera horiek jakinarazi ondoren, laguntzaren eskabidea benetako egoerara egokituko da.

3. 2001eko apirilaren 21eko Batzordearen (EE) 796/2001 Erregelamenduko IV. Tituluan aipatzen diren murrizketa eta salbuespenak laguntzaren eskabideen zati batzuei ez zaizkie aplikatuko baldin eta ekoizleek idatziz jakinarazten badiote Nekazaritza, Abeltzaintza eta Elikadura Departamentuari laguntzaren eskabidea ez dela zuzena edo okertu dela, betiere ekoizleei aldez aurretik Nekazaritza, Abeltzaintza eta Elikadura Departamentuak bertan kontrolatzeko asmoaren edo beren eskabideko akatsen berri eman ez badie.

22. artikulua. Eskabidearen aldaketa eta ez ereiteko jakinarazpena.

1. Eskabide bakarra aurkeztu duten nekazariek aldatzen ahalko dute, azaleraren araberako laguntzen erregimenei dagokienez, Batzordearen (EK) 796/2004 Erregelamenduaren 15. artikuluan xedatu bezala, inolako zehapenik gabe, maiatzaren 31 bitarte. Ondotik, ez da aldaketarik onartuko.

2. Ez ereiteko jakinarazpenak idatziz aurkeztuko dira Nekazaritza, Abeltzaintza eta Elikadura Departamentuan, 1618/2005 Errege Dekretuaren 88. artikuluan ezarritako epeetan.

23. artikulua. Eskaerak izapidatu eta ebaztea.

1. Nekazaritza garatzeko laguntzak Nekazaritza, Abeltzaintza eta Elikadura kontseilariaren 2000ko maiatzaren 15eko Foru Aginduaren arabera ebatziko dira. Foru agindu horrek finkatzen du FEOGAren Berme Atalak kofinantzatzen dituen laguntzak eman eta kudeatzeko prozedura, Nekazaritza Garatzeko Europar Batasuneko arautegiarekin bat.

2. Gainerako eskaerak Nekazaritza, Abeltzaintza eta Elikadura kontseilariak 1997ko urriaren 13an emandako Foru Aginduari jarraikiz izapidatuko dira eta haien gaineko ebazpena emanen da. Agindu horren bidez, FEOGA-Bermearen Ataleko laguntza eskaerak aurkeztu eta laguntzak baimendu eta ordaintzeko prozedura ezarri zen.

24. artikulua. Onuradunen betebeharrak.

Onuradunek honakook bete beharko dituzte:

a) Eman eta hartutako dirulaguntzak direla eta, Nekazaritza, Abeltzaintza eta Elikadura Departamentuak egiten dituen egiaztapen ekintzak oro onartzea.

b) Helburu bereko beste dirulaguntza publiko batzuk eskatu izanaren berri ematea Nekazaritza, Abeltzaintza eta Elikadura Departamentuari.

c) Kontabilitatean edo liburu-erregistroan dirulaguntza erregistratzea, indarra duen arautegiaren arabera horretara beharturik egonez gero.

d) Behi aziendako ustiategiaren liburua eguneratua izatea eta behi azienda identifikatu eta erregistratzeari buruzko arauetan ezarritako jakinarazpen epeak betetzea.

e) Ardi eta ahuntz aziendaren ustiategiko liburua eguneratua izatea.

25. artikulua. Kontrola eta ikuskatzailetza.

1. Foru agindu honen 2., 3. eta 4. artikuluetako laguntzen eskatzaileak administrazio-kontrol ohikoen eta tokian bertako egindakoen menpean egonen dira, eta Europar Batasunaren zehapen eta murrizketa ekonomikoen pean, kudeaketa eta kontrolerako sistema integratuari eta baldintzei dagokienez.

2. Foru agindu honen 5. artikuluko laguntzen eskatzaileak administrazio-kontrol ohikoen eta tokian bertan egindakoen menpean egonen dira, eta Nekazaritza, Abeltzaintza eta Elikadura kontseilariaren irailaren 22ko 72/2003 Foru Aginduan, ez-betetzeen mailaketari buruzkoan, ezartzen diren zehapen eta murrizketa ekonomikoen menpean. Halaber, laguntza-lerro bakoitzaren kontrol berariazkoak eginen zaizkie.

3. Eskatzaileak beharturik daude lurzatietan laborea edo haren hondarrak irailaren 10a arte uzteko, ekilore, soia eta gariaren kasuan, eta ekainaren 30a arte gainerako laboreetan.

4. Abeltzaintzako primei dagokienez, abereak identifikatzeko alderdiak hartuko dira aintzakotzat, bai eta abereak Nekazaritza, Abeltzaintza eta Elikadura Departamentuko Abereen Zentsuan inskribatzekoak ere.

26. artikulua. Laguntza itzultzea.

Europar Batasuneko arauek ezartzen dutena deusetan galarazi gabe, foru agindu honetako laguntzak itzultzeko, dirulaguntzen gainean foru arauetan xedatutakoari jarraituko zaio.

27. artikulua. Arau-hausteak eta zehapenak.

1. Arau-hausteak zehazteko eta zehapenak ezartzeko zehapen prozedura administratiboa abenduaren 9ko 369/1997 Foru Dekretuan ezarritakoa izanen da, haren bidez onetsi baitzen nekazaritza, abeltzaintza eta elikadura arloetako zehapenak jartzeko administrazio prozedura.

2. Foru agindu honetako 2., 3. eta 4. artikuluetako laguntzak direla-eta gertatzen diren arau-hausteak Batzordearen apirilaren 21eko (EEE) 796/2004 Erregelamenduan ezarritakoari jarraikiz zehatuko dira. Lur azalera edo abere zehaztu edo aurkitutzat joko dira administrazioaren kontroletan eta tokian bertan balioztatuak.

3. Aurrerako behi aziendako abere batean 96/23/EE Zuzentarauaren bidez debekaturik dauden substantzien hondarrak aurkitzen direnean, edo baimendutako substantziak izan arren legeak agindu ez bezala erabilitako substantzien hondarrak baldin badira, hala nola ustiategian baimenduta ez dauden produktu edo substantziak, edozein modutan, aurkitzen badira, edo baimenduta egonda ere, legeak agindu ez bezala erabili baldin badira produktu edo substantzia horiek, ekoizlea kalte-ordainetarako laguntzetatik at geldituko da urte batez, gertaera horiek egiaztatu diren egunean hasita. Arau-haustea berriz egiten baldin bada, haren larritasunaren arabera, zehapena bost urte bitarte luzatzen ahalko da, errepikapena egiaztatzen den egunetik aurrera.

4. Abereen jabeak edo edukitzaileak hondakinen kontrolerako programa publikoak edo uztailaren 31ko 1749/1998 Errege Dekretuan aurreikusitako ikerketa eta ikuskapenak egiteko behar diren ikuskapen eta lagin-hartzeak oztopatzen dituenean, aurreko zenbakian ezarritako zehapena aplikatuko da.

28. artikulua. Ekoizpen ekologiko eta integraturako, kalte-ordain konpentsatzailetarako, abeltzaintza ekologikorako eta desagertzear dauden hemengo arrazak babestu eta sustatzeko laguntzetarako baldintzak ez betetzea.

1. Ekoizpen ekologiko eta integraturako, kalte-ordainetarako, abeltzaintza ekologikorako eta desagertzear dauden hemengo arrazak babestu eta sustatzeko laguntzen kasuan, gezurrezko aitorpenik atzemanez gero, Nekazaritza, Abeltzaintza eta Elikaduraren 72/2003 Foru Aginduan ezarririkoa aplikatuko da.

2. Ekoizpen ekologikorako edo ekoizpen integraturako laguntzetan, onuradun baten ustiapeneko zati baten eskualdaketaren ondorioz, ukitutako eremua hitzartutakoaren % 15etik beherakoa baldin bada, ez da laguntza itzuli beharko, ondoko jabeak hasierako konpromisoei eutsi edo ez. Bestela, onuradunak jasotako laguntzak itzuli beharko ditu gehi dagozkion korrituak, diru-zenbatekoa Espainia barreneko berreskuratzeko korritu-tasa aplikatuz, onuradunak dirulaguntza jaso zuenetik itzultzen duen arte kalkulatuak.

3. Onuradunak nekazaritza behin betikoz uzten baldin badu, hiru urte baino gehiago igaro baldin badira eta ezinezkoa baldin bada ondokoak nekazaritza ekologikoko edo ekoizpen integratuko konpromisoa bere gain hartzea, ez da laguntza itzuli beharrik izanen.

4. Onuradunari ezinezkoa gertatzen baldin bazaio nekazaritza ekologikoan edo ekoizpen integratuan hartutako konpromisoari eustea, ustiategia lurzati berrantolamendurako proiektu baten edo lurzatiak antolatzeko beste esku-hartze publiko baten ondoriozko eragiketa baten xede izan delako, konpromisoak eta dirulaguntzaren zenbatekoak ustiategiaren egoera berrietara egokituko dira. Egokitzapena egiterik ez bada, konpromisoa bukatutzat hartuko da, konpromiso-aldiari dagokion diru-itzulketa eskatu gabe.

29. artikulua. Ezinbesteko kasuak.

1. Hartutako konpromisoekin aurrera egitea eragozten duten ezinbesteko kasuetan, konpromisoaldi eraginkorragatik ez da inolako diru-itzultzerik eskatuko.

Hauek dira ezinbestekoak:

a) Onuradunaren heriotza.

b) Onuradunaren lanerako ezintasun luzea.

c) Neurria aplikatu zaion ustiategiaren parte handi bat desjabetzea, konpromisoa hartu zen egunean desjabetzapena ezin bazen aurreikusi.

d) Hondamendi natural larriek laguntzak jaso dituen nekazaritza eremua hondatu izanagatik, hartutako konpromisoak betetzea ezinezkoa gertatzen denean.

e) Berrogeialdia eskatzen duten eritasun edo izurriteak hartzea, horiek desagertarazi edo menean hartzeko neurriak hartu beharra dakartenak (betiere Nekazaritza, Abeltzaintza eta Elikadura Departamentuaren gainbegiradaren pean).

f) Ekoizpen integratu eta ekologikorako labore bat uztea ez da neurriaren aplikazioaren etentzat hartuko, baldin eta, labore hori jarri zenetik hilabete bat pasatuta, eguraldiagatik ezin bada aurrera egin eta merkaturako moduko uzta bat lortu.

2. Abeltzaintzako primei dagokienez, ondokoak dira ezinbesteko kasuak:

a) Onuradunaren heriotza.

b) Onuradunaren lanerako ezintasun luzea.

c) Ustiategiko nekazaritza lurretan kalte handiak eragin dituen hondamendi natural larria.

d) Ustiategiko abeltegiak istripuz suntsitzea.

e) Abeltzainen azienda guztia edo parte bat ukitu duen epizootia.

3. Nekazaritza, Abeltzaintza eta Elikadura Departamentuari jakinarazi beharko zaizkio ezinbestekoak, ezbeharra gertatzen denetik hamar egun balioduneko epean, gehienez.

II. KAPITULUA

Ordainketa bakarreko erregimena

30. artikulua. Ogibide nagusia nekazaritza dela frogatzea.

Ordainketa bakarreko erregimenean onartua izateko eskabidean ogibide nagusia nekazaritza dutela frogatzeko, eskatzaileek beren ustiapeneko lurzati eta abere guztien berri eman beharko dute. Lurzatirik edo abererik izan ezean, ogibide nagusia nekazaritza dutela frogatu beharko dute, eskaera bakarrean egoki iruditzen zaizkien frogagiriak sartuz.

31. artikulua. Azalera onargarriak laguntza eskubide arrunten ordainketa justifikatzeko.

1. Eskubide arrunten aplikaziorako, onargarriak izanen dira 1618/2005 Errege Dekretuaren 12. artikuluko azalerak. Hona hemen aipagarrienak:

a) NELIGSen laboratzako lur mota bezala ageri dena.

b) Olibadien kasuan, NELIGSen inskribatzen ahal den azalera, 1998ko maiatzaren 1a baino lehenagoko olibondo landaketei edo ordezkapen olibondoei dagokienez.

c) 33. artikuluan adierazitakoa deusetan galarazi gabe, NELIGSen larre iraunkorren erabilerarekin agertzen direnak.

2. Ez dira azalera onargarririk izanen laguntza eskubide arrunten ordainketa justifikatzeko.

a) Labore iraunkorrek hartuak, 1618/2005 Errege Dekretuaren 12.1 artikuluan aipatutakoak ez diren beste batzuk.

b) Oihanak eta nekazaritzakoak ez diren jardueratan erabilitakoak.

32. artikulua. Laguntza eskubide arruntak aplikatzen diren lurzatien erabilera.

1. Eskubide arruntak justifikatzen diren lurzatien kasuan, erabilera honako hau izan daiteke:

a) Nekazaritzako edozein jarduera, bai eta, ordainketa elkartuak eta belarkietarako laguntza berariazkoak eskatuz gero, haien xede diren labore lurrak ere. Horretarako erabiliz gero, 1618/2005 Errege Dekretuaren 13. artikuluan ezarritako epearen lehen zazpi hilabetetan ezin izanen da bigarren aldiz erein.

b) 1998ko maiatzaren 1a baino lehen landatutako olibondoak eta haien ordez landutakoak.

c) Lur landugabeak; kasu honetan nekazaritza eta ingurumen aldetik lurzorua egoera onean mantendu beharko da, baldintzei buruzko arauekin bat.

2. Alabaina, lurzati horietan honako hau ezin da egin:

a) Frutak, barazkiak eta fekulatarako ez diren patatak ekoiztea.

b) Labore iraunkorrak jartzea.

33. artikulua. Azalera onargarriak kentzeko eskubideen ordainketa justifikatzeko.

1. Onartzen ahalko dira 1618/2005 Errege Dekretuaren 15.a) artikuluko lur azalerak. Hona hemen batzuk:

a) 2003ko NELIGSen labor-lur mota bezala ageri dena.

b) 2003ko NELIGSen aipatzen diren lurretatik, zainzuriekin, masustak eta mugurdiak landatzen dituztenak.

2. Labore lurrak kentzeko eskubideen ordainketaren justifikaziorako ez dira onartuko 2003ko NELIGSen erabilera hauekin agertzen diren hektareak:

a) Labore iraunkorrak.

b) Oihanak eta nekazaritzakoak ez diren jardueratan erabilitakoak.

34. artikulua. Kentzeko eskubideak aplikatzen diren lurzatien erabilera.

1. Oihandu diren lurzatietan kentzeko eskubideak aplikatzen ahalko dira 1251/1999 Erregelamenduanren 31. artikuluan xedatutakoari jarraikiz.

2. Bestetik, lurzati batean kentzeko eskubideen ordainketa frogatuz gero, lugorrirako utzi beharko da, 38. artikuluan ezarri bezala, edo bestela, elikagai ez den beste labore baterako (Non-Food).

35. artikulua. Baldintza artifizialak sortzea.

1. Laguntzen helburuez beste onurak lortzearren nekazari batek deialdietan eskatutako baldintzak artifizialki sortu dituela frogatzen ahal den egoerak eragotzi gabe, Kontseiluaren EE 1782/2003 Erregelamenduaren 29. artikuluaren ondorioetarako, baldintza artifizialtzat hartuko da ordainketa bakarreko eskubideak dituzten nekazariek, soilik eskubide horiek abeltzaintzakoak ez diren laguntza erregimenekoak diren kasuetan, NELIGSen larre, zuhaixka-larre edo zuhaitz-larre gisa sailkatutako larre iraunkorretan erabiltzen saiatzea.

2. Lur horiek ez dira deklaratutako azaleratzat hartuko ez Batzordearen EE 796/2004 Erregelamenduaren 50.2 artikuluaren ondorioetarako ez 1618/2005 Errege Dekretuaren 19. artikuluaren araberako eskubide erabilpenaren ondorioetarako.

3. Aurreko ataletan xedatutakoa ez da aplikatuko baldin eta nekazariak, eskaera aurkeztean, abeltzaintzako ustiapen baten titularra dela eta, orobat, deklaratutako larre iraunkorrak ustiapeneko azienda elikatzeko erabiltzen dituela frogatzen badu.

36. artikulua. Ordainketa bakarreko eskubideen zenbatekoaren kalkulua esne-kuotari dagokionez.

1. 2006ko martxoaren 31n esne-kuotaren titularrak diren esne-ekoizleen kasuan, ordainketa bakarreko eskubideen zenbatekoa kalkulatzeko, kontuan hartuko dira 2006ko esne prima eta dagokion ordainketa gehigarria.

2. Esne primaren kasuan, ekoizle bakoitzari ordaindu beharrekoa kalkulatuko da 2006ko martxoaren 31n duten kuotaren arabera. Nafarroan 2006rako erabilgarri dauden ordainketa osagarriko funtsak, berriz, 2006ko martxoaren 31ko kuotaren kilogramo bakoitzeko zenbateko guztia ehuneko 15 handituz esleituko zaizkie 2005eko azaroan baldintza hori betetzen zuten abeltzaintzako ekoizpen integratu edo ekologikoko ustiapenei.

III. KAPITULUA

Alorretarako ordainketa elkartuak eta laboreentzako berariazkoak

37. artikulua. Ureztalurrak.

1. Diru hori hartu ahal izateko, ureztaketa lurtzat hartuko dira foru agindu honetako 19. artikuluan eskabideak aurkezteko aipatzen den muga-egunean NELIGSen ureztaketa esparruetan dauden nekazaritzako lurzatiak.

2. Bestetik, ureztalurtzat hartuko dira ureztaketa-lur bihurtzeko prozeduretan edo lurzatien berrantolamendu prozeduretan sarturiko nekazaritzako lurzatiak, katastroan hala agertzen direnak edo etorkizunean hala izatekoak direnak, Nekazaritza, Abeltzaintza eta Elikadura Departamentuak aurreko ataleko data baino lehen hasi bazituen.

38. artikulua. Ohiko lugorria eta kentzeko lurrak.

1. Laguntza eskatzaileek ohiko lugorrien indizeak errespetatu beharko dituzte 1618/2005 Errege Dekretuaren I. eranskinean agindu bezala.

2. Aurreko atalean ezarritako horretatik baztertuko dira egoera hauetan dauden titularren ustiapenak:

a) 2006ko kanpainan nekazaritza ekologikoko lehorreko belarkietarako laguntzen kontsezioa indarrean izatea.

b) Kate-ordainetarako laguntzak 2006ko kanpainan eskuratzeko baldintza guztiak betetzea.

c) 2005eko kanpainan ustiapenean nekazaritzako praktikak frogatzea eta ohiko lugorriren indizea eskualdeari dagokiona baino txikiagoa izatea.

Egungo egoeraren aldean beren burua kaltetuta ikusten ahal duten titularrak alde batera utzita, ustiapen mota horietan, ohiko luberri indize hauek ezarri dira: "Erribera Garaia-Aragoi" VI. eskualdeko azalen kasuan, 10 indizea; eta "Erribera Beherea" VII. eskualdekoetan, 40 indizea.

3. Lugorriko eta kendu beharreko lurrak laborantzarako baldintzetan mantenduko dira eta belar gaiztoak agertzea saihestuko, metodo hauetako bat erabiliz:

a) Laborantzako ohiko praktikak.

b) Gutxieneko lur-lantzea.

c) Landare-estaldura egokia mantentzea.

d) Baimenduta dauden herbizidak erabiltzea, arrisku txikikoak eta hondar-eraginik gabeak.

Gainera, lugorriak abereak larratuz mantentzen ahalko dira.

Elkarren segidako bi kanpainatan edo gehiagotan lugorria edo lur-kentzea izan duten lurzatietan, bigarren urtetik hasita mantentze-lanak egin beharko dira urtean behin, gutxienez.

Mantentze-lan horiek ohiko laborantzako praktikak badira, ezin izanen dira egin apirilaren 1etik ekainaren 30era bitarte, salbu eta hurrengo kanpainako ereintza prestatzeko lanak direnean.

39. artikulua. Borondatezko erretiratzearen portzentajea.

Ekoizleak gogoz kontra ustiategiaren egituran sarturiko aldaketengatik lurrak kentzeko ehunekoa gainditzeari buruzko 1618/2005 Errege Dekretuaren 31.2 artikuluarekin bat, baimena ematen da, Villafrancako berrantolamenduak ukituriko ureztaketa-lurzatietan, 2006ko kanpainarako lurrak kentzeko ehunekoa kalte-ordainen xede den azaleraren 100eko 50 izan dadin gehienez ere.

40. artikulua. Soiaren laborantzako hazien dosia.

Soiaren laborantzan erabiltzeko gutxieneko dosia 350.000 hazi/hektareako da.

41. artikulua. Oskoldun fruituen landaketetarako laguntzak.

1. 1618/2005 Errege Dekretuaren 38.2 artikuluak aipatzen duen koefiziente zuzentzailea aplikatzea beharrezkoa bada, laguntza bat emanen da Nafarroako Gobernuaren 2006ko aurrekontu orokorren kargura, koefiziente zuzentzaileak eragindako murrizketaren adinakoa, betiere aurrekontuetan horretan erabiltzeko dirurik baldin badago eta, 120,75 euro/hektareako, gehienez ere.

2. Aurreko ataleko mugen barnean, ogibide nagusia nekazaritza duten titularren azaleretarako laguntza osagarri bat emanen da, 60,375 euro/hektareako, gehienez ere.

42. artikulua. Olibadi lurzatien kategoria.

Nafarroako Foru Komunitate osorako olibadi kategoria bakarra ezarri da. Olibadi guztiak gizarte intereseko olibaditzat hartuko dira, eta Nafarroako Foru Komunitateari dagokion zenbateko osoa esleituko zaie, 1618/2005 Errege Dekretuaren IX. eranskinean adierazi bezala.

43. artikulua. Olibadietarako laguntza berariazkoaren zenbatekoa.

1. Ordainketarako ez dira kontuan hartuko kobratzeko 50 eurora iristen ez diren espedienteak. Kalkulua eginen da aurreko artikuluko zenbateko guztia olibadien azalera guztiaren artean banatuz, betiere, azalera hori administrazio-kontrolen eta tokian bertan egindakoen ondorioz balidatu eta gero.

2. Nafarroako Foru Komunitateko olibadien kasuan, olibadi hektarea onargarri bakoitzeko laguntzaren batez besteko zenbatekoa 65 euro/hektareako da.

44. artikulua. Hazi ziurtatuetarako laguntzak.

1. Hazietarako laguntzak eskatzen dituzten nekazariek edo enpresa ekoizleek espresuki adierazi beharko dute eskabide bakarrean eta, halaber, kontratuaren kopiari berari edo, enpresen kasuan, laborantza adierazpenari erantsi.

2. Kontratuek edo adierazpenek bat etorri beharko dute eskabide bakarrarekin.

45. artikulua. Tabakoa landatzeko laguntzak.

Laguntza hori eskatzen ahalko dute tabako gordina ekoizten duten nekazariek, baldin eta 2000, 2001 eta 2002an tabakoaren lehen eraldaketarako enpresei tabakoa emateagatik primaren bat jaso badute eta, era berean, 2005eko abenduaren 31n ekoizpen kuoten titularrak zirenek. Ekoizleak, edo tabako ekoizleen batasun aitortu batek, eta lehen graduko eraldatzaileak 2006ko otsailaren 15a baino lehen sinatu beharko dute laborantza kontratu bat.

IV. KAPITULUA

Abeltzainentzako primak

46. artikulua. Ustiategiko abereen mantentzea.

1. Ardi eta ahuntz aziendarentzat, behi ume-hazleentzako primetarako eta behi ume-hazleak dituzten ustiapenentzako prima osagarrirako eskubidea izateko, ekoizleak bere ustiategian mantendu beharko ditu, atxikialdietan, eskabidean aipatzen diren abere guztiak.

2. Behi ume-hazleentzako primetarako eta behi ume-hazleak dituzten ustiapenentzako ordainketa osagarrietarako atxikialdiak sei hilabetekoak izanen dira, eskabidea aurkeztu eta biharmanunetik aurrera.

3. Behi ume-hazleak dituzten ustiapenentzako ordainketa osagarrien kobrantza lotuko zaio ustiapeneko abere dentsitateari, izan ere, ezin izanen du gainditu 1,5 UGM/ha. Horretarako, ustiapeneko behi eta ardi azienda guztia hartuko da aintzat.

4. Behi ume-hazleentzako primak ez du abere dentsitatearen gaineko inolako baldintzarik bete beharko.

47. artikulua. Behi ume-hazleentzako primarako eta ordainketa berezirako eskaera.

Behi ume-hazleentzako primako eta behi ume-hazleak dituzten ustiapenentzako ordainketa osagarrirako eskaeran:

a) Behi ume-hazleek primaren xede diren abere guztien 100eko 60 gutxienez izan beharko dute eta txahalek, 100eko 40 gehienez ere. Ehuneko hauei atxikialdi osoan eutsiko zaie.

b) Behi ume-hazleen primen kasuan, ondoko hauek hartuko dira agintaritza eskudunari jakinarazitako abere-galeratzat:

_Xede honekin idatziz egindakoak, Abeltzaintza Zerbitzuan, bajaren berri izan eta 10 egun balioduneko epean. Bertan azalduko da taldearen bizitzan berezko edo ezinbesteko arrazoiengatik gertatutako baja den, edo primari uko egin zaiolako izan den.

_Abeltegian hildako abereak SIMOGAN datu baseari jakinaraziko zaizkio, jakin eta 10 egun balioduneko epean.

c) Behi ume-hazleak dituzten ustiapenentzako ordainketa osagarrirako eskaera: primaren xede diren animalietan aldaketak gertatuz gero, Administrazioko organo eskudunari jakinarazitako aldaketatzat hartuko dira, epearen barruan SIMOGANi haien berri eman bazaio.

d) Primarako aitortzen den behi edo txahal baten ordez, atxikialdian hiltzen bada, beste behi edo txahal bat sartzen ahalko da, baldin eta aldaketa horrekin ere behi ume-hazleen ehuneko horietan behar den kopuruari eusten bazaio. Atxikialdiko ordezpen horiek 20 eguneko epean gertatuko dira, aberea hil edo txahalaren ordez behia ekartzen denetik hasita, beste abeltegi batetik ekartzen direnean. Balioko dute SIMOGANi 7 egun balioduneko epean jakinaraziz gero, gertatzen denetik hasita eta ustiapenaren liburuan gertaeraren ondoko hurrengo hiru egunen barruan jaso badira.

e) Taldearen bizitzan berezko edo ezinbesteko arrazoiengatik gertatutako bajak, atxikialdian prima jaso dezaketen ume-hazleen kopurua gutxitzen badute, gertaeraren berri izan eta hurrengo hamar egunen barruan jakinarazi beharko dira.

48. artikulua. Ardi eta ahuntz aziendaren ekoizleentzako prima eskatzea.

1. Ardi eta ahuntz aziendaren ekoizleek prima eskatzeko, atxikialdian zenbat abere hil diren, primaren xede diren abereen artetik, hori jakin eta 10 egun balioduneko epean jakinarazi beharko dute idatziz.

2. Halaber, atxikialdiko ordezpen horiek 10 eguneko epean gertatuko dira, aberea ateratzen denetik hasita, eta beranduenik ere gertatu ondoko hirugarren egunean inskribaturik egon beharko dute ekoizlearen erregistroan eta atxikialdiko ordezpen horren berri eman, hurrengo 5 egunen barruan gehienez ere, agintaritza eskudunari.

3. Ardi-esnea esnekitarako merkaturatzen duten ekoizleen kasuan, eskatutako ardi eta ahuntzak ordeztu ahal izanen dira, espezie bereizketarik gabe, banako-eskubideen mugen barnean, eskatutako laguntza jasotzeko eskubidea galdu gabe.

49. artikulua. Abereak hiltzeko priman parte hartzearen hiltegien deklarazioa.

Abereak hiltzeko primen araubidean laguntzaile gisa parte hartu nahi duten Nafarroako Foru Komunitateko hiltegiek, aurreko kanpainetan eskatu ez badute, aldez aurretik, parte hartzen dutela jakinarazi beharko diote Nekazaritza, Abeltzaintza eta Elikadura Departamentuko Abeltzaintza Zerbitzuari, Estatuko oinarrizko arautegian aurreikusiriko moduan, eta Zerbitzu horrek ezartzen dituen kontrolen menpe jarri beharko dute eta kontrol horiekin elkarlanean aritu.

50. artikulua. Kalitateko haragiaren ekoizpenerako ordainketa osagarriak.

Behi haragiaren sektoreko ordainketa osagarrietan, ofizialki aitortutako kalitateko behikiaren ekoizpenerako ordainketa osagarria emanen zaie behikiaren ekoizleei, ofizialki aitortutako haragiaren kalitate sistema hauetako batean hildako behi bakoitzeko:

a) Jatorrizko deitura babestuak eta adierazpen geografiko babestuak.

b) Abeltzaintza ekologikoa edo integratua.

c) Behikiaren etiketak, arau orokorretan ezarritakoak baino baldintza zorrotzagoak betetzen dituela adierazteko.

Ustiapen bakoitzeko gehienez 200 aberek jasotzen ahalko dute prima.

51. artikulua. Esnearen sektorerako ordainketa osagarriak.

Ordainketa osagarriak esnearen sektorean esnetarako behi aziendako ustiapenak dituzten abeltzainentzat izanen dira, betiere, eskabidearekin batera eskatzen badute beren borondatez Higiene praktika egokien jarraibideetan azaldutako sisteman sartzea, 1618/2005 Errege Dekretuaren XIX. eranskinean jaso bezala.

V. KAPITULUA

Ekoizpen integraturako laguntzak

52. artikulua. Neurriaren eragin esparrua.

1. Ekoizpen integraturako laguntzak hartzen dituzten onuradunei Nafarroako Foru Komunitateko lurraldeko lurzatiengatik pagatuko zaizkie urtero, ondoren aipatzen diren landaketetarako erabiltzen badira:

a) Baratzekoen taldea: zainzuria, kruziferoak (azalorea, brokolia, erromaneskoa, azak, etab.), uraza, kukuluak, osterzuria, orburua eta tomatea.

b) Berotegikoen taldea: uraza, kukuluak, tomatea eta osterzuriak.

c) Arrozaren taldea: arroza.

d) Fruta gozoko arbolen taldea: mertxika, brinoia, udarea eta sagarra.

2. Labore bakoitzerako Nekazaritza, Abeltzaintza eta Elikadura Departamentuak onesten dituen Ekoizpen Integraturako arautegi berariazkoak egonen dira nekazarien esku Departamentuan berean. Eskatzaileen egitekoa izanen da agiri horiek eskuratzea, betebeharrak bete ahal izateko.

53. artikulua. Onuradunek urteko ordainketa jasotzeko bete beharreko baldintzak.

Kapitulu honetan aipatzen diren laguntzen hartzaile izan daitezke urtero Nafarroako Nekazaritzako Ustiategien Erregistroan inskribatutako nekazaritzako ustiategien titular diren pertsona fisiko nahiz juridikoak, beren ustiategi guztian edo parte batean ekoizpen integratuaren sistema aplikatzen badute, eta bost urtean bederen baldintza hauek betetzen badituzte:

a) Urteko ordainketaren eskabidea aurkeztea.

b) Nafarroako Produkzio Integratuaren Erregistro Ofizialean inskribaturik egotea eta hortaz Kontrolatze eta Ziurtatze Entitatean ere bai, betiere kasuan kasuko lurzatiak erregistro horretan inskribatu baino lehen.

c) Eskatzaileek Produkzio Integratuaren Erregistroan inskribatuak izan beharko dituzte beren lurzatiak eta egindako landaketak jakinarazi Produkzio Integratuaren Erregistroak ezarritako epeetan. Aurrekoa bete ezean, lurzati horiek ez dira aintzat hartuko laguntzak kalkulatzean.

d) Aholku teknikoa hartzeko egitura batean inskribaturik egotea, ekoizpen integratua ere hartzen duen batean alegia, 2006ko maiatzaren 31 baino lehen.

e) Zehapen baten ondorioz nekazaritza eta ingurumen arloko laguntzetatik baztertuak ez izatea.

54. artikulua. Onuradunen konpromisoak.

Ordainketa eskatu duenak 2006ko kanpainako laguntzak hartu ahal izateko, laguntzak ematen zaizkionean, bost urterako harturiko konpromiso hauek bete beharko ditu:

a) Ekoizpen Integratuaren metodoak aplikatzea eta beraz ekoizpen mota horretarako kasuko Ekoizpen Integratuaren arautegi berariazkoan agindurik dagoena betetzea.

b) Parte hartzea, hala ematen zaionean aditzera, hartarako Nekazaritza, Abeltzaintza eta Elikadura Departamentuak, dela berak zuzenean, dela Nekazaritzaren Kudeaketarako Institutu Teknikoaren bitartez, antolatzen dituen prestakuntza ekintzetan, entitate horrek ardura baitu prestakuntzarako laguntza emateko Ekoizpen Integratuaren teknikak hobeki aplikatzeko. Horri gagozkiola, konpromiso hori betetzat hartuko da laguntzaren onuradunaren partez haren ordezkari bat joaten bada, betiere pertsona horrek benetan laguntzaren xede diren lurretako laborantzaren ardura baldin badu.

c) Nafarroako Foru Komunitatean taldeka antola litezkeen babes fitosanitarioko programetan parte hartzea, baldin eta Nekazaritza, Abeltzaintza eta Elikadura Departamentuko edo Nekazaritzaren Kudeaketarako Institutu Teknikoko teknikariek hala gomendatzen badute.

d) Ekoizpen integratuko teknikak aplikatzea Nafarroako Foru Komunitatean kokaturiko ustiategi osoan, betiere neurrian sarturikoek dituzten ekoizpen orientazio berekin. Ekoizpen-orientaziotzat joko dira merkataritzari dagokionez ekoizpena bereizten duten faktore guztiak, erabiliriko landarearen ezaugarriengatik (labore, espezie, barietate, eta abarrengatik) edo ziklo begetatiboagatik edo biengatik batera.

e) Ustiategiko liburua betetzea konpromisopeko lurzatietarako, zeinetan ekoizpen jarduerarekin lotura duten ekintza guztiak jasoko diren eta bai unitateei, datei, dosiei eta abarri buruzko datu osagarriak ere. Hartarako, ustiategiko liburu baliodun bakarrak izanen dira Nekazaritza, Abeltzaintza eta Elikadura Departamentuak egiten dituenak. Nekazariek Departamentuan bertan, eta Nafarroako Nekazaritzako Elikagaien Kalitatearen Institutuan (ICAN) izanen dituzte eskuragai liburu horiek, erregelamendu teknikoekin batera. Liburuak euskarri informatikoan ere egiten ahalko dira. Horretara, aplikazio baliogarri bakarra erabili beharko da, Nekazaritza, Abeltzaintza eta Elikadura Departamentuak ematen edo baliozkotzat jotzen duen bat, hain zuzen.

f) Administrazioko eta kontrolatze eta ziurtatze entitateko ikuskatzaileei libre uztea lurzatietara sartzen, eta laguntzapeko jardueraren gainean eskatzen duten informazio guztia ematea.

g) Ustiategi osoan nekazaritzako ohiko praktika egokiak egitea.

h) Lurra aldi baterako okupatzen duten landaketetako azalerak konpromisoak betetzeko kontuan hartuko dira, baldin eta nekazaritzako urtean uzta bat egiten bada.

VI. KAPITULUA

Ekoizpen ekologikorako laguntzak

55. artikulua. Kontzesioa 2006ra luzatzea.

Laguntza konpromisoak 2005ean bukatu eta konpromiso horri beste kanpaina batez eutsi nahi dioten titularrek, 2006ko kanpainarako, laguntzak luzatzeko eskatzen ahalko dute hitzartua zuten lur azalera berbererako.

56. artikulua. Neurriaren eragin esparrua.

1. Ekoizpen ekologikorako laguntzak hartzen dituzten onuradunei, edo luzapena eskatu dutenei, Nafarroako Foru Komunitateko lurraldeko lurzatiengatik pagatuko zaizkie urtero, ondoren aipatzen diren landaketetarako erabiltzen badira: larreak, lehorreko belarkiak, ureztaketako belarkiak, almendrondoak, mahatsondoak, olibondoak, barazkiak aire zabalean, fruta gozoko arbolak eta berotegiak.

2. Belarki-laboreen multzoan sartuko dira, halaber, urte bateko edo gehiagotako bazka-laboreak (gramineoak, lekadunak, proteaginosoak, e.a.) eta aurrekoen nahasketak, baldin eta (EE) 1782/2003 Erregelamenduan belarki-laboretzat jotzen badira eta sega bidez aprobetxatzen badira.

Larreen multzoan sartuko dira larre iraunkorrak, berezko belardiak eta belardi artifizialak, eta haien bazka-aprobetxamendua artzaingoan edo belarra ebakiz eginen da; kontserbazio, mantentze eta hobetze lanen bat egin beharko da haietan eta tarteka, gai organikoa, kareatsua edo magnesioduna gehitu. Ez da laguntzarik emanen zuhaitzez edo zuhaixkez hornitutako larreentzat, ezta lurzorua eta haren joritasuna zaindu, hobetu edo mantentzeko lanik egiten ez bada ere.

57. artikulua. Onuradunek urteko ordainketa jasotzeko bete beharreko baldintzak.

Nafarroako Nekazaritzako Ustiategien Erregistroan inskribaturik dauden nekazaritza ustiapenen titular diren edo luzapena eskatu duten pertsona fisiko eta juridikoek jasotzen ahalko dituzte kapitulu honetan ezarritako laguntzak, ustiategia oso-osorik edo zati bat nekazaritza ekoizpen ekologikora bideratzen baldin badute eta bost urtez ondoko baldintzak betetzen badituzte:

a) Urteko ordainketaren eskabidea aurkeztea.

b) Nafarroako Nekazaritzako Produkzio Ekologikoaren Kontseiluaren lizentzia edukitzea (NNPEK), ordainketaren eskabidea aurkeztu baino lehen.

c) Bere ustiapeneko laborantza ekologikoko lurzatiak NNPEKen erregistroan inskribaturik edukitzea.

d) Ekoizle batek bere ustiategian ekoizpen ekologikoa eta ohikoa egiten baditu, ekoizpen ekologikoko eta ohiko ekoizpeneko unitateek elkarrengandik erabat bereizirik egon beharko dute. Gainera, bere ustiategian ezin landatuko du barietate bera ekoizpen ekologikoan eta ohikoan, Kontseiluaren (EEE) 2092/01 Erregelamenduko III. eranskinean ezartzen dena izan ezik, alegia, zuhaitz, mahatsondo eta lupulu kasuetan, nekazaritzako ikerketetarako azaleretan eta haziak ekoitzi eta landareak eta aldaskak ugaltzekoetan.

e) Zehapen baten ondorioz nekazaritza eta ingurumen arloko laguntzetatik baztertuak ez izatea.

58. artikulua. Onuradunen konpromisoak.

1. Eskatzaileak 2006ko kanpainako laguntzak hartu ahal izateko, laguntza onartzen zaionean bost urterako harturiko konpromiso hauek bete beharko ditu:

a) Ekoizpen ekologikoaren metodoak bere egitea eta aplikatzea; hortaz, bete beharko du ekoizpen mota horretarako Kontseiluaren ekainaren 24ko (EE) 2092/91 Erregelamenduan eta Nafarroako Foru Komunitatean nekazaritza ekoizpen ekologikoaren eta nekazaritzako produktu eta elikagaietan horren adierazpena egitearen gaineko Erregelamendua onetsi zuen abenduaren 20ko 617/1999 Foru Dekretuan ezarritakoa, lehen aipatu den arautegia deusetan galarazi gabe.

b) Ekoizpen ekologikoa produkzio unitate batean egitea. Unitate horretako lurzati, ekoizpen-eremu eta biltegiek argi eta garbi bereizirik egon beharko dute ekoizpen ekologikoko arauei jarraituz ekoizten ez duen edozein unitatetatik.

c) Urtean-urtean Nafarroako Nekazaritzako Produkzio Ekologikoaren Kontseiluari jakinaraztea, entitate honek ezartzen duen eguna baino lehen, landare ekoizpenerako programa, lurzatien arabera zehaztuz.

d) Ekoizpen ekologikoko unitatean produkzio ekologikoan onartzen ez den lehengairik ez biltzea.

e) Izurriteak eta gaixotasunak kontrolatzeko produktuen eta ongarri organiko eta mineralen artetik (EEE) 2092/91 Erregelamenduko II. eranskinean aipatzen direnak bakarrik erabiltzea.

f) Nafarroako Nekazaritzako Produkzio Ekologikoaren Kontseiluaren ziurtatze arauei jarraituz lurraren emankortasuna mantendu eta handitzea.

g) Nafarroako Nekazaritzako Produkzio Ekologikoaren Kontseiluak ekoizpen ekologikoa kontrolatzeko ezarrita duen programaren eta prebentzio neurrien aplikazioa onartzea.

h) Administrazioko eta ziurtatu eta kontrolatzeko ardura duen entitateko ikuskatzaileei bide ematea labore-lurretan askatasunez sar daitezen, eta laguntzaren xede den jarduerari buruz eskatzen duten informazio guztia ematea.

i) Nekazaritza, Abeltzaintza eta Elikadura Departamentuak agintzen dizkion prestakuntza-ekintzetan parte hartzea. Horri gagozkiola, konpromiso hori betetzat hartuko da laguntzaren onuradunaren partez haren ordezkari bat joaten bada, betiere pertsona horrek benetan laguntzaren xede diren lurretako laborantzaren ardura baldin badu.

j) Horiez gainera, ustiategi osoan nekazaritzaren ohiko egiteko egokiak bete beharko ditu.

k) Lurra denbora gutxi okupatu behar den labore-motak direnean, konpromiso hori bete dela hartuko da, nekazaritzako urtean laguntzaren xede den labore-motaren uzta bat, gutxienez, biltzen baldin bada. Gainerako denbora, lurzatia libre geldituko da, beste ekoizpen baterako.

Bost urtez urteko gutxieneko azalera bat izate aldera, lehorreko belarkien kasuan kontuan har daitezke labore-txandaketan sartzen diren urteko lugorriak, betiere lurzati horien mantentze-lanak ekoizpen ekologikoaren metodoei eta Nafarroako Nekazaritzako Produkzio Ekologikoaren Kontseiluak ezarritako kontrol-programei lotuak baldin badaude, lugorri horiek inolako laguntzarik jaso gabe.

Horretarako ere, eskatzaileak aire zabaleko barazkien ekoizpen ekologikorako labore talde horretarako hitz emana zuen baino azalera handiagoa badarabil, gehiegizko azalera hori ureztaketa lurretako belarki-laborantzan konputatzen ahalko da eta ureztaketa lurretako belarki-laboreei dagozkien laguntzak hartzen ahalko ditu, talde horretarako emandako gehieneko azalera osatu arte.

Nolanahi ere, neurri horretarako laguntza bakarra emanen da nekazaritzako urte bakoitzeko eta katastroko lurzati edo horren puska bakoitzeko, nahiz eta urtean lurzati berean laguntza jaso dezaketen uzta bat baino gehiago bildu.

Landaketa iraunkorrei dagokienez, landaketa baten erabilgarritasun-aldia amaituta, hura utzi behar denean, antzeko labore-mota bati ekin zaiola frogatu beharko da hurrengo urtean, utzitako lurzatiaren luze-zabalera berdineko edo handiagoko eremu batean, konpromisoa bukatu arte falta den denbora puskarako. Halaber, labore iraunkorreko lurzatiei dagokienez, labore iraunkorreko izaera edukitzeko, landaketa erregularrak egon beharko dira bertan, hektarea bakoitzeko 60 zuhaitz baino gehiago betiere.

VII. KAPITULUA

Ekoizpen integraturako eta nekazaritza ekologikorako arau komunak

59. artikulua. Laguntzak.

1. 2006ko kanpainako urteroko ordainketa egiteko orduan, aurreko artikuluetan aipatzen diren betebehar eta konpromisoak betetzen dituzten onuradunei gehienez ere onarturiko kasuan kasuko zenbatekoa emanen zaie.

2. Kanpaina honetan azalera honek izanen du laguntzak hartzeko eskubidea: onarturiko eta zelaiko kontrolak egin ondoren, eta Nekazaritza, Abeltzaintza eta Elikadura kontseilariaren 72/2003 Foru Aginduan ez-betetzeengatik aurreikusiriko mailaketak ezarri ondoren gertatzen dena.

60. artikulua. Urteko ordainketaren eskabidea zein urtetan aurkeztu.

1. Eskuarki, urte bateko laboreen kasuan, urteko ordainketaren eskaera laborearen ziklo begetatiboaren erdia baino gehiago gertatzen den urtean aurkeztu behar da. Laborea landatu edo ereiten denetik bilketa egin bitartekoa hartzen da ziklo begetatibotzat.

2. Kruzifero eta urazen laborantzan azaroaren 1etik abenduaren 31 bitartean eginiko laborantzetarako laguntzak hurrengo urtean eskatu beharko dira.

3. Orburuetan eta urte askotako landaketetan, laguntzaren ordainketa kanpaina honetan uzta bat ekoizten duen azalerari dagokio.

61. artikulua. Kalkulurako azalera eta murrizketen aplikazioa.

1. Ekoizpen ekologikorako edo ekoizpen integraturako urteroko ordainketen xede den azalerak, landaketa talde bakoitzeko, gutxienez ere konpromisoaren xede den azaleraren % 85 hartuko du.

2. Ekoizpen ekologikoan edo ekoizpen integratuan eskatzen diren betebeharrak betetzen dituen azalera (betiere landaketa taldeko), bereizita harturik, eskatutako eta emandako azaleren artean txikiena baino txikiagoa bada, Nekazaritza, Abeltzaintza eta Elikadura kontseilariaren irailaren 22ko 72/2003 Foru Aginduan ezartzen den ez-betetzeen mailaketa aplikatuko da.

3. Laguntzen zenbatekoak murriztea eta onuradunak artikulu honetan aipatzen diren laguntzetatik baztertzea Nekazaritza, Abeltzaintza eta Elikadura kontseilariaren 72/2003 Foru Aginduan xedaturikoari jarraikiz eginen da.

62. artikulua. Konpromisoak eskualdatzea.

1. Konpromiso-aldian onuradunak laguntzaren xede den ustiategia osorik edo haren zati bat beste bati eskualdatzen baldin badio, lagapen-hartzaileak konpromisoari eusten ahalko dio hura amaitu arte, betiere foru agindu honetan onuradunari eskatzen zaizkion beharkizunak betetzen baldin baditu.

2. 2006ko kanpainaren nekazaritza ekologikorako laguntzen luzapena eskatu duten onuradunek ere eskatzen ahalko dute konpromisoak osorik edo hein batean eskualdatzeko.

63. artikulua. Bateraezintasunak.

Konpromiso bakar batek ez ditu batera hartzen ahal Europako Kontseiluaren maiatzaren 17ko (EE) 1257/1999 Erregelamenduaren babespeko laguntza (arautzen baitu zer laguntza emanen diren Nekazaritza Bideratu eta Bermatzeko Europako Funtsa-FEOGAtik) eta Europar Batasuneko beste laguntza-araubide batzuetakoa. Horri dagokionez:

a) Ekoizpen ekologikorako laguntzak bateraezinak dira konpromiso berberak dituzten antzeko laguntzekin. Konpromiso horiek Kon- tseiluaren (EE) 2200/1996 eta 2201/1996 Erregelamenduetan aurreikusitako ekintza-plan, programa operatibo eta neurri berariazkoetan proposatuak dira, fruta eta barazki fresko eta eraldatuen arloko merkatuko erakunde bateratuei buruzkoak hain zuzen.

b) Lurzati bererako, bateraezinak izanen dira orientazio produktibo beretarako laguntzak jasotzea (espeziea, laborea edo barietatea), nekazaritza ekologikoan eta ekoizpen integratuan hartutako konpromisoengatikoak hain zuzen.

Lehen xedapen gehigarria._Ekoizpen integratuaren eta nekazaritza ekologikoaren neurrietarako 2006ko ordainketak Nafarroako Aurrekontu Orokorretako "PDR (FEOGA-G) nekazaritza eta ingurumenaren arloko neurriak" izeneko 710001712304700414202 kontusailetik eginen dira.

Bigarren xedapen gehigarria._Kalte-ordainetarako 2006ko ordainketak Nafarroako Aurrekontu Orokorretako "PDR (FEOGA-G) kalte-ordainak" izeneko 710001712304700414200 kontusailetik eginen dira.

Hirugarren xedapen gehigarria._Fruitu lehorren landaketetarako 2006ko ordainketak, foru agindu honen 41. artikuluan aurreikusiak, Nafarroako Aurrekontu Orokorretako "Fruitu lehorren landaketetarako laguntzak" izeneko 710000712104700412104 kontusailetik eginen dira.

Laugarren xedapen gehigarria._Abeltzaintza ekologikorako eta desagertzear dauden hemengo arrazak babesteko laguntzen 2006ko ordainketak, foru agindu honen 5. artikuluko d) eta e) puntuetan aurreikusiak, Nafarroako Aurrekontu Orokorretako "Abeltzaintzako ingurumen laguntzak" izeneko 711001 71310 4700 412207 kontusailetik eginen dira.

Bosgarren xedapen gehigarria._2006an prima nazional gisa egiten diren ordainketak, foru agindu honen 4. artikuluan aurreikusitako behi ume-hazleetarako laguntzaren zati bat osatzen dutenak alegia, "Behi ume-hazleen abeltzainentzako laguntza osagarria" izeneko 711001 71310 4700 412203 kontusailetik eginen dira.

Azken xedapena._Foru agindu honek Nafarroako ALDIZKARI OFIZIALean argitaratu eta biharamunean hartuko du indarra.

E R A N S K I N A

Eskabidearekin batera aurkeztu beharreko agiriak

I._Orokorrak.

a) Pertsona fisikoak izanez gero, NANaren fotokopia, eta pertsona juridikoak izanez gero, IFKrena.

b) Banku-ziurtagiria, jatorrizkoa, eskabidean aipatzen den kontu korrontea edo libreta eskatzailearena dela frogatzen duena.

c) Eskabidea titularrak ez bestek izenpetzen duenean, haren baimen espresua. Eskatzailea adinez txikia bada, haren legezko ordezkari edo tutoreak espresuki bere baimena eman beharko du.

II._Ordainketa bakarreko erregimenean onartua izateko eskaerari erantsi beharreko agiriak:

a) Lurzatirik edo abererik izan ezean, nekazaria izaera frogatzen duten agiriak.

b) Nafarroako Foru Komunitatea ez den beste Autonomia Erkidegoren batek emandako eskubideen titularrak diren nekazariek haien egiaztagiria aurkeztu beharko dute eskabide bakarrarekin batera.

III._Erreserbako eskubideak eskatzeko agiri osagarriak:

III.1. Esne ekoizleak.

a) Ezinbesteko arrazoi bat egon dela frogatzen duen agiria.

III.2. Hildako edo erretiratutako nekazari baten lurrak, hirugarren bati errentan emanak zituenak, jaso dituzten nekazariak.

a) Lagapenaren agiri fede-emailea, publiko zein pribatua.

b) Testamentua, "ab intestato" oinordekoen aitorpena edo nabaritasun-akta edo, kasua bada, banaketa-eskritura edo herentziaren adierazpenarena.

c) Ardi aziendaren kasuan, ustiategiko liburuaren kopia.

III.3. Inbertsioak egin edo lurrak eskuratu dituzten nekazariak.

a) Salerosketaren agiri fede-emailea.

b) Kasua izanez gero, inbertsioaren frogagiria.

c) Ardi aziendaren kasuan, ustiapenaren liburuaren kopia.

III.4. Lurrak errentan hartu dituzten edo errentan hartutako lurrak eskuratu dituzten nekazariak.

a) Salerosketaren edo errentamenduaren agiri fede-emailea.

b) Ardi aziendaren kasuan, ustiategiko liburuaren kopia.

III.5. Ekoizpena berbideratzeko programetan parte hartu duten nekazariak.

a) Programa eta horretan parte hartzea onetsi zituen xedapena edo, kasua izanez gero, ebazpen administratiboa, aipatzea.

b) Ardi aziendaren kasuan, ustiategiko liburuaren kopia.

III.6. Epai judizialek edo administrazio egintza irmoek ukitutako nekazariak.

a) Epaiaren edo administrazio egintza irmoaren kopia.

III.7. Nekazaritzako jardueran hasi diren nekazariak.

a) Jarduera hasi izanaren frogagiria.

b) Ardi aziendaren kasuan, ustiategiko liburuaren kopia.

III.8. Berregituratze edo garapen eremuetako nekazariak.

a) Kasuan kasuko frogagiria, eskualdeko ustiapenaren gainekoa.

III.9. Eskabide bakarra aurkezteko epea amaitu ondoren baliogabetzen diren errentamenduak edo programak dituzten nekazariak.

a) Errentamendu kontratuaren kopia edo, behar izanez gero, beste agiri batena, non azalduko baitira amaitzeko eguna eta errentan hartutako hektarea kopurua.

IV._Azaleragatik eman beharreko laguntzen eskabideko eta bazkatokien deklarazioko agiri osagarriak.

a) Krokis akotatuak, gehienbat lurzatien zedulak, kalte-ordainen xede diren edo bazkatokitzat aitortzen diren nekazaritzako lurzatiak non dauden adierazten dutenak, nekazariak NELIGS esparru oso baten adierazpena egiten ez duenean.

b) Bazkatokiak ekoizle batek baino gehiagok batera aprobetxatzen dituztenean, azalera horren jabeak edo legezko administratzaileak luzatzen duen ziurtagiria edo, herrilurrak izanez gero, toki entitateek luzatua, non jasoko diren beren menpeko lurzati esleituak.

c) Ardi eta ahuntz aziendarentzako korralizetako bazka-aprobetxamenduaren kasuan, ordainei dagokienez, kasuan kasuko toki entitateak edo finken jabeak eman beharreko ziurtagiria. Bertan aprobetxamendu mota hauen azalerak emanen dira:

_Zuhaitz-larreak.

_Zuhaixka-larreak.

_Bazkalekuak.

_Lugorriak eta galondoak.

d) Hazi egiaztatua erosi izanaren fakturaren kopia, laguntza lihorako eta zuntzetarako kalamurako eskatzen denean edo gari gogorraren kalitaterako osagarria edo laguntza berariazkoa eskatzen denean. Azken kasu honetan lotearen zenbakia zehaztuko da.

e) Lehenbiziko hartzaileak edo lehenbiziko eraldatzaileak sinatutako kontratuaren kopia, baldin eta ekoizpenetik kendu eta orain elikagai ez den beste labore baterako erabiltzen diren lurzatietarako dirulaguntza eskatzen bada.

f) Lehen eraldatzailearekin izenpeturiko kontratuaren kopia, landaketa energetikoetarako laguntzak eskatuz gero.

g) Laguntzak hazi-ekoizpenerako aurkeztu badira, laboreen adierazpenaren kopia bat aurkeztuko da edo, halakorik bada, edo ugalketa-kontratuarena 2353/2004 Errege Dekretuko 43.2 artikuluan adierazitako datetan.

h) Titularrak uste badu dirulaguntzaren xede den merkaturatze-kanpainan bere eskualdeari ezarritako ohiko lugorri-indizea handiagoa dela bere ustiategian uzten duen lugorria baino, hala dela egiaztatu beharko du aurreko ekitaldietan justifikatu gabeko lurzatien dokumentazioa aurkeztuz.

i) Olibondoak kendu edo landatu baina NELIGSen datu basean zehazten ez badira, eremua identifikatzeko krokis bat erantsiko da. Horretan adieraziko da errotik kendutako zuhaitzak (X) non zeuden, bai eta landatu direnak (o) eta jarduketa eguna ere.

V._Abeltzaintzako primak eta abereak ere barne hartzen dituen kalte-ordaina jasotzeko eskaerari eransteko agiri osagarriak.

a) Ardi eta ahuntz aziendako ustiategien kasuan, lurzatiak katastroaren arabera identifikatu gabe deklaratzen badituzte, jabearekin izenpeturiko kontratua edo entitateak luzatutako ziurtagiria aurkeztu behar da, aprobetxamendurako baimena ematen duena alegia. Jabetza partikularrak izanez gero, errentan utziriko eremua osatzen duten lurzati guztien identifikazioa. Agirian jasoko da lurzati horiek, artzantzarako erabiltzeari dagokionez, ez dituela beste ezein nekazarik erabiltzen.

b) Ardi aziendaren ustiategiko liburua, eskaeraren egunean gaurkotua: balantze orria ere erantsiko da.

c) Abereak hiltzeko primaren eskabidearen kasuan, abenduaren 18ko 1980/1998 Errege Dekretuan aipatzen diren identifikazio agirien jatorrizkoak aurkeztuko dira. Agiri horiek administrazioak zigilatu eta segituan emanen zaizkio bueltan eskatzaileari.

d) Behi aziendaren ustiategia Nafarroatik kanpoan badago, ustiategiko liburua.

e) Zekorrak eta 6 hilabetetik gorako abereak Espainian hiltzeko primaren eskabide guztietan, hiltegiaren ziurtagiria beharko da, eta ziurtagiri horretan, gutxienez, abeltzaintzarako laguntzei buruzko estatuko oinarrizko arautegian deskribatzen diren datuak aipatuko dira, pisua kanalean barne beraz.

f) Abereak hiltzeagatiko primak eskatzeko eskabideen kasuan (Espainiatik kanpo hilak direnean edo Espainiatik kanpora bidaltzekoak):

_Espainiatik kanpoan baina Europar Batasuneko estatu batean hilak baldin badira, hiltze-ziurtagiria aurkeztu beharko da eta horrekin batera behi aziendaren identifikazio-agiriaren 2. alea. Administrazio Publikoak izenpetu eta eskatzaileari itzuliko dio. Kanalaren pisua frogatu behar izanez gero, hilketa-ziurtagirian jaso beharko da.

_Abereak Europar Batasunetik kanpoko estatu batean saltzekoak baldin badira, Europar Batasuneko aduanetatik atera izanaren froga aurkeztu beharko da eta horrekin batera Nazioarteko Osasun Ziurtagiria, prima eskatzeko abereen zerrenda daramana, horrela frogatuko baita agiriz haien esportazioa.

g) Behi aziendaren sektorean, ordainketa osagarriak eskatzen dituztenen lehen graduko ahaideen agiria, ogibide nagusia nekazaritza dutela frogatzeko, betiere, abenduaren 30eko 1618/2005 Errege Dekretuaren 80.3 artikuluan ezarritako aldaketa aplikatzeko, beren eskaerak berriro aztertuak izatea nahi badute. Familia liburuak ere aurkeztukodira, eskatzaileak alegatutako ahaidetasuna frogatzeko.

VI._Kalte-ordaina jasotzeko eskaeraren agiri osagarriak.

a) Egoitza-ziurtagiria, kasuan kasuko toki entitateak luzatua, zeinetan aipatuko baita zenbateko antzinatasuna duen udal erroldan.

b) Nekazari kooperatiba bateko bazkide dela frogatzen duten agiriak, hala bada.

c) Ustiategian nekazaritzako produktuak eraldatzen dituztela frogatzen duten agiriak, hala bada (jarduerarako lizentzia, produktuen etiketa ezaugarriak...).

d) Ardi eta ahuntz aziendako ustiategien kasuan, belarkietarako bazkatokiak deklaratzen direnean lurzatiak katastroaren arabera identifikatu gabe, jabeak edo entitateak luzatutako ziurtagiria aurkeztu behar da, aprobetxamendurako baimena ematen duena alegia. Ziurtagiri horretan bereiz agertaraziko dira azalera guztiak: larrea, zuhaixka-larrea, zuhaitz-larrea, galondoa eta lugorria.

VII._Nekazaritza eta ingurumen arloetako laguntzak ordaintzeko eskabidearen dokumentazio gehigarria.

a) Kontzesioa osorik edo hein batean eskualdatuz gero, eskualdaketaren agiria, behar bezala betea aurkeztu beharko da. Horretan agertuko dira: saltzailearen izen-deiturak, haren NANa edo IFK, eroslearen izen-deiturak, haren NANa edo IFK eta erosleak epeak diraueino mantentzeko konpromisoa hartzen duen azalera, labore multzoen araberakoa.

VIII._Abeltzaintza ekologikorako laguntza eskaeren agiri osagarriak.

Abeltzainek beren eskaera bakarrean espresuki azaltzen baldin badute Nekazaritza, Abeltzaintza eta Elikadura kontseilariaren 2002ko azaroaren 11ko Foru Aginduan ezarritako laguntzak jaso nahi dituztela, foru agindu horretako 4. artikuluan ezarritako baldintzak betetzen dituztela frogatzeko Abere Ekoizpenaren Atalak eskatzen dizkien agiri guztiak aurkeztu beharko dituzte.

IX._Desagertzear dauden hemengo arrazak babesteko laguntza eskaeren agiri osagarriak.

Abeltzainek beren eskaera bakarrean espresuki azaltzen baldin badute desagertzear dauden hemengo arrazak babestu eta sustatzeko laguntzak jaso nahi dituztela, 63/2004 Foru Aginduan ezarritako baldintzak betetzen dituztela frogatzeko eskatzen zaizkien agiri guztiak aurkeztu beharko dituzte. Nekazaritza, Abeltzaintza eta Elikadura kontseilariak emandako foru agindu horrek aipatu laguntzak arautzen ditu.

Iruñean, 2006ko otsailaren 10ean._Nekazaritza, Abeltzaintza eta Elikadura kontseilaria, José Javier Echarte Echarte.

Iragarkiaren kodea: F0602635