67. ALDIZKARIA - 2005eko ekainaren 6a

I. NAFARROAKO FORU KOMUNITATEA

1.1. XEDAPEN OROKORRAK

1.1.4. Ebazpenak

437/2004 EBAZPENA, maiatzaren 12koa, Eskola eta Lanbide Irakaskuntzaren zuzendari nagusiak emana, 2005/2006 ikasturtean Lanbide Hastapeneko Programetan (Lanbide Lantegietan) ikasleak onartzeko arauak onesten dituena.

Kontuan harturik ekainaren 21eko 233/1999 Foru Dekretua, Nafarroako Foru Komunitatean gizarte garantiako berariazko programak arautzen dituena, otsailaren 28ko 54/2005 Foru Agindua, diru publikotik ari diren irakaskuntza ez-unibertsitarioko ikastetxeetan ikasleak onartzeko prozedura arautzen duena 2005/2006 ikasturterako, eta ikusirik Lanbide Heziketaren Zerbitzuaren eta Dibertsitate, Kultura-aniztasun eta Inmigraziorako Zerbitzuaren adostasun txostenak.

Hori horrela, Nafarroako Foru Komunitateko Administrazioa arautzen duen abenduaren 3ko 15/2004 Foru Legearen 22.1. artikuluko d) idatz-zatiak ematen dizkidan ahalmenak erabiliz,

EBATZI DUT:

1. Ebazpen honen helburua da Nafarroako Foru Komunitatean 2005/2006 ikasturtean Lanbide Hastapeneko Programetan (Lanbide Lantegietan) ikasleak onartzeko arauak ezartzea.

2. Ebazpen honetan ezartzen den prozedura, oro har, Lanbide Hastapeneko Programetara (Lanbide Lantegietara) iristen diren ikasle guztientzat izanen da. Lanbide Hastapen Bereziko modalitatean ikasleak onartzean, gainera, 15. artikulutik 19.era bitartekoetan (biak barne) espresuki azaltzen denari lotu beharra dago.

3. 1. Izen-ematearen urte naturalean 16-21 bitarteko adina izanik eta Derrigorrezko Bigarren Hezkuntzako (DBH) titulua ez duten gazteek eskatu ahalko dute Lanbide Hastapeneko Programetan sartzea.

3.2. Kasu berezietan, Eskolatze Batzordeak matrikula egiteko baimena eman ahalko die ikasturte batez Lanbide Hastapeneko Programa bat egin eta beste Programa bat egiteko eskaera aurkezten duten ikasleei. Ikasleak onartzeko prozedura arrunta bukatutakoan tokirik geratzen bada egin ahalko da matrikula hori.

4. Hezkuntza Departamentuak 2005/2006 ikasturtearen plangintzaren barruan eskaintzen dituen Programak egiteko eskaerak ebazpen honen I. eranskineko ereduaren araberakoak izanen dira.

5. Eskatzaile bakoitzak eskabide bakar bat aurkeztuko du eta bertan adieraziko, lehentasunaren araberako hurrenkeran, zer programa, ikastetxe edo entitate eskatzen duen. Lehentasunez eskatzen den ikastetxe edo entitatean aurkeztuko da eskabidea, behar diren ziurtagiriekin batera. Eskabidea bi lekutan aurkeztuz gero, baremoa aplikatu ondoren lortutako puntu guztiak galduko dira.

6. 1. 2004/2005 ikasturtean eskolatuak daudenek txosten-ziurtagiri bat aurkeztu beharko dute eskabidearekin batera, eta bertan azaldu egindako maila eta kurtsoa, bai eta Lanbide Hastapeneko Programei (Lanbide Lantegiei) buruzko orientazio psikopedagogiko bat ere, 2. eranskineko ereduaren araberakoa. Eskatzaileak Derrigorrezko Bigarren Hezkuntza osoa egin ez badu, aipatu txosten-ziurtagiriak ikastetxeko ikuskatzailearen ikus-onetsia izanen du nahitaez.

6.2. Eskatzailea 2004/2005 ikasturtean eskolaturik ez badago, egindako azken kurtsoko ziurtagiri akademikoa aurkeztuko du, emaitza eta guzti, dagokion ikastetxeak 3. eranskineko ereduari jarraikiz emana.

7. Programaren batean eskatzaileak ikaspostuak baino gehiago badira, ondoko irizpide orokor hauek aplikatuko dira hurrenez hurren:

1._Deseskolatzea.

2._Eskatzailearen adina.

3._Bizilekuaren hurbiltasuna.

4._Familiaren per capita errenta.

8. Irizpide orokor horiek ondoko baremo honi jarraikiz baloratuko dira:

8.1. Deseskolatzea:

8.1.1. 2004/2005 ikasturtean matrikula egina ez izatea Hezkuntza Departamentuak baimendutako ikasketetan, eta 3.1. puntuko baldintzak betetzea: 5 puntu.

Atal hau egiaztatzeko 3. eranskineko eredua erabiliko da.

8.2. Eskatzailearen adina:

8.2.1. Izen-ematearen urte naturalean 17 urte edo gehiago dituzten gazteak: 2,5 puntu.

8.2.2. Izen-ematearen urte naturalean 16 urte dituzten gazteak: 0 puntu.

Eskatzaileen adina egiaztatzeko NANaren fotokopia aurkeztuko da.

8.3. Bizilekuaren hurbiltasuna:

8.3.1. Helbidea eskatutako ikastetxe edo entitateari dagokion eskola aldean duten eskatzaileak (4. eranskina): 1,5 puntu.

8.3.2. Beste aldeetako eskatzaileak: 0 puntu.

Familiaren bizilekua egiaztatzeko Udalak emandako ziurtagiria aurkeztuko da.

8.4. Famili unitatearen per capita errenta:

8.4.1. 5.429 euroko edo hortik beherako per capita errentak: 1 puntu.

8.4.2. 5.429,01 eurotik 7.112 eurora bitarteko per capita errentak: 0,75 puntu.

8.4.3. 7.112,01 eurotik 8.470 eurora bitartekoak per capita errentak: 0,50 puntu.

8.4.4. 8.470,01 eurotik 9.401 eurora bitarteko per capita errentak: 0,25 puntu.

8.4.5. 9.401 eurotik gorako per capita errentak: 0 puntu.

Familiaren errenta frogatzeko 2003ko Pertsona Fisikoen Errentaren gaineko Zergaren aitorpenaren kopia aurkeztu beharko da. Aitorpena egin beharrik ez eta egin ez bazuten, urte horretan jasotako diru-sarrerak egiaztatzeko agiria aurkeztuko da.

Famili unitatearen errentak behar den bezala egiaztatzen ez badira, atal honetako puntuazioa 0 izanen da.

9. Eskatzaile batzuek puntuazio bera baldin badute, familiaren per capita errentarik txikiena duenaren alde joko da. Eskatzaileek jasotako errentei buruz informaziorik aurkeztu ez badute, gerta litekeen berdintasuna jendaurreko zozketaz erabakiko da.

10. Ikasleak onartzeko prozesuak ondoko epe hauek izanen ditu: eskabideak aurkezteko epea ekainaren 20tik 28ra bitartekoa izanen da, biak barne. Programa horietan onartuen zerrenda behin-behinekoak ekainaren 29an jarriko dira jendaurrean. Erreklamazioak aurkezteko egunak ekainaren 29a eta 30a izanen dira. Onartuen behin betiko zerrendak ekainaren 30ean argitaratuko dira. Matrikula, berriz, uztailaren 1etik 15era bitarte eginen da, bi egunak barne.

11. Eskabideak aurkezteko epea bukatuta, baimena duten ikastetxe edo entitateek baremoa aplikatuko diete Ebazpen honen zortzigarren puntuan ezarritakoari jarraikiz. Horretarako, ondoko prozedura honi jarraikiko zaio:

1._Eskola kontseiluak edo horretarako eratzen den batzorde delegatuak onartuen eta baztertuen behin-behineko zerrendak onetsiko ditu. Behin-behineko zerrenda horiek jendaurrean paratuko dira, eskatzaileen puntuazioa adierazita.

2._Ezarrita dagoen epean (ekainaren 29an eta 30ean) aurkezten diren erreklamazioak ebatzi ondoren, matrikulazio epea irekiko da, hamargarren puntuan aipatzen diren egunetan.

3._Uztailaren 18an, 19an eta 20an, hasieran eman eta interesatuek hartu ez dituzten tokiak Eskola Kontseiluak edo aipatu batzorde delegatuak banatu ahalko ditu, kontuan harturik hautaturiko aukera guztiak, eskatzaileek adierazitako hurrenkeran.

4._Prozesua erabat bukatutakoan, onartuen eta baztertuen behin betiko zerrendak eta azken horien eskaera espedienteak igorriko zaizkio Eskolatze Batzordeari, 2005eko uztailaren 30a baino lehen.

12. Agiri horiek jaso eta gero, Eskolatze Batzordeak zilegi izanen du eskolatu ez diren ikasleen eskabideak beste ikastetxe batzuetara igortzea, batzordeak ezartzen duen moduan eskolatzeko.

13. Tuterako "El Castillo" lantegi-eskolak, Ilundaingo "Haritz-Berri" baserri-eskolak, Iruñeko "Etxabakoitz" lantegi-eskolak eta Berriozarko "Lantxotegi" lantegi-eskolak, Lanbide Hastapeneko Programa egokituak eta oinarrizkoak emateko hitzarmenak baitituzte Hezkuntza Departamentuarekin eta Gizarte Ongizate, Kirol eta Gazteri Departamentuarekin, lehentasuna emanen diete matrikulazio prozesuan Nafarroako Gizarte Ongizatearen Institutuak egiten dituen programa eta ekintzetatik heldu diren gazteei.

14. Lanbide Hastapeneko Programetan (Lanbide Lantegietan) tokia lortzen dutenek ebazpen honen 10. eta 11. ataletan ezarritako epeetan egin beharko dute matrikula, 5. eranskineko matrikula orriaren eredua erabiliz.

15. Adimeneko ezgaitasunak dituztela-eta Derrigorrezko Bigarren Hezkuntza curriculum egokitzapen nabarmenekin egina duten ikasleentzako jarraibideak, Lanbide Hastapen Bereziko Programetan (LHBP) sartzeko:

15.1. LHBP bat egin dezaketen ikasleek, CREENAn eginen dute aurreinskripzioa, "Eskolatzeko modalitatea" dokumentuan ezartzen diren epeetan eta moduan.

15.2. Ikaspostuak esleitzen zaizkien zentroetako aurreinskripzioak Nafarroako Hezkuntza Berezirako Baliabideen Zentroko Psikikoen arduradunak eginen ditu.

15.3. Ikaspostua berretsitakoan, familiek zuzenean eginen dute matrikula zentroan, guztientzat ezarritako epeetan.

15.4. Programa baterako aurreinskripzioek ekainaren 21eko 233/1999 Errege Dekretuko V. kapituluko 14. artikuluan ezarritako ratioa gainditzen badute, irizpide hauek izanen dira ikasleen hautapenerako:

1._Derrigorrezko hezkuntzatik zuzenean etorritako ikasleak (LHBPrik edo LHPrik eginik ez dutenak)

1.1._Oinarrizko Hezkuntza egina duten ikasleak.

1.2._Adimen ezgaitasuna dela-eta Derrigorrezko Bigarren Hezkuntza curriculum egokitzapen nabarmenekin egina duten ikasleak.

2._Eskatzailearen datuak; adinik handienekoei lehentasuna emanen zaie.

16. Salbuespenez, ikasle batek utz dezake LHBP bat egin gabe beste batan inskribitzeko, bere derrigorrezko hezkuntzaren bukaera urtean ez baldin badago beraren premia eta berezitasunetara egokitzen den programarik, baldin eta Hezkuntza Premia Berezien Atalak baimena aldez aurretik emana badu. Lehentxeago aipatutako irizpideak ez dira kontuan hartuko kasu horretan.

17. Salbuespenez LHBP bat bukatua duen ikasle batek eskaten ahal du beste ikasturte batez programa berean jarraitzea (bertan ikaspostu hutsik izatera), honako beharkizun hauek betetzen baditu:

1._Ezarritako gutxieneko helburuak lortuak ez izatea eta hurrengo ikasturtean lortuko dituela aurreikusten bada.

2._21 urte baino gehiago ez izatea.

3._Ikastetxeak eskatzea, gurasoen oniritziarekin, eta horrekin batera aurkeztea bai Zuzendaritzak bai Orientazio Departamentuak emandako txostenak.

18. Nafarroako Gobernuko Hezkuntza Departamentuak, Hezkuntza Premia Berezien Atalaren bitartez, eskaera horren egokitasuna aztertuko du, eta bere esku izanen du onartzea edo ukoa ematea.

19. Oro har LHBPko ikasleen kopurua 6tik 12 bitartekoa izanen bada ere, kasu batzuetan eta Lanbide Hastapeneko Programek Nafarroan izanen duten funtzionamendua arautzen duen abuztuaren 17ko 627/2004 Ebazpena oinarri harturik, zilegi da "ikasle kopurua txikiagoa izatea programa batzuetan". Murrizketa hori ikasleen premia bereziek, testuinguruaren inguruabarrek, bitarteko jakin batzuen erabileratik sortutako arrisku faktoreek, tailerretako lan tekniken konplexutasunak, eta abar egiten dute zilegi. Horregatik guztiagatik, horrelako ezaugarriak dituzten LHBPetan ikasle ratioa 6/10 bihur daiteke. Ikasmaila desberdinetako ikasleak biltzen dituzten programetan (landa-inguruneetako maila anitzekoak, eta Iruñeko Agroforestal BHI) zilegi dira 4/8 ikasleko ratioak.

20. Ebazpen honetan arautzen ez diren gainerako arazoak ebazteko, Hezkuntza kontseilariak otsailaren 28an emandako 54/2005 Foru Aginduan ezarritakoari jarraikiko zaio.

21. Ebazpen hau Nafarroako ALDIZKARI OFIZIALera igortzea, argitara dadin.

22. Ebazpen hau honako hauei igorriko zaie: Lanbide Heziketaren Zerbitzua, Eskola Antolamendu eta Berriztapenerako Zerbitzua, Zerbitzuak Ikuskatzeko eta Ikuskapen Teknikorako Zerbitzua, Ikastetxeen eta Ikasketetarako Laguntzen Zerbitzua, Dibertsitate, Kultura-aniztasun eta Inmigraziorako Zerbitzua, Lanbide Heziketa Berriztatu eta Garatzeko Atala Hezkuntza Premia Berezien Atala, eta ikastetxe eta erakunde interesatuak.

Iruñean, 2005eko maiatzaren 12an._Eskola eta Lanbide Irakaskuntzaren zuzendari nagusia, Fermín Villanueva Ferreras.

1. ERANSKINA

2. ERANSKINA

3. ERANSKINA

4. ERANSKINA

"Bizilekuaren hurbiltasuna" izeneko 8.3.1. atala

aplikatzeari begira, kontuan hartuko diren

eskola alde eta barrutiak

ESKOLA ALDEAK:

A aldea (Sakana): 1. barrutia.

B aldea (Baztan): 2., 7. eta 11. barrutiak.

C aldea (Lizarra): 4. barrutia.

D aldea (Martzilla-Azkoien): 5. barrutia.

E aldea (Lodosa-San Adrian): 8. barrutia.

F aldea (Tafalla): 9. barrutia.

G aldea (Tutera-Corella): 3. eta 10. barrutiak.

H aldea (Irunberri-Zangoza): 6. barrutia.

I aldea (Iruña): 7., 11., 12., 13., 14., 15., 16., 17. eta 18. barrutiak.

ESKOLA BARRUTIAK:

Eskola barrutiak martxoaren 13an eman eta apirilaren 8ko Nafarroako ALDIZKARI OFIZIALean (43. zk.) argitaratutako 150/1996 Foru Dekretuaren 1. eranskinean (Hezkuntza eskualdeak) ezarri ziren.

5. ERANSKINA

Iragarkiaren kodea: F0512641