II. NAFARROAKO TOKI ADMINISTRAZIOA
2.2. AGINTARIAK ETA LANGILEAK
2.2.2. Plantilla Organikoa, Lan Eskaintza Publikoa, oposizioak eta lehiaketak
IRUÑA
Jarduera soziokulturaletako goi mailako teknikarien zerrenda bat osatzeko deialdia
Deialdia, jarduera soziokulturaletako goi mailako teknikari lanpostuan eta prestakuntzarako zerbitzu berezietan aritzeko izangaien zerrenda bat hautaproben bidez osatzeko, betiere Iruñeko Udaleko Kulturako Alorrean sortzen diren beharrak bete ahal izateko.
Ekonomia, Lehendakaritza eta Hiritarren Partaidetzako Alorreko zinegotzi delegatuak, 2006ko urtarrilaren 11ko 24/PR ebazpenaren bidez, honako oinarri hauek taxutzen duten deialdia onetsi zuen:
O I N A R R I A K
Lehenbizikoa._Aditzera ematen da deialdia egiten dela, jarduera soziokulturaletako goi mailako teknikari lanpostuan eta prestakuntzarako zerbitzu berezietan aritzeko izangaien zerrenda bat hautaproben bidez osatzeko, betiere Iruñeko Udaleko Kulturako Alorrean sortzen diren beharrak bete ahal izateko.
Prestakuntzarako izangaien zerrenda hau erabiliko da azaroaren 15eko 347/2004 Foru Dekretuko lehen xedapen iragankorrean aipatzen den zerrenda ezin bada erabili. Foru dekretu horren bidez apirilaren 14ko 96/1997 Foru Dekretua aldatu zen.
Bigarrena._Parte-hartzaileen betebeharrak.
2.1. Parte-hartzaileek, eskabideak aurkezteko epea bukatzen den egunean, baldintza hauek beteko dituzte:
a) Iruñeko Udalaren eta haren erakunde autonomoen zerbitzuko langile finko izatea, B, C, D edo E maila edo taldekoa.
b) Lanpostuan egiazki hiru urte eginak izatea, gutxienez ere.
c) Borondatezko edo nahitaezko eszedentzian ez egotea.
d) Eskaerak aurkezteko epea bukatzen den egunean, lizentziatu, ingeniari edo arkitekto tituluaren jabe izatea edo hura eskuratzeko eskubideak ordaindu izanaren gordekina.
2.2. Baldintzak bete beharko dira eskabideak aurkezteko epea bukatzen den egunerako, eta dei egiten zaienean eta prestakuntzak diraueino.
Hirugarrena._Hautapen prozesuaren bilakaera eta balorazioa.
3.1. Hautapen prozeduran, izangaiek lanpostuko eginkizunekin zerikusia duten proba teoriko edo praktiko bat edo batzuk egin beharko dituzte, II. eranskineko gaiei buruz.
Proba egiteko gehieneko denbora epaimahaiak zehaztuko du, hasi aurretik.
3.2. Hautapen probagatik gehienez ere 50 puntu emanen dira. Bazterturik geldituko dira lor daitekeen gehieneko puntuazioaren erdira iristen ez diren izangaiak, hots, 25 puntu.
3.3. Probarako deialdi bakarra eginen da, eta izangaiek Nortasun Agiri Nazionala aldean dutela agertu beharko dute. Agertzen ez diren izangaiak bazterturik geldituko dira.
Laugarrena._Prestakuntzarako izangaiendako deia.
Izangaiendako deia eta, behar bada, prestakuntzarako zerbitzu berezietako egoeraren deklarazioa indarra duen legerian ezarritakoaren arabera eginen da.
Bosgarrena._Eskabideak aurkezteko epea.
Eskabideak aurkezteko epea hogei egun naturalekoa izanen da, deialdi hau Nafarroako ALDIZKARI OFIZIALean argitaratu eta biharamunetik hasita.
Seigarrena._Eskabideak.
6.1. Deialdian parte hartzeko eskabideak Iruñeko Udaleko erregistro orokorrean aurkeztu beharko dira, Merkatuko kalean, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeko 38. artikuluko 4. idatz-zatian aipatzen diren aukeretako edozein erabiliz.
Eskabideak bete beharko dira I. eranskineko ereduaren arabera, zeina eskuratzen ahalko baita Iruñeko Udaleko Laguntza Bulegoan, edo Internet bidezko www.pamplona.es gunean, edo, bestela, Nafarroako ALDIZKARI OFIZIALetik bertatik hartuta.
Parte hartzeko eskabideetan izangaiek adierazi behar dute baldintza guztiak betetzen dituztela eskabideak aurkezteko epea amaitzen den egunean.
Era berean, parte-hartzeko eskabideari erantsi beharko diote baldintza gisa eskatutako tituluaren fotokopia.
Aski justifikaturik dauden ezinbertzeko kasuetan izan ezik, aipatutako agiri horiek aurkezten ez dituztenak ezin izanen dute deialdian parte hartu, eta ordura arteko egintza guztiak baliorik gabe geldituko dira, beren eskabidearen faltsukeria dela eta, legokiekeen erantzunbeharra ukatu gabe.
Zazpigarrena._Behin-behineko zerrendak.
Eskabideak aurkezteko epea bukatutakoan, Lehendakaritzako Alorrak jendaurrera aterako ditu ebazpen honen bidez onetsitako deialdiko izangai onartuen eta baztertuen behin-behineko zerrenda, Iruñeko Udalaren iragarki oholean (Merkatuko plazan, Udaletxearen gibeleko aldean).
Egun horretatik aitzina, izangaiek bortz egun balioduneko epea izanen dute erreklamazioak aurkezteko eta eskabidean egindako akatsak zuzentzeko.
Zortzigarrena._Behin betiko zerrendak.
Erreklamazioak aurkezteko epea amaitu eta haien gainekoa ebatzi ondoren, Ekonomia, Lehendakaritza eta Hiritarren Partaidetzako Alorreko zinegotzi delegatuaren ebazpen baten bidez, izangai onartu eta baztertuen behin betiko zerrenda onetsi eta Iruñeko Udalaren iragarki oholean jarriko da jendaurrean, ebazpen honetan aipatzen diren hautaprobak egiteko egunarekin eta tokiarekin batera.
Onartuen zerrendetan agertzea ez da aski deialdi hauetan eskatutako baldintzak betetzen direla onartzeko. Dei egiten zaienean izangaiek aurkeztu behar duten dokumentazioa edo Administrazioak bere eskuetan daukana aztertutakoan, baldintzaren bat betetzen ez dela ohartuz gero, interesatuek deialdi hauetan parte hartzeagatik dituzten eskubide guztiak galduko dituzte.
Bederatzigarrena._Epaimahaia.
9.1. Epaimahaiak kide hauek izanen ditu:
Mahaiburua: Ignacio Pérez Cabañas jauna, Kulturako zinegotzi delegatua.
Ordezko mahaiburua: Juan José Unzué Gaztelu jauna, Funtzio Publikoko zinegotzi berezia.
Mahaikidea: José Luis González García jauna, Kulturako Alorreko zuzendaria.
Ordezko mahaikidea: Iñigo Huarte Huarte jauna, Ekonomiako Alorreko zuzendaria.
Mahaikidea: Silvia Azpilicueta Rodríguez-Valdés andrea, Merkataritza eta Turismoko Alorreko zuzendaria.
Ordezko mahaikidea: Julio Sucunza Azcona jauna, Lehendakaritzako Alorreko zuzendaria.
Mahaikidea: Iruñeko Udaleko Langileen Batzordearen ordezkari bat, Batzordeak berak izendatua.
Ordezko mahaikidea: Iruñeko Udaleko Langileen Batzordearen ordezkari bat, Batzordeak berak izendatua.
Mahaikide-idazkaria: José María Pascal Mendióroz jauna, Kulturako Alorreko Zuzenbidean lizentziatua.
Ordezko mahaikide idazkaria: Juan Sáez Leclercq jauna, Lehendakaritzako Alorreko legelaria.
9.2. Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legean aipatzen diren abstentzio arrazoietako bat gertatzen denean, epaimahaiko kideek ezin izanen dute epaimahaian parte hartu, eta Lehendakaritza Alorreko Zuzendaritzari eman beharko diote horren berri.
Izangaiek, halaber, zilegi izanen dute mahaikideak errefusatzea, arrazoi horietako bat izaten denean.
Mahaikideek parte ez hartzeko eta haiek errefusatzeko legez ezarririko arrazoiak gertatzeagatik epaimahaia aldatzen bada, aldaketa hori jakinaraziko da, lehiakide onartu eta baztertuen zerrendekin batera.
9.3. Epaimahaia hautaprobak hasi baino lehen eratuko da.
Epaimahaia ezin izanen da eratu, ezta aritu ere, kideen gehiengo osoa bertan izan gabe. Halaber, epaimahaiaren eraketak eta jardunak balio izateko, mahaiburuak eta mahaikide-idazkariak edo haien ordezkoek bertan egon beharko dute.
9.4. Epaimahaiak gehiengoz erabakiko ditu deialdietako arauak ulertu eta aplikatzerakoan sor daitezkeen afera guztiak.
9.5. Epaimahaiak aholkulari adituen laguntza eska dezake probarako. Aholkulari horiek beren espezialitate teknikoetan baizik ez dira ariko eta epaimahaiari horietan bakarrik emanen diote laguntza.
Hamargarrena._Probak gainditzen dituztenen zerrenda.
10.1. Behin proben kalifikazioa amaituz gero, epaimahaiak Iruñeko Udalaren iragarki oholean eta proba egin den lekuan jarriko du prestakuntzarako zerbitzu berezietan lanean aritzeko probak gainditzen dituzten izangaien zerrenda, guztira lortzen duten puntuazioaren ordenaren arabera.
Halaber, epaimahaiak Lehendakaritzako Alorreko zuzendariari igorriko dizkio oinarri honetan aipatzen diren zerrenda horiek, onets ditzan, hautaprobetako espediente osoarekin batera.
10.2. Puntuetan berdinketarik gertatuz gero, kasuan kasuko deialdian eskabideak aurkezteko epea bukatzen den egunean izangaiek aitorturik daukaten antzinatasunaren arabera ebatziko da. Berdinketak jarraituz gero, zozketa bidez ebatziko da. Zozketa Lehendakaritzako Alorrean eginen da eta bertara deituko zaie ukitutako izangaiei.
Hamaikagarrena._Errekurtsoak.
Deialdi honen aurka, nahiz bere oinarrien eta aplikazio egintzen aurka, errekurtso hauetakoren bat aurkezten ahalko da, hautara:
a) Berraztertzeko errekurtsoa, egintzaren organo egileari zuzendua, hilabeteko epean, jakinarazi edo argitaratu eta biharamunetik hasita.
b) Administrazioarekiko auzi-errekurtsoa, Nafarroako Administrazioarekiko Auzien Epaitegiari zuzendua, bi hilabeteko epean, errekurtsoa paratzen zaion egintza edo erabakia jakinarazi edo argitaratu eta biharamunetik hasita.
c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurtsoa paratzen zaion egintza edo erabakia jakinarazi edo argitaratzen denetik hasita.
Epaimahaiaren egintzen aurka, gora jotzeko errekurtsoa paratzen ahalko da, deialdia egin duen udal organoari zuzendua, hilabeteko epean, errekurritutako egintza edo erabakia jakinarazten denetik aitzina.
Iruñean, 2006ko urtarrilaren 11n._Ekonomia, Lehendakaritza eta Hiritarren Partaidetzako Alorreko zinegotzi delegatua, José Iribas Sánchez de Boado.
I. ERANSKINA
Eskabide eredua
Izena: ..................., adinez nagusia. NAN/nortasun agiria: ........... Jaioteguna (urtea/hila/eguna): ............. Jaioterria (herria/probintzia): .............. Naziotasuna: ................. Egungo helbidea (karrika, zenbakia, eskailera, solairua): ............ Posta kodea/herria: ................... Telefonoa: ............ Laneko telefonoa: ...............
Azaltzen dut:
Deialdian eskatzen den titulua badudala, eta hura ez dela oraingo jarduneko egoerarako dudan bera.
Eskabideak aurkezteko epea bukatzen den egunean eskatzen diren baldintza guztiak betetzen ditudala.
Eskatzen dut:
Onartua izatea jarduera soziokulturaletako goi mailako teknikari lanpostuan eta prestakuntzarako zerbitzu berezietan aritzeko izangaien zerrenda bat hautaproben bidez osatzeko deialdian, Iruñeko Udaleko Kulturako Alorrerako, ........... eguneko Nafarroako ALDIZKARI OFIZIALean argitaratu baitzen.
Datuen babesa. Datu Pertsonalak Babesteari buruzko 1999ko abenduaren 13ko Lege Organikoan ezarritakoa betetzeko, aditzera ematen zaizu inprimaki honetan ematen diren datu pertsonalak hautapen prozeduran Udalak dituen eskumenak erabiltzeko baizik ez direla erabiliko eta Iruñeko Udalaren datu basea osatzen duten fitxategiei batuko zaizkiela. Fitxategietan sartu, datuak zuzendu eta ezabatzeko eta horien aurka jotzeko eskubideak Iruñeko Udalari zuzendurik erabiltzen ahalko dituzu, Erregistro Orokorrera joz (Merkatuko kalea, 7-9, 31001-Iruña).
Iruñean, 20.....(e)ko .......................aren ......(e)an.
(Sinadura)
Oharra._Eskabidearekin batera deialdian eskatzen den titulazioaren fotokopia bana ekarri.
II. ERANSKINA
1._Musika zikloen programazioa.
2._Sanferminetako programazioa.
3._Udalaren harremanak bertako musika talde ospetsuekin. Kudeaketa metodoak
4._Udalarekin harreman iraunkorra duten talde edo erakundeen jardueren programazioa.
5._Talde artistiko amateurren jarduera Iruñeko Udalean.
6._Erraldoi eta kilikien konpartsaren urteko jardueraren kudeaketa.
7._Kontratazio arloko administrazio prozedurak. Kontratuei buruzko Foru Legea eta dirulaguntzei buruzko araudia.
Iragarkiaren kodea: L0600787
