Iragarkia
97. ALDIZKARIA - 2003ko uztailaren 30a
I. NAFARROAKO FORU KOMUNITATEA
Xedapen Orokorrak. Foru Aginduak
318/2003 FORU AGINDUA, ekainaren 20koa, Hezkuntza eta Kultura kontseilariak emana, 2003-2004 ikasturtean Iruña eta Tuterako Hizkuntza Eskola Ofizialen antolaketa eta jarduna arautzeko jarraibideak onesten dituena.
Ikasketen Antolamendu eta Lanbide Heziketaren Zerbitzuko zuzendariak adostasun txostena aurkeztu du Iruña eta Tuterako Hizkuntza Eskola Ofizialen antolaketa eta jarduna 2003-2004 ikasturtean arautuko dituzten jarraibideak onesteko.
Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legeko 36. artikuluak ematen dizkidan ahalmenak erabiliz,
AGINDU DUT:
1. Foru agindu honen eranskineko jarraibideak onestea. Aipatu jarraibide horiek Iruña eta Tuterako Hizkuntza Eskola Ofizialen antolaketa eta jarduna arautzen dituzte 2003/2004 ikasturterako.
2. Hezkuntza zuzendari nagusiari ahalmena ematen zaio foru agindu honetan ezarritakoa betearazi eta garatzeko beharrezkoak diren xedapenak eman ditzan.
3. Foru agindu hau eta eranskina igortzea Ikasketa eta Ikasketen Antolamendu eta Lanbide Heziketaren Zerbitzura, Zerbitzuak Ikuskatzeko eta Ikuskapen Teknikorako Zerbitzura, Giza Baliabideen Zerbitzura, Araubide Bereziko Irakaskuntzaren eta Teknologia Berrien Zerbitzura, Ikasketak Antolatzeko Atalera, Araubide Bereziko Irakaskuntzaren eta Atzerriko Hizkuntzen Atalera eta ukitutako ikastetxeetara, behar diren ondorioak izan ditzaten.
4. Foru agindu hau eta eranskina Nafarroako ALDIZKARI OFIZIALean argitaratzea.
Iruñean, bi mila eta hiruko ekainaren hogeian._Hezkuntza eta Kultura kontseilaria, Jesús María Laguna Peña.
ERANSKINAREN AURKIBIDEA
Iruña eta Tuterako Hizkuntza Eskola Ofizialen antolaketa eta jarduna 2003-2004 ikasturtean arautzeko jarraibideak
I._IKASTETXEKO URTEKO PROGRAMAZIO OROKORRA
1. Edukia.
A._Ikastetxearen ordutegi orokorra eta planifikatzeko irizpideak
B._Irakaslanak.
C._Jarduera osagarrien urteko programazioa.
D._Txosten administratiboa.
2. Urteko programazio orokorra prestatu, onetsi eta ebaluatzea.
II._IRAKASLEAK
1. Lanaldia.
2. Orduen banaketa.
A._Irakastorduak.
B._Astean zenbatu beharreko ordu osagarriak.
C._Guardiak.
D._Urtean zenbatu beharreko ordu osagarriak.
3. Ordutegiak egitea.
A._Txanda eta kurtsoen banaketa.
B._Aukeratzeko hurrenkera.
C._Ikasketaburutzak ordutegiak egitea.
D._Irakasleen ordutegi pertsonala.
4. Ordutegia onetsi eta jakinaraztea.
5. Irakasleek ordutegia betetzea eta asistentzi partea.
III._IRAKASLANAK KOORDINATZEKO ORGANOAK
1. Departamentuak.
A._Departamentuen kopurua.
B._Departamentuaren eginkizunak.
a) Programazioa.
b) Ikasturte bukaerako memoria.
c) Bestelako eginkizunak.
C._Departamentuaren bilkurak.
D._Departamentuburutza.
a) Izendapena.
b) Erantzukizunak.
2. Informatikako koordinazioa.
IV._IKASLEEN ESKUBIDE ETA BETEBEHARRAK
1. Ikasleen asistentzia.
2. Ikasleek kalifikazioei buruz erreklamazioak egiteko eskubidea.
3. Kurtsoa errepikatzea.
V._BESTE JARRAIBIDE BATZUK
1. Ikastetxeez landarako jendea sartzea.
2. Irakasleen erantzukizuna.
3. Matrikula egiteko araubidea.
4. Matrikulari uko egitea.
5. Alkohola saltzeari eta erretzeko debekuari buruzko arauak.
6. Ikastetxeko langileen jarduerak.
7. Jarraibide hauen berri ematea.
8. Bigarren Hezkuntzako irakasleentzako ikaspostuak.
E R A N S K I N A
Iruña eta Tuterako Hizkuntza Eskola Ofizialen antolaketa eta jarduna 2003-2004 ikasturtean arautzeko jarraibideak
I._IKASTETXEKO URTEKO PROGRAMAZIO OROKORRA
1. Edukia.
Iruña eta Tuterako Hizkuntz Eskola Ofizialek, ikasturtea hasi baino lehen, Urteko Programazio Orokorra eginen dute, irakaslan guztien koordinazioa, beren eskumenen erabilera egokia eta eskola komunitatearen sektore guztien parte-hartzea bermatzeko.
Urteko Programazio Orokorra zuzendaritza taldeak eginen du, klaustroaren eta eskola kontseiluaren proposamen eta erabakiak kontuan hartu ondoren, eta ondoko alderdi hauek edukiko ditu:
A._Ikastetxearen ordutegi orokorra eta planifikatzeko irizpideak.
Ikastetxeko ordutegi orokorrak, klaustroari kasu egin ondoren zuzendaritza taldeak egin eta eskola kontseiluak onetsi behar duenak, bide emanen du ikastetxe bakoitzeko Urteko Programazio Orokorrean aurreikusitako jarduerak, bai irakaskuntzaren arlokoak, bai osagarriak, aurrera eramateko. Hortaz, ikastetxeko ordutegi orokorrak honako hauek bilduko ditu gutxienez:
a) Ikastetxea eskola komunitatearentzat irekita egonen den ordutegia. Ikastetxeko zuzendaritzak behar diren baliabideak jarriko ditu ikastetxeak eskolako oporraldietan goizez irekiak egoteko.
b) Eskolaldiko orduen banaketa eskola ordutegiaren arabera eta ondoko irizpide hauei jarraikiz eginen da:
_Eskola ordutegia astelehenetik ostiralera bitartekoa izanen da, goizeko eta/edo arratsaldeko saioekin, eta 8:00etatik 22:00etara bitartekoa izaten ahalko da, bi txandatan, 8:00etatik 15:00etara eta 15:00etatik 22:00etara.
_Kurtsoko modalitate arruntak honako hauek izanen dira.
-Ordu batekoa egunean.
-Ordu eta erdiko modalitatea, astean hiru egunez, bi egunetik
behin.
-Bi ordukoa, astean bi egunez eta ostiral txandakatu batzuk.
Aurreko hirurak ez bezalako modalitateak ezartzeko beharrezkoa izanen da Zerbitzuak Ikuskatzeko eta Ikuskapen Teknikorako Zerbitzuaren baimena.
Era berean, ikastaro bereziak emateko beharrezkoa izanen da Zerbitzuak Ikuskatzeko eta Ikuskapen Teknikorako Zerbitzuak berariazko baimena ematea. Ikastaroen ondoren, haien gaineko ebaluazioa eginen da, haien jarraipena ebaluazioko emaitzen menpe geldituko dela.
_Ikasleen kopurua 25ekoa izanen da gela bakoitzeko, bai oinarrizko zikloan, bai goi zikloan.
2002-2003 ikasturtean, Atzerriko Hizkuntzak irakasteko Urrutiko Hizkuntz Eskola Ofizialak eta Bigarren Hezkuntzako Institutuek duten lankidetza programaren bidez, Frantsesean, Ingelesean eta Euskaran Oinarrizko Zikloko Agiria eskuratu duten ikasleen irakaskuntza espezializatuari jarraipena emateko, Hezkuntza eta Kultura Departamentuak zehazten den ikaspostu kopurua gordeko du ikasle horientzat Iruñeko eta Tuterako Hizkuntz Eskola Ofizialetako Frantseseko eta Ingeleseko 4. mailan. Ikaspostu horiek lortzen ahalko dituzte, orobat, programa horretako ikasle izanda, Oinarrizko Zikloko Agiria 2002-2003 ikasturtean lortu zuten ikasleek.
Erreserba horretarako eskabideen kopurua eskainitako ikaspostuena baino handiagoa baldin bada, zozketa bidez emanen dira ikaspostuak eta lehentasuna izanen dute Programaren barrenean Oinarrizko Zikloko Agiria ekaineko deialdian eskuratu duten ikasleek.
Ahalik eta ikasle kopururik handiena hartu ahal izateko, asistentziari buruz urrian izandako matrikula egiteko aparteko epe bat irekiko da azaroaren 15a baino lehen, eskabideen kopurua eta urriko asistentziari buruzko datuak oinarri hartuta, sortu diren bajak betetzeko eta, horrela, gela bakoitzeko 25 ikasleren ratioa izateko.
Ikastetxeak zikloak, txandak, mailak, taldeak, orduak etab. planifikatzeko irizpideak ezarriko ditu, Hizkuntza Eskola Ofizialen helburuen esparruaren barruan eskaintza benetako eskaerari egokitzeko, eta, behar izanez gero, behar diren lehentasunezko irizpideak finkatuko ditu.
B._Irakaslanak.
Irakasleen klaustroak ikastetxeko irakaslanak ezarriko ditu eta haien barruan ondoko hauek sartuko:
_Departamentu bakoitzaren programazioa.
_Ebaluazioak: ikasleen ikaste prozesuaren ebaluazioa da prozesu osoaren jarraipen sistematiko etengabea eta globala.
Ikasleei beren ikasketen errendimenduaren balorazio prozesuan izandako emaitzen berri emanen zaie aldian behin. Informazioa hiruhilekoan behin emanen da gutxienez. Programazioa lauhilekotan edo bestelako modalitateen arabera antolatua badago, gutxienez bi aldiz emanen zaie informazio hori.
Bai Oinarrizko Zikloko Agiria, bai Gaitasun Agiria eskuratzeko, beharrezkoa izanen da dagokion departamentuak prestatutako proba bat gainditzea. Oinarrizko Zikloko Agiriari dagokionez, proba bera eginen da Nafarroako Hizkuntza Eskola guztietan.
C._Jarduera osagarrien urteko programazioa.
Eskola kontseiluari dagokio eskolako jarduera osagarriak programatu eta burutzeko jarraibideak ematea. Zuzendaritza taldeak egindako programazioan kontuan hartuko dira departamentuen proposamenak.
D._Txosten administratiboa.
Zuzendaritza taldeak memoria administratiboa eginen du eta horretan, beste elementu batzuen artean, Ikastetxearen Antolaketarako Agiria (IAA) sartuko da.
Hezkuntza eta Kultura Departamentuak agiri horiek betetzeko inprimakiak igorriko ditu ikastetxeetara, horiek Zerbitzuak Ikuskatzeko eta Ikuskapen Teknikorako Zerbitzura bidal ditzaten ikasturteko irakaslanak hasi eta 20 eguneko epean.
2. Urteko programazio orokorra prestatu, onetsi eta ebaluatzea.
Ikastetxeko zuzendariari dagokio Urteko Programazio Orokorra modu egokian egitea bideratuko duen jarduketa egutegia ezartzea.
Eskola kontseiluak onetsiko du Urteko Programazio Orokorra, Irakasleen klaustroak txostena eman ondoren, eskola denbora hasi eta 20 eguneko epean, klaustroari dagozkion irakaskuntza kontuak errespetatuz. Programazio horren ale bat Zerbitzuak Ikuskatzeko eta Ikuskapen Teknikorako Zerbitzura bidaliko da urriaren 31 baino lehen; beste ale bat ikastetxearen idazkaritzan jasoko da, irakasleek eta eskola kontseilukideek azter ahal dezaten.
Zerbitzuak Ikuskatzeko eta Ikuskapen Teknikorako Zerbitzuak ikertuko du Urteko Programazio Orokorra egokitzen zaion jarraibide hauetan xedatzen denari, eta zer zuzenketa egin behar diren adieraziko du, behar izanez gero.
Urteko Programazio Orokorra ikastetxeko kide guztiek nahitaez bete beharrekoa izanen da.
Ikasturtea bukatzean, eskola kontseiluak eta zuzendaritza taldeak ebaluatu eginen dute Urteko Programazio Orokorra zenbateraino bete den. Ondoriorik aipagarrienak memoria batean jasoko dira eta hura Zerbitzuak Ikuskatzeko eta Ikuskapen Teknikorako Zerbitzura bidaliko da, uztailaren 10a baino lehen.
II._IRAKASLEAK
1. Lanaldia.
Irakasleek, oro har, Nafarroako Gobernuaren mendeko funtzionarioentzat finkatzen diren lan orduak izanen dituzte, beren irakasle lanerako egokituak. Irakasleentzat jaiegun izanen dira Nafarroako Foru Komunitateko Administrazioaren zerbitzuko langileen lan egutegian ere jaiegun direnak.
Ikasturtea irailaren 1ean hasi eta ekainaren 30ean bukatuko da.
Ikasturtean, irakasleek jarraibide hauetan finkatutako lanaldia eta ordutegia beteko dituzte.
Ekain-irailetako eskola gabeko lan egunetan, baimena ematen zaie irakasleei egunean ikastetxean egon beharreko bost orduko lanaldi etengabea egiteko, lanaldi zatituan programatutako jardueretan salbu.
Ikasturtearen gainerakoan eskola gabe izaten diren lanegunetan, zilegi izanen da egun horiei dagozkien orduak, 5 ordu eguneko, ikasturtean zehar konpentsatzea; hartarako, ikastetxeko irakasle guztientzako plan komun bat eginen da. Hori guztia irakaslearen ordutegi pertsonalean azalduko da, aparteko kasuetan izan ezik, horrelakoetan ikastetxeko zuzendariak baimendu beharko baitu; proposamen arrazoituaren bidez egin beharko da beti.
Irakasleek hogeita hamar ordu emanen dute astean ikastetxeko jardueretan, horietan sartuta irakastorduak eta ordu osagarriak, bai astean zenbatzekoak, bai urtean zenbatzekoak.
Irakasle bakoitzaren ordutegi pertsonalean asteko irakastorduak eta astean zenbatu beharreko orduak, 25 osotara, jasoko dira.
Asteko beste 5 orduak, urtean zenbatu beharreko ordu osagarritzat hartuko dira.
Gainerako orduak, ikastetxean egon beharrik gabekoak, ondoko zereginetan emanen dira:
_Irakasleen hobekuntza.
_Irakaslanen prestakuntza.
_Batzorde eta hautapen epaimahaietan parte hartzea edo antzeko eginkizunak, horietarako izendatzen direnean.
2. Orduen banaketa.
Ikastetxean bertan eman beharreko orduak honela banatuko dira:
A._Irakastorduak.
Oro har, irakasleek 18 irakastordu izanen dituzte astean, batez beste. Salbuespen gisa, 20 ordu izanen dituzte, gehienez, ikastetxearen ordu banaketak hala eskatzen duenean.
Irakasle batek hemezortzi irakastordu baino gehiago dituenean, kontuan hartuko da, betiere, irakasle bakoitzaren ordutegi pertsonalean agertu behar diren irakastorduen eta astean zenbatu beharreko ordu osagarrien batuketa 25 ordukoa izanen dela astean, ikasturtean dauden eskola gabeko lanegunengatiko konpentsazio orduak aparte utzita.
Irakastorduak zenbatzerakoan ondoko jarduera eta inguruabarrak hartuko dira kontuan:
a) Zuzendaritza taldea.
Zuzendaritza taldeak, bere irakastorduetatik gehienez ere honako ordu kopurua emanen du karguen eginkizunetan, matrikulatutako ikasle ofizialen kopuruaren arabera:
_Iruñeko H.E.O.:
Zuzendaria, ikasketaburua eta idazkaria, batez beste 13,5 ordu astean, alegia, gutxienez talde bati eman behar diote eskola.
Zuzendariordea, batez beste 4,5 ordu astean, alegia, gutxienez hiru talderi eman behar die eskola.
_Tuterako H.E.O.:
Zuzendaria, ikasketaburua eta idazkaria, irakastegun erdia astean, alegia, gutxienez bi talderi eman behar diete eskola.
b) Departamentuko buru eta koordinatzaileak.
Departamentuko buru eta koordinatzaileek gehienez ere 4,5 ordu erabiltzen ahalko dute astean curriculumeko materialen programazio, prestaketa eta eguneratzearen jarraipena eta ebaluazioa zuzentzeko.
c) 58 urtez goitiko irakasleak.
Lanaldi osoa duten 58 urtez goitiko irakasleek zilegi izanen dute, nahi badute, beren irakastorduak murriztea, gehienez ere 5 ordu kenduz, nahiz horrek ez duen esan nahi astean ikastetxean egon beharreko orduak gutxituko direnik. Salbuespenez eta ikastetxeak hala behar duenean, murrizte hori ezinezkoa denean, ukatutako murrizte ordu bakoitza, bi ordu osagarritzat kontatuko da interesatuaren ordutegi pertsonalean.
Borondatezko murriztapena aipatu adina betetzen den urte naturalean hasten den ikasturtetik aurrera aplikatu ahalko da, eta zuzendaritza edo didaktika arloko karguetan aritzeagatik onartzen diren beste ordu murriztapen batzuekin bateraezina izanen da. Beraz, 58 urtez goitiko irakasle bat departamentuburua baldin bada, asteko irakastorduetatik hartzen dituen 5 ordu horiek departamentuaren burutzak dituen eginkizunetarako erabiliko ditu.
Adina dela kausa eskola ordutegiaren murriztapena duten 58 urtetik gorako irakasleek, 65 urte betetzearekin batera, murriztapen hori egiteko eskubidea galduko dute, baldin eta zerbitzu aktiboan segitzea eskatzen badute; horretan salbuespen izanen dira erretiro sariaren % 100 jasotzeko behar den gabealdia ez badute.
B._Astean zenbatu beharreko ordu osagarriak.
Astean zenbatzeko ordu osagarrietan, irakasle bakoitzari esleituriko eginkizunen arabera, ondoko hauek sartu ahalko dira:
_Guardiako orduak.
_Astean ordu bat departamentuaren bileretarako.
_Astean bi ordu, gehienez, ikasleei eta, hala behar izanez gero, gurasoei kasu egiteko.
Aurreko ataletan aipaturiko ordu osagarrietan garatu beharreko jarduerak behar den bezala egiten badira, batez ere guardiako orduak, irakasleek, bakoitzaren ordutegi pertsonalean agertu behar diren asteko 25 orduetara ailegatu arte, ondoko ordu hauek sartzen ahalko dituzte astean zenbatu beharreko ordu osagarrien artean, irakasle bakoitzari esleitutako jardueren arabera:
_Astean batez beste 2 ordu, gehienez, koordinazio didaktikorako eta Klaustroetarako.
_Astean ordu bat irakasleek eskola kontseiluan dituzten ordezkarientzat.
_Gainerako orduak, asteko 25eko zenbatekoa egin arte, Zuzendaritzak banatuko ditu, departamentuko lanak egiteko, liburutegia, laborategiak, ekipo teknikoak, irakaskuntzarako materiala zaintzeko, etab.
Dena den, oinarritzat hartuta jarduera osagarrietarako orduen moduluek irakaslanetakoekin bat etorri behar dutelako printzipioa, Zuzendaritza Taldeak, Eskola bakoitzaren premien arabera, saio motzagoak onartzen ahalko ditu jarduera osagarriak egiteko, baina jarduera horiek, betiere, ordu erdikoak izanen dira gutxienez.
C._Guardiak.
Ikastetxea, eta, hortaz, zuzendaria, ikasleen arduraduna da eskolako orduetan; beraz, ikastetxean une oroz behar adina irakasle izan behar da guardiei egoki kasu egiteko.
Ordu guztiak behar den bezala beterik baldin badaude, zuzendariak zilegi izanen du guardiako irakasleren bati beste zeregin batzuk ematea, adibidez, liburutegian, laborategietan etab.
Guardiako irakaslearen eginkizun nagusiak hauek dira:
a) Irakasleak huts egiteagatik edo beste edozein arrazoirengatik zaindaririk ez duten ikasleei kasu egitea.
Irakasleren batek aurrez baldin badaki huts eginen duela, antolaturik utziko du ikasleek zer lan egin behar duten gelan, eta ikasketaburuari emanen dio laneko plan hori.
b) Beren txandan sortzen diren gorabehera guztiak ebaztea, bai eta ikastetxeko norbait mediku beharrean gertatuz gero hartarako behar direnak egitea ere; horrez gain, ikasketaburua lehenbailehen jakinaren gainean jarri beharko du.
c) Beren txandan irakasleek duten puntualitate eta asistentziaren berri ematea idatziz, klaseei, guardiei, liburutegiari eta bestelako jarduerei dagokienez.
Ikasketaburuak guardien eguneroko kontrola eginen du. Guardiei buruzko txosten bat eginen du astean, eta horretan, gutxienez, honako datuak sartuko ditu:
(a) Irakasleen falta eta atzerapenak.
(b) Ikastetxeko edozein egoitzatan izan diren gorabeherak.
(c) Gertatu diren istripuak.
(d) Guardiako irakasleen sinadurak.
Guardietarako adierazten diren helburuak betetzen baldin badira, aurretik Zerbitzuak Ikuskatzeko eta Ikuskapen Teknikorako Zerbitzuak eta eskola kontseiluak txostena emanik, ikastetxeak zilegi izanen du guardietarako plan berariazko bat ezartzea.
Irakasleek guardia lana eginen dute asteko zenbait ordutan, ikastetxearen beharren arabera. Nolanahi ere, kontuan hartu behar da irakasle bakoitzaren asteko ordutegian irakastorduak eta ordu osagarriak batuta hogeita bost ordu izanen direla astean guztira, ikasturtean irakastegunak ez diren lanegunengatiko konpentsazio orduak alde batera utzita.
Arreta berezia edo guardiak modu desberdin batez egitea eskatzen duten egoeretan, ikastetxeko zuzendariak edo ikasketaburuak zilegi izanen du irakasle batzuk eskatzea guardiako ordu horiek betetzeko.
D._Urtean zenbatu beharreko ordu osagarriak.
Irakasle bakoitzak ikastetxeko jardueretarako astean eman behar dituen 30 orduak betetzeko, norberaren ordutegian agertu behar duten asteko 25 orduak aparte utzita, gainerako bostak urtean konputatuko dira, irakasle guztiek nahitaez egin behar dituzten lanak egiteko, alegia, ikasle libreen azterketak ekain-irailetako deialdietan prestatu, egin eta zuzentzeko, hala nola ikasle berriak hartzeko eskola kontseiluak erabakitzen dituen probei dagozkienak eta departamentuetako gainerako eginkizunak.
3. Ordutegiak egitea.
Ikasketaburutzak, departamentuburuei kontsulta egin ondoren, hizkuntza eta txanda bakoitzari zenbat talde dagozkion jakinaraziko die departamentuei; orobat, Zerbitzuak Ikuskatzeko eta Ikuskapen Teknikorako Zerbitzuak departamentu bakoitzarentzat jarritako irakasleen kopuruaren berri ere emanen die.
Departamentuek aparteko bilkura bat eginen dute kurtsoak beren irakasleen artean banatzeko, betiere klaustroak ezarritako irizpide pedagogikoak eta jarraibide hauetan ageri direnak errespetatuz.
Banaketa honela eginen da:
A._Txanda eta kurtsoen banaketa.
Eskola goiz eta arratsaldez ematen duten ikastetxeetan, departamentu bakoitzeko irakasleek erabakiko dute bakoitza zein txandatan arituko den, goizez edo arratsaldez.
Ordutegiak egiten direnean ikastetxeko zuzendaritzak kontuan hartuko du klaseak unibertsitatean ere ematen dituzten irakasleen egoera, ordutegi bateragarriak izan ahal ditzaten; horrek ez du esan nahi irakasle horiek Hizkuntza Eskola Ofizialean bete behar duten ordutegian murrizketarik egin daitekeenik.
Irakasleren batek ezin baldin badu aukeratutako txandan bere ordutegia osatu, bestean osatu beharko du.
Departamentuko irakasleak ados jartzen ez badira, txanda aukeratuko da "Irakasleak" izeneko II. ataleko 3.2. idatz-zatian ("Aukeratzeko hurrenkera") finkaturiko ordenari jarraikiz.
Txanda aukeratu ondoren, departamentuko irakasleek kurtsoen banaketa eginen dute.
Adostasunik lortu ezean, honela jokatuko da: aipatu 3.2. puntuan ezarritako hurrenkerari jarraikiz, aurrena hautatu behar duen irakasleak, eman nahi duen mailako talde bat aukeratuko du; ondoren, bigarren hautatu behar duen irakasleak aukeratuko du beste bat, eta horrela, hurrenez hurren, bertan dauden irakasle guztiek lehenbiziko aukera egin arte.
Lehen txanda hori amaitutakoan, beste batzuk eginen dira, irakasle guztiek irakastordu guztiak osatu edo departamentuari dagozkion talde guztiak esleitu arte.
Bilera berezi horretan izaten diren gorabehera guztien akta eginen da eta departamentuko kide guztiek sinatuko dute; ikasketaburuari aktaren kopia emanen zaio.
B._Aukeratzeko hurrenkera.
Aukera egiteko honela jokatuko da:
a) Hizkuntza Eskola Ofizialetako irakasle katedradunak, ikastetxean behin betiko destinoa dutenak.
b) Hizkuntza Eskola Ofizialetako irakasleak, ikastetxean behin betiko destinoa dutenak.
c) Hizkuntza Eskola Ofizialetako irakasleak, destinoaren zain daudenak.
d) Azken oposizio-lehiaketa gainditu duten oposiziogileak.
e) Zerbitzu-eginkizunetan dauden Bigarren Hezkuntzako Irakasleak.
f) Funtzionarioak eta lan kontratu mugagabea dutenak, prestakuntzarako zerbitzu bereziak egiten ari direnak.
g) Administrazio edo lan araubidean dauden aldi baterako kontratudunak.
Arestiko a), b) eta c) idatz-zatietan, taldeak hautatzeko lehentasuna kidegoan duten antzinatasunak ezarriko du (borondatezko eszedentiak kontatu gabe), eta antzinatasuna berdina baldin bada, idatz-zati bakoitzaren lehentasun ordena ezartzeko, honako irizpide hauek aplikatuko dira bata bestearen atzetik:
_Ikastetxean antzinatasun handiena.
_Kidegoan sartzeko urtea (zaharrena aurretik).
_Hautapen prozeduretan puntu gehien izatea.
d) idatz-zatian, taldeak hautatzeko lehentasun ordena ezartzeko, prozesua gainditu zuten oposiziogileen ebazpenetan agertzen den ordenari segituko zaio.
e) eta f) idatz-zatietan, berriz, lehentasun ordena ezartzeko, Giza Baliabiden Zerbitzuan ageri diren zerrendetan egokitu zaien ordenari segituko zaio.
C._Ikasketaburutzak ordutegiak egitea.
Departamentuek egindako txanda eta mailen banaketa ikusirik, Ikasketaburutzak ikasle eta irakasleen ordutegiak eginen ditu, irakaskuntzari buruz Klaustroak finkatzen dituen irizpideei eta Urteko Programazio Orokorrean agertzen direnei jarraikiz.
Ikasketaburuak departamentukide guztien irakastorduak Jarraibide hauetan finkatutakoari egokitzen diren egiaztatuko du; halaber, ikasle talde guztiek irakaslea duten edo bete gabeko ordu libreak dituen irakaslerik ote dagoen begiratuko du.
Irakasleen irakastorduak astearen egun guztietan banatuko dira, gehienez 5 klase egunean, kontratu partziala duten irakasleak salbu.
D._Irakasleen ordutegi pertsonala.
Irakasleek ikastetxeko jardueretan astean eman beharreko 25 orduak paratuko dituzte horretarako prestatutako inprimakian, bai eta ikasturtean zehar irakastegunak ez diren lanegunen ordu konpentsazioak ere.
Halaber, ikastetxe bakoitzeko irakasleek ordu beretan beteko dituzte ikastetxean sartu beharreko orduak, irakaslanak koordinatzearren edo, bestela, gutxienez 5 ordu bi ostiraletik behin, goizez, helburu berberarekin.
Zuzendaritza taldeko kideak diren irakasleen ordutegian irakaslaneko edo zuzendaritza karguaren laneko orduak sartuko dira astearen egun guztietan.
Azken azterketak-arruntak eta apartekoak-egiteko ezarritako egunetan, irakasleek beren ordutegia egokituko dute azterketak egiteko programatutako egutegiaren arabera.
4. Ordutegia onetsi eta jakinaraztea.
Zerbitzuak Ikuskatzeko eta Ikuskapen Teknikorako Zerbitzuak ordutegia onetsiko du, nahitaez bidaltzeko azken egunetik 10 eguneko epean; bitartean, irakasleek ikasketa-buruak egin eta zuzendariak behin-behinekoz onetsitako ordutegia bete beharko dute. Horri buruz aurkezten den edozein erreklamazio, Zerbitzuak Ikuskatzeko eta Ikuskapen Teknikorako Zerbitzuak ebatziko du.
Ikastetxearen egoerari buruzko informazioa, bereziki irakasle guztien ordutegia eta lantokia, bai irakastorduei buruz, bai guardiakoei buruz, departamentuko bilerak etab., irakasleen gelako iragarki oholean, ikasketaburutzakoan eta ikastetxeko estamentu guztiek sartzea duten beste lekuren batean egonen da denbora guztian ikusgai.
Informazio hori guztia hezkuntza komunitate osoko kide guztien eskura egonen da. Era berean, zuzendaritza kargu bakoitza ikastetxean zein ordutan egonen den ere adieraziko da.
5. Irakasleek ordutegia betetzea eta asistentzi partea.
Zuzendaritza taldeak irakasleak ikastetxean egoten diren kontrolatu behar du, baita ekaineko eta iraileko eskola gabeko egunetan ere. Halaber kontuan hartuko du, eta horren berri emanen Zerbitzuak Ikuskatzeko eta Ikuskapen Teknikorako Zerbitzuari, lan araubideko kontratudunak zein egunetan hasi diren ikastetxean.
Ikastetxeetako zuzendariek, aurreko hilabeteko asistentzi parteak bidali behar dizkiote Zerbitzuak Ikuskatzeko eta Ikuskapen Teknikorako Zerbitzuari, hilabete bakoitzaren 5a baino lehen, ikastetxeetara bidaliko diren ereduak erabiliz.
Ikastetxean nahitaez egoteko orduei buruzko ausentzien eta atzerapenen berri emanen da ohiko ereduetan, kontuan hartuta bakoitzaren ordutegi pertsonala eta alde batera utzita ausentzia justifikatuta dagoen ala ez.
Nolanahi ere, txosten horietan ondoko arau hauek beteko dira:
_Inoiz ez da utziko hutsik "hutsegitearen arrazoia" laukia, eta hala egiten bada, justifikatu gabeko hutsegitetzat hartuko da.
_Hutsegite guzti-guztiak agertuko dira.
_"Hutsegitearen arrazoia" izeneko laukian "Norberaren arazoetarako ordaindu gabeko lizentzia" jarri ahal izateko, beharrezkoa izanen da Giza Baliabideen Zerbitzuak irakasleari baimena ematea.
Halaber, norberaren ordutegian agertu ez arren, irakasleek egin dituzten jarduera osagarriak aipatuko dira.
Jarduera bakoitzean, parte hartu duten irakasleen eta emandako orduen berri emanen da.
Irakasleek beren lanetan gertatzen den edozein ausentzia edo atzerapenen berri emanen diote ikastetxeari, ahalik eta lasterren.
Zuzendariak, justifikazioa aurkezteko epea amaitu eta biharamunean aditzera emanen dio Zerbitzuak Ikuskatzeko eta Ikuskapen Teknikorako Zerbitzuari edozein hutsegite nahiz atzerapen, ikasketaburuari justifikatu gabekoa iruditzen zaiona, bere lansaritik tokatzen den kenketa egiteko eta, hala behartzen bada, espedientea hasteko. Kasuko irakasleari ere emanen zaio, idatziz, horren berri.
Irakasleek hutsegitearen justifikanteak aurkeztu behar dizkiote zuzendariari, horrek eskatu gabe.
Asistentzi partearen kopia bat jendaurrean paratuko da, ikusgai, irakasle gelan hil bakoitzaren 5a baino lehen. Beste kopia bat eskola kontseiluaren esku jarriko da.
Irakasleen hutsegiteen justifikanteak (baja agiriaren kasuan, haren kopia edo fotokopia) ikastetxeko zuzendaritzan geldituko dira Zerbitzuak Ikuskatzeko eta Ikuskapen Teknikorako Zerbitzuaren eskura.
Eskola emate normalaren alterazio guztiak berehala emanen zaizkio aditzera telefonoz Zerbitzuak Ikuskatzeko eta Ikuskapen Teknikorako Zerbitzuari, eta ondoren asistentzi partean jasoko dira.
III._IRAKASLANAK KOORDINATZEKO ORGANOAK
1. Departamentuak.
Departamentuak lan taldeak dira eta haien ardura eta zuzendaritza departamentuburuari dagozkio, eta hori ez badago, ikasketaburuari. Ongi jarduteko, beharrezkoa da kide guztien lan koordinatua.
A._Departamentuen kopurua.
Hizkuntza Eskola bakoitzean, departamentu bat eratuko da irakasten den hizkuntza bakoitzeko.
Ikastetxeko irakasle guztiak departamentu bati atxikirik egonen dira, ordu gehienak ematen dituzten irakasgaiari dagokionari, hain zuzen, eta bertan antolatzen diren bilkuretara joan beharko dute.
B._Departamentuaren eginkizunak.
Departamentuaren eginkizunen artetik azpimarratzekoak dira programazioa prestatzea eta haren betetze maila begiratzea ikasturtean zehar, hala nola ikasturte amaierako memoria egitea.
a) Programazioa.
Departamentu bakoitzak, irailean, hurrengo ikasturteko jarduketa plana egiteko behar diren bilkurak eginen ditu eta bertan bilkuretarako plangintza, departamentukoak edo mailen araberakoak, azalduko. Orobat, programazioak egin eta eguneratuko dituzte.
Departamentuek, programa ofizialak oinarritzat hartuta, zilegi izanen dute horiek egokitu eta moldatzea, lan programaren eta diseinatutako programazioen arabera. Hezkuntza eta Kultura Departamentuak, Zerbitzuak Ikuskatzeko eta Ikuskapen Teknikorako Zerbitzuaren bidez, batzuen eta besteen artean desoreka handirik gertatzen ez dela begiratuko du.
Programazioaren barruan, baterako programazioari buruz departamentuko irakasleek sartu behar dituzten berezitasunen berri emanen da; haien justifikazioa ere azalduko da. Berezitasun horiek helburuei, edukiei eta denboraren banaketari buruz finkatutako gutxieneko arauak errespetatuko dituzte.
Programazioan ondoko alderdi hauek bilduko dira nahitaez:
(a) Helburuak, edukiak eta denboraren banaketa.
(b) Metodologia.
(c) Ebaluazioa: etengabeko ebaluazio sistematikoan ondoko atalak bilduko dira:
_Ebaluaziorako irizpideak.
_Ikasturtean zehar ikasleek zer ikasten duten ebaluatzeko bideak.
_Errekuperatzeko sistemak.
_Mailaz pasatzeko irizpideak, bereziki aipatuz eskatu beharreko minimoak, hala nola ikasle ofizialak eta libreak kalifikatzeko irizpideak.
Departamentuburuak, Departamentu bakoitzeko programazioa prestatzeko arduradun nagusia den aldetik, haren ale bat emanen dio ikastetxeko zuzendariari urriaren 10a baino lehen. Zuzendariak, programazioa aztertu ondoren, puntu honetan ezarritakoaren araberakoa baldin bada, Ikastetxearen Urteko Programazio Orokorrean sartuko du gainerako departamentuetako programazioekin batera, eta Zerbitzuak Ikuskatzeko eta Ikuskapen Teknikorako Zerbitzura igorriko du.
Departamentuaren programazioa puntu honetan ezarritakoaren araberakoa ez bada, ikastetxeko zuzendariak Departamentura bidaliko du hor beste bat egin dezaten.
Departamentuan programazioaren bi kopia geldituko dira gutxienez, bata ikastetxeko gobernu organoen esku, hala pertsona bakarrekoak nola kolegiatuak, eta bestea departamentuaren esku, eta haren kopia bana emanen zaie departamentukideei.
b) Ikasturte bukaerako memoria.
Ekainean, departamentuko kideek bilkura eginen dute ikasturte bukaerako memoria egiteko eta bertan ondoko alderdi hauen berri emanen:
(a) Emaitzen balorazioa:
_Kalifikazioen estatistikak, talde eta mailen arabera.
_Ikasleen errendimenduaren azterketa, haren faktoreak azalduta.
(b) Funtzionamenduaren balorazioa:
Programazioaren garapenaren azterketa, bereziki ondoko alderdi hauena:
_Garatutako helburu, eduki eta jardueren balorazioa, programazioa betetzeko erabilitako metodologia eta baliabideena, taldeen antolaketa eta funtzionamenduarena; halaber, agertu diren akatsen arrazoia azaldu eta zuzenketak proposatu beharko dira.
_Ikasleen ebaluazioa egiteko erabili diren irizpide, prozedura eta jardueren balorazioa, baita ikasle libreentzako probena ere.
_Egindako jarduera osagarrien azalpen eta balorazioa.
"Departamentuaren bilkurak" izeneko 1.3. puntuan azaldu bezala, departamentuburuak ekainaren 30a baino lehen emanen dio ikastetxeko zuzendariari ikasturte bukaerako txostenaren ale bat.
c) Bestelako eginkizunak.
Departamentuei dagokie hezkuntzaren arloko ikerketak egitea eta kideen hobekuntza zientifikoa eta didaktikoa, ebaluazioa egiteko irizpide bateratuak prestatzea, jarduera osagarriak antolatu eta egitea eta ikasle libreen azterketak egitea, proba berberekin egin eta aurrez finkatutako irizpideei jarraikiz zuzenduko baitira.
C._Departamentuaren bilkurak.
a) Irailean, departamentuek behar diren bilkurak eginen dituzte iraileko ebaluazioen emaitzak aztertu eta hurrengo ikasturteko jarduketa plana eta irakasgaien programazioa egiteko.
b) Ikastetxeko ordutegiaren barruan, astean ordu bat utziko da gutxienez, batez beste, departamentuko kide guztiak bil daitezen, eta ordu hori ikastetxeko eskola ordutegiaren barruan egonen da.
Bilkura horretan, kurtsoen programazioaren garapena aztertu, behar den materiala elkarrekin prestatu, emaitzak aztertu curriculumaren helburuei jarraikiz, ebaluaziorako irizpideak adostu eta zehaztu, eta ezartzen diren gainerako eginkizunak burutuko dira.
c) Ekainean, departamentuko kideek behar diren bilkurak eginen dituzte jarduketa plana eta programazioak aztertu eta hurrengo ikasturteari begira egin beharreko zuzenketak proposatzeko; hori guztia ikasturte bukaerako txostenean sartuko da eta txostena ikastetxeko zuzendariari emanen zaio ekainaren 30a baino lehen; Zuzendaritzak Urteko Programazio Orokorrari buruzko txostenean sartuko du informazio hori, ikastetxe guztiek Zerbitzuak Ikuskatzeko eta Ikuskapen Teknikorako Zerbitzura uztailaren 10a baino lehen igorri behar duten horretan, hain zuzen.
Bilkura bakoitzaren akta jasoko da departamentu guztiek izan behar duten akta liburuan. Departamentuburuak akta horiek egin eta sinatuko ditu.
d) Departamentuko dokumentazioa. Departamentu guztiek liburu bat osatuko dute egindako bilkura guztien aktekin.
Halaber, departamentuek inbentario liburua eguneratua izanen dute eta bertan material inbentariagarri guztien zerrenda azalduko.
Departamentuan, ikasturtean zehar ikasleen ebaluazioa egiteko erabili diren proba eta dokumentuak gordeko dira; ikasturtearen bukaeran eta ikasleen erreklamazioak aurkezteko epea amaituta, botatzen ahalko dira.
D._Departamentuburutza.
a) Izendapena.
Departamentu bakoitzean buru bat izendatuko da.
Ikastetxeko zuzendariak eginen du izendapena eta ezin izanen zaio izendapenari uko egin.
Departamentuburuaren kargua hurrenkera honen arabera beteko da:
(a) Hizkuntza Eskola Ofizialeko irakasle katedraduna, ikastetxean behin betiko destinoa izanik, katedradun izaeraren antzinatasun handiena duena.
(b) Katedraduna den irakaslerik ez badago, zuzendariak, departamentuaren iritzia jakin ondoren, departamentuburua izendatuko du kideen artean, eta kargua ikastetxean behin betiko destinoa duen irakasle bati emanen zaio, horrelakorik baldin badago.
Departamentuburuaren kargua zuzendaritza taldeko kide bati egokitzen zaionean, zuzendariak beste irakasle bat izendatuko du departamentuburu izateko, arestian aipatu prozedurari jarraikiz.
Izendapena irailean eginen da eta ikasturte bat iraunen du.
Departamentuburuak proposaturik eta departamentuen barrenean eskola hartzen duten ikasle taldeen kopuruaren arabera (moduluak alde batera utzita), zilegi izanen da haien koordinatzaileak izendatzea.
Irakaskuntza arautuetako (ez modulu edo irakaskuntzaren bestelako modalitateetako ) 24 ikasle talde baino gehiago dituzten departamentuetan koordinatzaile bat izendatuko da. 50 talde baino gehiago dituzten departamentuetan, bigarren koordinatzailea izendatzen ahalko da.
Departamentuetako koordinatzaileek, departamentuburuak kideen proposamenak kontuan hartuta esleitzen dizkien eginkizunak beteko dituzte. Departamentuko aktetan eginkizun horien berri emanen da.
Ikastetxeko zuzendariak izendatuko ditu koordinatzaileak.
b) Erantzukizunak.
Organo horien zeregina elkarlanean egin beharrekoa da, eta zenbait lan, adibidez, ikasle libreentzako probak prestatu eta zuzentzea, estatistikak egitea etab., departamentuko kide guztien eginkizunak dira. Departamentu bakoitzeko burua da zeregin horien erantzukizuna duena eta departamentuko elkarlana koordinatu eta zuzendu behar duena.
Departamentuburuak ondoko eginkizun hauek izanen ditu:
a) Departamentuko jarduerak zuzendu eta koordinatzea.
b) Bilerak antolatu, prestatu eta zuzentzea, hala nola aktak idatzi eta sinatzea. Aktak akten liburuan bilduko dira nahitaez.
c) Irakasgaiaren programazioa eta ikasturte amaierako memoria prestatu eta koordinatzea, hala nola programazioa betetzen dela begiratzea edukiei eta eskatzen diren gutxieneko mailei dagokienez. Nahikotasun proba bat antolatuko da maila ohiko deialdian gainditu ez dutenentzat.
d) Departamentuak ekainean eta irailean egindako proben kalifikazioak gainbegiratzea.
e) Ikasle libreen azken proben prestaketa eta antolaketa koordinatu eta zuzentzea.
f) Ikasleak ebaluatzeko prozesuan erreklamazioak aurkezteko prozedura betetzen dela bermatzea, indarra duten arauei jarraikiz.
g) Inbentario liburua eguneratzea.
h) Ikasleen balorazioa egiteko erabili diren proba eta dokumentuen zainketa bermatzea.
i) Departamentuan gertatzen den edozein akatsen berri ematea zuzendariari edo ikasketa-buruari.
j) Hobekuntza pedagogikoa bultzatzea, aldian behin egiten diren bilerak Departamentuko kideen prestakuntzarako lagungarriak izan daitezen.
2. Informatikako koordinazioa.
Bi Hizkuntza Eskola Ofizialetan, Iruña eta Tuterakoan, horretarako prestakuntza duten langileak baldin badaude, informatikako koordinatzaile bat izendatzen ahal da. Informatikako koordinatzailea klaustroko irakasle bat izanen da, zuzendariak eskuordeturik, ondoko eginkizun hauek burutuko dituena: baliabide informatikoak erabiltzeko irakasleei laguntza eman, Hezkuntza Zuzendaritza Nagusiaren Teknologia Berrien Programarekin harremanak ezarri eta Eskolan dagoen materiala gainbegiratu eta zaintzea.
Ikastetxeko zuzendariak izendatuko du informatikako koordinatzailea, ikasturte batez, arestian aipatu baldintzak betetzen dituzten klaustroko irakasleen artean.
Informatikako koordinatzaile gisa aritzen den irakasleak, araubide arruntean ikasle talde bati eskola emateko erabiltzen den denbora erabiltzen ahal du koordinatzaile karguaren eginkizunetarako; zuzendaritza taldeak esleitzen dizkion zereginen arabera, zilegi izanen da denbora hori luzatzea, araubide arruntean bi ikasle talderi eskola emateko denborara ailegatu arte.
Koordinatzaileak ondoko eginkizun hauek izanen ditu:
a) Koordinazio eginkizunak:
_Ikastetxeko zuzendariaren eskuordetzaz, Hezkuntza Zuzendaritza Nagusiaren Teknologia Berrien programarekin harremanak izatea.
_Departamentuburuei aholkuak ematea, baliabide informatikoak modu koordinatuan erabil daitezen hizkuntza guztietan.
_Baliabide informatikoei erabilera berriak emateko irizpideak proposatzea ikastetxeko zuzendaritzari.
b) Sostengu teknikoko eginkizunak:
_Baliabide informatikoen egoera operatibo egokia zaintzea; horretarako, instalazio eta ekipo informatikoak gainbegiratu eta aurreikusitako jarduerak burutzeko behar diren programen erabilgarritasuna bermatuko du.
c) Irakaslanak sustatu eta bideratzeko eginkizunak:
_Departamentuei hizkuntzak irakasteko teknologia informatikoaren erabilerari buruzko aholkuak ematea.
_Programa didaktikoak, aplikazio orokorrekoak eta bereziak, dagozkien departamentuei aurkeztea.
_Hezkuntzaren arloko informatikari buruzko informazioa zabaldu eta horren gaineko dokumentazioa erabiltzeko bidea ematea.
_Departamentuei aholkuak ematea, haien kideen interes eta premiei komeni zaien prestakuntza modalitateei buruz.
d) Administrazio eginkizunak:
_Ikastetxeko zuzendaritza aholkatzea baliabide berekiak erosterakoan, hezkuntza administrazioaren irizpideei jarraikiz.
_Ikastetxeko zuzendaritzari laguntza ematea baliabide informatikoen inbentarioa egin eta zaintzeko, hala nola ikastetxeak unitate eta aplikazio informatiko orokorretarako eman duen aurrekontua kudeatu eta Hezkuntza Zuzendaritza Nagusiaren Teknologia Berrien Programarekin koordinatzeko.
IV._IKASLEEN ESKUBIDE ETA BETEBEHARRAK
1. Ikasleen asistentzia.
Ikasle ofizial guztien eskubidea eta betebeharra da eskoletara joatea, eta inoiz ez da zilegi izanen borondatezko asistentzia duen sistemarik ezartzea ikaslea matrikulaturik dagoen irakasgaietan.
Zenbait egun jakinetan arrazoi batengatik edo bestearengatik ikasle gutxi egonagatik ere, ikastetxeak eta irakasleek normalki eman beharko dituzte eskola horiek.
Irakaskuntza espezializatuen lehenbiziko maila antolatzeko irailaren 2an emandako 967/1988 Errege Dekretuaren 4 eta 5. artikuluetan (irailaren 10eko EAO), metodologia aktiboa eta praktikoa aplikatzeko beharra ezarri zen hizkuntzen irakaskuntza ofizialen berezko helburuak erdiesteko, eta aplikazio horren ondorioz, ezinbestekoa da ikaslearen asistentzia jarraia, bestela ezinezkoa baita haren aurrerapena aztertzea, ez eta, beraz, zenbat ikasten duen ebaluatzea.
Kontuan harturik arestian aipatutakoa eta dagoen eskari handia, gutxienez, asistentziaren % 70 eskatuko zaie ikasleei, etengabeko ebaluaziorako eskubidea izan eta ikastetxean segitu ahal izateko.
Horretarako, irakasle bakoitzak talde bakoitzeko ikasleen asistentziaren egoera orri bat bete eta ikasketaburuari emanen dio hilero. Orri hori behar bezala sinatu ondoren ikasketaburuari eman beharko zaio, ondoko hilabeteko lehenbiziko eskola egunean, hark espresuki eskatzen ez badu ere.
Ikastetxeko zuzendaritzak hiru hilabetean behin jakinaraziko die ikasleei hutsegiteen kopurua, Ikastetxeak ezartzen duen prozeduraren bitartez.
Hutsegiteek urteko irakastorduen % 30 gainditzen badute, ikasleak ez du etengabeko ebaluazioa izanen eta azken proba egin ahalko du bakarrik. Gainera, hizkuntza horretan ikaspostua gordetzeko eskubidea galduko du, hurrengo bi ikasturteetarako. Matrikula ofizial berria egin nahi baldin badu, aurreinskripzioa egina zutenak matrikulatu ondoren egiten ahalko du, bete gabeko ikaspostuak gelditzen badira, zehazten den epearen barruan.
Hala ere, zerrenda argitaratu eta bost egun balioduneko epean, osasun edo lan arrazoiak alegatzen ahalko dira, eskola kontseiluaren ustez justifikatuak badira. Horretaz gain, behar bezala egiaztatutako kasuetan, ondokoak onartuko dira: graduondoko espezializazio praktikaldiak (enpresetan edo instituzioetan aritzeko bekak edo kontratuak, unibertsitateko lan praktikaldiak), laneko oporrak, laneko baimena ezkontzeagatik, amatasun baja, Erasmus programak eta ikasketetako prestakuntza bekak.
Ikastetxeetako barne araubiderako erregelamenduak atal honetan zehaztutakoa garatuko du.
Dena den, ikasle batek zilegi du matrikulari uko egitea, matrikula egin ondoren gertatutako arrazoi justifikatuak direla eta, ezin denean eskolara joan, eranskin honetako "Bestelako jarraibideak" izeneko V. ataleko 4. puntuan ("Matrikulari uko egitea") ezarritakoari jarraikiz.
Hizkuntza baterako plaza erreserbatzeko eskubidea galtzeak ikasmaila errepikatzeak dituen ondorio berberak ekarriko ditu.
2. Ikasleek kalifikazioei buruz erreklamazioak egiteko eskubidea.
Ikasleei beren errendimendu akademikoaren balorazio objektiboa bermatzeko, beharrezkoa da ikasleek aurretik izatea helburuen, edukien eta ebaluazio irizpideen berri, hala nola balorazio positiboa izateko eskatutako gutxieneko emaitzena, kalifikazio irizpideena eta ikasketak ebaluatzeko ikasturtean erabiliko diren prozedurena.
Irakasle titularrak ikasleek, haien gurasoek edo legezko ordezkariek programazio didaktikoei buruz eskatzen dituzten argibideak emanen dizkie. Ebaluazioa egiteko tresnei buruzko informazioa ere emanen die eta ikasleek zilegi izanen dute egin dituzten idatzizko proba, ariketa eta lanak ikusi eta irakaslearekin batera aztertzea.
Ebaluazioa egiteko tresnak azken erabaki edo kalifikazioak hartu ondoko hiru hilabeteetan gordeko dira gutxienez.
Ikasle guztiek eskubidea dute beren kalifikazioan eragina izanen duen edozein azterketa edo proba idatzi zuzenduta eta kalifikatua ikusteko.
Ikasleek, haien gurasoek edo legezko ordezkariek zilegi izanen dute balorazio eta kalifikazioei buruzko argibideak eskatzea. Informazio hori eman ondoren ados ez badaude izandako azken kalifikazioarekin, hura berriz aztertzeko eskatzen ahalko diote idatziz ikasketaburuari, jakinarazpena egin eta bi egun balioduneko epean.
Azken kalifikazioa eta/edo agiria eskuratzekoa berraztertzen baldin bada, departamentu didaktikoek edo, kasua bada, epaimahaiek, hurrengo egun baliodunean, berraztertzeko eskakizunak ikusi eta dagozkien txostenak eginen dituzte. Txostena ikasketaburuari igorriko zaio eta horrek kopia bat bidaliko die ikasleei edo haien gurasoei.
Ikastetxeetan berraztertzeko prozesua agortzen duten ikasleek zilegi izanen dute, dela nork bere kasa, dela guraso edo tutoreen bitartez, ikastetxeko zuzendariari eskatzea erreklamazioa Zerbitzuak Ikuskatzeko eta Ikuskapen Teknikorako Zerbitzura igor dezala, azken jakinarazpena egin eta bi eguneko epean.
Ikastetxeko zuzendariak, gehienez ere hiru eguneko epean, espedientea bidaliko du Zerbitzuak Ikuskatzeko eta Ikuskapen Teknikorako Zerbitzura. Hezkuntza zuzendari nagusiaren ebazpena, administrazio bideari amaiera emanen diona, hamabost eguneko epean emanen da, espedientea jasotzen denetik, kontuan hartuz Zerbitzuak Ikuskatzeko eta Ikuskapen Teknikorako Zerbitzuaren txostenak.
Ikaslearen alegazioaren aldeko ebazpena ematen baldin bada arestian aipatutako instantziaren batean, dagokion zuzenketa agertaraziko da ebaluazio agirietan, ikastetxeko idazkariak sinatutako eta zuzendariak bisatutako eginbidearen bitartez.
Kalifikazioen kontrako berraztertze eskaerak eta erreklamazioak jarraibide hauetan ezarritakoari lotuko zaizkio, eta, jarraibide hauetan arautu ez diren aferetarako, 1995eko abuztuaren 28ko Aginduari (1995eko irailaren 20ko E.A.O.).
3. Kurtsoa errepikatzea.
Oro har, oinarrizko zikloan eta goi mailako zikloan, ikasle batek maila errepikatzeko erabakia behin bakarrik hartzen ahalko da, eta gainditzen ez badu, ikasle ofizialaren izaera galduko du elkarren segidako bi urteko epe baterako.
Epe hori amaituta, ikaslea Hizkuntza Eskola Ofizialeko ikasle ofiziala izaten ahalko da, gainerako izangaien baldintza beretan aurreinskripzioa egin ondoren matrikulazioa egiten badu.
Salbuespenez, ikasleek zilegi izanen dute maila berean hirugarren aldiz jarraian matrikulatzea, baldin eta aurreinskripzioa egin eta bertan onartutako ikasleek matrikula egin ondoren ikaspostu betegabeak gelditzen badira.
V._BESTE JARRAIBIDE BATZUK
1. Ikastetxeez landarako jendea sartzea.
Ikastetxean edozein mezu aditzera eman, transmititu edo banatu nahi duten pertsona guztiek eskola kontseiluaren baimena beharko dute, edo bestela ikastetxeko zuzendariaren baimen idatzia.
Batean nahiz bestean, baimen hori idatziz jasoko da ikastetxeko agiritegian.
Hori guztia ez da inoiz izanen legeak aitortzen dituen eskubide sindikaletarako traba.
2. Irakasleen erantzukizuna.
Hezkuntza administrazioak, indarrean dauden legeek ezartzen dutenari jarraikiz, bere gain hartuko ditu irakasle funtzionarioen kontrako auzietatik sortzen ahal diren erantzukizun zibil ordaingarriak; hori ez da eragozpen izanen bidezkoa den kasuetan atzera egiteko ekintza gauzatzeko. Irakasleek, euren jardunean letratuen laguntza behar izanez gero, defentsa egokia izan dezaten ere arduratuko da.
3. Matrikula egiteko araubidea.
A._Dagokion zikloan hasteko behar diren betebehar akademikoak bete behar badituzte ere, aurretik hizkuntzaren ezagupenak dituzten ikasleek zilegi izanen dute oinarrizko zikloko lehenbizikoa ez den maila bat edo goi zikloko bigarrena ofizialki egitea, baldin eta aurretik dagokion mailakatze proba gainditzen badute.
Horretarako, hizkuntza eskolek mailakatze proba berariazkoak antolatzen ahalko dituzte, aurreneko aldiz sartu behar diren ikasleak maila egokian kokatu ahal izateko, haien ezagupenen mailaren arabera. Proba horiek ez dute ondorio akademikorik izanen eta haien bidez lortutako mailaketaren indarraldia dagokion ikasturtekoa izanen da. Ikasle horiek sartu zireneko maila hori gainditzen ez badute, behin bakarrik errepikatzen ahalko dute; bestela, eskolako ikasle ofiziala izateko eskubidea galdu eta ez dute ondorio akademikorik aterako.
Proba horiek eginez gero, hizkuntz eskolek proba horien prozeduraren, edukien eta emaitzen berri emanen diote Zerbitzuak Ikuskatu eta Ikuskapen Teknikorako Zerbitzuari.
B._Goi Zikloko Gaitasun Agiria erdiesteko beharrezkoa denez gero aurretik Oinarrizkoa gainditu izanaren ziurtagiria lortzea, deialdi berean bi probak egiteko gauza direla uste duten ikasleak irakaskuntza librean matrikulatzen ahalko dira, bai oinarrizko zikloan, bai, hori gainditzen duten kasurako, goi zikloan.
C._Ezinezkoa da hizkuntza batean matrikula egitea urrutiko modalitatean eta bertaratzekoan, eta, horrenbestez, hizkuntza eskolek ahalik eta publizitate handiena emanen diote arautegiari, ikaspostuen eskaintza murriz lezaketen matrikula bikoitzak egin ez daitezen.
4. Matrikulari uko egitea.
Kontuan hartuta "Ikasleen eskubide eta betebeharrei" buruzko IV. ataleko "Ikasturtea errepikatzea" izeneko 3. puntuan ezarritakoa, edozein ikaslek zilegi izanen du matrikula bertan behera uzteko eskatzea bere ikasketen espedientea dagoen Hizkuntza Eskola Ofizialeko zuzendariari, apirilaren 30a baino lehen, baldin eta agiri bidez egiaztatzen baldin badu eritasun fisiko edo psikikoa izan duela edo matrikulatuta dagoen taldean klasera joatea galarazten dion lanpostu batean hasi dela.
Beharrezkoa izanez gero, ikaslearen irakasleari entzun ondoren, eskolako zuzendariak eskaera ebatzi eta matrikulari uko egiteko baimena emanen du baldin eta aipatu arrazoi horietako bat egiaztatzen bada eta hori dela medio, ezinezkoa izan bada eskatzailea eskolara normalki joatea eta etengabeko ebaluazioaren bidez haren kalifikazioa egitea.
Arestian tipifikatutakoak ez bezalako bestelako arrazoi bereziak daudenean, matrikulari uko egiteko eskabideak epe berean aurkeztuko zaizkio eskolako zuzendariari eta horrek, txosten batekin batera eta, hala badagokio, behar den dokumentazioarekin batera, Hezkuntza Zuzendaritza Nagusira igorriko du, behar den ebazpena eman dadin.
Matrikulari uko egiteko baimena ematen den kasu guztietan, dagokion eginbidea agertaraziko da ikaslearen ikasketen espedientean eta kontuan hartuko da uko horrek baimendu den ikasturte horretarako bakarrik balio duela. Kasu horretan, ikasturte hori ez da aintzat hartuko kurtsoa errepikatzearen ondorioetarako, Eranskin honetan dagokion puntuan ezarri diren horietarako. Nolanahi ere, matrikulari uko egiten dion ikasleak, hurrengo ikasturtean, aurrekoan matrikulatuta egon zen maila berean egin beharko du matrikula eta horrela egin ezean, ikasle ofizialaren eskubide guztiak galduko ditu; dena den, horrek ez dio kenduko hurrengo urteetan aurreinskripzio prozesuetan parte hartzeko eskubidea, ofizialak ez diren gainerako ikasleen baldintza beretan.
5. Alkohola saltzeari eta erretzeko debekuari buruzko arauak.
Ikastetxeek giro higieniko eta osasuntsua bultzatu behar dute, hezkuntza komunitatean osasunerako on diren ohitura eta jarrerak sustatuz.
Hori helburu, eta 6/2003 Foru Legea, otsailaren 14koa, tabako kontsumoaren prebentzioari, arnasteko airea babesteari eta tabakoaren aurrean osasuna sustatzeari buruzkoa, bete dadin:
a) Ez da zilegi izanen ikastetxeetan tabakoa saltzea.
b) Ez da zilegi izanen ikastetxeetan erretzea.
Baldintza horiek kontuan hartuko dira barne araubideko erregelamendua prestatzerakoan.
Ikastetxeetako Eskola Kontseiluek behar diren neurriak hartuko dituzte ikastetxeetan edari alkoholdunak saltzea eta kontsumitzea galarazteko.
6. Ikastetxeko langileen jarduerak.
Urteko Programazio Orokorrean sartuta ez dagoen edozein jarduera egin ahal izateko, ikastetxeko zuzendariaren berariazko baimena beharko dute bai irakasleek, bai hezkuntza komunitateko beste edozein kidek.
7. Jarraibide hauen berri ematea.
Ikastetxeko eskola kontseiluak eta zuzendaritza taldeak ardura hartuko dute hezkuntza komunitateko sektore guztiek jarraibide hauen edukiaren berri izan dezaten.
8. Bigarren Hezkuntzako irakasleentzako ikaspostuak.
Iruñeko eta Tuterako Hizkuntza Eskola Ofizialek, arratsaldeko ordutegi ohikoaren barruan, araubide ofizialeko ikaspostu kopuru bat gordeko dute Nafarroako Haur eta Lehen eta Bigarren Hezkuntzako irakasle funtzionarioek ingeles edo edo frantsesaren 1, 2, 3, 4 eta 5. mailak egiteko. Horretarako izena eman eta ikaspostuak esleitzeko prozedura Eskolek ezarriko dute. Eskaintza horren barruan lehentasuna izanen dute atzerriko hizkuntzak ematen dituzten irakasleek.
Iragarkiaren kodea: A0306594
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
