I. NAFARROAKO FORU KOMUNITATEA
Agintariak eta Langileak
EBAZPENA, 2003ko martxoaren 10ekoa, Funtzio Publikoaren zuzendari nagusiak emana. Ondoko deialdia onesten du, Nafarroako administrazio publikoetako B mailako suhitzaile-ofizialak, oposizioz, Nafarroako Foru Komunitateko Administrazioaren zerbitzuko A mailako suhiltzaile-ofizial mailan sailkatzekoa.
Funtzio Publikoaren zuzendari nagusiak 2003ko martxoaren 10ean emandako Ebazpenez onetsi da deialdi hau, aukera ematen diena Nafarroako administrazio publikoetako funtzionarioei Nafarroako Foru Komunitateko Administrazioaren zerbitzuko A mailako suhiltzaile-ofizial gisa sailkatzeko, baldin eta B mailako suhiltzaile-ofizialaren izendapena eta benetan emandako bost zerbitzu urteko antzinatasuna bazuten apirilaren 3ko 8/2002 Foru Legeak indarra hartzean, zeinak aldatu baitzituen Nafarroako Administrazio Publikoetako langileendako neurriei buruzko maiatzaren 24ko 10/2001 Foru Legea eta otsailaren 13ko 1/1987 Foru Legea, Nafarroako Administrazio Publikoen menpeko Polizia Kidegoei buruzkoa.
O I N A R R I A K
1._Arau orokorrak.
1.1. Deialdi honen xedea da Nafarroako administrazio publikoetako funtzionarioak Nafarroako Foru Komunitateko Administrazioaren zerbitzuko A mailako suhiltzaile-ofizial gisa oposizioz sailkatzea baldin eta B mailako suhitzaile-ofizialaren izendapena eta benetan emandako bost zerbitzu urteko antzinatasuna bazituzten apirilaren 3ko 8/2002 Foru Legeak indarra hartzean, zeinak aldatu baitzituen Nafarroako Administrazio Publikoetako langileendako neurriei buruzko maiatzaren 24ko 10/2001 Foru Legea eta otsailaren 13ko 1/1987 Foru Legea, Nafarroako Administrazio Publikoen menpeko Polizia Kidegoi buruzkoa. Hori guztia gorago aipatutako apirilaren 3ko 8/2002 Foru Legeko Xedapen Iragankor bakarrean ezarritakoa betetzeko.
Xedapen horretan ezarritakoaren arabera, oposizioa gainditzen ez dutenek Nafarroako Adiministrazio Publikoen zerbitzuko Langileen Estatutuaren hamabosgarren xedapen gehigarrian araututako egoeran iraunen dute.
1.2. Izendapenak Nafarroako Foru Komunitateko funtzionario izaera eta A mailako suhiltzaile-ofizialaren lanpostua emanen die izendatuei, eta, beraz, aplikagarri zaizkien xedapen indardunek funtzionarioentzat onartzen dituzten eskubide eta betebehar guztiak izanen dituzte.
1.3. Hautapen-probak gainditzen dituzten izangaiak A mailako suhiltzaile-ofizialaren lanpostu baterako izendatuko dira eta plantilla organikoan maila eta lanpostu horretarako finkatzen diren lansariak jasoko dituzte. Nafarroako Gobernuko Lehendakaritza, Justizia eta Barne Departamentuari atxikiko zaizkio.
1.4. A mailako suhiltzaile-ofizial izendatu eta Nafarroako Foru Komunitateko Administrazioan sartzen direnak Gizarte Segurantzako Araubide Orokorrean afiliatuko dira eta alta emanen zaie, araubide horretan jasotako babesa izan dezaten.
Hala ere, deialdi honen xede diren lanpostuetan aritzeko izendatzen diren funtzionarioek, baldin eta afiliatuak badaude Nafarroako Administrazio Publikoen zerbitzuko Langileen Estatutuak eta gainerako xedapen osagarriek aipatzen duten eskubide pasibo eta osasun laguntza eta laguntza sozialaren araubidean, aukera izanen dute bertan segitzeko edo Gizarte Segurantzaren Araubidera pasatzeko.
1.5. Izendatutako izangaiak destinoa duen herrian bertan bizi beharra du, eta hori betetzeko udalerri horretan finkatuko du bizilekua. Administrazio organo eskudunek destinoa aldatzen ahalko dute.
1.6. Lanaldiaren araubidea zerbitzuaren beharretara moldatuko da, eta administrazio organo eskudunek noiznahi aldatzen ahalko dute.
2._Izangaiek bete beharreko baldintzak.
2.1. Oposizio honetan onartuak izateko, izangaiek baldintza hauek bete beharko dituzte eskabideak aurkezteko epea bukatzen den egunean:
a) Nafarroako administrazio publikoetako edozeinetako funtzionarioa izatea.
b) B mailako suhiltzaile-ofizial izateko lanpostu baterako izendatua izatea, 2002ko apirilaren 11 baino lehen.
c) Gutxienez 2002ko apirilaren 11 baino lehenagoko 5 zerbitzu urteko antzinatasuna frogatzea.
2.2. Aurreko idatz-zatian zehaztutako beharkizunak izendapena bitarte bete behar dira, eta bai hautapen-prozedurak irauten duten bitartean ere.
3._Eskabideak.
3.1. Deialdian parte hartzeko eskabideak aurkeztu beharko dira Nafarroako Gobernuko Erregistro Orokorrean (Karlos III.a etorbidea, 2, Iruña) edo Administrazio Publikoen Araubide Juridikoari eta Guztientzako Administrazio Prozedurari buruzko azaroaren 20ko 30/1992 Legeko 38.4 artikuluan aurreikusitako bideetako edozeinetatik, deialdia Nafarroako ALDIZKARI OFIZIALean argitaratu eta biharamunetik hogeita hamar egun naturaleko epean. Eskabideak deialdi honetan argitaratutako ereduari lotuko zaizkio (Nafarroako Gobernuaren Informazio Bulegoan jasotzen ahal da, Karlos III.a, 2, atalondoan) eta bertan, izangaiek adierazi beharko dute, kasu bakoitzean, eskatutako baldintza guztiak betetzen dituztela eskabidea aurkezteko epea bukatzen den egunean.
3.2. Behar bezala betetako eskabideari, ondoren adierazten diren honako agiri hauek erantsiko zaizkio:
3.2.1. Nortasun Agiri Nazionalaren bi aldeen fotokopia, behar bezala konpultsatua.
3.2.2. Nafarroako Foru Komunitateko Administrazioaren kontuan 25 euro ordaindu izana frogatzen duen agiria. Kopuru horrekin espedientearen formalizazioa eta azterketa-eskubideak ordainduko dira.
3.2.3. Deialdiko 2.1 oinarrian eskatzen diren beharkizunak betetzen dituela frogatzen duen dokumentazioa.
3.3. Eskabideak aurkezteko epea luzaezina izanen da.
4._Izangaien onarpena eta erreklamazioak.
4.1. Eskaerak aurkezteko epea bukaturik, Funtzio Publikoaren zuzendari nagusiak ebazpena emanen du izangai onartu eta baztertuen behin-behineko zerrenda onesteko, eta Nafarroako ALDIZKARI OFIZIALean argitara dadila aginduko.
4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, deialdiko baldintzak betetzen dituztela egiaztatzeko agirietan akatsik egin badute, zuzentzeko.
4.3. Erreklamazioetarako epea bukatutakoan eta horiek ebatzita, Funtzio Publikoaren zuzendari nagusiak onartu eta baztertuen behin betiko zerrenda onesten duen ebazpena emanen du, eta Nafarroako ALDIZKARI OFIZIALean argitara dadila aginduko du.
5._Epaimahaia.
5.1. Epaimahaia honako hauek osatuko dute:
Epaimahaiburua: Javier Vitrián Arigita jauna, Nafarroako Su-itzaltze eta Salbamendu Zerbitzurako Partzuergoko zuzendaria.
Ordezkoa: Miguel González Fontana jauna, Nafarroako Su-itzaltze eta Salbamendu Zerbitzurako Partzuergoko Zuzendaritza Kontseiluko zuzendariordea.
Mahaikidea: Francisco José Fernández Elizalde jauna, Herritarren Babeserako Zerbitzuko zuzendaria.
Ordezkoa: Elena Iribarren Górriz andrea, Nafarroako Gobernuko Herritarren Babeserako Zerbitzuko Aurreneurrien Ataleko burua.
Mahaikidea: Ramón Loitegui Aldaz jauna, Nafarroako Administrazio Publikoaren Institutuko zuzendari kudeatzailea.
Ordezkoa: Juan Barián Sola jauna, Segurtasun Eskolaren Zerbitzuko zuzendaria.
Mahaikidea: Nafarroako Foru Komunitaeko Administrazioko Langileen Batzordeak izendatzekoa.
Ordezkoa: Nafarroako Foru Komunitaeko Administrazioko Langileen Batzordeak izendatzekoa.
Mahaikide idazkaria: José Miguel Gorricho Ochoa jauna, Barne Zuzendaritza Nagusiko Araubide Juridiko eta Administratiboaren Zerbitzuko zuzendaria.
Ordezkoa: Purificación González Merchán andrea, Barne Zuzendaritza Nagusiko Afera Administratiboen Ataleko burua.
Epaimahaia hautapen probak hasi baino lehen eratuko da.
5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.
Organo kolegiatuaren eraketak eta jardunak balio izateko, mahaiburuak eta mahaikide-idazkariak edo haien ordezkoek bertan egon beharko dute.
5.3. Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legean aipatzen diren abstentzio arrazoietako bat gertatzen denean, epaimahaiko kideek ezin izanen dute epaimahaian parte hartu, eta deialdia egin duen organoari eman beharko diote horren berri.
Izangaiek, halaber, zilegi izanen dute epaimahaikideak errefusatzea, arrazoi horietako bat gertatzen denean.
5.4. Epaimahaiak gehiengoz erabakiko ditu deialdi honetako oinarrien interpretazioari eta aplikazioari buruz sor daitezkeen gorabeherak oro.
5.5. Epaimahaiak aholkulari adituen laguntza eska dezake, jarritako proban laguntzeko. Aholkulari horiek espezialitate teknikoetan aritzera mugatuko dira, eta epaimahaiari horietan baizik ez diote lagunduko.
6._Oposizioaren nondik norakoak.
6.1. Oposizioa 2003ko ekainean hasiko da.
Onartu eta baztertuen behin betiko zerrenda onesten duen ebazpenean berean zehaztuko da ariketak non, noiz eta zer ordutan hasiko diren.
6.2. Oposizioak atal hauek izanen ditu:
a) Ariketa idatzia, baztergarria. Deialdiko II. eranskineko gai-zerrendako bi gai (bata lehenbiziko zatikoa eta bestea bigarrenekoa) zozketaz aukeratu ondoren, gehienez ere 4 ordutan idatziz azaldu beharko dira.
Ariketa idatziari gehienez ere 20 puntu emanen zaizkio, gai bakoitzari 10 bitarte.
Kanpo geratuko dira ariketa bakoitzaren puntuazioaren gutxienez erdia ateratzen ez duten izangaiak edo proposatutako edozein gaitan 0 puntuazioa ateratzen dutenak.
Ariketarako deialdi bakarra eginen da. Izangaiek Nortasun Agiri Nazionala edo epaimahaiak nahikoa dela kontsideratzen duen beste identifikazio agiri bat aldean dutela agertu beharko dute. Oposiziotik baztertuta geratuko dira agertzen ez diren izangaiak edo nortasuna frogatzen ez dutenak.
Ariketa kalifikatu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den lekuan, probak gainditu dituzten izangaien zerrenda, bakoitzaren kalifikazioekin.
b) Ehun eta hogei orduko prestakuntza-ikastaro bat, baztergarria eta Nafarroako Administrazio Publikoaren Institutuak antolatua, su-itzaltze eta salbamenduko zerbitzu publikoen kudeaketarekin zerikusia duen proba bat barne.
Lehiaketaldian 50 puntu emanen dira gehienez. Bazterturik geldituko dira gutxienez 25 puntu lortzen ez dituzten izangaiak.
7._Probak gainditzen dituztenen zerrenda eta izendapen proposamena.
7.1. Prestakuntza ikastaroa amaiturik, Nafarroako Administrazio Publikoaren Institutuak izangaien kalifikazioa igorriko dio epaimahaiari.
7.2. Epaimahaiak izangaien azken kalifikazioa onetsiko du, eta Nafarroako Gobernuaren iragarki-oholean argitaratuko du gainditu dutenen zerrenda, lortutako puntuazioaren arabera ordenatua, eta haien aldeko izendapen proposamena igorriko dio Funtzio Publikoaren zuzendari nagusiari.
8._Izendapena eta jabetza hartzea.
8.1. Funtzio Publikoaren zuzendari nagusiak A mailako suhiltzaile-ofizial izendatuko ditu izendapen-proposameneko izangaiak.
8.2. Izendapena Nafarroako ALDIZKARI OFIZIALean argitaratuko da eta izangai izendatuek hilabeteko epean jabetu beharko dute beren lanpostuaz, izendapenaren jakinarazpenetik kontatzen hasita. Hala egiten ez dutenek, ezinbesteko kasuak salbu, A mailako suhiltzaile-ofizialaren lanpostuan aritzeko eskubidea galduko dute.
9._Errekurtsoak.
Deialdiaren, oinarri hauen eta aplikazio egintzen kontra gora jotzeko errekurtsoa jar daiteke, Nafarroako Gobernuari zuzendua, hilabeteko epean, errekurtsoaren xede den egintza argitaratu edo jakinarazi eta biharamunetik aurrera, Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legearen 114. eta 115. artikuluetan eta hura aldatzen duen urtarrilaren 13ko 4/1999 Legean xedaturikoarekin bat.
Iruñean, bi mila eta hiruko martxoaren hamarrean._Funtzio Publikoaren zuzendari nagusia, Ignacio Bandrés Urriza.
I. ERANSKINA
Eskabide eredua
Izena: ..................., adinez nagusia, N.A.N: ............, jaioteguna: .........., jaioterria: .........., probintzia: .........., egungo helbidearen herria: .........., probintzia: .........., kalea: .........., zenbakia.: ..........., solairua: ........., letra: ......., posta kodea: ............, etxeko telefonoa: .........., laneko telefonoa: ..........., sakelako telefonoa: ...........
Hau diot:
Betetzen ditudala apirilaren 3ko 8/2002 Foru Legeko Xedapen Iragankor bakarrean ezarritakoa betetzeko Funtzio Publikoaren zuzendari nagusiaren Ebazpenez egindako deialdian (A mailako suhiltzaile-ofizial oposizioz sailkatzekoan, ... . Nafarroako ALDIZKARI OFIZIALean argitaratu zen, ...ren...an), eskatzen diren baldintza guztiak (lege horrek aldatu zituen Nafarroako Administrazio Publikoetako langileendako neurriei buruzko maiatzaren 24ko 10/2001 Foru Legea eta otsailaren 13ko 1/1987 Foru Legea, Nafarroako Administrazio Publikoen menpeko Polizia Kidegoei buruzkoa).
Horrenbestez,
Eskatzen dut onartua izatea oposizioz A mailako suhiltzaile-ofizial gisa sailkatzeko deialdian.
Iruñean, 2003ko .............aren ............(e)an.
Izenpea
FUNTZIO PUBLIKOAREN ZUZENDARI NAGUSIA.
II. ERANSKINA
Gai zerrenda
Lehen zatia
1. gaia._Antolamendu juridikoaren iturriak. Konstituzioa arau gisa. Legeak. Motak. Erregelamenduak. Beste iturri batzuk: ohitura, printzipio orokorrak. Jurisprudentzia.
2. gaia._Administrazio Publikoa. Kontzeptua, motak, helburuak. Antolaketa printzipioak. Lege formala, legegintza delegatua eta Lege Dekretua: kontzeptuak. Erregelamendu-ahalmena: kontzeptua eta mugak. Erregelamendu motak. Arauen hierarkia.
3. gaia._Administrazio egintza. Kontzeptua, ezaugarriak eta sailkapena. Administrazio egintzaren elementuak: eskumena, edukia, xedea eta forma. Egintza tazituak eta isiltasun administratiboa. Egintza administratiboaren jakinarazpena.
4. gaia._Nafarroako Administrazio Publikoen zerbitzuko langileak. Nafarroako Administrazio Publikoen zerbitzuko langileriaren Estatutua. Langile motak: sarrera, administrazio karrera, eskubideak eta betebeharrak.
5. gaia._Lan arriskuei aurrea hartzea: Europako arautegia. Lan Arriskuei Aurrea Hartzeari buruzko 31/1995 Legea. 39/1997 Errege Dekretua: Prebentzio-zerbitzuen erregelamendua. 135/1998 Foru Dekretua, arautegi hori Foru Komunitateko Administrazioaren eta haren erakunde autonomoen esparruari egokitzen diona.
6. gaia._Aurrekontuak prestatzeko teknikak. Aurrekontu administratiboa: oinarri ekonomiko-finantzario, politiko eta kontabilitatekoak. Laguntza mota: lanen araberako aurrekontua; helburuen araberakoa; programen araberakoa; zero oinarriko aurrekontua. Aurrekontu klasikoa nola prestatzen den. Exekuzio-aurrekontua; kontzeptua eta prestaketaren faseak.
7. gaia._Ekonomia publikoa. Araudia: Nafarroako Ogasun Publikoari buruzko Foru Legea. Nafarroako Aurrekontu Orokorren prestaketa. Sektore publikoaren kontabilitatea. Aurrekontuaren exekuzioaren kontrola: barne eta kanpo kontrolak.
Bigarren zatia
8. gaia._Herritarren babesa. Kontzeptua. Jarduketako prozedurak eta mekanismoak. Eginbehar eta betebeharrak herritarren babesaren arloan. Aurrea hartzeko esku-hartzeak. Larrialdiko esku-hartzeak; zuzendaritza eta antolamendua. Arau-hausteak eta zehapenak. Herritarren Babeserako Batzorde Nazionala. Nafarroako Herritarren Babeserako Batzordea.
9. gaia._Herritarren babesaren plangintza. Herritarren babeserako planak. Sailkapena eta prestatzeko irizpidea. Eskualdeetako planak: zertarako prestatzen diren eta egiteko irizpideak. Plan bereziak: zertarako prestatzen diren eta egiteko irizpideak. Plan bereziak zein arriskutarako diren. Plan berezien motak. Plan berezien modalitateak, zentzu hertsian. Interes nazionala, eta adierazpen horren ondorioak.
10. gaia_Hondamendi-arriskuak eta haien garrantzia. Arrisku handien sailkapena: arrisku naturalak eta antropikoak. Arrisku handiei aurre egiteko sistema. Oinarri konstituzionalak. Herritarren babesa: errealitate juridiko bereizia. Eskumenen banaketa; abenduaren 18ko 123/1984 AKEa; uztailaren 19ko 133/1990 AKEa. Herritarren babesa: zerbitzu publikoa. Esparru objektiboa: arrisku naturalak eta teknologikoak. Esparru funtzionala: arriskuen aurreikuspena eta aurreneurriak; larrialdien plangintza; esku-hartzea; errehabilitazioa eta errekuperazioa. Elementu subjektiboa; subjektuek sisteman duten zeregina: Estatuaren, autonomi erkidegoen, toki entitateen, partikularren eta beste entitate batzuen zereginak. Herritarren babeserako zerbitzuen funtzionamenduari buruzko erantzukizun balizkoa.
11. gaia._Uholdeak. Uholde-arriskua: tipologia eta eragileak. Jardunbideak; uholde-arriskuaren aurreikuspena; iragarpen eta zainketa meteorologikoa; iragarpen eta zainketa hidrologikoa. PREVIMETa. Arriskuaren zehaztapena. Aurreneurriak. Uholde-arriskuaren aurreko plangintza. Herritarren Babesak uholde-arriskuaren aurrean emandako plangintza-jarraipide oinarrizkoa; Uharka eta urtegientzako araudi teknikoa.
12. gaia._Lurrikarak. Fenomenoaren deskribapena eta eragile posibleak. Lurrikaren eskala-neurketa; intentsitate eta magnitude sismikoak. Lurrikara-arriskua. Lurrikara-arriskuaren aurrean zer egin; aurreikuspena, aurre-neurriak eta plangintza hirigintzan. Larrialdi sismikoetarako aurre-neurriak.
13. gaia._Arrisku kimikoa. Arrisku kimikoa gutxitzearekin zerikusia duen araudi orokorra; jarduera sailkatuak; ingurumeneko inpaktuaren neurketa; industri segurtasuna. Arrisku kimikoari nola erantzuten zaion Seveso zuzentarauan; istripu larriei aurrea hartzeko Espainiako araudia. Arrisku kimikoaren plangintza berezia.
14. gaia._Basoetako suteak. Arazoaren agerialdeak eta zehaztapena. Erantzun juridikoa: oihanetako suteetarako Estatuaren araudia: legeria oinarrizkoa; aurreneurriak eta nola ezarri. Oihanetako suteen sailkapena larritasunaren arabera. Herritarren babesa nola antolatu oihanetako suteen arriskuaren aurrean. Planen koordinazioa.
Iragarkiaren kodea: A0302829
