Iragarkia

6. ALDIZKARIA - 2023ko urtarrilaren 10a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

126/2022 FORU AGINDUA, abenduaren 19koa, Ekonomia eta Ogasuneko kontseilariak emana, zeinaren bidez aldatzen baita Ogasuneko eta Finantza Politikako kontseilariaren urtarrilaren 8ko 3/2018 Foru Agindua, "Pertsona fisikoen errentaren gaineko zergan, lan etekinengatik, enpresa- eta lanbide-jarduera batzuengatik, sariengatik eta errenta-egozpen batzuengatik egindako atxikipenen eta konturako sarreren urteko laburpena" izeneko 190 eredua onetsi zuena.

Foru agindu honen xedea da zenbait aldaketa egitea Ogasuneko eta Finantza Politikako kontseilariak urtarrilaren 8an emandako 3/2018 Foru Aginduan; foru agindu horren bidez, 190 eredua onetsi zen, "Pertsona fisikoen errentaren gaineko zergan, lan etekinengatik, enpresa eta lanbide jarduera batzuengatik, sariengatik eta errenta-egozpen batzuengatik egindako atxikipenen eta konturako sarreren urteko laburpena" izenekoa. Aldaketa horiekin, Administrazioak eredu horren bidez jasotzen duen informazioaren kalitatea hobetu nahi da, funtsezko elementua baita Nafarroako Foru Ogasunak esleituak dituen laguntza, ikerketa eta kontroleko eginkizunak eraginkorrak izan daitezen.

Lehenik eta behin, 190 eredua aldatu da beste errenta salbuetsienetatik bereizita eman dadin aktibo ukiezinak asmatzeagatik sari gisa jasotako lan etekin salbuetsiei eta zehaztu gabeko gainerako lan etekin salbuetsiei buruzko informazioa.

Gainera, abenduaren 20ko 19/2021 Legean araututako bizitzeko gutxieneko errentaren prestazioa eta Gizarteratzerako eta errenta bermaturako eskubideak arautzen dituen azaroaren 11ko 15/2016 Foru Legean ezarritako errenta bermatuaren prestazioa hobeki kudeatzeko helburuarekin, komenigarritzat jo da 190 ereduan bizikidetza unitatearen titularraren identifikazioari buruzko informazioa sartzea. Izan ere, maiz, identifikazio hori ez dator bat ez prestazioa jasotzen duenarekin, ez adingabearen ordezkariaren nortasunarekin. Halaber, beharrezkotzat jotzen da eremu berri bat sartzea, bizitzeko gutxieneko errentaren prestazioan, ekitaldian ordaindutako edozein hilekotan, abenduaren 20ko 19/2021 Legean ezarritako haurrei laguntzeko osagarriaren zenbatekoak sartu diren kasuak identifikatzeko.

Azkenik, foru aginduaren idazketa hobetu da, eredua aurkezteko moduari, gaikuntzari, baldintza orokorrei eta prozedurari dagokienez.

Horiek horrela, Pertsona Fisikoen Errentaren gaineko Zergari buruzko Foru Legearen Testu Bateginaren 87.2.c) artikuluan (testu bategin hori ekainaren 2ko 4/2008 Legegintzako Foru Dekretuaren bidez onetsi zen) eta Tributuei buruzko abenduaren 14ko 13/2000 Foru Lege Orokorrean ezarritako gaikuntzak baliatuz

AGINTZEN DUT:

Artikulu bakarra.–Aldatzea Ogasuneko eta Finantza Politikako kontseilariak urtarrilaren 8an emandako 3/2018 Foru Agindua, 190 eredua onetsi zuena, "Pertsona fisikoen errentaren gaineko zergan, lan etekinengatik, enpresa- eta lanbide-jarduera batzuengatik, sariengatik eta errenta-egozpen batzuengatik egindako atxikipenen eta konturako sarreren urteko laburpena" izenekoa.

Urtarrilaren 8ko 3/2018 Foru Aginduaren manu hauek honela idatzita geldituko dira:

Bat.–4. artikulua.

"4. artikulua. 190 eredua aurkezteko moduak.

Aipatutako eredua soilik formatu elektronikoan izanen da eskuragarri eta modu elektronikoz aurkeztu beharko da, Internet bidez, 6. eta 7. artikuluetan azaltzen diren baldintza orokorren eta prozeduraren arabera.

Aurkezpena egiten dutenek kontuan hartu beharko dituzte aurkezpen telematiko hori egiteko behar diren arau teknikoak, Nafarroako Gobernuaren web orrian, Nafarroako Foru Ogasunari dagokion atalean argitaratuta daudenak".

Bi.–5. artikulua.

"5. artikulua. 190 eredua aurkezteko gaikuntza.

Honako hauek aurkezten ahalko dute 190 eredua modu elektronikoz, Internet bidez:

1. Zergapekoek edo, hala dagokionean, haien legezko ordezkariek.

2. Tributuen aplikazioan laguntzaile sozialen izaera duten pertsonek edo entitateek, Tributuei buruzko abenduaren 14ko 13/2000 Foru Lege Orokorraren 90. artikuluan eta ekainaren 29ko 130/2009 Foru Aginduan xedatutakoarekin bat (kanpo-lankidetzarako akordioa onesten duen foru agindua, hirugarren pertsonen izenean telematika bidez aurkezteko aitorpenak, jakinarazpenak eta zerga arloko beste agiri batzuk, eta telematika bidez tramitatzeko tributu zorren ordainketa)".

Hiru.–6. artikulua.

"6. artikulua. 190 eredua aurkezteko baldintza orokorrak.

190 eredua elektronikoki aurkezteko, honako baldintza orokor hauek bete beharko dira:

a) Aitortzaileak identifikazio fiskaleko zenbakia (IFZ) eduki beharko du.

b) Eredua elektronikoki aurkezteko, beteko dira Ekonomia eta Ogasuneko kontseilariaren 132/2009 Foru Aginduaren 2. artikuluan ezarritako baldintza orokorrak, foru agindu horretan arautzen baitira zenbait tributu aitorpen baliabide telematikoen bidez edo ordenagailuak irakurtzen ahal duen euskarriaren bidez aurkeztera behartzen duten kasuak".

Lau.–7. artikulua.

"7. artikulua. 190 eredua elektronikoki aurkezteko prozedura.

Aitorpenak Internet bidez aurkezteko, bi prozedura hauetako bat erabiliko da:

a) Web formulariotik:

1. Sartu 190 eredua aurkezteko tramitera, Nafarroako Gobernuaren webgunean, Nafarroako Foru Ogasunaren atalean.

2. Bete aitorpena aurkezteko beharrekoak diren datu guztiak.

3. Aitorpena bete ondoren, igortzeko aukera erabili.

Aitorpena zuzen egina bada, sistemak baliozkotuko du. Akatsik atzemanez gero, formularioaren bidez emanen da horren berri, eta haiek zuzendu arte ezin izanen da aitorpena aurkeztu. Aitorpena behar bezala bete ondoren, aurkeztutako aitorpenari esleitutako zenbakia emanen du aditzera sistemak, eta inprimatzeko aukera eskainiko du, frogagiri gisa erabiltzeko.

b) Nafarroako Foru Ogasunak garatutako laguntza programatik:

1. Aitorpena laguntza programa erabiliz bete.

2. Aitorpena bete ondoren, baliozkotu egin behar da, aurkeztu aurretik.

3. Aitorpena baliozkotu ondoren, Internet bidez igortzen ahalko da.

4. Aitorpena igorri ondoren, sistemak erantzun eginen du ordainagiri zenbakia eta aurkezpenaren eguna eta ordua emateko. Igorpena baliozkotu eta prozesatu ondoren, haren emaitza laguntza programan eskura dauden loteen kontsultatik aztertzen ahalko da.

c) Salbuespen gisa, aurkeztu beharreko adierazpenak 12.000 erregistro baino gehiago baditu, eredu informatiboen formulario osagarritik:

1. Eredu informatiboen formulario osagarrian (994) sartu Ogasunarekiko tramiteen zerbitzuaren bitartez, Nafarroako Atarian.

2. Egin beharreko aitorpenaren eredua hautatu: M190.

3. Transmititu beharreko aitorpenaren fitxategia erantsi.

Fitxategi horien edukia II. eranskinean ezartzen diren erregistro diseinuen araberakoa izanen da.

Akatsik atzemanez gero, formularioaren bidez emanen da horren berri, eta haiek zuzendu arte ezin izanen da aitorpena aurkeztu. Aitorpena behar bezala bete ondoren, aurkeztutako aitorpenari esleitutako zenbakia emanen du aditzera sistemak, eta inprimatzeko aukera eskainiko du, frogagiri gisa erabiltzeko".

Bost.–8. artikulua, indargabetzea.

Sei.–I. eranskina, gehitzea.

I. eranskin gisa gehitzen da foru agindu honen eranskina.

Zazpi.–Eranskina.

Urtarrilaren 8ko 3/2018 Foru Aginduaren eranskina, aurrerantzean, II. eranskina izanen da.

Honela aldatzen da:

a) 2. erregistro mota (hartutakoa), 79-80 idazguneak, "Hartutakoaren L gakorako erabili beharreko azpigakoa", "29" azpigakoa:

"29. Bizitzeko gutxieneko errenta gisa jasotako prestazio ekonomikoa, abenduaren 20ko 19/2021 Legean arautua. Salbuetsirik dago halaxe xedatu delako 4/2008 Legegintzako Foru Dekretuaren bidez onetsitako Pertsona Fisikoen Errentaren gaineko Zergari buruzko Foru Legearen testu bateginaren 7. artikuluaren k) letrako laugarren paragrafoan".

b) 2. erregistro mota (hartutakoa), 79-80 idazguneak, "Hartutakoaren L gakorako erabili beharreko azpigakoa", "30" azpigakoa:

"30. Beste errenta salbuetsi batzuk. Azpigako honetan sartuko dira pertsona fisikoen errentaren gaineko zerga pagatzetik salbuetsita dauden beste errenta batzuk, 190 ereduan adierazi beharrekoak badira ere, L gakoaren beste azpigakoetan berariaz aipatzen ez direnak (adibidez: epe luzeko aurrezki planak, administrazio publikoen kalte-ordainak, askatasun-gabetzeagatik jasotako kalte-ordainak, aurrezki sistematikoko banakako planak). Berariaz gelditzen dira azpigako honetatik kanpo lan etekin salbuetsitzat jotzen direnak".

c) 2. erregistro mota (hartutakoa), 79-80 idazguneak, "Hartutakoaren L gakorako erabili beharreko azpigakoa", "31" azpigakoa gehitzea:

"31. Aktibo ukiezinak asmatzeagatik sari gisa jasotako lan etekin salbuetsiak –salbuetsita baitaude Pertsona Fisikoen Errentaren gaineko Zergari buruzko Foru Legearen testu bateginaren 7. artikuluko w) letran ezarritakoaren arabera–, eta L gakoaren beste azpigakoetan zehaztua ez dagoen beste edozein lan etekin salbuetsi".

d) 2. erregistro mota (hartutakoa), 158-166 idazguneak, "Bizikidetza unitatearen titularraren IFZ" eremu alfanumerikoa gehitzea:

"BIZIKIDETZA UNITATEAREN TITULARRAREN IFZ. (L.28 eta L.29 gakoetarako soilik).

Eremu hau nahitaez bete behar da "Bizikidetza unitatearen titularra" eremuaren edukia 2 zenbakiarekin adierazitakoa denean. Halakoetan, bizikidetza unitatearen titularra den pertsona fisikoaren identifikazio fiskaleko zenbakia (IFZ) jarriko da.

Eremu hau ezin da izan ez "Atxikitzailearen IFZ" eremuaren ez "Hartzailearen IFZ" eremuaren berdina.

Eremu hau eskuinaldean lerrokaturik egonen da, eta azken idazgunea kontrol karakterea izanen da. Ezkerreko idazguneak zeroz beteko dira.

Beste edozein kasutan, zuriunez beteko da eremua."

e) 2. erregistro mota (hartutakoa), 167. idazgunea, "Bizikidetza unitatearen titularra" zenbakizko eremua gehitzea:

"BIZIKIDETZA UNITATEAREN TITULARRA. (L.28 eta L.29 gakoetarako soilik).

Eremu honetan, zenbakizko kode adierazgarria jarriko da, zerrenda honen arabera:

1. Hartzailea bizikidetza unitatearen titularra bada.

2. Hartzailea ez bada bizikidetza unitatearen titularra. Halakoetan, nahitaez bete beharko da "Bizikidetza unitatearen titularraren IFZ" eremua".

f) 2. erregistro mota (hartutakoa), 168-178 idazguneak:

"ZEROZ BETE".

g) 2. erregistro mota (hartutakoa), 322. idazgunea, "Haurrei laguntzeko osagarria" zenbakizko eremua gehitzea:

"HAURREI LAGUNTZEKO OSAGARRIA. (L.29 gakorako soilik).

Eremu honetan, zenbakizko kode adierazgarria jarriko da nahitaez, zerrenda honen arabera:

1. Prestazioan haurrei laguntzeko osagarriko zenbatekoak sartu badira, ekitaldian ordaindutako edozein hilekotan. Osagarri hori bizitzeko gutxieneko errenta ezartzen duen abenduaren 20ko 19/2021 Legean aurreikusia dago.

2. Prestazioan ez bada sartu haurrei laguntzeko osagarriko zenbatekorik, ekitaldian ordaindutako hileko batean ere. Osagarri hori bizitzeko gutxieneko errenta ezartzen duen abenduaren 20ko 19/2021 Legean aurreikusia dago".

h) 2. erregistro mota (hartutakoa), 323-500 idazguneak:

"ZURIUNEAK".

Azken xedapen bakarra.–Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra, eta 2023ko urtarrilaren 1etik aurrera aurkezten diren aitorpenei aplikatuko zaie lehenbizikoz, 2022ko informazioari dagokionez.

Iruñean, 2022ko abenduaren 19an.–Ekonomia eta Ogasuneko kontseilaria, Elma Saiz Delgado.