37. ALDIZKARIA - 1997ko martxoaren 26a

II. NAFARROAKO TOKI ADMINISTRAZIOA

S E S M A

Merkataritza ez-egonkorra arautzen duen ordenantza

7/1985 Legearen 70.2 artikuluan eta Nafarroako Toki Administrazioari buruzko uztailaren 2ko 6/1990 Foru Legearen 235 eta 326. artikuluetan ezarritakoari jarraikiz, ondotik ematen da Merkataritza ez-egonkorra (merkatu ttikia) arautzen duen ordenantzaren testu osoa, Udalak 1997ko otsailaren 3an egin osoko bilkuran onetsi zuena.

Ordenantza horrek Nafarroako ALDIZKARI OFIZIALean argitaratzen den egunean hartuko du indarra.

Sesman, mila bederatziehun eta lauretan hogeita hamazazpiko otsailaren zazpian. Alkatea, José María Olcoz Esteban.

MERKATARITZA EZ-EGONKORRA (MERKATU TTIKIA) ARAUTZEN DUEN ORDENANTZA

I. TITULUA

Xedapen orokorrak

1. artikulua. Ordenantza honen xedea Sesmako udalerrian merkataritza ez-egonkorra arautzea da, uztailaren 3ko 13/1989 Foru Legeak Nafarroako toki entitateei erregelamenduak egiteko ematen dizkien ahalmen zehatzak garatuz.

2. art. Herrian kalez-kaleko salmenta egitea debeku da erabat.

3. art. Ordenantza honi doakionez, merkataritza ez-egonkorra merkatariek ohiko saltoki egonkorretatik kanpo, muntadura desmuntagarrietan, aire zabalean, edo denda ibilgailuetan egiten dutena da, uztailaren 3ko 13/1989 Foru Legean, eta Ordenantza honetan ezarritako baldintzei jarraikiz.

4. art. Inoiz ere ez da produktuak saltzeko baimenik emanen, haien arauteriak debekatzen badu.

Halaber, hauek saltzea debeku da:

-Haragia, hegaztiak, zezinak, ehizakiak, arrainak eta itsaskiak.

-Esnea, gazta freskoa, zenderena, esnegaina, gurina, jogurta eta bertze esneki freskoak.

-Ketuak eta bertze semikontserbak.

Baimena ematen da pastelak saltzeko higiene eta osasungarritasunaren aldetik behar bezalako baldintzak konplitzen badituzte.

Urdaiazpikoak eta hertzekiak garraiatu, biltegiratu eta erakusterakoan higiene baldintzak beteko dira zehatz- mehatz, eta garbi-garbi edukiko ondoko gauza guztiak. Urdaiazpiko eta hertzekiak zintzilik eta ordenaturik paratuko dira. Ezin izanen dira ibilgailuaren behealdea ukitzen dutela ukan. Eskaintza egiteko erakusmahaiak behar bezalako txukuntasunez zainduko dira eta material garbigarri eta iragazkaitzez eginak. Urdaiazpiko eta hertzekiek aldean osasun agiri beharrezkoa eramanen dute osotara betea eta bertan datu orokorrak eta aipatu produktuak identifikatzeko direnak paratuko dira.

Ikuskaritza zerbitzuek, ez dute saltzera utziko edo konfiskatuko dituzte ibilgailuari edo arestian aipatu eskaintzari dagokionez higiene arauteria betetzen ez dituzten produktuak, eta berdin eginen dute haien identifikazio osoa posible ez bada edo hondamen aztarnarik badute.

Oinarrizko araua hau izanen da: elikagai guztiek bakoitzari buruzko osasun arautegia beteko dute, eta nahitaezkoa izanen da produktuak behar bezala ontziraturik eta etiketaturik aurkeztea beren arautegiak hala galdatzen baldin badu.

5. art. Merkatari ez-egonkorrek baldintza hauek bete beharko dituzte beti:

a) Alta hartua izatea merkataritza eta industri jardueren Lizentzia Fiskaleko epigrafeetan.

b) Dagokien ogasun publikoarekiko zerga betebeharrak beterik izatea.

c) Alta hartua izatea bakoitzaren Gizarte Segurantzaren sisteman.

d) Sesmako Udalaren baimena izatea, salmenta-postuan ikusteko maneran agerian egonen dena.

e) Osasungintzako arau teknikoek eta gainerako xedapen aplikagarriek merkaturatzen diren produktuen gainean eskatzen dituzten baldintzak betetzea.

f) Atzerritarrek, lanean bere gain aritzeko eta hemen bizitzeko baimenak izatea, indarra duen arauteriari jarraikiz.

g) Argi ikusteko moduko kartelen bidez kontsumitzaileari adieraztea zein diren salmentako produktuak egiterakoan egin diren izkutuko akatsak.

h) Salgai jartzen diren produktuen marka eta jatorria behar adina frogatzen duen dokumentazioa izatea.

i) Elikagaiak salduz gero, janari erabiltzaileen karneta izatea, Nafarroako Gobernuaren zerbitzu teknikoek luzatua.

6. art. Tokatzen diren tasak ordainarazteko, eremu publikoko eta herrilurretako zoru, hegalkin eta zorupeko probetxamendu berezien tasak arautzeko ordenantzak agintzen duena hartuko da aintzat.

Baimena eskuratu aitzin, tasa Sesmako Udaleko diruzaintzan ordaindu beharko da.

7. art. Debeku izanen da inolako dei soinurik egitea bezeroen arreta ekartzeko ez merkatuan eta ez herriko beste kaleetan.

II. TITULUA

Merkatu ttikia

I. KAPITULUA

Jardueran aritzeko baldintzak

8. art. Merkatu ttikiko salmenta ortziralero eginen da, edo ortzegunetan ortzirala jaieguna bada, salbu eta herriko bestetan, eta 20. artikuluan eta ondokoetan ezarritakoa ukatu gabe.

9. art. Salmentako ordutegia goizeko bederatziatetik arratsaldeko ordubiak artekoa izanen da eta zamalanetakoa, berriz, goizeko sei t'erdietatik arratsaldeko hirurak artekoa. Produktuak deskargatu ondoren, atera eginen da ibilgailua merkatu ttikiko eremutik.

10. art. Plaza de la Diputación da merkatu ttikiaren kokalekua, Udaleko langileek saltzaileei erraten dieten aldean.

11. art. Salmenta-postuek baldintza hauek beharko dituzte bete: luze-zabalak gehienez ere zortzi metro.

12. art. Ez da salmenta-postuen gehieneko kopururik zehazten, baina plazan erabiltzeko lekurik ez dagoen heinean mugak jartzen ahalko zaizkio salmenta-postu gehiago paratzeari.

13. art. Udalaren osoko bilkurak bere esku du aitzineko bortz artikuluetan aipatu baldintza guztiak aldatzeko ahalmena, komenigarri juzkatuz gero.

II. KAPITULUA

Banan banako baimenak merkatu ttikiko salmentarako

14. art. Alkatearena da banan-banan baimenak emateko eskumena, herriko merkatu ttikian saldu ahal izateko.

15. art. Banan banako baimenak norberarenak eta eskualdaezinak dira, eta urtebeteko indarraldia dute.

Baimenean adieraziko da nor den titularra, indarraldia, postuaren luze-zabala, baldintzak eta kokalekua eta salmentarako baimena duten produktuak.

Merkatariak behartuak daude osasungintzako agintarien ustez behar diren agiri guztiak aurkeztera eskatzaileak garraio eta hozkailuen instalazioetan produktuak higienearen eta osasunaren aldetik behar bezalako baldintzetan gordetzeko neurriak betetzen dituen ala ez frogatzeko.

16. art. Urtero hamabortz egun balioduneko epea irekiko da merkatari interesatuek merkatu ttikiko salmentarako banan-banako baimenak eska ditzaten.

Halaber, edozein unetan eskatzen ahalko da baimena, emanda dauden baimenen kopurua baimendu daitezkeen postuen kopurua baino ttikiagoa izanez gero.

17. art. 1. Merkatu ttikian salmenta-postuak paratzeko baimena lortu nahi dutenek udal bulegoetan eskabidea jaso eta hari dokumentazio hau erantsiko diote:

a) N.A.N.aren fotokopia.

b) Janari erabiltzaileen karnetaren fotokopia, elikagaiak saltzen dituztenen kasuan.

c) Bi argazki, karnet tamainakoak.

2. Merkatariek merkatuan zein produktu saltzeko baimena eskatzen duten beharko dute adierazi eskabidean, baita postuaren luze-zabalak zein diren ere.

3. Helbidea udalerrian izanez gero, horrela adierazi beharko du merkatariak eskabidean.

18. art. Merkatu ttikiko postuetarako baimenak ematerakoan, lehentasuna izanen dute Sesman bizi diren merkatariek eta salerosketan denbora gehien egin dutenek.

Gainerako postuak zozketaz banatuko dira.

Eskabideen kopurua baimena lortu dezaketena baino handiagoa bada, Udala behartua egonen da edozein arrazoi dela eta libre gelditutako postuak esleipenik hartu ez dutenen artean zozketatzera. Lehentasuna izanen dute merkatu ttikian saldu ez edo urri diren artikuluak.

III. KAPITULUA

Baimena eskuratzen duten merkatarien betebeharrak

19. art. Banan banako baimenen titularrak, 5. artikuluko baldintzak bete behar izateaz landa, behartuta daude ondokoak ere betetzera:

a) Salgai dauden produktuak, guttienez ere, lurretik lauretan hogei zentimetrora paratzea, haien tamainak eta pisuak horretarako bide ematen badute bederen.

b) Normalean, esleituriko postuan egotea. Merkatu ttikira ez agertuz gero, alkateak lizentzia kentzen ahalko dio.

c) Esleitutako postua txukun atxiki, eta salmenta orduak bukatuta, hura garbitzea.

III. TITULUA

Noizbehinkako merkataritza feria eta bestetan

20. art. Alkatearen eskumena da salmentari baimena ematea herriko feria eta bestetan. Alkateak garaiz onetsiko ditu salmentarako baldintzak. Zehatz-mehatz, merkatariek non-noiz saldu, zenbat postutan gehienez eta horiek zer baldintza beteko dituzten erabakiko du.

21. art. Herriko besta eta ferietan salmentan aritzen diren merkatariek ordenantza honen 5. artikuluan ezarritako baldintzak bete beharko dituzte.

22. art. Baimen eskabideak Udalean aurkeztuko dira berak ematen duen epearen barrenean.

Eskatzaileek 15. artikuluan adieraziriko agiriak beharko dituzte ekarri.

Baimenek, feriak edo bestek irauten duten bitartean baizik ez dute balioko.

IV. TITULUA

Arau-hausteak eta zehapenak

23. art. Hauek arau-hauste arinak dira:

a) 13/1989 Foru Legeko aginduak edo ordenantza honetakoak ez betetzea, arau-hausteen bertze bi kategorietakoak izan ezik.

24. art. Hauek arau-hauste larriak dira:

a) Arau-hauste arinak behin baino gehiagotan egitea.

b) Salerosketako produktuei buruzko arauteriak galdatzen dituen baldintzak ez betetzea.

c) Ozarkeria, edo udal agintariei, haren funtzionari edo udaltzainei beren egitekoetan ari direnean argibideak ukatzea, bai eta okerreko argibideak edo gezurrezko agiriak ematea ere.

25. art. Hauek arau-hauste oso larriak dira:

a) Arau-hauste larriak behin baino gehiagotan egitea.

b) Sesmako Udalak luzaturiko baimenik ez izatea merkatu ttikian aritzeko.

c) Toki entitatearen agintari, funtzionari edo udaltzainei, beren egitekoetan ari direnean, aurka, bortxa edo mehatxu egitea.

26. art. Arau-hauste arinak ohartarezpenez edo 25.000 pezetarainoko isunez zehatzen ahal dira.

Arau-hauste larriak 25.001etik 100.000 pezeta bitarteko isunez zehatzen ahal dira.

Arau-hauste oso larriak 100.001etik 500.000 pezeta bitarteko isunez zehatzen ahal dira eta, kasuan-kasuan, saltzeko baimena aldi baterako kenduz edo hura baliogabetuz.

Badaezpadako neurri gisa, salgaiak kentzen ahal zaizkie, burututako eginbideetatik haiek merkaturatzeko eskatzen diren baldintzak ez direla bete ondorioztatzen bada, eta bahitu eginen dira agintari eskudunen iritziz osasun arriskua sortzen ahal badute.

27. art. Zehapen espedienteak, prozedurari dagokionean, indarra duten administrazio xedapenetan ezarritakoari lotuko zaizkio.

AZKEN XEDAPENA

Bakarra.-Nafarroako Toki administrazioari buruzko uztailaren 2ko 6/1990 Foru Legearen 325. artikuluan ezarritako prozedurari jarraikiz onetsi ondotik, ordenantza fiskal honek bere testu osoa Nafarroako ALDIZKARI OFIZIALean argitaratzen denean indarra hartu eta erabateko eragin juridikoa sortuko du.

Iragarkiaren kodea: A9701394