I. NAFARROAKO FORU KOMUNITATEA
Agintariak eta Langileak
455/2003 FORU AGINDUA, urriaren 17koa, Hezkuntza kontseilariak emana, Zerbitzuak Ikuskatzeko eta Ikuskapen Teknikorako Zerbitzuko hezkuntza ikuskatzaile izateko bi lanpostu, merezimendu lehiaketa bidez eta zerbitzu eginkizunetan betetzeko deialdia onesten duena.
Hezkuntzaren Kalitateari buruzko abenduaren 23ko 10/2002 Lege Organikoaren hamaikagarren xedapen gehigarriaren 3. idatz-zatiaren arabera, hezkuntzako ikuskatzaileen kidegoan sartzeko beharrezkoa da irakaskuntzaren funtzio publikoa osatzen duten kidegoetako baten kide izatea, eta irakaskuntzan gutxienez sei urteko esperientzia izatea. Kidego horretan sartzeko sistemari dagokionez, adierazten du lehiaketaldian izangaien ibilbide profesionala eta irakasle gisa dituzten berariazko merezimenduak baloratuko direla. Merezimendu horien artean bereziki baloratuko da Eskolako Irakaskuntzako katedradunen kidego bateko kide izatea.
Hezkuntza eta Kultura Departamentuko Hezkuntza Ikuskatzailetzaren antolaketa eta funtzionamendua arautu eta Hezkuntza Ikuskatzaileen Kidegoan sartu eta bertako lanpostuak betetzeko sistema ezartzen duen irailaren 13ko 365/1999 Foru Dekretuak (Nafarroako ALDIZKARI OFIZIALa, 1999/10/01), bere bigarren xedapen gehigarriaren 1. puntuan ezartzen du Hezkuntza Ikuskatzaile kidegoko plantillako lanpostu hutsak zerbitzu eginkizunetako irakaskuntzako funtzionarioekin beteko direla aldi baterako, berdintasun, merezimendu, gaitasun eta publizitate printzipioei jarraikiz.
Azken oposizio-lehiaketan hautatu gabe geratu eta aipatu bigarren xedapen gehiagarri horren 2. puntuan ezarritako baldintzak betetzen dituen izangairik ez dagoenez, bidezko da lanpostu hutsak abenduaren 28ko 2193/1995 Errege Dekretuan finkatutako baldintzak betetzen dituzten irakasle funtzionarioekin betetzea, horrela hezkuntza ikuskatzaileen kidegora sartuko baitira berdintasun, merezimendu eta gaitasun printzipioei jarraikiz, bai eta publizitate printzipioari jarraikiz ere, hautapenerako deialdi baten bidez, aipatu bigarren xedapen gehiagarri horren 3. puntuarekin bat.
Zerbitzuak Ikuskatzeko eta Ikuskapen Teknikorako Zerbitzuak aurkeztutako proposamenari jarraikiz, bidezko da hezkuntza ikuskatzaile izateko bi lanpostu, Musika eta Ingelesaren irakaskuntzan espezializatuak, merezimendu lehiaketa bidez eta zerbitzu eginkizunetan betetzeko deialdia onestea.
Horrenbestez, apirilaren 1eko 165/1996 Foru Dekretuaren bidez esleitu dizkidaten eskurantzak erabiliz,
AGINDU DUT:
1. Hezkuntza ikuskatzaile izateko bi lanpostu, Musika eta Ingelesaren irakaskuntzan espezializatuak, merezimendu lehiaketa bidez eta zerbitzu eginkizunetan betetzeko deialdia onestea. Destinoa Zerbitzuak Ikuskatzeko eta Ikuskapen Teknikorako Zerbitzuan izanen dute. Deialdia foru agindu honen eranskinean ageri da.
2. Foru agindu honen kontra interesatuek gora jotzeko helegitea jartzen ahal dute, Nafarroako Gobernuari zuzendua, Nafarroako ALDIZKARI OFIZIALean argitara eman eta biharamunetik hilabeteko epean.
3. Foru agindu hau eta bere eranskina Nafarroako ALDIZKARI OFIZIALean argitaratzea, behar diren ondorioak izan ditzaten.
4. Foru agindu hau eta eranskina Idazkaritza Teknikora, Giza Baliabideen Zerbitzura eta Zerbitzuak Ikuskatzeko eta Ikuskapen Teknikorako Zerbitzura igortzea, behar diren ondorioak izan ditzaten.
Iruñean, bi mila eta hiruko urriaren hamazazpian._Hezkuntza kontseilaria, Luis Campoy Zueco.
E R A N S K I N A
Hezkuntza ikuskatzaile izateko bi lanpostu, Musika eta Ingelesaren irakaskuntzan espezializatuak, merezimendu lehiaketa bidez eta zerbitzu eginkizunetan betetzeko deialdiaren oinarriak
Lehena._Deialdiaren xedea.
Deialdi honen xedea da hezkuntza ikuskatzaile izateko bi lanpostu, Musika eta Ingelesaren irakaskuntzan espezializatuak, merezimendu lehiaketa bidez eta zerbitzu eginkizunetan betetzea.
Bigarrena._Betebeharrak.
1. Deialdi honetan parte hartu ahalko dute Hezkuntza Departamentuari atxikitako irakasle funtzionarioek, baldin eta Hezkuntzaren Kalitateari buruzko abenduaren 23ko 10/2002 Lege Organikoan, abenduaren 28ko 2193/1995 Errege Dekretuan eta Hezkuntza eta Kultura Departamentuko Hezkuntza Ikuskatzailetzaren antolaketa eta funtzionamendua arautu eta hezkuntza ikuskatzaileen kidegoan sartu eta bertako lanpostuak betetzeko sistema ezartzen duen irailaren 13ko 365/1999 Foru Dekretuan ezarritakoari jarraikiz, baldintza hauek betetzen badituzte:
a) Irakaskuntzaren funtzio publikoa osatzen duten kidegoetako baten kide izatea.
b) Irakasle gisa gutxienez sei urteko esperientzia frogatzea, hezkuntza sistemako edozein ikastetxe eta mailatan.
c) Doktore, lizentziatu, ingeniari edo arkitektoaren titulua izatea.
d) Jardunean edo zerbitzu eginkizunetan egotea.
2. Aurreko atalean jasotako betebehar guztiak eskabideak aurkezteko epea amaitzen den egunean bete beharko dira eta eskainitako lanpostuaren jabetza hartu arte betetzen jarraitu.
Hirugarrena._Parte hartzeko eskabideak eta aurkeztu beharreko agiriak.
1._Deialdi honetan parte hartu nahi duten langileek eskabide orria aurkeztuko dute, deialdi honen eranskinean ageri den ereduaren araberakoa. Eredua Departamentuko Argibide eta Agiri Bulegoan izanen dute eskura, hala nola web-gune honetan: www.pnte.cfnavarra.es.
Eskabidean zein lanposu bete nahi duten azalduko dute.
Parte hartzeko eskabidearekin batera, ondoko agiri hauek aurkeztuko dituzte:
1._Unibertsitateko doktore, lizentziatu, ingeniari edo arkitekto titulua edukitzea, edo eskuratzeko eskubideak ordaindu dituela frogatzen duen agiria izatea.
2._Ziurtagiria, hezkuntza sistemako edozein ikastetxe eta mailatan irakasle gisa gutxienez sei urteko esperientzia dituela frogatzen duena.
Ikastetxe publikoetan emandako zerbitzuak frogatzeko, dagokien zerbitzu-orria aurkeztuko da.
Ikastetxe pribatuetan emandako zerbitzuei dagokienez, ikastetxeko zuzendariaren ziurtagiria aurkeztuko da, hezkuntza ikuskatzailetzak ontzat emana. Ziurtagiri horretan hezkuntza maila eta emandako zerbitzuen benetako iraupena azalduko dira.
3._Alegaturiko merezimenduen ziurtagiriak, deialdi honetako II. eranskineko baremoan ezarritakoaren arabera.
4._Eskatutako lanpostu bakoitzarentzat proiektu bat, ondoko gaiei buruzkoa:
Musika espezialitateko lanposturako:
a) "Hezkuntza ikuskatzailetzaren eginkizunak, irailaren 13ko 365/1999 Foru Dekretuan (Nafarroako ALDIZKARI OFIZIALa, 99/10/01) eta Hezkuntzaren Kalitateari buruzko abenduaren 23ko 10/2002 Lege Organikoan ezarriak".
b) "Zerbitzuak Ikuskatzeko eta Ikuskapen Teknikorako Zerbitzuaren jardueretako proposamenak, Musikako irakaskuntzaren kontrolari, ikuskaritzari eta ebaluazioari begira".
Ingeles espezialitateko lanposturako:
a) "Hezkuntza ikuskatzailetzaren eginkizunak, irailaren 13ko 365/1999 Foru Dekretuan (Nafarroako ALDIZKARI OFIZIALa, 99/10/01) eta Hezkuntzaren Kalitateari buruzko abenduaren 23ko 10/2002 Lege Organikoan ezarriak".
b) "Zerbitzuak Ikuskatzeko eta Ikuskapen Teknikorako Zerbitzuaren jardueretako proposamenak, Ingeleseko irakaskuntzaren kontrolari, ikuskaritzari eta ebaluazioari begira".
Jatorrizko proiektuarekin batera lau kopia aurkeztuko dira. Proiektuak gehienez ere 12 orrialde izanen ditu, Dina 4-koak, eta tarte bikoitza utziz idatzitakoak.
2._Eskabideak Administrazio Publikoen Araubideari eta Guztiendako Administrazio Prozedurari buruzko Legearen 70. artikuluak aipatzen dituen datuak ez baditu biltzen, errekerimendua eginen zaio eskatzaileari, hamar egunen barnean hutsa zuzendu edo behar diren agiriak ekar ditzan. Horrela egiten ez badu, eskabidea besterik gabe artxibatuko dela ohartaraziko zaio.
Laugarrena._Eskabide orria zein organori zuzendu behar zaion eta aurkezteko tokia.
Eskabideak Giza Baliabideen Zerbitzuko zuzendariari zuzenduko zaizkio eta aurkeztuko dira Hezkuntza Departamentuko Erregistro Bulegoan (Santo Domingo kalea z.g., 31001, Iruña), Nafarroako Gobernuko Erregistro Orokorrean edo Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Foru Legearen (urtarrilaren 13ko 4/1999 Legeak aldatu zuena) 38.4 artikuluan aipatu bulegoetako edozeinetan.
Eskatzaileak posta bulego batean aurkezten badu eskaera, kartazal ireki batean eginen du, postako funtzionarioak datatu eta zigilatu dezan eskabidea, zertifikatu baino lehen.
Bosgarrena._Eskabideak aurkezteko epea.
Eskabideak aurkezteko epea hamar egun naturalekoa izanen da, deialdi hau Nafarroako ALDIZKARI OFIZIALean argitaratu eta biharamunetik hasita.
Proiektua eta haren kopiak aurkezteko epea hamabost egun naturalekoa izanen da, deialdi hau Nafarroako ALDIZKARI OFIZIALean argitaratu eta biharamunetik hasita.
Seigarrena._Izangaien onarpena.
1._Izangai onartuen eta baztertuen behin-behineko zerrenda.
Eskabideak aurkezteko epea amaitutakoan, Giza Baliabideen Zerbitzuak izangai onartu eta baztertuen behin-behineko zerrendak onetsi eta eta jendaurrean paratuko ditu Departamentuko Argibide eta Agiri Bulegoan.
Zerrenda horien kontra interesatuek zilegi izanen dute erreklamazio idazkiak aurkeztea argitaratzen direnetik hiru egun balioduneko epean, eta, hala behar izanez gero, baztertzea ekarri duten akatsak zuzentzea. Idazki horiek Giza Baliabideen Zerbitzuko zuzendariari zuzendu zaizkio eta deialdi honetako laugarren oinarrian aurreikusitako edozein lekutan aurkeztuko dira.
2._Izangai onartuen eta baztertuen behin-betiko zerrenda.
Epea amaiturik eta, hala badagokie, aurreko atalean aipatutako erreklamazioak aintzta hartu ondoren, Giza Baliabideen Zerbitzuak izangai onartu eta baztertuen behin betiko zerrendak onetsi eta eta jendaurrean paratuko ditu Departamentuko Argibide eta Agiri Bulegoan.
Onartuen zerrendan agertzea ez da aski deialdi honetan eskatutako baldintzak betetzen direla onartzeko. Deialdian onartua izateko nahiz hautatua izateko aurkeztu beharreko dokumentazioa aztertu ondoren, betebeharren bat falta dela ikusten baldin bada, izangaiak bertan parte hartzeagatik izan zitzakeen eskubide guztiak galduko ditu.
Zazpigarrena._Hautapen organoak.
1._Hezkuntza Departamentuak izendatutako Hautapen Batzordeak baloratuko ditu izangaien merezimenduak eta haiek aurkezten duten proiektua, deialdi honetako II. eranskineko baremoari jarraituz. Kide hauek osatuko dute Hautapen Batzordea:
Mahaiburua: Antonio Marticorena Valencia jauna.
Batzordekideak: Francisco Arteaga Ruiz jauna.
Jesús Bariáin Arregui jauna.
Luis Iza Dorronsoro jauna.
Félix Otano Zaratiegui jauna.
2._Epaimahaiak aholkulari espezialistak ekartzea proposatu ahalko du. Haien lan bakarra izanen da espezialitate bakoitzean ezagupenak eta merezimenduak ebaluatzeko laguntza ematea.
Zortzigarrena._Hautapen prozesua.
1._Hautapen prozesuak bi fase izanen ditu: A fasea, merezimenduak baloratzekoa; B fasea, proiektua baloratzekoa.
A fasean, izangaiek alegatutako merezimenduak baloratuko dira deialdi honen II. eranskinean dagoen baremoaren arabera. Fase honen azken puntuazioa kalkulatzeko merezimenduen baremoko lehenbiziko hiru ataletako puntuazioak batuko dira.
Proiektuaren B fasean, proiektua, zeinaren ahozko defentsa eginen baita, 10 punturekin baloratuko da gehienez. Fase hau gainditzeko beharrezkoa izanen da gutxienez 5 puntu ateratzea eta puntuazio hori erdiesten ez dutenak bazterturik geldituko dira. Hautapen Batzordeak ematen dituen puntuazioen batez bestekoa izanen da eskuraturiko puntuazioa. Batzordekideek ematen dituzten puntuazioen artean bost puntu edo gehiagoko aldea dagoenean, besterik gabe, gehieneko eta gutxieneko puntuazioa baztertuak izanen dira eta behin betiko puntuazioa gainerako puntuazioen batez besteko aritmetikoa izanen da.
2._Merezimenduen baremoan aipatzen den elkarrizketa, aurkeztutako proiektuari buruzkoa, Hezkuntza Departamentuak zehazten duen egunean eginen da. Data hori Departamentuko iragarki oholean jakinaraziko da.
3._Lortutako azken kalifikazioa kalkulatzeko, merezimenduen baremoaren atal guztietan erdietsitakoen batuketa eginen da.
Azken puntuazioan berdinketarik gertatuz gero, ondoko irizpideak aplikatuko dira, hurrenez hurren:
a) Proiektuan lortutako puntuaziorik altuena (B fasea).
b) Baremoko ataletan lortutako puntuaziorik altuena, baremoan berean duten hurrenkeran.
4._Hezkuntza Departamentuak deialdiaren behin-behineko ebazpena jakinaraziko du. Horretarako hautapen prozesuaren emaitzak jendaurrean paratuko ditu Departamentuko Argibide eta Agiri Bulegoan.
5._Eskatzaileek hiru egun balioduneko epea izanen dute, ikusgai jarri eta biharamunetik aurrera, ukoak eta erreklamazioak aurkezteko.
6._Uko eta erreklamazioetarako epea amaiturik eta horietaz ebazpena eman ondoren, Hezkuntza eta Kultura Departamentuak behin betiko ebazpena onetsiko du. Ebazpena Nafarroako ALDIZKARI OFIZIALean argitaratuko da.
Bederatzigarrena._Jabetza hartzea berritzeak.
Deialdi honen xede diren lanpostuen jabetza hartzea Hezkuntza Departamentuak ezartzen duen egunean izanen da, eta zerbitzu eginkizunetarako egoeran izanen da. Zerbitzu eginkizun horien iraupena hasiera batean urtebetekoa izanen da, eta luzatzen ahalko da.
Hamargarrena._Eginkizunak, lanaldia eta ordainsariak.
Eginkizunak, lanak, lanaldia, ordainsariak eta langileriari buruzko gainerako neurriak Departamentuko Zerbitzuak Ikuskatzeko eta Ikuskapen Teknikorako Zerbitzuari dagozkionak izanen dira.
Hamaikagarrena._Errekurtsoak.
Interesatuek gora jotzeko errekurtsoa jartzen ahalko dute deialdi honen kontra, Nafarroako Gobernuari zuzendua, Nafarroako ALDIZKARI OFIZIALean argitaratu eta biharamunetik hilabeteko epean.
I. ERANSKINA
Eskabide eredua
Zerbitzuak Ikuskatzeko eta Ikuskapen Teknikorako Zerbitzuko hezkuntza ikuskatzaile izateko bi lanpostu, Musika eta Ingelesaren irakaskuntzan espezializatuak, merezimendu lehiaketa bidez eta zerbitzu eginkizunetan betetzeko deialdian parte hartzeko eskabidea.
1._Nortasunari buruzko datuak
Deiturak:
Izena:
NANa: ...........................
Egungo lanpostua:
Ikastetxea:
Herria:
Lortu nahi duen lanpostua:
Alegatzen duen titulua, bigarren oinarriaren c) puntuaren arabera:
Giza Balaibideen Zerbitzuak zerbitzu-orria ofizioz aurkeztea eskatzen dut: d
.............., 2003ko .............aren ........(e)an.
(Sinadura)
HEZKUNTZA DEPARTAMENTUKO GIZA BALIABIDEEN ZERBITZUKO ZUZENDARIA. IRUÑA.
II. ERANSKINA
Merezimenduen baremoa
1._Zuzendaritza karguetan aritzea: 3 puntu.
a) Zuzendari izandako urte bakoitzeko: 0,75 puntu.
b) Zuzendaritzako bestelako karguetan aritzea:
_Lehen Hezkuntzako zikloetako koordinatzaile edo Bigarren Hezkuntzako departamentuburu edo antzeko zereginetan emandako urte bakoitzeko: 0,10 puntu.
_Ikasketaburu edo idazkari nahiz antzekoetan emandako urte bakoitzeko: 0,25 puntu.
_Nafarroako hezkuntza administrazioko atalburu edo goragoko postuetan eta Estatuko hezkuntza administrazioko 26. mailan edo goragoko batean emandako urte bakoitzeko: 0,5 puntu.
Egiaztagiriak: Zerbitzu-orria nahiz izendapenaren kredentzialaren fotokopia konpultsatua, jabetza hartze eta uztearen eginbidea erantsita.
Zerbitzu-orria Giza Baliabideen Zerbitzuak eman ahalko du ofizioz, interesatuak aurretik eskatzen baldin badu.
2._Ibilbide profesionala: 3 puntu.
a) Irakaskuntzako esperientzia. Baldintza gisa eskatutako 6 urteetatik aparteko urte bakoitzeko: 0,20 puntu, gehienez ere 2 puntu. (Ziurtagiriak: zerbitzu-orria).
b) Behin-behineko ikuskatzaile gisa emandako urte bakoitzeko: 0,75 puntu. (Ziurtagiriak: zerbitzu-orria).
c) Irakasle lanaren balorazio positiboa: 0,10 puntu. (Ziurtagiriak: balorazio positiboaren ziurtagiria, hezkuntza administrazio eskudunak emana).
d) Hezkuntza ikuskatzaileen kidegoan sartzeko eskatutakoak ez bezalako goi mailako titulazioak: Doktore tituluarengatik, puntu bat; kidegoan sartzeko aurkeztutakoa ez bezalako espezialitateko lizentziatu tituluarengatik, puntu bat. (Ziurtagiriak: tituluaren fotokopia konpultsatua edo titulua emateko eskubideak pagatu izanaren frogagiria). (Titulu hori ez da deialdi honetan parte hartzeko baldintza gisa aurkeztu dena izanen).
e) Katedradunen kidegoko kidea izateagatik: 2 puntu. (Ziurtagiriak: titulu administratiboaren kopia konpultsatua edo hezkuntza administrazio eskudunak emandako ziurtagiria).
Urte osoa dela kontsideratuko da baldin eta ikasturte batean benetako jardunaldia gutxienez zortzi hilabetekoa izan bada. Denbora txikiagoak ez dira kontuan hartuko.
3._Beste merezimendu batzuk: 4 puntu.
Musika espezialitateko lanposturako:
_Bigarren Hezkuntzako irakasleen kidegoko Musika espezialitatea izateagatik: 3 puntu.
_Bigarren Hezkuntzako katedradunen kidegoko Musika espezialitatea izateagatik: 3 puntu.
_Musika eta Arte Eszenikoetako irakasleen kidegoko musikaren irakaskuntzari loturiko edozein espezialitate izategatik: 3 puntu.
_Musika eta Arte Eszenikoetako katedradunen kidegoko musikaren irakaskuntzari loturiko edozein espezialitate izategatik: 3 puntu.
_Musikaren irakaskuntzari loturiko argitalpen zientifiko edo didaktikoengatik: puntu bat gehienez.
Espezialitate bat izatea behin bakarrik puntuatuko da.
Ingeles espezialitateko lanposturako:
_Bigarren Hezkuntzako irakasleen kidegoko Ingeles espezialitatea izateagatik: 3 puntu.
_Bigarren Hezkuntzako katedradunen kidegoko Ingeles espezialitatea izateagatik: 3 puntu.
_Hizkuntza Eskola Ofizialetako irakasleen kidegoko Ingeles espezialitatea izateagatik: 3 puntu.
_Hizkuntza Eskola Ofizialetako katedradunen kidegoko Ingeles espezialitatea izateagatik: 3 puntu.
_Ingelesaren irakaskuntzari loturiko argitalpen zientifiko edo didaktikoengatik: puntu bat gehienez.
Espezialitate bat izatea behin bakarrik puntuatuko da.
4._Proiektua: gehienez 10 puntu.
Proiektuaren balorazioa osatzeko, Hautapen Batzordeak elkarrizketa bat eginen dio izangaiari, gehienez 60 minutukoa.
Lanpostu bakoitzerako aurkezten den proiektua baloratzeko irizpideak ondoko hauek izanen dira: hezkuntza ikuskatzailetzaren eginkizunak ezagutzea, hezkuntza sistema hobetzeko baliabide gisa duen balorazioa eta haren uztartzea hezkuntzaren egungo egoeraren barnean, Musika eta Ingelesaren irakaskuntzaren kontrolari, gainbegiratzeari eta ebaluazioari begira.
Iragarkiaren kodea: A0309931