138. ALDIZKARIA - 2006ko azaroaren 17a

II. NAFARROAKO TOKI ADMINISTRAZIOA

2.1. ORDENANTZAK ETA BESTELAKO XEDAPEN OROKORRAK

BERA

Partaidetza esklusiboko merkataritzako sozietatea eratzea, Berako Udaleko hirigintza garapeneko zerbitzu publikoaren zuzeneko kudeaketa egiteko

2006ko urriaren 18an Udalbatzak egindako osoko bilkuran, ondoko erabakia hartu zuen:

1. Behin betikoz onestea "Bera Lantzen, s.l." partaidetza esklusiboko merkataritzako sozietatearen eraketa, Berako Udaleko hirigintza garapeneko zerbitzu publikoaren zuzeneko kudeaketa egiteko.

2. Halaber, behin betikoz onestea aipatu sozietatea gobernatuko duten estatutuak.

Beran, 2006ko urriaren 31n._Alkatea, Helena Santesteban Guelbenzu.

SOZIETATEAREN ESTATUTUAK

BERA LANTZEN, S.L.

I. TITULUA

Izena, xedea, helbidea eta iraupena

1. artikulua.

Bera Lantzen, S.L. izeneko merkataritza sozietatea eratu da, toki erakunde baten eremuko eta erantzukizun mugatuko sozietate gisa. Erantzukizun mugatuko sozietateei buruzko Legearen, toki erakundearen gaineko legeen eta estatutu hauen bidez gobernatuko da.

2. artikulua.

Sociedad Bera Lantzen, S.L. erantzukizun mugatuko sozietatea da. Udal enpresa den aldetik, nortasun juridikoa izanen du bere xedeak betetzeko eta konplitzeko, lege-xedapenetan eta estatutu hauetan ezarritako mugak gainditu gabe.

3. artikulua.

Sozietatearen xedea da eraginkortasun handiagoa lortzea Berako udalerriko hirigintzaren garapena sustatzeko udal ekintzan, eta orobat arintasun handiagoa hirigintza arloko plangintza, kudeaketa eta betearazpen prozesuen kudeaketan, eta horiez gain herriko hirigintzaren plangintzan Udalaren interesak begiratzeko udal tutoretza bermatzea, Udalaren hirigintza politikak dinamizatu eta koordinatzeko bitartekoa eratzea, eta lurzoruaren kudeaketa eta plangintzaren arloan interes publiko eta pribatuen partaidetza eta elkarlotura handiagoa erdiestea, Berako udalerriaren garapen iraunkorra bermatze aldera.

Bere xedeak lortzeko, sozietateak ahalbide hauek izanen ditu:

_Honelakoak prestatzea: hirigintzaren plangintzarako agiriak eta proiektuak (plan partzialak, bereziak, babeserakoak, sektorizazio planak, katalogoak, xehetasun azterlanak), hirigintzako azterlanak, urbanizazio proiektuak eta udal obren proiektuak, ekimen publikokoak badira.

_Honelakoak prestatzea: indarra duen planeamendua aldatzeko proiektuak, hirigintzako araudi orokorra eta partikularra eta planeamenduari eragiten dioten ordenantzak, ekimen publikokoak badira.

_Jarduketa publikorako sistemen bidez, Udal Planaren kudeaketa garatu eta betearaztea, eta bereziki hura lorzoru mota guztietan betearazi eta garatzeko aurreikusirik dauden agiriak.

_Hirigintza kudeatu eta betearazteko agiri eta proiektuak prestatzea, jarduketa publikorako sistemen bidez.

_Partikularrekin eta bertze entitate interesatuekin behar diren hitzarmenak egitea, hirigintzaren plangintza eta kudeaketa egiteko bitartekoak prestatu eta tramitatzeko, jarduketa publikorako behar diren sistemak definituz.

_Udalaren ekimeneko hirigintza espedienteak prestatu eta ebazteko proposatzea , eta partikularrek abiarazten dituztenak Udalaren aitzinean tramitatzea, jarduketa sistema eta kudeaketa modu ezberdinei jarraikiz.

_Obra lizentziak eta hirigintzako lurzatiketak egitekoak onartu aitzineko tramitean, Udalari txostena egitea.

_Jarduera lizentziak eta irekitzeko lizentziak onartu aitzineko tramitean, Udalari txostena egitea, interesatuek edo, hala behar badu, Udalak berak Udalaren aitzinean tramitatzen dituzten espedienteetan.

_Udalak baiamendutako obrak kontrolatzeko edo haietan zuinketa egiteko lanak egitea, behar diren txosten, frogapen eta ikuskaritza lanak eginez.

_Udal mugapean ibilgailuen eta oinezkoen trafikoa antolatu eta arautzeko proiektu eta dokumentuak eta aparkalekuen kudeaketari buruzkoak prestatzea.

_Ekimen publikoko obren proiektuak prestatu, kudeatu eta betearaztea, izanik horiek arruntak nahiz urbanizatzekoak, azpiegiturakoak edo halako eremu edo poligono bat zerbitzuz hornitzekoak, jarduketa programaren barnean badaude, salbu eta Udalak haien gaineko eskumena bertzelako udal zerbitzuei esleitzen badie.

_Berako Udalak haren gain uzten dituen eginkizunak betearaztea.

Sozietatearen xede diren jarduerek administrazio baimenen bat behar dutenean edo administrazio erregistroren batean inskribatu behar direnean, baldintza horiek bete beharko dira jarduerei ekin aurretik.

Berariazko titulazioa behar duten jarduerak egiteko, sozietateak profesional eskudunen zerbitzuak kontratatu beharko ditu, edo kasu bakoitzean eskumena duten langileak.

4. artikulua.

Sozietateak Beran (Nafarroa) izanen du egoitza, Herriko Etxea plazako 1ean. Administrazio organoak Berako udal mugapeko bertze leku batera aldatu ahal izanen du egoitza, komenigarria iruditzen bazaio.

5. artikulua.

Sozietateak mugarik gabeko iraupena izanen du, eta eraketaren eskritura egiten den egunean abiatuko da lanean.

II. TITULUA

Kapital soziala

6. artikulua.

Kapital soziala, osorik harpidetu eta ordaindua, hiru mila eta hamar euro da (3.010 euro). Hura, hirurehun eta bat partaidetza sozialetan banaturik dago, bakoitzaren balio nominala hamar euro dela (10 euro). Partaidetza horiek banaezinak eta metagarriak dira, hurrenez hurren zenbakituak 1etik 301era, biak barne.

Kapital sozial hori Berako Udalak erabat harpidetua eta ordaindua dago, bera baita hura osatzen duten partaidetza guztien titular esklusiboa. Hura ezin da eskualdatu ezta enpresa honen xedea ez den bertze deusetarako erabili, baina bai handitu eta murriztu legezko xedapenekin bat.

Kapital soziala handitu edo txikitu ahal izanen da Batzar Orokorrak hala erabakitzen badu. Aitzinetik Administrazio Kontseiluak idatzizko txostena eginen du horrelako aldaketa justifikatzeko.

III. TITULUA

Sozietatearen gobernu organoak

7. artikulua.

Akziodunen Batzar Orokorra eta Administrazio Kontseilua dira sozietatea gobernatu eta administratzeko organoak. Haren ordezkaritza Administrazio Kontseiluari dagokio.

IV. TITULUA

Akziodunen Batzar Orokorra

8. artikulua.

Batzar Orokorra sozietatearen organo gorena da eta Berako Udalbatzak osatzen du.

Batzarreko burua Udalbatzakoa izanen da, eta idazkaria, berriz, Udalekoa edo Batzarrak aldi bakoitzean izendatzen duena.

9. artikulua.

Batzar Orokorraren lanetan aritzean Udalaren osoko bilkurak deialdia egiten duelarik, eraketan edo prozeduretan aritzen delarik, bozketak egiten dituelarik, erabakiak hartzen dituelarik eta kide bakar gisa (beti izanen baita bat eta bakarra) bere borondatea agertzen duelarik, aplikagarri zaizkion xedapen administratiboei lotuko zaie, eta erantzukizun mugatuko sozietateen araubideko arauak aplikatuko dira, sozietateari dagozkion gainerakoetan.

Sozietatearen Batzar Orokorrak honako eginkizun hauek izanen ditu:

_Administrazio Kontseilua izendatu, berritu edo berrestea, estatutu hauetan ezarritakoari jarraituz.

_Kontseilukideen ordainsariak finkatzea, halakorik bada.

_Estatutuak aldatzea.

_Kapitala handitu edo murriztea.

_Obligazioak jaulkitzea.

_Inbentarioa, balantzeak, emaitzen kontua, memoria eta kudeaketari buruzko urteko txostena onestea.

_Auditoreak izendatzea.

_Erantzukizun mugatuko sozietateei buruzko Legeak Batzar Orokorrari ezartzen dizkion gainerako eginkizunak.

Gainera, kudeaketaren inguruko halako gai batzuen gaineko erabakiak hartzeko, Udalaren osoko bilkurak jarraibideak ematen ahalko dizkio administrazio organoari edo haren baimena beharko du organo horrek, Erantzukizun Mugatuko Sozietateei buruzko Legearen 63. artikuluan ezarritakoari jarraikiz.

10. artikulua.

Batzar Orokorra derrigorrez urtean behin bilduko da bilkura arruntean, ekitaldi bakoitzeko lehen seihilekoan, sozietatearen kudeaketa zentsuratzeko edo onesteko, hala behar denean aurreko ekitaldiko kontuak, balantzea eta kudeaketa txostena onesteko, mozkinen xedeaz behar dena erabakitzeko, halakorik bada, eta bilkurako gai zerrendan sarturiko bere eskumeneko afera guztien gainean erabakiak hartzeko.

11. artikulua.

Aurreko artikuluan aipatutako bilkura arruntaz gain, Batzar Orokorrak bilkura berezia eginen du behar den guztietan, aldez aurretik lehendakariak deituta, Administrazio Kontseiluak edo gutienez Udalbatzako legezko kideen laurdenak hala eskatuz gero.

12. artikulua.

Udalbatzako kide guztiak bildu eta aho batez batzarra egitea erabakitzen badute, Batzar Orokorra deituta eta edozein gairi heltzeko modu baliozkoan eratuta geldituko da.

13. artikulua.

Batzar Orokorraren bilera bakoitzetik idazkariak dagokion akta eginen du, eta hura Udalabtzen aktak onesteko modu, manera eta ondorio berekin onetsi beharko da. Akta horiek sozietatearen Batzar orokorraren Akten Liburu Berezian inskribatuko dira, lehendakariaren eta idazkariaren sinadura dutela. delako liburua zuzendariak zainduko du.

14. artikulua.

Batzar Orokorreko kide ez diren Administrazio Kontseiluko kideek haren bilkuretan parte hartu ahal izanen dute, hizpidearekin baina botorik gabe, bai eta kudeatzaileak ere, egonez gero.

V. TITULUA

Sozietatearen administrazioa

15. artikulua.

Administrazio kontseilu batek administratu, gobernatu eta ordezkatuko du sozietatea, ahalmenik handienekin, salbu eta Batzar Orokorrari dagozkionak. Delako Kontseiluak gutienez ere hiru kide izanen ditu eta gehienez ere zazpi; denak Udalbatzako kide izan beharko dute.

Batzar Orokorrak lau urterako izendatuko ditu kontseilukideak, baina Udalbatzako kide diren aldetik izendatuak izan direnek izaera hori galduz gero kontseilukide izateari utziko diote bertzerik gabe.

16. artikulua.

Debeku da Administrazio Kontseiluan kargurik izatea legez ordezkapen kargurik hartzeko bateraezintasuna duten pertsonek, baita Erantzukizun Mugatuko Sozietateei buruzko Legearen 58.3 artikuluak aipatzen dituenek ere.

Berako Udaleko burua izanen da Administrazio Kontseiluko buru, kontseilukide bada, edo bertzenaz kontseilukide den zinegotzi bat, Batzar orokorrak hautatua. Kontseiluko buruordea Administrazio Kontseiluak izendatuko du. Buruordea kontseiluburuaren lekuan ariko da hura kanpoan, eri edo karguan aritzeko ezindurik dagoenean, eta haren ahalmen guztiak izanen ditu.

Kontseiluak berak izendatuko du bere idazkaria. Kontseiluko kidea nahiz kontseilutik kanpokoa izan daiteke, eta hala denean hizpidea bai baina botorik ez du izanen Kontseiluaren bileretan. Ez dagoenean edo etortzerik ez duenean, Kontseiluak erabakitzen duen pertsona egonen da bileran eta haren akta eginen.

Edozein kontseilukidek proposatuz gero, alkate udalburuak izendatutako teknikari espezializatuek Administrazio Kontseiluaren bileretan parte hartu ahal izanen dute, hizpidearekin baina botorik gabe.

Kontseilukideei kalte-ordainak emanen zaizkie bilkura, batzar eta lan-mahaietan parte hartzeagatik. Batzar Orokorrak kalte-ordainen zenbatekoa zehaztuko du ekitaldi bakoitzean.

17. artikulua.

Kontseiluak, gutienik, hiruhilekoan behin eginen du bilkura arrunta eta kontseiluburuak deitzen edo gutienez bi kontseilukidek eskatzen duten guztietan, berriz, bilera berezia. Bilkurak sozietatearen egoitzan edo Kontseiluak erabakitzen duen tokian eginen dira.

Kontseiluburuari edo haren ordezkoari dagokio deialdiak egitea, eguneko gai zerrenda eta guzti.Deialdia kontseilukideei banan-banan jakinarazi behar zaie bilkurarako ezarritako ordua baino berrogeita zortzi ordu lehenago, gutienez.

Kontseilua modu baliozkoan eratuko da kontseilukideen erdiak gehi bat bilduz gero.

Erabakiak bilkurara agertutako edo bertan ordezkatutako kontseilukideen erabateko gehiengoaz hartuko dira, salbu eta legezko xedapen batek bertzelako quorum bat ezarri. Berdinketarik gertatuz gero, kontseiluburuaren edo haren ordezkoaren botoak trenkatuko du.

Administrazio Kontseiluaren erabakiak aktetan jasoko dira eta aktak liburu egokian transkribatuko dira. Kontseiluburuak edo haren ordezkariak eta Kontseiluko idazkariak sinatuko dituzte aktak.

18. artikulua.

Kontseiluak edo haren eginkizunetan ari denak sozietatearen negozioak kudeatuko ditu, igorpen eta trafiko eragiketak eginen ditu eta sozietatea ordezkatuko du hala epaiketan nola epaiketatik kanpo. Bereziki, jarduera horiei dagokienez, legeak eta estatutuek Batzar Orokorrarendako gordetzen ez dituzten ahalmenak Kontseiluari eman zaizkio. Gainera, ondotik aipatzen diren ahalmenak izanen ditu, bertzeak bertze:

_Sozietateko langileak izendatzea eta bereiztea, haien soldatak eta ordainsariak finkatzea, behar diren zuzenketak egitea eta langileak kaleratzea; arrisku mota guztietarako aseguratzea, istripuak barne; hauteskunde sindikaletan edo lan hauteskundeetan parte hartzea eta ematen zaizkion karguak onartzea.

_Sozietatearen afera eta negozio guztien barne eta kanpo kudeaketan aritzea; kontabilitatearen ardura izatea eta legeak eskatzen dituen kontabilitate liburuak erabiltzea; kontuak formalizatu eta aurkeztea, zergak ordaintzea eta bidegabeko edo kaltegarritzat jotzen diren zergen aurkako erreklamazioak egitea.

_Igorpenak egitea, zor-agiriak endosatzea, kanbio agiriak eta agindurako bertzelako agiriak bermatu, onartu, negoziatu, ordaindu eta protestatzea, kontuak eta kredituak, kanbio letrak eta igorpen eta trafikoko gainerako agiriak eta erresaka kontuak jaso, kobratu eta ordaintzea.

_Kontu korronteak eta kreditu kontuak irekitzea aurrezki kutxetan eta edozein bankutan, Espainiakoa barne, edo sozietate eta entitate pribatu nahiz publikoetan, eta haiek baliatzea, txekeak, ordainketa aginduak eta gainerako agiriak emanez.

_Era guztietako zorrak, libramenduak eta ordainketa aginduak kobratu eta ordaintzea, horien gainean ordainagiriak eta ordain gutunak ematea eta bermeak kitatzea, hipoteka-bermeak eta pignoraziozkoak barne; zorren ordainketa gisa edozein motatako ondasunen lagapenak onartzea, higigarrien eta eskubide errealen lagapenak barne, eta eskubideak eta aukerak onartzea; lurreko, itsasoko eta aireko garraioak kontratatzea; salgaiak, gutunak, ziurtagiriak, igorpenak, telegramak eta gutuneria orokorra jasotzea aduana, aireportu, tren geltoki, biltegi edo gordailuetatik, baita administrazioetatik eta telegrafo zerbitzuetatik ere.

_Diru kopuruak maileguz hartzea edozein entitateri eta bertze edozein establezimenduri, komeni diren epe eta baldintzekin, eta nolanahiko bermeak onartu eta ematea, baita hipoteka-bermeak ere.

_Sozietatearen memoria, inbentarioa eta balantzea idatzi eta prestatzea, galera eta irabazien kontuan, eta funts berezien ezarpenari buruz erabakitzea.

_Sozietatea ordezkatzea epaiketan eta epaiketatik kanpo, agintari, entitate eta norbanakoen aurrean, Estatuko, autonomia erkidegoetako, probintzia eta udalerrietako erakunde eta bulegoen aitzinean, maila, mota eta jurisdikzio guztietako magistratura, epaitegi eta auzitegien, Etxebizitzako ordezkaritzen edo haien eskumenak bere gain dituen erakundearen, Ogasun, Industria eta Lan ordezkaritzen, Trafiko, Herri Lan eta Hirigintza burutzen eta Estatuko Administrazioko bertze edozeinen aitzinean, espedienteetan, ekintzen eta salbuespenen erabilpenean, sustatzaile, jardule, laguntzaile edo demandatu gisa, edozein dela ere espedientea, epaiketa edo jurisdikzioa, eta haietan probak proposatzea, lekukoak errefusatzea, funtzionarioak ezestea, errekurtsoak paratzea, prozeduretan etsi eta amore ematea, fidantzak eta gordailuak eratu eta garaiz kentzea, posizioei erantzutea eta epaiketan aitortzea.

_Sozietatearen xedeak betetzea eta horretarako aurretik egin behar diren urrats guztiak egitea.

_Ahal orokor edo bereziak ematea, bere eginkizun guztiak edo batzuk bertzeren esku uzteko; auzitegietako prokuradoreak eta legelariak izendatzea, epaiketan ordezkari aritzeko behar diren ahalmenak emanez; emandako ahalak ezeztatzea eta ordezpenak baimentzea; mota guztietako notario-aktak eskatzea; jakinarazpen eta errekerimenduak egin, jaso eta erantzutea; agiri publiko eta pribatuak formalizatzea, eta, orokorrean, bere jarduera berezia garatzeko behar den guztia egitea.

_Sozietateko kudeatzailea izendatzea.

_Ekitaldi ekonomiko bakoitzaren amaieran, memoria aurkeztea Udalbatzari sozietateak aitzineko ekitaldian egindako kudeaketaz.

19. artikulua.

Kontseiluburuari ondoko eskurantza hauek dagozkio:

_Sozietatearen eta Kontseiluaren ordezkaritza arazo judizialetan eta bertzelakoetan, auzitegi, korporazio, agintari eta mota guztietako pertsona sozial eta norbanakoen aitzinean. Epai edo administrazio ekintzen erabiltzeko erabakiak hartzen ahalko ditu, Sozietatearen interes eta eskubideak defendatu edo hobeki bermatze aldera.

_Kontseiluaren bileretarako deiak egitea, horietan buru egitea eta Kontseiluaren erabakiak betearaztea.

_Sozietatearen jarduera, negozio, zerbitzu eta bulegoen goi-zuzendaritza eta ikuskapen orokorra.

_Ordainketa-aginduen emailearen eginkizunak.

_Larrialdietan sozietatearen interesak zaintzeko egokitzat jotzen dituen erabakiak hartzea eta Kontseiluari horien berri ematea hurrengo bileran.

_Estatutuek eta toki araubideari buruzko legeriak ematen dizkioten gainerako eginkizunak.

_Ahal orokor edo bereziak ematea, eginkizunen eskuordetzeak egiteko.

20. artikulua.

Administrazio Kontseiluak kontseilari delegatu bat edo gehiago izendatzen ahal du, izendatzeko erabakiak ezartzen dituen ahalmenekin.

21. artikulua.

Administrazio Kontseiluak kudeatzaile bat izendatzen ahalko du, eta hark zuzendaritza, kudeatzailetza eta betearazpen ahalmenak izanen ditu. Gaitasun berezia duen pertsona izendatuko da eta sozietateak gehienez ere hamar urteko kontratua eginen dio.

Kudeatzaileak eginkizun hauek izanen ditu:

a) Kontseiluaren erabakiak betetzea eta betearaztea.

b) Sozietatearen jarduna zuzendu, kudeatu eta ikuskatzea.

c) Kontseiluaren bilkuretan parte hartzea, hizpidea duela baina botorik gabe.

d) Kontseiluak ematen dizkion gainerako eginkizunak.

VI. TITULUA

Sozietateko langileak

22. artikulua. Langileak.

Administrazio Kontseiluak izendatu eta kontratatuko ditu sozietatearen eginkizunak egiteko behar diren teknikari, administrari eta menpeko guztiak, kudeatzaileak proposaturik, halakorik bada.

Horiek guztiak enpresako plantillara pasatuko dira, eta lan-kontratudunak izanen dira.

VI. TITULUA

Sozietatearen ondarea eta ogasuna

23. artikulua.

Sozietatearen ondareak haren jabetzako ondasun eta eskubide guztiak biltzen ditu, erosketetan, zuzeneko sustapenetan eta sozietatearen funtsekin egindako eragiketetan eskuratuak, edo Berako Udalaren, Estatuaren, autonomi erkidego, probintzia eta udalerrien, korporazio eta norbanakoen lagapen, dohaintza eta dirulaguntzen bidez lortuak.

24. artikulua.

Sozietatearen ogasunak ondoko baliabideak biltzen ditu:

_Sozietatearen ondasun, kredituak eta eskubideen errenta, emaitza edo korrituak.

_Berako Udalaren transferentzia arruntak, udal aurrekontuaren betearazpenaren ondoriozkoak.

_Berako Udalak ematen dizkion dirulaguntzak.

_Estatuak, autonomi erkidegoek, probintzia eta udalerriek, korporazioek eta norbanakoek ematen ahal dizkioten dirulaguntza, sorospen eta emariak.

_Bere ondasunak besterenduz eskuratzen dituen baliabideak.

_Kontratatzen dituen mailegu edo kreditu eragiketetatik datozenak.

_Entitate edo norbanakoek ematen dizkioten aurrerakinak eta sozietateak lortzen ahal dituen legezko dirusarrera guztiak.

VII. TITULUA

Sozietatearen ekitaldia eta urteko kontuak

25. artikulua.

Sozietatearen ekitaldiak urte naturalarekin bat eginen du, sozietatearen lehen ekitaldia kenduta, fundazioaren eskritura ematen den egunean hasiko baita eta urte bereko abenduaren 31n bukatuko.

26. artikulua.

Sozietatearen ekitaldi bakoitza itxi ondoko hiru hilabetean, Administrazio Kontseiluak aurkeztuko ditu urteko kontuak, kudeaketaren gaineko txostena eta emaitzak aplikatzeko proposamena, eta Udalbatzari aurkeztuko dizkio, Batzar orokorraren egikizunetan onets ditzan, egindako jarduera eta lortutako emaitzak azaltzeko txosten batekin batean.

Udalbatzak zentsura eginkizunak beteko ditu, zer zuzendu behar den adieraziz, eta, behar denean, erantzukizuna eskatuz.

27. artikulua.

Mozkinik izanez gero, Batzar Orokorrak xedatzen duen bezala banatuko da emaitza, Erantzukizun Mugatuko Sozietateei buruzko Legearen aginduzko determinazioekin bat etorrita.

28. artikulua.

Urteko kontuak onetsi ondoko hilabetean, horiek Merkataritzako Erregistroan aurkeztuko dira, legeak ezartzen duen gisan, eta kontuen onespenaren eta emaitzaren aplikazioaren ziurtagiriarekin batean.

29. artikulua.

Sozietateko organoek ezin izanen dute dohaintzarik edo dirulaguntzarik eskuzabaltasun hutsez eman.

30. artikulua.

Sozietateko gobernu organoetako kideak erantzule zibilak izanen dira Udalaren aitzinean, dolo, erru edo zabarkeria larriagatik eginez edo ez eginez kalte larriak egiten dizkietenean Udalari, sozietateari edo hirugarrenei, azken hauei Udalbatzak kalte-ordainak eman dizkien kasuan.

VII. TITULUA

Desegitea eta likidazioa

31. artikulua.

Sozietatea Batzar Orokorrak erabakita deseginen da edo, bertzenaz, Erantzukizun Mugatuko Sozietateei buruzko Legeak aurreikusten dituen arrazoiengatik, toki araubidearen gaineko legeriak aurreikusten dituen kasuetan eta Udalak osoko bilkuran zerbitzua kentzea erabakitzen duenean.

Deseginez gero, kontseilukideak ordezkari izatetik geldituko dira, kontratu berriak egiteaz eta obligazio berriak kontratatzeaz den bezainbatean.

32. artikulua.

Desegiteko erabakia hartuta, likidazio epea irekiko dira. Osoko bilkura berean, Batzar Orokorrak likidazio batzordea izendatuko du, kide kopuru bakoitia izanen duena. Kide horiek Erantzukizun Mugatuko Sozietateei buruzko Legeak ezartzen dituen eginkizunak eta likidazio lanak eginen dituzte.

Likidazio batzordearen izendapenak Administrazio Kontseiluaren ahalmenen bukaera ekarriko du. Likidatzaileak denbora zehaztu gabean ariko dira beren karguan. Likdazio epea irekitzen denetik hiru urte iragaten badira likidazioaren azken balantzea Batzar Orokorrari aurkeztu gabe, onets dezan, edozein kidek edo legezko interesa duen edonork likidatzaileak egozteko eskatzen ahalko dio sozietatearen egoitzako Lehen Auzialdiko epaileari, legeak aurreikusten duen gisan eskatu ere.

Likidazio aldia burutu arte Batzar Orokorrak urteko bilkura arruntak eta deitu behar diren bilkura berezi guztiak egiten jarraituko du, indarra duten xedapenen arabera.

Iragarkiaren kodea: L0617461