I. NAFARROAKO FORU KOMUNITATEA
1.1. XEDAPEN OROKORRAK
1.1.2. Foru Dekretuak
104/2005 FORU DEKRETUA, abuztuaren 22koa, Nafarroako Gobernuak emana, La Nava handitzeko industria-jarduketa bateratuaren ondorioz, Erriberriko eta Tafallako udal mugapeak aldatzeko espedientearen gainean ebazten duena.
Erriberriko eta Tafallako udalek, 2003ko abenduaren 2ko eta abenduaren 18ko izkribuen bidez, hurrenez hurren, Nafarroako Gobernuari eskatu zioten La Nava handitzeko industria-jarduketa bateratuaren ondorioz, Erriberriko eta Tafallako udal mugapeak aldatzeko espedientea izapidatu zezala, Nafarroako Toki Administrazioari buruzko uztailaren 2ko 6/1990 Foru Legeko 15. artikuluko 1. idatz-zatiko c) letran xedaturikoarekin bat.
2003ko azaroaren 3ko eta 2003ko azaroaren 25eko bilkuretan, Erriberriko eta Tafallako udalek hartu zituzten, hurrenez hurren, La Nava handitzeko industria-jarduketa bateratuaren ondorioz, Erriberriko eta Tafallako udal mugapeak aldatzeko ekimena gauzatzeko onespen-erabakiak, Nafarroako Toki Administrazioari buruzko uztailaren 2ko 6/1990 Foru Legeak horretarako eskatzen dituen gehiengoekin.
Toki Administrazioko kontseilariak, otsailaren 11ko 7/2004 Foru Aginduaren bidez, hasiera eman zion, La Nava handitzeko industria-jarduketa bateratuaren ondorioz, Erriberriko eta Tafallako udal mugapeak aldatzeko espedienteari.
Uztailaren 11ko 1690/1986 Errege Dekretuaren bidez onetsitako Toki Entitateetako Biztanleriaren eta Lurralde Mugaketaren Erregelamenduko 14. artikuluan eskaturikoa betearazteko, 2004ko martxoaren 25ean eta 2004ko azaroaren 9an, aipatu udalek artikulu horretan eskatutako dokumentazioa bidali zuten. Gero, dokumentazioan atzemandako akats batzuk zuzendu behar izan zituzten.
Nafarroako Toki Administrazioari buruzko uztailaren 2ko 6/1990 Foru Legearen 17. artikuluan arautzen da udal mugapeak aldatzeko prozesuetan segitu beharreko bidea. 2. ataleko a) eta b) lerroaldeetan adierazten da espedientea jendaurrean jarri behar dela, bi hilabetez bederen, eta horrelakoxe epea finkatuko dela prozesuan ukitzen diren udalen eta, kasua bada, kontzejuen iritzia entzuteko.
Horrenbestez, Toki Administrazioko zuzendari nagusiak urtarrilaren 19an emandako 94/2005 Foru Aginduaren bidez (2005eko otsailaren 14ko Nafarroako ALDIZKARI OFIZIALa, 19. zenbakia), espedientea jendaurrean jarri zuen bi hilabetez eta entzunaldia ireki zuen Erriberriko eta Tafallako udalentzat.
2005eko apirilaren 14an epe hori bukatu zen. Espedientean Erriberriko eta Tafallako udalek emaniko ziurtagiriak ageri dira, inolako alegaziorik hartu ez dutela frogatzen dutenak.
Kontuan harturik espedientea Nafarroako Toki Administrazioari buruzko uztailaren 2ko 6/1990 Foru Legearen 17. artikuluan ezarritako prozedurari jarraikiz tramitatu dela eta lege horren 13., 15., 16. eta 18. artikuluetan eskatutako baldintza guztiak betetzen dituela, eta ikusirik 13. artikuluan aipatzen diren helburuak dituela, bidezkoa da Nafarroako Foru Komunitateko Administrazioak espediente hori ebaztea eta proposatzen den udal mugapeen aldaketa onartzea.
Espedientean jaso dira, orobat, Lurraldearen Mugaketa Batzordeak 2005eko ekainaren 6an emandako irizpena eta Nafarroako Kontseiluak 2005eko uztailaren 27an emandako 30/2005 irizpena.
Horiek horrela, Toki Administrazioko kontseilariak proposaturik, eta Nafarroako Gobernuak bi mila eta bosteko abuztuaren hogeita biko bilkuran hartutako Erabakiarekin bat,
DEKRETATU DUT:
1. artikulua. La Nava handitzeko industria-jarduketa bateratuaren ondorioz, Erriberriko eta Tafallako udal mugapeen aldaketa onestea, udal mugape horiek hirigintza antolamendura egokitzeko. Udalerrien mugak udal horiek, hurrenez hurren, 2004ko azaroaren 3an eta 2004ko azaroaren 25ean egindako osoko bilkuretan, hurrenez hurren, hartutako erabakien bidez onetsitako planoetan adierazitakoak izanen dira.
2. artikulua. Toki Administrazioko Departamentuari ahalmena ematen zaio foru dekretu hau betearazteko behar diren egintza guztiak egin ditzan.
3. artikulua. Foru dekretu honen aurka administrazioarekiko auzi-errekurtsoa jartzen ahalko da, Nafarroako Auzitegi Nagusiko Administrazioarekiko Auzien Salari zuzendua, bi hilabeteko epean, jakinarazi eta biharamunetik hasita. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epean.
Iruñean, 2005eko abuztuaren 22an._Nafarroako Gobernuko lehendakariordea, Francisco J. Iribarren Fentanes._Toki Administrazioko kontseilaria, Alberto Catalán Higueras.
Iragarkiaren kodea: F0518005