I. NAFARROAKO FORU KOMUNITATEA
Xedapen Orokorrak. Foru Aginduak
FORU AGINDUA, 2000ko uztailaren 24koa, Nekazaritza, Abeltzaintza eta Elikadura kontseilariak emana, Nafarroako eskualde behartsuei 2000ko ekitaldian eman beharreko konpentsio kalteordainak eskatzeko epea luzatu eta tramitazioko eginbeharrak osatzen dituena.
Nekazaritza, Abeltzaintza eta Elikadura kontseilariak 2000ko maiatzaren 31n emandako Foru Aginduaren bidez, Nafarroako eskualde behartsuentzako konpentsazioko kalteordainak arautu dira, 2000ko ekitaldirako.
Horri dagokionez, Nafarroan ordezkaritza handiena duten nekazaritzako erakundeek eskabideak aurkezteko epea luza dadila eskatu diote Nekazaritza, Abeltzaintza eta Elikadura Departamentuari; eskatu diote, halaber, zehatzago azal daitezela eskatzaileen ustiategiek ingurugiro arloko gutxieneko arauak betetzearen inguruko zenbait alderdi. Arau horiek aipatu Foru Aginduko 4. artikuluko c) letran ageri dira.
Horrenbestez, Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legearen 36.2 artikuluak emandako ahalmenak erabiliz,
AGINDU DUT:
1. artikulua. 2000ko abuztuaren 22 arte luzatu da, egun hori barne, Nafarroako eskualde behartsuei 2000ko ekitaldian eman beharreko konpentsio kalteordainak eskatzeko epea. Horri dagozkion arauak Nekazaritza, Abeltzaintza eta Elikadura kontseilariak 2000ko maiatzaren 31n emandako Foru Aginduan ageri dira.
2. artikulua. Aipatu Foru Aginduaren 4. artikuluko 2. zenbakiaren a) letrak ezartzen du irekitzeko udal lizentzia edo, bestela, jarduera sailkatuarena aurkeztu behar duela onuradunak, Ingurugiroa babesteko Jarduera Sailkatuei buruzko Foru Legearen menpeko jarduerak direnean; hala ere, eskatzaileek eskaria egiten dutenean ezin badute dokumentazio hori aurkeztu, eskaria egin ahalko dute, salbuspenez, 2000ko ekitaldirako, dokumentazioa zergatik ezin duten aurkeztu azalduta.
Halako kasuetan, eta kasu bakoitzeko ustiapen mota ikusita, Nekazaritza, Abeltzaintza eta Elikadura Departamentuak beharrezkoa iruditzen zaion dokumentazioa eskatuko du, ingurugiroaren gainean eragin kaltegarririk, oro har, ez dagoela egiaztatzeko.
AZKEN XEDAPENA
Foru Agindu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, bi milako uztailaren hogeita lauan.-Nekazaritza, Abeltzaintza eta Elikadura kontseilaria, Ignacio Javier Martínez Alfaro.
Iragarkiaren kodea: a0007228
