II. NAFARROAKO TOKI ADMINISTRAZIOA
NAFARROAKO IPARRALDEKO EUSKARA MANKOMUNITATEA
Nafarroako Iparraldeko Euskara Mankomunitatearen euskara teknikari izateko bi lanpostu finko oposizio-lehiaketa bidez betetzeko deialdia
Nafarroako Iparraldeko Euskara Mankomunitatearen euskara teknikari izateko bi lanpostu finko oposizio-lehiaketa bidez betetzeko deialdia.
1.-Arau orokorrak.
1.1. Deialdi honen xedea da Nafarroako Iparraldeko Euskara Mankomunitatearen zerbitzuko euskara teknikari izateko bi lanpostu, lan araubide finkoan, oposizio-lehiaketa bidez betetzea.
1.2. Izendatuak gertatzen diren pertsonek, izendapenaren unetik beretik, lan-kontratatu finkoaren izaera bereganatuko dute, indarra duen lan-legerian ezarrita dagoen probaldi luzeena behin iragan eta gero.
1.3. Lanpostuek B mailako lansariak izanen dituzte, hots, Nafarroako Administrazio Publikoen zerbitzuko Langileriaren Estatutuaren Testu Bategina onesten duen abuztuaren 30eko 251/1993 Foru Dekretu Legegilean eta 1984ko uztailaren 4ko Ordainsarien behin-behineko Erregelamenduan ezarritakoen artean.
1.4 Lanaldiaren erregimena zerbitzuaren beharretara egokituko da eta administrazio organo eskudunek edozein unetan aldatu ahalko dute.
1.5. Euskara teknikari bakoitzak bi zonalde hauetako bat hartuko du: Ultzamaldea edo Larraunaldea. Puntu gehien ateratzen dituen izangaiak aukeratuko du lan egiteko zonaldea.
2.-Eginbeharrak.
a) Nafarroako Iparraldeko Euskara Mankomunitatearen egitarauaren prestaketa, jarraipena eta kontrola.
b) Mankomunitatean euskararen normalizaziorako eta sustapenerako jarduera planen prestaketa, kudeaketa, jarraipena eta kontrola.
c) Euskararen normalizaziorako plangintza sektorialen prestaketa.
d) Larraunaldeko edo Ultzamaldeko euskararen normalizaziorako eta sustapenerako jarduera planen prestaketa, kudeaketa, jarraipena eta kontrola.
e) Euskararen alorrean hartutako Mankomunitatearen erabaki guztiak betetzeko ardura, eta haien jarraipena eta kontrola.
f) Arestian aipatutako udal eta Nafarroako Iparraldeko Mankomunitateari bere euskarazko jardunetan aholkularitza eta laguntza teknikoa ematea.
g) Soziolinguistikaren alorrean, euskara Mankomunitateko egitura ezberdinak aholkatzea.
h) Arestian aipatutako herri horietako Euskara Batzordeak, eskualdeko Euskara Batzordea, Mankomunitateko aholkularitza batzordea, batzorde erabakiorrak eta Batzar Orokorrak koordinatu eta horietan parte hartzea.
i) Beste Udalekin eta Foru Erakundeekin harremanetan jarri eta koordinatzea.
j) Euskararen sustapenerako ekintzetan parte har dezaketen herriko nahiz kanpoko elkarte eta taldeekin harremanetan jarri eta koordinatzea.
k) Euskara Zerbitzuaren azpiegitura (pertsonala, bitartekoak...) antolatu eta koordinatzea.
l) Kasuan kasuko batzorde erabakiorrak euskara alorrean eman diezaiokeen beste edozein eginkizun.
3.-Izangaien baldintzak.
3.1. Oposizio-lehiaketa honetan onartuak izateko izangaiek honako baldintza hauek bete beharko dituzte:
a) Europako Elkarteko hiritarra izatea.
b) Eskaerak aurkezteko epea amaitzen den egunean hemezortzi urte eginak izatea.
c) EGA titulua edo baliokideren bat izatea.
d) Unibertsitateko titulazioa izatea, erdi edo goi mailakoa.
e) Eginkizunak betetzeko gaitasun fisiko eta psikikorik aski izatea.
f) Eginkizun publikoak betetzeko ezgaiturik edo gabeturik ez egotea eta Administrazio Publikoaren zerbitzutik baztertua ez izana.
g) Ibilgailuak gidatzeko karneta izatea, B mailakoa bederen, bai eta ibilgailua ere.
3.2. Aurreko baldintzak eskabideak aurkezteko epea amaitzen den egunerako bete beharko dira, eta oposizio- lehiaketaren prozeduran zehar, izendapena arte.
4.-Eskabideak.
4.1. Eskabideak Leitzako Udaletxeko Idazkaritzan aurkeztu beharko dira hogeita hamar egun naturaleko epean, Nafarroako ALDIZKARI OFIZIALean argitaratu eta biharamunetik hasita azken eguneko 13:00ak arte, laneguna bada, edo laneguna den hurrengoan.
4.2. Eskabidea deialdi honen I. eranskinean heldu den ereduaren arabera beteko da, eta harekin batera honako agiri hauek ere auzkeztu beharko dira:
a) NANaren fotokopia konpultsatua.
b) Deialdi honen 3.1. atalean eskatzen diren baldintzak betetzen direla egiaztatzen duten agirien fotokopia konpultsatuak.
c) Lehiaketaldian baloratzen ahal diren merezimenduen fotokopia konpultsatuak.
4.3. Eskabideak aurkezteko ezarritako epea luzaezina izanen da.
5.-Izangaien onarpena eta erreklamazioak.
5.1. Eskabideak aurkezteko epea amaiturik, lehendakari jaunak izangai onartu eta baztertuen behin-behineko zerrenda onesten duen ebazpena emanen du, eta Nafarroako ALDIZKARI OFIZIALean argitaratzeko aginduko.
5.2. Baztertutako izangaiek, behin-behineko zerrenda Nafarroako ALDIZKARI OFIZIALean argitaratu eta ondoko hamar laneguneko epean erreklamazioak egin eta akatsak, halakorik bada, zuzendu ahalko dituzte.
5.3. Erreklamazioetarako epea iraganik eta horiek ebatzi ondoren, lehendakari jaunak onartu eta baztertuen behin betiko zerrenda onesteko ebazpena emanen du eta Nafarroako ALDIZKARI OFIZIALean argitaratzeko aginduko. Ebazpen horretan berean probak hasteko lekua, eguna eta ordua zehaztuko dira.
6.-Epaimahai kalifikatzailea.
6.1. Epaimahai kalifikatzailea honakoek osatuko dute:
Mahaiburua: Nafarroako Iparraldeko Euskara Mankomunitateko lehendakaria.
Ordezko mahaiburua: Nafarroako Iparraldeko Euskara Mankomunitateko lehendakariordea.
Mahaikidea: Nafarroako Gobernuko Hizkuntza Politikarako Zuzendaritza Nagusiko teknikari bat.
Ordezkoa: Nafarroako Gobernuko Hizkuntza Politikarako Zuzendaritza Nagusiko teknikari bat.
Mahaikidea: Nafarroako Mendi Aldeko Euskara Zerbitzu baten euskara teknikaria.
Ordezkoa: Nafarroako Mendi Aldeko Euskara Zerbitzu baten euskara teknikaria.
Mahaikidea: Larraunaldeko edo Ultzamaldeko kultur arloko pertsona bat.
Ordezkoa: Larraunaldeko edo Ultzamaldeko kultur arloko pertsona bat.
Mahaikide-idazkaria: Eukeni Celaya Zubieta, Leitzako Udaleko idazkaria.
Ordezko mahaikide-idazkaria: Aitor Iztueta Garaikoetxea, Olaztiko Udaleko idazkaria.
6.2. Epaimahaia hautapen-probak hasi aurretik eratu beharko da.
6.3. Epaimahaia eratzeko eta jarduteko kideen gehiengo absolutua bederen beharko da.
6.4. Epaimahaiak gehiengoz erabakiko ditu deialdi honen oinarriak ulertu eta aplikatzean sor daitezkeen arazo guztiak
6.5. Epaimahaiak aholkulari espezialisten laguntza izan ahalko du proba guztietarako edo batzuetarako. Aholkulari horiek beren espezialitate teknikoetan aritzera mugatuko dira eta haiei buruz soilik emanen diete laguntza epaimahaikoei.
7.-Oposizio-lehiaketaren garapena.
7.1. Onartu eta baztertuen behin betiko zerrenda onesten duen ebazpen berean finkatuko da probak zein tokitan, egunetan eta ordutan hasiko diren.
7.2. Lehiaketaldia:
7.2.1. Alegatutako merezimenduak, Leitzako Herriko Etxean behar bezala konpultsatutako fotokopiak aurkeztuz agiri bidez egiaztatu beharko direnak, baremo honi jarraikiz kalifikatu eta puntuatuko dira.
a) Nafarroako Mendialdeko udalen baten zerbitzuan euskara teknikari lanpostuan aritu izana. Urte bakoitzeko 3 puntu, eta gehienez ere 9 puntu.
b) Beste Administrazio Publikoetako lanposturen batean euskara teknikari gisa aritu izana. Urte bakoitzeko 2 puntu, eta gehienez ere 6 puntu.
c) Beste Administrazio Publikoetako lanposturen batean euskara irakasle edota itzultzaile gisa aritu izana. Urte bakoitzeko puntu 1, eta gehienez ere 3 puntu.
d) Elkarte edo entitate pribatuetan euskararen alorrarekin zerikusirik duten lanetan aritu izana. Urte bakoitzeko puntu 1 eta gehienez ere 3 puntu.
e) Titulazio akademiko hauek izatea:
-Hizkuntza Plangintzan diplomatua: 2 puntu.
-Euskal Filologian lizentziatua: puntu 1.
-Soziologian lizentziatua: puntu 1.
f) Epaimahaiaren iritziz deialdiko lanpostuarekin zerikusirik izan eta hamabost ordutik goitiko iraupena duten ikastaroetan parte hartu izana. Gehienez ere 2 puntu emanen dira.
g) Argitalpenak, komunikazioak, ikerketa-lanak, deialdiarekin zerikusirik duten gaiei buruzkoak, epimahaiak baloratuko dituenak. Gehienez ere 3 puntu emanen dira.
7.2.2. Lehiaketaldian gehienez ere 30 puntu lortu ahalko dira.
7.2.3. Behin lehiaketaldia bukaturik, izangaiek lortutako puntuazioa Leitzako Herriko Etxeko iragarki taulan paratuko da.
7.3. Oposizioaldia:
7.3.1. Oposizio ariketen balorazioa gehienez ere 70 puntukoa izanen da. Bazterturik geratuko dira gai bakoitzari eman zaion puntuazioaren erdia lortzen ez duten izangaiak.
7.3.2. Lehenbiziko ariketa: idatziz eta gehienez ere lau orduz II. eranskinetik zozketa bidez hautatutako bi gai landu beharko dira. Gehienez ere 30 puntu, gai bakoitzagatik 15 puntu. Ariketa hau plika sistemaren bidez eginen da.
Bigarren ariketa: idatziz eta gehienez ere lau orduz Ultzamaldeko edo Larraunaldeko egoera soziolinguistikoan oinarriturik euskararen normalizaziorako plangintza prestatu beharko da. Proba hasi aurretik epaimahaiak zozketaren bitartez bi zonaldetako bat aukeratuko du.
Ariketa hau epaimahaiaren aurrean irakurri beharko dute lehiakideek, bestela bazterturik geldituko baitira. Irakurtze saioan, epaimahaiak argibideak eskatu ahal izanen ditu. Gehienez ere 40 puntu.
7.3.3. Oposizioaldiko probak euskaraz eginen dira.
7.3.4. Epaimahaiko kide bakoitzak bere aldetik eginen du kalifikazioa, eta ariketa horren zatiaren puntuazioa izanen da kalifikazio guztien bataz besteko aritmetikoa.
8.-Probetarako deialdia.
8.1. Ariketa bakoitza amaiturik, epaimahaiak, hamar eguneko epean, Leitzako Herriko Etxeko iragarki taulan argitaratuko du izangaien zerrenda, lortutako puntuazioekin batera, eta bertan adieraziko da, baita ere, oposizioaren hurrengo ariketa egiteko eguna eta tokia, gutxienez 48 ordu lehenago.
8.2. Probetarako deialdi bakarra eginen da, eta izangaiek NANa aldean dutela bertaratu beharko dute. Probetara agertzen ez diren izangaiak bazterturik geldituko dira.
9.-Probak gainditzen dituztenen zerrenda eta agirien aurkezpena.
9.1. Azken ariketaren kalifikazioa amaiturik, epaimahaiak argitara emanen du Leitzako Herriko Etxeko iragarki taulan gainditu dutenen zerrenda, izangai bakoitzak ariketa guztietan lortutako kalifikazioak batu eta ateratzen den puntuazioaren araberakoa.
9.2. Izendapen proposamena iragarki taulan eta Nafarroako ALDIZKARI OFIZIALean argitara eman eta hurrengo 30 egun naturaleko epean, proposatutako izangaiak agiri hauek aurkeztu beharko ditu Iparraldeko Euskara Mankomunitatearen idazkaritzan:
a) Nortasun Agiri Nazionalaren fotokopia.
b) 2. oinarrian eskatzen den titulu jatorrizkoaren fotokopia edo hori erdiesteko eskubideak ordaindu direla egiaztatzen duen gordekina.
c) Zinpeko aitorpena, eginkizun publikoetan aritzeko ezgaitu edo gabetua ez dagoela eta inongo administrazio publikoren zerbitzutik baztertua ez dela izan adierazten duena.
d) Karguan aritzeko eritasun edo akats fisikorik ez duela egiaztatzen duen ziurtagiri medikoa.
e) Zin egin edo hitz ematea Nafarroako Foru Araubidea errespetatu, Konstituzioari eta Legeei men egin, eta karguari dagozkion beharkizunak zuzen beteko dituela.
9.3. Emandako epearen barrenean eta behar adina arrazoituriko ezinbesteko kasuetan izan ezik, interesatuak agiri horiek aurkezten ez baditu, Iparraldeko Euskara Mankomunitateko euskara teknikari gisa lan-kontratudun finko bihurtzeko eskubide guztiak galduko ditu.
9.4. Aurreko atalean aurreikusitako kasua gertatuz gero, 9.1. atalean aipatu den zerrendan ondo-ondotik heldu den izangaiarekin beteko da haren hutsunea, eta horrekin ere aurreko atalean ezarrita dagoen bezala eginen da.
10.-Izendapena eta lanpostuaz jabetzea.
10.1. Hautapenaldia bukaturik eta izangaiak aurreko 9.2. oinarriak aipatzen dituen agiriak ekarririk, lehendakariak, emanen duen ebazpenaren bidez, Nafarroako Iparraldeko Euskara Mankomunitateko lan-kontratadun finko izendatuko du, euskara teknikari bati dagokion lanpostuan ari dadin.
10.2. Izendapena Nafarroako ALDIZKARI OFIZIALean argitaratuko da.
10.3. Izendatuak lanpostuan hasi beharko du izendapena jakinarazi eta ondoko hilabeteko epearen barrenean. Ezinbesteko kasuetan izan ezik, ez bada epe horretan lanpostuaz jabetzen, euskara teknikariaren kategoria eskuratzeko eskubidea galduko du, eta Mankomunitateak oposizioa gainditu dutenen zerrendatik puntuazioaren arabera hurrengo den izangaia proposatuko du.
11.-Helegiteak.
11.1. Deialdi honen, bere oinarrien edo aplikazio egintzen kontra, helegite hauetakoren bat paratzen ahal da, aukeran:
a) Administrazioarekiko helegitea, Nafarroako Auzitegi Nagusian dagokion Sailari zuzendua, argitara eman eta biharamunetik hasi eta bi hilabeteko epearen barrenean.
b) Horren aurretik, eta hala nahi bada, gora jotzeko helegitea, Nafarroako Administrazio Auzitegiari zuzendua, argitaratzen denetik hasi eta hilabeteko epearen barrenean.
I. ERANSKINA
Eskabide eredua
................ J/A adinez nagusia, ........... zenbakidun NANaren jabea, 19.....eko ...........aren ..........(e)an ...........(e)n jaioa, helbidea .......... herriko ................ kaleko ....... zenbakian eta .......... telefonoa duena, zure aurrean agertzen da eta azaltzen du:
Euskara teknikari izateko bi lanpostu, oposizio- lehiaketa bidez betetzeko deialdian onartua izatea eskatzen duela.
Karguan aritzea galarazten dion ezintasun fisiko edo psikikorik ez duela.
Indarra duten xedapenetan ezarritako ezgaitasunetan sarturik ez dagoela.
Eskabideak aurkezteko ezarri den epea bukatzean eskatzen diren baldintza guztiak betetzen dituela.
Ondoko merezimendu hauek alegatu eta aurkezten dituela:
-
-
-
Horregatik, eskabide hau jaso eta euskara teknikari izateko bi lanpostu oposizio-lehiaketaren bitartez betetzeko deialdian onartua izatea eskatzen du.
Leitzan, 1998ko .....aren .....(e)an.
(Sinadura)
II.ERANSKINA
1.-Euskara 1978ko Espainiako konstituzioan eta Nafarroako Forua Birrezarri eta Hobetzeari buruzko Lege Organikoan.
2.-Euskarari buruzko Foru Legea.
3.-Soziolinguistika: linguistika eta soziologiarekin dituen berdintasun eta ezberdintasunak.
4.-Soziolinguistikari dagozkion oinarrizko kontzeptuak: elebitasuna, diglosia, egoera minoritarioa eta minorizatua.
5.-Hizkuntzaren normalizazioa: hizkuntza normalizazioaren eremuak; hizkuntzaren ezaguera eta erabilera. Hizkuntzaren normatibizazioa: estandarizazio eredua: a) dialekto baten hedapena, b) eredu batua sortzea.
6.-Hizkuntza anitzeko Estatuen Hizkuntza Politika: eredu juridiko-legalak eta tratamendu ezberdinak: 3 adibideak.
7.-Euskararen ordezkapen linguistikoa XIX. mendera arte: bilakaera historikoa.
8.-Euskararen egungo egoera Nafarroan.
Iragarkiaren kodea: A9809242
