I. NAFARROAKO FORU KOMUNITATEA
1.1. XEDAPEN OROKORRAK
1.1.3. Foru Aginduak
185/2004 FORU AGINDUA, azaroaren 25ekoa, Lehendakaritza, Justizia eta Barne kontseilariak emana, Nafarroako Foru Komunitateko Administrazioaren eta haren erakunde autonomoen zerbitzuko langileen 2005eko lan-egutegia onesten duena.
Industria eta Teknologia, Merkataritza, Turismo eta Lan kontseilariak, uztailaren 1eko 71/2004 Foru Aginduaren bitartez, Nafarroako Foru Komunitatean 2005. urteko jaiegunak zein izanen diren erabaki ondoren, bidezko da langile horien 2005eko aste barreneko jaien egutegia eta haien lanaldiaren urteko lanordu kopuruaren banaketa onestea, abenduaren 27ko 624/1999 Foru Dekretuak ezarritako urteko lanordu kopuruaren arabera.
Horrenbestez, Nafarroako Foru Komunitateko Gobernuari eta Administrazioari buruzko Foru Legearen 46.5 artikuluak ematen dizkidan eskurantzak erabiliz,
AGINDU DUT:
1. artikulua. 1. Nafarroako Foru Komunitateko Administrazioaren eta haren erakunde autonomoen zerbitzuko langileendako, 2005ean, aste barreneko jaiegunak hauexek izanen dira:
Urtarrilaren 1a: Urteberri eguna.
Urtarrilaren 6a: Errege eguna.
Martxoaren 19a: San Jose.
Martxoaren 24a: Ostegun Santua.
Martxoaren 25a: Ostiral Santua.
Martxoaren 28a: Pazko bigarrena.
Uztailaren 6a: San Fermin bezpera, 12,00:00etatik aurrera jai Iruñean lan egiten dutenendako.
Uztailak 7, 8 eta 9: Sanferminak, jaiegunak Iruñean lan egiten dutenendako.
Uztailaren 25a: Santiago eguna.
Abuztuaren 15a: Ama Birjinaren Jasokundea.
Urriaren 12a: Espainiako jai nazionala.
Azaroaren 1a: Santu Guztien eguna.
Azaroaren 29a: San Saturnino, jaieguna Iruñean lan egiten dutenendako.
Abenduaren 3a: San Frantzisko Xabierkoa, Nafarroaren Eguna.
Abenduaren 6a: Konstituzioaren eguna.
Abenduaren 8a: Ama Birjina Sortzez Garbia.
2. Iruñean lan egiten ez dutenentzat jaiegun izanen dira, herriko bestak direla-eta, santu zaindariaren eguna, hurrengo hirurak eta bezpera, azken hori 12:00etatik aurrera. Gainera, beste jaiegun bat ere izanen da, herriari usadioz edo erlijioaren aginduz dagokiona hain zuzen ere.
2. artikulua. Nafarroako Foru Komunitateko Administrazioan eta haren erakunde autonomoetan lanaldiaren urteko lanordu kopurua, 1.592koa izanen dena, honela banatuko da:
A) Astelehenetik ostiralera bitarteko eguneroko lanaldia, orokorrean, 7 ordu eta 15 minutukoa izanen da. Nahitaezkoa izanen da 8:00etatik 15:00ak bitarte aritzea, eta gainerako 15 minutuak betetzeko aukera malgua utziko da, enplegatuaren esku, 7:45etik 8:00etara bitarte eta 15:00etatik 15:15era bitarte.
B) Artikulu honetan ezarritako urteko lan orduen banaketa doitzeko, aurreko atalak ezarritako lanaldia duten eta Iruñean lan egiten ez duten langileek 24 ordu eta 45 minutuko murrizketa orokorra izanen dute herriko bestetan, edo herriari usadioz edo erlijioaren aginduz dagokionean, kasu bakoitzeko egoeraren arabera banatuta. Murrizketa honek Iruñean diharduten langileei dagokienak bezainbat ordu egiten du.
C) Artikulu honetako aurreko ataletan ezarritako lanaldiaren banaketa ez zaie aplikatuko, zerbitzuko beharrak direla eta, lanaldi berezia edo ordu konpentsazioren bat (lana txandaka, gauez, e.a.) dutenei, ez eta ikastetxeei eta osasun zentroei atxikita daudenei ere, horiek lan egutegi berezia izanen baitute.
Urteko lanorduen kopurua banatzeko orokorrean ezarritakoa ez bezalako erregimena dagoen kasuetan, lan egutegi berezi horrek, betiere lanaldiaren urteko kopurua errespetatuz, indarrean dagoen erregimenari eutsiko dio, bai eguneko lanaldiaren edo txanden iraupenari dagokionez, bai urteko lanorduak asteko egunetan banatzeko kasu bakoitzean erabiltzen den moduari dagokionez; horrek guztiak ez du galarazten beste ordutegi batzuk edo urteko lanorduak banatzeko bestelako erregimenak ezartzeko aukera, zerbitzuaren beharrek hala aholkatzen dutenean, dagokion Mahai Orokorrean edo sektorialean negoziatu ondoren.
D) Zerbitzuaren beharrak direla-eta hala komeni denean, Lehendakaritza, Justizia eta Barne Departamentuak, horretan interesa duen Departamentuak proposaturik, zenbait kasu edo administrazio unitatetan artikulu honetako lan ordutegia ez bezalakoa izatea baimen dezake, aitzinetik Mahai Orokorrarekin edo sektorialarekin negoziatu ondoren eta, betiere, ezarritako urteko lanordu kopurua errespetatzen bada.
AZKEN XEDAPENA
Foru agindu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, 2004ko azaroaren 25ean._Lehendakaritza, Justizia eta Barne kontseilaria, Javier Caballero Martínez.
Iragarkiaren kodea: F0418113