128. ALDIZKARIA - 2006ko urriaren 25a

I. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Plantilla Organikoa, Lan Eskaintza Publikoa, oposizioak eta lehiaketak

DEIALDIA, Funtzio Publikoaren zuzendari nagusiak irailaren 25eko 2357/2006 Ebazpenaren bitartez onetsia, Nafarroako Foru Komunitateko Administrazioaren eta haren erakunde autonomoen zerbitzuko Kirol eta Gazteriaren arloko erdi mailako teknikari izateko lanpostu bat oposizio bidez betetzekoa.

Funtzio Publikoaren zuzendari nagusiak, irailaren 25eko 2357/2006 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko Kirol eta Gazteriaren arloko erdi mailako teknikari izateko lanpostu bat oposizio bidez betetzeko deialdia onetsi du.

Hautapen prozesua ondoko hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsi zena, aipatu estatutua garatu eta burutzeko Sarrera Erregelamendua, gainerako aplikazio arauak eta deialdi honetako arauak.

1._Deialdiaren xedea.

1.1. Deialdi honen xedea Kirol eta Gazteriaren arloko erdi mailako teknikari izateko lanpostu bat oposizio bidez betetzea da, funtzionario araubidekoa eta B mailakoa, Nafarroako Kirol eta Gazteriaren Institutuari atxikia eta Iruñean aritzekoa.

1.2. Lanpostuek B mailako lansariak izanen dituzte, uztailaren 4ko 158/1984 Foru Dekretuaren bidez onetsitako Lansarien Behin-behineko Erregelamenduan eta, kasuan kasu, aplikatu beharreko gainerako xedapenetan ezarritakoari jarraikiz.

1.3. Halaber, deialdi honen bidez hautaprobak gainditu bai baina lanposturik lortzen ez duten izangaiekin aldi baterako kontratatuak izateko izangaien zerrenda bat osatuko da, deialdi honetako 10. arauan xedaturikoarekin bat.

2._Betebeharrak.

2.1. Oposizio honetan onartuak izateko, izangaiek, eskabideak aurkezteko epea amaitzen den egunean eta agiriak aurkezteko epearen barrenean (deialdiaren 7.2 atalean adierazia) eta lanpostuaren jabetza hartu arte, baldintza hauek bete beharko dituzte:

a) Espainiarra izatea, edo Europar Batasuneko bertze estatu batekoa, edo, Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, espainiarren eta Europar Batasuneko beste estatuetako edo aipatu nazioarteko itunek ukitutako estatuetako herritarren ezkontideek hartzen ahal dute parte; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira edo, gorakoak izanik, haien kontura biziz gero.

b) Adin nagusikoa izatea eta erretiroko adina ez izatea.

c) Unibertsitateko Diplomadun, Ingeniari Tekniko edo Arkitekto Tekniko titulua edo titulu baliokidea edukitzea, edo aipatu titulua eskuratzeko baldintza guztiak betetzea eskabideak aurkezteko epea amaitzen den egunean, edo Lizentziatura, Ingeniaritza edo Arkitekturako lehenengo hiru ikasturteak osorik gaindituak izatea.

Atzerrian lorturiko tituluak badira, homologazioaren egiaztagiria eduki beharko da.

d) B motako ibilgailuak gidatzeko baimena izatea.

e) Bete behar dituen eginkizunetan aritzeko adinako gaitasun fisiko eta psikikoa izatea.

f) Eginkizun publikoetan aritzeko desgaitu edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute beren estatuko funtzio publikoan sartzea eragozten dien diziplina zehapenik edo zigor penalik ez dutela.

2.2. Betebehar horiek izendatua izateko proposatzen den hautagaiak egiaztatu beharko ditu, deialdiaren 7.2 arauan ezarritako epean eta moduan.

3._Eskabideak.

3.1. Deialdian parte hartzeko eskabideak Nafarroako Gobernuko Erregistro Orokorrean (Karlos III.aren etorbidea, 2, atalondoa, 31002 Iruña) edo erregistro horretako beste edozein bulegotan (zerrenda 2006ko 65. Nafarroako ALDIZKARI OFIZIALean argitaratu zen, maiatzaren 31n) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legeko 38.4 artikuluan adierazitako bideren bat erabiliz, deialdia Nafarroako ALDIZKARI OFIZIALean argitaratu eta biharamunetik hogeita hamar egun naturaleko epean.

Eskabideak deialdi honen eranskinean dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuko Argibide Bulegoan dago eskuragarri. Interneten bidez ere lortzen ahal da, www.navarra.es helbidean, bai argitaratzen deneko Aldizkari Ofizialetik abiatuta, bai Zerbitzuen Katalogoko Enplegu Publikoan dagoen deialdiaren aiputik abiatuta.

3.2. Ezgaitasun aitortua duten lehiatzaileek, ariketak egin ahal izateko denbora edo baliabideetan egokitzapenik behar badute, zilegi izanen dute eskabidean eskatzea, eta hartarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Horrekin batera, legeen arabera ezgaitasunen bat dutela frogatzeko agiriaren kopia konpultsatua ere aurkeztu beharko dute, organo eskudunak emana.

3.3. Eskabidea osorik beteko da eta harekin batera espedientea irekitzeko eta azterketa egiteko eskubidea izateko tasa, 18 eurokoa, pagatu dela frogatzen duen agiria aurkeztuko da. Azterketa egiteko eskubidea izateko tasa pagatu ezik, izangaia baztertuko da.

Prozedura hauetako bat erabiliz ordaintzen ahalko da tasa hori:

_Behar bezala betetako ordainketa gutuna erabiliz; Foru Komunitateko Administrazioak Nafarroako finantza entitateetan dituen kontuetako batean dirua sartu dela frogatuko da. Arestian aipatutako webgunean, deialdiaren iragarkian, ordainketa gutuna eredua ageri da.

_Sarrera esku-dirutan edo bankuko transferentzia bidez eginez, Banestoko (Banco Español de Crédito) 00308124 87 0870002271 kontuan; horrelakoetan ordain-agirian datu hauek jarri beharko dira nahitaez:

-Izangaiaren izen-deiturak.

-NAN/IFZ.

-Ordainketa zein kontutan egiten den, haren zenbakia.

-Kontzeptua: Oposizioak.

-Deialdiaren xede den lanpostua.

Honako hauek ez dute tasarik ordaindu beharko:

a) %33ko edo gehiagoko ezgaitasun aitortua dutela frogatzen duten pertsonek, organo eskudunak luzaturiko jatorrizko agiriaren edo behar bezala konpultsaturiko fotokopiaren bidez.

b) Hautaproben deialdia egin aurretik hilabete batez edo luzaroago lan-eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon den bitartean eskainitako inolako lan egokiri uko egin ez izana eta lanbide sustapen, prestakuntza edo aldaketarako ekintzetan parte hartzeari uko egin ez izana, justifikaturiko kasuetan izan ezik, eta, horrez gainera, lanbide arteko gutxieneko soldatatik gorako den dirusarrerarik ez izatea hilabetero.

Lan-eskatzailea dela frogatzeko, Enplegu Bulegoak emandako agiria aurkeztu beharko da. Bertan, lan-eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ez eta lanbide sustapen, prestakuntza edo aldaketarako ekintzetan parte hartzeari ere, justifikaturiko kasuetan izan ezik.

Hilabetero lanbide arteko gutxieneko soldatatik gorako dirusarrerarik ez duela interesatuaren adierazpenaren bidez frogatuko da. Adierazpen eredua Nafarroako Gobernuko Informazio-Bulegoan eskuratzen ahalko da, edo bestela internet bidez, arestian emandako helbidean.

3.4. Eskabideak aurkezteko epea ezin izanen da luzatu.

3.5. Eskabidean atzematen diren akats materialak edo egitezkoak ofizioz edo interesatuak eskaturik zuzentzen ahalko dira, noiznahi ere.

4._Izangaien onarpena eta erreklamazioak.

4.1. Eskaerak aurkezteko epea bukaturik, Funtzio Publikoaren zuzendari nagusiak ebazpena emanen du izangai onartu eta baztertuen behin-behineko zerrenda onesteko, eta Nafarroako ALDIZKARI OFIZIALean argitara dadila aginduko du.

4.2. Izangai baztertuek hamar egun balioduneko epea izango dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, akatsik egin badute, zuzentzeko.

4.3. Erreklamazioetarako epea bukatutakoan eta horiek ebatzita, Funtzio Publikoaren zuzendari nagusiak onartu eta baztertuen behin betiko zerrenda onesten duen ebazpena emanen du, eta Nafarroako ALDIZKARI OFIZIALean argitara dadila aginduko.

4.4. Izangaiei egotziriko arrazoiengatik baztertzen direnei ez zaizkie azterketa egiteko eskubideak itzuliko.

5._Epaimahaia.

5.1. Epaimahaiak kide hauek izanen ditu:

_Mahaiburua: Javier Trigo Oubiña, Nafarroako Kirol eta Gazteriaren Institutuko zuzendari kudeatzailea.

_Ordezkoa: José María Echeverría Larrea, Nafarroako Kirol eta Gazteriaren Institutuko Kirol zuzendariordea.

_Mahaikidea: Ignacio Ausín Iñigo, Nafarroako Kirol eta Gazteriaren Institutuko Gazteriaren arloko goi mailako teknikaria.

_Ordezkoa: Luis Vicente Echarri, Nafarroako Kirol eta Gazteriaren Institutuko Azpiegiturak Kudeatu eta Ikuskatzeko Bulegoko burua.

_Mahaikidea: Primitivo Sánchez Sanz, Nafarroako Kirol eta Gazteriaren Institutuko Jokoen Bulegoko burua.

_Ordezkoa: Alfonso Gogorzena Rebolé, Nafarroako Kirol eta Gazteriaren Institutuko Teknifikazio eta Selekzio Bulegoko burua.

_Mahaikidea: Nafarroako Kirol eta Gazteriaren Institutuko Langileen Batzordearen ordezkari bat, batzordeak berak proposatua.

_Ordezkoa: Nafarroako Kirol eta Gazteriaren Institutuko Langileen Batzordearen ordezkari bat, batzordeak berak proposatua.

_Mahaikide idazkaria: Ricardo Ruano Enériz, Nafarroako Kirol eta Gazteriaren Institutuko Idazkaritza Nagusiaren eta Azpiegituren Zerbitzuko zuzendaria.

_Ordezkoa: Marta Alvarez Alonso, Gizarte Ongizate, Kirol eta Gazteria Departamentuko idazkari tekniko nagusia.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Organo kolegiatuaren eraketak eta jardunak balio izateko, mahaiburuak eta mahaikide idazkariak edo haien ordezkoek bertan egon beharko dute.

5.3. Epaimahaiko kideek ez dute parte hartuko, eta organo dei egileari horren berri emanen diote, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretakoren batean baldin badaude.

Izangaiek, halaber, zilegi dute mahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren arauak ulertu eta aplikatzeko moduaren inguruan sortzen diren arazo guztiak.

5.5. Epaimahaiak aholkulari adituen laguntza izan dezake proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta horietan bakarrik emanen diote laguntza epaimahaiari.

6._Oposizioa nola eginen den.

6.1. Oposizioa 2007ko apirilean hasiko da. Onartu eta baztertuen behin betiko zerrenda onesten duen Ebazpenean berean finkatuko dira probak hasteko tokia, eguna eta ordua.

Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

6.2. Oposizioak ariketa hauek izanen ditu:

Lehena._50 galdera erantzun beharko dira, deialdiaren II. eranskineko gaiei buruz. Galderek hiruna erantzun izanen dituzte, baina horietariko bat bakarrik egonen da ongi. Ariketa egiteko izangaiek 40 minutu izanen dituzte. Erantzun hutsak zehatuko dira.

Bigarrena._Teorikoa, zotz eginda gai zerrendako bigarren eta hirugarren zatietatik aukeratuko diren bi gai idatziz azaltzea. Ariketa hau egiteko hiru ordu izanen dituzte oposiziogileek.

Hirugarrena._Praktikoa. Idatziz, gehienez ere lau orduz gai zerrendari buruz kasu bat garatu beharko da.

Bigarren eta hirugarren ariketak plika sistemaren bidez eginen dira.

6.3. Oposizioko ariketen balorazioan 80 puntu eman daitezke gehienez ere, honela banatuak:

_Lehenbizikoa: gehienez 20 puntu.

_Bigarrena: gehienez 30 puntu. Gai bakoitzean gehienez 15 puntuko balorazioa ematen ahal da.

_Hirugarrena: gehienez 30 puntu.

6.4. Oposizioko ariketak baztergarriak izanen dira. Bazterturik geldituko dira horietako ariketaren batean gutxienez gehieneko puntuazioaren erdia lortzen ez duten izangaiak. Halaber, bazterturik geldituko da bigarren ariketako gaietako edozeinetan 0 puntuko kalifikazioa ematen zaiona.

6.5. Ariketak zuzendu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo proba edo ariketa egiteko tokia, eguna eta ordua, gutxienez 48 ordu lehenago.

6.6. Ariketa bakoitzerako dei bakarra eginen da. Izangaiek nortasun agiri nazionala, pasaportea edo gida-baimena eraman beharko dute. Azterketara agertzen ez direnak edo arestian aipatutako agirietako baten bidez beren nortasuna egiaztatzen ez dutenak oposiziotik baztertuko dira.

6.7. Hautaprobak egiteko, ezgaitasun aitorturen bat dutenentzat bidezkoak diren denbora eta baliabide egokitzapenak eginen dira, eskabidean azaldutakoaren arabera.

7._Probak gainditu dituztenen zerrenda, izendapen proposamena eta agirien aurkezpena.

7.1. Hautaprobak amaiturik, epaimahaiak jendaurrean jarriko du probak gainditu dituztenen zerrenda, oposizioan lortutako kalifikazioekin, Nafarroako Gobernuaren iragarki oholean. Gero, zerrenda hori Funtzio Publikoaren zuzendari nagusiari igorriko dio, probak puntuazio altuenekin gainditu dituen izangaia izendatzeko proposamenarekin eta espediente osoarekin batera. Proposamen hori Nafarroako ALDIZKARI OFIZIALean argitaratuko da.

Berdinketarik gertatuz gero, hirugarren ariketan puntu gehien lortu dutenen alde ebatziko da. Eta hala ere berdinduta segitzen badute, bigarren ariketan lortutako puntuazioa hartuko da kontuan.

7.2. Izendapen proposamena Nafarroako ALDIZKARI OFIZIALean argitaratu ondoko 30 egun naturaleko epean, proposatutako izangaiak inprimaki berariazko batzuk jaso eta honako agiri hauek aurkeztu behar ditu Funtzio Publikoaren Zuzendaritza Nagusian:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangai proposatuak:

a) Nortasun Agiri Nazionalaren bi fotokopia konpultsatu, edo izangaiaren hiritartasuna eta nortasuna frogatzen dituen beste agiri baliokideren batenak.

b) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.

c) Laneko Arriskuei Aurrea hartzeko Atalak emandako txostena, interesatuak karguan aritzea eragotziko liokeen eritasun edo akats fisiko edo psikikorik ez duela frogatzeko.

Izangai proposatuak ezgaitasunen bat alegatu badu, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko du, balorazio eta orientazio talde eskudunek luzatua.

d) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizi ez izanaren zinpeko aitorpena.

Izangaiak nazionalitate espainiarra ez badu, agiri bat aurkeztu beharko du, bere Estatuko Funtzio Publikoan sartzea eragozten dion diziplina zehapenik edo zigor penalik ez duela adierazteko.

e) Zin egin edo hitz ematea, Nafarroako Foru Eraentza errespetatu, Konstituzioari eta legeei men egin eta karguari dagozkion eginkizunak zuzen beteko dituela.

f) B motako ibilgailuak gidatzeko baimenaren kopia konpultsatua.

g) Funtzio Publikoaren Zuzendaritza Nagusiak eskatzen dizkion gainerako agiriak.

Izangai proposatua deialdi hau egin ez duen Nafarroako beste Administrazio Publikoren bateko langile finkoa edo Nafarroako Foru Komunitateari eskualdatutako Justizia Administrazioko zerbitzuei atxikitako langile finkoa bada, gainera, aurreko administrazioko espediente pertsonalean ageri diren inguruabar eta aurrekari guztiak frogatzen dituen ziurtagiria aurkeztu beharko du, hots, sarrerari, antzinatasunari, mailari, egoera administratiboari eta abarrei buruzkoa.

7.2.2. Izangaia Nafarroako Foru Komunitateko Administrazioaren edo haren erakunde autonomoen zerbitzuko langile finkoa bada:

a) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.

b) B motako ibilgailuak gidatzeko baimenaren kopia konpultsatua.

c) Funtzio Publikoaren Zuzendaritza Nagusiak eskatzen dizkion gainerako agiriak.

Izangaiak ezgaitasunen bat alegatu badu, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko du, balorazio eta orientazio talde eskudunek luzatua.

7.3. Aipatu epearen barnean, eta aski arrazoituriko ezinbesteko kasuak izan ezik, aipatu agiriak aurkezten ez badira proposaturiko izangaia ezin izanen da izendatu eta, beraz, egintza guztiak deuseztaturik geldituko dira, betiere bere eskabidearen faltsukeriagatik legokiokeen erantzun beharra galarazi gabe.

7.4. Aurreko atalean aurreikusitakoa gertatuz gero, Funtzio Publikoaren zuzendari nagusiak probak gainditu dituztenen zerrendan, 7.1. atalean aipatutakoan, hurrengoa den izangaiarekin beteko du baja, eta horrekin ere aurreko ataletan adierazitako moduan jokatuko da.

8._Izendapena, lanpostuaren esleipena eta jabetza-hartzea.

8.1. Funtzio Publikoaren zuzendari nagusiak Nafarroako Foru Komunitatearen funtzionario izendatuko du aurreko arauetan xedatutakoa betetzen duen izangaia, Kirol eta Gazteriaren arloko erdi mailako teknikarien lanetan aritzeko, eta dagokion lanpostu hutsa esleituko dio, ebazpen baten bidez.

8.2. Izendapenak eta lanpostuaren jabetza hartzeak nomina eta plantillako funtzionario bilakatuko du izendatua, Nafarroako Foru Komunitateko Administrazioko funtzionarioentzat indarra duten xedapenetan ezarrita dauden eskubide eta betebehar guztiak dituela. Gizarte Segurantzako araubide orokorrean inskribatu eta kidetuko da, araubide horretan aurreikusitakoaren babesean.

Aurrekoa gorabehera, Nafarroako Administrazio Publikoen Zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein bahituretxetako eskubide pasiboen araubidekoak direnen kasuan, bi aukera izanen dituzte: Nafarroako Foru Komunitateko Administrazioko bahituretxean segitzea, martxoaren 5eko 10/2003 Foru Legearen bidez arauturiko eskubide pasiboen araubideak babesturik, edo Gizarte Segurantzaren Araubide Orokorrean sartzea.

8.3. Izendatutako izangaiak destinoko herrian bizi beharko du, eta horretarako, udalerri horretan eduki beharko du bizileku finkoa. Administrazio organo eskudunek destinoa aldatzen ahalko dute, aplikatzekoa den arautegian ezarritakoarekin bat.

8.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den arautegian ezarritakoarekin bat.

8.5. Izendapena Nafarroako ALDIZKARI OFIZIALean argitaratuko da eta izangai izendatuak hilabeteko epean jabetu beharko du bere lanpostuaz, izendapenaren jakinarazpenetik kontatzen hasita.

Aipatu epean eta ezinbesteko kasuetan izan ezik, izangaiak ez baldin badu lanpostua bere egiten, Foru Komunitateko Administrazioaren funtzionario izateko eskubide guztiak galduko ditu. Hala bada, 7.4 atalean ezarritakoari jarraikiko zaio.

8.6. Izangairen bat funtzionario bilakatu eta lanpostuan batere aritu gabe zuzenean eta berak eskatuta borondatezko eszedentzia ematen bazaio jabetza hartzearen egunetik beretik, data hartan bertze administrazio publiko batean ari delako, dagokion lanpostu hutsa beteko da deialdiko 7.4 atalak agintzen duen bezala.

9._Aldi baterako kontratuetarako izangaien zerrenda

9.1. Nafarroako Administrazio Publikoan sartzeko Erregelamenduaren 42. artikuluan, lanpostuak aldi baterako betetzeko kudeaketa arauak onetsi zituen Lehendakaritza, Justizia eta Barne kontseilariaren azaroaren 14ko 146/2005 Foru Aginduan eta arau honexetan ezarritako prozedurari jarraikiz, aldi baterako kontrataziorako izangaien zerrenda hauek sortuko dira:

_Probak gainditu bai baina lanposturik lortu ez duten izangaien zerrenda.

_Hautapen prozesuaren ariketa guztiak gainditu ez dituzten izangaien zerrenda.

9.2. Epaimahaiaren espedientea jasota, Funtzio Publikoaren zuzendari nagusiaren ebazpen baten bidez, hautapen prozesua gaindituta ere lanposturik gabe gelditu diren izangaiei eta deialdian ezarritako azkenaurreko ariketa gainditu dutenei hamar egun balioduneko epea emanen zaie, ebazpena argitaratu eta biharamunetik hasita, ondoko dokumentazio hau aurkezteko:

a) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, sartzeko prozesuan parte hartzeko eskabideak aurkezteko epean titulua eskuratzeko moduan egoten dela frogatzen duen ziurtagiria.

b) B motako ibilgailuak gidatzeko baimenaren kopia konpultsatua.

Ebazpen hau Nafarroako ALDIZKARI OFIZIALean argitaratuko da, eta langileen zerrendak Nafarroako Gobernuko iragarki-oholean (Karlos III.aren etorbidea, 2, atalondoa, Iruña).

Eskatzen diren agiriak aipatu epean aurkezten ez dituztenak (aski justifikatutako ezinbesteko kasuetan izan ezik) eta eskatutako baldintzak betetzen ez dituztenak ez dira sartuko aldi baterako kontratuetarako izangaien zerrendan, eta deialdian parte hartzeagatiko eskubide guztiak galduko dituzte, deusetan ukatu gabe, betiere, parte hartzeko eskabidea faltsutzeagatik legokiekeen erantzukizuna.

9.3. Sartzeko prozeduraren eskabideak aurkezteko epea bukatzen den egunerako bete beharko dira baldintzak, eta hautaprobek dirauteino eta kontratazioaldiak iraun bitarte bete beharko dira.

9.4. Dokumentazioa aurkezteko epea bukaturik, Funtzio Publikoaren zuzendari nagusiaren ebazpen baten bidez, aldi baterako kontratuetarako izangaien zerrenda hauek onetsiko dira eta Nafarroako Gobernuaren iragarki-oholean argitaratuko (Karlos III.aren etorbidea, 2, atalondoa, Iruña):

a) Probak gainditu bai baina lanposturik lortu ez duten izangaien zerrenda.

b) Deialdiaren azkenaurreko ariketa gainditu bai baina lanposturik gabeko gaindituen zerrendan ez daudenen zerrenda.

9.5. Hauxe izanen da aldi baterako kontratazioen zerrendaren ordena: oposizioa gainditu bai baina lanposturik lortu ez dutenen kasuan, hautapen prozesuan lortutako puntuazioaren arabera; gainerako izangaien kasuan, gainditutako ariketetan lortutako puntuazioen batura. Berdinketarik dagoenean nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

10._Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da Funtzio Publikoaren zuzendari nagusiari zuzenduta, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdi honen eta bere arauen kontra eta arauak aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barne kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik kontatuta.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2006ko irailaren 25ean._Funtzio Publikoaren zuzendari nagusia, Alberto Andérez González.

I. ERANSKINA

Eskabidea

Izena: ...................................., adinez nagusia. Nortasun Agiri Nazionala: .............. (edo balio bereko beste agiriren bat). Sorteguna: ................... Sorterria: ....................., naziotasuna: ............, orain bizi den udalerria: (...........), karrika: ............, posta kodea: .............., telefonoa: .........., laneko telefonoa: ..........

Azaltzen dut:

Nafarroako Foru Komunitateko Administrazioaren eta bere erakunde autonomoen zerbitzuko .............. izateko ....... lanpostu ................... bidez betetzeko deialdian parte hartzeko onar dezatela eskatzen duela, behean aipatzen den txandan (deialdia ...... Nafarroako ALDIZKARI OFIZIALean argitaratu zen, ......(e)an).

f Txanda irekia

f Igoera txanda*

f Ezgaitasunen bat dutenendako txanda*

Hautaprobak gainditzen ez baditut, lanpostuak behin-behinekoz betetzeko aukeraz baliatu nahi dudala, honako esparruotako batean:

f Administrazio erroa*

f Osasunbidea-Nafarroako Osasun Zerbitzua*

f Nafarroako Gizarte Ongizatearen Institutua*

(Esparruetako bakar bat aukeratu daiteke)

Ez dudala karguan aritzea galarazten didan eritasunik edo akats fisikorik nahiz psikikorik.

Indarra duten xedapenetan ezarritako ezintasunik ez dudala.

Ez naizela diziplinako espediente bidez ezein administrazio publikoren zerbitzutik kanpo utzia izan eta ez nautela eginkizun publikoak betetzeko gaitasunik gabe utzi.

Deialdian eskatzen den titulazioaren jabe naizela.

Azterketa eskubideak ordaindu ditudala deialdian ezarritako moduan eta horren gordekina erantsi dudala, edo erantsitako agirien bidez frogatzen dudala tasa ordaintzetik salbuetsita nagoela.

Eskabideak aurkezteko epearen azken egunean beharkizun guztiak betetzen ditudala.

f Ezgaitasuna dudala eta, beraz, behar ditudan egokitzapenak eskatzen ditudala, haietarako arrazoiak adierazita. (Beste orri batean azaldu behar dira eskatzen diren egokitzapenak eta haietarako arrazoiak).

f Ezgaitasuna frogatzen duen agiria aurkezten dudala, erakunde eskudun batek emana.

f Euskararen gaitasunaren agiria edo ofizialki baliokidea den beste titulu bat aurkezten dudala*

f Euskara maila jakiteko proba egitea eskatzen dudala*

f Frantseseko eta ingeleseko nahikotasun frogak egitea eskatzen dudala.*

Horrenbestez,

Eskabide hau ontzat hartu eta aipatu deialdian onartua izatea eskatzen dut.

Iruñean, .......(e)ko ..............aren ........(e)an.

(Sinadura)

(*) Bidezkoa bada.

NAFARROAKO GOBERNUA. LEHENDAKARITZA, JUSTIZIA ETA BARNE DEPARTAMENTUA.

FUNTZIO PUBLIKOAREN ZUZENDARITZA NAGUSIA.

II. ERANSKINA

Lehen zatia

1. gaia._Espainiako 1978ko Konstituzioa. Estatuko aginteak. Koroa. Gorte Nagusiak. Gobernua eta Administrazioa. Botere judiziala Konstituzioan.

2. gaia._Zuzenbide Publikoaren iturburuak: legeak eta horien motak. Lege dekretuak. Legegintzako foru dekretuak. Nazioarteko itunak.

3. gaia._Administrazio Zuzenbidearen iturburuak: erregelamendua eta erregelamendu-ahalmena. Erregelamendu motak. Erregelamendu-ahalmenaren mugak eta haren kontrola.

4. gaia._Administrazio egintza (I): kontzeptua, motak eta osagaiak.

5. gaia._Administrazio egintza (II): Baldintzak, eraginkortasuna, deuseztasuna eta deuseztagarritasuna.

6. gaia._Administrazio prozedura erkidea (I). Kontzeptua eta izaera. Hasiera, antolamendua, instrukzioa eta bukaera.

7 gaia._Administrazio prozedura erkidea (II). Administrazioarekiko errekurtsoak: printzipio orokorrak eta motak.

8. gaia._Nafarroako Parlamentua edo Gorteak: osaera, antolakuntza eta eginkizunak.

9. gaia._Datu pertsonalen babesa. Datu pertsonalak babesteari buruzko abenduaren 13ko 15/1999 Lege Organikoa. Xedapen orokorrak. Datu babesaren printzipioak. Pertsonen eskubideak. Titulartasun publikoko fitxategikoak. Administrazio publikoen arau-hausteak.

10. gaia._Datu pertsonalen babesa. Datu pertsonalak dituzten fitxategi automatizatuen Segurtasun Neurrien gaineko Erregelamendua. Xedapen orokorrak. Neurtasun neurrien mailak. Arau-hausteak eta zehapenak.

11. gaia._Laneko arriskuei aurrea hartzeari buruzko 31/1995 Legea. Xedea eta esparrua. Eskubideak eta betebeharrak.

12. gaia._Apirilaren 20ko 135/1998 Foru Dekretua, laneko arriskuei aurrea hartzeko arautegia Foru Komunitateko Administrazioaren eta haren erakunde autonomoen eremurako egokitzen duena: Nork bere instalazioak babesteko plana. Edukia.

13. gaia._Nafarroako Gobernuari eta lehendakariari buruzko Foru Legea.

14. gaia._Nafarroako Foru Komunitateko Administrazioari buruzko Foru Legea: Printzipio orokorrak. Herritarren eskubideak. Nafarroako Foru Komunitateko Administrazioaren jarduketa.

15. gaia._Nafarroako Foru Komunitateko Administrazioari buruzko Foru Legea: Zehatzeko ahalmena. Ondare erantzukizuna.

16. gaia._Nafarroako Foru Komunitateko Administrazioari buruzko Foru Legea: Nafarroako Foru Komunitateko Administrazioaren antolaketa. Erakunde publikoak: Erakunde autonomoen araubidea.

17. gaia._Nafarroako Foru Komunitateko arartekoa. Comptos Ganbera. Nafarroako Kontseilua.

18. gaia._Nafarroako Administrazio Publikoen zerbitzuko Langileen Estatutua (I): Langile motak. Funtzionario publikoen hautapena. Funtzionario izaera eskuratzea eta galtzea.

19. gaia._Nafarroako Administrazio Publikoen zerbitzuko Langileen Estatutua (II): Administrazio karrera. Administrazio egoerak. Lanpostuak betetzea. Ordainsariak.

20. gaia._Nafarroako Ogasun Publikoaren Araubidea: Nafarroako Ogasun Publikoaren eskubide eta betebeharrak. Nafarroako Aurrekontu Orokorrak: edukia eta onespena; gastuen sailkapen ekonomikoa; betearaztea eta likidazioa.

21. gaia._Nafarroako Ogasun Publikoaren Araubidea: Ekonomia eta finantza arloetako jarduera kontrolatzea: Kontu-hartzailetzaren araubidea: barne kontrolerako erregelamendua eta kontu-hartzailetzaren prozedurak.

22. gaia._Nafarroako Aurrekontu Orokorretako gastu eta dirusarrera publikoen sailkapen ekonomikoa.

23. gaia._Maiatzaren 17ko 205/2004 Foru Dekretua, fakturazio betebeharrak arautzen dituen Erregelamendua onesten duena.

24. gaia._Nafarroako Foru Komunitateko administrazioko eta haren erakunde autonomoetako tasa eta prezio publikoei buruzko martxoaren 27ko 24/2001 Foru Legea.

25. gaia._Fundazioen araubidea Nafarroaren esparruan. Fundazioei eta babes jarduerei buruzko uztailaren 2ko 10/1996 Foru Legea.

26. gaia._Kontratu Publikoei buruzko Foru Legea: Aplikazio eremua. Nafarroako Administrazio Publikoen kontratuei buruzko orotariko eta berariazko arauak. Kontratazio organoak. Kontratuak esleitu, betearazi eta berrikusteko orotariko arauak. Kontratu motak eta haien definizioak.

27. gaia._Kontratu Publikoei buruzko Foru Legea: laguntza kontratua. Xedea, prestakuntza, exekuzioa eta aldaketa. Kontratua bete eta bukatzea.

28. gaia._Kontratu Publikoei buruzko Foru Legea: obra kontratua. Xedea, prestakuntza, exekuzioa eta aldaketa. Kontratua bete eta bukatzea.

29. gaia._Nafarroako Foru Komunitateko Administrazioaren eskumenen araubidea hornidura eta laguntza kontratuak izenpetzeko.

30. gaia._Nafarroako Foru Komunitateko Administrazioaren araubidea obrak, zerbitzuak, hornidurak eta jarduerak Nafarroako Foru Komunitateko sozietate publikoen bidez zuzenean burutzeko.

31. gaia._Dirulaguntzei buruzko azaroaren 9ko 11/2005 Foru Legea. Xedapen komunak. Dirulaguntzak emateko prozedurak. Justifikazioa, egiaztapena, ordainketa, jarraipena eta kontrola.

32. gaia._Ikuskizun Publikoak eta Josteta Jarduerak arautzen dituen martxoaren 13ko 2/1989 Foru Legea.

Bigarren zatia

1. gaia._Kirolari buruzko urriaren 15eko 10/1990 Legea.

2. gaia._Espainiako Kirol Federazioen eta Estatu osoko Kirol Elkarteen Erregistroaren araubidea.

3. gaia._Kirol selekzioak. Nafarroako kirol selekzioak: araubidea. Nazioarteko kirol jardueren eta ordezkaritzaren araubidea.

4. gaia._Kirol teknikarien tituluen araubidea. Kirol teknikarien tituluak ezartzeko aldi baterako araubidea. Tituluen eta kirol prestakuntzaren araubidea Nafarroan.

5. gaia._Goi mailako kirolaren araubidea. Nafarroaren eremuko goi mailako kirola. Sustapena eta laguntzak.

6. gaia._Kirolari profesionalen lan harreman bereziaren araubidea. Aplikazio esparrua: kirolariak, kirol teknikariak eta entrenatzaileak. Gizarte babesa: Gizarte Segurantzaren araubidea.

7. gaia._Zerbitzuen prestazioa kirol jardueren esparruan. Lan, boluntariotza eta merkataritza harremanen motak eta araubidea. Gizarte babesa: Gizarte Segurantzaren araubideak.

8. gaia._Kirol aseguruen araubidea. Motak eta modalitateak. Nahitaezko kirol asegurua. Nafarroako kirol aseguruen araubidea Nafarroan.

9. gaia._Dopingaren araubide juridikoa kirolean. Organoak eta eskumenak. Dopingaren kontrako Batzorde Nazionala. Dopingaren araubidea Nafarroan.

10. gaia._Eskumenak kirolaren arloan: Estatuaren eskumenak eta Foru Komunitateko administrazioaren eskumenak. Toki entitateen eskumenak.

11.gaia._Kirol eta Gazteriaren Nafarroako Institutua: izaera. Zuzendaritza organoak. Eskumenak eta eginkizunak kirolaren arloan. Kirolaren Azterlan, Ikerketa eta Medikuntzako Zentroa

12. gaia._Kirol eta Gazteriaren Nafarroako Institutua: izaera. Zuzendaritza organoak. Eskumenak eta eginkizunak kirol eta gazte azpiegituren, kontratuen, kudeaketa ekonomikoaren eta langileen arloetan.

13. gaia._Kirol arloan eskumenak dituzten organo kolegiatuak, Nafarroako Foru Komunitateko Administrazioari atxikiak. Izaera. Eskumenak eta eginkizunak.

14. gaia._Nafarroako Kirolaren Kontseilua. Araubidea. Osaera.

15. gaia._Kirol jarduerak Nafarroaren esparruan. motak eta ezaugarriak.

16. gaia._Nafarroako Kirol Erakundeak: motak. Nafarroako Kirol Erakundeen Erregistroa.

17. gaia._Nafarroako Kirol Federazioak. Osatzeko araubidea. Eginkizunak. Federazioaren lizentzia.

18. gaia._Nafarroako Kirol Federazioak. Egitura organikoa eta funtzionatzeko araubidea. Diru, agiri eta erantzukizun arloetako araubidea.

19. gaia._Nafarroako kirol federazioetako hauteskundeak.

20. gaia._Nafarroako Kirol Erakundeak: Nafarroako Kirol Klubak.

21. gaia._Zehapen araubidea kirol arloan.

22. gaia._Kirol diziplinaren araubidea Nafarroaren esparruan. Errekurtsoak. Prozedurak.

23. gaia._Nafarroako Kirol Justiziaren Batzordea. Izaera. Osaera. Eginkizunak. Funtzionatzeko araubidea.

24. gaia._Erabilera publikoko kiroldegien araubidea Nafarroan. Lizentziak eta baimenak. Tabakokiak kiroldegietan saldu, hornitu eta erretzea. Arautegia.

25. gaia._Kiroldegien plangintza Nafarroako Kirolari buruzko Legean. Nafarroako kiroldegien errolda.

26. gaia._Nafarroako Foru Komunitateko arautegia kirol hornidurak Nafarroako Foru Komunitatean erabiltzeko segurtasunaren arloan.

27. gaia._123/2003 Foru Dekretua, maiatzaren 19koa, erabilera kolektiboko igerilekuen baldintza tekniko-sanitarioak ezartzen dituena.

28. gaia._Kirolariendako sariak Nafarroako Foru Komunitatean. Araubidea.

29. gaia._Gizarte interesa adierazteko araubidea kirol jardueretan. Kirol babeseko kontratua. Kirol babesaren araubidea eta enpresen arteko elkarlana Nafarroan. Kirol babeseko fiskalitatea. Produktuen edo zerbitzuen publizitatearen mugak.

30. gaia._Kirol jarduerak Nafarroan antolatu eta egiteko baimenen araubidea. Arautegia.

31. gaia._Kirol jardueren fiskalitatea Nafarroan: Sozietateen gaineko zerga. Balio Erantsiaren gaineko Zerga Pertsona Fisikoen Errentaren gaineko Zerga.

32. gaia._Kirol lehiaketa eta ikuskizunetan bortizkeriari, arrazakeriari, xenofobiari eta intolerantziari aurrea hartzeko araubidea. Organoak eta eskumenak. Kiroletako bortizkeriaren kontrako Batzorde Nazionala. Nafarroaren esparrua. Kiroltasuna sustatzeko kanpaina.

Hirugarren zatia

1. gaia._Nafarroako Kirol eta Gazteriaren Institutua. Izaera. Zuzendaritza organoak. Eskumenak eta eginkizunak gazteriaren arloan.

2. gaia._Boluntariotza: Nafarroako arauak. Bolondres Lanari buruzko Foru Legea.

3. gaia._Elkarteak osatzeko eskubideari buruzko Lege Organikoa. Esparrua eta gazte elkarteei buruzko arauak.

4. gaia._Nafarroako Foru Komunitateko Gazteriaren Kontseilua. Araubidea. Eginkizunak.

5. gaia._Gazteak informatzeko zerbitzuak. Arauak.

6. gaia._Gazteendako sariak Nafarroako Foru Komunitatean. Araubidea.

7. gaia._Gazteekin egiten diren Jardueretarako Nafarroako Eskola.

8. gaia._Aisialdirako Eskolak Nafarroan. Onarpena. Funtzionamendua.

9. gaia._Aisialdirako zuzendariaren eta aisialdirako begiralearen tituluak Nafarroan. Araubidea.

10. gaia._Gazte Erakundeen Errolda Nafarroan. Araubidea.

11. gaia._Gazteekin aire zabalean egiten diren jardueren araubidea Nafarroako Foru Komunitatean.

Oharra: Gai guztiak deialdi hau Nafarroako ALDIZKARI OFIZIALean argitaratzen denean indarra duen legeriari jarraikiz baloratuko dira, baina egun horren ondoren onetsitako arau aldaketen ekarpenak baloratzen ahalko ditu epaimahaiak.

Iragarkiaren kodea: F0616356