I. NAFARROAKO FORU KOMUNITATEA
Xedapen Orokorrak. Foru Dekretuak
138/2001 FORU DEKRETUA, ekainaren 4koa, Ingurumen Hezkuntza eta Komunikazioa Garatzeko Departamentuarteko Batzorde Teknikoa eratzen duena.
Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoaren 57. artikuluko c) atalak Nafarroaren esku uzten du ingurumenaren eta ekologiaren arloko legedia betearazi eta garatzea, Estatuko oinarrizko legeditik abiatuta.
Nafarroako Gobernuak ingurumenaren arloan dituen eskumenetariko bat ingurumen hezkuntza sustatzea eta garatzea da. Espainiako Ingurumen Hezkuntzaren Liburu Zuriaren arabera, Ingurumen Hezkuntza izen generiko bat da, gehien erabiltzen dena baita, ingurumenaren arloko politikaren tresna sozialak aipatzeko, hots, informazioa eta komunikazioa, prestakuntza eta gaikuntza, parte-hartze soziala eta ingurumenaren kudeaketari aplikaturiko ikerkuntza soziala eta ebaluazioa.
Nafarroako Gobernuak konponbide teknikoak (arau- emaileak, finantzarioak, fiskalak eta bestelakoak) gure ingurumenaren kalitatea zaindu eta hobetzeko nahikoa ez direla ikusirik, eta ingurumenaren arloko arazo gehienek gizartean dutela jatorria iritzirik, parte-hartze publikoa izan duen prozesu bat sustatu eta koordinatu du, Ingurumen, Lurraldearen Antolamendu eta Etxebizitza Departamentuaren bitartez (1999ko ekainetik 2001eko otsailera arte), Nafarroako Ingurumen Hezkuntzaren eta Komunikazioaren arloko Estrategia (NIHE) finkatzeko. Estrategia horrek Nafarroan ingurumenaren arloan garatzen den politikaren gizarte neurriak sustatzeko balio behar du eta, horrekin batera, gure erkidegoko sektoreak neurri horiek garatzeko lanetan ardurakide bilakatzeko. Proiektu horretan 130 entitate publikok baino gehiagok parte hartu dute gogoz, honako talde-erakunde hauetakoak: Nafarroako Administrazio Publikoak (Gobernua, udalak, kontzejuak eta mankomunitateak); hainbat produkzio sektoretako eta zerbitzuetako enpresa pribatuak eta enpresa publikoak; sindikatuak eta enpresaburuen elkarteak; hiritarren elkarteak, lanbide elkargoak, unibertsitateak eta ikastetxeak (publikoak eta itunduak), hala nola gizarte komunikabideak (prentsa, irratia, telebista).
Nafarroako Gobernuaren izenean, ondoko departamentu hauetako teknikariek parte hartu dute: Lehendakaritza, Justizia eta Barne Departamentua; Industri, Merkataritza, Turismo eta Lan Departamentua; Nekazaritza, Abeltzaintza eta Elikadura Departamentua; Herrilan, Garraio eta Komunikazio Departamentua; Osasun Departamentua; Hezkuntza eta Kultura Departamentua; Ingurumen, Lurraldearen Antolamendu eta Etxebizitza Departamentua; Gizarte Ongizate, Emakume, Kirol eta Gazteri Departamentua; halaber, enpresa publiko hauetako teknikariek parte hartu dute: Ingurugiroko Kudeaketa-Nafarroako Mintegiak eta Basoberritzeak, S.A.; Nafarroako Ureztalurrak, S.A.; Nafarroako Toki Azpiegiturak, S.A. (NILSA); Nafarroako Industria Ingurugiroa, S.A. (NAMAINSA); Institutu Teknikoak (Nekazaritzakoa eta Abeltzaintzakoa, ITGG-ITGA); Nafarroako Enpresa eta Berrikuntzarako Europako Zentroa (CEIN).
Hori guztia kontuan harturik, eta gure erkidegoko ingurumenaren kalitatea zaindu eta hobetzeko jarduketek departamentuarteko izaera izan behar dutela jakinda, beharrezkoa da NIHEk lurraldeko administrazioari esleitzen dizkion neurriak bultzatzeko zuzendaritza organo bat eratzea; gainera, Nafarroako Gobernuak ingurumen hezkuntza eta komunikazioaren arloan jorratzen duen politika koordinatuko du eta Gobernuak ingurumenaren kudeaketaren gainean sustatzen dituen proiektu guztietan hezkuntza eta komunikazio programak txertatuko ditu. Organo horren eginkizuna da, orobat, zerbitzuen eraginkortasun-maila hobetzea eta Nafarroako Foru Komunitateko Administrazioko departamentuek, gure erkidegoko ingurumen arloko politiketan sartu beharreko neurri sozialei dagokienez, informazio eta komunikazioaren arloan, prestakuntza eta gaikuntzaren arloan, parte-hartzearen arloan eta ikerkuntza eta ebaluazioaren arloan, nork bere kasa egiten dituzten jarduketak bikoiztu ez daitezen begiratzea.
Horrenbestez, Ingurumen, Lurraldearen Antolamendu eta Etxebizitza kontseilariak proposaturik, eta Nafarroako Gobernuak bi mila eta bateko ekainaren lauan hartutako erabakiaren arabera,
DEKRETATU DUT:
1. artikulua. Ingurumen Hezkuntza eta Komunikazioa Garatzeko Departamentuarteko Batzorde Teknikoa eratzea. Ingurumen Hezkuntzaren arloko Nafarroako Estrategiak Nafarroako Foru Komunitateko Administrazioari esleitzen dizkion neurriak sustatu eta koordinatzeko organo berariazkoa izanen da eta Foru Dekretu honetan finkatzen diren eginkizunak eta osakideak izanen ditu.
2. artikulua. Ingurumen Hezkuntza eta Komunikazioa Garatzeko Departamentuarteko Batzorde Teknikoari honako eginkizun hauek dagozkio:
1. Informazioaren eta komunikazioaren arloan:
-Nafarroako Gobernuko departamentuek eta haren enpresa publikoek ingurumenaren gainean duten informazioa eta dokumentazioa bildu, sistematizatu eta eguneratzea eta jendearen eskura jartzea, ingurumenaren gaineko informazioa jasotzeari buruzko abenduaren 12ko 38/1995 Legea betetzeko.
-Gobernuak ingurumenaren arloan duen informazioa departamentu guztietara iritsi dadin behar diren barne- bideak ezartzea, eta Gobernuko web-gune guztiak elkarren artean komunikatzeko behar diren loturak ezartzea, ingurumenaren kudeaketaren gaineko alderdi guztiei dagokienez.
-Gobernuak eta bere enpresa publikoek ingurumenaren kudeaketa programen inguruan egiten dituzten informazio eta zabalkunde kanpainen eduki hezigarriak ezagutzea, orientatzea, proposatzea eta ebaluatzea.
-Ingurumenari buruzko informazio eta zabalkunde materialak prestatzea, Gobernuaren politika sektorialetan aplikatzeko.
2. Prestakuntza eta gaikuntza arloa.
-Nafarroako Gobernuko eta bere enpresa publikoetako teknikarien ingurumen arloko prestakuntza finkatzea, sustatzea eta ebaluatzea.
-Nafarroako Gobernuko eta bere enpresa publikoetako funtzionario eta lan kontratatuen ingurumen arloko prestakuntza sustatzea eta ebaluatzea.
-Beste gizarte sektoreei zuzendutako prestakuntza jarduerak garatzea, Nafarroako erakunde publiko eta pribatuekin lankidetzan.
-Hezkuntza materialak prestatzea.
-Ingurumenaren arloko jokabide egokiak biltzeko eskuliburu eta katalogoak presta daitezela sustatzea, gure erkidegoko ekonomia eta gizarte sektoreei zuzenduak.
-Administrazioaren barrenean, ingurumenaren arloko koherentzia sustatzea.
3. Parte-hartzeari dagokionez:
-Ekonomia eta gizarte sektoreentzako laguntzen deialdi publikoen bitartez, nafar gizartean ingurumenaren arloko hezkuntza eta komunikazioa bultzatzeko, Gobernuak bideratzen dituen finantza lerroak ezagutzea, orientatzea, proposatzea eta ebaluatzea.
-21 Toki Agenden garapena sustatzea eta horretan laguntzea.
-Ingurumenaren kudeaketarekin zerikusia duten programa guztietan parte-hartze publikoa sustatzea.
-Sektore bakoitzari aplikatutako ingurumen arloko politiken garapenean gizarteak duen ardurakidetza sustatzea.
4. Ingurumenaren kudeaketari aplikatutako ikerkuntza soziala.
-Ikerkuntza sustatzea, gizartearen sektore bakoitzak ingurumenaren gainean duten pertzepzioa eta eskakizunak ezagutzeko, hala nola jendeak inguruarekin dituen gizarte harremanak hobetzeko zailtasunak.
3. artikulua. Ingurumen Hezkuntza eta Komunikazioa Garatzeko Departamentuarteko Batzorde Teknikoa Osoko Bilkuran eta Batzordeetan egituratzen da.
Osoko Bilkurako burua Ingurumen zuzendari nagusia izanen da, edo horrek eskuordetzen duena. Horrez gainera, ondoko hauek izendatzen dituzten teknikariak izanen dira kide:
-Barne zuzendari nagusia; Nekazaritza eta Abeltzaintzakoa; Nekazaritzako Egitura eta Elikagai Industrietakoa; merkataritza eta turismokoa; hezkuntzakoa; lurraldearen antolamendu eta etxebizitzakoa; ingurumenekoa; herrilanetakoa; garraio eta telekomunikazioetakoa; toki administraziokoa.
-Nafarroako Administrazio Publikoaren Institutuko zuzendari kudeatzailea; Osasunbidea-Nafarroako Osasun Zerbitzukoa; Osasun Publikoaren Institutukoa; Nafarroako Kirol eta Gazteriaren Institutukoa; Nafarroako Enplegu Zerbitzukoa.
-Enpresa publiko hauetako kudeatzaileak: Ingurugiroko Kudeaketa-Nafarroako Mintegiak eta Basoberritzeak, S.A.; Nafarroako Ureztalurrak, S.A.; Nafarroako Toki Azpiegiturak, S.A. (NILSA); Nafarroako Industria Ingurugiroa, S.A. (NAMAINSA); Institutu Teknikoak (Nekazaritzakoa eta Abeltzaintzakoa, ITGG-ITGA); Nafarroako Enpresa eta Berrikuntzarako Europako Zentroa (CEIN).
Osoko Bilkurak lan batzordeak eratzeko proposamena egin dezake, Foru Dekretu honetako 2. artikuluan adierazi diren eginkizunen inguruko proposamen teknikoak lantzeko. Proposamen horiek Osoko Bilkuran eztabaidatu beharko dira, eta onesteko, kasuan-kasuan ukituak diren zuzendaritza, institutu eta enpresa publikoen ikus-onespena beharko da.
Batzorde horretako idazkaritza Ingurumen Zuzendaritza Nagusiaren esku izanen da. Honako eginkizun hauek izanen ditu:
-Bilkuretako deialdia egitea eta aktak idaztea.
-Aktak Osoko Bilkurako kide guztiei eta zuzendari nagusiei bidaltzea, orok ezagutu eta behar diren ondorioak izan ditzaten.
-Batzordearen eginkizunen inguruan kideek eskatzen dioten informazio eta dokumentazioa prestatzea eta haien eskura jartzea.
4. artikulua. Ingurumen, Lurraldearen Antolamendu eta Etxebizitza Departamentuak Ingurumen Hezkuntza eta Komunikazioa Garatzeko Departamentuarteko Batzorde Teknikoaren eskura jarriko ditu dagokion lana aurrera eramateko behar dituen giza eta gauzazko baliabideak, gastu publikoa areagotu gabe betiere.
XEDAPEN IRAGANKORRA
Ingurumen Hezkuntza eta Komunikazioa Garatzeko Departamentuarteko Batzorde Teknikoko kideen izendapena egin eta Ingurumen Zuzendaritza Nagusiari jakinarazteko hogeita hamar eguneko epea izanen da, Foru Dekretu hau Nafarroako ALDIZKARI OFIZIALean argitara ematen denetik hasita.
AZKEN XEDAPENAK
Lehena.-Ingurumen, Lurraldearen Antolamendu eta Etxebizitza kontseilariari ahalmena ematen zaio Foru Dekretu hau garatzeko behar diren arauak eman ditzan.
Bigarrena.-Foru Dekretu honek Nafarroako ALDIZKARI OFIZIALean argitara eman eta biharamunean hartuko du indarra.
Iruñean, bi mila eta bateko ekainaren lauan.-Nafarroako Gobernuko lehendakaria, Miguel Sanz Sesma.-Ingurumen, Lurraldearen Antolamendu eta Etxebizitza kontseilaria, Jesús Javier Marcotegui Ros.
Iragarkiaren kodea: A0106274
