I. NAFARROAKO FORU KOMUNITATEA
Xedapen Orokorrak. Foru Aginduak
39/2001 FORU AGINDUA, otsailaren 20koa, Hezkuntza eta Kultura kontseilariak emana, ezintasun psikiko, mugimenezko eta sentimenezkoen ondorioz hezkuntza premia bereziak dituzten ikasleak eskolatzeko prozedurari buruzkoa.
Hezkuntza Sistemaren Antolamendu Orokorrari buruzko urriaren 3ko 1/1990 Legearen 37. artikuluak premia bereziak dituzten ikasleak eskolatzea du aztergai.
Ikastetxeetako Parte-hartzeari, Ebaluazioari eta Gobernuari buruzko 1995eko azaroaren 20ko Legeak, bigarren xedapen gehigarrian, ezartzen du fondo publikoak jasotzen dituzten ikastetxeak beharturik daudela hezkuntza premia bereziak dituzten ikasleak eskolatzera.
Gure erkidegoan hezkuntza premia bereziak dituzten ikasleen eskolatzea arautzen duten lege-xedapenak hauek dira:
-Maiatzaren 10eko 153/1999 Foru Dekretua, Nafarroako Foru Komunitateko ikastetxe publikoetako hezkuntza orientazioa arautzen duena.
-Martxoaren 1eko 76/1993 Foru Dekretua, Hezkuntza Bereziko Baliabideen Zentroa sortzen duena, Hezkuntza eta Kultura Departamentuaren menpe.
-Otsailaren 28ko 56/1994 Foru Dekretua, fondo publikoak jasotzen dituzten Nafarroako Foru Komunitateko irakaskuntza ez-unibertsiotarioetako ikastetxeetan ikasleak onartzeko arauak ematen dituena.
-Maiatzaren 8ko 133/1988 Foru Agindua, ezintasun psikiko, sentimenezko eta mugimenezkoen ondorioz hezkuntza premia bereziak dituzten ikasleak bigarren hezkuntzako ikastetxeetan eskolatzeko eta haiei hezkuntza laguntza emateko jarraibideak ematen dituena, oinarrizko irakaskuntza buka dezaten.
Arautegi horien arabera, hezkuntza premia bereziak dituzten ikasleak eskolatzearen inguruko erabakiak hartzea Eskolatze Batzordeari dagokio. Eskolatzeko modalitatea proposatzea, berriz, ikastetxeetako orientatzaileen eta Hezkuntza Bereziko Baliabideen Zentroko talde berariazkoen esku uzten du.
Ezintasunak dituzten ikasleak eskolatzeko erabakiak hartzeko prozesua zaila da, izan ere, hezkuntza arloan eman beharreko erantzuna ikasleen ezaugarri pertsonalei egokitu behar zaie, eskola ingurunea ahalik eta normalizatuena izan dadin ahaleginduz gainera, integrazioari esker ikasle guztientzat ezarrita dauden helburu orokorrak lor ditzaten.
Ikasle horiek eskolatzeko proposamenak ikaslearen hezkuntza beharrak identifikatzean eginen dira, hots, adin-talde horretarako eskola testuinguruan ohikoak diren irakaskuntza/ikaskuntza prozesuen aldean dituen beharrak aztertuta eta behar horiei erantzuteko nolako eta norainoko egokitzapen, baldintza eta laguntzak hartu behar diren ikusita. Ikaslearen beharren balorazio ponderatu hori eta eskola inguruneak behar horiei erantzuteko ahalmena izanen dira ikastetxe batera edo bestera bidaltzea erabakiko dutenak, hots, ikastetxe arrunt batera, lehentasunezko batera, berariazko batera edo transiziorako modalitate konbinatu batera.
Proposamen hori Ebaluazio Psikopedagogikoan oinarrituko da, non ikaslearen beraren baldintza eta ezaugarriak eta familia eta eskola ingurunearen baldintza eta ezaugarriak kontuan hartuko diren. Azterketa horren ondorioz, Eskolatze Txostena eginen da.
Egoera guztiak aldian behin berraztertuko dira, kasuan-kasuan hartzen diren erabakiak hezkuntza helburuak betetzeko lagungarriak izan daitezen, ikaslea atenditzeko behar den ingurunerik egokienean.
Horrenbestez, organo eskudunak eta erreferentzia markoa ezarri direlarik, irizpideak zehaztu eta prozedura antolatu beharra dago orain, hezkuntza premia bereziak dituzten ikasleak egoki eskolatuko direla bermatzearren.
Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legearen 36.2 c) eta d) artikuluak eman dizkidan ahalmenak erabiliz,
AGINDU DUT:
Lehena.-Foru Agindu hau Nafarroako Foru Komunitatean irakaskuntza ez-unibertsitarioak ematen dituzten ikastetxe publiko eta itunduetan aplikatuko da.
I.-Eskolatze txostena
Bigarrena.-Eskolatze txostena ezinbestekoa izanen da hezkuntza premia bereziak dituzten ikasleak eskolatzeko, hau da, curriculuma osatzeko egokitzapenak eta curriculumean egokitzapen nabarmenenak behar dituzten ikasleendako, ondoko egoeraren batean baldin badaude:
a) Hezkuntza bereziko ikastetxe berariazko batean edo ikastetxe arrunt batean lehenbiziko aldiz sartzea eskatzen duten ikasleak.
b) Eskolaturik egon arren, eskolatze-modalitatea berraztertu behar zaien ikasleak.
Eskolatze Txostenarekin batera, Orientazioaren Unitate Teknikoaren eta Hezkuntza Bereziaren Unitate Teknikoen txostenak aurkeztu beharko dira. Aipatu txostenak aztertu ondoren, Eskolatze Batzordea izanen da ikaslearen eskolatzeari buruzko erabakia hartuko duena.
Hirugarrena.-1. Eskolatze txostena ikaslea aurrematrikulatu den zentroko orientatzaileak eginen du. Hezkuntza Bereziko Baliabideen Zentroko talde berariazkoek txosten osagarria emanen dute, kasua bada.
2. Eskolatze Txostena eranskinean azaltzen den ereduaren araberakoa izanen da. Honako alderdi hauek bildu beharko ditu:
a) Ebaluazio psikopedagogikoa, ziklo edo etaparen gaitasunen aldean, ikasleak duen ahalmen kurrikularraren maila zehaztuko duena, hala nola irakaskuntza/ikaskuntza prozesurako garrantzitsuak diren beste baldintza batzuk.
b) Curriculumaren egokitzapenetarako behar diren hezkuntza premia bereziak eta orientazio berariazkoak zehaztea, eta, kasua bada, laguntza eta tratamendu berariazkorako baliabideak.
c) Eskolatze-modalitateari buruzko proposamen arrazoitua, dauden baliabideen arabera.
e) Familiarekin eta ikastetxearekin lorturiko adostasun maila.
f) Laburpen orria.
Laugarrena.-1. Eskolatze txostenak helburu hauek ditu: ikasle baten hezkuntza premia bereziak zehaztea; eman beharreko hezkuntza erantzunari buruzko orientabideak ematea; behar dituen laguntza eta tratamendu berariazkoak zehaztea, eta eskolatze-modalitaterik egokiena proposatzea.
2. Eskolatze txostenak Oinarrizko eta Derrigorrezko Bigarren Hezkuntzako ebaluazioari buruzko arautegietan finkatu diren ikasleen ikasketa espedienteei erantsiko zaizkie.
3. Kasuan-kasuan hartzen den erabakia aldian behin berraztertu beharko da, ikaslearen ebaluazio pertsonaletik, hezkuntza eskaintzatik eta dauden zerbitzuetatik datozen aldaketak sartzeko.
4. Eskolatze-modalitatearen berrazterketa egiteko epeei dagokienez, Foru Agindu honen bederatzigarren puntuan ezarritakoari segituko zaio.
Bosgarrena.-Ebaluazio psikopedagogikoan, ikasleen hezkuntza premia bereziak zehazteko, curriculum arloko erabakiak hartzeko eta eskolatze proposamena egiteko funtsezkoa den informazio guztia bildu beharko da, zehazki honako alderdi hauek:
a) Ikasleari buruzko informazioa.
-Garapenaren inguruko informazioa: hezkuntza arloko erabakiak hartzeko lagungarri izan daitezkeen alderdi biologikoak, kognitiboak, emozionalak, historia pertsonala edo elkarreragin sozialekoa.
-Egun duen ahalmen kurrikularraren maila: hezkuntza ziklo edo etapa horretan garatu ohi diren curriculumeko helburu eta edukietatik zer egin dezakeen eta zer ez.
-Irakaskuntza eta ikaskuntza prozesua laguntzen edo baldintzatzen duten ikaslearen alderdi eta ezaugarriak.
b) Inguruneari buruzko informazioa.
-Familia ingurunea.
-Eskola ingurunea: ikaslearen hezkuntza premiei erantzuteko gauza ote den; ikastetxeak eta/edo eskualdeak dituen baliabideen araberako aukerabideak eta mugak.
Seigarrena.-Egokitzapen kurrikularrak egiteko orientabide berariazkoak aurrerago zehazten ahalko dira, ikaslea eskolatu ondoren. Dena den, honako alderdi hauek aipatu beharko dira gutxienez: zein arlotan egin behar diren egokitzapen kurrikularrak eta horietako bakoitzaren lerro nagusiak; ikastetxean sartzeko egokitzapenak eta ikasleak behar dituen tratamendu edo esku-hartze berariazkoak.
Zazpigarrena.-Eskolatzeko proposamena egitean, kontuan hartuko da erabaki horiek atzera egiteko modukoak izatea eta honako irizpide hauen araberakoak:
a) Ikastetxean sartzeko eta curriculumean egin beharreko egokitzapenen tamaina.
b) Ohiko curriculuma zenbateraino egokitu behar den.
c) Egokitzapenaren eta integrazio sozialaren maila.
d) Laguntza beharrak eta tratamendu berariazkoa.
e) Hezkuntzako eskaintza eta dauden zerbitzuak.
II.-Izapidatzea
Zortzigarrena.-1. Ikastetxean lehen aldiz sartzen diren ikasleendako eskolatze txostenaren izapidatzea honela eginen da:
a) Ikaslearen guraso edo legezko tutoreek harendako eskola-postu bat eskatu eta seme-alabaren ezaugarriak azalduta, dokumentazioa jasotzen duen ikastetxeko zuzendariak eskaera orientatzaileari igorriko dio, ikaslearen balorazioa eta Eskolatze Txostena egin ditzan. Txostena Eskola Orientazioaren Unitate Teknikora igorri beharko da, eskaerak barematzeko ezartzen den epean, betiere onartu diren ikasleen behin-behineko zerrendak jakinarazi aurretik.
b) Ikastetxeek, hala publikoek nola itunduek, ezintasun psikiko, mugimenezkoak edo sentimenezkoak dituzten ikasleen eskaerak onartu beharko dituzte, baina horrek ez du ekarriko, ezinbestean, eskaturiko ikastetxe horretan behin betiko matrikulatuko direnik.
c) Eskola Orientazioaren Unitate Teknikoa eta Hezkuntza Bereziaren Unitate Teknikoa adostasun batera iritsi ondoren, eskolatzeko proposamena Eskolatze Batzordera eramanen da, haren gaineko erabakia har dezan. Proposamena biltzen duen txosten-zatia eta dagokion erabakia gurasoei edo legezko tutoreei igorriko zaizkie, ikaslea eskolatuko den ikastetxeari eta, hala bada, jatorrizko ikastetxeari.
2. Hiru urtetik beherako ikasleen kasuan, ikaslearen guraso edo legezko tutoreek, eskola postua eskatu aurretik, hezkuntza zerbitzuei buruzko balorazioa eta orientabideak eskatzen ahalko dituzte, baita haur horiek atenditzeaz arduratzen diren Administrazioaren zerbitzuei buruzko informazioa ere, hori guztia Hezkuntza Bereziko Baliabideen Zentroaren bitartez. Kasu horretan, Hezkuntza Bereziko Baliabideen Zentroko ekipo berariazkoak arduratuko dira balorazioa egin eta kasuan kasuko ikastetxeetako orientatzaileekin koordinatzeaz.
Bederatzigarrena.-1. Ikaslearen gurasoek edo legezko tutoreek edo ikastetxeak arrazoibidez eskatuta, eskolatzearen berrazterketa eginen da. Nolanahi ere, hezkuntza etapa bakoitza bukatutakoan, ikastetxeetako orientatzaileek eskolatze-modalitatearen berrazterketa egin beharko dute.
2. Modalitatea berraztertzeko prozedura Foru Agindu honetako zortzigarren puntuan ezarritako berbera izanen da, baina noiznahi hasten ahalko da eta zortzigarren puntuko 1.a) atalean ezarritako epea baino lehen ebatzi beharko da.
3. Lehen Hezkuntza bukatutakoan, ikastetxeko orientatzaileak laburpen txostena egin beharko du eskolatze-modalitatearen berrazterketa egin dadila proposatzeko, eta hori justifikatzen duten arrazoiak emanen ditu. Berrazterketa bera eta aginduzko Eskolatze Txostena, berriz, ikaslea inskribatzen den bigarren mailako ikastetxeko orientatzaileak eginen ditu.
Hamargarrena.-1. Zortzigarren eta bederatzigarren puntuetan azaldu den prozedurak iraun bitartean, ikaslearen guraso edo legezko tutoreei informazioa eta aholku emanen zaie, seme-alaben hezkuntza premia bereziei, curriculum egokitzapenei eta eskolatzeko aukera egokienei buruz.
2. Hezkuntza premia bereziak dituzten ikasleen guraso edo legezko ordezkariek Eskolatze Txostenean azaltzen denarekin bat datozen ikastetxeetan matrikulatzen ahalko dituzte seme-alabak, ikasleak onartzeko ezarritako irizpide orokorren markoan.
3. Eskola postua eskatzean, guraso edo legezko ordezkariek ez badute adierazten semeak edo alabak nolako eta norainoko ezintasun edo afektazioa duen, eta, horren ondorioz, ikasleak behar dituen hezkuntza behar bereziei egokituriko hezkuntza erantzuna jasotzeari begira nolabaiteko kaltea etortzen baldin bazaio, Eskolatze Batzordeak ahalmena izanen du ikaslearen ikastetxea aldatzeko, behar bezalako balorazio teknikoa egin ondoren.
4. Eskolatze Batzordearen ebazpenen aurka gora jotzeko errekurtsoa jartzen ahalko da Nafarroako Gobernuari zuzendua.
XEDAPEN INDARGABETZAILEA
Indarrik gabe utzi da otsailaren 20ko 57/1996 Foru Agindua, ezintasun psikiko, mugimenezko eta sentimenezkoen ondorioz hezkuntza premia bereziak dituzten ikasleak eskolatzeko prozedurarako jarraibideak ematen zituena.
AZKEN XEDAPENAK
Lehena.-Hezkuntza zuzendari nagusiari baimena ematen zaio Foru Agindu hau betearazi eta garatzeko behar diren xedapenak eman ditzan.
Bigarrena.-Foru Agindu hau eta eranskina Nafarroako ALDIZKARI OFIZIALean argitara daitezela agintzea.
Hirugarrena.-Foru Agindu honek Nafarroako ALDIZKARI OFIZIALean argitara eman eta biharamunean hartuko du indarra.
Laugarrena.-Foru Agindu hau igortzea Pedagogi Berrikuntzako Zerbitzura, Zerbitzuak Ikuskatzeko eta Ikuskapen Teknikorako Zerbitzura, Ikasketen Antolamendu eta Lanbide Heziketaren Zerbitzura, Hezkuntza Berriztapen eta Sustapenerako Atalera, Eskola Orientazioaren Unitate Teknikora eta Hezkuntza Bereziaren Unitate Teknikora, behar diren ondorioak izan ditzan.
Iruñean, bi mila eta bateko otsailaren hogeian.-Hezkuntza eta Kultura kontseilaria, Jesús María Laguna Peña.
Iragarkiaren kodea: a0101865
