Iragarkia

91. ALDIZKARIA - 2005eko abuztuaren 1a

I. NAFARROAKO FORU KOMUNITATEA

1.1. XEDAPEN OROKORRAK

1.1.4. Ebazpenak

592/2005 EBAZPENA, ekainaren 28koa, Eskola eta Lanbide Irakaskuntzaren zuzendari nagusiak emana, Haur Hezkuntzako Bigarren Zikloa, Lehen Hezkuntza, Derrigorrezko Bigarren Hezkuntza, Batxilergoa, Lanbide Heziketa eta Lanbide Hastapenerako Programak ematen dituzten ikastetxe publikoen antolaketa eta jarduna 2005-2006 ikasturtean arautuko dituzten jarraibideak onesten dituena.

Eskola Antolamendu eta Berriztapenerako Zerbitzuko zuzendariak adostasun txostena aurkeztu du ebazpen hau onesteko; ebazpen honen xedea da ikastetxeetako erregelamendu organikoen, uztailaren 6ko 225/1998 Foru Dekretuaren, uztailaren 16ko 257/1998 Foru Aginduaren eta uztailaren 16ko 258/1998 Foru Aginduaren osagarri diren jarraibide batzuk onestea, arestian aipatutako arauetan orokorrean aipatzen diren zenbait alderdi zehatzen gainean xehetasunak eman eta garatzeko balio dutenak, 2005-2006 ikasturtean ikastetxeen antolaketa egokia eta funtzionamendu ona lortzeko eta horrela heziketa lan koherente eta eragilea bermatzeko.

Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1.d) artikuluak ematen dizkidan ahalmenak erabiliz,

EBATZI DUT:

1. Ebazpen honen eranskinetan ageri diren jarraibideak onestea. Aipatu jarraibide horiek Nafarroako Foru Komunitatearen esparruan Haur Hezkuntzako Bigarren Zikloa, Lehen Hezkuntza, Derrigorrezko Bigarren Hezkuntza, Batxilergoa, Lanbide Heziketa eta Lanbide Hastapenerako Programak ematen dituzten ikastetxe publikoen antolaketa eta jarduna arautzen dituzte 2005-2006 ikasturterako.

2. Ebazpen honek aipatutako jarraibideak ikastetxe pribatuei, hots, itunduak direnei, eta dirulaguntza jasotzen dutenei aplikatuko zaizkie, indarra duten arauei jarraikiz, dagozkien afera orotan.

3. Ebazpen honen aurka gora jotzeko errekurtsoa aurkez daiteke, Hezkuntza Departamentuko kontseilariari zuzendua, argitaratu eta biharamunetik hasita hilabeteko epean.

4. Ebazpen hau eta eranskinak igortzea Eskola Antolamendu eta Berriztapenerako Zerbitzura, Zerbitzuak Ikuskatzeko eta Ikuskapen Teknikorako Zerbitzura eta Ikasketak Antolatzeko Atalera, behar diren ondorioak izan ditzaten.

5. Ebazpen hau eta eranskinak Nafarroako ALDIZKARI OFIZIALean argitaratzea.

Iruñean, 2005eko ekainaren 28an._Eskola eta Lanbide Irakaskuntzaren zuzendari nagusia, Fermín Villanueva Ferreras.

I. ERANSKINA

Haur Hezkuntzako Bigarren Zikloa eta Lehen Hezkuntza ematen dituzten ikastetxe publikoen antolaketa eta jarduna 2005-2006 ikasturtean arautuko dituzten jarraibideak.

Sarrera

Haur Hezkuntzako Bigarren Zikloa eta Lehen Hezkuntza ematen dituzten ikastetxe publikoak antolatzeko eta funtzionatzeko, funtsean honakoak beteko dira: Nafarroako Foru Komunitateko lurraldean diren Haur Hezkuntzako Eskola Publiko, Lehen Hezkuntzako Ikastetxe Publiko eta Haur Hezkuntza eta Lehen Hezkuntzako Ikastetxe Publikoen Erregelamendu Organikoa, uztailaren 6ko 225/1998 Foru Dekretuaren I eta II. Tituluetan eta xedapenetan, azaroaren 4ko 229/2002 Foru Dekretuan eta uztailaren 16ko 257/1998 Foru Aginduan ezarritakoa eta, azkenik, I. eranskin honetan 2005-2006 ikasturterako bildutako jarraibideotan ezarritakoa.

Hezkuntza administrazioak bultzatzen dituen lan-ildoak irizpide eta erreferentzia izanen dira ikastetxeen plangintzarako eta lana antolatzeari begira euren autonomia pedagogikoaren barruan hartu behar dituzten erabakietarako.

2005-2006 ikasturtean ere lehendik hasitako lan-ildoak garatzen jarraitu behar da, baina Lehen Hezkuntzan lehentasuna izanen dute Atlante Proiektuan ezarritako hobekuntza arloek (urriaren 8ko 279/2004 Foru Agindua), beraiek mugatzen baitute Hezkuntza Departamentuaren jarduketen marko orokorra. Horien artean azpimarratzekoa da apirilaren 12ko 293/2005 Ebazpena, 2005-2007 ikasturteetarako hobekuntza plana eta hura betetzeko behar diren neurriak ezarri dituena.

1. Ikasleen oinarrizko gaitasunak.

Ulermenezko irakurketaren, ahozko eta idatzizko adierazpenaren eta zenbakizko kalkuluaren ikaskuntza eskolaren helburu nagusietakoa da, etorkizuneko ikasketen oinarria baita.

Haur eta Lehen Hezkuntzako ikasleen gaitasun matematikoa lortu eta finkatzea eskolaren funtsezko helburuetakoa da. Izan ere, gaitasun horretan oinarritzen da hein batean jakintza zientifikoa, eta haren gabezia eskola porrotaren eragile garrantzitsuenetakoa da.

Ulermenezko irakurketak, idazketak eta ahozko adierazpenak ohiko, etengabeko eta zeharkako praktikak izan behar dute arlo guztietako edukien ikaskuntzan.

Gainera, hizkuntz gaitasunak hobetu behar dira bai gaztelaniaren eta, hala denean, euskararen ikaskuntzan eta bai atzerriko hizkuntzaren ikaskuntzan ere. Beraz, curriculumeko hizkuntza guztiek izan behar dute tratamendu didaktiko integratua.

2. Barne ebaluazioa.

Zerbitzuak Ikuskatzeko eta Ikuskapen Teknikorako Zerbitzuak amaitutzat emanen du 2003/2005 aldirako bi urteko plana, uztailaren 19ko 385/2002 Foru Aginduan jasotakoa, amaierako txostenaren bidez. Txosten hori ikastetxeei emanen zaie eta barne ebaluazioko prozesuetan erabili ahalko dute.

Ikasleen emaitza akademikoen ebaluazioari dagokionez, errendimendu estandarrak argitaratzen dira eta ikastetxeetan lagungarriak dira; haien bidez irakasleek errazago egiten dituzte ikasgelako programazioak, ziklo eta arlo bakoitzeko ikasleek zer jakin behar duten eta zer egiten jakin behar duten zehazten dituztenak. Jarduerak hautatzen eta ikasteko zailtasunak identifikatzen laguntzen dute, eta irizpideak eskaintzen dituzte helburuak noraino bete diren eta edukiak noraino ikasi diren baloratzeko orduan.

Estandarrak ez dira gutxienekoak; aitzitik, Nafarroako ikastetxeetako ikasleek izan behar dituzten helmugak ezartzen dituzte, adinaren eta gaitasunaren arabera.

Ez dira dokumentu itxiak, irekiak baizik, irakasleen ekarpenek edo balorazioak onartzen baitituzte, eta ikastetxe bakoitzaren egoera zehatzari egokitzen ahal zaizkio.

Ikastetxeek kontuan hartuko dituzte, halaber, Hezkuntza Departamentuak, Hezkuntza eta Zientzia Ministerioak eta nazioarteko erakundeek kanpo ebaluaziorako egiten duten proba-eredua eta ikastetxe bakoitzeko emaitza orokorren gaineko txostena, halakorik egonez gero.

3. Kanpo ebaluazioa.

PIRLS-2006 Proiektuko ebaluazioan parte hartuko da. Proiektu hori 9 urteko (Lehen Hezkuntzako 4. mailako) ikasleen irakurmenari buruzkoa da. Hezkuntza Departamentuak marko teorikoa eta ebaluazio proben ereduak zabalduko ditu.

Irakaskuntza gainbegiratzeko prozesuak garatzen jarraituko da etapa eta arlo guztietan, eskola curriculumen betetze eta aplikazio maila, plangintzako dokumentuen eta ikasgelako haien ezarpenaren arteko koherentzia eta lortutako emaitzen maila egiaztatze aldera. Hauek izanen dira jarduketa hori garatzeko irizpideak:

a) Eskola curriculumak betetzea.

b) Programazioen eta plangintzako gainerako agirien azterketa.

c) Programatutakoaren eta ikasgelan benetan garatutakoaren arteko koherentzia.

d) Lortutako emaitzen maila, kontuan izanik ikastetxearen eta ikasgelaren benetako ingurunea.

4. Koordinazio didaktikoa.

Behar-beharrezkoa da Haur Hezkuntzako, Lehen Hezkuntzako eta Derrigorrezko Bigarren Hezkuntzako etapen arteko koordinazioa. Ikasleei etapa batetik bestera igarotzeak ez die hausturarik ekarri behar, ikaskuntzaren jarraipena baino.

5. Aniztasunari arreta ematea.

Aniztasunari arreta ematea gero eta beharrezkoagoa da egungo hezkuntza sisteman, gizartean gertatu diren aldaketen ondorioz. Izan ere, egunetik egunera areagotzen ari dira gizartearen aniztasuna eta dinamismoa. Aniztasunarekiko arretaren bitartez ikasle bakoitzaren beharrei erreparatu eta erantzun egokiena eman behar zaie, ikasleak ahalik garapen onena lor dezan bai pertsona gisa, bai hezkuntzan nahiz gizartean.

Gizarte bazterketak, bereizkeriak eta intolerantziak eragindako desberdintasunak konpentsatzeko tresna ederra izateaz gainera, aniztasunarekiko arretak errespetuan oinarritutako eskola integratzaile eta plurala eratzen laguntzen du.

6. Hezkuntza balioak.

Ardura, autodiziplina eta norberaren ahalegina beharrezko hezkuntza balioak dira, ikaskuntza eta garapen pertsonala bultzatzen dituztenak. Ahalegina aintzat hartzea aukera berdintasuna bermatzeko eta talde behartsuenen gabeziak konpentsatzeko tresna eraginkorrena da. Aniztasunaren errespetuan oinarriturik eskolak gai izan behar du gizarteko faktoreei lotutako desberdintasunak konpentsatzeko, maitasuna eta zorroztasuna uztartzen dituen eskola giro ordenatua sortuz, ikasleek ikasteko eta irakasleek irakasteko egiten dituzten ahaleginak batzen dituena.

Horretarako, ikastetxeetako jarduna arau argi eta zehatzetan oinarritu behar da. Arauok arrakastaz betetzen direnean balorazio positiboa egin behar da eta betetzen ez direnean zehapenak erabili behar dira itundutako moduan.

Ikastetxeetako bizikidetzari modu baikorrean heldu behar zaio giro egokia lortzeko. Alde batetik giro horrek ikaskuntza sustatu behar du, eta bestetik askotariko gizarte pluralean bizitzeko behar diren trebetasun sozialak bereganatzen lagundu behar die ikasleei.

Ikastetxeek zuzenean jardun behar dute ikasleen portaera hobetzen, eta indartu egin behar dituzte eskolaren eta familiaren arteko koordinazio eta komunikazio bideak, ardura eta bizikidetza ohitura onak sendotzeko.

Garrantzitsua da orobat hezkuntza zibikoa sustatzea. Haurrei, beren adinaren arabera, demokraziaren izaera eta herritarren betebeharrak, ardurak eta eskubideak irakatsi behar zaizkie. Gainera, erantzukizun pertsonalaren eta gainontzekoekiko betebeharren garapena lortu behar da.

7. Familia.

Funtsezkoa da ikastetxearen eta familien arteko lankidetza ezartzea, bizikidetza egokiaren garapena bermatuko duen elkarrekiko konfiantza lortzeko.

Gurasoek irakasle tutoreen aholkuak jaso ahalko dituzte. Irakasle espezialistekin batera, tutoreek orientazioa emanen diete ikasleen familiei. Hezkuntza behar bereziak dituzten ikasleen familiekin orientazio lana berariazkoagoa eta jarraituagoa izanen da.

Familiaren eta ikastetxearen arteko elkarlan horrek erantzukizuna sustatu behar du. Ikasleak eskolako lanak egitera bultzatu behar ditu eta ikasteko ohitura eta irakurtzeko zaletasuna sortu behar dizkie.

I._Ikastetxeko urteko programazio orokorra.

Ikastetxea planifikatu eta antolatzeko oinarrizko baliabidea da, antolaketarako eta curriculumerako ikastetxeak urtero egiten duen proposamena biltzen duena; hezkuntza proiektuaren zehaztapena da, hezkuntza jarduera guztien koordinazioa, gobernu organoen eskumenen burutze egokia eta eskola komunitatearen sektore guztien parte-hartzea bermatzeko balio duena.

1. Hobekuntza plana.

2005eko irailean, Haur eta Lehen Hezkuntzako ikastetxeek ikastetxeko hobekuntza plana zehaztu eta egokituko dute 2005-2007 urteetarako, 293/2005 Ebazpenean ezarritakoari jarraikiz.

Zerbitzuak Ikuskatzeko eta Ikuskapen Teknikorako Zerbitzuak hobekuntza plan hori gainbegiratuko du eta haren jarraipena eginen du, ondoko irizpideak kontuan izanik:

a) Hobekuntza plana zenbateraino landu den.

b) 293/2005 Ebazpenaren eranskineko neurriak zenbateraino ezarri diren.

c) Planaren garapena, eta haren zehaztapena 2005/2006 ikasturterako.

d) Zikloko koordinatzaileek eta zikloko lantaldeek hobekuntza plana garatzeko agertzen duten ardura.

e) Hobekuntza planak ikastetxeko irakaskuntzaren kalitatean duen eragina.

2. Koordinazioa.

Irailean, ikastetxeko zuzendaritza taldeak, Koordinazio Pedagogikorako Batzordean, egutegia eginen du arlo, ziklo eta etapen arteko koordinaziorako uneak ezartzeko, eta egutegi hori bete dadin arduratuko da.

Bilera horietan arreta berezia emanen zaio ikastetxeko hobekuntza plana abian jartzeko behar diren jarduketen koordinazioari.

Ikasleen hizkuntz gaitasunen maila igotzeko, ikastetxeak, bidezkoa bada, bertan ematen diren hizkuntz arloen arteko koordinaziorako mekanismoak ezarriko ditu.

Era berean, zuzendaritza taldeak behar diren mekanismoak ezarriko ditu Haur Hezkuntzako etaparen eta Lehen Hezkuntzakoaren arteko koordinazioa lortzeko, eta ikastetxea atxikita duten Bigarren Hezkuntzako ikastetxeetako zuzendaritza taldeekin behar diren harremanak izanen ditu, Lehen Hezkuntzako etaparen eta Derrigorrezko Bigarren Hezkuntzakoaren arteko koordinaziorako bilerak finkatzeko Gaztelania arloan, Euskara arloan, halakorik bada, eta Matematika arloan. Gutxienez koordinazio bilera bat finkatuko da.

Ikasturte amaierako memorian, balorazio laburra jasoko da 2005-2006 ikasturtean arloka, zikloka eta etapaka egindako koordinazioari buruz.

3. Programazioak eta errendimendu estandarrak.

a) 2005-2006 ikasturtean, irailean, irakasleak ikasgelako programazioak berrikusiko ditu Haur Hezkuntzako Komunikazio eta Adierazpen arloan eta Lehen Hezkuntzako Gaztelania arloan, Euskara arloan, halakorik bada, eta Matematika arloan. Programazio horiek errendimendu estandarrekin alderatuko ditu, testu liburuetan eta erabiltzen diren gainerako materialetan behar adina jorratu gabeko jarduerak edo proposamenak gehitzeko.

b) 293/2005 Ebazpenaren arabera, 2005-2006 ikasturtearen azkenean ziklo amaierako proba egin behar da Lehen Hezkuntzako Gaztelania arloan, Euskara arloan, halakorik bada, eta Matematika arloan. Errendimendu estandarrak hartuko dira erreferentzia proba hori prestatzeko edo eguneratzeko.

c) Curriculumean dauden hizkuntzen ikasgelako programazioetan baterako ekintza didaktikoak sartu ahal izanen dira, errendimendu estandarretatik abiatuta. Errendimendu estandarrak hizkuntzen tratamendu integratua praktikan jartzeko beharrezko tresnak dira. Tratamendu horren bidez, ikasleek hizkuntz gaitasunak ikasten ematen dituzten orduak ahalik ongien erabili ahal izanen dira.

d) Eskolako liburutegia egoki antolatuko da, eskola komunitatearen behar bibliografikoak aseko dituen baliabide-zentro gisa, 293/2005 Ebazpenean ezarritako neurriak betetzeari dagokionez, batik bat. Ikasturtean zehar eskolako liburutegian egin beharreko jarduerak sartuko dira arloetako programazioetan.

e) Curriculum egokitzapenak prestatzea ikaslearen tutoreari dagokio. Garrantzi handiko curriculum egokitzapenak bakarrik eginen dira Hezkuntzarako Laguntza Unitatean (H.L.U.). Betiere Hezkuntzarako Laguntza Unitateak aholku emanen du egokitzapenen koordinazio eta jarraipenari buruz.

4. Aniztasunari arreta emateko Plana.

a) 2005-2006 ikasturtearen hasieran, ikastetxeko zuzendaritza taldeak, irakasle taldeekin eta ikastetxeko koordinaziorako beste organo batzuekin elkarlanean, Aniztasunari arreta emateko Plana prestatu edo berrikusiko du 293/2005 Ebazpenean ezarritako neurriak kontuan hartuta, 2005/2006 ikasturtean aplikatu dadin. Ebazpen horretan jasotako neurriak hezkuntza behar bereziak dituzten ikasleentzat egokituko ditu.

Hizkuntza eta matematika arloetako oinarrizko gaitasunak hobetzeko bidean, Aniztasunari arreta emateko Planak, hezkuntza behar bereziak dituzten ikasleei dagokienez, gaitasun horiek lantzen eta garatzen laguntzeko neurriak eta haien ebaluaziorako neurriak bilduko ditu. Neurri horien berri jaso behar da urteko programazio eta memorietan.

b) Ikastetxeko Aniztasunari arreta emateko Planak komunikazio bideak ezarriko ditu familiekin harremanak izateko eta kanpoko erakundeekin (udalak, entitate laguntzaileak etab.) elkarlanean aritzeko.

c) Aniztasunari arreta emateko Planean, ikastetxeek Ikasle Etorkinentzako Harrera Programa garatu behar dute. Agiri horretan arautuko dira urrats guztiak, ikastetxean harrera egiten zaienetik hasi eta Haur eta Lehen Hezkuntzako irakasle tutoreak taldeko irakasle espezialisten ordutegiaren barnean egin behar dituen jarduera sendogarri eta lagungarrietaraino. Ikasleak, oro har, gela arruntetan sartuko dira eta eskola ordu guztiak eginen dituzte, murgilketa eta laguntza prozesu normalizatuan. Neurri osagarrien beharra badute, beren taldearen barnean ezarriko zaizkie eta aldi baterakoak izanen dira. Ikasgelatik kanpoko laguntza, batez ere Lehen Hezkuntzako lehenbiziko zikloan, salbuespenezko kasuetan emanen zaie.

d) Irakasle tutoreek, ikastetxeko orientatzaileen laguntzaz, aholku emanen diete kultur prestakuntza urriena duten familiei, seme-alabei ikasten eta eskolako lanak egiten lagundu ahal diezaieten, eta arreta berezia emanen diete hezkuntza behar bereziak dituzten ikasleen familiei.

e) 2005-2006 ikasturtearen hasieran, Haur eta Lehen Hezkuntzako ikastetxeetako zuzendaritza taldeek eta barruti bereko Derrigorrezko Bigarren Hezkuntzako ikastetxeetakoek informazioa trukatzeko koordinazio-mekanismoak ezarriko dituzte, ikasleen eskolatzea etengabea izanen dela eta eskola absentismorik izanen ez dela bermatzeko; behar izanez gero, oinarrizko gizarte zerbitzuekin harremanetan jarriko dira. Zuzendaritza taldeek ikastetxeetako orientatzaileen laguntza jasoko dute, eta lankide izanen dituzte Lehen Hezkuntzako hirugarren zikloko eta Derrigorrezko Bigarren Hezkuntzako lehen kurtsoko irakasle taldeak.

5. Tutoretza Plana.

a) Ikastetxeko zuzendaritza taldearen ardura izanen da Tutoretza Plana zehazteko urteko programazioa egitea. Orientatzaileak, tutoreek eta zikloko taldeek aholku emanen diote eta lan horretan parte hartuko dute.

b) Tutoretza Plana zehazteko urteko programazioak ikastetxeko egoeraren azterketa izanen du oinarri, lehentasuneko beharrak jasoko ditu eta ikastetxeko Hobekuntza Planari egokituko zaio.

c) Tutoretza Plana zehazteko urteko programazioan irizpideak, jarduketak eta prozedurak ezarriko dira 2005-2006 ikasturterako, irakasle tutoreek horiexek garatu ditzaten ikasleekin, familiekin eta talde bakoitzeko irakasle taldearekin.

6. Bizikidetza Plana.

Ikastetxeek Bizikidetza Plana eginen dute. Ikastetxeko Hezkuntza Proiektuaren atal izanen da, eta bertan jasotzen diren ekintzak Tutoretza Planean ere sartuko dira. Ikastetxearen egoera kontuan izanik eginen da Bizikidetza Plana. Lehentasuneko helburuak, arazoak atzemateko irizpideak, prebentzio neurriak eta gatazkak konpontzeko prozesua bilduko ditu.

Ikastetxeko zuzendaritzaren ardura izanen da plan hori egitea. Orientatzaileak, tutoreek eta zikloko lantaldeek aholku emanen diote eta lan horretan parte hartuko dute.

7. Ikastetxeko Prestakuntza Plana.

Ikastetxe bakoitzak Irakasleentzako Prestakuntza Plana eginen du, kontuan izanik atzemandako beharrak, ikastetxean garatzen den prestakuntza ibilbidea eta Hezkuntza Departamentuak proposaturiko ildo estrategikoak. Ikasturte honetarako ezarritako ildoen artean Atlante Proiektua nabarmentzen da (hizkuntzaren eta matematikaren arloetako gaitasunak, barne ebaluazioa, hezkuntza balioak, eta familientzako informazioa). Prozesu honetan elementu nagusietakoa da prestakuntzaren arduraduna, berak koordinatuko baititu ikastetxeko Prestakuntza Planarekin zerikusia duten jarduera guztiak.

8. Kalitatea.

293/2005 Ebazpenaren 4. artikuluak honela dio: "Kalitatea kudeatzeko sistemetan hobekuntza proiektuak lantzen ari diren ikastetxeek euren prozesuan txertatu beharko dituzte ebazpen honetan ezarritako neurriak." Kalitate sareetan parte hartzen duten Haur eta Lehen Hezkuntzako ikastetxeek, beraz, neurriak ezarri ahala, hobekuntzarako proiektu horietara egokituko dituzte.

II._Irakasleak.

1. Ordutegia ikastetxe batean baino gehiagotan banatua duten irakasleak.

Ikastetxe batean baino gehiagotan ari diren irakasleen ordutegia prestatzerakoan, Hezkuntza Departamentuak irakasle ibiltariei buruz emandako arauak beteko dira.

2. Atzerriko Hizkuntzako maisu-maistra espezialistak.

Atzerriko hizkuntzen errefortzuaren ezarpenak irauten duen bitartean, eta azaroaren 4ko 229/2002 Foru Dekretuari jarraikiz, Atzerriko Hizkuntzako maisu-maistra espezialistek 20 ordu emanen dituzte astean zuzeneko irakaskuntzan. Gainerako irakaskuntza orduak, astean 25 ordu egin arte, materialak prestatu eta tutore eta gainerako irakasleekin koordinatzeko erabiliko dituzte.

Hiru urteko ikasleek eskolako girora moldatzeko dituzten premiak direla eta, atzerriko hizkuntzen irakaskuntza bigarren hiruhilekoan hastea aholkatzen da. Denbora horretan, Atzerriko Hizkuntzako irakasle espezialista kurtsoko tutorearekin batera ariko da, ikasgelako dinamika ezagutzeko.

Egokitzeko aldi hori amaituta, komeni da beharrezkotzat jotzen den denboraz kurtsoko tutorea irakasle espezialistarekin batera aritzea, hizkuntzaren arloko esperientziaren helburuak bermatzeko.

3. Ordutegi osagarriaren inguruko azalpenak.

Plangintza instituzionaleko edo prestakuntzako baliabideak prestatzeko emandako denboraren erdia nahitaezkoa izanen da eta lehentasuna izanen du irakasleek egin beharreko beste edozein lanaren aurretik; ikastetxeko zuzendariak zainduko du betetzen dela; beste erdia irakasleen esku geldituko da. Horrela beteko da 229/2002 Foru Dekretuaren 3. artikuluan ezarritakoa, bertan arautzen baita urtean 35 ordu eman behar direla nahitaezko prestakuntzan.

4. Ikastetxeetako zuzendarien koordinaziorako ordutegia.

Ikastetxeen arteko koordinazioa areagotzeko, zuzendariek ez dute eskolarik eman beharrik izanen astearte goizetan, ikastetxean horretarako aukerarik baldin bada.

III._Koordinazio organo osagarriak.

Haur eta Lehen Hezkuntzako ikastetxe publikoen Erregelamendu Organikoan, uztailaren 6ko 225/1998 Foru Dekretuan eta uztailaren 16ko 257/1998 Foru Aginduan aurreikusten diren karguak, zuzendaritzakoak eta didaktikoak, beteko dituzten irakasleak izendatuta, premia guztiei erantzuna emanik (gaztelania ikasteko laguntza ikasle atzerritarrentzat, egoera sozial edo kultural behartuan dauden ikasleei eta bi kurtso edo gehiagoko curriculum desfasea dutenei kasu egiteko laguntza, aniztasunari arreta emateko ohiko laguntza eta teknologia berrien koordinazioa), eta ikastetxeak dituen orduen arabera, zuzendariak zilegi izanen du, idazkariak hala proposaturik, kargu horietarako izendapenik jaso ez duten irakasleen artean liburutegiko koordinatzaile bat izendatzea. Izendatuak, gehienez, astean bi eskola ordu eman ahal izanen ditu karguari dagozkion lanetan.

Liburutegiko irakasle koordinatzaileak, idazkariaren agindupean, honako eginkizun hauek izanen ditu, besteak beste:

a) Ikastetxeko liburutegiak duen material didaktikoa behar bezala antolatu eta zaintzea, eta behar bezala erabiltzen dela bermatzea.

b) Ikasleei kasu egin eta aholku ematea Ikastetxeko liburutegiaren baliabideak erabiltzeko.

c) Ikastetxeko liburutegian dagoen material didaktikoari buruzko informazioa zabaltzea irakasle eta ikasleen artean, batez ere gauza berriei buruz, eskuratu ahala.

d) Liburutegirako material eta funts berriak erosteko aholkuak ematea.

e) Hezkuntza komunitateko sektore ezberdinetan, eta bereziki ikasleen artean, irakurketa sustatzeko lanetan laguntzea.

f) Eskola liburutegiko baliabideak familiei hurbiltzea.

g) Eskola liburutegiaren eta auzoko liburutegi publikoaren arteko komunikazioa erraztea, funtsak eta esperientziak trukatzeko.

Arestian aipatutako koordinazio eginkizunei erantzuna emanda, ikastetxeak dituen orduen arabera, eta ikastetxe batean, eskola orduetatik kanpo, kirol, musika, kultur jarduerak, oro har, iraunkorrak, antolatzen badira, zuzendariak zilegi izanen du, ikasketaburuak hala proposaturik, jarduera hauen irakasle arduradunak izendatzea, parte hartzeko interesa dutenen artean. Aukera hau gauzatzeko kirol jardueren irakasle arduradun bat eta arte eta kultur jardueren irakasle arduradun bat izendatu ahal izanen dira. Irakasle horiek, dauden orduen arabera, lan horietan, astean, bi irakastordu eman ahal izanen dute, gehienez.

II. ERANSKINA

Derrigorrezko Bigarren Hezkuntzako lehen eta bigarren kurtsoak behin-behinekoz irakasten duten ikastetxe publikoen, eta herri bereko ikastetxe publikoekin batera funtzionatzen duten Derrigorrezko Bigarren Hezkuntzako institutuen antolamendua eta jarduna 2005/2006 ikasturtean arautzeko jarraibideak.

Sarrera

Ikastetxe publiko hauek antolatzeko eta funtzionatzeko, funtsean honakoak beteko dira: Nafarroako Foru Komunitateko lurraldean diren Haur Hezkuntzako Eskola Publiko, Lehen Hezkuntzako Ikastetxe Publiko eta Haur Hezkuntza eta Lehen Hezkuntzako Ikastetxe Publikoen Erregelamendu Organikoa, uztailaren 6ko 225/1998 Foru Dekretuaren I eta III. Tituluak eta xedapenak, azaroaren 4ko 229/2002 Foru Dekretua, Haur eta Lehen Hezkuntzako Ikastetxe Publikoen Erregelamendu Organikoa garatzen duen uztailaren 16ko 257/1998 Foru Agindua, batez ere bigarren xedapen gehigarria, eta, azkenik, ebazpen honen I. eta II. eranskinetan 2005-2006 ikasturterako bildutako jarraibideotan ezarritakoa.

Hezkuntza administrazioak bultzatzen dituen lan-ildoak irizpide eta erreferentzia izanen dira ikastetxeen plangintzarako eta lana antolatzeari begira euren autonomia pedagogikoaren barruan hartu behar dituzten erabakietarako. Hartara, ikastetxeen plangintza instituzionalerako agiriak eta programazioak aztertu eta hobetzeko lehentasuna duten alderdi batzuk aipatuko ditugu.

1. Ikasleen oinarrizko gaitasunak.

Ulermenezko irakurketaren, ahozko eta idatzizko adierazpenaren eta problemen ebazpenaren ikaskuntza hezkuntzako helburu nagusietakoa da, etorkizuneko ikasketen oinarria baita.

Ulermenezko irakurketak, idazketak eta ahozko adierazpenak ohiko, etengabeko eta zeharkako praktikak izan behar dute irakasgai guztien edukien ikaskuntzan.

Gainera, hizkuntz gaitasunak hobetu behar dira bai gaztelaniaren eta, hala denean, euskararen ikaskuntzan eta bai atzerriko hizkuntzaren ikaskuntzan ere. Beraz, curriculumeko hizkuntza guztiek izan behar dute tratamendu didaktiko integratua.

2. Barne ebaluazioa.

Ikastetxeen barneko ebaluazioa ezinbesteko tresna da ikastetxeak bere hobekuntza planetan ezarri dituen xedeak zenbateraino bete diren neurtzeko, eta puntu sendoak eta landu beharreko arloak identifikatzen laguntzen du. Barne ebaluaziorako probek bat etorri behar dute nazioarteko erakundeek egiten dituztenekin, batez ere Pisa Proiekturako egindako probekin. Proba horiek hamabost urteko ikasleekin (DBHko 4. mailakoak) egiten dira, Hizkuntza, Matematika eta Zientziak irakasgaietan.

3. Kanpo ebaluazioa.

Nafarroako Foru Komunitateak PISA-2006 Proiektuko ebaluazioan parte hartuko du lagin adierazgarri batekin. Ebaluazioaren eta Kalitatearen Institutu Nazionalak koordinatuko du ebaluazio hori Estatu osoan.

Lehen hiruhilekoan ebaluazioa eginen zaie 2004/2005 ikasturtean DBHko 2. kurtsoa egin duten ikasleei eta DBHko 4. kurtsoa egin dutenei. Horretarako probak eginen dira DBHko 3. mailan eta Batxilergoko nahiz erdi mailako heziketa zikloetako 1. mailan. Arlo instrumentaletan, Matematika arloan, Gaztelania arloan eta, egonez gero, Euskara arloan eginen dira, eta maila bakoitzari dagozkion gaitasunen lorpenean oinarrituko dira.

Irakaskuntza gainbegiratzeko prozesuak garatzen jarraituko da etapa, arlo eta irakasgai guztietan, eskola curriculumen betetze eta aplikazio maila, plangintzako dokumentuen eta ikasgelako haien ezarpenaren arteko koherentzia eta lortutako emaitzen maila egiaztatze aldera. Hauek izanen dira jarduketa hori garatzeko irizpideak:

a) Eskola curriculumak betetzea.

b) Programazioen eta plangintzako gainerako agirien azterketa.

c) Programatutakoaren eta ikasgelan benetan garatutakoaren arteko koherentzia.

d) Lortutako emaitzen maila, kontuan izanik ikastetxearen eta ikasgelaren benetako ingurunea.

Irakaskuntzaren koordinazioa (etapak, zikloak, departamentu didaktikoak etab.).

4. Koordinazio didaktikoa.

Bereziki beharrezkoa da Lehen Hezkuntzako azken zikloko Hizkuntza eta Matematika irakasleen eta barruti berean dauden institutuetako DBHko lehen mailako irakasleen arteko koordinazioa, bai eta DBHaren eta Batxilergoaren arteko koordinazioa ere, curriculumeko arlo guztietan. DBHko institutuetako irakasleak zein instituturi atxikita dauden, hango departamentuko irakasleekin koordinatuko dira.

Garrantzitsua da curriculumeko hizkuntz arloen koordinazioa ezartzea, hizkuntzak ikasten ematen diren orduak ahalik ongien erabiltzeko estrategiak prestatze aldera.

5. Aniztasunari arreta ematea.

Aniztasunari arreta ematea gero eta beharrezkoagoa da egungo hezkuntza sisteman, gizartean gertatu diren aldaketen ondorioz. Izan ere, egunetik egunera areagotzen ari dira gizartearen aniztasuna eta dinamismoa. Aniztasunarekiko arretaren bitartez ikasle bakoitzaren beharrei erreparatu eta erantzun egokiena eman behar zaie, ikasleak ahalik garapen onena lor dezan bai pertsona gisa, bai hezkuntzan nahiz gizartean.

Gizarte bazterketak, bereizkeriak eta intolerantziak eragindako desberdintasunak konpentsatzeko tresna ederra izateaz gainera, aniztasunarekiko arretak errespetuan oinarritutako eskola integratzaile eta plurala eratzen laguntzen du.

6. Hezkuntza balioak.

Hezkuntza etapa honetan garrantzitsua da autonomia eta zentzu kritikoa sustatzea, ikasleak gai izan daitezen beren eskubideak erabili eta betebeharrak betetzeko; tolerantzia, elkartasuna eta desberdintasunarekiko errespetua landu behar dira, gizarte demokratiko eta pluralak berezko dituen erantzukizunei aurre egiteko; ardura, autodiziplina eta norberaren ahalegina sustatu behar dira, ikaskuntza eta garapen pertsonala errazteko eta autoestimua, norbere ezagutza eta autokontrola sustatzeko, horrela lortuko baitute ikasleek beren etorkizun akademiko eta profesionalari buruzko erabakiak hartzeko autonomia.

Eskola komunitatearen ahaleginak bideratu behar dira bizikidetza baketsua lortzeko, elkarren errespetua, tolerantzia eta desberdintasunen onarpena oinarri. Pertsonen arteko harremanetan iritzien eta interesen arteko gatazkak sortu ohi dira. Modu positiboan egin behar zaie aurre eta elkarrizketaren, enpatiaren eta komunikazioaren bitartez konpondu behar dira.

Horretarako, ikastetxeetako jarduna arau argi eta zehatzetan oinarritu behar da. Arauok arrakastaz betetzen direnean balorazio positiboa egin behar da eta betetzen ez direnean zehapenak erabili behar dira itundutako moduan.

Balio horiek garatuko badira, ezinbesteko baldintzak dira irakasle taldeak horietaz arduratzea eta familiek irakasle tutoreari laguntzea.

7. Familia.

Ikastetxeek familiei orientazioa eman behar diete nerabeen garapenean garrantzi berezia duten alderdiei buruz: garapen pertsonal eta sozialaz, afektu eta emozioen garapenaz eta familiaren garapenaz. Hori guztia, tutorearen ekintza eta orientatzaileak ematen dituen aholkuak direla bide.

Familiek eskubidea dute unean uneko informazio zehatza jasotzeko seme-alaben bilakaera pertsonalaz, errendimenduaz eta ikasketen nondik norakoaz. Halaber seme-alaben etorkizun akademiko eta profesionalari buruzko aholku eta laguntza eman behar zaie.

Horretarako, funtsezkoa da ikastetxearen eta familien arteko lankidetzarako bideak ezartzea, konfiantza giroa sortzeko. Bizikidetza positibo hori lagungarria izanen da ikasleen garapen osoa lortzeko.

I._Irakasleak.

1. Ordutegia ikastetxe batean baino gehiagotan banatua duten irakasleak.

Ikastetxe batean baino gehiagotan ari diren irakasleen ordutegia prestatzerakoan, Hezkuntza Departamentuak irakasle ibiltariei buruz emandako arauak beteko dira.

2. Irakaskuntza konpartitua bi mailetan (Lehen Hezkuntza eta Derrigorrezko Bigarren Hezkuntzako lehen eta bigarren kurtsoak).

Derrigorrezko Bigarren Hezkuntzako lehen eta bigarren kurtsoak behin-behinekoz ematen diren Haur eta Lehen Hezkuntzako ikastetxe publikoetan eta herri bereko ikastetxe publikoarekin batera aritzen diren Derrigorrezko Bigarren Hezkuntzako Institutuetan, destinoa Lehen Hezkuntzan duten irakasleek, noizbait suertatuz gero, Derrigorrezko Bigarren Hezkuntzan eskola ematen ahalko dute, zenbait irakasgaitan.

Halaber, Derrigorrezko Bigarren Hezkuntzako Lehen Zikloari atxikitako maisu-maistren kidegoko irakasleek euren ordutegia osatzen ahalko dute Lehen Hezkuntzako jarduerekin.

3. Derrigorrezko Bigarren Hezkuntzako koordinazio lanak.

3.1. Uztailaren 6ko 225/1998 Foru Dekretuaren 14.4 artikuluaren arabera Derrigorrezko Bigarren Hezkuntzako ikasle taldeen tutoreek koordinazio eginkizunetarako astean duten irakastordua, ahal baldin bada, ikasleen jarraipena egiteko jardueretarako erabiliko da, horretan sartuz bai ikasleekiko elkarrizketak, bai dagokion irakasle taldearekiko bilerak.

3.2. Programazio didaktikoei dagokienez, 258/1998 Foru Aginduaren VII. kapituluko 24. artikuluan eta 257/1998 Foru Aginduaren bigarren xedapen gehigarrian xedatutakoari jarraituko zaio.

3.3. Irakasgai guztietako programazio didaktikoetan aintzat hartuko da ikasleen hizkuntz gaitasunen hobekuntza.

Gaztelania irakasgaiaren eta, halakorik baldin bada, Euskara irakasgaiaren programazio didaktikoan, ikasleek etxean irakurtzea sustatzeko behar diren neurriak ezarriko dira.

Matematika irakasgaiaren programazioan berariazko aipamena eginen zaie problemen ebazpenari eta horretarako behar diren jarduketei.

Curriculumean diren hizkuntzen programazioetan baterako ekintza didaktikoak jaso ahal izanen dira hizkuntzen tratamendu integratua praktikan jarri ahal izateko. Horrela ahalik ongien erabiliko dira ikasleek hizkuntz gaitasunak lantzen ematen dituzten orduak.

Eskolako liburutegia egokiro antolatuko da, eskola komunitatearen behar bibliografikoak asetzen dituen baliabide-zentro gisa. Ikasturtean zehar liburutegian egin beharreko jarduerak jasoko dira irakasgaien programazio didaktikoetan.

Garrantzi handiko curriculum egokitzapenak soilik jarriko dira Pedagogia Terapeutikoko espezialistaren esku. Garrantzirik gabeko eta garrantzizko curriculum egokitzapenak egitea kurtsoetan irakasgaiak ematen dituzten irakasleen ardura izanen da. Betiere kasuan kasuko departamentu didaktikoak gainbegiratuko ditu. Nolanahi ere, egokitzapen horien koordinazioa eta jarraipena egitea ikaslearen tutoreari dagokio. Orientazio arloko langileen aholkuak jasoko ditu horretarako.

4. Asteazken arratsaldeko ordutegiari buruzko xehetasunak.

Plangintza instituzionaleko edo prestakuntzako baliabideak prestatzeko emandako denboraren erdia (hil bakoitzeko lehen eta hirugarren asteazkenak) nahitaezkoa izanen da eta lehentasuna izanen du irakasleek egin beharreko beste edozein lanaren aurretik; ikastetxeko zuzendariak zainduko du betetzen dela eta berak ezarriko du lan plana; beste erdia (gainerako asteazkenak) irakasleen esku geldituko da. Horrela beteko da uztailaren 6ko 225/1998 Foru Dekretua aldatzen duen azaroaren 229/2002 Foru Dekretuaren hirugarren artikuluan ezarritakoa, bertan ezartzen baita urtean 35 ordu eman behar direla nahitaezko prestakuntzan.

Aurreko lerroaldean ezarri ordu kopuruari puntualizazio hauek egin beharko zaizkio:

_Derrigorrezko Bigarren Hezkuntzako institutuetako (DBHI) irakasleek plangintza instituzionalerako tresnak egiteko eta prestakuntza jardueretarako erreserbaturiko asteroko ordu osagarriak, bai eta Departamentuko bilerarako asteroko ordu osagarria ere, ondoko jardueretarako erabiliko dituzte:

.Irakasleek programazio berariazkoak, oso garrantzitsuak ez diren curriculum egokitzapenak eta irakasle-lana lagundu eta indartzeko baliabideak prestatuko dituzte Derrigorrezko Bigarren Hezkuntzarako, haien ikastetxeak atxikirik dituzten Bigarren Hezkuntzako Institutuen departamentu didaktikoekin koordinatuta.

.Derrigorrezko Bigarren Hezkuntzako irakaskuntzen koordinazio didaktikoa egitea beren ikastetxean, Zuzendaritza taldeak egindako planifikazioaren arabera, edo ikastetxea atxikirik duen Bigarren Hezkuntzako Institutuaren Departamentu didaktikoetan. Azken jarduera hori egiteko, ezertan ukatu gabe uztailaren 16ko 257/1998 Foru Aginduaren xedapen gehigarrietan ezarritakoa, Derrigorrezko Bigarren Hezkuntzako institutuetako irakasleak, oro har, beren ikastetxeak atxikirik dituzten Bigarren Hezkuntzako institutuetako departamentu didaktikoen bileretara joanen dira hilean behin. Horretarako, bi ikastetxeetako zuzendaritza taldeak ados jarriko dira koordinazio lan horiek egiteko.

III. ERANSKINA

Otsailaren 10eko 25/1997 Foru Dekretuaren hirugarren xedapen gehigarriaren arabera funtzionatzen duten Derrigorrezko Bigarren Hezkuntzako institutuen eta Bigarren Hezkuntzako institutuen antolaketa eta funtzionamendua 2005-2006 ikasturtean arautuko dituzten jarraibideak.

Sarrera

Ikastetxe hauek antolatzeko eta funtzionatzeko, funtsean honakoak beteko dira: Nafarroako Foru Komunitateko lurraldean diren Bigarren Hezkuntzako institutuen Erregelamendu Organikoa, uztailaren 6ko 225/1998 Foru Dekretuaren I eta IV. Tituluetan eta xedapenetan, azaroaren 4ko 229/2002 Foru Dekretuan eta Bigarren Hezkuntzako Institutuen Erregelamendu Organikoa garatzen duen uztailaren 16ko 258/1998 Foru Aginduan ezarritakoa eta, azkenik, III. eranskin honetan 2005-2006 ikasturterako bildutako jarraibideotan ezarritakoa.

Hezkuntza administrazioak bultzatzen dituen lan-ildoak irizpide eta erreferentzia izanen dira ikastetxeen plangintzarako eta lana antolatzeari begira euren autonomia pedagogikoaren barruan hartu behar dituzten erabakietarako. Hartara, ikastetxeen hezkuntza proiektuak eta programazioak aztertu eta hobetzeko lehentasuna duten alderdi batzuk aipatuko ditugu.

1. Ikasleen oinarrizko gaitasunak.

Ulermenezko irakurketaren, curriculumeko arlo guztietako ahozko eta idatzizko adierazpenaren eta problemak ebazteko gaitasunaren garapena hezkuntzako helburu nagusietakoa da, etorkizuneko ikasketen oinarria baita.

Ulermenezko irakurketak, idazketak eta ahozko adierazpenak ohiko, etengabeko eta zeharkako praktikak izan behar dute irakasgai guztien edukien ikaskuntzan.

Gainera, hizkuntz gaitasunak hobetu behar dira bai Gaztelania eta Literaturaren eta, hala denean, Euskal Hizkuntza eta Literaturaren ikaskuntzan eta bai Atzerriko Hizkuntzaren ikaskuntzan ere. Beraz, curriculumeko hizkuntza guztiek izan behar dute tratamendu didaktiko integratua.

2. Barne ebaluazioa.

Ikastetxeen barneko ebaluazioa ezinbesteko tresna da ikastetxeak bere hobekuntza planetan ezarri dituen xedeak zenbateraino bete diren neurtzeko, eta puntu sendoak eta landu beharreko arloak identifikatzen laguntzen du. Barne ebaluaziorako probetan kontuan hartu behar dira nazioarteko erakundeek egiten dituztenak, batez ere Pisa Proiekturako egindako probak. Proba horiek hamabost urteko ikasleekin (DBHko 4. kurtsokoekin) egiten dira, Hizkuntza, Matematika eta Zientziak irakasgaietan.

3. Kanpo ebaluazioa.

Nafarroako Foru Komunitateak PISA-2006 Proiektuko ebaluazioan parte hartuko du lagin adierazgarri batekin. Ebaluazioaren eta Kalitatearen Institutu Nazionalak koordinatuko du ebaluazio hori Estatu osoan.

Lehen hiruhilekoan ebaluazioa eginen zaie 2004/2005 ikasturtean DBHko 2. kurtsoa egin duten ikasleei eta DBHko 4. kurtsoa egin dutenei. Horretarako probak eginen dira DBHko 3. mailan eta Batxilergoko nahiz erdi mailako heziketa zikloetako 1. mailan. Arlo instrumentaletan, Matematika arloan, Gaztelania arloan eta, egonez gero, Euskara arloan eginen dira, eta maila bakoitzari dagozkion gaitasunen lorpenean oinarrituko dira.

Irakaskuntza gainbegiratzeko prozesuak garatzen jarraituko da etapa, arlo eta irakasgai guztietan, eskola curriculumen betetze eta aplikazio maila, plangintzako dokumentuen eta ikasgelako haien ezarpenaren arteko koherentzia eta lortutako emaitzen maila egiaztatze aldera. Hauek izanen dira jarduketa hori garatzeko irizpideak:

a) Eskola curriculumak betetzea.

b) Programazioen eta plangintzako gainerako agirien azterketa.

c) Programatutakoaren eta ikasgelan benetan garatutakoaren arteko koherentzia.

d) Lortutako emaitzen maila, kontuan izanik ikastetxearen eta ikasgelaren benetako ingurunea.

e) Irakaskuntzaren koordinazioa (etapak, zikloak, departamentu didaktikoak etab.).

Halaber, heziketa zikloetan Lantokietako Prestakuntza (LP) modulua gainbegiratuko da ondoko irizpideak erabiliz:

a) Lantokietako Prestakuntzaren plangintza eta garapena egokiak direla eta hura erregulatzen duen araua (uztailaren 15eko 269/1997 F.A.) betetzen dela egiaztatzea.

b) LP moduluaren helburu zehatzak zenbateraino lortu diren.

c) Nola erabili diren ikastetxeko giza baliabideak eta plangintzarako baliabideak modulua garatzeko.

4. Koordinazio didaktikoa.

Bereziki beharrezkoa da Lehen Hezkuntzako azken zikloko Hizkuntza eta Matematika irakasleen eta barruti berean dauden institutuetako DBHko lehen mailako irakasleen arteko koordinazioa, bai eta DBHaren eta Batxilergoaren arteko koordinazioa ere, curriculumeko arlo guztietan. DBHko institutuetako irakasleak zein instituturi atxikita dauden, hango departamentuko irakasleekin koordinatuko dira.

Garrantzitsua da curriculumeko hizkuntz arloen koordinazioa ezartzea, hizkuntzak ikasten ematen diren orduak ahalik ongien erabiltzeko estrategiak prestatze aldera.

5. Aniztasunari arreta ematea.

Aniztasunari arreta ematea gero eta beharrezkoagoa da egungo hezkuntza sisteman, gizartean gertatu diren aldaketen ondorioz. Izan ere, egunetik egunera areagotzen ari dira gizartearen aniztasuna eta dinamismoa. Aniztasunarekiko arretaren bitartez ikasle bakoitzaren beharrei erreparatu eta erantzun egokiena eman behar zaie, ikasleak ahalik garapen onena lor dezan bai pertsona gisa, bai hezkuntzan nahiz gizartean.

Gizarte bazterketak, bereizkeriak eta intolerantziak eragindako desberdintasunak konpentsatzeko tresna ederra izateaz gainera, aniztasunarekiko arretak errespetuan oinarritutako eskola integratzaile eta plurala eratzen laguntzen du.

6. Hezkuntza balioak.

Hezkuntza etapa honetan garrantzitsua da autonomia eta zentzu kritikoa sustatzea, ikasleak gai izan daitezen beren eskubideak erabili eta betebeharrak betetzeko; tolerantzia, elkartasuna eta desberdintasunarekiko errespetua landu behar dira, gizarte demokratiko eta pluralak berezko dituen erantzukizunei aurre egiteko; ardura, autodiziplina eta norberaren ahalegina sustatu behar dira, ikaskuntza eta garapen pertsonala errazteko eta autoestimua, norbere ezagutza eta autokontrola sustatzeko, horrela lortuko baitute ikasleek beren etorkizun akademiko eta profesionalari buruzko erabakiak hartzeko autonomia.

Eskola komunitatearen ahaleginak bideratu behar dira bizikidetza baketsua lortzeko, elkarren errespetua, tolerantzia eta desberdintasunen onarpena oinarri. Pertsonen arteko harremanetan iritzien eta interesen arteko gatazkak sortu ohi dira. Modu positiboan egin behar zaie aurre eta elkarrizketaren, enpatiaren eta komunikazioaren bitartez konpondu behar dira.

Horretarako, ikastetxeetako jarduna arau argi eta zehatzetan oinarritu behar da. Arauok arrakastaz betetzen direnean balorazio positiboa egin behar da eta betetzen ez direnean zehapen hezitzaileak erabili behar dira.

Balio horiek garatuko badira, ezinbesteko baldintzak dira irakasle taldeak horietaz arduratzea eta familiek irakasle tutoreari laguntzea.

7. Familia.

Ikastetxeek familiei orientazioa eman behar diete nerabeen garapenean garrantzi berezia duten alderdiei buruz: garapen pertsonal eta sozialaz, afektu eta emozioen garapenaz eta familiaren garapenaz. Hori guztia, tutorearen ekintza eta orientatzaileak ematen dituen aholkuak direla bide.

Familiei unean uneko informazio zehatza eman behar zaie seme-alaben bilakaera pertsonalaz, errendimenduaz eta ikasketen nondik norakoaz. Halaber seme-alaben etorkizun akademiko eta profesionalari buruzko aholku eta laguntza eman behar zaie.

Horretarako, funtsezkoa da ikastetxearen eta familien arteko lankidetzarako bideak ezartzea, konfiantza giroa sortzeko. Bizikidetza positibo hori lagungarria izanen da ikasleen garapen osoa lortzeko.

I._Ikastetxeko urteko programazio orokorra.

Ikastetxea planifikatu eta antolatzeko oinarrizko baliabidea da, antolaketarako eta curriculumerako ikastetxeak urtero egiten duen proposamena biltzen duena; hezkuntza proiektuaren zehaztapena da, hezkuntza jarduera guztien koordinazioa, gobernu organoen eskumenen burutze egokia eta eskola komunitatearen sektore guztien parte-hartzea bermatzeko balio duena.

1. Hobekuntza plana.

Aurreko biurtekorako hobekuntza plana uztailaren 19ko 386/2002 Foru Aginduak araututakoa da. Berari amaiera emateko, Zerbitzuak Ikuskatzeko eta Ikuskapen Teknikorako Zerbitzuak txostena eginen die ikastetxeei, 2004/2005 ikasturte amaierako memoria eta 2005/2006ko programazio didaktikoetan sartutako hobekuntzak aztertu ondoren.

Lehenbiziko aldiz, Nafarroako Bigarren Hezkuntzako institutuek parte hartuko dute, beren lagin adierazgarriarekin, nazioarteko PISA ebaluazioetan (Ikasleen Nazioarteko Ebaluaziorako Programa). Ebaluazio horiek DBHko 4. kurtsoaren pareko mailan dabiltzan ikasleei egiten zaizkie. Jarduketa horren bidez, Hezkuntza Departamentuak apustu argia egin du ebaluazioan oinarritutako ikaskuntzaren hobekuntzaren alde.

Nazioarteko ebaluazio azterlanen ardatzak hiru gaitasun nagusi hauek dira: irakurketa, matematika eta zientziak. Ebaluazio honen emaitzek bide ematen dute ikasleen oinarrizko gaitasunen bilakaeraren berri jakiteko, parte hartzen duten herrialdeak alderatzeko eta ikaskuntza nahiz irakaskuntza prozesuen hobekuntzarako aztergaiak biltzeko.

PISA proiektuak errendimendua ebaluatzen du irakurketan, matematikan eta zientzian. Eremu bakoitza definitu nahi du bai eskola curriculumari dagokionez eta bai helduaroko bizitzarako behar diren ezagutza garrantzitsuei eta trebetasunei dagokienez ere.

Ebaluatzen diren gaitasunetako batzuk berariaz lotu daitezke curriculum arloren batekin; beste gaitasun eta jarrera batzuk hainbat arloren artean banaturik daude: ulermenezko irakurketa, grafikoen edo formatu desberdinetako informazioen interpretazioa, problemen ebazpena etab.

Hala, bada, Derrigorrezko Bigarren Hezkuntzako hobekuntza planak, jarraian azaltzen den horrek, hasiera batean oinarri izanen du irakasleek PISA Proiektuaren berri jakitea (funts teorikoa, gaitasun nagusiak, ebaluazio proben ereduak etab.). Horrela proiektu hau lagungarria izanen da programazio didaktikoak hobetu eta garatzeko.

2005-2006 ikasturteko lehen hiruhilekoan, ikastetxeak Derrigorrezko Bigarren Hezkuntzarako hobekuntza plana prestatzen hasiko dira, ondoko arlo, helburu eta jarduketak kontuan izanik:

_1. hobekuntza arloa. Hizkuntz gaitasunak curriculumeko arlo guztietan.

1. helburua. Testu liburuak edo irakasleek erabiltzen dituzten beste ikasmaterial batzuk irakurri eta ulertzeko gaitasuna hobetzea curriculumeko arlo guztietan, eta testu idatzien produkzioa hobetzea.

Jarduketa. Curriculumeko arlo guztietan, egunero tarte bat hartuko da ikasleen hizkuntz gaitasun orokorrak eta kasuan kasuko arloari dagozkionak hobetzeko. Zenbait saiotan PISA Proiektuko irakurketa proben ereduak erabiliko dira. Arlo instrumentaletan, hizkuntz gaitasunak hobetzeko denbora tartea arloaren ezaugarriei egokituko zaio.

Jarduketa horren berri jasoko da arlo guztietako programazio didaktikoetan eta ikastetxeko Irakurketa Planean.

2. helburua. Irakurtzeko ohitura eta zaletasuna areagotzea.

Jarduketa. Irakurketa plana eginen da ikaslearentzat, eskola orduetatik kanpo hiruhilekoan gutxienez liburu bat irakur dezan. Ikastetxeko hizkuntz arloetako irakasleek elkarrekin hartu ahalko dituzte testu motari eta generoari buruzko erabakiak.

Jarduketa horren berri jasoko da Gaztelania arloko edo, halakorik izanez gero, Euskara arloko programazio didaktikoetan, bai eta Atzerriko Hizkuntzaren arloan ere, bidezkoa bada.

_2. hobekuntza arloa. Gaitasun matematikoa.

Helburua. Problemak ebazteko gaitasuna hobetzea.

Jarduketa. PISA Proiektuan aurkeztutako problemak eta probak erabiliko dira arlo honetako saioetako batzuetan.

Jarduketa horren berri jasoko da Matematika arloko programazioan.

_3. hobekuntza arloa. Gaitasun zientifikoa.

Helburua. Arrazoibide zientifikoaren garapena hobetzea.

Jarduketa. PISA Proiektuan zientzien arlorako aurkeztutako proba-ereduak erabiltzea.

Jarduketa horren berri jasoko da Zientzia arloko programazioan.

_4. hobekuntza arloa. Hezkuntza balioak.

Helburua. Bizikidetza eta eskolako giroa hobetzea.

Jarduketa. Ikastetxeak bi hezkuntza balio aukeratuko ditu, bizikidetzaren ingurukoak. Eskola komunitate osoak balio horiek landuko ditu lehentasunez 2005-2006 ikasturtean, ezertan eragotzi gabe gaur egun garatzen ari direnak edo ikastetxeak bere beharren arabera garatu asmo dituenak. Jarduketa horren berri jasoko da Bizikidetza Planean.

Hezkuntza Departamentuak materialak banatuko ditu eta ikastetxeak aholkatuko ditu, irakasleen prestakuntzaren bitartez, hobekuntza plan hau bete dadin.

2005/2006 ikasturtean, Zerbitzuak Ikuskatzeko eta Ikuskapen Teknikorako Zerbitzuak hobekuntza planean bildutako arlo guztien garapena gainbegiratuko du, ondoko irizpideak erabiliz:

a) Hobekuntza plana zenbateraino landu den.

b) Ebazpen honetan jasotako neurriak zenbateraino ezarri diren.

c) Planaren garapena, eta haren zehaztapena 2005/2006 ikasturterako.

d) Departamentuetako buruek hobekuntza planari buruz agertutako inplikazio maila.

e) Hobekuntza planak ikastetxeko irakaskuntzaren kalitatean duen eragina.

2. Koordinazioa.

Irailean, ikastetxeko zuzendaritza taldeak Lehen Hezkuntzako etapa eta Derrigorrezko Bigarren Hezkuntzakoa koordinatzeko egutegia ezarriko du irakasgai hauetarako: Gaztelania eta Literatura, Euskal Hizkuntza eta Literatura, egonez gero, eta Matematika. Gutxienez koordinazio bilera bat finkatuko da.

Ikasleen hizkuntz gaitasunen maila igotzeko, ikastetxeak, bidezkoa bada, bertan ematen diren hizkuntz arloen arteko koordinaziorako mekanismoak ezarriko ditu.

DBHko institutuetako irakasgai guztien irakasleak eta BHko institutuetako departamentuetako irakasleak uztailaren 16ko 258/1998 Foru Aginduan ezarritako eran koordinatuko dira.

Ikasturte amaierako memorian, balorazio laburra jasoko da 2005-2006 ikasturtean arloka eta etapaka egindako koordinazioari buruz.

3. Programazio didaktikoak.

Irakasgai guztietako programazio didaktikoetan aintzat hartuko da ikasleen hizkuntz gaitasunen hobekuntza.

Gaztelania eta Literatura irakasgaiaren eta, halakorik baldin bada, Euskal Hizkuntza eta Literatura irakasgaiaren programazio didaktikoan, ikasleek etxean irakurtzea sustatzeko behar diren neurriak ezarriko dira.

Matematika irakasgaiaren programazioan berariazko aipamena eginen zaie problemen ebazpenari eta horretarako behar diren jarduketei.

Curriculumean diren hizkuntzen programazioetan baterako ekintza didaktikoak jaso ahal izanen dira hizkuntzen tratamendu integratua praktikan jarri ahal izateko. Horrela ahalik ongien erabiliko dira ikasleek hizkuntz gaitasunak lantzen ematen dituzten orduak.

Eskolako liburutegia egokiro antolatuko da, eskola komunitatearen behar bibliografikoak asetzen dituen baliabide-zentro gisa. Ikasturtean zehar liburutegian egin beharreko jarduerak jasoko dira irakasgaien programazio didaktikoetan.

Garrantzi handiko curriculum egokitzapenak soilik jarriko dira Pedagogia Terapeutikoko espezialistaren esku. Garrantzirik gabeko eta garrantzizko curriculum egokitzapenak egitea kurtsoetan irakasgaiak ematen dituzten irakasleen ardura izanen da. Betiere kasuan kasuko departamentu didaktikoak gainbegiratuko ditu. Nolanahi ere, egokitzapen horien koordinazioa eta jarraipena egitea ikaslearen tutoreari dagokio. Orientazio arloko langileen aholkuak jasoko ditu horretarako.

4. Aniztasunari arreta emateko Plana.

2005-2006 ikasturtean ikastetxeek Aniztasunari arreta emateko Plana egin edo berrikusiko dute. Zuzendaritza taldea izanen da lan horren arduraduna, eta ikastetxeko irakasle taldeek eta beste organo batzuek parte hartuko dute.

Oinarrizko gaitasunak hobetzeko ildotik, Aniztasunari arreta emateko Planean bilduko dira hezkuntza behar bereziak dituzten ikasleentzako laguntza eta ebaluazio neurriak. Neurri horiek Urteko Programazio Orokorrean eta ikasturte amaierako memorian jaso behar dira.

Aniztasunari arreta emateko Planean, ikastetxeek Ikasle Etorkinentzako Harrera Programa garatu behar dute. Agiri horretan azalduko dira harrera egiteko protokoloa, behar zehatzei buruzko azterlana, jarduketen programa eta horren arduradunak.

2005-2006 ikasturtearen hasieran, Haur eta Lehen Hezkuntzako ikastetxeetako zuzendaritza taldeek eta barruti bereko Bigarren Hezkuntzako ikastetxeetakoek informazioa trukatzeko koordinazio-mekanismoak ezarriko dituzte, ikasleen eskolatzea etengabea izanen dela eta eskola absentismorik izanen ez dela bermatzeko; behar izanez gero, oinarrizko gizarte zerbitzuekin harremanetan jarriko dira. Horretarako, zuzendaritza taldeek ikastetxeetako orientatzaileen laguntza jasoko dute, eta lankide izanen dituzte Lehen Hezkuntzako hirugarren zikloko eta Derrigorrezko Bigarren Hezkuntzako lehen kurtsoko irakasle taldeak.

5. Tutoretza Plana.

Tutoretza Planak ikastetxeko egoeraren azterketa izanen du oinarri, lehentasuneko beharrak jasoko ditu eta ikastetxeko Hobekuntza Planari egokituko zaio.

Tutoretza Planean irizpideak, jarduketak eta prozedurak ezarriko dira, 2005-2006 ikasturtean irakasle tutoreek, ikastetxeko orientazioaren arduradunarekin elkarlanean, horiexek garatu ditzaten ikasleekin, familiekin eta talde bakoitzeko irakasle taldearekin.

Tutoretza Planean adierazi behar da nolako tratamendua emanen zaion 2005-2006 ikasturterako hobekuntza planean hautaturiko balioen garapenari.

Plan horretan jaso behar dira ikastetxearen eta familien arteko komunikazioa erraztuko duten jarduketa guztiak, eta arreta berezia eman behar zaie ikastetxeko hobekuntza planarekin zerikusia duten alderdiei.

Ikasleek etapa honetan etorkizunari buruzko erabakiak hartu behar dituztenez, Ikasketa eta Lanbide Orientaziorako Programa ere sartu behar da planean, ikasleei etorkizun akademiko eta profesionala hautatzen laguntzeko jarduketa guztiak bilduko dituena.

Ikastetxeko zuzendaritza taldearen ardura izanen da plan hori egitea. Orientatzaileak, klaustroak, tutoreek, irakasle taldeek eta koordinaziorako beste organo batzuek aholku emanen diote eta lan horretan parte hartuko dute.

6. Bizikidetza Plana.

Ikastetxeek Bizikidetza Plana eginen dute. Ikastetxeko Hezkuntza Proiektuaren atal izanen da, eta bertan jasotzen diren ekintzak Tutoretza Planean ere sartuko dira. Ikastetxearen egoera kontuan izanik eginen da Bizikidetza Plana. Lehentasuneko helburuak, arazoak antzemateko irizpideak, prebentzio neurriak eta gatazkak konpontzeko prozesua bilduko ditu.

Ikastetxeko zuzendaritza taldearen ardura izanen da plan hori egitea. Orientatzaileak, klaustroak, tutoreek, irakasle taldeek eta koordinaziorako beste organo batzuek aholku emanen diote eta lan horretan parte hartuko dute.

7. Ikastetxeko Prestakuntza Plana.

Irakasleei Laguntzeko Zentroetan abian jarri dira Irakasleen Prestakuntzarako Kontseiluak. Ondorioz, ikastetxe bakoitzak prestakuntzaren arduraduna eduki behar du, besteak beste eginkizun hauek izanen dituena: Ikastetxeko Prestakuntza Plana egiteko prozesua bizkortzea, plan horrek sorrarazitako beharrak jakinaraztea bere barrutiko ILZko aholkulariei, bere barrutiko ILZko Prestakuntza Kontseiluan parte hartzea eta irakasleen ordezkaria izatea kontseilu horretan.

Hona hemen Ikastetxeko Prestakuntza Planaren ildo nagusiak 2005-2006 ikasturterako:

_Zuzendaritza taldeei behar duten prestakuntza bermatzea, hobekuntzarako tresna izanen den zuzendaritza-proiektua prestatu ahal dezaten, ikastetxeko egoeraren diagnostikoa egin ondoren.

_Kalitatea kudeatzeko sistemak sustatzea Hezkuntza Departamentuaren ikastetxeetan eta hezkuntza zerbitzuetan.

_Ikastetxeetako hobekuntza planak bultzatzea, bereziki hizkuntz gaitasunei eta gaitasun matematikoei dagokienez.

_Irakasleen prestakuntza sustatzea zeharkako gaietan, banakoen, gizartearen eta ikasketen eremuetako balioetan oinarritutako hezkuntza eta bakearen kultura sustatzen dituen eskaintza integratuaren bitartez.

II._Irakasleak.

1. Tailerren mantentze eta horniketarekin zerikusia duten jarduerak.

Lanbide Heziketa Berariazkoa ematen duten Bigarren Hezkuntzako institutuetan tailerren mantentze eta horniketaz arduratuko den irakasleak astean hiru eskola ordu eman ahal izanen ditu, gehienez, lan horretan.

2. Heziketa ziklo batean dauden irakasleen jarduna bigarren kur- tsoko azken hiruhilekoan, eskola orduak gutxitzean.

Ikasleek Lantokietako Prestakuntza Modulua egiten duten bitartean irakastordu gutxiago dituzten irakasleek denbora hori emanen dute, Lantokietako Prestakuntza Moduluan sartu ez diren ikasleak atenditzeaz gainera, errekuperaziorako jarduera antolatuetan, ikastetxean heziketa zikloak ikasten ari diren beste talde batzuei laguntza ematen, bai eta lan hobekuntzako jardueretan, ikastetxeko instalazioek behar dituzten mantentze lanetan, Lantokietako Prestakuntza Moduluko tutorearekin lankidetzan ikastetxeak dituen beharren arabera modulu hori egiten ari diren ikasleei jarraipena egiten, berrikuntza proiektuak garatzen, esperientzia duten langileei prestakuntza emateko taldeei kasu egiten eta laguntzen, prozedura ez-formalen bidez lortutako lanbide gaitasuna ebaluatzeko prozesuetan eta atzerriko programen ondoriozko beharrak atenditzeko lanetan ere. Hori guztia, ikasketaburuak egin eta Zerbitzuak Ikuskatzeko eta Ikuskapen Teknikorako Zerbitzuak ontzat eman beharreko lan plan baten bitartez.

3. Ordutegia ikastetxe batean baino gehiagotan banatua duten irakasleak.

Ikastetxe batean baino gehiagotan ari diren irakasleen ordutegia prestatzerakoan, Hezkuntza Departamentuak irakasle ibiltariei buruz emandako arauak beteko dira.

4. Esparruko irakasleak.

Esparruko irakasleek bere esparruko irakaskuntzak emanen dituzte Curriculum Egokituko Unitateetan, Curriculum Aniztasuneko Programetan eta Lanbide Hastapeneko Programetan.

a) Zientziaren esparruko eta hizkuntza eta gizartearen esparruko irakasleak. Irakasle horiek beren esparruko irakaslanean behar adina eskola ordu egiterik ez badute, ikastetxeak irakaslan gehiago esleitzen ahalko die, berariazko talde hauetako irakaslana departamentu didaktiko egokietako kideei esleitu eta gero eskola ordurik geratzen baldin bada. Horretarako lehentasun ordena honakoa izanen da:

_Oinarrizko Prestakuntzako Ziklo Egokitua, ikastetxean halakorik egonez gero.

_DBHko 4. kurtsoko Praktikaren eta Oinarrizko Prestakuntzaren Aukera.

_Gaztelania bigarren hizkuntza gisara irakastea, Hizkuntz Murgilketarako Programa ematen duten ikastetxeetan.

_Aniztasunari arreta emateko laguntza.

Ikastetxeak beharrezkoa badu, irakasle horiek, aurrean aipatutako irakaslana betez gero, beste kurtso batzuetan eskola ematen ahalko dute; betiere beren espezialitateko edo gertuko irakasgaietan ariko dira, eta ikastetxean irakasgaiak esleitzeko erabiltzen diren irizpideak errespetatuko dira.

b) Curriculum Egokituko Unitateetako eta Curriculum Aniztasuneko esparru praktikoan ari diren irakasleek beren esparruko irakaslanean behar adina eskola ordu egiterik ez badute, ikastetxeak irakaslan gehiago esleitzen ahalko die Oinarrizko Prestakuntzako Ziklo Egokituan.

c) Lanbide Hastapeneko Programen esparru praktikoan ari diren irakasleak.

Lanbide Heziketa Berariazkoaren arloan ikastetxe publikoek ematen dituzten programetan ari diren irakasleak zein bere lanbide arloko departamentu didaktikoan sartuko dira edo, halakorik ezean, gertueneko lanbide arloko departamentuan. Oinarrizko Prestakuntzaren arloko irakasleak programaren ezaugarrietarako departamentu egokienean sartuko dira, zuzendaritza taldearen irizpideari jarraituz.

Ikastetxean behar adinako irakaslanik ez badago esparru praktikoan eta Lanbide Hastapeneko Programetan behin betiko destinoa duten irakasle guztiak programa horietan aritu ahal izateko, irakasleok _behar den titulu akademikoa baldin badute_ eskolak emanen dituzte CEUetan, Curriculum Aniztasuneko Programetan, Oinarrizko Prestakuntzako Ziklo Egokituan (baldin eta Ziklo Egokitu hori gaika ematen bada eta ez esparruka, eta berariazko talde hauetako irakaslana Teknologiako Departamentu Didaktikoko kideei esleitu ondoren eskola ordurik geratzen bada), edo bestela Lanbide Heziketako Prestakuntza Zikloetan. Hautaketaren ordena 229/2002 Foru Dekretuaren 10. artikuluko 4. puntuan ezarritakoa izanen da.

d) Lanbide Hastapeneko Programa, CEU, Curriculum Aniztasuneko Programa eta, halakorik egonez gero, Oinarrizko Prestakuntzako Ziklo Egokituetako irakasle taldeetan ari diren esparruko irakasleek koordinaziorako eta tutoretzarako dituzten hiru irakastorduetatik bat bederen gordeko dute programazio didaktikoaren garapen eta ebaluazioaren inguruko koordinazio lanetarako eta tutoretza lana koordinatzeko lanetarako (uztailaren 6ko 225/1998 Foru Dekretuaren 22.3 artikulua).

5. Tutoreen koordinazio eginkizunak.

Uztailaren 6ko 225/1998 Foru Dekretuaren 22.3 artikuluaren arabera Derrigorrezko Bigarren Hezkuntzako, Batxilergoko eta Berariazko Lanbide Heziketako ikasle taldeen tutoreek koordinazio eginkizunetarako astean duten irakastordua, ahal baldin bada, ikasleen jarraipena egiteko jardueretarako erabiliko da.

6. Institutuetako zuzendarien koordinaziorako ordutegia.

Ikastetxeen arteko koordinazioa areagotzeko, institutuetako zuzendariek ez dute eskolarik eman beharrik izanen astearte goizetan.

7. Asteazken arratsaldeko ordutegiari buruzko xehetasunak.

Plangintza instituzionaleko edo prestakuntzako baliabideak prestatzeko emandako denboraren erdia (hil bakoitzeko lehen eta hirugarren asteazkenak) nahitaezkoa izanen da eta lehentasuna izanen du irakasleek egin beharreko beste edozein lanaren aurretik; ikastetxeko zuzendariak zainduko du betetzen dela eta berak ezarriko du lan plana; beste erdia (gainerako asteazkenak) irakasleen esku geldituko da. Horrela beteko da uztailaren 6ko 225/1998 Foru Dekretua aldatzen duen azaroaren 229/2002 Foru Dekretuaren hirugarren artikuluan ezarritakoa, bertan ezartzen baita urtean 35 ordu eman behar direla nahitaezko prestakuntzan.

Aurreko lerroaldean ezarri ordu kopuruari puntualizazio hauek egin beharko zaizkio:

_Orientazio Departamentuko irakasleak programazio didaktikoak prestatzen arituko dira, zehazki, curriculum aniztasuneko programetara eta curriculum egokitzapenetara egokitutako curriculum unitateen arloetakoak.

_Gainerako irakasleek programazio berariazkoak, oso garrantzitsuak ez diren curriculum egokitzapenak eta irakasle-lana lagundu eta indartzeko baliabideak prestatuko dituzte.

Derrigorrezko Bigarren Hezkuntzako institutuetako (DBHI) irakasleek plangintza instituzionalerako tresnak egiteko eta prestakuntza jardueretarako erreserbaturiko asteroko ordu osagarriak, bai eta Departamentuko bilerarako asteroko ordu osagarria ere, ondoko jardueretarako erabiliko dituzte:

_Derrigorrezko Bigarren Hezkuntzako programazio didaktikoak egin edo/eta berrikustea, haien ikastetxeak atxikirik dituzten Bigarren Hezkuntzako Institutuen Departamentu Didaktikoekin koordinatuta.

_Derrigorrezko Bigarren Hezkuntzako irakaskuntzen koordinazio didaktikoa egitea beren ikastetxean, zuzendaritza taldeak egindako planifikazioaren arabera, edo ikastetxea atxikirik duen Bigarren Hezkuntzako Institutuaren Departamentu didaktikoetan. Azken jarduera hori egiteko, ezertan ukatu gabe uztailaren 16ko 258/1998 Foru Aginduaren 25. artikuluan ezarritakoa, Derrigorrezko Bigarren Hezkuntzako institutuetako irakasleak, oro har, beren ikastetxeak atxikirik dituzten Bigarren Hezkuntzako institutuetako departamentu didaktikoen bileretara joanen dira hilean behin.

8. Zaintza.

Zaintzako irakaslearen eginkizun nagusiak hauek dira:

a) Irakasleak huts egiteagatik edo beste edozein arrazoirengatik zaintzailerik ez duten ikasleei kasu egitea.

Irakasleren batek aurrez baldin badaki huts eginen duela, antolaturik utziko du ikasleek zer lan egin behar duten gelan, eta ikasketaburuari emanen dio laneko plan hori.

Ikasleek ez badute inolako lan berezirik, edo hala hitzartzen badu huts egiten duen irakasleak zaintzako irakaslearekin, zaintzako irakasleak zilegi izanen du ordu hori ikasleei bere gai propioa emateko erabiltzea, betiere ikasketaburuaren baimena baldin badu, eta gainerako ordutegia aldatzen ez bada.

b) Korridoreetan ordena zaintzea eta, oro har, ikasleek gelaz kanpo duten portaera. Horrek ez du esan nahi beste irakasleek eginkizun hori bete behar ez dutenik.

c) Beren txandan sortzen diren gorabehera guztiak konpontzea, bai eta ikastetxeko norbait mediku beharrean gertatuz gero hartarako dilijentziak egitea ere, horrez gain ikasketaburua lehenbailehen jakinaren gainean jarriz.

d) Beren txandan irakasleek duten puntualitate eta asistentziaren berri ematea idatziz, klaseei, zaintzari, liburutegiari eta bestelako jarduerei dagokienez.

Ikasketaburuak zaintzei buruzko parte bat prestatuko du egunero, beti Zerbitzuak Ikuskatzeko eta Ikuskapen Teknikorako Zerbitzuaren eskura egonen dena. Gutxienez honako datuak izanen ditu:

_Irakasleen hutsegite eta atzerapenak.

_Ikastetxeko edozein egoitzatan izan diren gorabeherak.

_Gertatu diren istripuak.

_Zaintzako irakasleen sinadurak.

Irakasleren baten zaintza orduak berariazko beste jarduera batzuekin trukatzen ahal dira, baldin zaintza ordu guztiak beteta badaude eta jarduerak Klaustroak onetsi baditu.

III._Irakaslana koordinatzeko organoak.

1. Departamentu didaktikoak.

1.1. Nafarroako Urrutiko Hizkuntz Eskola Ofizialarekin koordinatzeko bilerak.

Nafarroako Urrutiko Hizkuntza Eskola Ofizialarekin lankidetzan aritzeko Programari jarraikiz atzerriko hizkuntzak irakasteko baimena duten Bigarren Hezkuntzako institutuetako departamentu didaktikoek Nafarroako Urrutiko Hizkuntza Eskola Ofizialak finkatzen dituen bilera guztiak eginen dituzte aipatutako Eskolako arduradunekin, ikasturte hasieran. Programan parte hartzen duten irakasle guztiek joan beharko dute bilera horietara.

Ikasturtean zehar gutxienez hilabetean behin bilera bat eginen da curriculumaren garapena aztertzeko hala nola programa horren aplikazio praktikoaren ondorioz sor daitezkeen arazoak konpontzeko.

Irakasle horien eginkizunak Nafarroako Urrutiko Hizkuntza Eskola Ofizialeko Jarraibideak 2005-2006 ikasturterako arautzen dituen Ebazpenaren eranskinaren II. ataleko 5. puntuan ("Irakasle laguntzaileak") bildu dira.

Era berean, ekainean ebaluatuko da programa, hurrengo ikasturteetan hura hobetzeko neurriak hartzeko.

Ebaluazioan programazioa bete den aztertuko da, koordinazio bilkurak nola egin diren ikusiko eta erabilitako materialak eta egindako ebaluazio probak aztertuko.

1.2. Departamentuburutza. Bestelako eginkizunak.

Departamentuburuak, Erregelamendu Organikoan, uztailaren 16ko 258/1998 Foru Aginduan eta jarraibide hauetan aipatzen diren eginkizunak bere gain hartzeaz gainera, ikasturte hasieran Urteko Lan Plana aurkeztu beharko du, departamentuak urtean zehar egin beharrekoa bilduko duena, departamentuan aztertu eta onesteko. Plan horretan, besteak beste, ikasturtearen hasieran lehentasuna emanen zaio hezkuntza etapei dagozkien ikasketen programazio didaktikoak prestatzeko egin beharreko lanari, Batxilergoa irakasten duten Institutuen kasuan, edo ziklo bakoitzeko moduluetako programazio didaktikoa prestatzeari, Berariazko Lanbide Heziketaren ikasketak ematen dituzten Institutuen kasuan.

2. Koordinazioko beste eginkizun batzuk.

Bigarren Hezkuntzako Institutuen Erregelamendu Organikoan eta uztailaren 16ko 258/1998 Foru Aginduan aurreikusten diren karguak, zuzendaritzakoak eta didaktikoak, beteko dituzten irakasleak izendatuta, eskolako premia guztiei erantzuna emanik eta Institutuak dituen orduen arabera, zuzendariak zilegi izanen du, idazkariak hala proposaturik, kargu horietarako izendapenik jaso ez duten irakasleen artean liburutegiko koordinatzaile bat izendatzea, zeinak, gehienez, astean bi irakastordu eman ahal izanen baititu karguari dagozkion lanetan.

Liburutegiko irakasle koordinatzaileak, idazkariaren agindupean, honako eginkizun hauek izanen ditu, besteak beste:

a) Ikastetxeko liburutegiak duen material didaktikoa behar bezala antolatu eta zaintzea, eta behar bezala erabiltzen dela bermatzea.

b) Ikasleei kasu egin eta aholku ematea ikastetxeko liburutegiaren baliabideak erabiltzeko.

c) Ikastetxeko liburutegian dagoen material didaktikoari buruzko informazioa zabaltzea irakasle eta ikasleen artean, batez ere gauza berriei buruz, eskuratu ahala.

d) Liburutegirako material eta funts berriak erosteko aholkuak ematea.

e) Hezkuntza komunitateko sektore guztietan, eta bereziki ikasleen artean, irakurketa sustatzeko lanetan laguntzea.

Orobat, bi lanbide arlo edo gehiagoko heziketa zikloak ematen dituzten Bigarren Hezkuntzako institutuetan, idazkariak hala proposatuta, zuzendariak ahalmena izanen du irakasle bat ekipamendu didaktikoaren arduradun izendatzeko, lanbide arlo guztietarako konpartitua. Horren dedikazioa liburutegiko koordinatzailearena bezalakoa izanen da.

Arestian aipatutako koordinazio eginkizunei erantzuna emanda, ikastetxeak dituen orduen arabera, eta ikastetxe batean, eskola orduetatik kanpo, kirol, musika, kultur jarduerak, oro har, iraunkorrak, antolatzen badira, zuzendariak zilegi izanen du, ikasketaburuak hala proposaturik, jarduera hauen irakasle arduradunak izendatzea, parte hartzeko interesa dutenen artean. Aukera hau gauzatzeko kirol jardueren irakasle arduradun bat eta arte eta kultur jardueren irakasle arduradun bat izendatu ahal izanen dira. Irakasle horiek, dauden orduen arabera, lan horietan, astean, bi irakastordu eman ahal izanen dute, gehienez.

IV. ERANSKINA

Beste jarraibide batzuk

1. Irakasleek ordutegia betetzea eta asistentzi partea.

Zuzendaritza taldeak jakinaraziko die Giza Baliabideen Zerbitzuari eta Zerbitzuak Ikuskatzeko eta Ikuskapen Teknikorako Zerbitzuari, lan edo administrazio araubideko aldi baterako lan-kontratudunak zein egunetan hasi diren ikastetxean.

Asistentzi parteen eredu ofizialak betetzean, honakoak hartu behar dira aintzat parte horietan:

a) Inoiz ez da utziko hutsik "Hutsegitearen arrazoia" laukia, eta hala egiten bada, justifikatu gabeko hutsegitetzat hartuko da.

b) Hutsegite guziek agertu behar dute, bat ere utzi gabe.

c) "Hutsegitearen arrazoia" laukian "ordainsaririk gabeko norberaren eginkizunetarako baimena" jartzeko, nahitaezkoa izanen da Giza Baliabideen Zerbitzuak hartarako lizentzia eman izana.

Zuzendariak, justifikazioa aurkezteko epea amaitu eta biharamunean aditzera emanen dio Zerbitzuak Ikuskatzeko eta Ikuskapen Teknikorako Zerbitzuari irakasle baten edozein hutsegite nahiz atzerapen, ikasketaburuari justifikatu gabekoa iruditzen zaiona, bere lansaritik tokatzen den kenketa egiteko eta, hala behartzen bada, espedientea hasteko. Kasuko irakasleari ere emanen zaio, idatziz, horren berri.

Aurreko paragrafoan aipatutako epea Nafarroako Gobernuko langileentzat orokorrean ezartzen dena izanen da.

Irakasleek hutsegitearen justifikanteak aurkeztu behar dizkiote zuzendariari, horrek eskatu gabe.

Asistentzi partearen kopia bat jendaurrean paratuko da, ikusgai, irakasle gelan hil bakoitzaren 5a baino lehen.

Irakasleen hutsegiteen justifikanteak (baja agiriaren kasuan, haren kopia edo fotokopia) ikastetxeko zuzendaritzan geldituko dira Zerbitzuak Ikuskatzeko eta Ikuskapen Teknikorako Zerbitzuaren eskura.

Eskola emate normalaren alterazio guztiak berehala emanen zaizkio aditzera telefonoz Zerbitzuak Ikuskatzeko eta Ikuskapen Teknikorako Zerbitzuari, eta bai ondoren asistentzi partean jasoko.

2. Hizkuntza Eskola Ofizialetan ingelesa edo frantsesa bertaratze modalitatean ikasteko ikaspostuen erreserba.

Iruñeko eta Tuterako Hizkuntza Eskola Ofizialek, ohiko eskaintzaren barruan, araubide ofizialeko ikaspostu kopuru bat gordeko dute Nafarroako Haur eta Lehen Hezkuntzako nahiz Bigarren Hezkuntzako ikastetxe publikoetako irakasle funtzionarioek ingelesa edo frantsesa ikas dezaten. Horretarako izena eman eta ikaspostuak esleitzeko prozedura Eskolek ezarriko dute.

3. Aniztasunari arreta emateko neurri osagarriak.

Edukiak ingelesez irakasteko eskolaldiak gehitzearen ondorioz Lehen Hezkuntzako tutoreak bere taldean liberatzen dituen orduak nahitaez erabili beharko dira irakasle etorkinei edo egoera soziokultural ahuleko gutxiengoei arreta emateko, lehenbizi, eta, ikastetxean halako arreta motarik ez badago, aniztasunari arreta emateko neurrietarako izanen dira ordu horiek; inoiz ez dira erabiliko ikasleekin zuzenean egiten ez diren jardueretarako. Haur Hezkuntzan, ordu horiek koordinazio jardueretarako erabiliko dira edo, bestela, indartze jardueretarako eta taldeak banatu ahal izateko.

Aniztasunari arreta emateko neurrien artean, 2005-2006 ikasturtean Hezkuntzarako Laguntza Programa Esperimentala ezarriko da Lehen Hezkuntzako zenbait ikastetxetan, Lehen Hezkuntzako hirugarren zikloan, egoera soziokultural ahula izan eta curriculumean atzeratuta dabiltzan ikasleei arreta emateko, eskola orduetatik kanpo ez baldin badute gizarte edo famili ingurune egokirik ikasteko. Programa hori Aniztasunari arreta emateko neurri orokorren osagarria izanen da. Premia duten ikastetxe batzuetan jarriko da abian, halako ikasleei hezkuntzarako laguntza eman ahal izateko eskola orduetatik kanpo. Ikastetxeko irakasle batek edo/eta kanpoko monitore batek garatuko du programa hori. Aukerako jarduera izanen da irakasleentzat. Ikastordu gisara konputatuko da eta ikastetxeak duen ahalbideari egokitu beharko zaio.

Beste alde batetik, 2005-2006 ikasturtean bertan eta Aniztasunari arreta emateko neurrien barruan, Bigarren Hezkuntzako instituturen batean programa esperimental bat jarriko da abian, egoera soziokultural ahuleko ikasleen absentismoa eta ikasketen etena gutxitzea helburu duena. Horrelako ikasleak dituzten Lehen Hezkuntzako ikastetxeekin koordinaturik ezarriko da programa hori. Familiekin eta Bigarren Hezkuntzako Institutuko irakasleekin batera lan eginen da, halako ikasleez arduratzen diren kanpoko erakundeekin koordinaturik.

4. Salbuespenak eta egokitzapenak, Gorputz Hezkuntzaren arloan.

Salbuetsiak daude soilik hogeita bost urtetik goitikoak edo matrikulatutako ikasturtean adin hori betetzen dutenak.

Hala ere, zuzendaritzari Batxilergoko Gorputz Hezkuntza egitetik salbuesteko eskaera egin ahalko diote mugikortasun arazo larriak dituzten ikasleek, ohiz kanpoko kasuetan. Egoera hori behar bezala frogatu beharko da.

Curriculum egokitzapenei dagokienez, egokitzapenak egiteko eskabideak ikasleek edo, adingabeak baldin badira, beren gurasoek edo legezko ordezkariek aurkeztuko dituzte ikastetxeko zuzendaritzan, eta medikuen ziurtagiriak erantsiko zaizkie.

5. Derrigorrezkoaren ondoko Bigarren Hezkuntzan matrikulari uko egitea.

Derrigorrezkoaren ondoko Bigarren Hezkuntzako edozein ikasketa, baita goi mailako heziketa zikloak ere, egiten ari diren ikasleek, ikasketak bukatzeko deialdiak mugatuak badira, zilegi izanen dute beren espediente akademikoak gordetzen dituen institutuko zuzendariari eskatzea matrikula baliogabetzeko, baldin eta agiri bidez eta era frogagarrian egiaztatzen badute ondoko gorabehera hauetako bat:

_Eritasun fisiko nahiz psikiko luzea izatea.

_Lanpostu bat eskuratu dutela.

_Familiako beharkizunak dituztela.

Ikaslearen irakasleari entzun ondoren, ikastetxeko zuzendariak eskaera ebatzi eta matrikula baliogabetzeko baimena emanen du, baldin eta aipatu arrazoi horietako bat frogatzen bada eta, hori dela medio, ezinezkoa izan bada eskatzailea eskolara normalki joatea eta etengabeko ebaluazioaren bidez haren kalifikazioa egitea.

Arestian esandakoez landara, ohiz kanpoko beste arrazoirik izaten bada, ikaslearen espediente akademikoa gordetzen duen Bigarren Hezkuntzako institutuko zuzendariari eginen zaizkio matrikula baliogabetzeko eskaerak, epe berean. Kasu horretan, zuzendariak eskaera eta harekin batera txosten bat eta, beharrezkoa bada, dagokion dokumentazioa bidaliko ditu Eskola eta Lanbide Irakaskuntzaren Zuzendaritza Nagusira, egokia den ebazpena eman dadin.

Matrikulari uko egiteko baimena ematen den kasu guztietan, dagokion eginbidea agerraraziko da ikaslearen ikasketen espedientean eta kontuan hartuko da uko horrek baimendu den ikasturte horretarako bakarrik balio duela. Horrelako kasuetan, ikasturte hori ez da kontuan hartuko irakaskuntza horietan egoteko gehieneko epea kontatzean. Matrikula baliogabetzen zaien Batxilergoko ikasleek hurrengo ikasturtean matrikula egin beharko dute aurreko urtean matrikulatu ziren kurtso berean. Hori egin ezean, ikasle ofizial gisa izandako eskubide guztiak galduko dituzte. Lanbide Heziketako eta Arte Plastikoetako eta Diseinuko ikasleek, matrikula baliogabetuz gero, hurrengo ikasturterako ikaspostuaren erreserba galduko dute.

6. Ikasleek kalifikazioei buruz erreklamazioak egiteko prozesua.

Ikasleei beren errendimendu akademikoaren balorazio objektiboa bermatzeko, beharrezkoa da ikasleek aurretik izatea helburuen, edukien eta ebaluazio irizpideen berri, hala nola balorazio positiboa izateko eskatutako gutxieneko emaitzena, kalifikazio irizpideena eta ikasketak ebaluatzeko ikasturtean erabiliko diren prozedurena.

Irakasle titularrak ikasleei, haien gurasoei edo legezko ordezkariei programazio didaktikoez eskatzen dituzten argibideak emanen dizkie. Ebaluazioa egiteko tresnei buruzko informazioa ere emanen die eta ikasleek zilegi izanen dute egin dituzten idatzizko proba, ariketa eta lanak ikusi eta irakaslearekin batera aztertzea.

Ebaluazioa egiteko tresnak azken erabakiak hartu edo ikasturte amaierako kalifikazioak eman ondoko hiru hilabeteetan gordeko dira gutxienez.

Ikasle guztiek eskubidea dute beren kalifikazioan eragina izanen duen edozein azterketa edo proba idatzi zuzenduta eta kalifikatua ikusteko.

Ikasleek, haien gurasoek edo legezko ordezkariek zilegi izanen dute balorazio eta kalifikazioei buruzko argibideak eskatzea. Informazio hori eman ondoren ados ez badaude ikasturte amaierako kalifikazioarekin, hura berriz aztertzeko eskatzen ahalko diote idatziz ikasketaburuari, jakinarazpena egin eta bi egun balioduneko epean.

Azken kalifikazioa eta/edo agiria eskuratzekoa berraztertzen baldin bada, departamentu didaktikoek edo, kasua bada, epaimahaiek, hurrengo egun baliodunean, berraztertzeko eskakizunak ikusi eta dagozkien txostenak eginen dituzte. Txostena ikasketaburuari igorriko zaio eta horrek kopia bat bidaliko die ikasleei edo haien gurasoei.

Ikastetxeetan berraztertzeko prozesua agortzen duten ikasleek zilegi izanen dute, dela nork bere kasa, dela guraso edo tutoreen bitartez, ikastetxeko zuzendariari eskatzea erreklamazioa Zerbitzuak Ikuskatzeko eta Ikuskapen Teknikorako Zerbitzura igor dezala, azken jakinarazpena egin eta bi eguneko epean.

Ikastetxeko zuzendariak, gehienez ere hiru eguneko epean, espedientea bidaliko du Eskola eta Lanbide Irakaskuntzaren Zuzendaritza Nagusira. Zuzendari nagusiak ebazpena emanen du _eta horrek administrazio bideari amaiera emanen dio_ hamabost egun balioduneko epean espedientea jasotzen denetik hasita, Zerbitzuak Ikuskatzeko eta Ikuskapen Teknikorako Zerbitzuaren txostenak kontuan izanik.

Ikaslearen alegazioaren aldeko ebazpena ematen baldin bada arestian aipatutako instantziaren batean, dagokion zuzenketa agerraraziko da ebaluazio agirietan, ikastetxeko idazkariak sinatutako eta zuzendariak bisatutako eginbidearen bitartez.

Kalifikazioen kontrako berraztertze eskaerak eta erreklamazioak jarraibide hauetan ezarritakoari lotuko zaizkio, eta, jarraibide hauetan arautu ez diren aferetarako, 1995eko abuztuaren 28ko Aginduari (1995-9-20ko Estatuko Aldizkari Ofiziala).

7. Arteetako eta Teknologiako Batxilergo titulua lortzea.

Batxilergoa gauez edo urrutiko modalitatean (tutoretzapeko modalitatean) ematen duten ikastetxeei baimena ematen zaie Batxilergo titulua eskatzeko, Batxilergoko lehen eta bigarren mailak Arte edo Teknologia modalitatean egin eta errekuperatzeko hiru irakasgai komun edo gutxiago dituzten eta Batxilergoko ikasketak gaueko edo urrutiko (tutoretzapeko) Batxilergoa ematen duen institutu batean bukatu dituzten ikasleentzat.

8. Tutoretza Plana.

Tutoretza, Batxilergoko ikasleentzat, Tutoretza Planean sartuko da, kontuan izanik Batxilergoan ez dela izanen talde-tutoretzako ordurik ikasgelan, tutorearekin.

9. Batxilergoko bigarren mailara sartzeko aukera, LOGSE aurreko ikasketak egin eta Batxilergoaren antolaketa berriko ikasketak egin nahi dituzten ikasleentzat.

Batxilergoko bigarren maila egiten hasi ahalko dira Hezkuntza Sistemaren Antolamendu Orokorrari buruzko urriaren 3ko 1/1990 Lege Organikoaren aurreko ikasketak egin eta ondoko egoera hauetako batean dauden ikasleak:

_Osorik gainditua izatea hauetako bat: Batxilergo Bateratu Balioanitzeko hirugarren kurtsoa, Bigarren Mailako Lanbide Heziketako hirugarren kurtsoa irakaskuntza espezializatuen araubidean, Bigarren Mailako Lanbide Heziketako bigarren kurtsoa araubide orokorrean, edo Irakaskuntza Ertainen Erreformako Batxilergo Esperimentaleko bigarren zikloko lehenbiziko kurtsoa; edo, bestela, Batxilergo titulua (BBB) nahiz teknikari espezialistarena izatea.

_Osorik gainditua izatea Arte Aplikatuen eta Lanbide Artistikoen Irakaskuntzako espezialitateko bigarren kurtsoa edo Arte Aplikatuetako eta Lanbide Artistikoetako Graduatuaren titulua izatea.

_Unibertsitatera Bideratzeko Ikasturtea edo Irakaskuntza Ertainen Erreformako bigarren ziklo esperimentaleko bigarren kurtsoa errepikatu behar izatea.

Ikasleek Batxilergoko lehen kurtsoan matrikulatu beharra izanen dute irakasgai bat edo bi gainditu behar badituzte ikasketa hauetako bat osorik amaitzeko: Batxilergo Bateratu Balioanitzeko hirugarren kurtsoa, edo irakaskuntza espezializatuen araubideko Bigarren Mailako Lanbide Heziketako hirugarren kurtsoa, edo araubide orokorreko Bigarren Mailako Lanbide Heziketako bigarren kurtsoa, edo Irakaskuntza Ertainen Erreformako Batxilergo Esperimentaleko bigarren zikloko lehenbiziko kurtsoa, edo Arte Aplikatuen eta Lanbide Artistikoen Irakaskuntzako espezialitateko bigarren kurtsoa.

10. Irakaskuntza araubidea aldatzea.

Ohiko araubideko ikasketak egiteko matrikula irakaskuntza araubide batetik beste batera pasatzen duten ikasleek, sartzen diren araubideko ikasketa planeko irakasgai guztietan matrikulatu beharko dute, kontuan hartu gabe utzi nahi duten araubidean kurtsoz igarotzeko zituzten baldintzak aplikatzen zaizkien ala ez.

Iragarkiaren kodea: F0515485