Iragarkia

9. ALDIZKARIA - 2004ko urtarrilaren 21a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

1685/2003 FORU AGINDUA, abenduaren 17koa, Ingurumen, Lurraldearen Antolamendu eta Etxebizitza kontseilariak emana, industri jarduerak ingurumenaren gainean duen eragina galarazi, zuzendu eta kontrolatzeko inbertsioetarako dirulaguntzen 2004ko deialdia onesten duena.

Urriaren 28ko 221/02 Foru Dekretuak arautu zituen industriek ingurumenean duten eraginari aurrea hartu eta eragin hori zuzendu eta kontrolatzeko inbertsioetarako dirulaguntzak. 4. artikuluko 1. idatz-zatian hauxe dio: "Deialdia urtero eginen da, Ingurumen, Lurraldearen Antolamendu eta Etxebizitza kontseilariaren foru aginduaren bidez, bertan ezarriko delarik eskabideak aurkezteko epea".

Ikusirik Ingurumenaren Integrazioko Zerbitzuaren txostena, Ekonomi eta Ogasun Departamentuko kontu-hartzaile delegatuak aurrekontuko kontusailari emandako oniritzia dakarrena, eta Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legearen 36.2 artikuluak emandako eskurantzak erabiliz,

AGINDU DUT:

1. Industriek ingurumenean duten eraginari aurrea hartu eta eragin hori zuzendu eta kontrolatzeko inbertsioetarako dirulaguntzen 2004rako deialdia onestea.

2. Deialdia arautuko duten oinarriak, foru agindu honen eranskinean agertzen direnak, onestea.

3. Gastuaren finantzazioa honela eginen da: 600.000 euro, gehienez ere, 2004ko gastu-aurrekontuko "Kutsadura galarazi eta zuzentzea" izeneko 31100-7709-4421000 kontusailaren kontura eta 300.000 euro, gehienez, 2005eko gastu-aurrekontuen kontura, horretarako dirurik baldin badago aurrekontuan.

4. Deialdia Nafarroako ALDIZKARI OFIZIALean argitara ematea.

5. Foru agindu honen kontra gora jotzeko errekurtsoa jar daiteke, Nafarroako Gobernuari zuzendua, hilabeteko epean, jakinarazi eta biharamunetik aitzina, Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legean eta hura aldatu duen 4/1999 Legearen 114. eta 115. artikuluetan xedaturikoarekin bat.

6. Foru agindu hau igortzea Ingurumenaren Integrazioko Zerbitzura, Kontrol Administratiboaren Atalera eta Ekonomi eta Ogasun Departamentuak Departamentu honetan duen kontu-hartzaileari, behar diren ondorioak izan ditzan.

Iruñean, bi mila eta hiruko abenduaren hamazazpian._Ingurumen, Lurraldearen Antolamendu eta Etxebizitza kontseilaria, José Andrés Burguete Torres.

O I N A R R I A K

1. artikulua. Xedea.

1. Foru agindu honen xedea da, industriek ingurumenean duten eraginari aurrea hartu eta eragin hori zuzendu eta kontrolatzeko inbertsioetarako dirulaguntzak 2004ko ekitaldirako arautzea.

2. Foru agindu honetan aipatzen diren dirulaguntzak, onuradunak eginiko inbertsio edo jardueraren arabera, sei motatakoak izan daitezke:

A mota: ingurumenaren gainean indarra duen arautegira egokitzeko neurri zuzentzaileetarako inbertsioak, hala prozesua aldatuz nola baliabideak erantsiz (aktibo finkoak), zuzenean kutsadura murrizteko.

B mota: kutsadura eta ingurumenari kalte egiten dioten bestelako eraginak zuzenean gutxitu edo kentzeko inbertsioak, xede berarekin egiten diren ekoizpen-metodoen egokitzapenetarakoak, edo teknologia garbiak nahiz gutxitze, birziklatze, berrerabiltze edo balioztatze prozesuak sartzeko inbertsioak, indarra duen ingurumenaren gaineko legerian ezarritakoa nabarmen gainditu nahi denean.

C mota: Industri ikerketarako proiektuak, hura ikerketa planifikatu edo azterketa kritiko gisa ulerturik, gehiago jakitea dutela xede, ekoizpen prozesu berriak sortzeko erabilgarria izateko, kutsadura eta jardueraren bestelako eragin kaltegarriak gutxitzearren, xede berarekin egiten diren ekoizpen-metodoen egokitzapenetarakoak, edo teknologia garbiak nahiz gutxitze, birziklatze, berrerabiltze edo balioztatze prozesuak sartzeko inbertsioak, indarra duen ingurumenaren gaineko legerian ezarritakoa nabarmen gainditu nahi denean.

D mota: ingurumenaren gaineko auditoretzak, ekodiagnostikoak, ingurumena kudeatzeko sistemen ezarpena, ingurumenerako arriskuen azterketa eta ebaluazioa, industriek ingurumenaren gainean duten eraginari buruzko balorazio-azterlana eta haiek sustatutako prestakuntza jarduerak.

E mota: argibide eta sentiberatze proiektuak.

F mota: industria kutsatuak araztuz ingurumenari eginiko kaltea konpontzen eta bereziki lurzoruaren eta lur gaineko edo lur azpiko uraren kalitatea hobetzen diharduten enpresek eginiko inbertsioak.

3. Dirulaguntza mota bakoitzaren zehaztapen partikular eta espezifikoak oinarri hauen eranskinetan agertzen dira.

4. Nafarroako hondakin uren arazketari buruzko abenduaren 29ko 10/1988 Foru Legea aplikatuz ezartzen diren dirulaguntza berariazkoak jaso ditzaketen proiektuak, deialdi honetan ezartzen den araubideaz ere balia daitezke, betiere, ados izanik, hala onartzen badute, bakoitzaren jarduera programa berariazkoa kontuan hartuz.

5. Erabiltzen den erregaiaren ordez gutxiago kutsatzen duen beste erregai bat paratzeko proiektuak ez dira deialdi honen xede izanen, helburu horretarako Industria Departamentuak kudeatzen duen deialdi berariazko bat dagoelako.

6. 7. artikuluan xedaturikoa deusetan galarazi gabe, ekoizpena ezarri edo handitzeko instalazioak A edo B motetako dirulaguntzetatik espresuki baztertzen dira.

7. Hozte-instalazioak edo haiek dauzkaten gas-instalazioak aldatzeko jarduketak ere ez dira sartuko.

2. artikulua. Onuradunak.

Foru agindu honetan ezarririko dirulaguntzak enpresa publikoek edo pribatuek, enpresa horien taldeek eta arestiko artikuluan aipaturiko pertsona fisiko eta erakundeek hartzen ahalko dituzte.

A motako dirulaguntzak enpresa txiki eta ertanei bakarrik ematen ahalko zaizkie. Onuradunek laguntzak eskatzen ahalko dituzte 1999ko urtarrilaren 1aren aurretik abian zeuden instalazioetarako bakarrik, eta 2001eko urtarrilaren 1aren ondotik indarra hartu duten ingurumen alorreko arau berrietara egokitzeko soilik, ingurumenaren aldeko laguntza publikoetarako indarrean dagoen Europako Batasuneko arauteriaren ariora.

B motako jarduketetan honako hauek sartuko dira: ingurumen alorreko arau berrietara egokitzea, legean ezarritako epean baino lehenago, helburu duten proiektuak eta, bereziki, Kutsaduraren aurkako Aurreneurri eta Kontrol Osatuei buruzko uztailaren 1eko 16/2002 Legepeko jarduerak.

A, B eta C motako laguntza eskabideak ezin izanen dira onartu nekazaritza eta abeltzaintzako produktuen eraldaketaz eta merkaturatzeaz arduratzen diren industri jardueretarako.

E motako dirulaguntzak eskatu beharko dituzte enpresa taldeek, merkataritza edo zerbitzu alorretakoek barne.

Eskualde lagundutzat jotzen ez diren Foru Komunitateko eremuetan, D motako dirulaguntzak enpresa txiki eta ertanei bakarrik ematen ahalko zaizkie.

3. artikulua. Eskabideak.

1. Dirulaguntzetarako eskabideak Ingurumen, Lurraldearen Antolamendu eta Etxebizitza Departamentura igorriko dira, horretarako honako agiri hauek erabiliko direlarik:

a) Dirulaguntzen eskaera.

b) Agiri teknikoak, foru agindu honen eranskinetan dirulaguntza mota bakoitzerako ezarririkoaren arabera.

c) Jardueraren aurrekontu zehatza, aditzera emanez zein diren ekoizpena handitzeko xedea duten zatiak.

d) A eta B motakoetan, inbertsioen azterketa ekonomikoa eta finantza-plana. 7.2 artikuluan aurreikusiriko kasuetan inbertsioen birgertatze aldien ebaluazioa erantsiko da.

e) Jarduerak dituen baimen eskuragarrien kopiak, hala nola jarduera sailkatuaren lizentziarena, hondakin urak isurtzeko baimenak, ur kontzesioa edo bestelako batzuk.

f) Erantzukizunpeko adierazpena, Foru Komunitateko Administrazioko edo beste administrazio publiko batzuetako beste departamentu batzuetan jarduketa bererako dirulaguntzetarako egin diren beste eskabide batzuei dagokiena.

g) Dirulaguntza eskatzen duen enpresa-batasuna osatzen duten enpresen zerrenda.

h) Enpresa, 5. artikuluko 4. idatz-zatiko irizpideen arabera, enpresa txiki edo ertaintzat har daitekeela frogatzeko agiriak.

i) Jarduketak hasi eta bukatzeko aurreikusitako epeak. Espresuki adieraziko dira aurrekontualdi bakoitzaren barruan eginen direnak, haietarako erabiliko den dirua bereizirik zenbatuz.

2. Ingurumena Kudeatzeko Sistemak ezartzeko dirulaguntzak ziurtapen entitatearen ziurtagiria lortu ondoren eskatuko dira, hura kobratzeko eskaerarekin batera, 9. artikuluan xedaturikoarekin bat.

3. Ingurumena Kudeatzeko Sistemak ezartzeko proiektuetarako izan ezik, eskaerak proiektuak edo inbertsioak egiten hasi baino lehen aurkeztu beharko dira.

4. artikulua. Dirulaguntzak aurkeztu eta aitortzeko prozedura.

1. Aurrekontu-ekitaldi honetarako deialdiak Nafarroako ALDIZKARI OFIZIALean argitara eman eta biharamunean hartuko du indarra eta egun horretatik aurrera bi hilabetez izanen da irekita.

2. Epe hori iragan eta gero ere onartzen ahalko dira eskabideak, baldin eta aurrekonturik bada.

3. 8. artikuluaren 8. idatz-zatian ezarritakoa galarazi gabe, aurreko deialdia bukatu ondoren aurkezturiko eskabideak deialdi bakoitzari gaineratuko zaizkio, baldin eta hartarako onartu ez badira, 3. artikuluko 3. idatz-zatian xedaturikoa betetzen dela bermatzearren.

4. Ingurumen, Lurraldearen Antolamendu eta Etxebizitza Departamentuak emanen du eskabideen gaineko ebazpena, 1. idatz-zatian ezarririko epea bukatu ondoren.

Dirulaguntzen ematea dirulaguntzak onartzeko administrazio ebazpena luzatzen denean aurrekontu-kreditua izatearen baldintzapean dago.

5. Eskabidea aurkeztu eta hiru hilabete iragaten badira Ingurumen, Lurraldearen Antolamendu eta Etxebizitza Departamentuak erabakirik hartu gabe, eskatzaileak ulertu beharko du eskabidea ezetsi zaiola ustezko egintzagatik.

6. Deialdi honetako eranskinetan ezartzen denaren araberako dokumentazio teknikoa aurkezten ez duten eskaerak ez dira onartuko. Izan ere, proiektuak teknikari eskudun batek izenpeturik aurkeztu beharko dira, oso-osorik landuak.

7. Aurkezten diren agiri teknikoetan zuzentzen ahal diren akatsak daudela ohartuz gero, dela 3. artikuluko 1. idatz-zatian aipatzen den agiriren bat falta delako, dela bidezko den dirulaguntzaren zenbatekoa zehazteko behar diren argibideak falta direlako, Ingurumen Departamentuak, 5., 6. eta 7. artikuluetan xedaturikoarekin bat, eskatuko du agiri osagarriak aurkeztu daitezela. Horretarako gehienez ere hilabeteko epea emanen du.

5. artikulua. Dirulaguntzen zenbatekoa.

1. Deialdi honetan aurreikusitako jarduketa mota bakoitzarentzadako, dirulaguntzen gehienekoak, egindako inbertsio gordinaren gaineko ehunekoetan emana, honako hauek izanen dira:

ENPRESA HANDIAK TXIKI ETA ERTAINAK

A mota: - %15

B mota: %30 %40

C mota: %40 %50

D mota: %50 %50

E mota: %75 %75

F mota: %15 %25

enpresa txiki edo ertaintzat hartzen ahal baldin bada edo batasuna enpresa txiki eta ertainek osatzen badute.

2. Adierazi den gehieneko mugarekin eskaera guztiak aurrekontuetan aintzat hartzeko behar adina diru ez badago, deialdi honetan hasiera bateko dirua handitu baledi ere, betebehar hura betetzeko gutxitze ehuneko bera aplikatuko zaie denei.

3. 2. artikuluko hirugarren lerroaldeko B motako jarduketei dagokienez, gehieneko portzentaje bat ezarriko da dirulaguntza jasotzeko. Portzentajea kalkulatu da artikulu honetako 1. puntuaren A eta B motako jarduketetako gehieneko portzentajeen batez bestearekin (dela enpresa handia, ertaina edo txikia), ingurumen arloko arau berriak indarra hartu zuenetik lortutako aurrerapena, arauan ezarritako epeari dagokionez.

4. Foru dekretu honetan laguntzetarako ezarririko gehieneko mugak aplikatzekoak dira, bai kasuan kasuko laguntza Ingurumen, Lurraldearen Antolamendu eta Etxebizitza Departamentuaren diruaz osorik finantzatzen denean, bai osorik edo hein batean beste Administrazio Publiko batzuen diruaz finantzatzen denean ere.

5. Horretarako enpresa txiki edo ertaintzat hartzen dira Estatuak enpresa txiki eta ertainei laguntzak emateko Europako Batasunaren zuzentarauetan (96 EEAO/C213/04) ezarritako baldintzak betetzen dituzten enpresak. Baldintza horiek, aldaketarik ez dagoen bitartean, hauexek izanen dira:

a) Ez izatea 250 langile baino gehiago.

b) Irizpide finantzario hauetariko bat betetzea:

_Negozio bolumena, urtean, gehienez ere 40 milioi eurokoa.

_Balantze orokorra, gehienez ere 27 milioi eurokoa.

c) Enpresa txiki edo ertaintzat jotzen ez den enpresa bat edo enpresa batasun bat, kapitalean edo bozkatzeko eskubideetan %25 edo hortik goiti parte hartzen ez badute, Europako Batasuneko zuzentarauek baimentzen dituzten salbuespenezko kasuetan izan ezik.

6. artikulua. Aintzat hartzen diren inbertsioak.

1. Aintzakotzat hartzen diren inbertsioak hauexek dira: lurretan egiten direnak, ingurumeneko helburuak betetzeko behar-beharrezkoak badira; eraikin, instalazio edo ekipo-ondasunetan egiten direnak, haien helburua kutsadura eta beste eragin kaltegarri batzuk gutxitu edo kentzea edo ekoizpen-metodoak ingurumena babesteko egokitzea bada. Proiektuak prestatzeko eta obra zuzentzeko gastuak sartzen ahalko dira, baina ez lizentzia, zerga edo tasenak.

2. Teknologien transferentzien gastuak ere hartzen ahalko dira kontuan, hala nola, ustiatzeko lizentziak eskuratzekoak edo patentaturik edo patentatu gabe dauden ezagupen teknikoak lortzekoak. Hala ere, aktibo inmaterial horiek baldintza hauek bete beharko dituzte:

a) aktiboaren osagai amortizagarriak izatea,

b) enpresei merkatuaren baldintzetan erosiak izatea eta erosleak enpresa horiek zuzenean edo zeharka kontrolatzeko ahalmenik ez izatea,

c) enpresaren aktiboan agertzea eta laguntzaren onuraduraren establezimenduan gutxienez ere bost urtez iraun eta ustiatuak izatea, laguntza ematen denetik hasita. Bost urte horiek iragatean berriro salduz gero, salmentaren etekina dirulaguntzaren xede diren kostuetatik kendu beharko da eta, hala bada, dirulaguntzaren zenbatekoa hein batean edo osorik itzuli.

3. D motako laguntzetan enpresek ezin sartuko dituzte beren langileen sariak.

7. artikulua. Dirulaguntzaren xede izan daitezkeen kostuak.

1. Dirulaguntzaren xede diren kostuak bakar-bakarrik ingurumena babesteko eginiko inbertsio gehigarrienak izanen dira.

2. Betiere, dirulaguntzaren xede diren kostuak honakoak kontuan hartu gabe kalkulatuko dira: ahalmena handitzea, inbertsioaldiko lehenbiziko bost urteetan sorturiko kostuen aurrezkiak eta bost urte horretako ekoizpen gehigarria.

3. Ingurumenari buruzko Espainia osoko, Nafarroako edo herrietako arauetara egokitzeko, arau horiek Europako Batasunekoak baino hertsiagoak badira, edo nahita ingurumenari buruzko arauak gaindituz gero, dirulaguntzaren xede diren kostuen artean sartuko da ingurumena babesteko mailari eusteko kostua, alegia, ingurumenari buruzko arauek eskatzen dutena baino handiagoa den horri.

4. Ingurumenari buruzko arauak gainditzeko inbertsioetarako ez da laguntzarik emanen ez eta ingurumenari buruzko araurik ez dagoenean ere, arauak gainditzearen funtsa Europako Batasunak onetsi bai, baina oraindik Espainiako Zuzenbidean indarra hartu ez duten arauetara egokitzea besterik ez bada. Enpresa batek bakarrik laguntza bat eskuratzen ahalko du Europako Batasuneko arauak baino hertsiagoak diren Espainiako arauetara egokitzeko edo, Europako Batasuneko araurik ez badago, Espainiako kasuan kasuko arauetara hauek aurreikusiriko mugaeguna baino lehen egokitu bada. Mugaegunaren ondorengo inbertsioak ez dira kontuan hartuko.

5. Dirulaguntza zehazteko abiapuntuko aurrekontuan ez dira sartuko kutsadura gutxitzeko bakarrik zeharkako ondorioak sortzen dituzten kontzeptuak.

6. Instalazio berriak sortzeko edo instalazio batzuen ordez beste batzuk paratzeko, ez da diruz laguntzen ahalko ekoizpena sortu edo ordezteko hasierako inbertsioaren kostua, non eta ez diren hobetzen ingurumenaren gaineko ondorioak.

7. Bi urtetik goitiko instalazioak dituzten enpresek, instalazioak ingurumenaren gaineko arautegira egokitu beharrean, haien ordez beste berri batzuk paratzen badituzte, jasotzen ahalko dituzte inbertsiorako laguntzak, baldin eta laguntza horiek gainditzen ez badute instalazio zaharrak aipatu eskakizunetara egokitzeko beharko litzatekeen kopurua.

8. B motako proiektuetarako dirulaguntza, betiere, ingurumenerako lortzen den hobekuntzarekiko proportzionala izanen da. Kasu guztietan dirulaguntzaren xede den aurrekontua ezarriko da.

9. F motako proiektuetan, kutsadura sortu duenak, zalantzarik gabe ezaguna denean, finantzatu beharko du lehengoratzea, erantzukizuna irizpide, eta ezin izanen du laguntzarik lortu.

Kutsadura sortu duena ezaguna ez denean edo kutsaduraren erantzukizun ekonomikoa inori ezin leporatu zaionean, erantzule subsidiarioek laguntza hartzen ahalko dute obrak egiteko, alegia, lurzoru kutsatuak dauzkatenek eta haien jabeek, Hondakinei buruzko apirilaren 21eko 10/98 Legeko 27. artikuluan xedaturikoarekin bat.

10. Instalazio kutsatuak arazteko dirulaguntzaren zenbatekoak dirulaguntzaren xede izan daitezkeen kostuen %100 egiten ahal dute, plus obren zenbatekoaren %15 (%25 enpresa txiki edo ertaina izanez gero). Dirulaguntzaren xede izan daitezkeen kostuak kalkulatuko dira lanak egiteko kostuetatik lurraren garestitzea kenduz.

11. Laguntzaren zenbateko osoa ez da behin ere enpresaren benetako gastuak baino handiagoa izanen.

8. artikulua. Ordaintzeko modua.

1. Emandako dirulaguntza ordaintzeko, aldez aurretik eskatu egin beharko da, aurreikusitako inbertsio eta gastuak egin eta gero, honako agiri hauek erantsiko direlarik:

a) Txosten teknikoa, proiektua nola egin den eta hura gauzatzen izan diren jarduketa eta datu edo gora-behera aipagarrienak biltzen dituena.

b) Eginiko inbertsio osoaren ziurtagirien zerrenda. Ziurtagiri horiek fakturak egiteko betebeharrak arautzen dituen 85/1993 Foru Legean xedaturikoaren araberakoak izan beharko dute. Fakturak jatorrizkoak edo behar bezala konpultsaturiko fotokopiak izanen dira.

c) Gastuak egiazki pagatu direla frogatzen duen agiria, gutxienez ere, pagatu beharreko dirulaguntzak adina eginen dutenak.

d) Inbertsio beretarako beste Administrazio Publiko batzuek eman dituen edo haiei eskatu zaizkien dirulaguntzen adierazpena.

e) Jarduera sailkatuaren lizentziaren kopia.

f) Instalazioak ongi dabiltzala frogatzea, saio eta neurketa egokien bidez.

g) Foru Ogasunarekiko zor guztiak kitatuak daudela frogatzea.

2. Ordaintzeko eskaera 2004ko azaroaren 15a baino lehen eginen da, beste epe bat, kontzesioan behar bezala arrazoitua, ezartzen ez bada behintzat.

3. Onuradunek eskatzen ahalko dute, obrak gauzatzen diren bitartean, aurreko puntuan adierazten den egunaren aurretik, onarturiko zenbatekoaren hein bateko ziurtapenen dirulaguntza pagatu dakiela, betiere aurreikusiriko %50 baino gehiago egin dela frogatzen badute.

4. Onuradunek eskatzen ahalko dute, obrek dirauteino, dagokien dirulaguntzaren %100 pagatu dakiela, aldez aurretik aurkeztuta zenbateko horren balioko banku-abal bat, betiere inbertsioaren %25 baino gehiago egin dutela frogatzen badute.

5. Instalazioak ongi dabiltzala egiaztatzeko luzaz saioak eta neurketak egin behar badira, onuradunek, inbertsioak bukaturikoan, dagokien dirulaguntzaren %100 pagatu dakiela eskatzen ahalko dute, zenbateko horren adinako banku-abala eta artikulu honetako 1. idatz-zatian aipatzen diren gainerako ziurtagiriak aurkeztu ondoren.

6. Aipatu banku-abalak deuseztatuko dira instalazioak zuzen gauzatu direla eta egoki dabiltzala frogatu eta gero.

7. Pagatuko den dirulaguntza izanen da emandako ehuneko zehatz bat, benetan egin den inbertsioaren gainean aplikatua, kenduko direlarik beste administrazio publikoetatik hartutako laguntzak, halakorik baldin bada. Bistan denez, ez du behin ere gaindituko onarturiko gehieneko zenbatekoa.

8. Artikulu honetan 2. idatz-zatian aipatzen den mugaeguna baino lehen hasiera batean egin asmo zen jarduketa edo proiektua gauzatzen hasi ez bada, edo aurreko urteetan hasi arren 2003. urtean aldaketarik jaso ez badu, eta beraz ezin bada frogatu inbertsioren bat egin denik, ulertuko da, interesatuari entzun ondoren, onuradunak uko egin diola garai batean eman zitzaion dirulaguntzari eta gainera eskubidea galduko du hurrengo bi urteetan ekainaren 23ko 221/2002 Foru Dekretuaren bidez arauturiko laguntzen deialdietan beste laguntzarik eskatzeko, jarduketa edo proiektu hartarako.

9. artikulua. Ingurumena Kudeatzeko Sistemak ezartzeko dirulaguntzen ordainketa.

Ingurumena Kudeatzeko Sistemak ezartzeko dirulaguntzak Ziurtagirietarako erakundearen ziurtagiria eskuratu ondoren onartu eta pagatuko dira, eskabidea aurkezturik.

Eskabideak agiri hauek bilduko ditu:

a) Dirulaguntzen eskaera.

b) Agiri teknikoak, 5. eranskinean zehaztutakoaren arabera.

c) Jarduera sailkatuaren lizentziaren eta eskuraturiko bestelako baimenen kopia.

d) Ziurtapen entitateak egindako ziurtagiriaren kopia.

e) Erantzukizunpeko adierazpena, Foru Komunitateko Administrazioko edo beste administrazio publiko batzuetako beste departamentu batzuetan jarduketa bererako dirulaguntzetarako egin diren beste eskabide batzuei dagokiena.

f) Enpresa, 5.5 artikuluko irizpideen arabera, enpresa txiki edo ertaintzat har daitekeela frogatzeko agiriak.

g) Eginiko inbertsio osoaren ziurtagirien zerrenda. Ziurtagiri horiek fakturak egiteko betebeharrak arautzen dituen 85/1993 Foru Legean xedaturikoaren araberakoak izan beharko dute. Fakturak jatorrizkoak edo behar bezala konpultsaturiko fotokopiak izanen dira.

h) Gastuak egiazki pagatu direla frogatzen duen agiria, gutxienez ere, pagatu beharreko dirulaguntzak adina eginen dutenak.

i) Foru Ogasunarekiko zor guztiak kitatuak daudela frogatzea, jatorrizko agiriaren edo konpultsaturiko kopiaren bidez.

10. artikulua. Onuradunaren betebeharrak.

Honako hauek dira onuradunaren beharkizun berariazkoak:

a) Onartzea, edozein unetan, Ingurumen, Lurraldearen Antolamendu eta Etxebizitza Departamentuak datu eta obrak egiaztatu ditzala, hark eskatzen dituen agiri guztiak aurkeztuko zaizkiolarik.

b) Ingurumen, Lurraldearen Antolamendu eta Etxebizitza Departamentuari jakinaraztea proiektuen garapenean gertatu eta edukiaren aldaketa nabarmena dakarren gorabehera oro, gertatu bezain laster. Aldaketa horri buruz Nafarroako Foru Komunitateko Administrazioak ez du konpromisorik hartuko, non eta ez duen espresuki bere egiten.

c) "Ikerketa + Garapena" direlako jardueretarako dirulaguntzen onuradun diren enpresak beharturik daude zabaldu eta ustiatzera gauzatu diren proiektuen emaitzak, bereizkeriarik gabe eta merkatuko baldintzak betez.

11. artikulua. Arau aplikagarriak.

Deialdi hau ekainaren 9ko 8/1997 Foru Aginduan xedatutakoaren menpe egongo da, horren bidez ezarri baitzen Nafarroako Foru Komunitateko Administrazioko eta haren erakunde autonomoetako dirulaguntzak eman, kudeatu eta kontrolatzeko araubide orokorra.

11. artikulua. Helegiteak.

Deialdi honen, bere oinarrien eta aplikazio egintzen aurka helegite arrunta jarriko ahal da, Nafarroako Gobernuari zuzendua, argitaratu eta biharamunetik hilabeteko epean, Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legearen 114. artikulutik 117.era bitartekoen arabera.

E R A N S K I N A K

Dirulaguntza mota bakoitzerako zehaztapen espezifikoak

1. eranskina._A motako dirulaguntzak.

A motako dirulaguntzetarako eskabideekin batera honako dokumentazio tekniko hau aurkeztu beharko da:

A) Jardueraren memoria orokorra, kontu hauek bildu beharko dituena:

_Ekoizpen prozesuaren deskripzioa.

_Kutsagarriak izan litezkeen guneen inbentarioa eta, hala bada, ezarriak dauden neurri zuzentzaileak.

_Jaulkipen edo isurketen kontrolaren datuak eta, hala bada, neurketa ekipoak.

_Hondakinen ekoizpenari buruzko datuak.

_Kutsaduraren aurkako programa osatua, epe luzera aurreikusia, egin beharreko inbertsioen plana eta programako fase eta epeak aipatuz.

B) Teknikari aditu batek sinatutako proiektua, honako agiri hauekin:

_Instalazioa eta lortu nahi diren helburuak arrazoitzen dituen memoria.

_Instalazioen proiektu teknikoa.

_Inbertsioen azterketa ekonomikoa eta finantza plana. 7.2 artikuluan aurreikusiriko kasuetan inbertsioen birgertatze aldien ebaluazioa erantsiko da.

_Proiektatutako instalazioez, haien kontrolaz eta kutsadura sortzen duten gainerako guneez arduratuko diren langileak.

_Kutsadura kontrolatu eta neurtzeko bitartekoak.

2. eranskina._B motako dirulaguntzak.

Behar diren agiri teknikoak A motako dirulaguntzetarako agindu honen 1. eranskinean ezarririkoak izanen dira.

Emandako laguntza maila proportzioan egonen da ingurumenean lortutako hobekuntzarekin eta behar izan den inbertsioarekin.

Deialdi honen ondorioetarako, industria bateko ekoizpen prozesuko hondakin eta jaulkipenen minimizatzea da azkenean tratamendua edo deuseztatzea behar duten kutsagarri sortuen (hondakinen edo airera edo uretara jaulkitzen direnen) kopurua eta arriskua gutxitzea ahalbidetzen duten antolamenduzko eta eragiketazko neurriak hartzea. Hori jatorrian gutxituz lortu da eta, posible ez denean, azpiproduktuak birziklatuz, prozesu berean edo beste batzuetan, edo dauzkaten osagarri batzuk berreskuratuz.

3. eranskina._C motako dirulaguntzak.

Eskabideei proiektu tekniko bat erantsi beharko zaie, eduki honekin:

1._Proiektua garatuz lortu nahi diren helburuen deskripzioa.

2._Prozesuaren garapen teknikoaren gaur egungo egoera, beste estatu batzuetan, Espainian eta enpresan berean aplikazioaren esparruan ezagutzen diren aurrerapenak aipatuz.

3._Burutzeko programa, proiektuko etapak eta funtsezko jomugak aipatuz eta mugatuz, lana faseetan banatzeko, haietariko bakoitzean emaitzak neurtu eta ondorengo garapena zehaztu ahal izateko.

4._Egutegia, fase bakoitza burutzeko aurreikusiriko egunekin.

5._Proiektuaren aurrekontu osoa, faseetan banatua, inbertsioaren garaia zehazteko, proiektuaren finantza programa lortuko delarik. Aurrekontua atal hauetan banatuko da:

a) Langileen kostua, kategoria eta lanaldia aipatuz.

b) Erabiliriko material suntsikorra.

c) Prototipoak, instalazioak eta makinak egin eta aldatzea.

d) Neurtzeko instalazio eta ekipoak, erabilera horretarako bakarrik izanen den ala bestelako helbururik ere izanen duen esanez.

e) Beste ikerketa zentro edo laborategi batzuei esleituriko lanak.

f) Bestelako gastuak: bidaiak, planoak, liburuak, patenteak, etab.

6._Proiektua eginen duen giza taldea. Zerrenda osoa aurkeztuko da, kategoria eta ikerketa esparruko jarduera aipatuz.

7._Ekoizpen prozesuak kontu hauetan izanen duen oihartzunaren aurreikuspena:

a) Ekoizteko ahalmenean.

b) Produktuaren ekoizpenaren kostua.

c) Barne eta kanpo kudeaketako isurkien edo hondakinen tratamenduaren kostuak.

d) Langile beharrak.

8._Proiektua finantzatzeko modua, horretarako beste erakunde batzuei laguntzarik eskatu zaien edo horietatik laguntzarik hartu den esanez.

9._Enpresak beste ikerketa proiektu batzuetan duen esperientzia.

10._Enpresaren ikerketaren erakusleak:

a) I+G gastuaren bilakaera.

b) I+G jardueretan aritzen diren langileen bilakaera.

c) I+G gastua/salmenta harremana.

4. eranskina._D motako dirulaguntzak (Ingurumeneko auditoriak).

1. Ingurumeneko auditoriek eduki hau izan beharko dute:

A) Industrien egoeraren ebaluazioa kontu hauei buruz:

a) Jarduerak ingurumenaren osagaietan duen eragina ebaluatu, kontrolatu eta aurreneurriak hartzea.

b) Energia kudeatu, aurreztu eta aukeratzea.

c) Lehengaiak kudeatu, aurreztu, aukeratu eta garraiatzea; ura kudeatu eta aurreztea.

d) Hondakinak gutxitu, birziklatu, berriro erabili, garraiatu eta deuseztatzea.

e) Zentroan berean eta hortik kanpo zarata ebaluatu, kontrolatu eta gutxitzea.

f) Ekoizpen prozesu berriak hautatu eta horiek aldatzea.

g) Produktuak planifikatzea (marraztu, ontziratu, garraiatu, erabili eta deuseztatzea).

h) Kontratisten, azpikontratisten eta hornitzaileen ingurumen emaitza eta praktikak.

i) Ustekabean ingurunera isurtzea saihestu eta gutxitzea.

j) Ingurumeneko istripuak gertatuz gero, presako prozedurak.

k) Langileak ingurumeneko gaietan argibideak eman eta haiek prestatzea.

l) Ingurumeneko gaiei buruz kanpoko argibideak.

B) Ingurumenaren arloan egun indarra duten arauetara edo etorkizunerako aurreikusten direnetara egokitzeko beharrezko ikusten diren neurriak zehaztea, gai hauetan: teknologia moldatzea, prozesuak aldatzea, instalazio eta ekipoko ondasun berriak sartzea.

C) Eskura dagoen teknologiarik hoberenerako egokitze maila ebaluatzea, industriaren sektorean, ekoizpen berari dagokionez, ingurumenaren gainean duen eragina minimizatzeko.

D) Proposatutako neurriak ezartzeak zein bideragarritasun ekonomiko duen zehaztea.

E) Industriaren barne antolamendurik hoberena ezartzea, ingurumeneko helburuak lortu ahal direla bermatzeko.

2. Ingurumeneko auditoretzak ingurumen sektoreko enpresa espezializatuek prestatu beharko dituzte, espreski erabili beharreko giza eta gauzazko baliabideak eta lanen egutegia aipatuz.

3. Ingurumen arloko Kudeaketa Sistemak ezarri ondoren aldian-aldian egiten diren auditoretzak (sistema horiek ezartzearen ondorioz eskatzen direnak) ez dira dirulaguntzetan sartzen.

5. eranskina._D motako dirulaguntzak (Ingurumena Kudeatzeko Sistemak ezartzea).

Eskabidean, kontu hauek zehaztu beharko dira:

_Ezartzeko programa.

_Bere langileek haren garapenean parte hartzea.

_Kanpoko enpresa aholku-emaileek parte hartzea.

_Ziurtatze erakundeek parte hartzea.

_Jarduketen aurrekontu zehaztua.

6. eranskina. D motako dirulaguntzak (ingurumeneko jarraipena).

1. Isurkiak edo industri jardueren hondakinak igorri, erabili edo deuseztatzeak ingurumenean duen eragina neurtzea eta horiek zaindu eta kontrolatzeko sistemak ezartzea xede duten proiektuei dirulaguntzak ematen ahalko zaizkie. Administrazioak espresuki beharturik edo arauteria indardunak eskaturik egin beharreko kontrol eta begiratze lanak ez dira dirulaguntzen xede izanen.

2. Proiektuaren barruan agiri hauek sartuko dira:

_Arrazoiak eta erdietsi nahi diren helburuak.

_Erabili beharreko langile eta baliabideak.

_Egiteko kronograma.

3. Proiektuaren memoria orokorrak foru dekretu honen 1. eranskineko A) letrako kontuak bildu beharko ditu.

7. eranskina._D motako diru laguntzak (Ingurumen arriskuen analisia eta ebaluazioa).

PNE 150008 metodologiari edo metodo estandarizatu baliokideari jarraituz eginen da Ingurumen Arriskuen analisia eta ebaluazioa, ingurumenean eraginen duten istripuak galarazteko (kutsadura episodikoa) eta industri instalazio batek ohiko baldintzetan funtzionatuz ingurumenean egin dezakeen kaltea (kutsadura graduala) atzemateko.

8. eranskina._D motako dirulaguntzak (Prestakuntza jarduerak).

1._Profesional liberalek eta enpresa edo administrazio publikoetako teknikariek industri ingurumenari buruz duten teknika edo legezko jakintza handitzeko ikastaroak dauzkaten jarduerak sorosten ahalko dira.

2._Prestakuntza jarduera egin nahi duenak aurkeztu beharko du eskabidea, ikastaroaren gorabehera guztiak (programa, irakasleak, kostu ekonomikoa) biltzen dituen memoriarekin eta ikastaroko matrikula ordaindu duela frogatzen duen agiriarekin batera.

9. eranskina._E motako dirulaguntzak (Argibide eta sentiberatze proiektuak).

1._Informazio eta sentsibilizazio jardueratzat hartuko dira enpresek edo elkarteek industri sektoreari edo orotariko jendeari industri ingurumenaren arazoen berri jakinarazteko egiten dituztenak.

2._Eskabideekin batera memoria bat aurkeztuko da, eduki hau izanen duena:

a) Lortu nahi diren helburuak.

b) Egin beharreko jarduerak, haien programa zehaztuz.

c) Haiek egiteko aurreikusiriko egutegia.

d) Proiektuaren aurrekontu osoa, kapituluka, langileen gastuen, behar den materialaren eta abarren arabera.

e) Jarduerak garatuko dituen pertsona taldea, bakoitzaren parte-hartzea zehaztuta.

3._Profesional edo enpresendako prestakuntza ikastaroak ez dira informazio eta sentsibilizazio jardueratzat hartuko.

10. eranskina._F motako dirulaguntzak. (Kutsatutako industri instalazioetako saneamendua ).

1._Kutsatutako industri instalazioetako saneamendurako proiektuak sorosten ahalko dira.

2._Eskabidearekin batera, proiektu tekniko bat aurkeztuko da, eduki hau izanen duena:

A) Kutsaturiko lurzorua identifikatzea, ukitutako lurzatiaren mugaketa eta lurzoruaren kutsaduraren zabalera eta ezaugarriak zehazteko moduan.

B) Kutsatutako industri instalazioak saneatzeko proiektua, ondoko alderdiak bilduko dituena:

a) Egindako karakterizazio lanak, ondoko hauekin:

_Ikerketa historikoa

_Ikerketa kanpainak (katak, zundaketak, laginak hartzea, ur eta lurren analisiak, e.a.)

_Litologia eta piezometria

_Emaitzak eginak dauden beste emaitza batzuekin erkatzea

b) Lurrak lehengoratzeko erabili behar den prozedura, egokitasun teknikoa arrazoituz.

c) Proiektuko kontusailetako aurrekontua.

d) Prozesua eta haren ondorengo egoera kontrolatu eta zaintzeko plana.

Iragarkiaren kodea: F0301406