II. NAFARROAKO TOKI ADMINISTRAZIOA
2.2. AGINTARIAK ETA LANGILEAK
2.2.2. Plantilla Organikoa, Lan Eskaintza Publikoa, oposizioak eta lehiaketak
IRUÑA
Hautaproben bidez izangaien zerrenda bat osatzeko deialdia, aldi baterako kontratazioaren bidez Musika Eskolako irakasle lanpostuan aritzeko
Iruñeko Udaleko Lehendakaritzako Alorreko zuzendariak, 2006ko abenduaren 1ean, honako oinarri hauek dituen deialdia onetsi zuen:
OINARRIAK
1._Hautaproben bidez izangaien zerrenda bat osatzeko deialdia egiten da, Musika Eskolako irakasle lanpostuan aritzeko, Iruñeko Udalaren Hezkuntza, Gazteria eta Kiroleko Alorrean, musika modernoko harmoniako eta inprobisazioko hasierako ikastaroa ematearren.
Ikastaroa, lau hilabetekoa, musika modernoko talde batean aritu nahi duten musikari gazteentzat da. Musiari horiek musika tresnaren oinarrizko maila izan beharko dute. Pop, rock eta antzeko estiloetako abestiak interpretatu eta, batzuetan, sortu eta inprobisatu beharko dira. Astean ordubetean arituko dira, 4 edo 5 musikarik osaturiko taldeetan.
Aldi baterako kontratatu beharreko izangaien zerrenda hau erabiliko da baldin eta ez badago langile finkoen beste zerrendarik, jadanik prestatua edo geroan noizbait osatzen dena, hala xedatzen baita apirilaren 14ko 96/1997 Foru Dekretuan.
2._Izangaiek bete beharreko baldintzak.
Izangaiek, eskabideak aurkezteko epea bukatzen den egunean, baldintza hauek beteko dituzte:
a) Nazionalitatez espainiarra eta adinez nagusi izatea eta erretiroa hartzeko ezarritako adinik ez izatea.
b) Musikako erdi mailako edo goi mailako titulua izatea eskabideak aurkezteko epea bukatzen den egunean.
c) Lanpostuaren eginkizunak betetzeko gaitasun fisiko eta psikikoa izatea.
d) Eginkizun publikoetan aritzeko desgaitu edo gabetua ez egotea eta administrazio publikoren baten zerbitzutik bereizia ez izatea.
Baldintza horiek guztiak aldi baterako kontratatzeko hautatu eta deitzen diren lehiakideek frogatu beharko dituzte, agiri bidez, kontratua izenpetu aurretik horretarako ezartzen zaien unean.
Aski justifikaturik dauden ezinbertzeko kasuetan salbu, aipatutako agiri horiek aurkezten ez dituztenak ezin izanen dira kontratatu, eta ordura arteko egintza guztiak baliorik gabe geldituko dira, euren eskabidearen faltsukeria dela eta, legokiekeen erantzunbeharra galarazi gabe.
Eskabideak aurkezteko epea bukatzen den egunerako bete beharko dira baldintzak, eta hautapen prozedurak diraueino eta kontratazioak iraun bitartean beharko dira bete.
3._Eskabideak.
3.1. Deialdian parte hartzeko eskabideak Iruñeko Udalaren erregistro orokorrean aurkeztu beharko dira, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38. artikuluko 4. idatz-zatian aipatzen diren baliabideen bidez.
Eskabideak bete beharko dira I. eranskineko ereduaren arabera, zeina eskuratzen ahalko baita Iruñeko Udaleko Herritarrendako laguntza bulegoan, Merkatuko kalean, edo Internet bidezko www.pamplona.es gunean, edo, bestela, aldizkari ofizialetik bertatik hartuta, argitaratzen denean. Haietan adieraziko da zein espezialitatetan hartzen den parte.
Parte hartzeko eskabidean, izangaiek adierazi behar dute baldintza guztiak betetzen dituztela eskabideak aurkezteko epea bukatzen den egunean.
Parte hartzeko eskabidearekin batera, izangaiek Nortasun Agiri Nazionalaren fotokopia ere aurkeztu beharko dute.
Parte hartzeko eskabidearekin batera, helburuak, edukiak eta baliabide metodologikoak garatzen dituen proiektua aurkeztuko da, gutxienez 10 orrialdekoa eta gehienez 25ekoa. Ikastaroaren helburak hauek dira: Harmoniaren eta inprobisazioaren oinarrizko baliabideak ezagutzea, praktikatuz, ikasle bakoitzari dagokion tresnarekin eta euskarri informatikoaren laguntzarekin. Gainera, proiektuan proposaturiko sasioen eskema-gida bat aurkeztuko da, non aipatuko baita erabiliko den material didaktikoa.
3.2. Minusbaliotasuna duten lehiatzaileek, eskabidearekin batera, minusbaliatuak direla frogatzeko agiria ere aurkeztu beharko dute, organo eskudunak emana. Halaber, ariketak egiteko denbora eta baliabide aldetik behar dituzten egokitzapenak eskatzen ahalko dituzte, horren beharrik izanez gero, eskabidean bertan. Aparteko orri batean, zein ezintasun duten eta zein egokitzapen eskatzen duten adierazi beharko dute.
4._Eskabideak aurkezteko epea.
Eskabideak aurkezteko epea hogei egun naturalekoa izanen da, deialdi hau Nafarroako ALDIZKARI OFIZIALean argitaratu eta biharamunetik hasita.
5._Behin-behineko zerrendak.
Eskabideak aurkezteko epea bukatutakoan, Lehendakaritzako Alorrak izangai onartuen eta baztertuen behin-behineko zerrenda emanen du aditzera Iruñeko Udalaren iragarki oholean (Udaletxearen atzeko aldean).
Egun horretatik aurrera, izangaiek bost egun balioduneko epea izanen dute erreklamazioak aurkezteko eta eskabidean egindako akatsak zuzentzeko.
6._Behin betiko zerrendak.
Erreklamazioak aurkezteko epea amaitu eta haiek ebatzi ondoan, Lehendakaritzako Alorreko zuzendariaren ebazpen baten bidez, izangai onartu eta baztertuen behin betiko zerrenda onetsi eta Iruñeko Udalaren iragarki oholean jarriko da jendaurrean, deialdi honetako zortzigarren oinarrian aipatzen diren hautaprobak egiteko eguna eta tokia adierazita.
Onartuen zerrendetan agertzea ez da aski deialdi honetan eskatutako baldintzak betetzen direla onartzeko. Kontrataziorako dei egiten zaienean izangaiek aurkeztu behar duten dokumentazioa aztertuta, baldintzaren bat betetzen ez dela ohartuz gero, interesatuek deialdian parte hartzeagatik dituzten eskubide guztiak galduko dituzte.
7._Epaimahaiak.
7.1. Espezialitate bakoitzeko epaimahai bat eratuko da, ondoko kideek osatua. Espezialitate bakoitzean onartutako izangaien behin betiko zerrenda onesten duen ebazpenean finkatuko da haien behin betiko osaera:
Mahaiburua: Maite Mur Dallo, Hezkuntza, Gazteria eta Kiroleko Alorreko zinegotzi delegatua.
Ordezkoa: Ana Elizalde Urmeneta, Hezkuntza, Gazteria eta Kiroleko Alorreko zuzendaria.
Mahaikidea: Patricio Goialde Palacios, Donostiako Musika eta Dantza Eskolako irakaslea.
Ordezkoa: Angel Ochotorena Zabalza, Joaquin Maya Musika Eskolako irakaslea.
Mahaikidea: Ana Teresa Rodríguez Larrañaga, Joaquín Maya Musika Eskolako zuzendaria.
Ordezkoa: Nuria Goñia Oiz, Udaleko pedagogoa.
Mahaikidea: Iruñeko Udaleko Langileen Batzordearen ordezkari bat, batzordeak berak izendatua.
Ordezkoa: Iruñeko Udaleko Langileen Batzordearen ordezkari bat, batzordeak berak izendatua.
Mahaikide idazkaria: M.ª Luisa Echeverria Iriarte, Joaquín Maya Musika Eskolako idazkaria.
Ordezkoa: M.ª José Elverdin Garcés, Joaquín Maya Musika Eskolako ikasketaburua.
7.2. Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legean aipatzen diren abstentzio arrazoietako bat gertatzen denean, epaimahaiko kideek ezin izanen dute epaimahaian parte hartu, eta Iruñeko Udaleko Lehendakaritza Alorreko Zuzendaritzari eman beharko diote horren berri.
Izangaiek, halaber, zilegi dute mahaikideak errefusatzea, inguruabar horietako bat izaten denean.
Mahaikideek parte ez hartzeko eta haiek errefusatzeko legez ezarritako arrazoiak gertatzeagatik epaimahaia aldatzen bada, jakinarazi eginen da, lehiakide onartu eta baztertuen zerrendekin batera.
7.3. Epaimahaia hautaprobak hasi baino lehen eratuko da.
Epaimahaia ezin izanen da eratu, ezta aritu ere, kideen gehiengo osoa bertan izan gabe.
7.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren inguruan sortzen diren arazo guztiak.
7.5. Epaimahaiak aholkulari adituen laguntza eska dezake probarako. Aipatu aholkulariak beren espezialitate teknikoetan baizik ez dira ariko eta haietan oinarriturik bakarrik emanen diote laguntza epaimahaiari.
8._Hautaproben bilakaera eta balorazioa.
8.1. Hautapena honako proba hauen bidez eginen da:
1. Froga: aurkezten den proiektua irakurtzea eta defenditzea. Probetako epaimahaiak egoki juzgatzen dituen galdera guztiak egiten ahalko ditu. Probak, gehienez ere, 20 puntuko kalifikazioa izanen du, eta bazterturik geldituko dira 10 puntu eskuratzen ez dituzten izangaiak.
2. Froga: 20 minutuko klase praktikoa, izangaiak berak proposatzen duen gaiari buruz, ikasle talde batekin. Probak, gehienez ere, 20 puntuko kalifikazioa izanen du, eta bazterturik geldituko dira 10 puntu eskuratzen ez dituzten izangaiak.
8.2. Probarako deialdi bakarra eginen da, eta izangaiak Nortasun Agiri Nazionala aldean dutela azalduko dira. Agertzen ez diren izangaiak baztertuak izanen dira.
8.3. Hautaprobak egiteko orduan, halaxe eskatzen duten minusbaliatuek denbora eta baliabide aldetik zilegi diren egokitzapenak izanen dituzte, eskabidean azaltzen dutenaren arabera.
9._Hautaprobak gainditzen dituztenen zerrenda eta lanean hasteko deia.
9.1. Proben kalifikazioa amaiturik, epaimahaiak jendaurrean jarriko du Iruñeko Udalaren iragarki oholean eta ariketa egin den tokian probak gainditu dituzten izangaien zerrenda, lortutako azken puntuazioaren hurrenkeran, eta Lehendakaritzako Alorreko zuzendariari helaraziko dio, baita hautapen prozesuaren espediente osoa ere, onets dezan.
Puntu berdinketa izanez gero, izangai zaharrenak izanen du lehentasuna.
9.2. Gainditu duten izangaiei deitzen ahalko zaie, Iruñeko Udaleko Hezkuntza, Gazteria eta Kiroleko Alorrean sortzen diren beharren arabera, deialdi honetako oinarrietan ezarritakoari eta aplikatzekoak diren gainerako arauei jarraituz.
9.3. Langileei dei egiterakoan, aintzat hartuko da Nafarroako Administrazio Publikoetako Langileen Estatutuaren testu bateginaren zazpigarren xedapen gehigarriko 3. idatz-zatian ezarritakoa (Nafarroako Foru Komunitatean ezgaitasunen bat duten pertsonek enplegua lortzeari buruzko maiatzaren 31ko 16/2002 Foru Legean emandako idazketaren arabera).
9.4. Kontratatuak Gizarte Segurantzaren araubide orokorrean sartu eta bertan kidetuko dira; beraz, haien kontu izanen dira dagokien kuota eta Pertsona Fisikoen Errentaren gaineko Zergaren atxikipena, bidezko diren kopuruetan.
10._Errekurtsoak.
Deialdi honen aurka, nahiz bere oinarrien eta aplikazio egintzen aurka, errekurtso hauetakoren bat aurkezten ahalko da, hautara:
a) Berraztertzeko errekurtsoa, egintzaren organo egileari berari zuzendua, hilabeteko epean, jakinarazi edo argitaratu eta biharamunetik aitzina.
b) Administrazioarekiko auzi-errekurtsoa, Iruñeko Administrazioarekiko Auzien Epaitegiari zuzendua, bi hilabeteko epean, errekurtsoa paratzen zaion egintza edo erabakia jakinarazi edo argitaratu eta biharamunetik hasita.
c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurritutako egintza edo erabakia argitaratu edo jakinarazten denetik aitzina.
Epaimahaiaren egintzen aurka, gora jotzeko errekurtsoa paratzen ahalko da, deialdia egin duen udal organoari zuzendua, hilabeteko epean, errekurritutako egintza edo erabakia jakinarazten denetik aitzina.
Iruñean, 2006ko abenduaren 1ean._Iruñeko Udaleko Lehendakaritzako Alorreko zuzendaria, Julio Sucunza Azcona.
I. ERANSKINA
Izena
Adinez nagusia
N.A.N./Nortasun agiria
Jaioteguna (eguna/hilabetea/urtea)
Non sortua (udalerria/probintzia)
Nazionalitatea
Egungo helbidea (karrika, zenbakia, eskailera, solairua)
Telefonoa
Sakelako telefonoa:
Honako hau azaltzen dut:
Ez dudala karguan aritzea galarazten didan eritasunik edo akats fisikorik nahiz psikikorik.
Ez dudala indarra duten xedapenetan ezarritako ezintasunik.
Ez naizela diziplina espediente bidez inongo administrazio publikoren zerbitzutik bereizia izan eta ez nagoela desgaitua eginkizun publikoak betetzeko.
Deialdian eskatzen den titulazioaren jabe naizela.
Eskabideak aurkezteko epea bukatzen den egunean, behar diren baldintza guztiak betetzen ditudala.
f Ezgaitasuna dudala eta, beraz, azaltzen den egokitzapena eskatzen dudala, adierazten diren arrazoiengatik. (Bertze orri batean azaldu behar dira eskatzen diren egokitzapenak eta haietarako arrazoiak).
f Minusbaliatua naizela frogatzen duen agiria aurkezten dudala, erakunde eskudun batek emana.
Eskatzen dut:
Onartua izatea aldi baterako kontratuaren bidez Joaquín Maya Musika Eskolan irakasle lanpostuetan aritzeko izangaien zerrenda bat hautaproben bidez osatzeko deialdian (.....eko .....: bon.ean, ...... egunean argitaratua).
Datuen babesa._Datu Pertsonalak Babesteari buruzko 1999ko abenduaren 13ko Lege Organikoan ezarritakoa betetzeko, aditzera ematen zaizu inprimaki honetan ematen diren datu pertsonalak hautapen prozeduran Udalak dituen eskumenak erabiltzeko baizik ez direla baliatuko eta Iruñeko Udalaren datu basea osatzen duten fitxategiei gehituko zaizkiela. Fitxategietan sartu, datuak zuzendu eta ezabatzeko eta horien aurka jotzeko eskubideak Iruñeko Udalari zuzendurik erabiltzen ahalko dituzu, Erregistro Orokorrera joz (Merkatuko kalea, 7-9; 31001 Iruñea).
Iruñean, 20..ko .............aren ............(e)an.
(Sinadura)
Iragarkiaren kodea: L0619391
