I. NAFARROAKO FORU KOMUNITATEA
1.1. XEDAPEN OROKORRAK
1.1.3. Foru Aginduak
514/2003 FORU AGINDUA, abenduaren 4koa, Hezkuntza kontseilariak emana, ekainaren 24ko 322/2003 Foru Aginduaren 2.1.1. puntua aldatzen duena.
Hezkuntzaren Plangintzako Zerbitzuko zuzendariak adostasun txostena aurkeztu du, 2003-2004 ikasturtean Nafarroako Urrutiko Hizkuntza Eskola Ofizialak izanen duen antolaketa eta jarduna arautzeko jarraibideak onesteko.
Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legeko 36. artikuluak ematen dizkidan ahalmenak erabiliz,
AGINDU DUT:
1. Onespena ematea ekainaren 24ko 322/2003 Foru Aginduaren 2.1.1. puntuaren aldaketari, honako idazketa hau izanen baitu hemendik aurrera:
2.1.1. Ezaugarriak.
Programa honen bitartez aukera eman nahi zaie Bigarren Hezkuntzako ikasleei Urrutiko Hizkuntza Eskola Ofizialeko ikasle ofizial izateko, horrela jasotzen ahalko baitituzte beren ikastetxeetan hurrengo arauetan jasotako irakaskuntzak: irailaren 2ko 967/1988 Errege Dekretuan (1988-09-10eko Estatuko Aldizkari Ofiziala), abenduaren 1eko 1523/1989 Errege Dekretuan (1989-12-18ko Estatuko Aldizkari Ofiziala), urtarrilaren 24ko 47/1992 Errege Dekretuan (1992-02-05eko Estatuko Aldizkari Ofiziala) eta hizkuntzen irakaskuntza espezializatuen oinarrizko zikloa antolatzen duen uztailaren 16ko 196/2001 Errege Dekretuan, eta baita 1993ko azaroaren 2ko Aginduan ere (1993-11-13ko Estatuko Aldizkari Ofiziala); horrela, bada, ikasleak, aldi berean jasotzen ahal ditu Bigarren Hezkuntzako helburu propioak eta Hizkuntza Eskola Ofizialetako irakaskuntza espezializatuetakoak, dagozkion irakaskuntzako ziurtagiriak lortzea ekarriko dutenak.
Arestian adierazi den Programa horretan kontuan hartu behar da Bigarren Hezkuntzak eta H.E.O.ek ezaugarri desberdinak dituztela hizkuntzen irakaskuntzari dagokionez, baina, aldi berean, biek hizkuntzazko helburu eta eduki komunak dituztela.
Gainera, DBHko 4. mailan dauden ikasleek, baldin eta NUHEOrekin lankidetza-programara biludak badira eta HEOaren Euskararen Oinarrizko Zikloaren Agiria badute, badute aukera irakaskuntza horien Goiko Zikloaren ziurtagiria eskuratzeko lankidetza-programa jarraitzeko, uztailaren 28ko 272/2003 Foru Dekretuan ezarritako curriculumarekin bat, eta ezartzen den maila-egokitzea eginik.
Beharrezkotzat jo da aldian behin bilerak egitea N.U.H.E.O.ren eta Programa honen arabera irakasten dituzten Bigarren Hezkuntzako ikastetxe eta institutuetako departamentu didaktikoen artean.
Ikasturtean zehar gutxienez hilabetean behin bilera bat eginen da curriculumaren garapena aztertzeko, hala nola programa horren aplikazio praktikoaren ondorioz sor daitezkeen arazoak konpontzeko. Halaber, ikasturtearen bukaeran programaren ebaluazioa eginen da, hurrengo ikasturteetan hobetzeko behar diren neurriak hartu ahal izateko. Ebaluazioan bereziki programazioa bete den aztertuko da, koordinazio bilkurak nola egin diren ikusiko eta erabilitako materialak eta egindako ebaluazio probak aztertuko.
Horrela, bermatu eginen da helburu, eduki eta ebaluazioaren irizpideen egokitzapena eta horiek N.U.H.E.O.ko programazioan bilduko dira.
Aurreko idatz-zatian adierazi diren edukiak eskolako ohiko orduetan irakatsiko dira, ikasleen eskola orduetan alegia.
2. Foru agindu hau Nafarroako ALDIZKARI OFIZIALean argitaratzea.
3. Foru Agindu hau helaraztea Hezkuntzaren Plangintzarako Zerbitzuari, Euskara Zerbitzuari, Zerbitzuak Ikuskatzeko eta Ikuskapen Teknikorako Zerbitzuari, Antolamendu Akademikoaren Atalari eta Araubide Bereziko Irakaskuntzaren Atalari, bidezko ondorioak izan ditzan.
Iruñean, bi mila eta hiruko abenduaren lauan._Hezkuntza kontseilaria, Luis Campoy Zueco.
Iragarkiaren kodea: F0300980
