I. NAFARROAKO FORU KOMUNITATEA
1.1. XEDAPEN OROKORRAK
1.1.2. Foru Dekretuak
713/2002 FORU DEKRETUA, abenduaren 22koa, Nafarroako Gobernuak emana. Baimena ematen dio Nafarroako Unibertsitate Publikoko Gizarte Kontseiluari 2004ko ekitaldian unibertsitate horretako irakasle bakoitzari merezimenduen ondorioz dagozkion lansari osagarriak esleitzeko.
Unibertsitateei buruzko abenduaren 21eko 6/2001 Lege Organikoak 69. artikuluko 2. idatz-zatian xedatzen duenez, autonomia erkidegoetako gobernuek unibertsitateetako irakasleen artean lansari osagarriak esleitzen ahalko dituzte, norberak irakaskuntzan, ikerketetan eta kudeaketan izaniko merezimenduen arabera. Artikulu hartako 3. idatz-zatiak xedatzen du, bestetik, autonomia erkidegoek horretarako ezartzen dituzten mugen barruan, Gizarte Kontseiluak, Unibertsitateko Gobernu Kontseiluak proposaturik, erabakitzen ahalko duela lansari osagarri horiek irakasle bakoitzari esleitzea. Azkenik, hurrengo idatz-zatian esaten da osagarriak esleituko direla Kalitatearen Ebaluazioko eta Kreditazioko Agentzia Nazionalak edo kasuan kasuko autonomia erkidegoko Legeak kanpoko ebaluaziorako zehazten duen organoak merezimenduak baloratu ondoren.
Kontuan hartuz Nafarroako Foru Komunitatea gaur egun aztertzen ari dela zein den kanpoko ebaluazioko sistemarik egokiena Nafarroako Unibertsitate Publikoa garatzeko alderdi nagusien kalitatea baloratu eta kreditatzeko, eta irakasleen lansari osagarrien araubidea zehaztea azterlan hori bukatzen denerako uztea dela bidezkoena, abenduaren 23ko 269/2002 Foru Dekretuaren bidez baimena eman zitzaion Nafarroako Unibertsitate Publikoko Gizarte Kontseiluari unibertsitate horretako irakasle bakoitzari 2003ko ekitaldian merezimenduen ondorioz dagozkion lansari osagarriak esleitzeko.
2004. urtea hurbil denez, aipatu araubidea ezartzen ez den bitartean, beharrezkoa da Unibertsitate Publikoko Gizarte Kontseiluari osagai horiek esleitzeko baimena luzatzea 2004rako, Nafarroako Unibertsitate Publikoko irakasleen ordainsariei buruzko abenduaren 1eko 19/1998 Foru Legeak ezarritakoaren arabera.
Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoko 47. artikuluan xedaturikoarekin bat, Nafarroak eskumen osoa du irakaskuntzako hedapen, maila eta espezialitate guztiak arautu eta kudeatzeko.
Ikusirik Nafarroako Unibertsitate Publikoko Gizarte Kontseiluak harturiko 15/2003 Erabakia, Unibertsitate hartako Gobernu Kontseiluak proposaturik, Hezkuntza kontseilariaren proposamenez, eta Nafarroako Gobernuak bi mila eta hiruko abenduaren hogeita biko bilkuran hartutako erabakiari jarraikiz,
DEKRETATU DUT:
Artikulu bakarra._Luzatu egin da Nafarroako Unibertsitate Publikoko Gizarte Kontseiluari 2004ko ekitaldian unibertsitate horretako irakasle bakoitzari merezimenduen ondorioz dagozkion lansari osagarriak esleitzeko emandako baimena.
AZKEN XEDAPENA
Foru dekretu honek Nafarroako ALDIZKARI OFIZIALean argitaratzen den egunean berean hartuko du indarra.
Iruñean, bi mila eta hiruko abenduaren hogeita bian._Nafarroako Gobernuko lehendakaria, Miguel Sanz Sesma._Hezkuntza kontseilaria, Luis Campoy Zueco.
Iragarkiaren kodea: F0301617
