Iragarkia

95. ALDIZKARIA - 2023ko maiatzaren 8a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

310E/2023 EBAZPENA, apirilaren 14koa, Garraioen eta Mugikortasun Jasangarriaren zuzendari nagusiak emana, zeinaren bidez onesten baita errepideko garraio zerbitzuak ematen dituzten bidaiarien garraio enpresa pribatuak eta salgaien errepide-garraioan esku hartzen duten enpresa pribatuak modernizatzeko laguntzen deialdia, Europar Batasunak finantzatutako Suspertze, Eraldatze eta Erresilientzia Planaren esparruan (Next Generation EU). DDBN identifikazioa: 688295.

Urriaren 25eko 902/2022 Errege Dekretuak (2022ko urriaren 26ko Estatuko Aldizkari Ofizialean, 257. zenbakian, argitaratua; aurrerantzean, 902/2022 Errege Dekretua) autonomia erkidegoei eta Ceuta eta Melilla hiriei zuzeneko laguntzak ematea onesten du, errepideko garraio zerbitzuak ematen dituzten bidaiarien garraio enpresa pribatuak eta salgaien errepide-garraioan esku hartzen duten enpresa pribatuak modernizatzeko, Europar Batasunak finantzatutako Suspertze, Eraldatze eta Erresilientzia Planaren esparruan (aurrerantzean, SEEP), ezohiko izaerarekin eta interes publiko, sozial eta ekonomikoko arrazoiengatik.

902/2022 Errege Dekretuaren xedea autonomia erkidegoei eta Ceuta eta Melilla hiriei laguntza horiek zuzenean ematea arautzea da, horiek dagozkien laguntza deialdiak onar ditzaten, eta, era berean, deialdi horiek bete behar dituzten oinarri arautzaileak ezartzea du helburutzat.

SEEParen esparruan, zeina jarduera ekonomikoa inbertsio batzuen bidez sustatzera bideratuta baitago, laguntza horiek Planaren 6. osagaiaren barrenean («Mugikortasun jasangarri, seguru eta konektatua») sartzen dira, 4. inbertsioan. Inbertsio horren helburua garraio sektorea digitalizazio eta intermodalitatera bideratutako jarduketen bidez bultzatzea da; eta inbertsio horren barrenean, berriz, 15. neurrian jasota dago. Neurri horrek laguntzak barne hartzen ditu bidaiarien eta salgaien garraioko enpresa pribatuak, garraio operadoreak eta enpresa kargatzaileak, salgaien garraioan esku hartzen duten enpresak diren aldetik, digitalizatzeko.

4. inbertsioaren barrenean, honako hauek hartzen dira jarduera diruz lagungarritzat: errege dekretu horretan ezarritako baldintzak betetzeaz gain, enpresa horiek modernizatzeko direnak eta bertan azaldutako modernizazio konponbideen kategorietara egokitzen direnak. Era berean, laguntza horien bidez sektoreari erraztasunak eman nahi zaizkio aplikagarri zaion araudi sektoriala bete dezan.

Garraioen, Mugikortasunaren eta Hiri Agendaren Estatu Idazkaritzaren 2022ko azaroaren 30eko Ebazpenaren bidez, Nafarroako Foru Komunitateari 1.535.695 euroko dirulaguntza bat zuzenean ematea erabaki zen. Dirulaguntza hori laguntza horien deialdira bideratu behar da, errege dekretuan ezarritako moduan eta baldintzetan.

Jarduketa diruz lagungarriak dira 902/2022 Errege Dekretuaren 19. artikuluan definitutako jarduketa tipologiak, zeinak 14. artikuluan zerrendatzen diren enpresek, laguntzen azken hartzaileak diren aldetik, egiten baitituzte, eta errege dekretu horretan xedatutakoari zorrotz jarraikiz, bereziki 10., 11. eta 13. artikuluetan, autonomia erkidegoen betebeharrei eta mugarri eta helburuak betetzeari buruzkoetan, ezarritakoari.

Garraioen Ikuskapen, Kudeaketa eta Antolamenduaren eta Mugikortasunaren Zerbitzuak 2023ko apirilaren 14ko txostenean adierazten duenez, jarduketa diruz lagungarrietarako laguntzak Estatuaren laguntzatzat hartzen dira, eta Batzordearen 2013ko abenduaren 18ko 1407/2013 (EB) Erregelamendua bete beharko dute, Europar Batasunaren Funtzionamendu Itunaren 107. eta 108. artikuluak «de minimis» laguntzei aplikatzeari buruzkoa. Laguntza horiek emateko, erregelamendu horretan ezarritako baldintzak eta mugak bete beharko dira.

Era berean, Zerbitzu horrek jakinarazi du deialdi honen prestaketan betetzen dela Suspertze eta Erresilientzia Mekanismoaren (aurrerantzean, SEM) Erregelamenduan , SEEPan eta hura garatzeko araudian xedatutakoa; bereziki, irailaren 29ko HFP/1030/2021 Agindua, SEEParen kudeaketa sistema taxutzen duena, eta irailaren 29ko HFP/1031/2021 Agindua, zeinaren bidez ezartzen baitira SEEParen osagaietako neurrien aurrekontu eta kontabilitate betearazpena eta mugarri eta helburuak betetzearen jarraipenerako estatuko, autonomia erkidegoko eta tokiko sektore publikoko erakundeek eman beharreko informazioaren prozedura eta formatua, bai eta urtarrilaren 24ko HFP/55/2023 Agindua ere, SEEPa betearazten duten prozeduretan interes-gatazken arriskuaren azterketa sistematikoari buruzko prozedura arautzen duena.

Garraioen eta Mugikortasun Jasangarriaren zuzendari nagusiaren otsailaren 13ko 73E/2023 Ebazpenaren bidez, «Erkidego eta toki mailan bidaiarien eta salgaien garraio zerbitzuak digitalizatzeko inbertsioa, Suspertze, Eraldatze eta Erresilientzia Planaren esparruan» izeneko programa kudeatzeko plana onartu da. Plan horretan, Nafarroako Gobernuak 2022ko otsailaren 16an hartutako Erabakian adierazitako edukiak jasotzen dira (SEMak finantzatutako proiektuen kudeaketa eta kontrol arauak onartzen dira erabaki horren bidez).

Lurralde Kohesiorako kontseilariaren maiatzaren 6ko 27/2022 Foru Aginduaren bidez, Lurralde Kohesiorako Departamentuaren Iruzurraren aurkako Neurrien Plana onartu zen, SEEPa gauzatzeko, eta espedientean jasota daude iruzur arriskuaren ebaluazioa eta esku hartzen duten pertsonen interes-gatazkarik ezaren adierazpenak.

Nafarroako Foru Komunitatean, Dirulaguntzei buruzko azaroaren 9ko 11/2005 Foru Legeak arautzen ditu Nafarroako Aurrekontu Orokorren kontura ematen diren dirulaguntzak. Deialdi hau aurrekontu horietako partida baten kontura finantzatzen da, eta, horregatik, arau hori bete behar du, kontuan izanda, betiere, partida horren kreditua 902/2022 Errege Dekretuaren bidezko diru-sarrerekin sortu izana alde batera utzi gabe.

Errege Dekretu horrek ezartzen du laguntzak emanen zaizkiela dagokion deialdiaren oinarrietan ezarritako baldintzak eta deialdian bertan aurreikusitako baldintzak betetzen dituzten eta epearen barruan erregistratu diren eskaerei. Hala, 22.4 artikuluan ezartzen du aurkeztutako hurrenkerari zorrotz jarraikiz hartuko direla kontuan eskaerak, funtsak agortu arte. Prozedura hori bat dator Dirulaguntzei buruzko 11/2005 Foru Legean ezarritako banakako ebaluazio prozedurarekin.

Apirilaren 13ko 1/2022 Foru lege-dekretuak ezarritakoaren arabera (haren bidez premiazko neurriak hartzen dira Nafarroako Foru Komunitatean Ukrainako gerraren ondorio ekonomiko eta sozialei erantzuteko), ez da Nafarroako Gobernuaren aldez aurreko baimenik behar laguntzak banakako ebaluazio araubidearen bidez izapidetzeko, ezta urte anitzeko gastu konpromisorik ere ez.

Horrenbestez, Lurralde Kohesiorako Departamentuaren egitura organikoa ezartzen duen urriaren 30eko 263/2019 Foru Dekretuaren 48. artikuluko h) letraren bidez emandako ahalmenak erabiliz, eta Garraioen Ikuskapen, Kudeaketa eta Antolamenduaren eta Mugikortasunaren Zerbitzuak egindako proposamenari jarraituz,

EBATZI DUT:

1. Banakako ebaluazio araubideko laguntzen deialdia onestea, errepideko garraio zerbitzuak ematen dituzten bidaiarien garraio enpresa pribatuak eta salgaien errepide-garraioan esku hartzen duten enpresa pribatuak modernizatzeko, Europar Batasunak finantzatutako Suspertze, Eraldatze eta Erresilientzia Planaren esparruan (Next Generation EU).

2. 1.535.695 euroko gastua baimentzea, 2023ko gastuen aurrekontuko 230000 23200 7701 441100 partidaren kontura –SEMa, Garraio enpresa pribatuak modernizatzeko laguntzak, 902/2022 ED (PEP E-22/000558-01 elementua)– eta 2024, 2025 eta 2026ko gastuen aurrekontuko partida baliokideen kontura, urterokoen banaketa honekin:

3. Laguntza hauen oinarri arautzaileak onestea. Ebazpen honen eranskinean jasotzen dira.

4. Ebazpen hau eta eranskina Nafarroako Aldizkari Ofizialean argitaratzea, eta deialdia Nafarroako Gobernuaren Dirulaguntzen Datu basera bidaltzea.

5. Ebazpen hau jakinaraztea Garraioen Ikuskapen, Kudeaketa eta Antolamenduaren eta Mugikortasunaren Zerbitzuari, Ekonomia eta Aurrekontu Kudeaketarako eta Gastuaren Kontrolerako Zerbitzuari (Kudeaketa Ekonomikoaren Bulegoa) eta departamentuan dagoen kontu-hartzailetza delegatuari.

6. Ebazpen honek ez du administrazio bidea bukatzen, eta honen aurka gora jotzeko errekurtsoa jartzen ahal dute interesdunek, Garapen Ekonomikorako kontseilariari zuzendua, argitaratu eta biharamunetik hilabeteko epean.

Iruñean, 2023ko apirilaren 14an.–Garraioen eta Mugikortasun Jasangarriaren zuzendari nagusia, Berta Miranda Ordobás.

ERANSKINA

Oinarri arautzaileak

1. oinarria.–Xedea.

1.1 Deialdi honen xedea da ezartzea, urriaren 25eko 902/2022 Errege Dekretuaren arabera (aurrerantzean, 902/2022 ED), errepideko garraio zerbitzuak ematen dituzten bidaiarien garraio enpresa pribatuak eta salgaien errepide-garraioan esku hartzen duten enpresa pribatuak modernizatzeko laguntzak ematea, Europako Suspertze, Eraldatze eta Erresilientzia Planaren esparruan (aurrerantzean, SEEP).

Hori guztia SEEParen 6. osagaiaren barruan (Mugikortasun jasangarria, segurua eta konektatua, 4. inbertsio lerroa), zeinak helburutzat baitu garraio sektorea digitalizazio eta intermodalitatera bideratutako jarduketen bidez bultzatzea. Jarduera ildo horretako 15. neurriak erkidego eta toki maian bidaiarien eta salgaien garraio zerbitzuak digitalizatzeko proiektuak jasotzen ditu, eta, bereziki, neurri horren barruan, bidaiarien eta salgaien garraioko enpresa pribatuak, garraio operadoreak eta enpresa kargatzaileak, salgaien garraioan esku hartzen duten enpresak diren aldetik, digitalizatzeko laguntzak. SEEParen agintaritza arduradunak azpiproiektuari esleitutako erreferentzia bakarra (C06.I04. P03. S16).

1.2 Deialdi honetan ezarritako laguntzen helburua enpresen eta garraio sistemaren eraginkortasuna handitzea da, digitalizazioaren, jasangarritasunaren eta konektibitatearen bitartez, sistemak berrituz eta sektorean teknologia berriak sartuz. Salgaien garraioan parte hartzen duten eragileen sistemen eta prozesuen elkarreragingarritasuna lortzeko, garraio enpresak ez ezik, garraio operadoreak eta enpresa kargatzaileak ere modernizatu beharra dago, garraio katearen ezinbesteko kideak baitira.

1.3 Jarduketa diruz lagungarriak izanen dira 6. oinarrian zehaztutako modernizazio soluzioen kategoriak, baldin eta 902/2022 Errege Dekretuaren I. eranskinean zehaztutako gutxieneko edukia betetzen badute.

2. oinarria.–Laguntzen azken hartzaileak.

2.1 Honako hauek izanen dira laguntzen azken hartzaileak, zerga-egoitza Nafarroako Foru Komunitatean badute:

1. Pertsona juridiko pribatuak, ETEen definizioan sartzen badira, Batzordearen 2014ko ekainaren 17ko 651/2014 (EB) Erregelamenduaren I. eranskinean ezarritakoaren arabera.

2. Pertsona fisikoak.

Bi kasuetan, honako baldintza hauetako bat betez gero:

a) Honako baimen hauetakoren baten titular izatea, eta baimena indarrean egotea laguntzen eskaera egiteko egunean:

1. Salgaien garraio publikorako baimena, zeinak gaitzen baitu 3,5 tonako gehieneko masa baino gehiagoko ibilgailuekin edo ibilgailu taldeekin garraiatzeko; MDPE gakoaz identifikatuta.

2. Eskatu ahalako garraio publikorako baimena, bidaiariak autobusez garraiatzekoa, VDE gakoaz identifikatutakoa.

3. Salgaien garraio publikorako baimena, zeinak gaitzen baitu 3,5 tonako gehieneko masa duten ibilgailuekin garraiatzeko; MDLE gakoaz identifikatuta.

4. Garraio operadorerako baimena, zeinak gaitzen baitu salgaien garraio publikoen kontratazioan bitartekari izateko, OT gakoaz identifikatutakoa.

b) Autobus bidezko hiriko garraioaren zerbitzu publikoa ematea, eta laguntza eskatzen den egunean apartatu honetako a) letran jasotako baimenen bat eskuratzetik salbuetsita egotea.

c) Salgaien garraioko prozesuan kargatzaile/deskargatzaile edo bidaltzaile/hartzaile gisa esku hartzea, uztailaren 30eko 16/1987 Legean adierazten den bezala, kontrol agirian eta ADRn.

2.2 Honako hauek ez dira laguntzen azken hartzaileak izaten ahalko:

a) Krisi egoeran dauden enpresak, Batzordearen 2014ko ekainaren 17ko 651/2014 (EB) Erregelamenduan zehazten den definizioaren arabera.

b) Dirulaguntzei buruzko azaroaren 9ko 11/2005 Foru Legearen 13. artikuluan zehaztutako egoeraren batean dauden pertsonak.

Azken hartzaileak laguntza eskaera aurkeztean, eta espresuki ukatu ezean, baimena emanen dio organo kudeatzaileari zuzenean kontsulta dezan zerga administrazioarekin edo Gizarte Segurantzarekin dituen betebeharrak eguneratuak ote dituen, prozedura izapidetzean beharrezkoa denean.

c) Aurretik emandako edozein laguntza edo dirulaguntzari dagokionez, berreskuratzeko agindu baten menpe dauden enpresak, dela laguntza legez kanpokoa eta barne merkatuarekin bateraezina dela deklaratu delako, dela emakidan esleitu zaizkien betebeharrak ez betetzeagatik.

d) Hiriko garraio publikoaren zerbitzua ematen duten titulartasun publikoko enpresak edo erakundeak.

3. oinarria.– Modernizazio soluzioen hornitzaile atxikiak.

3.1 Modernizazio soluzioen hornitzaile atxikiek (aurrerantzean, MSHA) baino ez dituzte 6. oinarrian zerrendatzen diren modernizazio soluzio diruz lagungarriak ematen ahalko.

3.2 Modernizazio soluzioen hornitzaileak laguntza programari –2023ko urtarrilaren 13ko Lurreko Garraioaren Zuzendaritza Nagusiaren ebazpen bidez onetsitakoari– atxikitzeko iragarkian ezarritako prozeduraren arabera programari atxikitzen zaizkion enpresak izaten ahalko dira MSHA-a, baldin eta 902/2022 Errege Dekretuaren 17. artikuluan jasotako baldintzak betetzen badituzte.

3.3 Modernizazio soluzioen hornitzaileek programari atxikitzea eskatu beharko dute Garraioetako, Mugikortasuneko eta Hiri Agendako Ministerioaren (MITMA) egoitza elektronikoan, helbide honetan, eta bertan egonen da, halaber, Atxikipen Iragarkia:

https://sede.mitma.gob.es/SEDE_ELECTRONICA/LANG_CASTELLANO/OFICINAS_SECTORIALES/GESTION_TRANS_PRTR_CCAA/adhesion-proveedores-soluciones-modernizacion-programa-ayudas-autonomos-y-pymes-modernizar/

Atxikitzeko prozedura 902/2022 Errege Dekretuaren VI. eranskinean eta aipatutako atxikitzeko erabakian ezarritakoaren arabera eginen da. Programari atxikitzeko prozedura ebazteko organo eskuduna MITMAko Lurreko Garraioko zuzendari nagusia da.

3.4 MSHA-ak eta haien zerbitzu eskaintza MITMA-aren Hornitzaileen Erregistroan ikusten ahalko dira. Erregistro hori MITMA-aren egoitza elektronikoan argitaratuta egonen da, esteka honetan:

https://www.mitma.gob.es/ministerio/proyectos-singulares/prtr/listado-proveedores-prtr

3.5 MSHAek 902/2022 Errege Dekretuaren 17.3 artikuluan ezarritako betebeharrak izanen dituzte.

3.6 MSHAek azken hartzaileei laguntza ematen ahalko diete, beren borondatez, dagozkien laguntzak eskatu eta kudeatzeko orduan.

3.7 Laguntza programa honi atxikitzeak berekin dakar enpresei zerbitzuak emateko jardunbide egokiak gauzatzeko konpromisoa.

3.8 Programa indarrean den bitartean, Nafarroako Foru Komunitateko organo emailearen kontrol prozeduraren mende egonen dira une oro MSHA-ak. Prozedura horrek haientzat ezarritako betekizunak eta betebeharrak hartuko ditu barne, MITMA-ari dagozkion eskumenak deusetan galarazi gabe.

Baldintza edo betebeharren bat betetzen ez dela ikusiz gero, baja emanen zaie MSHA-ak alta emandako jarduera diruz lagungarrien erreferentzia guztiei, hamar eguneko epean entzunaldia egin ondotik, baina horiek itzuli beharra eta dagozkion zehapenak ezartzea alde batera utzi gabe.

Halaber, Garraioetako, Mugikortasuneko eta Hiri Agendako Ministerioari emanen zaio horren berri.

3.9 Programako MSHA-aren izaera galduko da interesdunak espresuki hala eskatzen badu, betiere azken hartzaileekin formalizatutako Modernizazio Soluzioak Emateko Akordioen ondorioz egin edo justifikatu beharreko lanik gelditzen ez bada.

3.10 MSHAek Europar Batasunaren subiranotasun digitalaren eta autonomia estrategikoaren helburuak lortzen lagundu beharko dute, eta hornidura katearen segurtasuna bermatu beharko dute, nazioarteko testuingurua eta soluzioaren parte izaten ahal den edozein osagai edo azpisistema teknologiko sentikorren erabilgarritasuna kontuan hartuta. Horretarako, horrela dagokiolarik, Europar Batasunean kokatutako hornitzaileei lotutako softwarea eta sistema integrazioak eta ekipamenduak erosi beharko dituzte.

4. oinarria.–Kalte nabarmenik ez eragiteko printzipioa.

4.1 Azken hartzaileak eta MSHA-ak bermatuko dute laguntza programa hau betez egiten diren jarduera guztiek ingurumenari kalte nabarmenik ez eragiteko printzipioa errespetatzen dutela (DNSH printzipioa «Do No Significant Harm»), SEEPan, SEMaren Erregelamenduan eta hura garatzeko araudian xedatutakoa betez.

4.2 DNSH printzipioak barne hartzen du 6. osagaian (4. inbertsioa, 15. ildoa) esleitutako baldintza espezifikoak betetzea, bertan sartzen baitira jarduketa horiek, eta honako hauek zehazki:

–SEEPan jarduketa-ildo horretarako, ekonomia zirkular baterako trantsizio helbururako, ezarritako baldintza espezifikoak beteko dituzte.

–Ezarritako tresna elektriko eta elektronikoen eta produktuen iraunkortasuna eta horiek konpondu, eguneratu eta berriz erabiltzeko aukera handitzeko neurriak hartuko dituzte.

–Neurri egokiak hartuko dituzte 2009/125/EE Zuzentarauaren esparruan ezarritako aparatu elektriko eta elektronikoen hondakinak berriz erabiltzea eta tratatzea errazten duten diseinu ekologikoko betekizunak aplika daitezen, haien balio-bizitza bukatu arte, aparatu elektriko eta elektronikoen hondakinei buruzko 2012/19/EB Zuzentarauak (AEEH) ezartzen dituen jarraibideak aplikatuz.

4.3 Horretarako, azken hartzaileek eta MSHAek DNSH printzipioa betetzen dutelako erantzukizunpeko adierazpena aurkeztu beharko dute ingurumen helburu bakoitzerako, eta ingurumenari buruzko legeria aplikagarria betetzen dutela adierazi beharko dute. Adierazpen horiek 11. oinarrian zehaztutako Modernizazio Soluzioak Emateko Akordioen parte izanen dira.

4.4 Ingurumen ebaluazioko prozedurak beteko dituzte beti, indarreko arauekin bat aplikagarri direnean, bai eta ingurumenaren arloko araudiari jarraikiz egin beharreko eraginen bestelako ebaluazioak ere.

5. oinarria.–Aurrekontuko zuzkidura eta eskaerak aurkezteko epea.

5.1 Deialdi honetan 1.535.695 euroko zuzkidura ekonomikoa dago, zeina finantzatuko baita 2023ko gastuen aurrekontuko 230000 23200 7701 441100 partidaren kontura –SEMa, Garraio enpresa pribatuak modernizatzeko laguntzak, 902/2022 ED (PEP E-22/000558-01 elementua)– eta 2024, 2025 eta 2026ko gastuen aurrekontuko partida baliokideen kontura.

5.2 Laguntza eskaerak aurkezteko epealdia oinarri hauek Nafarroako Aldizkari Ofizialean argitaratu eta biharamunean hasiko da, eta 2024ko ekainaren 30ean bukatuko da, orduan bukatuko baita laguntza programaren indarraldia.

Eskaerak aurkezteko epealdia bukatutakoan ez da eskaerarik onartuko.

Aurrekontua bukatu izanaren berri emanen da Nafarroako Gobernuak Interneten duen Atariko (www.navarra.es) tramiteen katalogoko fitxa erabiliz (hemendik aurrera, laguntzaren fitxa).

6. oinarria.–Jarduketa diruz lagungarriak.

6.1 Jarduketa diruz lagungarriak izanen dira ondotik zerrendatzen diren modernizazio soluzioen kategoriak:

a) 1. kategoria: kontrol dokumentu elektronikoen kudeaketa.

b) 2. kategoria: bigarren belaunaldiko takografo adimendunaren sistema.

c) 3. kategoria: kontrol dokumentu elektronikoak kudeaketa sistemetan integratzea.

d) 4. kategoria: TMS/ERP sistemak ezartzea.

e) 5. kategoria: SAE sistemak ezartzea.

f) 6. kategoria: SAE sistemak eguneratzea.

g) 7.–Bidaiarien garraio zerbitzuetarako laguntzak.

h) 8. kategoria: bitarteko elektronikoen bidez erreklamazioak egiteko aplikazioak ezartzea.

i) 9. kategoria: ticketing sistemak hobetzea.

6.2 Modernizazio soluzioen kategoriek 902/2022 Errege Dekretuaren I. eranskinean zehaztutako gutxieneko edukia bete behar dute. Baldintza horiek eskuragarri daude laguntzaren fitxan, kategoria bakoitzerako.

Horrez gain, 5., 6. eta 7. kategoriek eranskin horretan jaso ez diren baldintza hauek bete beharko dituzte:

–5. eta 6. kategoriak:

• Azken hartzaileak gehienez hiru ibilgailu ere baditu, gutxienez ibilgailu batean sartuta dagoen SAE sistema paratu edo eguneratu beharko du.
• Azken hartzaileak lau eta hamar ibilgailu artean baditu, gutxienez hiru ibilgailutan dauden SAE sistemak paratu edo eguneratu beharko ditu.
• Azken hartzaileak hamar ibilgailu baino gehiago baditu, gutxienez hamar ibilgailutan dauden SAE sistemak paratu edo eguneratu beharko ditu.

–7. kategoria:

• Azken hartzaileak gehienez hiru ibilgailu ere baditu, kontaketako hardware sistemak eta behar diren sentsoreak gutxienez ibilgailu batean paratu beharko ditu.
• Azken hartzaileak lau eta hamar ibilgailu artean baditu, kontaketako hardware sistemak eta behar diren sentsoreak gutxienez hiru ibilgailutan paratu beharko ditu.
• Azken hartzaileak hamar ibilgailu baino gehiago baditu, kontaketako hardware sistemak eta behar diren sentsoreak gutxienez hamar ibilgailutan paratu beharko ditu.

6.3 Oinarri hauen II. eranskineko taulan, eskuratzen ahal diren modernizazio soluzioen kategoriak zehazten dira, azken hartzaileak garatutako jardueraren arabera.

6.4 Azken hartzaile bakoitzak gehienez bi modernizazio soluzio hautatzen ahalko ditu eranskin horretan aukeran daudenetatik. Kasu horretan, azken hartzaileak eskaera telematiko bat egin beharko du eskatutako jarduketa diruz lagungarri edo modernizazio soluzio bakoitzeko.

6.5 Laguntzak pizgarria gisa erabili nahi dira, horregatik, laguntzen azken hartzaileek egindako jarduketak onartuko dira bakar-bakarrik laguntzaren eskaera erregistratu ondotik hasi badira. Jarduketen hasiera datatzat hartuko da azken hartzailearen eta MSHA-aren arteko kontratua sinatzen den eguna.

6.6 Laguntza hauek jasoko badituzte, Europako Batzordearen 2013ko abenduaren 18ko 1407/2013 Erregelamenduan (EB) ezarritako baldintzak eta mugak bete beharko dituzte, zuzenbide nazionaleko eta Europar Batasuneko gainerako xedapenak betetzea deusetan galarazi gabe, eta bereziki Suspertze eta Erresilientzia Mekanismoa eta Suspertze, Eraldatze eta Erresilientzia Plana gauzatu eta kudeatzeko esparruan onesten direnak.

Azken hartzaileetako bakoitzari ematen zaizkien «de minimis» laguntzen guztizko baturak ez du 200.000 euroko zenbatekoa gainditzen ahalko hiru ekitaldi fiskaleko aldi bakoitzeko.

Halaber, azken hartzaileek salgaien errepide-garraioa besteren kontura egiten badute, haietako bakoitzari ematen ahal zaion «de minimis» laguntzen guztizko batura 100.000 eurokoa izanen da gehienez, hiru ekitaldi fiskaleko aldi bakoitzeko.

6.7 Aurrekoa betetzen ez bada, eta zuzentzen ez bada, jasotako zenbateko guztiak itzultzeko prozedura hasiko da eta dirulaguntza ordaindu zenetik dagokion berandutze-interesa eskatuko da, Dirulaguntzei buruzko azaroaren 9ko 11/2005 Foru Legearen 35. artikuluan ezarritakoaren arabera.

7. oinarria.–Laguntzen zenbatekoa.

7.1 Laguntzen zenbatekoa oinarri hauen I. eranskineko taulan ezartzen da. Bertan, kategoria bakoitzaren barruan, dagokion gehieneko laguntzaren zenbatekoa zehazten da, bertan adierazten diren baldintzen arabera (eskaera egiten den egunean zenbat langile edo ibilgailu dauden).

7.2 Zenbatekoa enpresaren ibilgailu kopuruaren arabera ezarrita duten kategorietan, laguntza eskatzen den unean zenbat ibilgailu zeuden hartuko da kontuan.

Zenbatekoa enpresako langile kopuruaren arabera ezarrita duten kategorietan, laguntza eskatu aurreko 12 hilabeteetan Gizarte Segurantzako araubide orokorrean alta emanda dagoen batez besteko plantilla kontabilizatuko da, bai eta enpresak aitortzen dituen sozietate autonomoak ere.

Autonomoei dagokienez, honako hauek zenbatuko dira:

1. Autonomo enplegatzailea.

2. Adierazitako aldian Gizarte Segurantzako araubide orokorrean alta emanda dagoen batez besteko plantilla.

3. Autonomoak deklaratzen dituen autonomo laguntzaileak.

Enpresei dagokienez, honako hauek zenbatuko dira:

1. Adierazitako aldian Gizarte Segurantzako araubide orokorrean alta emanda dagoen batez besteko plantilla.

2. Enpresak deklaratzen dituen sozietate autonomoak.

7.3 Ez dira diruz lagungarriak izanen modernizazio soluzioak hartzean sortutako Balio Erantsiaren gaineko Zerga eta Ekoizpenaren, Zerbitzuen eta Inportazioaren gaineko Zerga, Dirulaguntzei buruzko azaroaren 9ko 11/2005 Foru Legearen 28.8 artikuluari jarraikiz.

7.4 Zerbitzuak edo produktuak erosteko kostua ez da inola ere merkatuko balioa baino handiagoa izanen, Dirulaguntzei buruzko azaroaren 9ko 11/2005 Foru Legearen 28.1 artikuluan xedatutakoaren arabera.

8. oinarria.–Araubide juridikoa eta muga orokorrak.

8.1 Araubide juridikoa, aplikatu beharreko araudi espezifikoa, azken hartzaileen baldintzak eta betebeharrak eta laguntzak emateko prozedura 902/2022 Errege Dekretuan eta oinarri hauetan ezarritakoak izanen dira, Dirulaguntzei buruzko Foru Legean xedatutakoarekin bat.

Jarduketa diruz lagungarrietarako laguntzak estatuaren laguntzatzat hartzen dira, eta, beraz, Batzordearen 2013ko abenduaren 18ko 1407/2013 (EB) Erregelamendua bete beharko dute; lehen aipatutako araubide juridikoaren mende egonen dira halaber, 6. oinarriko 6. apartatuan zehaztutako baldintzetan.

8.2 6.1 artikuluan araututako jardueretarako dirulaguntzak bateraezinak izanen dira Europar Batasuneko beste programa eta tresna batzuetatik etorrita kostu bera estaltzen duten beste laguntza batzuekin, SEMaren Erregelamenduaren 9. artikulua eta Europako Parlamentuaren eta Kontseiluaren 2018ko uztailaren 18ko 2018/1046 (EB, Euratom) Erregelamenduaren 191. artikulua aplikatuz, bai eta kostu diruz lagungarri berentzat emandako beste dirulaguntza edo laguntza batzuekin ere, edozein administrazio edo erakunde publiko edo pribatutatik, nazionaletatik edo nazioarteko erakundeetatik, etorrita.

8.3 Bateraezintasun hauek ezartzen dira abenduaren 29ko ETD/1498/2021 Aginduaren bidez araututako Kit Digital Programari dagokionez (agindu horren bidez onartzen dira enpresa txikiak, mikroenpresak eta autoenplegu egoeran dauden pertsonak digitalizatzeko laguntzak emateko oinarri arautzaileak, Espainia Digitala 2025 Agendaren, 2021-2025 ETEak Digitalizatzeko Planaren eta Espainiako Suspertze, Eraldatze eta Erresilientzia Planaren esparruan –Europar Batasunaren Next Generation EU funtsak finantzatua–):

a) 10 langile baino gutxiago dituzten eta digitalizazio soluzioaren IV. kategoriako Kit Digital Programako laguntzen onuradun izan diren azken hartzaileak. Bezeroen kudeaketa: ez dituzte eskatzen ahalko 6. oinarrian ezarritako modernizazio soluzioen kategoria hauek:

1. 8. kategoria: bitarteko elektronikoen bidez erreklamazioak egiteko aplikazioak ezartzea.

2. 9. kategoria: ticketing sistemak hobetzea.

b) Azken hartzaileak, baldin eta 10 langile baino gutxiago badituzte eta Kit Digital programako laguntzen onuradun izan badira, digitalizazio soluzioaren VI. kategoriarekin. Prozesuen kudeaketa: ez dituzte eskatzen ahalko 6. oinarrian ezarritako modernizazio soluzioen kategoria hauek:

1. 1. kategoria: kontrol dokumentu elektronikoen kudeaketa.

2. 3. kategoria: kontrol dokumentu elektronikoak kudeaketa sistemetan integratzea.

3. 4. kategoria: TMS/ERP sistemak ezartzea.

4. 5. kategoria: SAE sistemak ezartzea.

5. 6. kategoria: SAE sistemak eguneratzea.

9. oinarria.–Laguntzak eskatzeko modua.

9.1 Eskaerak telematikoki aurkeztuko dira Nafarroako Gobernuak Interneten duen atariko (www.navarra.es) tramiteen katalogoaren bitartez (15. oinarriko hirugarren paragrafoan xedatutakoa izan ezik), laguntzen fitxan eskuragarri dauden formularioen eta hurrengo apartatuan jasotako dokumentazioaren bidez, 902/2022 Errege Dekretuaren III. eranskinean ezarritakoaren arabera. 5. oinarrian ezartzen da laguntza eskaera aurkezteko epea.

Azken hartzaileak ordezkari baten bidez izapidetzen badu prozedura, Administrazio Prozedura Erkidearen urriaren 1eko 39/2015 Legearen 5. artikuluan ezarritakoaren arabera egiaztatu beharko da hori, laguntzen fitxan jasotako bitartekoen bidez.

9.2 Eskabidea izapidetzeko, fitxan eskuragarri dagoen formularioa bete beharko da, 902/2022 Errege Dekretuaren V. eranskinean finkatutako datuekin (azken hartzailearen identifikazio datuak eta eskatutako modernizazio soluzioen kategoria).

Eskaerak inplikatutako administrazio publikoen arteko datuen komunikazioaren onarpena dakar, aplikatzekoa den Europako araudian aurreikusitakoa betetzeko eta Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoarekin bat etorriz.

Laguntza eskatzen den modernizazio soluzioen kategoria bakoitzeko eskaera bat aurkeztu beharko dute.

Formulario horren bidez, erantzukizunpeko adierazpen hauek beteko dituzte:

a) ETEa izateko baldintza guztiak betetzen dituela dioen erantzukizunpeko adierazpena, 2014ko ekainaren 17ko 651/2014 (EB) Erregelamenduaren I. eranskinean ezarritako definizioaren arabera.

b) Erantzukizunpeko adierazpena, egiaztatzeko ez dagoela Dirulaguntzei buruzko azaroaren 9ko 11/2005 Foru Legearen 13. artikuluko 2. eta 3. apartatuetan zerrendatutako egoeretako bakar batean ere, eta, bereziki, dirulaguntzak itzultzeagatiko betebeharren ordainketa egunean duela, ez dagoela krisi egoeran eta ez dagoela berreskuratzeko agindu baten eraginpean, Batzordeak laguntza bat legez kanpokotzat eta bateragarritzat jo duelako, Batzordearen 2014ko ekainaren 17ko 651/2014 (EB) Erregelamenduaren arabera.

Krisian dauden enpresen egoera aitortzeari dagokionez, enpresa horiek egoera horretan izandako aldaketa ororen berri eman beharko dute prozedura osoan zehar, harik eta jasotako laguntzak justifikatzen dituzten arte.

c) Erantzukizunpeko adierazpena, zeinaren bidez konpromisoa hartuko baita behar diren eskubideak eta sarbidea emateko Europako Batzordeak, OLAFek, Europako Kontuen Auzitegiak, Europako Fiskaltzak eta estatuko agintaritza eskudunek beren eskumenak erabiltzen dituztela bermatzeko.

d) Erantzukizunpeko adierazpena, SEEPak ezartzen dituen zeharkako printzipioak betetzeko konpromisoari buruzkoa, baldin eragina izaten ahal badute kudeatu beharreko eremuan.

e) Kargatzailearen/deskargatzailearen edo bidaltzailearen/hartzailearen kasuan: erantzukizunpeko adierazpena, adierazten duena salgaien garraio prozesuan kargatzaile/deskargatzaile edo bidaltzaile/hartzaile gisa esku hartzen duela, eta hori egiaztatzen duten urte bereko gutxienez ehun garraio dokumenturen zerrenda (garraio-gutunak, kontrol-dokumentuak edo CMR) duela. Agiri horiek organo emailearen esku egonen dira, hala eskatzen badu.

9.3 Halaber, dokumentazio hau erantsiko dute:

a) Eskaera bere izenean aurkezten ez badu, ordezkaritza dokumentua, laguntzaren eskatzaileak eta ordezkariak ziurtagiri digitalaz sinatuta, fitxan dagoen ereduaren edo zuzenbidean balio duen beste edozein baliabideren arabera.

b) Ekonomia-jardueren gaineko zergaren altaren ziurtagiria, laguntza eskatu den egunean benetan garatutako jarduera ekonomikoa jasotzen duena, datuak zuzenean kontsultatzea baimendu ezean.

c) Zerga betebeharrak eguneratuak dituela egiaztatzen duen ziurtagiria, datuak Datuak Egiaztatzeko eta Kontsultatzeko Sistemaren bidez kontsultatzeko baimena espresuki ukatzen badu. Baimen hori Egiaztatze Sistemara sartzeko konfigurazioa, ezaugarriak, betekizunak eta prozedurak ezartzen dituen abenduaren 26ko PRE 3949/2006 Aginduan ezarrita dago.

d) Gizarte Segurantzarekiko betebeharrak eguneratuak dituela egiaztatzen duen ziurtagiria, datuak Datuak Egiaztatzeko eta Kontsultatzeko Sistemaren bidez kontsultatzeko baimena espresuki ukatzen badu. Baimen hori Egiaztatze Sistemara sartzeko konfigurazioa, ezaugarriak, betekizunak eta prozedurak ezartzen dituen abenduaren 26ko PRE 3949/2006 Aginduan ezarrita dago.

e) Erantzukizunpeko adierazpena, aurreko bi ekitaldi fiskaletan eta indarrean dagoen ekitaldi fiskalean kostu diruz lagungarri beretarako edo «de minimis» araubidepeko beste dirulaguntzarik eskatu edo jaso ez duela adierazteko, eta 8.3 oinarrian adierazitako Kit Digital programako laguntzekin bateraezintasunik ez duela, edo, hala badagokio, kontzeptu horiengatik eskatu eta jasotako laguntzen erantzukizunpeko adierazpena. Hori guztia laguntzaren fitxan eskuratzen ahal den ereduaren araberakoa.

f) Interes-gatazkarik ezaren adierazpena (IGEA), fitxa horretan dagoen ereduaren araberakoa.

9.4 Horrez gain, dokumentazio hau aurkeztu beharko da, hala badagokio:

a) Langile kopurua egiaztatzeko: alta egoeran dauden langileen batez besteko plantillaren ziurtagiria, Gizarte Segurantzaren Diruzaintza Nagusiak emana, alta emanda duen kotizazio kontuaren kode bakoitzeko, laguntza eskatu aurreko azken 12 hilabeteei buruzkoa.

Hala badagokio, eskatzailearen autonomo kolaboratzailea eta sozietate autonomoa delako egiaztagiriak.

b) Autobus bidezko hiriko garraioaren zerbitzu publikoa ematen duten enpresei dagokienez: dagokion toki erakundeko organo eskudunak emandako ziurtagiria, laguntza eskatu den egunean hiriko garraioaren zerbitzu publikoa ematea egiaztatzen duena.

9.5 Aurkeztutako dokumentazioak betebehar horiek betetzen ez baditu, Garraioen Ikuskapen, Kudeaketa eta Antolamenduaren eta Mugikortasunaren Zerbitzuak erakunde interesdunari eskatuko dio 10 egun balioduneko epean zuzentzeko, eta ohartaraziko dio, hala egin ezean, eskaera bertan behera uzten duela ulertuko dela eta espedientea artxibatzeko ebazpena emanen dela.

10. oinarria.–Laguntzak ematea.

10.1 Laguntzak banakako ebaluazioaren bidez emanen dira. Hortaz, eskaerak zein hurrenkeratan aurkezten diren, horren arabera ebatziko dira beti, aurrekontua agortu arte.

Esleitutako aurrekontua agortuz gero, eta baldin eta programaren indarraldia bukatu ez bada, eskaera gehiago erregistratzen ahalko dira behin-behineko erreserba zerrendarako; eskaera horiek zein ordenatan aurkezten diren, horren arabera erantzunen dira beti, baldin eta lehenago aurkeztutako laguntza eskaeraren baten ezespena edo uko egitea gertatzeagatik aurrekontua askatzen bada.

Eskaera erreserba zerrendarako aurkezteak ez dio inolako eskubiderik sortuko eskatzaileari, harik eta eskaera baliozkotu arte.

10.2 Garraioen Ikuskapen, Kudeaketa eta Antolamenduaren eta Mugikortasunaren Zerbitzuak, laguntzak kudeatzen dituen organoa den aldetik, eskaerak ebaluatuko ditu, ezarritako baldintza eta betekizun guztiak betetzen dituztela eta aurkeztutako dokumentazioa egiaztatuz horretarako, eta ebazpen proposamena bidaliko dio organo eskudunari. Bertan, azken hartzaileek dirulaguntza lortzeko betebehar guztiak betetzen dituztela adieraziko du.

10.3 SEEParen araudiaren arabera, interes-gatazkaren arriskuaren azterketa sistematikoa eta automatizatua egiteko prozedura gauzatuko da, espedientea prestatu eta izapidetzeko prozesuan parte hartzen duten organoen eta eskatzaileen artean halakorik ez dagoela egiaztatzeko, 2023rako Estatuko Aurrekontu Orokorrei buruzko abenduaren 23ko 31/2022 Legearen ehun eta hamabigarren xedapen gehigarrian ezarritakoa betez. Prozedura hori urtarrilaren 24ko HFP/55/2023 Aginduak arautuko du, SEEPa gauzatzen duten prozeduretako interes-gatazkaren arriskuaren azterketa sistematikoari buruzkoak.

10.4 Garraio eta Mugikortasun Jasangarriko zuzendari nagusia izanen da laguntzak emateari buruz ebazteko organo eskuduna. Laguntza emateko ebazpenak azken hartzaileari hura «modernizazio txeke» gisa ematea hartzen du barne.

Ebazpena arrazoitua izanen da, eta eman eta jakinarazteko gehieneko epea sei hilabetekoa izanen da, eskaera aurkezten den egunetik hasita. Ebazpen horretan, dirulaguntza zein tresna juridikorekin ematen den jakinaraziko zaio azken hartzaileari. Ebazpena epe horretan jakinarazi ezean, eskaera ezetsitzat joko da. Dirulaguntza emateko ebazpenik ez da inola ere hartuko 2024ko abenduaren 31z geroztik.

Laguntzak beste proposamen batzuekiko balorazio konparatiborik behar ez duten jarduerak finantzatzeko erabiltzen direla kontuan hartuta, laguntzak emateko ebazpenak ematen ahalko dira eskaerak aurkezteko ordenaren arabera, egoera edo jarduera diruz lagungarria bat datorrela eta eskatutako gainerako baldintzak betetzen direla egiaztatu ondotik, deialdietan esleitutako aurrekontu kreditua agortu arte.

Oinarri hauen ondorioetarako, emateko ebazpenak azken hartzaileentzat sortzen duen kobrantza eskubidea «modernizazio txeke» hori da, laguntza eskatzen den jarduketei dagokien zenbatekoan.

«Modernizazio txekea» ez da egiten ahalko, harik eta MSHA-ak, azken hartzailearen izenean, eta hori azken arduraduna izanik, dirulaguntza ematen zaion jarduera egin delako egiaztagiriak aurkezten dituen eta dirulaguntza ematen duen organoak dirulaguntza justifikatutzat jotzen duen arte.

11. oinarria.– Modernizatzeko soluzioak emateko akordioak.

11.1 Azken hartzaileak emandako laguntza, «modernizazio txekea», erabili beharko du 6. oinarrian zerrendatuta eta 902/2022 Errege Dekretuaren I. eranskinean zehaztuta dauden 6. oinarrian zerrendatutako modernizazio soluzioen kategoriak kontratatzeko. Horretarako, Modernizatzeko soluzioak Emateko Akordioak formalizatu beharko ditu MSHA batekin, laguntzen fitxan dagoen ereduari jarraikiz.

Emandako laguntza («modernizazio txekea») kobratzeko eskubidea erabiltzeko, azken hartzaileak Modernizatzeko Soluzioak Emateko Akordioa sinatu beharko du jarduera diruz lagungarri bakoitzeko, laguntza emateko ebazpena jakinarazten denetik hiru hilabeteko epean gehienez ere. Epe hori igaro eta akordiorik formalizatu ez bada, azken hartzaileak galdu eginen du emandako laguntzaren zenbatekoa kobratzeko eskubidea.

Modernizatzeko Soluzioak Emateko Akordioak aplikatutako dirulaguntzaren zenbatekoa edo hari lotutako «modernizazio txeke»aren zatia ezarri behar du, baita klausula hauek ere:

–Azken hartzaileak MSHA-aren esku utziko du kobratzeko eskubidea («modernizazio txekea»), Modernizatzeko Soluzioak Emateko Akordioari lotutako zenbatekoan.

–Azken hartzaileak MSHA-aren lankidetza onartuko du laguntza justifikatzeko lanetan, bai eta dirulaguntza horren ondoriozko gainerako kontrol jardueretan ere.

–Azken hartzaileak eta MSHA-ak erantzukizunez adieraziko dute konpromisoa hartzen dutela «kalte nabarmenik ez eragiteko» (DNSH) printzipioa betetzen dela bermatzeko.

–Azken hartzaileak dagozkion gastuak ordainduko dizkio MSHA-ari, baldin eta azken hartzaileak ez betetzearen ondorioz hari lotutako kobrantzarako eskubidea guztiz edo zati batez galduz gero.

–Ez-betetzeak gertatuz gero alderdiek jaso beharreko kalte-ordainak eta gatazkak konpontzeko mekanismoak.

–Modernizatzeko Soluzioak Emateko Akordio horiek sinatzeko, azken hartzaileak aldez aurretik kontratua formalizatu beharko du MSHA-arekin, hartu nahi duen modernizazio soluziorako, jarduera diruz lagungarrietan oinarrituta.

Azken hartzaileak eta MSHA-ak elektronikoki sinatu beharko dute Modernizatzeko Soluzioak Emateko Akordioaren proposamena, eta bertan ezarritako baldintzak onartu.

Modernizatzeko Soluzioak Emateko Akordioaren proposamena sinatu ondotik, azken hartzaileak organo kudeatzailearen esku paratuko du. Modernizatzeko Soluzioak Emateko Akordioarekin batera, azken hartzaileak akordioa sinatu behar duen MSHA-arekin aldez aurretik formalizatutako kontratua aurkeztu beharko du.

Modernizatzeko Soluzioak Emateko Akordioak baliozkoak izanen dira, eta ondorioak izanen dituzte, dirulaguntza ematen duen organoak adostasuna adierazi ondotik; gehienez ere hamar egun balioduneko epean eginen du hori. Era berean, azken hartzaileak ez badu aurkeztutako akordioari buruzko adostasun adierazpenik jaso ezarritako epean, akordio hori baliozkoa izanen da eta ondorioak izanen ditu.

Honako kasu hauetan ez da Modernizatzeko Soluzioak Emateko Akordiorik formalizatzen ahalko:

a) Diruz lagundutako jarduera azpikontratatzen den kasuetarako, Dirulaguntzei buruzko Lege Orokorraren Erregelamenduaren 68.2 artikuluko a), b), d), e), f) eta g) letretan jasotako kasuetan, esaterako, MSHA-aren eta azken hartzailearen artean lotura dagoenean.

b) MSHA-a eta azken hartzailea enpresa talde berekoak direnean.

Ez da onartuko Modernizatzeko Soluzioak Emateko Akordioak aldatzeko proposamenik.

11.2 Modernizatzeko Soluzioak Emateko Akordioa formalizatuta, hautatutako soluzioaren MSHA-ak modernizazio soluzioa emanen du. MSHA-ak faktura bakarra eginen dio azken hartzaileari, Modernizatzeko Soluzioak Emateko Akordioari lotuta kontratatutako modernizazio soluzioaren guztizko zenbatekoarekin. Fakturak jasoko du azken hartzaileak ordaindu beharreko zenbatekoaren murrizketa, «modernizazio txeke»an emandako dirulaguntzaren zenbatekoari dagokionez.

Azken hartzaileak ordainduko du prestazioa; horretarako, sinatu duten Modernizatzeko Soluzioak Emateko Akordioari lotutako «modernizazio txeke»aren zatia lagako dio MSHA-ari, eta diruz laguntzen ahal ez diren kostuei dagokien zatia ordainduko du.

11.3 Akordioa ez betetzeak 902/2022 Errege Dekretuan eta deialdi honetan ezarritako betebeharrak ez betetzea badakar, hala azken hartzailearen aldetik nola MSHA-aren aldetik, jasotako zenbatekoak itzultzeko eskatuko da, hamar eguneko epean entzunaldia eman ondotik, bai eta dagozkion berandutze-interesak ordaintzeko ere, dirulaguntza ordaintzen den unetik, halakorik gertatu bada. Ez bada ordainketarik egin, dirulaguntza emateko ebazpena aldatzen edo ezeztatzen ahalko da.

Era berean, eta antzematen den ez-betetzearen arabera, horren berri emanen zaie Garraioetako, Mugikortasuneko eta Hiri Agendako Ministerioari, Europako Funtsen Idazkaritza Nagusiari, Estatuko Administrazioaren Kontu-hartzailetza Nagusiari, Kontuen Auzitegiari edo Europako Batzordearen kontrol eta fiskalizazio organoei.

12. oinarria.–Diruz lagundutako jarduketa justifikatzea.

Modernizazio soluzioa eman ondotik, MSHA-ak, azken hartzailearen izenean, egindako ekintzen justifikazioa aurkeztu beharko du, eskatutako dokumentazioan oinarrituta; gehienez ere hamabi hilabeteko epean egin beharko du, azken hartzaileak dirulaguntza emateko ebazpena ematen duen egunetik zenbatzen hasita.

Dirulaguntza justifikatzeko dokumentazioa ezarritako epean aurkeztu ezean, laguntza kobratzeko eskubidea galduko dute.

902/2022 Errege Dekretuaren III. eranskinean adierazten den dokumentazioa, laguntzen fitxan jasotakoa, aurkeztu beharko dute, modernizazio soluzioen kategoria bakoitzerako.

Jarduketa gauzatu dela justifikatzeko aurkezten den dokumentazioa koherentea izan beharko da laguntza eskatzeko formularioan emandako informazioarekin.

13. oinarria.–Dirulaguntza ordaintzea.

13.1 Justifikazioa jaso ondotik, azken hartzaileari modernizazio soluzioa eman izana begiratu eta egiaztatuko da. Hori aztertu ondotik, organo kudeatzaileak MSHA-ari ordaintzeko ebazpen proposamena eginen dio organo eskudunari, azken hartzailearekin sinatutako Modernizatzeko Soluzioak Emateko Akordioari lotutako laguntzari dagokion «modernizazio txeke»aren zenbatekoan.

Proposamen horrekin batera, dirulaguntzaren xedeak bete direla eta azken hartzaileek dirulaguntza jasotzeko eskubidea ematen duten baldintzak bete dituztela egiaztatzen duen txostena aurkeztuko da.

Dirulaguntza ordaintzeko ebazpena gehienez sei hilabeteko epean emanen da, MSHA-ak justifikazioa aurkezten duenetik hasita. Salbuespen gisa, justifikatzeko eta ordaintzeko epeak luzatzen ahalko dira, betiere jarduketa guztiak 2026ko apirilaren 30a baino lehen justifikatuta badaude.

Halaber, azken hartzailearekin sinatutako Modernizatzeko Soluzioak Emateko Akordioari lotutako laguntzari dagokion «modernizazio txeke»aren zenbatekoa handiagoa bada MSHA-ak egindako jarduketa diruz lagungarriaren kostua baino, eskatutako justifikazio dokumentazioaren ondoriozko jarduketa diruz lagungarriaren kostua zein den kontuan hartuta ordainduko da dirulaguntza.

Kasu horietan, betiere jarduketaren gutxieneko edukia bete bada, laguntza jaso duten modernizazio soluzioen kategoriarekin zerikusia duten beste jarduera batzuetan inbertitzen ahalko da txekearen soberakina.

13.2 Baldin eta azken hartzaileak, MSHA-aren bitartez, ez badu betetzen 12. oinarrian ezarritako justifikazio betebeharra, ez da ordainduko «modernizazio txeke»ari dagokion dirulaguntza, hura kobratzeko eskubidea galdu dela adieraziko da, eta, hala badagokio, dagokion itzulketa prozedura hasiko da.

Laguntzaren ordainketa ez bada egiten ahal azken hartzailearen ez-betetzearen ondorioz, horrek hartu beharko du bere gain sortutako kostuak MSHA-ari ordaintzeko betebeharra.

13.3 Tresna juridiko honen bidez osorik edo zati batean SEMko funtsen kontura finantzatutako proiektu edo eragiketei dagokienez, iruzurra, ustelkeria, interes-gatazka edo irregulartasuna eragiten ahal duten gertakarien berri duen pertsona orok gertakari horiek jakinarazi ahalko dizkio MITMAko Barne Kontrolerako Unitateari bitarteko elektronikoak erabiliz, Ministerioak bere web atarian horretarako gaitutako kanalaren bidez, edo, bestela, posta helbide honen bidez (gutun azal itxian): Barne Kontroleko Unitatea, Zerbitzuen Ikuskaritzako eta Herritarren Arretarako Zuzendariordetza Nagusia, Garraioetako, Mugikortasuneko eta Hiri Agendako Ministerioa, Castellana 67, 28046 Madril.

14. oinarria.–Azken hartzaileen betebeharrak.

Dirulaguntzen azken hartzaileek honako betebehar hauek bete beharko dituzte:

a) Dirulaguntzaren esleipena jakinarazi eta hilabeteko epean, telematikoki aurkeztea dirulaguntzen azken hartzaileen gardentasun betebeharrari buruzko adierazpena, irailaren 11ko 59/2013 Foru Dekretuan arautua (haren eredua laguntzen fitxan dago eskuragarri). Foru dekretu horren 3 .artikuluan eskatzen den informazioa aurkezteko betebeharra bete ezean, onartutako dirulaguntza ez da ordaintzen ahalko.

b) Dirulaguntzei buruzko azaroaren 9ko 11/2005 Foru Legearen 9. artikuluan jasotako betebeharrak betetzea, bai eta deialdi honetan jasotakoak eta betearaztearen, jarraipena egitearen, laguntzak ordaintzearen, informazio eta publizitatearen, eta gastuaren justifikazio eta kontrolaren arloetan ezarritakoak ere.

c) Gastu diruz lagungarri bererako beste dirulaguntza, laguntza, diru-sarrera edo baliabide batzuk lortu izana jakinaraztea, horiek edozein administrazio edo erakunde publiko edo pribatutatik, Europar Batasunetik edo nazioarteko erakundeetatik heldu direla, horren berri izan bezain laster, eta, nolanahi ere, jasotako funtsei emandako erabilera justifikatu aurretik.

d) Jarduera diruz lagungarriarekin lotutako transakzio guztien xehetasuna kontabilitatean erregistratzea, kontabilitateko kode bereizi batean. Era berean, kontabilitate-liburuak, erregistro eginbidetuak eta gainerako dokumentuak eduki beharko ditu, kasu bakoitzean azken hartzaileari aplikatu beharreko merkataritza eta sektoreko legeriak eskatutako baldintzetan, eta fakturak eta froga balio baliokidea duten gainerako gastu egiaztagiriak gorde beharko ditu, bai eta ordainketen eta jasotako funtsen aplikazioen egiaztagiriak ere, «modernizazio txekea», egindako jarduketa diruz lagungarriagatik ordaintzeko MSHA-ari emandako zenbatekoan, erabili izana justifikatzeko. Dokumentu multzo hori emandako laguntzaren justifikazio euskarria da, azken hartzaileen kontabilitatean behar bezala jasotzen dela bermatzen du, eta gutxienez bost urtez gorde beharko da, laguntza justifikatzeko epea amaitzen denetik kontatzen hasita.

e) Aurreko bi ekitaldi fiskaletan eta indarrean dagoen ekitaldi fiskalean jasotako «de minimis» laguntza guztiak dirulaguntza ematen duen organoari deklaratzea.

f) MSHAekin behar diren Modernizatzeko Soluzioak Emateko Akordioak formalizatzea oinarri arautzaile hauekin bat etorriz, 6. oinarrian jarduketa diruz lagungarri gisa jasotako modernizazio soluzioak hartzeko, eta dirulaguntzaren zenbatekoa horietara bideratzea.

g) Neurri eraginkorrak eta egokiak ezartzea, dirulaguntza publikoei buruzko araudiak eskatzen duena betetzean iruzurrik egon ez dadin, bai eta dokumentazioaren finantzaketa bikoitza eta faltsifikazioa eragozteko ere.

h) Azken hartzaileak 4. oinarriko betebeharrak bete beharko ditu formalizatzen den Modernizatzeko Soluzioak Emateko Akordio bakoitzean.

i) Laguntzen azken hartzaileek Europako funtsetatik jasotako laguntzaren berri eman beharko dute jendaurrean argitalpenetan, hedapen jardueretan, web orrietan eta, oro har, edozein hedabidetan, eta, horretarako, jarduketaren azalpen laburra egin beharko dute beren web orrietan, horrelakorik badute, emandako laguntzaren mailaren araberakoa; horren bitartez, helburuak eta emaitzak azalduko dituzte, eta Europar Batasunaren finantza laguntza nabarmenduko dute.

15. oinarria.–Bitarteko elektronikoen bidezko harremanak.

Laguntzen eskaera egin eta Nafarroako Foru Komunitateko Administrazioaren Erregistro Orokor Elektronikoan telematikoki aurkeztu beharreko dokumentazio guztia aurkezteko www.navarra.es atariko laguntzen fitxa erabiliko da. Atari horretan dago laguntza horiei buruzko informazio guztia.

Administrazio egintzen jakinarazpena eta laguntza hauek emateko prozeduraren barruan egiten diren jarduketa guztien komunikazioak eskatzaileen gaitutako helbide elektronikoaren bidez eginen dira.

Azken hartzaileak pertsona fisikoak badira, autobus bidezko hiriko garraioaren zerbitzu publikoa ematen badute, eta aldez aurretik adierazitako garraio baimenen bat lortzetik salbuetsita badaude, edo salgaien garraio prozesuan kargatzaile/deskargatzaile edo bidaltzaile/hartzaile gisa esku hartzen badute, ez dira behartuta egonen bitarteko elektronikoen bidez komunikatzera.

16. oinarria.–Emandako dirulaguntzen publikotasuna.

16.1 Garraioen Ikuskapen, Kudeaketa eta Antolamenduaren eta Mugikortasunaren Zerbitzuak jendaurrean jarriko ditu emandako dirulaguntzak Nafarroako Gobernuaren Dirulaguntzen Datu Basearen bitartez, honako hauek adierazita: deialdia, laguntza zein aurrekontu kredituri egotzi zaion, azken hartzaileak eta emandako zenbatekoa.

16.2 Argitalpenetan, hedapen jardueretan, web orrietan eta, oro har, edozein hedabidetan laguntzen xede den jardunari buruz egindako erreferentzia orok SEMaren Erregelamenduaren 34. artikuluan ezarritakoa bete beharko du, bai eta SEEParen Irudi Eskuliburuan eta, hala badagokio, MITMA-ak onartzen duen Eskuliburuan ageri diren baldintzak ere. SEEParekin eta Europako funtsekin lotutako proiektuen komunikazio, publizitate eta hedapen betebeharrak, SEMaren funtsak erabakitzen eta gauzatzen dituzten erakundeek zein haien onuradunek, azken hartzaileek edo MSHAek bete beharko dituztenak, webgune honetan kontsultatzen ahalko dira:

https://www.mitma.gob.es/ministerio/proyectos-singulares/prtr/transporte/publicidad-y-difusion-de-las-ayudas-del-mecanismo-de-recuperacion-y-resiliencia

Aurrekoa deusetan galarazi gabe, betiere ageri beharko da jarduketa SEEParen funtsen bidez finantzatu eta MITMA-ak kudeatu izana, Dirulaguntzei buruzko azaroaren 9ko 11/2005 Foru Legearen 15.2 artikuluan ezarritakoari jarraikiz.

16.3 Laguntzen azken hartzaileek Europako funtsetatik jasotako laguntzaren berri eman beharko dute jendaurrean, eta, horretarako, jarduketaren azalpen laburra egin beharko dute beren web orrian, horrelakorik badute, emandako laguntzaren mailaren araberakoa; horren bitartez, helburuak eta emaitzak azalduko dituzte, eta Europar Batasunaren finantza laguntza nabarmenduko dute.

MSHAek ematen dituzten modernizazio soluzioen berri emanen dute jendaurrean, Suspertze, Eraldatze eta Erresilientzia Plana argi eta garbi aipatuta.

Nolanahi ere, azken hartzaileek eman beharreko informazioaren formari eta edukiari buruz ematen zaien jarraibide oro bete beharko dute azken hartzaileek.

17. oinarria.–Itzultzea.

17.1 Oinarri hauetan eta gainerako arau aplikagarrietan ezarritako baldintzak eta betebeharrak betetzen ez badituzte, jasotako laguntzak itzuli beharko dituzte, baita dagozkien berandutze-interesak ordaindu ere, dagokion itzulketa-prozedura egin ondotik, edo gauzatu ez den kobrantzarako eskubidea galduko dute, Dirulaguntzei buruzko azaroaren 9ko 11/2005 Foru Legearen II. tituluko I. kapituluan xedatutakoaren arabera.

17.2 Laguntza emateko kontuan hartu ziren helburuak ez direla bete ulertuko da honako kasu hauetan:

a) Emandako laguntza oinarri hauetan zehaztutakoez bestelako jardueretara bideratzea.

b) MSHA-ak Modernizatzeko Soluzioak Emateko Akordioetan ezarritako soluzioen instalazioa, entregak edo zerbitzuak ez egitea, 902/2022 Errege Dekretuaren I. eranskinean eta oinarri hauetan ezarritako betekizunen arabera.

c) Finantzatutako jarduketak deialdi honetan ezarritako epean egin izanaren justifikazioa ez aurkeztea.

d) Deialdi honetako 4. oinarriko betebehar espezifikoak ez betetzea.

17.3 Azken hartzaile batek Modernizatzeko Soluzioak Emateko Akordio bat baino gehiago formalizatu badu, ez-betetze partzialtzat hartuko da horietakoren bat ez egitea.

17.4 Ez-betetze partzialen kasuan, proportzionaltasun printzipioari jarraikiz zehaztuko da itzuli beharreko zenbatekoa; horrez gain, bete duten hori guztizko betetze mailara nabarmen hurbiltzen den hartuko da kontuan, bai eta azken hartzaileek konpromisoak zalantzarik gabe betetzeko jarduketa egiaztatzen duten ere.

Publizitatearen arloko betebeharrak ez betetzeak eragindako ez-betetze partzialen kasuan, aurreko oinarrian ezarritakoaren arabera, emandako laguntzaren ehuneko hamar izanen da itzuli beharreko zenbatekoa.

18. oinarria.–Azken hartzaileentzako informazioa.

18.1 Dirulaguntzaren erregistroa Dirulaguntzen Datu Base Nazionalean, 130/2019 Errege Dekretuan aurreikusitakoaren arabera.

18.2 Foru Komunitateko Administrazioak eta SEMaren Erregelamenduaren 22. artikuluan jasotako organo guztiek aukera izatea Benetako Titulartasunen Erregistroan (JUS/319/2018 Aginduaren bidez sortua) jasotako informazioa eskuratzeko, edo benetako titularrei buruzko datu horiek ematen ahal dituzten Administrazioaren beste datu base batzuetan sartzeko.

18.3 Informazioa trukatzea sistema horien eta Europako Funtsen Sistemaren artean, aplikatu beharreko Europako eta estatuko araudian jasotako aurreikuspenen arabera.

18.4 Azken hartzaileak funtsen azken jasotzaileari buruzko datuak emateko betebeharra, azken hartzailea bera ez denean.

18.5 Azken hartzaileak beharrezkoak diren eskubideak eta sarbideak emateko konpromisoa, Batzordeak, OLAFek, Europako Kontuen Auzitegiak, Europako Fiskaltzak eta agintari nazional eskudunek beren eskumenak baliatzen dituztela bermatu dadin, bat etorriz Suspertze eta Erresilientzia Mekanismoaren Erregelamenduaren 22. artikuluko 2. apartatuko e) letran eta Finantza Erregelamenduaren 129. artikuluan ezarritakoarekin [Europako Parlamentuaren eta Kontseiluaren 2018ko uztailaren 18ko 2018/1046 (EB, Euratom) Erregelamendua].

19. oinarria.–Oinarri arautzaileen aurkako errekurtsoa.

Oinarri arautzaile hauen aurka gora jotzeko errekurtsoa jartzen ahal dute interesdunek, Lurralde Kohesiorako kontseilariari zuzendua, argitaratu eta biharamunetik hilabeteko epean.

I. ERANSKINA

Zenbatekoak eta jarduketen definizioa

II. ERANSKINA

Eskuratzen ahal diren modernizazio soluzioen kategoriak, azken hartzaileak garatutako jardueraren arabera

Iragarkiaren kodea: F2306038