I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
23/2004 FORU AGINDUA, ekainaren 8koa, Osasun kontseilariak emana, hamasei urtetik beheitiko seme-alabak, garun-perlesiak joak eta Petö metodoarekin tratamendua hartzen dutenak, dituzten familiendako 2004rako dirulaguntzak banatzeko deialdia onesten duena.
Ekainaren 9ko 8/1997 Foru Legeak, 1997ko 74. Nafarroako ALDIZKARI OFIZIALean ekainaren 20an argitaratu baitzen, arautzen du Nafarroako Foru Komunitateko Administrazioaren eta haren erakunde autonomoen dirulaguntzak eman, kudeatu eta kontrolatzeko araubide orokorra.
Aipatutako foru legearen 3. artikuluan ezarritakoari jarraituz, dirulaguntzak publizitatean, lehiakortasunean eta objektibotasunean oinarrituta emanen dira.
Deialdi honen xedea da 2004rako hamasei urtetik beheitiko seme-alabak, garun-perlesiak joak eta Petö metodoarekin tratamendua hartzen dutenak, dituzten familiendako dirulaguntzak banatzea.
Horiek horrela, Nafarroako Foru Komunitateko Administrazioaren eta haren erakunde autonomoen dirulaguntzak eman, kudeatu eta kontrolatzeko araubide orokorrari buruzko ekainaren 9ko 8/1997 Foru Legearen 5. artikuluak ematen dizkidan eskumenak erabiliz,
AGINDU DUT:
1. Hamasei urtetik beheitiko seme-alabak, garun-perlesiak joak eta Petö metodoarekin tratamendua hartzen dutenak, dituzten familiendako 2004rako dirulaguntzak banatzeko deialdia onestea, foru agindu honetako eranskinean ageri diren baldintzei jarraituz.
2. Foru agindu hau eta eranskina Nafarroako ALDIZKARI OFIZIALean argitaratzea.
3. Foru agindu honek Nafarroako ALDIZKARI OFIZIALean argitaratu eta biharamunean hartuko du indarra.
4. Deialdi honen aurka gora jotzeko errekurtsoa jartzen ahal da, Nafarroako Gobernuari zuzendua, argitaratu eta biharamunetik hilabeteko epean.
Iruñean, 2004ko ekainaren 8an._Osasun kontseilaria, María Kutz Peironcely.
E R A N S K I N A
Arauak
1. Deialdi honen babesean banatzen diren dirulaguntzak hamasei urtetik beheitiko seme-alabak, garun-perlesiak joak eta Petö metodoarekin tratamendua hartzen dutenak, dituzten familien gastuak osorik edo hein batean finantzatzeko erabiliko dira, baldintza hauei jarraituz:
_Garun-perlesiak edo sendagile batek diagnostikatutako antzeko prozesu neurologikoek jotako haurrak izatea.
_Nafarroan bizitzea.
_Tratamendua Osasunbidea-Nafarroako Osasun Zerbitzuko sendagile espezialista batek agindu izana.
2. Tratamenduaren kostuaren zenbatekoa pagatu behar duen aita, ama, tutore edo legezko ordezkariak eskatzen ahalko dituzte foru agindu honetan ezartzen diren laguntzak.
3. Eskabideak aurkezteko epea deialdi hau Nafarroako ALDIZKARI OFIZIALean argitaratu eta biharamunean hasi eta 2004ko urriaren 1ean bukatuko da:
4. Dirulaguntzen eskabideak gehienbat Osasun Departamentuko Eregistroan (Iruñeko Amaia kaleko 2An), Osasun Departamentuko zuzendari nagusiari igorritako eskabidearen bidez. Eskabideari agiri hauek erantsi beharko zaizkio:
_Haurra eta eskabidea aurkezten duen ordezkaria Nafarroako Foru Komunitatean bizi direla frogatzen duen agiria.
_Ekonomia eta Ogasun Departamentuak luzaturiko ziurtagiria, eskatzaileak Nafarroako Ogasun Publikoarekiko eginbehar guztiak bete dituela adierazten duena.
_Tratamendua justifikatzen duen txosten klinikoa.
_Petö metodoarekin proposaturiko errehabilitazio tratamenduaren azalpena, zer zentrotan eginen den adieraziz.
_Petö metodoaren bidezko errehabilitazio tratamenduaren kostua, familiak pagatu behar duena.
_Dirua transferentzia bidez jasotzeko inprimakia, behar bezala betea.
Eskabideak aipatutako baldintzak betetzen ez baditu, Osasun Laguntzaren Zerbitzuak interesatuari eskatuko dio 10 eguneko epean zuzen dezala, eta adieraziko dio hala egiten ez badu eskabideari uko egiten diola eta artxibatu eginen da.
5. Eskabidea aurkezteak berekin dakar deialdia zuzentzen duten oinarriak onartzea.
6. Aurkeztutako datuak egiazkoak ez badira edo eskatzaileak faltsutzen baditu, zehapena ezar daiteke, Nafarroako Foru Komunitateko Administrazioaren eta haren erakunde autonomoen dirulaguntzak eman, kudeatu eta kontrolatzeko araubide orokorra ezartzen duen ekainaren 9ko 8/1997 Foru Legearen 27. artikuluan eta hurrengoetan ezarritakoari jarraikiz.
7. Osasun zuzendari nagusiak banatuko ditu dirulaguntzak, ebazpen baten bidez, Ebaluazio Batzorde batek proposaturik. Batzorde horrek kide hauek izanen ditu:
_Osasun Laguntzaren Zerbitzuko zuzendaria.
_Osasun Laguntzako Zerbitzuko teknikari bat, bertako zuzendariak izendatzekoa.
_Osasun Departamentuko Ikuskatzailetza eta Araubide Juridikoaren Ataleko kide bat, idazkari teknikoak izendatu beharrekoa eta idazkari lanetan arituko dena.
8. Ebaluazio Batzordeak egiaztatuko du onuradunak betetzen dituztela dirulaguntzak kobratzeko betebeharrak eta irizpide hauei jarraituz proposatuko ditu zenbatekoak:
_Dirulaguntzaren zenbatekoan familiak finantzaturiko tratamenduaren kostua hartuko da kontuan.
_Zehazteko, kontuan hartuko da zenbat diru dagoen aurrekontuetan, laguntzak tratamenduaren kostuarekin proportzionalak izan daitezen.
_Dirulaguntzak gutxienez tratamenduaren ziklo bat finantzatzeko adina eginen du.
9. Laguntza hauek bateragarriak dira bestelako dirulaguntza edo laguntzekin, baina guztira emanikoaren zenbateko osoak behin ere ezin eginen du familiaren kontu pagaturiko tratamenduaren kostu osoa.
Onuradunek Osasun Departamentuari jakinarazi beharko dizkiote beste erakunde batzuek helburu bererako emaniko laguntza edo dirulaguntza guztiak.
10. Justifikazio ekonomikoa Osasun Departamentuko Erregistroan jatorrizko fakturak aurkeztuz eginen da. Horietan gutxienez datu hauek agertuko dira:
_Haurraren izen-deiturak.
_Tratamendua ematen duen entitatea.
_Harturiko tratamendua, aldiak zehaztuz.
_Familiak guztira pagaturiko zenbatekoa.
Halaber, urteko tratamendua bukatzean, Osasun Departamentuan tratamenduak haurraren bilakaeran izaniko emaitzei buruz ebaluazio zehatz bat aurkeztu beharko da.
11. Eginiko gastuen ziurtagiriak 2004ko abenduaren 2a baino lehen aurkeztu beharko dira.
12. Dirulaguntza ordainketa bakar batean emanen da, 2005eko lehen hiruhilekoan, ziurtagiriak egiaztatu ondoren.
13. Deialdi hau garatzeko aurreikusi den zenbatekoa 2004ko Nafarroako Aurrekontu Orokorretako proiektuko "Petö tratamendua hartzen ari diren garun-perlesiak jotako haurren familiendako laguntzak" 51000-500000-4809-411102 kontusailean agertzen da.
14. Deialdi honetan zehaztuta ez dagoen orotan ekainaren 9ko 8/1997 Foru Legea aplikatuko da, horren bidez ezarri baitzen Nafarroako Foru Komunitateko Administrazioko eta haren erakunde autonomoetako dirulaguntzak eman, kudeatu eta kontrolatzeko araubide orokorra.
Iragarkiaren kodea: F0409366
