I. NAFARROAKO FORU KOMUNITATEA
- Xedapen Orokorrak. Foru Aginduak
4/2000 FORU AGINDUA, urtarrilaren 20koa, Industri, Merkataritza, Turismo eta Lan kontseilariak emana, "Asociación Independiente de Taxistas Autopatronos de Navarra, (A.I.T.A.N.)" elkarteari, Iruñeko autotaxi ibilgailuetan bidaiariak hirian barna garraiatzeko tarifak onesten dizkiona.
Ikusirik Iruñeko Udalak 1999ko abenduaren 30ean egindako osoko bilkuran harturiko erabakia, Iruñeko autotaxi ibilgailuetan bidaiariak hirian barna garraiatzeko tarifa berriak proposatzen dituena.
2000ko urtarrilaren 12an egindako bilkuran, Kontsumitzaileen eta Erabiltzaileen Elkarteen eta Asociación Independiente de Taxistas Autopatronos de Navarra izenekoaren iritziak entzun ondoren, eta Kontsumitzaileen eta Erabiltzaileen Defentsari buruzko uztailaren 19ko 26/1984 Lege Orokorraren hogeita bigarren artikuluko 2.d) idatz-zatian eta irailaren 1eko 1080/1989 Errege Dekretuan, Ibilgailu Arinetan Hiri Barneko eta Hiriarteko Garraio Zerbitzuetarako Erregelamendu Nazionalaren zenbait aldaketa onetsi zuen hartan, xedatutakoa betetzearren.
Ikusirik Merkataritza eta Kontsumo Zerbitzuak egindako txostena.
Hori horrela,
AGINDU DUT:
1. A.I.T.A.N. elkarteari Iruñeko hirian barnako bidaiarien garraiorako ondoko tarifak onestea:
1. tarifa: 6:00etatik 23:00ak arte aplikatzekoa, lanegunetan.
-Ibilitako kilometro bakoitzeko: 86,5 pezeta.
-Zain egondako ordu bakoitzeko: 2.205 pezeta.
-Gutxieneko zerbitzua (2,25 km edo 5,05 minutu): 440 pezeta.
2. tarifa: larunbat eta jaiegunetan, eta lanegunetako gaueko zerbitzuetan 23:00etatik 6:00ak arte, eta uztailaren 6tik 14a arte.
-Ibilitako kilometro bakoitzeko: 129,75 pezeta.
-Zain egondako ordu bakoitzeko: 3.307,5 pezeta.
-Gutxieneko zerbitzua (2,25 km edo 5,05 minutu): 660 pezeta.
Gehigarriak: ekipaje zerbitzua, RENFE geltokian hasitako zerbitzua eta futbol zelaira joatea, partidua dagoen egunetan: 62 pezeta.
2. Aipatu tarifen barne da balio erantsiaren gaineko zerga.
3. Tarifak Iruñeko udalerriaren barrenean egiten diren zerbitzuetan baizik ez dira aplikatuko.
4. Tarifa hauek begibistan egon beharko dute ibilgailuaren ageriko tokian, horrela beteko baita Ibilgailu Arinetan Hiri Barneko eta Hiriarteko Garraio Zerbitzuetarako Erregelamendu Nazionalean zenbait aldaketa onetsi zuen irailaren 1eko 1080/1989 Errege Dekretuan xedatutakoa.
5. Tarifa hauek Foru Agindu hau Nafarroako ALDIZKARI OFIZIALean argitaratu eta biharamunean hartuko dute indarra.
6. Urriaren 28ko 2695/77 Dekretuak, prezioen politikako neurriei buruzkoak, bere 7. artikuluan ezarritakoari jarraikiz, aurten tarifa horiek berraztertzea eskatu ahalko da, baldin eta egungo joeraren arabera, gasoleoa benetan eta modu kontrastatuan garestitzearen ondorioz zerbitzuaren ustiapeneko kostuek nabarmen igotzen badute.
Foru Agindu honen kontra gora jotzeko errekurtsoa jarri ahalko da, Nafarroako Gobernuari zuzendua, hilabeteko epean, argitaratu eta biharamunetik kontatzen hasita.
Foru Agindu hau jakinaraztea Merkataritza eta Kontsumo Zerbitzuari, Iruñeko Udalari, "Asociación de Taxistas Autopatronos de Navarra" elkarteari eta Nafarroan diren Kontsumitzaileen eta Erabiltzaileen Elkarteei, eta Nafarroako ALDIZKARI OFIZIALean argitara dadila agintzea.
Iruñean, bi milako urtarrilaren hogeian.-Industri, Merkataritza, Turismo eta Lan kontseilaria, Nuria Iturriagagoitia Ripoll.
Iragarkiaren kodea: A0000615
