I. NAFARROAKO FORU KOMUNITATEA
Xedapen Orokorrak. Foru Aginduak
FORU AGINDUA, 2001eko abenuaren 24koa, Nekazaritza, Abeltzaintza eta Elikadura kontseilariak emana, elorri beltza landatzeko laguntzak eskatzeko epea ezartzen duena, irailaren 25eko 422/95 Foru Dekretuak aldatutako apirilaren 3ko 87/95 Foru Dekretuan ezarritakoaren arabera.
Nafarroako Gobernuak apirilaren 3ko 87/95 Foru Dekretua onetsi zuen, ondoren irailaren 25eko 422/95 Foru Dekretuak aldatu zuena. Foru Dekretu horren bidez Nafarroan elorri beltzaren laborantza sustatzeko dirulaguntzak ezarri ziren. apirilaren 3ko 87/95 Foru Dekretu horren azken xedapenetako bigarrenak ahalmena ematen dio Nekazaritza, Abeltzaintza eta Mendi kontseilariari, egun Nekazaritza, Abeltzaintza eta Elikadura kontseilaria denari, Foru Dekretu hori garatu eta betearazteko behar diren xedapenak eman ditzan.
Hori horrela, Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legeko 36.2 artikuluak
AGINDU DUT:
1. artikulua. Elorri beltzaren laborantza sustatzeko apirilaren 3ko 87/95 Foru Dekretuan eta horretan dauden zenbait arau aldatu zituen irailaren 25eko 422/95 Foru Dekretuan ezarritako laguntzetarako eskabideak, 2001/2002 kanpainakoak, Foru Agindu hau argitaratu eta biharamunetik hasita 2002ko otsailaren 28ra arte, biak barne, aurkeztuko dira.
2. artikulua. Laguntzak eskatzeko inprimakiak Nekazaritza, Abeltzaintza eta Elikadura Departamentuaren Eskualdeetako Bulegoetan eskuratuko dira, eta hantxe jakinaraziko da zein den kasu bakoitzean laguntza eskaerari erantsi behar zaion dokumentazioaren zerrenda.
Laguntza eskatzeko inprimakiak, bete ondoren, Eskualdeetako Bulegoetan aurkeztuko dira eskatutako dokumentazioarekin batera, aurreko artikuluan ezarritako epean. Kanpaina bakoitzean, pertsona fisiko edo juridiko bakoitzak eskabide bakar bat aurkeztu ahalko du.
3. artikulua. Nekazaritza eta Nekazaritzako Finantzaketaren Zerbitzuak aurkeztu den dokumentazioa aztertuko du; akatsen bat aurkituz gero interesatuei jakinaraziko die, zuzendu edo behar diren datuekin osa dezaten.
4. artikulua. Nekazaritza, Abeltzaintza eta Elikadura kontseilariak, aurkeztutako dokumentazioa eta emandako txostenak ikusirik, laguntzak emateari buruz dagokion ebazpena emanen du, eta interesatuei jakinaraziko. Ondoren, landaketen inguruan Administrazioak eskatzen dizkien konpromisoak bete beharko dituzte.
5. artikulua. Laguntzak emateari buruzko ebazpenean baietza jaso duten landaketen kasuan, Nekazaritza eta Nekazaritzako Finantzaketaren Zerbitzuak landaketak egin direla egiaztatzen duen egunetik aurrera ordainduko dira dirulaguntzak.
Dirulaguntza hauek emanen dira, baldin eta 2002ko gastuen aurrekontuan behar beste diru badago Nekazaritza, Abeltzaintza eta Elikadura Departamentuko "Nekazaritzako ustiategien eraginkortasuna hobetzea PDR(FEOGA-G)" kontusailean.
6. artikulua. Landaketak amaitzeko 2002ko apirilaren 30a bitarteko epea izanen da.
7. artikulua. Foru Agindu honetan aurreikusi ez den orotan apirilaren 3ko 87/95 Foru Dekretuan eta irailaren 25eko 422/95 Foru Dekretuan ezarritakoari jarraituko zaio.
AZKEN XEDAPENA
Foru Agindu honek Nafarroako ALDIZKARI OFIZIALean argitaratzen den egunean hartuko du indarra.
Iruñean, bi mila eta bateko abenduaren hogeita lauan.-Nekazaritza, Abeltzaintza eta Elikadura kontseilaria, Ignacio Javier Martínez Alfaro.
Iragarkiaren kodea: A0113601
