Iragarkia
89. ALDIZKARIA - 2003ko uztailaren 11
I. NAFARROAKO FORU KOMUNITATEA
Xedapen Orokorrak. Foru Aginduak
168/2003 FORU AGINDUA, ekainaren 11koa, Ekonomi eta Ogasun kontseilariarena; beraren bidez Nafarroako ALDIZKARI OFIZIALean argitaratu da, jendaurreko informaziorako, Pertsona Fisikoen Errentaren gaineko Zergaren Erregelamendua (maiatzaren 24ko 174/1999 Foru Dekretuak onetsia) eta Sozietateen gaineko Zergaren Erregelamendua (urriaren 13ko 282/1997 Foru Dekretuak onetsia) aldatuko dituen foru dekretuaren proiektua.
Foru Komunitatearen Gobernuari eta Administrazioari buruzko apirilaren 11ko 23/1983 Foru Legeko 57.2 artikuluari jarraikiz, kontseilari eskudunak zilegi du erregelamenduzko arauen proiektuak jendaurrean paratzea, arauaren ezaugarriek hala aholkatzen badute.
Ekonomia eta Ogasun Departamentuak Pertsona Fisikoen Errentaren gaineko Zergaren Erregelamendua (maiatzaren 24ko 174/1999 Foru Dekretuak onetsia) eta Sozietateen gaineko Zergaren Erregelamendua (urriaren 13ko 282/1997 Foru Dekretuak onetsia) aldatuko dituen foru dekretuaren proiektua prestatu du.
Arauen Garapen eta Fiskalitaterako Zerbitzuak txosten batean adierazi du proiektatutako foru dekretuak, duen edukia edukita, jende askori eraginen diola, higiezinen kapitalaren etekinei, talde inbertsioko erakundeei, informazioa eman beharrari eta atxikipenak eta konturako sarrerak egin beharrari dagozkien alderdi oso garrantzitsuak aldatuko baititu. Gainera, berrikuntza handiak sartu dira, hala nola alarguntasun pentsioa eta Jarduera Ekonomikoen gaineko Zergaren kuotak konturako ordainketa gisa hartzea.
Horiek horrela, eta beren eskubide eta interesetan ukiturik dauden herritarrei entzun ahal izateko, hauxe
AGINDU DUT:
Lehenengoa._Pertsona Fisikoen Errentaren gaineko Zergaren Erregelamendua (maiatzaren 24ko 174/1999 Foru Dekretuak onetsia) eta Sozietateen gaineko Zergaren Erregelamendua (urriaren 13ko 282/1997 Foru Dekretuak onetsia) aldatuko dituen foru dekretuaren proiektua Nafarroako ALDIZKARI OFIZIALean argitaratuko da; foru dekretuaren testua foru agindu honen eranskinean ageri da.
Bigarrena._Hogei egun balioduneko epea eman da, foru dekretuaren proiektua Nafarroako ALDIZKARI OFIZIALean argitaratu eta biharamunean hasita, beren eskubide eta interesetan ukiturik dauden herritarrek bidezko jotzen dituzten alegazioak aurkez ditzaten Ekonomi eta Ogasun Departamentuan.
Iruñean, bi mila eta hiruko ekainaren hamaikan._Ekonomi eta Ogasun kontseilaria, Francisco J. Iribarren Fentanes.
E R A N S K I N A
FORU DEKRETUAREN PROIEKTUA, Pertsona Fisikoen Errentaren gaineko Zergaren Erregelamendua (maiatzaren 24ko 174/1999 Foru Dekretuak onetsia) eta Sozietateen gaineko Zergaren Erregelamendua (urriaren 13ko 282/1997 Foru Dekretuak onetsia) aldatzeko.
Martxoaren 17ko 16/2003 Foru Legearen bidez zenbait zerga eta bestelako zerga-neurri batzuk aldatu dira partzialki; bada, horren bidez Pertsona Fisikoen Errentaren gaineko Zergari buruzko abenduaren 30eko 22/1998 Foru Legea eraldatu da familien, urrituen eta alargunen interesak babesteko, beste batzuenak beste. Beste alde batetik, hazkunde ekonomikoa, enpresen lehiakortasuna eta enplegua bultzatzea du helburu.
Lege horren aldaketak berekin ekarri du Pertsona Fisikoen Errentaren gaineko Zergaren Erregelamenduan zenbait gauza aldatu beharra helburu jakin batzuk lortzearren.
Kasu batzuetan ezinbestekoa da erregelamenduko arauak Legera moldatzea, esaterako lanaren etekin batzuei aplikatu beharreko txikipenei buruzko artikuluak eta denboran era nabarmen irregularrean lortutako kapitalen etekinei eta enpresa eta lanbide jardueren etekinei aplikatu beharreko txikipenei buruzkoak. Orobat, zenbait gauza zehaztu behar dira errenten eratxikipenaren araubidean dauden erakundeei buruz.
Beste alde batetik, lege-berrikuntza batzuei buruzko arauak eguneratu behar dira, hala nola garraio gastuetarako sariak eta esleipenei buruzkoak, higigarrien kapitalaren etekinetan ken daitezkeen gastuei buruzkoak, bazkideen kopurua, ondarea eta talde inbertsioko erakundeetako gehieneko portzentajea frogatzeari buruzkoak, eta, langilea atzerritik Espainiako lurraldera doan kasuetarako, lanaren etekinei aplikatu beharreko atxikipenak eta kontura egin beharreko sarrerak zehazteko prozedurari buruzkoak.
Halaber, Estatuko Loteria eta Apustuen erakunde publikoari, ziurtatutako aurreikuspen planak merkaturatzen dituzten aseguru-erakundeei eta errenta-eratxikipenaren araubideko erakundeei ezarri berri zaien informatu beharraren inguruko alderdi batzuk araupetu dira.
Informatu beharra dela eta, argitu eta areagotu egin da. Hain zuzen ere, foru dekretu honek abenduaren 14ko 352/1998 Foru Dekretua indargabetu du; foru dekretu horrek banku-kontuetan ahalmendutako pertsonei, pentsio plan eta fondoei, gizarte aurreikuspeneko sistema alternatiboei eta mutualitateei eta finantza-aktiboen obligazio batzuei buruzko informazioa eman beharrari aplikatu beharreko xedapenak garatu zituen. Foru dekretu hori informatu behar horiek Pertsona Fisikoen Errentaren gaineko Zergaren Erregelamenduan txertatzeko asmoarekin indargabetu da, hain zuzen ere arauak gehiegi ugaritu ez daitezen eta zergadunek errazago izan dezaten zerga-betebeharrak euren kabuz betetzea; gainera, epe batzuk bateratu dira.
Konturako atxikipenen inguruko alderdi batzuk aldatu dira, Legean egin diren aldaketen ildoari jarraikiz. Hala, erakunde batek mozkinak banatzen dituenean, Zerga ondare-sozietateen araubidean ordaindu duen zergaldietan lortutako mozkinen partaidetzei atxikipena aplikatu beharretik salbuetsi dira zergadunak Zergari buruzko Foru Legeko 52. artikuluan ezarritakoaren arabera mozkinok zenbatu behar ez direnean, eta gauza bera egin da talde inbertsioko erakundeen partaidetzak edo akzioak itzuliz edo eskualdatuz lortutako ondare-gehikuntzei dagokienez ere.
57 bis artikulua gehitu da, alargun-pentsioaren ziozko kenkariari buruzko lege-arauak garatzeko. Horrez gainera beste xedapen gehigarri bat gehitu da, Jarduera Ekonomikoen gaineko Zergaren kuotak konturako ordainketatzat hartzeari buruz.
Azkenik, zaharkitutako arau-aipamen batzuk hobetu eta eguneratu egin dira.
Pertsona Fisikoen Errentaren gaineko Zergari buruzko abenduaren 30eko 22/1998 Foru Legeak zein zerga batzuk eta zergen arloko neurri batzuk partzialki aldatu dituen martxoaren 17ko 16/2003 Foru Legeak behar izan diren arau aipuak eta gaikuntzak egin dituzte, eta orain horiek guztiak foru dekretu honen euskarri dira.
Sozietateen gaineko Zergaren Erregelamenduan egin diren aldaketetara etorrita, aipatu beharrekoak dira berrinbertitzeko plan bereziei dagozkienak, hain zuzen ere baloreak eskualdatzean berrinbertitzearen ziozko kenkariak ukitzen dituztenak, eta elkarri lotutako pertsona edo erakundeen arteko eragiketak baloratzeko proposamenak ebazteko epeari dagokiona.
Zergari buruzko Foru Legeko 139.3. artikulua (X. tituluko IX. kapituluan dago) bat-egiteei, zatitzeei, aktibo ekarpenei eta balore trukeei buruzkoa da. Bertan eskuratzaileak eskualdatzailearen kapitalaren %5 gutxienez dueneko balizkoa ageri da. Halakoetan, partaidetzaren eskuraketa-prezioaren eta beraren balio teorikoaren arteko diferentzia eskuratutako ondasun eta eskubideei egotziko zaie eta egozten ez den diferentziaren zatia zerga-oinarritik kendu ahal izanen da, eta kendu ere zenbatekoaren hamarrena gehienez urtean, gainerako betekizunak betez gero.
30. artikuluari 4. zenbakia gehitu zaio; bertan erakunde eskuratzaileak zerga-oinarriari aurrean aipatutako kenkaria aplikatzen zaionean bete beharreko informatu beharra araupetu da.
Zerga-baterakuntzako araubidearen aukerari dagokionez, 31. artikuluko a) letrari beste paragrafo bat gehitu zaio, bigarrena, Espainiako lurraldeko egoiliar ez izaki sozietate nagusi diren establezimendu iraunkorrei buruz. Atxikita dauden erakunde ez-egoiliarra ere identifikatu behar dute.
II. tituluko IV. kapituluaren errubrika aldatu da, orain interes ekonomikodun Europako eta Espainiako elkartzeen araubide berezietako, enpresen aldi baterako batasunen eta ondare sozietateen erazko betebeharrei buruzkoa baita.
Atxikipenak aplikatu eta konturako sarrerak egin beharraren salbuespenak direla eta, bi berrikuntza daude. 34. artikuluko 13. zenbakia aldatu da, hain zuzen ere zerga-gardentasuna desagertzearen ziozko atxiki beharraren salbuespenari dagokiona. Oraingo testuaren arabera, interes ekonomikodun elkartzeek eta enpresen aldi baterako batasunek dibidenduak edo mozkin-partaidetzak banatzen dituztenean, ez da egonen atxikipenak aplikatu beharrik mozkinak erakundea zerga-ordainketako araubide berezian egon den zergaldietakoak izanez gero eta zerga-oinarriaren egozketa jasan behar duten bazkideei badagozkie.
34. artikuluari 18. zenbakia gehitu zaio; bertan atxiki eta konturako sarrera egin beharraren salbuespen bat ezarri da aseguru-erakundeek "unit linked" deritzenen hornidurak inbertituta dauden aktiboak eskualdatzen dituztenerako. Salbuespenaz baliatu ahal izateko, aseguru-erakundeak atxikipena aplikatu behar duen erakundeari jakinarazi behar dio aktiboak "unit linked" kontratuei lotuta daudela. Erakunde horrek jakinarazpena gorde beharko du, behar bezala sinatuta.
Halaber, Sozietateen gaineko Zergaren konturako atxikipenei buruzko alderdi batzuk aldatu dira Erregelamendua Legean egindako aldaketetara moldatzeko.
Azkenik, beste xedapen gehigarri bat batu zaio testuari; haren arabera Sozietateen gaineko Zergaren subjektu pasiboek Jarduera Ekonomikoen gaineko Zergaren zioz ordaindutako kuotak konturako ordainketatzat hartuko dira zergaldian jarduera guztietan egindako negozioen zenbateko garbia 2.000.000 euro baino gutxiago denean.
Horrenbestez, Ekonomi eta Ogasun kontseilariak proposaturik, eta Nafarroako Gobernuak bi mila eta hiruko ........aren ....(e)ko bilkuran hartutako erabakiarekin bat, hauxe
DEKRETATU DUT:
1. artikulua. Maiatzaren 24ko 174/1999 Foru Dekretuaren bidez onetsitako Pertsona Fisikoen Errentaren gaineko Zergaren Erregelamenduko artikulu batzuk aldatu dira eta jarraian azalduko den bezala geratu dira:
Bat._3. artikulua, lehenengo paragrafoa.
"Zergari buruzko Foru Legeko 7. artikuluko l) letran ezarritakoak ondoreak izan ditzan, kirol prestakuntza eta teknifikaziorako diru-laguntzak salbuetsita egonen dira, urteko muga 30.050,61 euro dela, betekizun hauek betez gero:"
Bi._5. artikulua, 2 eta 3.
"2. Salbuespenaren gehieneko kopurua 60.101,21 euro izanen da urtean.
3. Salbuespen hau bateraezina izanen da, atzerrian kokatu diren subjektu pasiboendako, Erregelamendu honen 8.A).3.b) artikuluan aurreikusiriko tributaziotik salbuetsiriko soberakinen araubidearekin, zenbatekoa edozein delarik ere. Subjektu pasiboak zilegi izanen du salbuespen honen ordez soberakinen araubidea aukeratzea."
Hiru._6. artikuluko 2. idatz-zatiari 4. zenbakia gehitu zaio.
"4. Idatz-zati honetan ezarritakoa galarazi gabe, lanbide edo profesional jarduerak egiten dituzten subjektu pasiboek eragiketak egiten badituzte lotutako pertsona edo erakundeekin, eragiketa horien aldi-egozketarako lotutako pertsonak edo erakundeak erabilitako irizpide bera erabili beharko dute."
Lau._8. artikulua, A).2.b).
"b) Bestelakoetan, ondoko kopurua izango da: 0,25 euro zenbatuko da egindako kilometro bakoitzeko, baldin eta joan-etorria egin dela frogatzen bada, eta horrez gainera bidesari eta aparkalekuaren gastuak ere gehituko dira, frogatuz gero."
Bost._8. artikulua, A).3.a).1., hirugarren paragrafoa.
"Mantenu-gastuengatik, 52,29 euro egunean, baldin eta joan-etorria Espainiako lurraldearen barruan bada; atzerriko lurraldean egin bada, 91,35 euro egunean."
Sei._8. artikulua, A).3.a).2., lehen eta bigarren paragrafoak.
"2. Gaua ematen ez denean hartzailearen ohiko lanlekua dagoen udalerria edo bizi dena ez beste batean, orduan mantenu-gastuetarako esleipenak izango dira, baldin eta 26,14 edo 48,08 eurotik gorakoak ez badira egunean, joan-etorria non gertatzen den, Espainiako lurraldean edo atzerrian, hurrenez hurren.
Hegazkin konpainietako hegazkin-langileen kasuan, mantenurako gastu arruntetarako esleipen gisa hartuko dira eguneko 36,06 euro arteko zenbatekoak, baldin eta Espainiako lurraldearen barruko joan-etorrietarako badira, edo eguneko 66,11 euro artekoak, atzerriko joan-etorrietarako badira. Egun berean gauza biak gertatzen badira, egindako hegaldi gehienen kopuruaren arabera dagokion zenbatekoa aplikatuko da."
Zazpi._8. artikulua, B).1.a), azken paragrafoa. "Bestelakoetan, egindako kilometro bakoitzeko 0,25 euro zenbatuz ateratzen den kopurua, gehi bidesari eta aparkalekuaren ziozko gastuak, frogatuz gero."
Zortzi._8. artikulua, B).1.b), lehenengo paragrafoa.
"b) Mantenu-gastuen zioz, 26,14 edo 48,08 euro egunean, joan-etorria non den, Espainiako lurraldearen barruan edo atzerrira."
Bederatzi._9. artikulua.
"9. artikulua Lanbide elkargoei ordaindutako kuoten zioz ken daitezkeen gastuak.
Lanaren etekin garbiak zehazteko, lanbide elkargoei ordaindutako kuotak kendu ahal izanen dira lan egiteko elkargoko kide nahitaez izan behar denean; hain zuzen ere, kuota elkargoaren funtsezko helburuei dagokien heinean kendu ahal izanen da, eta beti ere 300 euro urtean gehienez."
Hamar._10. artikuluaren enuntziatua eta 2. idatz-zatia.
"10. artikulua. %40ko txikipena lanaren etekin batzuetan."
"2. Lan etekinen sortzapenaldia bi urte baino luzeagoa izanik etekinak zatika jasotzen badira, Zergari buruzko Foru Legeko 17. artikuluko 2. idatz-zatiko a) letran ezarritako %40ko txikipena aplikatu ahal izanen da, baldin eta sortzapenaldiko urteen (datatik datara zenbatuta) eta zergaldien kopurua zatitzearen emaitzako kopurua bi baino handiagoa bada."
Hamaika._12. artikulua, a) eta b).
"a) Besteren kapitalen korrituak, baldin eta ondasunak, eskubideak edota erabilera nahiz gozatzeko ahalmenak eskuratzeko, birdoitzeko edota hobetzeko inbertitu badira, bai eta finantzaketako gainerako gastuak ere.
Hala ere, letra honetan ezarritako gastuen kenkaria ezin da izan, ondasun edo eskubide bakoitzeko, higiezina erabiltzeko edo gozatzeko lagatuz edo hartarako eskubidea lagatuz lortutako etekin osoen zenbatekoa baino gehiago.
b) Foru Komunitatearenak edo Estatuarenak ez diren zergak eta errekarguak, bai eta Foru Komunitatearen eta Estatuaren tasak, errekarguak eta kontribuzio bereziak, edozein dela beraien izendazioa, baldin eta zenbatutako etekinen gainekoak badira, edo beraiek ekoizten dituzten ondasun edota eskubideen gainekoak izanik zehapen izaerakoak ez badira."
Hamabi._13. artikulua, 1. idatz-zatiko a) letrako lehenengo paragrafoa eta 2. idatz-zatia.
"a) Higiezinak direnean: urtero, baldin eta ordaindutako eskuraketa edo hobekuntza kostuaren gainean %3 aplikatzearen emaitzako kopurua gainditzen ez badute, lurzoruaren kostua zenbatu gabe."
"2. Etekinak erabiltzeko edo gozatzeko eskubide edo ahalmenen titulartasunetik badatoz, ordaindutako eskuraketa kostua amortizatu ahal izanen da, gehieneko kopurua legez haietariko bakoitzaren etekin osoena dela.
Amortizazioa, horrelako kasuan, erregela hauen emaitza izango da:
a) Eskubidearen edo ahalmenaren iraunaldia mugatua denean, orduan eskuraketa kostua eta iraunaldiaren urteen kopurua zatitzearen emaitza izango da.
b) Eskubidea edo ahalmena bizi artekoa bada, ordaindutako eskuraketa kostuari %3ko portzentajea aplikatzearen emaitza izango da."
Hamahiru._14. artikulua, 2.
"2. Higiezinen kapitalaren etekinen sortzapenaldia bi urte baino luzeagoa izanik etekinak zatika jasotzen badira, Zergari buruzko Foru Legeko 25. artikuluko 2. idatz-zatian ezarritako %40ko txikipena aplikatu ahal izanen da, baldin eta sortzapenaldiko urteen (datatik datara zenbatuta) eta zergaldien kopurua zatitzearen emaitzako kopurua bi baino handiagoa bada."
Hamalau._19. artikulua, 1. idatz-zatiko lehenengo eta bigarren paragrafoak, 2. idatz-zatiko lehenengo paragrafoa, 3. idatz-zatia, eta 4. idatz-zatiko lehenengo paragrafoa.
"1. Zergari buruzko Foru Legeko 32. artikuluko 2. idatz-zatiko b) letran ezarritako txikipenak ordainaldi bakarreko kapital prestazioei aplikatu ahal izanen zaizkie.
Bereziki, polizaren erreskate partzialerako eskubidea baliatzearen ondoriozko hartukizunak direnean, aurreko paragrafoan aipaturiko txikipenak egutegiko urteko hartukizunaren ziozko etekinei soilik aplikatu ahal izanen zaizkie. Txikipen hori eta kontratua azkentzearen ondoriozkoa bateragarriak dira."
"2. Kontratuaren iraunaldian zehar ordaindutako primek behar adinako aldizkakotasun eta erregulartasuna dutela uste izango da, baldin eta, lehenengoa ordaindu denetik zortzi urte baino gehiago igarota, primek batez beste lau urte baino luzeago iraun badute."
"3. Zergari buruzko Foru Legeko 32.2.b) artikuluan ezarritako %75eko murrizketa portzentajea %65eko minusbaliotasuna edo handiagoa dutenek jasotzen dituzten ezintasunagatiko kalte-ordainei aplikatuko zaie."
"4. Kapital prestazioak kobratzen direnean Zergari buruzko Foru Arauko 30.1. artikuluan araututako bizi-aseguruetako bat dela bide eta aseguruak aldizkako edo aparteko primak baditu, prima bakoitzari lortutako guztirako etekinean dagokion zatia zehazteko, guztirako kopurua eta jarraian adieraziko den zatiketaren emaitzako haztapen-koefizientea biderkatuko dira:"
Hamabost._20. artikulua, 2.
"2. Higigarrien kapitalaren etekinen sortzapenaldia bi urte baino luzeagoa izanik etekinak zatika jasotzen badira, Zergari buruzko Foru Legeko 32. artikuluko 2. idatz-zatiko a) letrako bigarren paragrafoan ezarritako %40ko txikipena aplikatu ahal izanen da, baldin eta sortzapenaldiko urteen (datatik datara zenbatuta) eta zergaldien kopurua zatitzearen emaitzako kopurua bi baino handiagoa bada."
Hamasei._22. artikulua, 2.
"2. Enpresa edo lanbide jardueren etekinen sortzapenaldia bi urte baino luzeagoa izanik etekinak zatika jasotzen badira, Zergari buruzko Foru Legeko 34. artikuluko 6. idatz-zatian ezarritako %40ko txikipena aplikatu ahal izanen da, baldin eta sortzapenaldiko urteen (datatik datara zenbatuta) eta zergaldien kopurua zatitzearen emaitzako kopurua bi baino handiagoa bada."
Hamazazpi._23. artikulua, 2.
"2. Subjektu pasiboek aurreko araubideetako bat aplikatuko dute mugak eta bateraezintasunaren erregelak, uko egiteko erregelak eta bazterketaren erregelak (hurrengo artikuluetan ageri direnak) kontuan hartuz."
Hemezortzi._28. artikulua, 1. idatz-zatia, b) letra, lehenengo paragrafoa.
"b) Aurreko urteko negozioen zenbateko garbia ezin da izan 600.000 euro baino gehiago."
Hemeretzi._29. artikulua.
"29. artikulua. Ukoa eta bazterketa.
1. Zuzeneko zenbatespenaren araubidearen modalitate erraztuari uko egin nahi bazaio, ukoak ondoreak izan behar dituen egutegiko urtearen aurreko abenduan egin behar zaio edo, jarduera bati ekin bazaio, ekin eta hogeita hamar egun igaro baino lehen.
Ukoa hiru urtean egongo da indarrean, gutxienez. Hiru urte igarotakoan, eta modalitatea aplikatu ahal den artean, aurreko paragrafoan adierazitako epean ezeztatu ezean ukoa beste urtebeterako luzatuko da isilbidez.
Baldin eta zuzeneko zenbatespenaren araubidearen modalitate erraztuari egindako ukoa indarrean jarri behar den urtearen aurreko urtean haren aplikazio-eremua zehazten duen negozio kopurua gainditu bada, ukoa ez aurkeztutzat joko da.
Modalitateari uko egiteko, Ekonomi eta Ogasun Departamentuak onesten duen eredua bete beharko da, bai eta ukoa ezeztatzeko ere.
2. Zuzeneko zenbatespenaren araubidearen modalitate erraztutik bazter uzteko arrazoi izanen da aurreko artikuluan ezarritako negozio kopurua gainditzea.
Bazterketak hurrengo urtean izanen ditu ondoreak.
3. Halaber, modalitate horretatik bazter geratuko dira erregelamendu honetako 24. artikuluan aipatutako bateraezintasuna dutenak, bertan ezarritako ondoreekin.
4. Zuzeneko zenbatespenaren araubidearen modalitate erraztuari uko egiten dioten subjektu pasiboek eta hartatik bazter geratzen direnek araubidearen modalitate arruntaren bidez zehaztu beharko dituzte euren enpresa edo lanbide jarduera guztien etekin osoak."
Hogei._31. artikulua, 1. 1. eta 2.
"1. Bere bazkide, jaraunsle, erkide edo partaide guztiak zerga honen kargapeko pertsonak fisikoak badira.
2. Entitateak erregelamendu honetako 28. artikuluan ezarritako betekizunak betetzen baditu."
Hogeita bat._32. artikulua, 1.
"1. Zenbatespen objektiboaren araubidea Ekonomi eta Ogasun kontseilariak adierazten dituen enpresa eta lanbide jarduerei aplikatuko zaie, zeini bere aldetik, subjektu pasiboek, erregelamendu honetako 33. eta 34. artikuluetan ezarritakoaren arabera, uko egin ezean edo hartatik baztertuta egon ezean, hurrenez hurren.
Hala ere, araubide hau ezin aplikatu izanen zaie osorik edo partzialki Espainiako lurraldetik kanpo egiten diren enpresa eta lanbide jarduerei."
Hogeita bi._35. artikulua, 2.
"2. Balio Erantsiaren gaineko Zergan araubide berezi erraztutik bazter geratzeak berekin ekarriko du subjektu pasiboak egiten dituen enpresa eta lanbide jarduera guztietarako zenbatespen objektiboaren araubidetik ere bazter geratzea."
Hogeita hiru._38. artikulua, 1.
"1. Zenbatespen objektiboaren araubidea Zergari buruzko Foru Legeko 11. artikuluan aipatutako erakundeek egiten dituzten enpresa edo lanbide jardueren etekin garbia zehazteko aplikatu ahal izanen da, baldin eta beraien bazkide, jaraunsle, erkide edo partaide guztiak zerga honen kargapeko pertsona fisikoak badira eta foru agindu egokian ezarritako betekizunak betetzen badituzte."
Hogeita lau._44. artikulua, 2.
"2. Aurreko idatz-zatian aipatutako pertsona bakoitzeko urtean ordaindutako prima edo kuoten kopurua 500 euro baino gehiago ez izatea. Kopuruen horren gaindikinak gauzazko ordainsaritzat hartuko dira."
Hogeita bost._46. artikulua, 2. idatz-zatia, 1go.
"1go. Zeharkako formulen zenbatekoa ezin da izan 8,41 euro egunean baino gehiago. Handiagoa izanez gero, gaindikina gauzazko ordainsaria izanen da. Zenbateko hori Ekonomi eta Ogasun kontseilariak aldatzen ahal du ekonomiaren bilakaera eta formula horien eduki soziala kontuan hartuz."
Hogeita sei._48. artikulua, lehenengo paragrafoa eta 1. idatz-zatia.
"Zergari buruzko Foru Legeko 55.1.2gn.B) artikuluan ezarritakoaren ondoreetarako, ondokoa hartu behar da kontuan:"
"1go. Eskubide sendotuak baliarazten direnean Pentsioen Plan eta Fondoak araupetzen dituen ekainaren 8ko 8/1987 Legeko 8. artikuluko 8. idatz-zatian ezarritakoak ez beste balizko batzuetan lanaren etekintzat hartuko dira. Baldin eta prestazioa kapital gisa jasotzen bada, eta lehenengo ekarpenetik bi urte igaro badira, %40ko txikipena aplikatuko zaie, Zergari buruzko Foru Legeko 17. artikuluko 2. idatz-zatian aipatutakoari lotuz."
Hogeita zazpi._49. artikulua.
"49. artikulua. Pentsioen planei, gizarte aurreikuspeneko mutualitateei, ziurtatutako aurreikuspen planei eta sistema alternatiboei egindako ekarpenen gaindikinak, ekitaldian txikipenerako zio ez direnean.
Zergari buruzko Foru Legeko 55.1.6. artikuluan aipatutako gaindikinen zioz txikipenak aplikatu ahal izanen dira hurrengo bost zergaldietan, erregela hauen arabera:
1go. Txikipenaren zenbatekoa hurrengo epealdi bakoitzean izan daitekeen handiena izanen da, Zergari buruzko Foru Legeko 55.1.5. artikuluan ezarritako mugekin.
2gn. Zergaldian egindako ekarpenekin pilatzen badira, lehenbizi aurreko urteetako gaindikinen txikipenak aplikatuko dira."
Hogeita zortzi._49 bis artikulua, berria.
"49 bis artikulua. Talde inbertsioko erakundeak: bazkideen kopurua, ondarea eta gehieneko partaidetza-portzentajea.
1. Zergari buruzko Foru Legeko 52. artikuluaren arabera sozietate diren talde inbertsioko erakundeek izan behar duten gutxieneko bazkide kopurua honela zehaztuko da:
a) 52. artikuluko 1. idatz-zatian ageri diren talde inbertsioko erakundeetan, eskualdatu edo itzuli aurretik erakundeak Talde Inbertsioko Erakundeen Erregelamenduan (azaroaren 2ko 1393/1990 Errege Dekretuaren bidez onetsia) xedatutakoarekin bat etorriz Balore Merkatuko Komisio Nazionalari bidalitako azken hiruhilekoko txostenean ageri den akziodun kopurua.
b) 52. artikuluko 2. idatz-zatian ageri diren talde inbertsioko erakundeetan, talde inbertsioko erakundeak edo beraren gestorak berariaz izendatutako erakunde merkaturatzaile bakar batek, Espainian establezimendua duenak, eskualdatu edo itzuli aurretik Balore Merkatuko Komisio Nazionalari erregistratutako sail edo azpifuntsez bidalitako urteko azken berriematean ageri den akziodun kopurua. Ondore horietarako eta hurrengo idatz-zatian xedatutakoaren ondoreetarako, berriemate horretan sail edo azpifunts bakoitzeko akziodunen guztirako kopurua, erakundearen, sailaren edo azpifuntsaren guztirako ondarea eta aurreko datuei dagokien data azaldu behar dira; berriemateak urtebeteko indarraldia izanen du, gehienez, aipatu datatik aurrera. Balore Merkaturako Komisio Nazionalak jendaurrean azalduko du informazio hori eta letra honetan azaldutako informazioaren berri emateko betekizun teknikoak eta prozedurak zehaztuko ditu.
2. Zergari buruzko Foru Arauko 52. artikuluan talde inbertsioko sozietate-erakunde batek parte hartzen duen eragiketetarako ezarritako gerorapen araubideari heldu nahi dioten subjektu pasiboek agiri bidez jakinarazi behar diote eskualdaketa eta itzulketa edo erosketa eta harpidetza eragiketak bitarteko gisa egiten dituzten erakundeei aurreko hamabi hiletan ez dutela parte hartu talde inbertsioko erakundearen kapitalaren %5 baino gehiagoko eragiketetan. Erakunde horiek Zerga Administrazioaren esku eduki behar dituzte subjektu pasiboek emandako berriemate-agiriak zerga-betebeharrek preskribitu arte."
Hogeita bederatzi._50. artikulua.
"50. artikulua. Elbarritasuna eta elbarritasun gradua frogatzea.
1. Zerga honen ondorioetarako, elbarri dira %33 edo gehiagoko elbarritasun gradua duten pertsonak.
2. Aurreko idatz-zatian ezarritakoaren ondorioetarako, elbarritasun gradua frogatutzat emanen da Foru Komunitateko gizarte ongizateko zerbitzuek, Migrazio eta Gizarte Zerbitzuen Institutuak edo kasuan kasuko erkidego autonomoko organo eskudunak ziurtatzen dutenean.
3. Hala ere, ulertuko da Administrazio Publikoek ezgaitasun iraunkor osoaren ondorioz aitorturiko prestazioak hartzen dituzten pertsonek %33ko edo hortik goitiko elbarritasuna dutela; eta %65eko edo hortik goitiko elbarritasuna dutela erabateko ezgaitasun iraunkorraren, ezgaitasun handiaren edo epaile batek aitorturiko ezgaitasunaren ondorioz denean."
Hogeita hamar._56. artikulua.
"56. artikulua. Aitortu beharra.
Subjektu pasiboek zerga honen aitorpena aurkeztu eta sinatu behar dute Zergari buruzko Foru Legeko 83. artikuluan xedatutakoaren arabera.
Hala ere, jarraian azalduko diren errentak soilik jasotzen dituzten subjektu pasiboek ez dute aitortu beharrik:
a) Lanaren errentak; urteko gehieneko zenbateko gordina: 6.950 euro.
b) Higigarrien kapitalaren etekin osoak eta ondare gehikuntzak, kontuko atxikipena edo sarrera aplikatu behar zaienak, baldin eta bien artean urtean eta kopuru gordinean 1.500 eurotik goiti egiten ez badute.
Ekonomi eta Ogasun kontseilariari baimena eman zaio aurrean aipatutako kopuruak eguneratzeko."
Hogeita hamaika._57. artikulua.
"57. artikulua. Autolikidazioa eta zorra sartzea.
1. Zerga honen aitorpena aurkeztu behar duten subjektu pasiboek aitorpena aurkezteaz gainera euren zerga-zorra zehaztu behar dute eta Ekonomi eta Ogasun kontseilariak zehazten dituen lekuan, moduan eta epeetan sartu behar dute.
2. Autolikidazioaren emaitzako zenbatekoa bi zati berdin eginda sartu ahal izango da, korriturik eta errekargurik gabe, aurreko idatz-zatian esandakoaren arabera ezarriko diren epeetan.
Ordainketa prozedura horri heldu ahal izateko, aitorpena arauz ezarritako epearen barruan aurkeztu behar da eta lehen zatia Ekonomi eta Ogasun kontseilariak ezartzen duen epean sartu behar da. Aitorpen-likidazio osagarrien emaitzako kopurua ezin sartu izango da zatika, aurreko paragrafoan ezarritako prozeduraren arabera.
3. Ekonomi eta Ogasun Departamentuak autolikidazio proposamena bidal diezaieke subjektu pasiboei; departamentu horretako kontseilariak ezarriko du nola.
Baldin eta subjektu pasiboak uste badu proposatutako autolikidazio bat datorrela bere zerga egoerarekin, berretsi ahal izanen du; Ekonomi eta Ogasun kontseilariak ezarriko du nola."
Hogeita hamabi._57 bis artikulua, berria.
"57 bis artikulua. Alarguntasun pentsioaren ziozko kenkaria.
Behin kuota diferentziala finkatuz gero, alarguntasun pentsioa jasotzen duten subjektu pasiboek beste 900 euroko kenkaria aplikatu ahal izanen dute urtean, Zergari buruzko Foru Legeko 67 bis artikuluan ezarritakoaren arabera eta bertako baldintzak betez.
Kenkari gehigarri hau ezin aplikatu izanen da Gizarte Ongizate, Kirol eta Gazteri Departamentuak aurrerakin gisa ordaintzeko baimena eman badu, maiatzaren 20ko 127/2003 Foru Dekretuan ezarritako prozedurari lotuz (dekretu horren bidez alarguntasun pentsioaren ziozko kenkaria aldez aurretik ordaintzeko prozedura arautu da).
Aplikatuko den kenkariaren zenbatekoa ez badator bat aurreratu den kopuruarekin, subjektu pasiboek euren egoera erregularizatu behar dute aitorpeneko kuota diferentzialean; horretarako, aurreratutako kopurua jaso dutenetik sortu diren berandutza-korrituak sartu behar dituzte, kopurua behar ez zela jaso bada edo behar baino handiagoa izan bada. Zerga honen aitorpena aurkezten ez duten subjektu pasiboek maiatzaren 20ko 127/2003 Foru Dekretuko 10. artikuluan ezarritakoari lotuz erregularizatu behar dute euren egoera eta itzuli behar dute dirua (dekretu horren bidez alarguntasun pentsioaren ziozko kenkaria aldez aurretik ordaintzeko prozedura arautu da)."
Hogeita hamahiru._62. artikulua.
"62. artikulua. Informazioa emateko erazko beste betebehar batzuk.
1. Etxebizitzak eskuratzeko mailegu hipotekarioak ematen dituzten erakundeek maileguen gaineko informazio aitorpena aurkeztu behar dute hurrengo urteko urtarrilean, eta bertan mailegu-hartzaileen izenak eta identifikazio fiskaleko zenbakiak, mailegu bakoitzaren zenbateko osoa, mailegu-hartzaileek korrituen zioz eta kapitala amortizatzeagatik zergaldian ordaindu dituzten kopuruak eta maileguaren eraketa urtea eta maileguaren iraupenaren epealdia adierazi behar dituzte.
2. Zerga honetan kenkaria aplikatzeko eskubidea ematen duten dohaintzak hartzen dituzten erakundeek hurrengo urteko urtarrilean dohaintza horiei buruzko informazio aitorpena aurkeztu behar dute; bertan, identifikazio datuak eman eta fundazioen eta babes jardueren zerga araubidea arautu duen uztailaren 2ko 10/1996 Foru Legean ezarritako kenkarien araubideari atxikita daudenez zehaztu ez ezik, dohaintzak eman dituztenei buruzko datu hauek ere agerrarazi behar dituzte:
a) Izena eta deiturak.
b) Identifikazio fiskaleko zenbakia.
c) Dohaintzaren zenbatekoa.
3. Talde inbertsioko erakundeen kudeatzaileek bazkide edota partaideek egindako akzio edo partaidetza besterentzeei buruzko aitorpena aurkeztu behar dute hurrengo urteko urtarrilean; bertan datu hauek eman behar dituzte:
a) Bazkide edo partaidearen izen-deiturak eta identifikazio fiskaleko zenbakia.
b) Akzio edo partaidetzen eskuraketa balioa eta besterentze balioa.
c) Zenbateko epealdian iraun duten akzio edo partaidetzek bazkidearen edo partaidearen esku.
Betebehar hori betetzat joko da erregelamendu honetako 90. kapituluko 2. idatz-zatian adierazitakoa aurkeztuz gero, baldin eta horretan aurreko letretan aipatutako informazioa eman bada.
4. Estatuko Loteria eta Apustuen Nazio Erakundeak, autonomia erkidegoetako arlo bereko organo edo erakundeek, Espainiako Gurutze Gorriak eta Espainiako Itsuen Nazio Erakundeak zerga honetatik salbuetsita eman dituzten sariei buruzko aitorpena aurkeztu behar dute hurrengo urteko urtarrilean. Aitorpen horretan hartzaileen identifikazio datuak eman behar dira (izena eta deiturak eta identifikazio fiskaleko zenbakia) eta ondorio hauetarako Ekonomi eta Ogasuna kontseilariak ezartzen duen zenbatekoa gainditzen duten sarien zenbatekoa edo balioa agertu behar da.
5. Zergari buruzko Foru Legeko 55. artikuluko 1. idatz-zatiko 3. puntuan aipatutako aurreikuspen plan ziurtatuak merkaturatzen dituzten aseguru erakundeek informazio aitorpena aurkeztu behar dute hurrengo urteko urtarrilean; bertan datu hauek eman behar dituzte:
a) Hartzaile bakoitzaren izen-deiturak eta identifikazio fiskaleko zenbakia.
b) Hartzaileek ordaindutako primen zenbatekoa.
Hala ere, aitorpena ordenagailuan zuzenean irakurtzeko moduko euskarrian eginez gero, aurkezteko epea hurrengo urteko otsailaren 20an amaituko da.
6. Indarreko arautegiaren arabera, banku-trafikoan edo kredituen arloan diharduten bankuek, aurrezki kutxek, kreditu kooperatibek eta pertsona fisikoek edo juridikoek zabalik dituzten kontu korronte, aurrezki kontu, eperako ezarpen eta kreditu-kontuen titularrek haiek erabiltzeko eta baliatzeko baimendutako pertsonei buruzko informazio aitorpena aurkeztu behar dute hurrengo urteko urtarrilaren 1etik otsailaren 20ra bitarteko epealdian, dena delakoa haien modalitatea edo izendazioa, nahiz eta titularra edo berak baimendutako pertsona Espainiako lurraldeko egoiliarra ez izan. Informazioa aurreko urte naturalekoa izan behar da.
Aitorpen horretan, kontua zehatz-mehatz identifikatzeaz gainera, baimendutako pertsonen izen-deiturak eta identifikazio fiskaleko zenbakia adierazi behar dira. Hain zuzen ere, aitortzen den zergaldian aritu diren pertsona baimenduak identifikatu behar dira, baimenak zenbat iraun duen kontuan izan gabe.
7. Indarreko arautegiaren arabera, banku-trafikoan edo kredituen arloan diharduten bankuek, aurrezki kutxek, kreditu kooperatibek eta pertsona fisikoek edo juridikoek zerga honen kargapekoek, Sozietateen gaineko Zergaren subjektu pasiboek edo Ez-egoiliarren Errentaren gaineko Zergaren kargapekoek (establezimendu iraunkorrarekin) zabalik dituzten kontu guztiei buruzko informazio aitorpena aurkeztu behar dute hurrengo urteko urtarrilaren 1etik otsailaren 20ra bitarteko epealdian, nahiz eta ordainketarik, atxikipenik edo konturako sarrerarik izan ez. Informazioa aurreko urte naturalekoa izan behar da.
Aitorpen horretan, kontua zehatz-mehatz identifikatzeaz gainera, kontuen titular diren pertsona edo erakundeak edo haiek baimendutakoak zehaztu behar dira, eta Ekonomi eta Ogasun kontseilariak adierazten dituen datu guztiak eman behar dira.
8. Etxebizitza kontuetako diru kopuruak gordailatuta dituzten erakundeek haiei buruzko informazio aitorpena aurkeztu behar dute hurrengo urteko urtarrilean; bertan datu hauek eman behar dituzte:
a) Etxebizitza kontuaren titularraren izen-deiturak eta I.F.Z.
b) Etxebizitza kontuaren identifikazioa.
c) Etxebizitza kontua ireki den eguna.
d) Etxebizitza kontuan ekitaldi bakoitzaren hasieran eta amaieran egon den saldoa.
e) Ekitaldi bakoitzean etxebizitza kontuan egin den ekarpenaren zenbatekoa eta handik itzuli den zenbatekoa.
f) Zergadun bakoitzak etxebizitza kontuan duen partaidetzaren portzentajea.
9. Kreditu erakundeek urtean zehar txeke bidez egindako eragiketei buruzko informazio aitorpena aurkeztu behar dute; paperean eginez gero, hurrengo urteko urtarrilean aurkeztu behar dute, eta ordenagailuan zuzenean irakurtzeko moduko euskarrian aurkeztuz gero, urtarrilaren 1etik otsailaren 20ra bitarteko epealdian.
10. Pentsio fondoak kudeatzen dituzten erakundeek urteko informazio aitorpena aurkeztu behar dute hurrengo urteko urtarrilaren 1etik otsailaren 20ra bitarteko epealdian; bertan fondoei atxikitako planetako partaideak eta haiek (zuzenean zein planen sustatzaileen bidez) egindako ekarpenak adierazi behar dira.
Pentsio planen sustatzaileek ekarpenak egiten badituzte, urteko informazio aitorpena aurkeztu behar dute hurrengo urteko urtarrilaren 1etik otsailaren 20ra bitarteko epealdian; bertan ekarpenen onura jasoko duten partaideak eta ekarpenen zenbatekoak adierazi behar dituzte.
Pentsio planen antzeko prestazio-sistema alternatiboei heldutako enpresek eta erakundeek informazio aitorpena aurkeztu behar dute hurrengo urteko urtarrilaren 1etik otsailaren 20ra bitarteko epealdian; bertan ekarpenak edo zuzkidurak egin dizkioten pertsonak eta haien zenbatekoak adierazi behar dituzte.
Gizarte aurreikuspeneko mutualitateek informazio aitorpena aurkeztu behar dute hurrengo urteko urtarrilaren 1etik otsailaren 20ra bitarteko epealdian; bertan mutualista guztiak zehaztu behar dira, bai eta bakoitzak zerga honi buruzko arauetan ezarritakoaren arabera zerga-oinarria txikitzeko edo murrizteko zio diren kontingentziak estaltzeko ordaindu duen kopurua ere.
Idatz-zati honetan aipatutako aitorpenetan aurreko urte naturaleko datuak eman behar dira.
11. Efektu publikoak, baloreak edo bestelako titulu edo finantza-aktiboak jaulki, harpidetu, eskualdatu, trukatu, bihurtu, kitatu eta itzultzeko eragiketetan esku hartzen duten edo haietan bitartekari aritzen diren fedemaile publikoek eragiketa horiei buruzko informazio aitorpen bat aurkeztu behar dute urtean, batez ere efektu, balore eta bestelako titulu eta finantza-aktiboen gaineko eskubide errealei dagozkien eragiketei buruz, berme-eskubideak eta bestelako kargak, baloreen mailegu-eragiketak eta erantzukizun mugatuko sozietateen kapitalean parte hartzeko eragiketak barne direla.
Krediturako finantza erakundeek eta establezimenduek, baloreen sozietateek eta agentziek, finantzetako gainerako bitartekariek eta, oro har, efektu publikoak, baloreak eta bestelako finantza tituluak eta aktiboak, indizeak eta haien gaineko aukerak, kontu-idaztoharren bidez dokumentatuak barne, kokatzen eta haiekin egiten diren eragiketetan bitartekari lanak egiten jarduten duten gainerako pertsona fisiko eta juridikoek urtean zehar balore edo efektuen bitartez baliabideak biltzeko edo kokatzeko zuzenean edo zeharka egindako eragiketei buruzko informazio aitorpena aurkeztu behar dute.
Halaber, talde inbertsioko erakundeen sozietate kudeatzaileek erakunde horien akzioekin edo partaidetzekin urtean egindako eragiketei buruzko informazio aitorpena aurkeztu behar dute, gauza bera egin behar dute ezein merkatu antolatutan kotizatzen ez duten tituluak edo izendun baloreak jaulkitzen dituzten erakundeek jaulkipen-eragiketei dagokienez, bai eta gerokoen eta aukeren merkatuetako zuzendaritza sozietateek ere merkatuetan egindako eragiketez.
Kontuetako idaztoharren bidez ordezkatutako Herri Zorra harpidetu, eskualdatu eta itzultzeko eragiketetan parte hartzen duten erakunde kudeatzaileek urtean egindako mota horretako eragiketei buruzko aitorpen aitorpena aurkeztu behar dute, eta harekin batera korrituak jaso dituztenen zerrenda ere bai.
Ekonomi eta Ogasun Departamentuari informazioa eman beharra betetzeko, aurreko paragrafoan ezarri bezala, baldin eta eragiketa batean hirugarren paragrafoan aipatutako pertsona edo erakundeetako batek eta idatz-zati honetako lehen eta bigarren paragrafoetan aipatutako fedemaile edo finantza bitartekari batek parte hartzen badute, haren berri ematen duen aitorpena fedemaileak edo finantza bitartekariak aurkeztu behar du.
Eragiketaren xede atzerrian jaulkitako baloreak edo atzerrian eraturiko tresna eratorriak badira, aitorpena baloreok Espainian merkaturatzen dituen erakundeak egin behar du, edo bestela Espainiak balore horiek gordailatuta dituen erakundeak.
Aurreko paragrafoetan aipatutako aitorpenetan Estatuko lurraldetik kanpo egin arren Espainiako lurraldeko egoiliar diren edo bertan establezimendu iraunkorra duten bitartekariek euren kabuz edo besteren kontura esku hartuz egindako eragiketen eta kontratuen berri eman behar da.
Urteko informazio aitorpena hurrengo urteko urtarrilean aurkeztu behar da paperean eta urtarrilaren 1etik otsailaren 20ra bitarteko epealdian ordenagailuan zuzenean irakurtzeko moduko euskarrian; bertan eragiketen esku hartu duten subjektuen identifikazio osoa agerrarazi behar da (izen-deiturak edo sozietatearen izena, helbidea eta identifikazio fiskaleko zenbakia), eta horrez gainera efektu publiko, balore, titulu eta aktiboen motak eta kopuruak zehaztu behar dira eta eragiketa bakoitzaren zenbatekoa eta data adierazi behar dira. Aitorpena aurreko urte naturaleko eragiketei buruzkoa izan behar da.
Idatz-zati honetan aipatutako informatu beharra, atxikipena aplikatu beharreko eragiketei dagokiena, betetzat joko da hartzaileen zerrenda urteko atxikipenen eredu ofizial egokian aurkeztuz gero.
12. Herri Zorraren Idaztoharren Merkatua kudeatzen duten erakundeek euren komisio-emaileen kontura urtean egindako Altxorraren letren harpidetzei, eskualdaketei eta itzulketei buruzko informazio aitorpena aurkeztu behar dute hurrengo urteko urtarrilaren 1etik otsailaren 20ra bitarteko epealdian eta Idaztoharren Zentralak gauza bera egin behar du bertako kontuen titularrek beren kabuz egindako eragiketei buruz. Aitorpen horretan eragiketen esku hartu duten subjektu guztiak identifikatu behar dira (izen-deiturak edo sozietatearen izena, helbidea dagoen probintzia-herrialde kodea eta identifikazio fiskaleko kodea), bakoitzak zer gisa esku hartu duen zehaztu behar da, eta eragiketa bakoitzaren zenbatekoa eta data adierazi behar dira.
13. Aurreko idatz-zatietan aipatutako informazio aitorpenak Ekonomi eta Ogasun kontseilariak ezartzen duen modura eta berak dioen lekuan aurkeztu behar dira; gainera, aitorpena ordenagailuan zuzenean irakurtzeko moduko euskarrian edo bide telematikoen bidez aurkezteko prozedura eta baldintzak ezarri ahal izanen ditu. Aitorpen horiek Hitzarmen Ekonomikoan ezarritako eskumen-irizpideen arabera aurkeztu behar dira."
Hogeita hamalau._62 bis artikulua erantsi zaio IV. tituluko II. kapituluari.
"62 bis artikulua. Errenta-eratxikipenaren araubideko erakundeen informatu beharra.
1. Errenta-eratxikipenaren araubidean dauden erakundeek informazio aitorpena aurkeztu behar dute urtero; bertan, euren identifikazio datuak (eta behar denean euren ordezkariarenak ere bai) eman ez ezik beste datu hauek ere agerrarazi behar dituzte:
a) Bazkide, jaraunsle edo erkideen (Espainiako egoiliar izan ezin ez izan) identifikazioa, zerga helbidea eta identifikazio fiskaleko zenbakia; horiez gainera, zergaldian zehar erakundearen osaeran gertatu diren aldaketen berri eman behar da.
Erakundearen kideren bat ez bada Espainiako lurraldeko egoiliarra, beraren zerga-ordezkaritza duenaren identifikazioa eman behar da, Ez-egoiliarren Errentaren gaineko Zergari eta Zerga Arauei buruzko abenduaren 9ko 41/1998 Legeko 9. artikuluan ezarritakoaren arabera.
Atzerrian eraturiko errenta-eratxikipenaren araubideko erakundeek zerga honen edo Sozietateen gaineko Zergaren kargapean dauden kideak identifikatu behar dituzte, bai eta Ez-egoiliarren Errentaren gaineko Zergaren karpekoak direnak ere (zerga horri lotutako errentei dagokienez), eta identifikatu ere artikulu honetan ezarri den bezala.
b) Erakundeak lortutako errenta guztien zenbatekoa eta kide bakoitzari egotzi beharreko errentena; behar izanez gero hauek zehaztu behar dira:
1go. Sarrera osoak eta gastu kengarriak, errenta-iturri bakoitzeko.
2gn. Atzerriko errenten zenbatekoa; herrialdea adierazi behar da, bai eta etekin osoak eta gastuak ere.
3gn. Zergari buruzko Legeko 49. artikuluko 4. idatz-zatian aipatutako balizkoan, eskualdatu edo harpidetu diren akzioen talde inbertsioko erakundearen identifikazioa, akzioak edo partaidetzak eskuratu edo harpidetu diren eguna eta haien eskuraketa-balioa, eta norberaren kapitalen lagapen-hartzaile den pertsona edo erakundearen identifikazioa.
c) Kenkarien oinarriak.
d) Erakundeak jasandako atxikipenen eta konturako sarreren zenbatekoa, eta kide bakoitzari eratxiki dakizkiokeenena.
e) Negozioen zenbateko garbia, Sozietate Anonimoei buruzko Legearen Testu Bategineko 191. artikuluarekin bat etorriz (abenduaren 22ko 1564/1989 Legegintzako Errege Dekretuak onetsi zuen).
2. Aurreko idatz-zatian aipatutako informatu beharra errenta-eratxikipeneko araubideko erakundearen ordezkari denak bete behar du. Atzerrian eratutako erakundea izanez gero, zerga honen edo Sozietateen gaineko Zergaren kargapeko subjektu pasibo diren erakundeko kideek ere bete behar dute informatu beharra.
3. Errenta-eratxikipeneko araubideko erakundeek idatziz jakinarazi behar diete euren kideei aurreko 1. idatz-zatiko b), c) eta d) letretan aipatutako informazioa. Jakinarazpena aitorpena aurkezteko epea, 1. idatz-zatian aipatu dena, amaitu eta hilabete igaro aurretik egin behar da.
4. Ekonomi eta Ogasun kontseilariak adieraziko du zein eredutan, zein epetan, non eta nola aurkeztu behar den artikulu honetan aipatutako informazio aitorpena. Hitzarmen Ekonomikoan ezarritako eskumen-irizpideak aintzat hartuz aurkeztu behar da."
Hogeita hamabost._64. artikulua, 3, e), g) eta i) letrak, eta j) letra berria.
"e) Erakundea ondare-sozietateen araubidean egon den zergaldietan sortutako mozkinen partaidetzak eta dibidenduak, Zergari buruzko Foru Legeko 28. artikuluko 3. idatz-zatian aipatuak."
"g) Zorizko, eskaintza edo adurrezko eta apustuzko jokoen zehapenak, administrazioa eta zergen arloa arautu dituen otsailaren 25eko 16/1977 Errege Lege-Dekretuan ezarritakoaren babesean antolatutako jokoen ondorioz ematen diren sariak, eta 300 eurotik beherako atxikipen-oinarria dutenak."
"i) Akzioak edo partaidetzak jaulkitzeagatiko saria itzultzearen eta kapitala ekarpenak itzuliz egiten diren txikipenen ziozko etekinak, banatu gabeko mozkinen ondoriozko kapitala txikitzen denean izan ezik, Zergari buruzko Foru Legeko 39. artikuluko 4. idatz-zatiko a) letrako bigarren paragrafoan ezarritakoaren arabera."
"j) Talde inbertsioko erakundeen partaidetzak edo akzioak itzuliz edo eskualdatuz lortutako ondare-gehikuntzak, baldin eta, Zergari buruzko Foru Legeko 52. artikuluan ezarritakoaren arabera, zenbatu behar ez badira."
Hogeita hamasei._70. artikulua, b).
"b) Administrazio kontseiluetako, hauen ordez diharduten batzetako eta beste ordezkaritza-organo batzuetako kideek jasotzen dituzten ordainsarien gaineko atxikipenaren portzentajea %30 izango da."
Hogeita hamazazpi._72 bis artikulua gehitu zaio V. tituluko II. kapituluko 1. atalari.
"72 bis artikulua. Egoitza atzerritik Espainiako lurraldera aldatuz gero, lanaren etekinen gaineko atxikipenak eta konturako sarrerak zehazteko prozedura berezia.
1. Besteren kontura lan egiten dutenek, zerga honen kargapeko subjektu pasibo ez izaki laster izango direnak, egoitza Espainiako lurraldean kokatuko dutelako, eta haren barruan Nafarroako Foru Komunitatean, Nafarroako Zerga Ogasunari jakinarazi ahal izango diote Ekonomi eta Ogasun kontseilariak onesten duen berriemate-ereduaren bidez; hark berak adieraziko du nola, non eta zein epetan aurkeztu behar den, bai eta aurkeztu beharreko agiriak ere.
Berriemate horretan langilea eta lanaren etekinak ordaindu dituena identifikatu behar dira, Espainiako lurraldean zein egunetan sartu den eta ordaintzaile horrentzat lanean zein egunetan hasi den adierazi behar da, eta zehaztu behar da lan-harremanak direla eta pentsatzekoa denez Nafarroako lurraldean egoitza lekuz aldatzen duen urte naturalean, edo hurrengoan, bestela, ehun eta laurogeita hiru egun baino gehiago egongo den, Espainiako lurraldean lanean hasten denetik zenbatuta.
2. Nafarroako Zerga Ogasunak, berriematea eta harekin batera aurkeztutako agiriak aztertuta, frogagiria emanen dio langileari, bidezkoa bada, berriematea aurkeztu eta hamar astegun igaro aurretik, hain zuzen ere zerga honen ziozko atxikipenak noiztik aurrera aplikatu zaizkion adierazten duen frogagiria.
3. Langileak Nafarroako Zerga Ogasunak emandako agiri horren ale bat emanen dio lanaren etekinen ordaintzaileari, hark, atxikipenak aplikatzean, zerga honen kargapeko subjektu pasibotzat har dezan bertan adierazitako egunetik aurrera.
4. Agiri hori jasotakoan, atxikipenak aplikatu behar dituenak aplikatu eginen ditu, bertan adierazitako eguna kontuan hartuz eta zerga honi buruzko arauei lotuz.
5. Baldin eta interesatua atzerritik datorren urtean ez bada zerga honen subjektu pasibo gertatzen, Ez-egoiliarren Errentaren gaineko Zergaren aitorpenean zerga honen kontura aplikatutako atxikipenak kendu ahal izanen ditu.
Halaber, Ez-egoiliarren Errentaren gaineko Zergari eta Zerga Neurriei buruzko abenduaren 9ko 41/1998 Legeko 30 bis artikuluan ezarritakoa aplikatu behar bada eta langilea atzerrira joan den urtean Ez-egoiliarren Errentaren gaineko Zergaren zergadun izan ez bada, zerga horren ziozko atxikipenak eta konturako sarrerak zerga honen konturako sarreratzat hartu behar dira."
Hogeita hemezortzi._73. artikulua.
"73. artikulua. Higigarrien kapitalaren etekinen gaineko atxikipenen zenbatekoa.
Higigarrien kapitalaren etekinen gainean aplikatu beharreko atxikipenaren zenbatekoa atxikipen oinarriaren %15 izango da."
Hogeita hemeretzi._78. artikulua, 1, bigarren paragrafoa.
"Hala ere, jarraian adieraziko direnei ordaindutako etekinei %7ko atxikipena aplikatuko zaie:"
Berrogei._79. artikulua.
"79. artikulua. Talde inbertsioko erakundeen akzioak eta partaidetzak eskualdatuz edo itzuliz lortzen diren ondare-gehikuntzen gaineko atxikipenen zenbatekoa.
Talde inbertsioko erakundeen akzioak eta partaidetzak eskualdatuz edo itzuliz lortzen diren ondare-gehikuntzen gaineko atxikipenen zenbatekoa atxikipen-oinarriaren %15 izanen da."
Berrogeita bat._82. artikulua.
"82. artikulua. Sarien gaineko atxikipenen zenbatekoa.
Eskudirutan ordaintzen diren sarien gaineko atxikipena zenbatekoaren %15 izango da."
Berrogeita bi._82. artikulua, 2.
"2. Erregelamendu honetako 64. artikuluko 2.idatz-zatiko b) letran ezarritako gainerako kontzeptuen emaitzako etekinen gaineko atxikipena, kalifikazioa gora-behera, ordaindu diren etekin osoen %15ko izanen da."
Berrogeita hiru._90. artikulua, 2.
"2. Atxikipenak edo konturako sarrerak aplikatu behar dituenak urtean egindako atxikipenen eta konturako sarreren laburpena aurkeztu behar du, hurrengo urteko urtarrilean paperean eta urtarrilaren 1etik otsailaren 20ra bitarteko epealdian ordenagailuan zuzenean irakurtzeko moduko euskarrian. Bertan, identifikazio-datuak ez ezik hartzaileen zerrenda ere agerrarazteko eska daiteke, datu hauekin:"
Berrogeita lau._92. artikulua, Bat, Lehenengoa, a), b), c) eta d) letrak.
"a) Etekin garbiak 4.500 eta 12.000 euro bitartekoak izan badira, %6.
b) Etekin garbiak 12.001 eta 24.000 euro bitartekoak izan badira, %12.
c) Etekin garbiak 24.001 eta 36.000 euro bitartekoak izan badira, %18.
d) Etekin garbiak 24.001 eta 36.000 euro bitartekoak izan badira, %24."
Berrogeita bost._94. artikulua.
"94. artikulua. Errenta-eratxikipenaren araubidean dauden erakundeak.
Errenta-eratxikipenaren araubidean dauden erakundeek enpresa edo lanbide jarduerak eginez lortzen dituzten etekinak zatika ordainduz gero, bazkide, erkide edo partaide bakoitzari erakundearen errentatik eratxikitzen zaion proportzioan ordainduko zaio, Zergari buruzko Foru Legeko 11. artikuluan eta III. tituluko II. kapituluko 5. ataleko 1. azpiatalean xedatutakoarekin bat etorriz."
Berrogeita sei._Bosgarren xedapen gehigarria, berria.
"Bosgarrena. Jarduera Ekonomikoen gaineko Zergaren kuotak.
Zerga batzuk eta zerga-neurri batzuk partzialki aldatu dituen martxoaren 17ko 16/2003 Foru Legeko bederatzigarren xedapen gehigarrian ezarritakoaren arabera, pertsona fisikoek ordaintzen dituzten Pertsona Fisikoen Errentaren gaineko Zergaren kuotak zerga horren ziozko konturako ordainketatzat hartuko dira, Zergari buruzko Foru Legeko 91. artikuluko 1. eta 2. idatz-zatietan ezarritakoaren ondorioetarako.
Baldin eta subjektu pasiboak udal kuota batzuk ordaindu baditu, udalerri desberdinetan zein udalerri berean jarduera bera lokal batean baino gehiagotan egiten duelako edo jarduera bat baino gehiago lokal batean, ordaindutako kuota guztiak dira kengarriak, eta bederatzigarren xedapen gehigarrian ezarritako kenkari-muga aplikatuko zaio kuota bakoitzari.
Errenta-eratxikipenaren araubidean dauden erakundeek ordaintzen dituzten Jarduera Ekonomikoen Zergaren kuoten ziozko kenkariak bazkide, erkide edo partaideek erakundearen errentatik eratxikitzen zaien proportzioaren arabera aplikatuko dituzte, Zergari buruzko Foru Legeko 49. artikuluko 2. idatz-zatian xedatutakoarekin bat etorriz.
Kenkari hori errenta-eratxikipenaren araubidean dagoen erakundearen zergaldiko negozioen zenbateko garbia 2.000.000 euro baino gutxiago izan denean soilik aplikatu ahal izanen da. Negozioen zenbatekoa kalkulatzeko, Sozietateen gaineko Zergari buruzko Foru Legeko 50. artikuluko 1. zenbakiko b) letrako a') azpiletran eta Sozietate Anonimoei buruzko Legearen Testu Bategineko 191. artikuluan xedatutakoa aplikatuko da.
Kenkari hau aplikatu ahal izateko, ezinbestekoa da ordaindutako kuotak agiri bidez frogatzea eta kasu bakoitzerako ezarritako gutxieneko kuota ez gainditzea."
Berrogeita zazpi._Hamahirugarren xedapen iragankorra, berria.
"Hirugarrena. Sozietate gardenen mozkinen dibidenduak eta partaidetzak.
Erakunde batek mozkinen dibidenduak edo partaidetzak banatzen baditu eta mozkinak zerga-gardentasunaren araubidean egon den zergaldietan sortu badira, ez dauka haien gainean Pertsona Fisikoen Errentaren gaineko Zergaren ziozko atxikipenik edo konturako sarrerarik aplikatu beharrik."
2. artikulua. urriaren 13ko 282/1997 Foru Dekretuaren bidez onetsitako Sozietateen gaineko Zergaren Erregelamenduko artikulu batzuk aldatu dira; honela geratu dira:
Bat._13. artikulua.
"13. artikulua. Aparteko mozkinak zerga-oinarrian sartu ez berrinbertitzen direnean.
Aparteko mozkinak berrinbertitu eta ondorioz haiek zerga-oinarria ez sartzeari dagokionez, ondare-elementuei dagozkien hornikuntzen zenbatekoak ez dira sartuko Zergari buruzko Foru Legeko 36. artikuluko 1. zenbakian aipatutako errentetan, haiek Zergaren ondorioetarako kengarri izan diren heinean."
Bi._18. artikulua, 1, hirugarren paragrafoa.
"Aurreko paragrafoetan xedatutakoa Zergari buruzko Foru Legeko 70 bis artikuluan ezarritako balizkoetan ere aplikatuko da, baldin eta eskualdatutakoaren zenbatekoa ibilgetu material edo ez-materialaren ondare-elementuetan berrinbertitzen badira."
Hiru._23. artikulua, 6.
"6. Lotutako pertsona edo erakundeen arteko eragiketen balorazio-proposamenak ebazteko epea sei hilekoa izanen da proposamena jasotzen denetik aurrera.
Epealdi horretan ebazpenik eman ezean, interesatuak proposamenari gaitziritzi zaiola pentsatu behar du."
Lau._27. artikulua, 4.
"4. Aldaketa-espedienteari subjektu pasiboak ekinez gero, 22. eta 23. artikuluan ezarritako prozedura egingo da."
Bost._30. artikuluaren enuntziatua aldatu da eta 4. zenbakia gehitu zaio.
"30. artikulua. Araubide berezia aukeratzea. Berriematea aurkeztu behar duten subjektuak. Berriematearen edukia."
"4. Zergari buruzko Foru Legeko 139. artikuluko 3. zenbakiko bigarren paragrafoan aipatutako balizkoetan, erakunde eskuratzaileak bertan aipatutako kenkaria aplikatu den zergaldietako Sozietateen gaineko Zergaren aitorpena ez ezik jarraiko informazio hau ere aurkeztu behar du:
a) Erakunde eskualdatzailearen identifikazioa eta partaidetzaren portzentajea.
b) Erakunde eskualdatzailearen partaidetzen balioa eta eskualdaketa-eguna, bai eta haien kontabilitate-balio teorikoa ere, urteko kontu homogeneizatuak oinarritzat hartuta kalkulatua.
c) Erakunde eskualdatzaileak erakundea desegitean partaidetzen eskuraketa-balioaren eta haien kontabilitate-balio teorikoaren artean dagoen diferentzia ondasunei eta eskubideei eratxikitzeko erabilitako balio eta denbora irizpideak frogatzea, eta Zergari buruzko Foru Legeko 139. artikuluko 3. zenbakiko a) eta b) letretan ezarritako betekizunak bete direla ere bai."
Sei._31. artikulua.
"31. artikulua. Zerga-baterakuntzaren araubidea aukeratzea.
Zerga-baterakuntzaren araubidea aukeratuz gero, horren berri eman behar zaio Ekonomi eta Ogasun Departamentuari.
Datu hauen berri eman behar zaio:
a) Zerga-taldeko kide diren sozietateen identifikazioa.
Espainiako lurraldeko egoiliar ez den erakundea talde bateko nagusia bada eta establezimendu iraunkorrak baditu, zerga-taldeko sozietateak ez ezik Espainiako lurraldeko egoiliar ez den erakundea ere identifikatu behar da.
b) Zerga-taldeko sozietateek zerga-baterakuntzaren araubidea aukeratzeko hartutako erabakien kopiak.
c) Sozietate nagusiak taldea eratzen duten gainerako sozietateekiko oro har eta banan-banan duen zuzeneko eta zeharkako esku-hartzearen portzentajeen zerrenda, eta partaidetza horien eskuraketa-egunen zerrenda.
Sozietate nagusiak Zergari buruzko Foru Legeko 117. artikuluan ezarri dena betetzen duela adierazi behar du."
Zazpi._II. tituluko IV. kapítuluaren izenburua.
"IV. KAPITULUA
Interes ekonomikodun Europako eta Espainiako elkartzeen, enpresen aldi baterako batasunen eta ondare sozietateen araubide bereziak."
Zortzi._32. artikulua.
"32. artikulua. Interes ekonomikodun Europako eta Espainiako elkartzeen eta enpresen aldi baterako batasunen betebeharrak.
1. Sozietateen gaineko Zergari buruzko Foru Legeko X. tituluko IV. kapituluan ezarritako araubide berezia aplikatu ahal zaien interes ekonomikodun Europako eta Espainiako elkartzeek, zerga horren aitorpenarekin batera, zergaldiko azken egunean egoitza Espainiako lurraldean duten bazkideen edo bazkidetasunari dagozkion eskubide ekonomikoak dituzten pertsonen edo erakundeen zerrenda aurkeztu behar dute, datu hauekin:
a) Bazkideen edo bazkidetasunari dagozkion eskubide ekonomikoak dituzten pertsonen edo erakundeen identifikazioa, zerga-egoitza eta partaidetza-portzentajea.
b) Kontzeptu hauei eratxiki beharreko kopuruen guztirako zenbatekoa:
1go. Kontabilitatearen emaitza.
2gn. Zerga-oinarria eta likidazio-oinarria.
3gn. Barruko eta nazioarteko zergapetze bikoitza saihesteko kenkariaren oinarria, errentak eman dituen erakundearen mota eta hango partaidetzaren portzentajea.
4gn. Hobarien oinarria.
5gn. Jarduera batzuetarako pizgarri diren kenkarien oinarria, eta, hala denean, aktibo finko material berrietan inbertitzearen ziozko kenkariaren oinarria.
6gn. Interes ekonomikodun elkartzeen atxikipenak eta konturako sarrerak.
c) Erreserben kargura banatutako mozkinen dibidendua eta partaidetzak; sozietateari araubide berezia ezin aplikatu izan zaion zergaldietakoak bereizi behar dira.
2. Interes ekonomikodun elkartzeek euren bazkideei, edo bazkidetasunari dagozkion eskubide ekonomikoak dituzten pertsona edo erakundeei, berariaz emandako ziurtagiriaren bidez jakinarazi behar diete guztira zenbat eratxikiko den aurreko zenbakiko b) letrako kontzeptuen zioz eta zenbat eratxikiko zaion bakoitzari.
3. Mozkinen dibidenduak eta partaidetzengatik zergarik ez ordaintzeko, Zergari buruzko Foru Legeko 107. artikuluko 3. zenbakiko lehen paragrafoan ezarrita dagoenari helduta, elkartzeek jarraian zehaztu den informazioa eman behar dute urteko kontuen memorian:
a) Erreserbetarako mozkinak, elkartzea araubide orokorrean egon den zergaldietan sortuak.
b) Erreserbetarako mozkinak, elkartzea araubide berezian egon den zergaldietan sortuak; bereiz ezarriko dira batetik Espainiako lurraldean egoitza duten bazkideei dagozkienak eta bestetik egoitza ez dutenei dagozkienak.
c) Erreserbetarako mozkinen dibidenduak eta partaidetzak banatuz gero, aurreko a) eta b) letretan aipatutako hiruetatik zein erreserba aplikatu den adierazi behar da, mozkin motaren arabera.
4. Urteko memoriako informazioa, aurreko zenbakian aipatutakoa, bertako b) letran aipatutako erreserbak dauden bitartean eman behar da, nahiz eta erakundea araubide berezian egon ez.
5. Artikulu honetako 3. eta 4. zenbakietan ezarritako informatu beharra aurreko 3. zenbakiko b) letran aipatutako erreserben titular diren erakundeek ere bete beharko dute.
6. Artikulu honetako aurreko zenbakietan xedatutakoa, aplikatu behar den heinean, Zergari buruzko Foru Legeko X. tituluko IV. kapituluan ezarritako araubide bereziari lotutako enpresen aldi baterako batasunak bete beharko dute, zergaldiko azken egunean Espainiako lurraldean egoitza duten batasuneko enpresei dagokienez."
Bederatzi._32 bis artikulua gehitu zaio II. tituluko IV. kapituluari.
"32 bis artikulua. Ondare-sozietateen betebeharrak.
1. Zergari buruzko Foru Legeko 97. eta 98. artikuluetan xedatutakoaren ondorioetarako, ondare-sozietateek informazio hau eman behar dute urteko kontuen memorian:
a) Erreserbetarako mozkinak, ondore-sozietatea Zergari buruzko Foru Legeko X. tituluko II. kapituluan ezarritakoa ez beste araubide batean egon den zergaldietan sortuak.
a) Erreserbetarako mozkinak, araubide berezi honetan egon den zergaldietan sortuak.
c) Erreserbetarako mozkinen dibidenduak eta partaidetzak banatuz gero, aurreko a) eta b) letretan aipatutako bietatik zein erreserba aplikatu den adierazi behar da, mozkin motaren arabera.
2. Urteko memoriako informazioa aurreko zenbakiko b) letran aipatutako erreserbak dauden bitartean eman behar da, nahiz eta erakundea araubide berezi honetan egon ez.
3. Memorian, halaber, gastuak errenta-iturrien artean banatzeko egin diren kalkuluei buruzko informazio xehekatua ere adierazi behar da.
4. Artikulu honetako ezarritako informatu beharra aurreko 1. zenbakiko b) letran aipatutako erreserben titular diren erakundeek ere bete beharko dute."
Hamar._34. artikulua, 13, eta 22. zenbakia gehitu.
"13. Interes ekonomikodun Espainiako eta Europako elkartzeek eta enpresen aldi baterako batasunek banatutako mozkinen dibidenduak edo partaidetzak, Zergari buruzko arau orokorren arabera ordaindu behar dutenenak izan ezik, zerga-oinarriaren eratxikipena jasan behar duten bazkideei dagozkienak eta erakundea Zerga Foru Legeko X. tituluko IV. kapituluko araubide berezian xedatutakoaren arabera ordaindu duen zergaldietan sortuak."
"22. Bizi-aseguruen hornidurak inbertitu diren aktiboak trukatuz lortutako errentak, inbertsioaren arriskua hartzaileak bereganatzen duenean.
Aurreko paragrafoan xedatutakoa aplikatzeko, aseguru-erakundeek aktiboen eskualdaketa edo itzulketa dela eta atxikipena aplikatu behar duten erakundeei jakinarazi behar diete bizi-aseguruaren hartzaileak bereganatu duela inbertsioaren arriskua eta Pertsona Fisikoen Errentaren gaineko Zergari buruzko abenduaren 30eko 22/1998 Foru Legeko 32. artikuluko 3. idatz-zatian ezarritako betekizunak betetzen direla. Atxikipena aplikatu behar duen erakundeak berriematea gorde beharko du, behar bezala sinaturik."
Hamaika._37. artikulua, 6.
"6. Atxikipena aplikatu beharra erregelamendu honetako 33. artikuluko 1. zenbakiko e) letran ezarritakotik datorrenean, atxikipenaren oinarria errentatzaileari kontzeptu guztiengatik ordaindutako zenbatekoa izanen da, Balio Erantsiaren gaineko Zerga bazter utzita."
Hamabi._39. artikulua.
"39. artikulua. Atxikipenaren edo kontura egindako sarreraren zenbatekoa.
Atxikipenaren edo kontura egindako sarreraren zenbatekoa oinarriari jarraiko portzentajeak aplikatuz kalkulatuko da:
1go. Oro har, %15.
2gn. Irudia ustiatzeko eskubidearen edo hura erabiltzeko baimenaren lagapenak sortutako errentak badira, %20."
Hamahiru._40. artikulua, 2. zenbakiko lehenengo paragrafoa.
"2. Atxikitzaileak eta konturako sarrera egin behar duenak urtean aplikatutako atxikipenen edo kontura egindako sarreren laburpena aurkeztu behar dute; paperean eginez gero, hurrengo urteko urtarrilean aurkeztu behar dute, eta ordenagailuan zuzenean irakurtzeko moduko euskarrian eginez gero, hurrengo urteko urtarrilaren 1etik otsailaren 20ra bitarteko epealdian. Laburpen horretan bere identifikazio-datuak ez ezik hartzaileen zerrenda ere agerrarazi behar da, datu hauekin:"
Hamalau._Bigarren xedapen gehigarria batu zaio testuari; ondorioz, lehengo xedapen gehigarria lehen xedapen gehigarria da orain.
"Bigarrena._Jarduera Ekonomikoen gaineko Zergaren kuotak.
Zerga batzuk eta zerga-neurri batzuk partzialki aldatu dituen martxoaren 17ko 16/2003 Foru Legeko bederatzigarren xedapen gehigarrian ezarritakoaren arabera, Sozietateen gaineko Zergaren subjektu pasiboek ordaintzen dituzten Jarduera Ekonomikoen gaineko Zergaren kuotak Sozietateen gaineko Zergaren konturako ordainketatzat hartuko dira, Zergari buruzko Foru Legeko 86. artikuluko 1. eta 2. idatz-zatietan ezarritakoaren ondorioetarako, baldin eta zergaldian jarduera guztietan egindako negozioen zenbateko garbia 2.000.000 euro baino gutxiago izan bada.
Negozioen zenbateko garbia kopuru hori edo gehiago izan bada, ezin aplikatu izanen da kenkaririk jardueretan ordaindutako kuoten zioz.
Negozioen zenbatekoa kalkulatzeko, Zergari buruzko Foru Legeko 50. artikuluko 1. zenbakiko b) letrako a') azpiletran eta Sozietate Anonimoei buruzko Legearen Testu Bategineko 191. artikuluan xedatutakoa aplikatuko da.
Baldin eta subjektu pasiboak udal kuota batzuk ordaindu baditu, udalerri desberdinetan zein udalerri berean jarduera bera lokal batean baino gehiagotan egiten duelako edo jarduera bat baino gehiago lokal batean, ordaindutako kuota guztiak dira kengarriak, eta bederatzigarren xedapen gehigarrian ezarritako kenkari-muga aplikatuko zaio kuota bakoitzari.
Errenta-eratxikipenaren araubidean dauden erakundeek ordaintzen dituzten Jarduera Ekonomikoen Zergaren kuoten ziozko kenkariak Sozietateen gaineko Zergaren subjektu pasibo diren bazkide, erkide edo partaideek aplikatuko dituzte, bakoitzak erakundearen errentatik eratxikitzen zaion proportzioaren arabera, Pertsona Fisikoen Errentaren gaineko Zergari buruzko Foru Legeko 49. artikuluko 2. idatz-zatian xedatutakoarekin bat etorriz. Kenkari hori errenta-eratxikipenaren araubideko erakundearen zergaldiko negozioen zenbateko garbia 2.000.000 euro baino gutxiago izanez gero eta Zergari buruzko Foru Legeko 50. artikuluko 1. zenbakiko b) letrako a') azpiletran xedatutakoa aplikatu ahal izanez gero soilik aplikatu ahal izanen da.
Kenkari hau aplikatu ahal izateko, ezinbestekoa da ordaindutako kuotak agiri bidez frogatzea eta kasu bakoitzerako ezarritako gutxieneko kuota ez gainditzea."
XEDAPEN INDARGABETZAILEA
Foru dekretu honek abenduaren 14ko 352/1998 Foru Dekretua indargabetu du, Zerga Administrazioari informazioa eman beharrari buruzko xedapen batzuk garatu zituena.
AZKEN XEDAPENA
Foru dekretu hau Nafarroako ALDIZKARI OFIZIALean argitaratu eta biharamunean jarriko da indarrean.
Iruña, bi mila eta hiruko .....aren ....(e)(a)n._Nafarroako Gobernuko lehendakaria, Miguel Sanz Sesma._Ekonomi eta Ogasun kontseilaria, Francisco J. Iribarren Fentanes.
Iragarkiaren kodea: A0306229
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
