Iragarkia

164. ALDIZKARIA - 1999ko abenduaren 31

I. COMUNIDAD FORAL DE NAVARRA

- Obras y Servicios Públicos

4590/1999 Foru Agindua, abenduaren 14koa, Herrilan, Garraio eta Komunikazio kontseilariak emana. Ebazten du "Iruña-Logroño ardatzaren (N-111) azterlana eta ardatz horretan epe ertaineko ekintzei hots emateko plan baten itxuratzea; tartea: Iruña (Zizur Nagusia)-Lizarra (saihesbidearen hasiera)" delakoaren jendaurrealdia, eta Iruña-Logroño Autobia, 1. Tartea: Iruña-Lizarra delakorako trazadura alternatiba hautatzen, haren Ingurugiroaren gaineko Eraginaren Deklarazioa tramitatu eta Udalez gaindiko Proiektu Sektorialtzat onesteko.

Ekainaren 28ko 2367/1999 Foru Aginduaren bidez teknikoki onetsi zen "Iruña-Logroño ardatzaren (N-111) azterlana eta ardatz horretan epe ertaineko ekintzei hots emateko plan baten itxuratzea; tartea: Iruña (Zizur Nagusia)-Lizarra (saihesbidearen hasiera)" delakoa eta hurrena jendaurrera atera zen hiru hilabetetarako, 1999ko abuztuaren 11ko 100. BOLETIN OFICIAL ean argitaratu ondoren.

Azterlan horrek hainbat trazadura alternatibo plazaratzen zituen Iruña-Logroño autobia berriaren lehen tarterako (Iruña-Lizarra).

Kontuan harturik zenbateko garrantzia duen azpiegitura publikoko proiektu horrek, Herrilan, Garraio eta Komunikazio Departamentuak dei egin die proiektuak erasaten dien toki entitateei, aipatu azterlana azaldu eta toki entitate horien iritziak eta proposamenak jakiteko. 1999ko urriaren 6, 7, eta 8an hainbat informazio bilera berariazko izan dira Zizur Nagusia, Zizurko zendea, Legarda, Uterga, Muruzábal, Gares, Obanos, Mañeru, Zirauki, Mendigorría, Deierri, Villatuerta eta Lizarrako udal ordezkariekin.

Duen garrantziagatik, espreski eman behar da aditzera bilera horietan Zizurko zendearen udalak bere iritzia eman zuela Erreniegako pasabidearen bi alternatiben gainean; "Undio" delako alternatibak, haien ustez, eragin handiegia izanen zuen zendearen antolamenduan; "Asterain" delakoa, berriz, Azterlanak berak esaten duen moduan, arrisku handikoa zen geotekniaren ikuspuntutik. Horren ondorioz tarte horretarako beste alternatiba bat aztertu da, "Erreniega" alternatiba deritzana; Zizurko Zendearen udalari aurkeztu zitzaion, 1999ko azaroaren 8ko beste bilera batean. Pasabide berria ematen dio Erreniegako mendiari.

Aurrekoa gogoan, eta jendaurrealdia egin delarik, Proiektu, Teknologia eta Lan Hidraulikoen Zerbitzuak aditzera eman du honako sujerentzia edo alegazioak jaso direla hartarako epean:

-1. alegazioa, Zizur Nagusiko udalak aurkeztua.

Zizur Nagusiko udalak, 1999ko irailaren 24an izandako osoko bilkuran, erabaki zuen ondoren aipatzen diren sujerentziak egiteko idazki bat aurkeztea:

1) Etorkizuneko kanposantuaren biribilgunea egokia izan dadila ahal den trafiko gehiena etorkizuneko saihesbidetik desbideratzeko; aldi berean, autobiaren lehenbiziko tartea, IHAetan ageri dena (Iruñerriko Hirigintza Arauak), autobia izan dadila Galarko bidegurutzetik aurrera, Zizur Nagusira sartzen diren ibilgailuen segurtasuna ezertan murriztu gabe.

2) Proiektua idatzi duten teknikariekin harremanetan sartzea, proiektua hobeki ezagutu eta ondoren eraikitzeko.

3) Pasatzeko lehentasunak ezartzea (sarrerak eta irteerak) Zizur Nagusiko ibilgailuentzat.

4) Tarte horretako eraikuntza humanizatzea irizpide urbano eta ingurugirokoen arabera.

5) Glorietan apaingarrizko iturri bat eraikitzea, Iruñerrian sartzen zarela seinalatu eta markatzeko.

6) N-111 eta mendebaleko ingurubidearen lotuneko puntu beltza definitu eta diseinatzea.

-Erantzuna:

1) Autobiaren proiektuak aurreikusi egiten du autobiaren eta Ezkirotz aldean izanen den bide perimetralaren lotura bat egitea. Lotura horren diseinuak bide emanen du ez trabarik egiteko bide horretarantz egiten diren mugimenduei. Autobia egiten ari den bitartean, behar diren ekintzak eginen dira lotura hori bateragarria izateko. Orobat, kontuan hartuko da Zizur Nagusiak alegatu duena, eta autobiatzat joko da komunikazio bide berria Zizurko auzoberria pasatzetik aurrera.

2) Proiektua idazten ari deino, idazten ari diren teknikariek haren garapenaren berri emanen diote Udalari.

3),4),5) Alegaziook N-111 Zizurko auzoberrian barrena pasatzeko proiektua hartzen dute aintzat, ez jendaurrealdi honetako gaia den alternatiba azterlana. Hortaz, ez dira hemen aztertu behar; hala ere, proiektua idazten ari direnei helaraziko zaie haiek kontuan hartzeko.

6) Alegazio honek ez du zerikusirik jendaurrealdiko trazadura alternatiben azterlanarekin; hala ere kontuan hartuko da bide segurtasunari buruzko ekintza planetan, eta bai bidegurutze hori ukitzen duten bide-berritzeko ekintzetan.

-2. alegazioa, Utergako Udalak aurkeztua.

Carlos Donamaría Macaya jaunak, Utergako Alkate udalburua den partez, bi puntuko alegazio bat aurkeztu du:

1) Ontzat ematen dituela azterlanean proposatzen diren soluzioak.

2) Eskatzen du Obanosko loturatik Muruzabalerako sarbide bat egin dadila, Iruñetik Muruzabalera doazenak Utergan barrena ez pasatzeko moduan.

-Erantzuna:

1) Alternatiba hautatzerakoan kontuan hartu zen iritzi hori.

2) Onartzen da alegazioa. Errepide tarte berria, alternatiba azterlanean ageri dena, autobiaren proiektuari eta obrari erantsiko zaio.

-3. alegazioa, Legardako Udalak aurkeztua.

Jose Luis Biurrun Lezáun jaunak, Legardako Alkate udalburua den partez, bi puntuko alegazio bat aurkeztu du:

1) Ontzat ematen dituela azterlanean proposatzen diren soluzioak.

2) N-111k gaur duen babes bandak nahitaezko egiten duela eraikinen lerroa 25 metrora egotea. Autobia egitean eta errepide horrek hortaz trafiko gutxiago izatean, babes lerro gutxitzea eskatzen da.

-Erantzuna:

1) Alternatiba hautatzerakoan kontuan hartu zen iritzi hori.

2) Eraikinen distantzia gutxitzea, behin autobia proiektatuz gero, Udalak proposatu beharko du bere Udal Planaren barrenean. Alegazio hau kontuan hartuko da.

-4. alegazioa, Muruzabalgo Udalak aurkeztua. Muruzabalgo udalak, 1999ko azaroaren 8ko bilkura arruntean, erabaki zuen bere alegazioetan honako puntuak aditzera ematea:

1) Ados dagoela "N-111 eta NA-601 lotzeko bidea" delako tartearekin, hau da, Orvalaiz ardandegiaren eta Muruzabalera sartzeko pistaren arteko errepidea, Obanosko mugapeari datxikiola.

2) Autobiaren gainerakoari dagokionez, hura ere beharrezkotzat jotzen dutela, zein ere trazadura ematen zaion azkenean, baldintza tekniko eta ekonomikoen arabera.

-Erantzuna:

1) Esandako errepide tartea, alternatiba azterlanean ageri dena, autobia proiektu eta obrari erantsiko zaie.

2) Iritzi hori dagoeneko hartu da kontuan alternatiba hautatzeko.

-5. alegazioa, Mendigorriko Udalak aurkeztua. Mendigorriko udalak, 1999ko urriaren 22an izandako bilkura arruntean erabaki zuen proiektu honen gainean honako testua aurkeztea: "Proiektua ikusirik, Zirauki eta Mañeruren gainetik lotzen duen bidea iruditzen zaigu egokiena, eta erabat ados gaude autobidearen sarbidearekin."

-Erantzuna:

Alegazioa kontuan hartu da alternatiba hautatzeko.

-6. alegazioa, Ziraukiko Udalak aurkeztua.

Cruz Barandalla Lacunza jaunak, Legardako Alkate udalburua den partez, idazki bat aurkeztu du esateko urriaren 7ko osoko bilkuran honako puntuetan laburbiltzen dena erabaki zela:

1) Gaurko errepidearen bide bera hartzen duen alternatiba hobetsi zen.

2) Hainbat eskaera egitea, alderdi jakin eta zehatz batzuen gainekoak (bideak berjartzea, sarbideak eta abar) eta eskatzea kontuan har daitezela proposatzen den alternatiba proiektuan. Orokorragoko beste ekintza batzuk ere eskatzen dira: sarbideetan ez dadila oztopo arkitektonikorik izan, pausagune bat egin dadila zubi erromatarraren inguruan, sarbideak kontrolatzea, landarez horni daitezela zerbitzurik gabe gelditzen diren errepideak, eta abar.

3) Eskatzea udalaren iritziak kontuan har daitezela proiektua egiterakoan eta bukatu arte zain egon gabe.

-Erantzuna:

1) Kontuan hartu da Udalak adierazi duena alternatiba hautatzerakoan, bereziki Mañeru eta Ziraukiren artean. Zirauki eta Lorkaren arteko trazaduran, gaurko errepidearen ezaugarriak ikusirik, ia ezinezkoa da hori autobia berriaren pasabidetzat hartzea; hala ere, eta eremu horren ezaugarriak ikusirik, behin betiko trazadura xehero aztertuko da, tokatzen denean, Ziraukiko Udalarekin.

2) Aurkeztu diren proposamenak aztertu eta kontuan hartuko dira hautatzen den alternatibaren eraikuntza proiektua idazteko aldian. Alderdi orokorrenei dagokienez, proposatu den alternatiba jendaurrean jarriko da Ingurugiroaren gaineko Eraginaren Deklarazioa egiteko. Jendaurrealdi horretan zilegi izanen da ingurugiro gaien gaineko alegazioak egitea. Zerbitzurik gabe geratzen diren errepide zatiei dagokienez, autobia eginda dagoenean proiektu eta obrak kasu eginen du zati horiek kendu eta terrenoa lehengo egoerara bihur dadin.

3) Kontuan hartuko dira udalaren iritziak, aurreko puntuan esan den bezala, eta udalari aditzera emanen zaio, proiektua garatzen ari den bitartean, nola konpon daitezkeen planteatu diren arazoak.

-7. alegazioa, Angel Vilellak aurkeztua, Ziraukikoa.

Angel Vilellak alegazio bat aurkeztu du, Ziraukin 1999ko abuztuaren 31n datatua, eta bertan egiten dituen gogoetek honako ondorioak justifikatzen dituzte:

1) Bai Ziraukiko iparraldetik pasatzen den alternatibak nola hegoaldetik pasatzen denak biek dute Ingurugiroaren eta bertako gizarte-ekonomiaren gaineko Eragin handia eta konpongaitza.

2) Proposatzen da Ziraukiko zatian bideak gaurko errepideen leku bera hartzea.

-Erantzuna:

1 eta 2) Autobia baten trazadurak dituen baldintzak (kurben erradioa, gutxieneko maldak eta abar) direla medio, ia ezinezkoa izaten da, oro har, lehengo trazadurekin bat egitea. Horregatik proiektua gaurko errepideetatik aldentzen da zenbait tartetan. Egia da edozein eraikuntza ekintzak beti dituela ingurugiroaren gaineko eraginak, baina egin den alternatiba azterlanak eta jendaurrealdiak hori dute helburu: alternatiba guztien artetik hoberena hautatzea, interes eta eragin guztiak ahalik eta hobekien uztartuz. Hautatu den alternatibaren Ingurugiroaren gaineko Eraginaren Azterlanak neurri zuzentzaileak aztertu eta proposatuko ditu saihestu daitezkeen eragin negatiboak eta lurraldearen gaineko eragina ere ezerezteko.

-8. alegazioa, Ziraukiko Alkateak aurkeztua, Angel Istúriz Sanz jaunaren idazki batekin batera.

Cruz Barandalla Lacunza jaunak idazki bat aurkeztu du, Angel Istúriz Sanz Ziraukiko la Llanada dermioko gasolindegiaren jabeak, udal horretan aurkeztu duen alegazio baten alde egiteko. Idazkiak sei alegazio egiten ditu:

1) Lehenbizikoan, azaltzen du la Llanadako gasolindegiaren jabea dela eta autobiaren trazadura zein den, horren mende dagoela bere jarduera gelditzea edo aurrera joatea.

2) Bigarrenean azaltzen du gasolindegiaren inguruko ondasunak nekazari tankerakoak direla eta gasolindegiaren jarduna familiarra eta xumea dela.

3) Hirugarrenean azaltzen du zer arazo izan dituen behar bezalako sarbideak izateko.

4) Laugarrenean aditzera ematen du proposatzen den trazadurak tokiz kanpo uzten duela bere jarduna.

5) Bosgarrenean aditzera ematen du trazadura hori konplikatuagoa ez ezik garestiagoa ere badela eta desjabetzapen gehiago behar duela.

6) Seigarren alegazioan, defendatzen du Zirauki eta Lozako (sic, Lorkako?) bidegurutzearen arteko zatiari dagokionez, trazadura ahal den guztian oraingo errepidearen bidetik joan dadin.

7) Eta aukera hori ezin izaten bada, aditzera ematen du eskatuko diola Administrazioari erantzunbeharra egin zaion kalteagatik. Batera nahiz bestera, eskatzen du gasolindegiari sarbideak egin dakizkiola autobiatik.

Idazkiaren akaberan laburbildu egiten dira berriz alegazioetan egindako eskaerak.

-Erantzuna:

Lehenbizi, aditzera eman behar da jendaurrean jarri zen dokumentuak ez duela inongo alternatibarik defendatzen: hainbat alternatiba azaldu, haietako bat hautatu gabe, eta haien balorazioa egiten du ikuspuntu funtzional, ekonomiko, ingurugiroko eta sozioekonomikotik. Haren idazkia aztertuta, badirudi berak gogoan duen alternatiba dela “Anitz” izena eman zaiona, hau da, Ziraukiko udalak guztien artean hobetsi duena.

1)etik 4)rako atalek egoera azaldu besterik ez dute egiten eta beraz ez dute erantzunik behar.

5) eta 6) atalei dagokienez, esan dezagun autobia baten trazadurak dituen baldintzak (kurben erradioa, gutxieneko maldak eta abar) direla medio gehienetan ezin izaten dela aurreragoko trazadurekin bat egin, zati oso jakinetan ez bada; hala ere 6-1), 7-1) eta 2) alegazioetan esandakoa gogorarazi behar da.

7. atalari dagokionez, berriz, esan dezagun edozein eraikuntza proiektu, eta partikularki garatzen den soluzioarena, jendaurrean jarriko direla, eraginpeko ondasun eskubideen arazoak ebazteko, eta jendaurrealdi horretan egin beharko direla legez tokatzen diren erreklamazioak.

Sarbideak jartzeko eskaerari dagokionez, esan dezagun alternatiba guztiek sarbidea ematen diotela, aurreikusitako loturen bidez, N-111 alternatibari, eta handik aipatu gasolindegiari.

-9. alegazioa, Lakarko kontzejuak aurkeztua.

Lakarko Kontzejuaren udalbiltzak, 1999ko irailaren 10eko bilkuran, honako ikuspuntuak eta sujerentziak azaltzea erabaki zuen:

1) Ahal den guztian aprobetxa dadila N-111 errepidearen gaurko trazadura, eraginak ahalik eta txikienak izan daitezen.

2) Deierrira joateko irtenbideko lotura NA-7320 errepidearen gaurko bidegurutzetik egin dadila.

3) Ahaleginean bidea ez dadila Lakarko etxagunean barna pasa.

-Erantzuna:

1) Lehen puntuari dagokionez, esan dezagun autobia baten trazadurak dituen baldintzak (kurben erradioa, gutxieneko maldak eta abar) direla medio gehienetan ezin izaten dela aurreragoko trazadurekin bat egin, zati oso jakinetan ez bada.

2) Alegazio hau onartzen da. Lotura oso bat erantsiko da N-111 eta NA-7320en arteko gaurko gurutzagunean.

3) Alegazio hau onartzen da. Autobiaren proiektu eta obrari erantsiko zaio Autobia eta Lakarren arteko bidea eraberritu beharra, eta bai Herri horren saihesbidea ere, iparraldetik kurba-eremua pasa arte.

-10. alegazioa. Deierriko udalak aurkeztua.

Pedro Jesús Lizarraga Lezáun jaunak, Deierriko Alkate udalburua den partez, honako alegazioak aurkeztu ditu:

1) Deierrira joateko irtenbideko lotura NA-7320 gaurko errepide lokalaren bidegurutzetik egin dadila.

2) Ahaleginean ez dadila pasa Lakarko etxagunean barna.

-Erantzuna:

1) Onartzen da alegazioa. Lotura osoa erantsiko da N-111k eta N-7320k elkar jotzen duten lekuan.

2) Onartzen da alegazioa, autobia proiektu eta obrari erantsiko zaio autobia eta Lakarren arteko bidea eraberritzeko lana, eta bai herri horren saihesbidea ere kurba eremua pasa arte.

-11. alegazioa Euskal Herritarrok zinegotzi taldeak aurkeztua.

Datarik gabeko idazkia da, Carlos Ancín Izpura jaunak, Euskal Herritarrok zinegotzi taldeko ordezkari den partez sinatua, zein udaletakoa den zehaztu gabe. Edukiak, halere, Zizur Nagusia aipatzen du. Bertan aditzera ematen da Iruña-Lizarra bide-lotura ez dela joan behar etxagunean barna baizik eta IHAetan aurreikusten den saihesbidean barna.

-Erantzuna:

Jendaurrealdi honetako alternatiba azterlana ez da Iruñean hasten, Zizur Nagusian baizik. Zizur Nagusian barna pasatzea beste azterlan batek aztertzen du. Beraz alegazio hau ezin da aintzat hartu jendaurrealdi honetan. Hala ere, berriz esaten da 2. alegazioko erantzunean esandakoa, alegia, autobia berria Zizurko Auzoberriaz haratagotik hasiko dela.

12. alegazioa, Zizurko zendearen udalak aurkeztua.

Zizurko zendearen udalak 1999ko azaroaren 11n egindako osoko bilkuran onetsi zuen testuak honela dio:

1) Erreniega pasatzeko proposatzen diren alternatiba biak txarrak iruditzen zaizkiela.

2) Udalak eskatuta Herrilan, Garraio eta Komunikazio Departamentuak aurkeztu zuen alternatiba nahiago dutela, 1999ko azaroaren 8an aurkeztua, ondoren beste detaile batzuk (lotura mota, non jarri eta abar) aztertu beharra ezertan galarazi gabe.

-Erantzuna:

Onartzen da alegazioa. Emandako iritzia kontuan hartu da alternatiba hautatzerakoan.

-13. alegazioa, Undioko Kontzejuak aurkeztua.

Enrique Miranda García jaunak, Undioko kontzejutik bi puntuko idazki bat aurkeztu du:

1) Lehenbiziko puntuan aditzera ematen du Erreniegako pasabidearen azterlanean bi alternatibak gaitzestekoak iruditzen zaizkiola, ingurugiroaren eta lurraldearen gaineko eraginagatik, bai berak "iparrekoa" deitzen dion alternatiban (Asterainen iparraldetik pasatzen baita), eta bai "hegokoa" deitzen dionean ere, Azterlanean azaltzen diren arrazoi geologikoak direla medio.

-Erantzuna:

Eskaera hau Zizurko zendearen ordezkariek aurkeztu zuten, haien artean Undioko kontzejukoak ere zirela, 1999ko urriaren 8an izandako informazio bileran. Eskaera onartu zen eta departamentuak berehala aztertu zuen Erreniegako pasabidearentzat aurkezten zen alternatiba.

Alternatiba hori azterturik eta geologiazko trabarik ez zuela ikusirik, Herrilan, Garraio eta Komunikazio Departamentuak erabaki zuen alternatiba baliagarritzat aurkeztea, zeren garestiagoa bazen ere, deusezten ditu hasieran plazaratu zen alternatibak Zizurko zendearen gainean zituen eraginak.

"Erreniega" deritzan alternatiba horren azterlanak delako udalari aurkeztu zitzaion 1998ko azaroaren 8ko bilkuran.

Zizurko zendearen Udala, 12. alegazioan aipatu den bezala, alternatiba horren alde agertu da eta onartu da alegazioa. Hortaz, Undioko kontzejuak alegatu duena ere onartutzat ematen da.

-14. alegazioa, Mañeruko udalak aurkeztua.

Begoña Arbeloa García andreak, Mañeruko alkateak, aditzera ematen du urriaren 20ko osoko bilkuran ondoren laburbiltzen dena erabaki zela:

1) Positibotzat jotzea autobia egitea.

2) Plazaratu diren alternatibei dagokienez, N-111aren gaurko trazadurarekin bat doana hobesten dute.

3) Eskatzen dute N-111 horretatik erabili gabe gelditzen diren zatiak berdegune edo arboldegi bihurtzeko.

4) Eskatzen dute kontuan har dadila udalaren iritzia proiektuaren ondorengo faseetan ere.

-Erantzuna:

1) eta 2) Kontuan hartu da Udalak proposatutakoa alternatiba hautatzeko.

3) Autobia egin ondoren zerbitzurik gabe gelditzen diren errepide tarteak, desegin eta ingurugiro aldetik lehengoratu eginen dira.

4) Udalari bere ardurako zatiaren eraikuntza proiektuaren berri emanen zaio, proiektu zati hori itxuratzen den bitartean.

-15. alegazioa, Francisco javier Urrutia jaunak aurkeztua.

Francisco Javier Urrutia Jáuregui jaunak idazki bat aurkeztu du hainbat gogoeta egiteko autobia Zizur Nagusiko etxagunean barna pasatzearen gainean, IHAetan (Iruñerriko Hirigintza Arauak) aurreikusitako saihesbidearen gainean eta mendebaleko Ingurubideari lotzeko puntuaren gainean.

-Erantzuna:

Herrilan, Garraio eta Komunikazio kontseilariaren ekainaren 28ko 2367/1999 Foru Aginduak espreski esaten duenez, "jendaurrera ateratako zatia Zizur Nagusitik hasi (Zizurko auzoberria pasa ondorenetik, hori beste proiektu batekoa baita) eta Lizarrako saihesbide berrirainokoa da."

Beraz, alegazio honetan egiten diren gogoeta guztiak, jendaurrealdikoaz beste gai batekoak baitira, ez dire hemen erantzun behar. Esan behar da, halere, proposatu den alternatibaren proiektuak lotura bat izanen duela IHAetan aurreikusitako saihesbidea egiteko bide emateko, eta bai 1. alegazioan esanda dagoena ere, alegia, autobia berria Zizurko Auzoberria pasa ondorenetik hasiko dela.

-16. alegazioa, Garesko udalak aurkeztua. Garesko udalaren 1999ko urriaren 29ko osoko bilkurak erabaki zuen Nafarroako Gobernuari aditzera ematea ados zegoela saihesbideak gaur duen trazadurarekin.

-Erantzuna:

Garesko saihesbideak lehendik ere badu bere Ingurugiroaren gaineko Eraginaren Deklarazioa eta bere Udalez gaindiko Proiektu Sektoriala, hurrenez hurren Ingurugiro, Lurraldearen Antolamendu eta Etxebizitza kontseilariaren otsailaren 15eko Foru Aginduak eta Nafarroako Gobernuaren 1999ko maiatzaren 17ko Erabakiak onetsiak. Hortaz, dokumentu horietan aurreikusten den trazadura aztertutako alternatiba guztietan mantentzen da eta hura bera sartzen da hautatu beharreko alternatiban, Garesko Udalak alegatu duenarekin bat.

-17. alegazioa, Antonio Ros jaunak, Elena Urabayen andreak eta Victor Iriarte jaunak, Lizarrako udaleko zinegotziek, aurkeztua.

Lizarrako udalak 1999ko azaroaren 15ean aurkeztutako idazkia da, epez kanpo, beraz, hiru hileko jendaurrealdia izan bazuen ere. Beraz ez da aintzat hartu behar.

Orain arteko guztiaren ondorioz, beraz, alternatiba bat hautatu da Iruña-Logroño autobia, 1. Tartea: Iruña-Lizarra delakorako, hura tramitatu, behar den Ingurugiroaren gaineko Eraginaren Deklarazioa eman eta Udalez gaindiko Proiektu Sektorialtzat onetsi dadin.

Horrenbestez, Proiektu, Teknologia eta Lan Hidraulikoen Zerbitzuak egindako txostenarekin bat, Nafarroako Foru Komunitateko Gobernua eta Administrazioa arautzen dituen 23/1983 Foru Legeko 36.2 artikuluak esleitu dizkidan ahalmenak erabiliz,

AGINDU DUT:

1. Ekainaren 28ko 2367/99 Foru Aginduak irekitako jendaurrealdia azalpen zatian esandakoaren arabera ebaztea.

2. Aurretik esan denaren arabera Iruña-Logroño autobia, 1. Tartea: Iruña-Lizarra delakorako egokientzat jotzen den trazadura hautatzea, Ingurugiroaren gaineko Eraginaren deklarazioa tramitatu eta Udalez gaindiko Proiektu Sektoriala onetsi dadin.

Hautatu den alternatiba hori, zeinaren oin-planoa Foru Agindu honi erantsita baitator, N-111 errepidearen azterlanak biltzen zituen alternatiben hainbat azpitarte konbinatuz eta Erreniegako Pasabide berria, lotura berriak eta beste obra osagarri batzuk erantsiz sortua da.

Iruña-Lizarra autobiaren alternatiba eta haren loturak eta obra osagarriak hautatzeko, azalpen partean esan bezala, kontuan hartu dira bertako toki entitateek egindako proposamen, sujerentzia eta alegazio asko.

Alternatiba horren eta lotura eta obra osagarrien deskripzioa honakoa da:

a) Trazadura.

-Iruña-Logroño autobia, 1. tartea: Iruña-Lizarra delako autobia Zizurko auzoberria pasa ondorenetik hasiko da.

-Puntu horretatik Garesko saihesbidea hasi artekoan hautatu den trazadura "Erreniega" delako alternatibari dagokiona da. Alternatiba hori Erreniegako pasabideari dagokionez aztertu zen Zizurko zendearen udalak hala eskatuta, azalpen partean aditzera eman den bezala.

-Hasierako zatia, Gendulaingo putzuraino, gutxi gorabehera gaurko N-111 errepidearen trazadurarekin bat joanen da.

-Gendulaingo putzutik Legardaraino trazadura berria izanen da, oro har lerro zuzenekoa, Erreniega mendia 1.050 bat metroko tunel baten bidez pasatzen duena, 600 metroko alturan.

-Autobiak mendebaletik eginen dio inguru Legardari eta Obanosko bidegurutzean batuko zaio atzera gaurko errepideari.

-Puntu horretatik aurrera hasten da Garesko saihesbidea, zeinak onetsirik baititu bere trazadura eta bere UPS eta IED. Saihesbide horrek iparraldetik egiten dio inguru Garesi eta Mañerura sartzeko arranpan berriz lotzen gaurko errepideari.

-Garesko saihesbidetik aurrera, azterlanean "Anitz" zeritzan alternatiba hautatu da.

-Autobia berria Mañeru eta Ziraukiren iparraldetik joanen da, trazadura herri horietatik hurbil duela.

Ziraukitik aurrera gaurko errepidearen trazadurari alde egin eta Allozko akueduktuaren iparraldetik hasten da. Zirauki eta Lorkaren arteko zati osoaren detailearen trazadura garatzerakoan, aintzat hartuko da ahalik eta gehien gutxitzea lurraldearen gaineko eragina. Allozko akueduktutik eta gutxi gora behera 170 metroko tunel bat pasatuz, Lizarrako saihesbideari lotzen zaio, Iruña-Logroño autobia, 1. tartea: Iruña-Lizarra delako autobia bukatzen den tokian.

b) Loturak.

Fase honetarako honako loturak aurreikusten dira:

-Galarko lotura: sarrera berria emanen dio Galarko herriari, eta bai gero batean Galarko kanposantuari ere, inoiz egiten bada (haren promotoreek beretik jarri beharko dute hitzartutako dirutza). Lotura honetan aurreikusiko da Ezkiroz aldera joanen den bidearen lotzea, IHAek agintzen dutenez. Lotura horren diseinuak ez ditu bide berriranzko mugimenduak nekeztuko, batez ere hegoaldetik heldu den trafikoa.

-Iruñerriko ingurubidearen geroko lotura: nahiz eta fase honetan egin ez, aurreikusi eginen da non eginen den, ondorengo garatzea bateragarria izan dadin.

-Asterain-Zarikegi lotura. Bide emanen du Zizurko zendeako herriak autobiari lotzeko; gainera, handik sortu ahal izanen da Asterain eta Muru-Asteraingo geroko ingurubidea.

Legarda-Utergako lotura-erdia: bide emanen du Legarda eta Utergatik Iruñera mugitzeko.

-Obanosko lotura: hortxe erantsiko zaio autobiari Garestik ipar aldera ateratzeko errepidea; puntu horretantxe, gainera, erantsiko zaizkio NA-7040 Gares-Lezaun (I) errepidea, Industrialde berriarekiko lotura eta NA-601 errepidearekin (Mendigorria-Larraga-Lerín) lotzeko bide berria.

-Mañeru ekialdeko lotura erdia: Mañerutik Iruña aldera mugitzeko.

-Mañeru mendebaleko lotura erdia: Mañerutik Lizarrara eta Logroñora mugitzeko.

-Ziraukiko lotura: Ziraukitik Iruñera eta Lizarra-Logroñora mugitzeko.

-Allozko lotura: NA-7171 Lerate-Lorka errepideari lotzeko.

-Lakarko lotura: NA-7320 Lorka-Abartzuza errepidearekin lotura berria egiteko, Deierriko sarbide nagusia izan dadin.

c) Lan osagarriak

-Lokarri-errepideko zati berria Obanosko loturaren eta NA-601 errepidearen artean, Muruzabali sarbide emateko, Iltzarbeibarko zenbait eremu lotzeko eta ibilgailuak Utergatik eta Obanostik pasatzea galarazteko.

-Garestik Mendigorrirako NA-601 errepidearen lotura berria egitea Garesko saihesbidearen mendebaleko loturarekin, Argaren gaineko zubi bat ere eginaz, Mendigorria-Larraga-Lerín eskualdea autobia berriarekin zuzenean lotzeko.

-NA-7320 Lorka-Abartzuza errepidea eraberritzea, autobia eta Lakarren artean, eta herri horietako saihesbidea ere eraberritzea iparraldetik kurba eremua pasa arte, Deierriko sarbide nagusia izan dadin.

3. Aditzera ematea zilegi izanen dela hautatu den trazadura alternatibaten ezaugarriak eta bai aurreko atalean deskribitu diren loturak eta lan osagarriak aldatzea, zabaltzea, zuzentzea eta hobetzea, baldin eta UPS, IED eta eraikuntza proiektuetan aurrerago hala behar dela jotzen bada.

4. Foru Agindu hau BOLETIN OFICIALean eta Foru Komunitateko bi egunkaritan argitaratzea.

5. Foru Agindu honen berri ematea alegazio egileei, Proiektu, Teknologia eta Lan Hidraulikoen Zerbitzuari, Bide eta Eraikuntza Zerbitzuari eta Zizur Nagusia, Zizurko Zendea, Legarda, Uterga, Muruzabal, Gares, Obanos, Mañeru, Zirauki, Mendigorria, Deierri, Villatuerta eta Lizarrako udalei, behar diren ondorioak izan ditzan.

Iruñean, mila bederatziehun eta laurogeita hemeretziko abenduaren hamalauan.-Herrilan, Garraio eta Komunikazio kontseilaria, José Ignacio Palacios Zuasti

Iragarkiaren kodea: a9912368