Iragarkia

41. ALDIZKARIA - 2005eko apirilaren 6a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

58/2005 EBAZPENA, martxoaren 17koa, Unibertsitateetarako eta Hizkuntza Politikarako zuzendari nagusiak emana, Unibertsitateko Garraiorako Laguntzen deialdia (2005eko apirila-ekaina aldia) eta zerbitzu horren Hitzarmena onesten dituena.

Unibertsitateko Irakaskuntza, Hedapen eta Ikerketa Zerbitzuak unibertsitateko garraiorako laguntzen 2005eko apirila-ekaina aldirako deialdiari buruzko txostena aurkeztu du. Batetik, antolamenduko alderdiak eta Nafarroako unibertsitarioei ekar diezazkiekeen onura ekonomikoak aztertu ditu, eta, bestetik, kasuan kasuko autobus zerbitzuen baimen administratiboen jabe diren enpresekin sinatu beharreko garraio hitzarmenak arautuko dituzten baldintza teknikoen pleguak.

Kontuan harturik Nafarroako Foru Administrazioaren eta haren erakunde autonomoen dirulaguntzak eman, kudeatu eta kontrolatzeko araubide orokorrari buruzko ekainaren 9ko 8/1997 Foru Legean aurreikusitakoa eta Zuzendaritza Nagusiko letraduaren derrigorrezko txostena izanik.

Nafarroako Foru Komunitatearen Administrazioari buruzko abenduaren 3ko 15/2004 Foru Legeko 22.1.d) artikuluak eman dizkidan ahalmenak erabiliz,

EBATZI DUT:

1. "Unibertsitateko garraiorako laguntzen deialdia (2004ko apirila-ekaina aldia)", ebazpen honen eranskinean ageri dena, onestea.

2. 2005eko apirila-ekaina aldirako unibertsitateko garraio horretarako baimen administratiboa duten enpresekin sinatu beharreko hitzarmenei buruzko baldintza plegua, hori ere eransten baita, onestea.

3. Gehienez ere 45.500 euroko gastua onestea aurreko puntuan aipaturiko aldirako. Gastua finantzatuko da 2005eko gastuen aurrekontuko "Nafarroako goi mailako irakaskuntzako ikastetxeetako eskola garraioa" izeneko 431000-43100-4800-322303 kontusailaren kargura.

4. Kudeaketa Ekonomikoaren Bulegoari agintzea unibertsitateko garraioaren kudeaketak dakartzan faktura eta gastuak ordain ditzala, Unibertsitateko Irakaskuntza, Hedapen eta Ikerketa Zerbitzuak adostasun txostena eman ondoren, aurreko puntuan aurreikusitakoaren arabera.

5. Deialdi hau Nafarroako ALDIZKARI OFIZIALean argitara dadila agintzea.

6. Ebazpen honen berri ematea Ekonomia eta Ogasun Departamentuak Hezkuntzakoan duen kontu-hartzaile delegatuari, garraio enpresa interesatuei, Unibertsitateetarako eta Hizkuntza Politikarako Zuzendaritza Nagusira, Unibertsitateko Irakaskuntza, Hedapen eta Ikerketa Zerbitzura, Goi mailako Ikasketen Atalera, Aurrekontu eta Kudeaketa Ekonomikoaren Atalera, Goi mailako Ikasketen Bulegora, Administrazio Orokorraren Bulegora eta Kudeaketa Ekonomikoaren Bulegora, behar diren ondorioak izan ditzan.

Iruñean, 2005eko martxoaren 17an._Unibertsitateetarako eta Hizkuntza Politikarako zuzendari nagusia, Pedro Pegenaute Garde.

2005EKO APIRILA-EKAINA UNIBERTSITATEKO GARRAIOA

Nafarroako Gobernuko Hezkuntza Departamentuko Unibertsitateetarako eta Hizkuntza Politikarako Zuzendaritza Nagusiak kudeatzen dituen unibertsitateko garraiorako laguntzak Iruñerritik kanpora bizi diren unibertsitateko ikasle nafarrentzat dira, egunero etxetik Nafarroako unibertsitateetara edo Nafarroako goi mailako beste ikastetxe baimendu batzuetara joaten direnentzat, hain zuzen.

Bi laguntza mota eskaintzen dira:

_Antolamendurako laguntzak: garraio zerbitzua hobetzeko.

_Laguntza ekonomikoak: besterekin batera zerbitzuaren kostua finantzatzen laguntzeko.

Eskaerak aurkezteko azken eguna: Nafarroako ALDIZKARI OFIZIAL argitaratu ondoko 10 egun.

Garraio zerbitzuaren hasiera: 2005eko apirilaren 4a.

Argibideak:

Unibertsitateko garraioaren inguruko informazioa jasotzeko Hezkuntza Departamentuko Argibide Bulegora jo (Santo Domingo aldapa, 8, 31001 Iruña. Tel.: 848 426516 edo 848 426616) edo Unibertsitateko Irakaskuntza, Hedapen eta Ikerketa Zerbitzuko Goi Mailako Irakaskuntzaren Bulegora, Tel.: 848 426059 edo 848 426078. Edo posta elektronikoa erabiliz: mazconas@cfnavarra.es

UNIBERTSITATEKO GARRAIOA 2005EKO APIRILA-EKAINA ALDIAN

Antolamenduko Arauak

Nafarroako Gobernuko Hezkuntza Departamentuko Unibertsitateetarako eta Hizkuntza Politikarako Zuzendaritza Nagusiko Unibertsitateko Irakaskuntza, Hedapen eta Ikerketa Zerbitzuak 2005eko apirila-ekaina aldirako antolatu duen unibertsitateko garraioa honako arau hauek zuzenduko dute:

1. Helburua.

Deialdi honen xedea da egoitza Nafarroan -Iruñerritik kanpo- duten unibertsitateko ikasleek egunero ikastokiraino egin behar duten bidaia erraztea eta zerbitzu horren kostua jaistea. Halaber, ez Nafarroako Gobernuko Hezkuntza Departamentuaren Beka eta Laguntzen deialdiaren bidez ez eta Hezkuntza eta Zientzia Ministeriokoaren bidez ere garraiorako bekarik lortu ez duten ikasleen garraio gastuak finantzatzen lagundu nahi du.

Hauek dira lortu nahi dituen helburu zehatzak:

_Eskoletara joateko moduko zerbitzua eskaintzea.

_Garraio publikoan toki bat bermatzea.

_Eskolak bukatutakoan ohiko bizilekura itzultzeko aukera ematea.

_Zerbitzu hori unibertsitateko zentroetara hurbiltzea, goizean goiz eta arrats partean.

_Ikasle nafarrek unibertsitatera joateko dituzten garraio gastuak finantzatzen laguntzea.

Deialdi honen ondorioetarako egun hauek hartuko dira kontuan: 2005eko apirilaren 1etik ekainaren 30era bitartekoak, bazter utzirik eskolarik gabeko egunak eta oporraldiak.

2. Ikasketak.

Unibertsitate ofizialetan edo Nafarroako Gobernuak baimendutakoetan ikasketa hauetan diharduten ikasle nafarrek eskatzen ahalko dute:

_Diplomatura.

_Arkitektura teknikoa.

_Ingeniaritza teknikoa.

_Lizentziatura.

_Arkitektura.

_Ingeniaritza.

_Hirugarren Zikloko Ikasketak.

3. Ikasketak non egin behar diren.

Nafarroan kokaturik dauden ikastetxe hauetako batean:

_Nafarroako Unibertsitate Publikoa.

_Nafarroako Unibertsitatea.

_Urrutiko Hezkuntzarako Unibertsitate Nazionala Nafarroan.

_INET Turismo Eskola.

_Nafarroako Gobernuak baimendutako unibertsitate zentroak.

4. Ezaugarriak.

Deialdi honetako laguntzak bi motatakoak izan daitezke:

a) antolamendukoak: Unibertsitateetarako eta Hizkuntza Politikarako Zuzendaritza Nagusiak garraio enpresekin hitzarmena eginen du, unibertsitario nafarren beharren araberako zerbitzua eman dezaten, deialdi honen baldintzak betetzen diren tokietan.

b) ekonomikoak: garraioaren kostua finantzatzen laguntzea, bi bide hauetako bat dela medio:

_Unibertsitateko garraio txartela.

_Unibertsitateko garraiorako laguntzaren kredentziala.

Horrela, bada, Nafarroako Gobernuaren laguntza, unibertsitatera dagoen distantziaren arabera, garraioaren kostu benetakoaren % 51tik % 80ra bitartekoa izan daiteke.

5. Laguntzak eskatzeko beharkizunak.

Deialdi honetan parte hartzeko, ikasleek baldintza hauek bete beharko dituzte:

a) familiaren bizilekua Iruñerritik kanpora izatea eta, hortaz, ikastokira joateko egunero garraioaren beharra izatea, eskualdeko garraio egokia ez izateagatik.

b) deialdi honetako 3. arauan adierazitako ikastetxeetan aritzea.

c) izena ematen duten momentuan, aurreikusita dauden bi onura-mota hauetako bat aukeratzea:

_Unibertsitateko garraio txartela.

_Unibertsitateko garraiorako laguntzaren kredentziala.

6. Unibertsitateko garraio txartela.

Eskola-egun gehien-gehienetan bidaia egiten duten ikasleentzat da, bidaia gehienak unibertsitateko garraio zerbitzuak erabiliz egiten badituzte, betiere.

Unibertsitateko garraio txartela norberarena da, ez inori uztekoa. Titularrari eskubidea ematen dio 2005eko apirila-ekaina aldiko eskola egunetan, astelehenetik ostiralera, joan-etorriko bidaia bat egiteko plaza izateko, linea jakin bateko unibertsitateko garraiorako hitzartzen diren zerbitzuetan. Eserlekua erreserbaturik izanen du enpresek unibertsitateko ikasleentzat antolatzen dituzten garraio berezietako goizeko lehen bidaian eta, itzulirako, arratseko azkenekoan.

Aurretik leihatilan txartela erosi beharrik izan gabe, Iruñerako autobus zerbitzu erregularrak dituen geltokietatik familiaren bizilekutik hurbilen dagoen horretan igotzen ahalko da eta lehentasunezko eskubidea izanen du Iruñera goizeko 8:00ak baino lehen iristen den autobusean eta Iruñetik ateratzen den azken zerbitzuan, betiere 20:30etik aitzina. Bi autobus zerbitzu horiek unibertsitateen ingurura hurbilduko dira.

Deialdi honen helburu nagusia ikasleak goizeko eskoletara garaiz iristea da. Hortaz, enpresak konpromisoa hartzen du behar adina autobus paratzeko, beharra duten unibertsitario guztiendako ordu egokian gainera. Unibertsitarioek, berriz, antolamendu horretarako erraztasunak emanen dituzte, eskabidean adieraziz enpresek paratutako autobusak normalean zer ordutan hartuko dituzten eta emandako hitza betez. Baldintza hori betez gero baizik ezin dio eskatu ikasleak enpresari erantzukizunik, autobusaren erruz ikaslea garaiz ailegatzen ez denean eskolara.

Ikasketak direla-eta ikasleren batek larunbatetan ere behar badu unibertsitateko garraioa, halaxe adierazi beharko du eskabidea egiten duenean. Horrelakoetan, erabiltzaileak eskola ordutegi hori justifikatu beharko du Goi Mailako Irakaskuntzaren Bulegoan. Ikaslearen unibertsitatearen edo goi mailako ikastetxearen kreditazioa ere eska daiteke. Onuradunek txartelak ordaindu eta bidali behar dituzte, hiruhilekoen buruan, Goi mailako Irakaskuntzaren Bulegora, bulegoak bakoitzari dagokiona itzultzea erabaki dezan (txartelaren kostu osoaren % 70).

Autobusera igotzeko nahitaezkoa izanen da unibertsitateko garraio txartela eta eskola-egunen liburuxka erakustea. Garraio txartelean honako datuok agertuko dira:

_Titularraren argazkia.

_Titularraren izen-deiturak.

_Helbidea eta herria.

_Autobusa non hartzen duen.

_Garraio enpresa.

_Unibertsitatea edo ikasketa zentroa.

_Zer ikasketa egiten ari den eta kurtsoa.

Unibertsitateko txartelaren onuradunek diru-kopuru finko bat ordaindu beharko diote Foru Ogasunari, eta Unibertsitateetarako eta Hizkuntza Politikarako Zuzendaritza Nagusiak ordainduko die enpresei, zuzenean, 2005eko apirila-ekaina aldiko garraioaren kontratazioaren prezio osoa.

Txartela edo bidaien egiaztagiria ahaztu edo galtzeagatik ikasle onuradunek txartela ordaindu behar badute, Goi Mailako Irakaskuntzaren Bulegora igorriko dute txartel hori, behar den oharra erantsirik, Administrazioak ordain diezaien. Horrelakoetan, diru-kopuru hori hilean enpresari ordaintzen zaion fakturatik deskontatuko da.

7. Unibertsitateko garraiorako kredentziala.

Hasiera batean, egunero-egunero ikastokira joan beharrik ez duten ikasleei eta unibertsitateko garraio zerbitzua ailegatzen ez den herrietan bizi diren ikasleei zuzendua dago.

Unibertsitateko garraiorako kredentzialak eskubidea ematen dio titularrari 2005eko apirila-ekaina aldiko eskola egunetan, astelehenetik ostiralera, astean joan-etorriko lau bidaia egiteko gehienez, unibertsitateko garraiorako hitzartzen diren zerbitzuetan edo bidaiarientzako linea erregularren beste zerbitzu publiko batean.

Kredentziala aipatu eskubidearen aitorpena da Hezkuntza Departamentuaren eta garraio enpresen aitzinean, eta ez da beste agiririk aurkeztu beharrik izanen, onuradunak leihatilan ordaindu beharko baitu garraioaren prezioa gainerako bidaiariek bezala eta, deialdi honetan xedatutakoaren arabera, ondoren eskubidea izanen du eginiko gastuaren zati bat Unibertsitateetarako eta Hizkuntza Politikarako Zuzendaritza Nagusiak itzul diezaion.

Garraio txartela eskatu bai baina 25 eskaera baino gutxiago izanik, txartelik lortu ez duten ikasleak garraiorako kredentzialaren onuradun izan daitezke, eskaera aurkezten dutenean hori adierazi badute. Horrelako kasuetan, autobusa astelehenetik ostiralera erabiltzen ahalko dute, egunero.

Txartelaren onuradun diren ikasleen kasuan bezala, zerbitzua larunbatetan ere erabiltzen ahal dute, haientzat ezarritako baldintza berdinetan.

8. Garraio lineak.

Unibertsitateko garraioaren antolamenduak Nafarroako eskualdeetan dauden bidaiarien garraio lineetan du oinarria.

Horretarako, behin-behineko linea eta ibilbide hauek ezarri dira, eta bakoitzean bidaiariak hartzeko tarte hauek zehaztu:

Linea: Altsasu. Autobusa hartzeko tartea: Ziordia-Irurtzun.

Linea: Agoitz. Autobusa hartzeko tartea: Irunberri-Urrotz.

Linea: Baztan. Autobusa hartzeko tartea: Erratzu-Olague.

Linea: Lizarra. Autobusa hartzeko tartea: Lizarra-Legarda.

Linea: Erriberri. Autobusa hartzeko tartea: Erriberri-Tafalla.

Linea: San Adrian. Autobusa hartzeko tartea: San Adrian-Martzilla.

Linea: Zangoza. Autobusa hartzeko tartea: Galipentzu-Elo.

Linea: Tutera. Autobusa hartzeko tartea: Tutera-Caparroso.

Linea: Bera. Autobusa hartzeko tartea: Bera/Olague.

Jendea hartzeko geltokiak eta baimendurik dauden ordutegi eta prezioak linea erregularretarako ezarritako berberak izanen dira.

9. Enpresen hitzarmena.

Unibertsitateko garraioa antolatu eta, beraz, Nafarroako bidaiarien garraio enpresekin hitzarmena sinatuko da, betiere linea erregularren ibilbide berbera egiteko, gutxienez 25 txartel eskaera aurkezten badira eta dagokion kontratua sinatzeko adostasuna lortzen bada.

Antolatzen diren ibilbide guztien jomuga Iruña izanen da eta abiapuntua kasuan kasuko linea erregularrak duena.

Garraiobidea linea erregularrak finkatuta dituen geltokietatik edozeinetan hartzen ahalko da, kasuan-kasuan zehaztu diren tarteetan betiere.

Eskaeren kopurua 25era ailegatzen ez bada, ezin izanen da hitzarmenik sinatu linea horrekin eta, hortaz, ez da garraio txartelik luzatuko. Dena dela, ikasle horiek garraio linea hori erabiltzen ahalko dute, gainerako bidaiariek bezala, enpresak finkatutako ohiko zerbitzuetan, garraiorako kredentzialaren onurez baliatuz, edo, besterik gabe, unibertsitarioak ez diren gainerako erabiltzaileentzako baldintzetan.

Garraio enpresek konpromisoa hartzen dute garraio txartela duten unibertsitarioak adierazitako geltokietan hartzeko, lehenbiziko eskola hasi baino lehen Iruñean egon daitezen, eta betiere goizeko 8:00ak baino lehen, eta euren herrietara azken zerbitzuan, 20:30etik aitzina, itzul daitezen. Iruñera etortzeko lehen zerbitzuan eta arratsean ateratzeko azken zerbitzuan, autobusa unibertsitateen ondoan dauden ohiko tokietan geldituko da.

Enpresek zerbitzu berezi hau antola dezaten, unibertsitarioak haiei laguntzera beharturik daude. Horretarako, eskabidean adierazitako goizeko lehen zerbitzua erabiliko dute, eta enpresak beraientzat espresuki paratutako autobusak hartu.

Autobusetan ikasle guztientzako tokia izanen da, bai joanean bai etorreran, eta, hortaz, ezin izanen da ikaslerik zerbitzurik gabe utzi.

Iruñera doan lehenbiziko zerbitzuan eta itzultzeko arratseko azken zerbitzuan, autobusek unibertsitateetatik hurbil gelditu beharko dute, ohiko geltokietan. Bakar-bakarrik muturretako bi zerbitzuotarako erreserbatutako da tokia. Garraio zerbitzuko gainerako orduetan, deialdi honen onuradunek zerbitzu publikoaren gainerako bidaiarien eskubide berak izanen dituzte.

Bidaiarien nahitaezko asegurua eta aseguru osagarria garraio enpresa adjudikazio-hartzailearen kontura izanen dira eta, hortaz, huraxe izanen da kontratatzen den zerbitzuaren ondorioz gerta litezkeen kalteen erantzule zibil bakarra, dela zuzenean, dela subsidiarioki.

Ikasturtea hasita, komenigarria ikusten bada joan-etorrietako nahitaezko zerbitzuen ordutegia aldatzea, egin, egiten ahalko da, aldez aurretik Unibertsitateko Irakaskuntza, Hedapen eta Ikerketa Zerbitzuari jakinarazten baldin bazaio. Halaber, adjudikazio-hartzaileak baimena eska diezaioke Herri Lan, Garraio eta Komunikazio Departamentuari lineen ordutegietan behar diren aldaketak egiteko, unibertsitarioentzat ezarrita dauden ordutegiei egokitzearren.

10. Laguntza motak eta horien zenbatekoa.

a) Txartela egitea erabakitzen duten ikasleek 80 euro ordaindu beharko dituzte aldez aurretik Nafarroako Foru Ogasunean, astelehenetik ostirala arteko zerbitzua eskura izateagatik, zerbitzu hori benetan zenbat egunetan erabiltzen duten kontuan hartu gabe.

Horrenbestez, laguntza honen zenbatekoa honela kalkulatuko da: ikaslearen herritik Iruñera joan eta itzultzeko eguneko bidai txartelaren kostu erreala bider ikasturteko eskola egunen kopurua, ken goian aipatu dugun zenbatekoa.

b) Unibertsitateko garraiorako kredentziala duten ikasleek egunero ordaindu beharko dute leihatilan bidai txartelaren prezioa eta hiru hilabetetik Unibertsitateko Irakaskuntza, Hedapen eta Ikerketa Zerbitzuak dagokien dirua itzuliko die, agiri honen 16. arauan ezarri bezala.

Modalitate honetako benetako kostua, aldi osorako, hauxe izanen da:

_58 euro, astelehenetik ostiralera bitarteko zerbitzua, astean, gehienez, lau aldiz erabiltzeko, zerbitzu hori benetan zenbat egunetan erabiltzen duten kontuan hartu gabe.

_80 euro, unibertsitateko txartela eskatu eta, nahikoa eskaera ez izateagatik, lortu ez duten ikasleentzat, zerbitzua, astelehenetik ostiralera arte, astean bost egunez erabiltzeko, zerbitzu hori benetan zenbat egunetan erabiltzen duten kontuan hartu gabe.

Horrenbestez, laguntzaren zenbatekoa honakoa izanen da: herritik etortzeko eguneko bidai txartelaren prezioa bider baimenduriko/justifikaturiko egunen kopurua, ken goian adierazitako kopurua.

Laguntzen finantzabidea Unibertsitateetarako eta Hizkuntza Politikarako Zuzendaritza Nagusiaren 2005. ekitaldirako gastu-aurrekontuko "Nafarroako goi mailako ikastetxeetarako eskola garraioa" izeneko 431000-441000-43100-4800-422403 kontu-sailaren kargura eginen da. 2005eko Aurrekontuen Proiektuan dagoeneko onetsia da kontu-saila.

11. Aurkeztu beharreko agiriak.

Interesatuek deialdi honen eranskinean ageri den ereduaren araberako eskabidea aurkeztu beharko dute, "Txartelaren edo laguntzaren eskaera" izenekoa. Eskabide hori Hezkuntza Departamentuko Hezkuntza Zuzendaritza Nagusiko Argibide Bulegoan edo Unibertsitateetarako eta Hizkuntza Politikarako Zuzendaritza Nagusiko Goi Irakaskuntzaren Bulegoan har daiteke, eta argibide zerbitzuotan: Nafarroako Unibertsitate Publikokoan, Nafarroako Unibertsitatekoan, Urrutiko Hezkuntzarako Unibertsitate Nazionaleko Iruñeko zentro elkartukoan eta Nafarroako Gobernuko Hezkuntza Departamentukoan. Horrekin batera, honako dokumentazio hau aurkeztu beharko da:

Unibertsitateko garraiorako 2004ko urria-abendua aldirako laguntzen onuradunak

Unibertsitateko garraiorako laguntzen onuradunek, 2005eko apirila-ekaina aldirako ere onuradun izan nahi badute, ondoko dokumentazioa aurkeztu beharko dute:

a) Txartelaren eskaeretarako:

_Eskabide orria behar bezala beteta.

_Txartelaren zenbatekoa 2054/0000/46/910124955.6 (Nafarroako Aurrezki Kutxako bulego nagusia) kontu zenbakian ordaindu izanaren egiaztagiria.

b) Kredentzialaren eskaeretarako:

_Eskabide orria behar bezala beteta.

1._Unibertsitateko garraiorako 2005eko urtarrila-martxoa aldirako laguntzen onuradun berriak

a) Txartelaren eskaeretarako:

_Eskatzailearen bi argazki, txartel neurrikoak (atzean izen-deiturak jarri behar dira).

_Erroldatze agiri eguneratua, udalak luzatua.

_Txartelaren zenbatekoa 2054/0000/46/910124955.6 (Nafarroako Aurrezki Kutxako bulego nagusia) kontu zenbakian ordaindu izanaren egiaztagiria.

_2004-2005 ikasturteko matrikularen fotokopia konpultsatua, lortu bezain laster.

b) Kredentzialaren eskaeretarako:

_Eskatzailearen argazki bat, txartel neurrikoa (atzean izen-deiturak jarri behar dira).

_Erroldatze agiri gaurkotua, udalak luzatua.

_2004-2005 ikasturteko matrikularen fotokopia konpultsatua, lortu bezain laster.

Aurkeztu beharreko dokumentazioak jatorrizkoa izan behar du edo bestela fotokopia konpultsatua (konpultsak Hezkuntza Departamentuko Erregistro Bulegoan egin daitezke; Santo Domingo kalea, 8).

12. Aurkezteko epea eta tokia.

Eskabidea bete eta, gainerako agiriekin batean, 2005eko apirilaren 16ko 14:30 baino lehen aurkeztu beharko da Nafarroako Gobernuko Hezkuntza Departamentuko Erregistroan, Nafarroako Gobernuko Erregistro Orokorrean edo Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legearen 38.4 artikuluan aurreikusitako bulegoren batean.

Epea luzaezina izanen da matrikulazio aldiari edo bizitokiari buruzko salbuespenetan izan ezik. Hauek Balorazio Batzordeak baloratuko ditu.

Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legearen 76. artikuluan xedatutakoarekin bat, eskabidea behar bezala aurkezten ez bada, dela gaizki bete delako, dela erantsi beharreko dokumentazioa osorik ez dagoelako, eskatzaileari egindako akatsen berri emanen zaio, jakinarazi eta 10 eguneko epean zuzendu ditzan. Horrela egin ezean, artxibatu eginen da espedientea, horretarako ebazpena eman ondoren betiere.

13. Eskaeren tramitazioa.

Eskabideak aurkezteko epea bukaturik, Unibertsitateetarako eta Hizkuntza Politikarako Zuzendaritza Nagusiak, berehalakoan, eskabideen kopurua eta ezaugarriak aztertuko ditu, garraio enpresekin hitzarmena sinatzearen ondorioetarako.

Deialdi honetako 8. arauan ezarritako linearen baterako edo, bidaiarien garraiorako Nafarroan dagoen beste linea erregularren baterako, 25 eskaera edo gehiago aurkezten badira, enpresa kontzesio-hartzailearekin behar diren kudeaketak eginen dira, dagokion hitzarmena sinatu, garraio txartelak prestatu eta interesatuei igortzeko.

Enpresa horiekin hitzarmena sinatzeko gutxieneko kopuru horretara iristen ez bada, aldiz, txartela eskatzearekin batera ordaindutako dirua itzuliko du zerbitzuak. Gero eskaera bertan behera utziko da edo laguntzaren kredentziala emanen zaio eskatzaileari, horrek eskabidean hautatutakoaren arabera.

Eskatzaileak kredentziala aukeratu badu, modalitate horretako onuradunekin bezala jokatuko da berarekin eta txartela eskatzeko ordaindu zuen diru-kopurua itzuliko zaio; kasu honetan, asteko egun guztietan bidaia egiteko eskubidea izanen dute, astelehenetik ostiralera.

Laguntzaren kredentziala lehenbiziko aldiz eskuratzen duten ikasleek Unibertsitateetarako eta Hizkuntza Politikarako Zuzendaritza Nagusian aurkeztu beharko dute "Transferentzia bidezko ordainketaren eskaera-orria", behar bezala betea, lehenbiziko hiruhileko bidai-txartelekin batera. Eskaera-orri hori Unibertsitateko Irakaskuntza, Hedapen eta Ikerketa Zerbitzuko Goi Mailako Irakaskuntzaren Bulegoan jaso daiteke.

14. Laguntzak emateko proposamenak egiteko ardura duen Balorazio Batzordea.

Ebazpen proposamena egin behar duen Balorazio Batzordea honela osatuko da:

Batzordeburua:

_Unibertsitateetarako eta Hizkuntza Politikarako zuzendari nagusia.

_Batzordeburua falta bada, Unibertsitateko Irakaskuntza, Hedapen eta Ikerketa Zerbitzuko zuzendariak ordezkatuko du.

Kideak:

_Unibertsitateko Irakaskuntza, Hedapen eta Ikerketa Zerbitzuko zuzendaria.

_Goi Mailako Ikasketen Ataleko burua.

_Unibertsitateko Hedapenerako Ataleko burua.

_Goi Mailako Irakaskuntzaren Bulegoko burua.

Goi Mailako Irakaskuntzaren Bulegoko burua arituko da idazkari lanetan.

Batzorde honek aholkua eskatzen ahal die gai honetan kualifikatuta dauden pertsona fisikoei edo entitateei.

15. Ebazpena.

Laguntzak Unibertsitateetarako eta Hizkuntza Politikarako zuzendari nagusiaren ebazpenaren bidez emanen dira, Unibertsitateko Irakaskuntza, Hedapen eta Ikerketa Zerbitzuak eman beharreko txostena harturik.

Laguntza horiek Nafarroako ALDIZKARI OFIZIALean eta Hezkuntza Departamentuko iragarki oholean argitaratuko dira eta zerrendak Hezkuntza Departamentuko Beken Bulegora eta unibertsitate eta ikastetxe interesatuetara igorriko, ikasleei haien berri eman diezaieten. Halaber, Hezkuntza eta Zientzia Ministerioko Beka eta Hezkuntzaren Sustapenerako Zuzendariordetza Nagusira igorriko da. Ukatu diren laguntzen berri idatziz emanen zaie interesatuei.

16. Dirulaguntzen eta garraio gastuen ordainketa.

Laguntzen eta gainerako garraio gastuen ordainketa deialdi honetako arauak onesten dituen ebazpenean xedatutakoari jarraikiz eginen da, Unibertsitateko Irakaskuntza, Hedapen eta Ikerketa Zerbitzuaren txostena jaso eta behar diren ziurtagiriak aurkeztu ondoren.

_Unibertsitateko garraiorako kredentziala ateratzen dutenei, hiruhileko bakoitza bukatutakoan, ezarrita dauden arauei jarraikiz egindako bidaien autobus-txartelak, egun eta hilabeteen arabera ordenatuak, Unibertsitateko Irakaskuntza, Hedapen eta Ikerketa Zerbitzuan aurkeztuta (Goi Mailako Irakaskuntzaren Bulegoan).

Kredentzialei dagozkien lehen 58 edo 80 euroen justifikazioak onuradunen kredentzialeko eskubidea ordaintzea du helburu. Zenbateko horietatik aurrera, onuradunek astelehenetik ostiralera bitartean egiten dituzten bidaiei dagozkien diru-kopuruak, oso-osoan itzuliko zaizkie onuradunei. Bidaiak, behar bezala justifikatu beharko dira.

_Garraio txartela duten ikasle unibertsitarioentzako zerbitzua egin duten garraio enpresei hilabetero ordainduko zaie, banan-banan, enpresak hiru hilabeteetako bakoitzean egindako zerbitzuari dagokion faktura aurkeztu ondoren.

17. Onuradunen betebetebeharrak.

2005eko apirila-ekaina aldirako, unibertsitateko garraio txartela edo garraiorako kredentziala eskatzen badu, eskatzaileak arau hauek guztiak ezagutu eta onartu beharko ditu.

Onuradunak, unibertsitateko garraioaren antolamendu eta funtzionamendua egokiak izan daitezen, men egin beharko die Unibertsitateko Irakaskuntza, Hedapen eta Ikerketa Zerbitzuak ematen dituen jarraibideei.

Autobusera igotzeko nahitaezkoa izanen da gidariari txartela eta eskola egunen liburuxka erakustea. Halaber, laguntzen onuraduna behartuta dago Unibertsitateko Irakaskuntza, Hedapen eta Ikerketa Zerbitzuko Goi Mailako Irakaskuntzaren Bulegoari aditzera ematera laguntza errefusatzen duela, arau hauen arabera, laguntzaren bateraezintasuna dakarkion beste zerbait baldin badu.

Onuradunak deialdi honetako baldintzaren bat betetzen ez badu, dokumentazioa faltsutzen badu, bidezko ez den autobus-txartelen bat aurkezten badu edo matrikulatua dagoela frogatzen duen agiria aurkezten ez badu, txartel edo kredentzial horri baja emanen zaio berehalakoan eta itzuli beharko du. Gainera, emandako laguntza galduko du eta horren bidez eskuraturiko dirua itzuli beharko dio Gobernuari, deusetan galarazi gabe legozkiokeen lege-egintzak eta zehapenak. Diru kopuru horiek, legezko ondorioetarako, dirusarrera publikotzat joko dira.

Behin unibertsitateko garraio txartela edo kredentziala emanik, hura ukatu edo itzultzen baldin bada, Administrazioak ez du inolako diru konpentsaziorik emanen, salbu eta ezinbesteko kasuetan, behar bezala frogatzen bada eta betiere Unibertsitateko Irakaskuntza eta Ikerketa Zerbitzua ados badago.

18. Bateraezintasunak.

Unibertsitateko garraio laguntzak bateraezinak dira izaera bereko laguntzekin, baita egonaldirako laguntzekin ere, jakina, Nafarroako edo Espainiako edozein erakunde publikok zein pribatuk emanak badira.

Beraz, ez dute bide bererako laguntzarik eskuratuko Hezkuntza Deparmentuko Beken Deialdi Orokorretik deialdi honen bidez lortu dituztenek.

19. Arau-hausteak eta zehapenak.

Arau-hauste eta zehapenei dagokienez, Nafarroako Foru Komunitateko Administrazioaren eta haren erakunde autonomoen dirulaguntzak eman eta kontrolatzeko araubide orokorra ezartzen duen ekainaren 9ko 8/1997 Foru Legearen 27 eta 28. artikuluetan aurreikusitakoari lotuko zaio.

Zehapen prozedura Administrazio Publikoen Araubideari eta Guztiendako Administrazio Prozedurari buruzko azaroaren 26ko 30/1992 Legean ezarritakoa izanen da.

20. Errekurtsoak.

Ebazpen honen aurka, bidezko da gora jotzeko errekurtsoa jartzea, Hezkuntza Departamentuko kontseilariari zuzendua, errekurtsoaren xedeko egintza jakinarazi edo argitaratu eta biharamunetik hilabeteko epean.

UNIBERTSITATEKO GARRAIORAKO LAGUNTZAK 2005EKO APIRILA-EKAINA

Txartelaren edo kredentzialaren eskaera

........................ J/A, N.A.N.: .............., helbidea: ............. kalea, zk.: ......., solairua: ........ telefonoa: .........., P.K.: ........., herria: ............

2004-2005 IKASTURTEKO DATU AKADEMIKOAK

Unibertsitatea ........................ Fakultatea ...................

Titulazioa ................

Matrikula zein ikasmailatan ............

Eskatzen du:

a) Unibertsitateko garraio txartela f

b) Laguntzaren kredentziala f

Zein autobus lineatarako

Autobusa zein herritan hartuko duen

Itzuleran zein herritan jaitsiko den

Zenbat egun (astelehenetik ostiralera)

Herritik ateratzeko ordua

Herrira itzultzeko ordua

Ikasketak direla eta, zerbitzua larunbatetan erabili behar du? f BAI EZ f

Txartela eskatu badu eta linea horretan 25 eskaera ez badira jasotzen, ondoko hau hautatzen du:

f Eskaera bertan behera uztea.

f Laguntzaren kredentziala ematea.

Zenbatekoak itzultzeko, ordaintzeko, etab., ondoko kontuan sartu:

Bankua edo Aurrezki Kutxa

Bulegoa

Kontrola

Kontuaren zenbakia

Unibertsitate garraioaren gainean 2005eko apirila-ekaina aldirako agintzen duten arauak ezagutu eta onartzen dituela aitortzen du.

(Data eta sinadura)

Erantsi den dokumentazioa:

_2 argazki (txartel neurrikoak).

_Erroldatze ziurtagiria.

_Txartela eskatzen bada, Nafarroako Kutxaren 2054/0000/46/ 910124955.6 zenbakiko kontuan diru-sarrera (80 euro) egin izanaren egiaztagiria.

_2004-2005eko matrikularen fotokopia konpultsatua.

UNIBERTSITATEETARAKO ETA HIZKUNTZA POLITIKARAKO ZUZENDARI NAGUSIA.

Iragarkiaren kodea: F0504756