I. NAFARROAKO FORU KOMUNITATEA
Xedapen Orokorrak. Foru Aginduak
389/2001 FORU AGINDUA, azaroaren 19koa, Lehendakaritza, Justizia eta Barne kontseilariak emana, zenbait eskurantzaren erabilera Lehendakaritza zuzendari nagusiaren esku uzten duena.
Foru Komunitateko Gobernuari eta Administrazioari buruzko Foru Legearen 37. artikuluak xedatzen du kontseilariek beren departamentuetako zuzendari nagusien esku utzi ahalko dutela beren eskurantzen erabilera.
Lehendakaritza, Justizia eta Barne Departamentuaren jardueretan, bereziki Lehendakaritza Zuzendaritza Nagusiari dagozkion gaietan, komeni den dinamismoa lortzeko, beharrezkotzat jotzen da organo horren titularraren esku uztea kontseilariari dagozkion zenbait eskurantza.
Hori horrela, Foru Komunitateko Gobernuari eta Administrazioari buruzko Foru Legearen 37. artikuluak emandako ahalmenak erabiliz,
AGINDU DUT:
1. artikulua. Lehendakaritza, Justizia eta Barne kontseilariari dagozkion eskurantza guztien erabilera, Lehendakaritza Zuzendaritza Nagusiaren berezko alorretan, eta bereziki ondokoena, Lehendakaritza zuzendari nagusiaren esku uztea berriz:
a) Orokorrak.
-Administrazioko espedienteen ebazpena.
-Gastuak egiteko baimena eman eta xedatzea eta ordaindu beharrak onartzea.
-Lehendakaritza Zuzendaritza Nagusiko unitate organikoen artean sor daitezkeen liskarrak konpontzea.
-Nafarroako Gobernuak harturiko Erabakiak ziurtatzea.
-Foru Diputazioak 1984ko maiatzaren 7a baino lehen harturiko erabakiak eta eginak eta Nafarroako Administrazio Agiritegiko agiriak ziurtatzea.
b) Kontrataziokoak.
Nafarroako Administrazio Publikoen Kontratuei buruzko ekainaren 16ko 10/1998 Foru Legearen 12. artikuluan xedatutakoari jarraikiz, kontratuen gainean Lehendakaritza, Justizia eta Barne kontseilariari dagozkion ahalmenak, aipatu Foru Lege horren 13. artikuluan ezarritakoaren arabera, Nafarroako Gobernuaren baimena behar duten kontratuei dagozkienak izan ezik.
c) Langileenak.
-Lehendakaritza Zuzendaritza Nagusiari atxikitako langileei dagokienez, apirilaren 1eko 165/1996 Foru Dekretuaren 3. artikuluak kontseilariei ematen dizkien ahalmenak.
2. artikulua. Lehendakaritza, Justizia eta Barne kontseilariak edozein espediente eska dezake, noiznahi, hura ebazteko.
3. artikulua. Foru Agindu honek eskuordetzen dituen eskurantzen bidez ematen diren ebazpenetan espresuki aipatuko da hala dela. Ebazpen horiek kontseilariak emanikotzat hartuko dira ondorio guztietarako, eta haien kontra gora jotzeko helegitea aurkezten ahalko da, Nafarroako Gobernuari zuzendua.
AZKEN XEDAPENAK
Lehenbizikoa.-Lehendakaritza eta Barne kontseilariak zenbait eskurantzaren erabilera Lehendakaritza zuzendari nagusiaren esku uzteko urriaren 13an eman zuen 205/1999 Foru Agindua indarrik gabe gelditu da.
Bigarrena.-Foru Agindu honek Nafarroako ALDIZKARI OFIZIALean argitaratzen den egun berean hartuko du indarra.
Iruñean, bi mila eta bateko azaroaren hemeretzian.-Lehendakaritza, Justizia eta Barne kontseilaria, Rafael Gurrea Induráin.
Iragarkiaren kodea: A0112052
