I. NAFARROAKO FORU KOMUNITATEA
Xedapen Orokorrak. Foru Aginduak
FORU AGINDUA, 2003ko urtarrilaren 20koa, Nekazaritza, Abeltzaintza eta Elikadura kontseilariak emana, Nafarroako Nekazaritzako Kontabilitatearen Informazio Sareko (N.N.K.I.S.) kontabilitate bulegoendako 2003. urteko funtzionamendu arauak ematen dituena.
1988ko maiatzaren 2ko Foru Aginduaren bitartez, Nafarroako Nekazaritzako Kontabilitatearen Informazio Sarea (N.N.K.I.S.) sortu zen. Kontabilitate zentroaren zuzendaritza eta kudeaketa, Nekazaritza, Abeltzaintza eta Elikadura Departamentuko Idazkaritza Teknikoaren Nekazaritzako Kontabilitate Sarearen Bulegoaren esku utzi zen.
Foru Agindu horren 2. artikuluaren b) idatz-zatian adierazten da kontabilitate bulegoak Kontabilitate Zentroaren lotune eta laguntzagune izanen direla nekazaritzako ustiategi kolaboratzaileendako.
3. artikuluak zehazten duenez, Kudeaketarako Institutu Teknikoek kontabilitate bulegoaren izaera eduki dezakete, beren gobernu organoek erabakita hala eskatzen badute.
1989ko apirilaren 24ko Foru Aginduaren bidez, Nafarroako Nekazaritzako Kontabilitatearen Informazio Sarea (N.N.K.I.S.) osatzen duten kontabilitate bulegoak sortu ziren.
2002. urteko ekitaldiari dagokion dirulaguntza jaso ahal izateko funtzionamendu arau batzuk ezarri behar dira sareko kontabilitate bulegoetarako.
Hori horrela, eta Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legeko 36.2b artikuluak ematen dizkidan eskurantzak erabiliz,
AGINDU DUT:
1. artikulua. Kontabilitate bulegoen betebeharrak, beren nekazaritza enpresen kontabilitateari dagozkionetan, ondokoak izanen dira:
a) Ekitaldi ekonomiko bakoitzean, ustiategiak izan dituen merkataritza, nekazaritza, finantza eta bestelako eragiketei dagozkien kontabilitate datuak hartzea. Datu horiek eredu gisako "Liburu Nagusi" edo Kontabilitate Koaderno den dokumentu normalduan bildu, sailkatu eta transkribatuko dira edo, bestela, euskarri magnetikoan, datuak biltzeko behar den sisteman. Gaztigu-orri normalduak erabili beharko dira.
b) Ekitaldiaren bukaeran, ekitaldiko kontabilitate laburpenak banda magnetiko bidez betetzea, a) puntuaren arabera bildutako informaziotik abiatuta.
2. artikulua. 2003ko ekitaldirako Kontabilitate Bulegoak bere menpe dagoen eta N.N.K.I.S.ko kide den nekazaritza enpresa bakoitzagatik 480, 81 euroko dirulaguntza bat hartuko du kontabilitate osoak badira eta 240,4 euroko dirulaguntza sistema integratuko kontabilitateetan, bakarrik sistemaren parte baten datuak biltzen badituzte.
3. artikulua. Nekazaritzako Kontabilitate Sarearen Bulegoak ekitaldiaren barreneko edozein momentutan eskatu ahalko du metatutako informazioaren zerrendak eskuratzea, bai eta egoki deritzen froga guztiak egin ere.
4. artikulua. Esku-agiri normalduak Nekazaritza, Abeltzaintza eta Elikadura Departamentuko Idazkaritza Teknikoak emanen ditu.
Kontabilitate bulegoei Idazkaritza Tekniko horrek emanen dizkie agiri horiek betetzeko jarraibideak, baita kontabilitateak ongi burutzeko beharrezkoak direnak ere.
5. artikulua. Kontabilitate bulegoak nahi hainbat kontabilitate teknikari erabiliko ditu, koordinazioa eta antolakuntza agente bakar batek eginen baditu ere; agente hori bitartekari tekniko gisa Nekazaritzako Kontabilitate Sarearen Bulegoaren aitzinean solaskide ere izanen da.
6. artikulua. Nekazaritzako Kontabilitate Sarearen Bulegoak kasuan kasuko kontabilitate bulegoari nahi hainbatetan egiten ahalko dio bisita. Agerraldiaz aldez aurretik gaztigatu beharko zaio.
7. artikulua. Ustiategi bakoitzari dagokion dokumentazio osoa Nekazaritzako Kontabilitate Sarearen Bulegoaren eskuetan utzi beharko da, euskarri magnetikoan, 2004ko apirilaren 30a baino lehenago.
8. artikulua. N.N.K.I.S.ren kolaboratzaile diren nekazaritza ustiategien datu guztiak, kontabilitate bulegoaren esku baldin badaude, sekretu estatistikoaren menpe egonen dira, eta Nekazaritza, Abeltzaintza eta Elikadura Departamentuak baizik ez ditu argitaratu edo erabili ahalko, beti ere modu anonimoan, eta zenbakia izanik erreferentzia bakarra.
Nola edo hala N.N.K.I.S.en parte hartzen duten pertsonek ere sekretu estatistikoa mantentzeko beharkizuna dute, arestiko idatz-zatian deskribatu den gisa berean.
AZKEN XEDAPENA
Foru Agindu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, bi mila eta hiruko urtarrilaren hogeian._Nekazaritza, Abeltzaintza eta Elikadura kontseilaria, Ignacio Javier Martínez Alfaro.
Iragarkiaren kodea: A0300910
