38. ALDIZKARIA - 2023ko otsailaren 22a - BEREZIA

1. NAFARROAKO FORU KOMUNITATEA

1.7. BESTELAKOAK

3/2023 FORU AGINDUA, urtarrilaren 16koa, Ekonomia eta Ogasuneko kontseilariak emana, erabilitako ibilgailuen eta itsasontzien salmentako batez besteko prezioak onesten dituena, oinordetzen eta dohaintzen gaineko zergaren, ondare eskualdaketen eta egintza juridiko dokumentatuen gaineko zergaren eta zenbait garraiobideren gaineko zerga bereziaren kudeaketan aplikatzeko.

Erabilitako ibilgailuen eta itsasontzien eskualdaketetan, zerga-oinarria finkatzeko oinordetzen eta dohaintzen gaineko zergarako, ondare eskualdaketen eta egintza juridiko dokumentatuen gaineko zergarako eta zenbait garraiobideren gaineko zerga berezirako, urtero ematen diren foru aginduetan horretarako ezarritako batez besteko prezioak aplikatzen dira.

Erabilitako ibilgailuen eta itsasontzien parkearen berritzea eta ibilgailu horiek merkatuan dituzten prezioen berezko aldaketak direla-eta, bidezko da indarra duten batez besteko prezioak eguneratzea, eta horretarako prestatu dira foru agindu honen I., II., III. eta IV. eranskinetako taulak.

Modelo eta prezioen taulak egiteko, garraiobideen fabrikatzaile eta saltzaileen elkarteen argitalpenak baliatu dira.

Foru agindu honek eguneratu egiten du itsas motorren oinarrizko balorazioa potentzia mekaniko errealeko unitate bakoitzeko (III. eranskina), eta mantendu egiten du IV. eranskinean jasotako balio-galeraren portzentajeen taula, islatutako balioak ibilgailuen merkatuaren errealitateari eta ibilgailuek jasaten duten balio-galerari egokitzekoa.

Bestalde, garraiobide zehatz batzuek merkatuan izan duten bilakaera dela eta, komeni da foru agindu honetan moto elektrikoak eta quad-ak sartzea. Bilakaera horren ondorioz, SUV direlako ibilgailuak sortzen joan dira, zeinak batzuetan zaila baita jakitea non sartu, turismo-ibilgailuen sektorean edo lur orotako ibilgailuenean; hortaz, erabiltzaileek bi taulak kontsultatu behar izaten zituzten, eta horregatik aurten ez da bi ibilgailu mota horien arteko bereizketarik eginen I. eranskinean.

Aurreko urteetan bezala, modeloen informazio eta identifikazio gisa eta ohituragatik, zaldi potentziatan (zp) adierazten da motorren potentzia, merkataritza arloan interesa duen datu orokor bat baita, automobil modelo batzuk identifikatzeko baliagarria dena, nahiz eta ez den inola ere Neurketa Unitateen Legezko Sisteman onartutako unitate bat (Metrologiari buruzko abenduaren 22ko 32/2014 Legea). Halaber, merkaturatze aldia adierazten da automobilen modelo batzuk bereizteko bestelako elementu gisa, zeren, zenbait ibilgailuren kasuan, desberdinak badira ere, merkataritzako izen berari eusten baitzaio urte askoan. Era berean, errekuntzako motorra duten motozikleta eta quad mota guztien batez besteko prezioak motorraren tamainaren arabera bereizten dira, zentimetro kubikoetan adierazita, eta motozikleta elektriko moten batez besteko prezioak, berriz, motorrak garatzen duen potentziaren arabera bereizten dira, kW-etan adierazita.

Zenbait garraiobideren gaineko zerga bereziari dagokionez, Europar Batasunaren irizpideetara egokitzeko asmoz, bere horretan uzten da erabilitako formula, hots, ibilgailu erabiliak, aurretik atzerrian matrikulaturik egon bada, jasan duen zeharkako zergapetzea merkatuko baliotik kentzekoa.

Horiek horrela, bidezkoa da salmentako batez besteko prezioak eta horiei aplikatzen zaizkien portzentajeak eguneratzea 2023. urterako.

Horrenbestez,

AGINTZEN DUT:

1. artikulua. Batez besteko prezio aplikagarrien taulak.

I., II., III. eta IV. eranskinetan sartutako taulek Ekonomia eta Ogasuneko kontseilariaren urtarrilaren 31ko 13/2022 Foru Aginduaren bidez onetsitakoak ordeztuko dituzte ondorio guztietarako.

2. artikulua. Ibilgailu automobilen, autokarabanen, quad-en eta motozikleten balioa finkatzea.

Matrikulatutako turismo-ibilgailuen, lur orotako ibilgailuen, autokarabanen eta motozikleten balioa finkatzeko, I. eranskineko batez besteko prezioei dagozkien portzentajeak aplikatuko zaizkie, kontuan hartuta erabilera-urteak eta, egoki bada, ibilgailuaren jarduera. Portzentaje horiek IV. eranskinean jasotako taulan eta jarraibideetan daude.

3. artikulua. Aisialdiko ontzien, itsas motorren eta uretako motoen balioa zehaztea.

1. Aisialdiko ontzien eta itsas motorren balioa finkatzeko, bereizirik baloratuko dira ontzia motorrik gabe eta motorra, eta, horretarako, foru agindu honen II. eranskinean jasotako balioei III. eranskineko taulako portzentajeak aplikatuko zaizkie, erabilera-urteak kontuan hartuta, eta gero balio eguneratuak gehituko zaizkie, ontziaren guztizko balioa lortzeko.

2. Uretako motoen kasuan, balioa unitate gisa eta batera finkatuko da (kroskoa eta motorra bereiz baloratu gabe). Horretarako, II. eranskinean jasotako balioei III. eranskineko taulako portzentajeak aplikatuko zaizkie, erabilera-urteak kontuan hartuta eta aipatutako III. eranskinean jasotako jarraibideen arabera.

4. artikulua. Zenbait garraiobideren gaineko zerga berezirako balioa finkatzeko arau berezia.

Zenbait garraiobideren gaineko zerga bereziari dagokionez, honako arau hauek aplikatuko dira:

Lehena.–I., II. eta III. eranskinetan ageri diren batez besteko prezioei erabilitako urteen arabera dagozkien portzentajeak aplikatuko zaizkie, eta, egoki bada, ibilgailuaren jarduerari dagokiona, Portzentaje horiek foru agindu honen IV. eranskinean jasotako taulan eta jarraibideetan daude.

Ibilgailu modelo beraren kasuan, batez besteko prezio batzuk badaude, modelo motaren arabera, zergadunak egiaztatu beharko du, horretarako eskatzen diotenean, ibilgailu modeloaren zein mota matrikulatu nahi duen. Hala egiten ez badu, zerga administrazioak ibilgailu modelo horren mota garestienaren balioa hartuko du aintzat.

Bigarrena.–Aurretik atzerrian matrikulatuta egon eta behin betiko lehen matrikulazioa Espainian izan behar duten garraiobide erabiliak direnean, zeharkako zergetako kuoten hondarra kenduko zaio merkatuko balioari, betiere merkatuko balioa aurreko lehen arauan adierazitakoa kontuan hartuta kalkulaturik. Horretarako, formula hau erabil daiteke:

Azalpena:

ZO: Zenbait garraiobideren gaineko zerga bereziko garraiobide erabilien zerga-oinarria.

MB: merkatuko balioa, IV. eranskineko portzentajeak aplikatu ondoren batez besteko prezioen taulek finkatutakoa.

BEZtasa: zerga-tasa, bateko hainbestean, garraiobideari orain Espainiako lurralde eremuan matrikulatzeko lehen matrikulazioan eskatuko zitzaiokeen balio erantsiaren gaineko zergarena (BEZa).

ZGZBtasa: zenbait garraiobideren gaineko zerga bereziaren zerga-tasa, bateko hainbestean, lehen matrikulazioan eta garraiobidea orain Espainian matrikulatuko den lurralde eremuan eskatu beharko zatekeena.

BESTELAKOtasak: bestelako zeharkako zerga-tasak batzearen emaitza, bateko hainbestean, baldin eta garraiobidearen erosketari kargatu bazaizkio, eta merkatuko balioan sartuak badaude.

Azken xedapen bakarra.–Indarrean jartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra, eta 2023ko urtarrilaren 1etik aurrera izanen ditu ondorioak.

Iruñean, 2023ko urtarrilaren 16an.–Ekonomia eta Ogasuneko kontseilaria, Elma Saiz Delgado.

Jaitsi dokumentu osoa (PDFa).

Iragarkiaren kodea: F2300795