1. NAFARROAKO FORU KOMUNITATEA
1.7. BESTELAKOAK
803/2022 EBAZPENA, 2022ko apirilaren 12koa, Nafarroako Unibertsitate Publikoko errektoreak emana. Haren bidez agintzen da argitaratzeko Gobernu Kontseiluaren 2022ko apirilaren 12ko “Erabakia, Nafarroako Unibertsitate Publikoko Ikertzaileek Irakasle Lanean Laguntzeko Araudia onesten duena”.
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratu dadila Gobernu Kontseiluaren 2022ko apirilaren 12ko Erabakia, Nafarroako Unibertsitate Publikoko Ikertzaileek Irakasle Lanean Laguntzeko Araudia onesten duena.
“ERABAKIA, NUP-EKO IKERTZAILEEK IRAKASLE LANEAN LAGUNTZEKO ARAUDIA ONESTEKOA
Araudi honen xedea ikertzaile doktoreek eta doktore ez diren ikertzaileek irakasle lanean nolako baldintzetan lagundu behar duten zehaztea da, errazago has daitezen irakaslanean. Xedea da ikertzaileek unibertsitateko prestakuntza osoa eskuratzea, bai ikerketaren arloan bai irakasle lanari dagozkion alderdietan. Irakasle lanaren ikuspegitik, ikertzaileak irakaskuntzaren eduki eta metodologietan ahalik eta prestakuntza zabalena lortzea izanen da helburua, beti Nafarroako Unibertsitate Publikoan ematen den irakaskuntzaren kalitatea bermatuz.
2018ko maiatzaren 30ean, NUPeko Ikertzaileen Lankidetza arautzen duen prozedura onetsi zuen Gobernu Kontseiluak erabaki baten bidez.
Une honetan, bidezkoa da araudi hori aldatzea funtsezko zenbait alderdi nabarmentzeko, hala nola doktore ez diren ikertzaileen artean maila desberdinak bereizi beharra, arduradun diren irakasleei intentsitate desberdina eskatzeko haien tutoretzan. Era berean, bidezkoa da aldaketa hau egitea ikertzaile doktoreek aukera izan dezaten ardura handiagoak beren gain hartzeko.
Ikaskuntza-prozesu honetan, funtsezkoa da irakasleek konpromisoa izatea ikertzaileei irakasteko eta haien tutore aritzeko orduan. Hori dela eta, tutoretza hori beren gain hartzen duten irakasleek IAPan islatua ikusiko dute beren jarduera, proposatutako araudian adierazten den bezala.
Horregatik guztiagatik, Irakasleen Gaietarako errektoreordeak proposatuta, honako hau da Gobernu Kontseiluak, bere kideek aldez aurretik eztabaida egin eta gero, 2022ko apirilaren 12an egindako bileran hartu duen,
ERABAKIA:
Lehenbizikoa.–NUPeko Ikertzaileek Irakasle Lanean Laguntzeko Araudia onestea. Erabaki honen eranskinean dago araudi hori.
Bigarrena.–Indargabetzea NUPeko Ikertzaileen Lankidetza arautzen duen Prozedura, Gobernu Kontseiluak 2018ko maiatzaren 30ean hartutako erabaki baten bidez onetsia.
Hirugarrena.–Erabaki hau Nafarroako Aldizkari Ofizialean eta NUPen iragarki-ohol elektronikoan argitaratzea.
Laugarrena.–Erabaki hau aditzera ematea saileko zuzendariei, Giza Baliabideen Zerbitzuari, Ikastegien eta Sailen Atalari, Irakaskuntza Programatu eta Antolatzeko Unitateari eta Irakasleen Gaietarako Errektoreordetzari.
Bosgarrena.–Erabaki honek 2022ko irailaren 1ean hartuko du indarra.
Seigarrena.–Erabaki honen aurka, zilegi da administrazioarekiko auzi-errekurtsoa jartzea, bi hilabeteko epean, erabakia Nafarroako Aldizkari Ofizialean argitaratu eta biharamunetik kontatzen hasita, Administrazioarekiko Auzien Jurisdikzioari buruzko 1998ko uztailaren 13ko 29/1998 Legearen xedapenetan ezarritakoarekin bat.”
Iruñean, 2022ko apirilaren 12an.–Errektorea, Ramón Gonzalo García.
NAFARROAKO UNIBERTSITATE PUBLIKOAN DOKTORETZA ONDOKO IKERTZAILEEK ETA PRESTAKUNTZALDIAN DAUDENEK IRAKASLE LANEAN LAGUNTZEKO ARAUDIA
1. artikulua. Xedea eta ikertzaile guztientzat komunak diren ezaugarriak
1. Araudi honen xedea da zehaztea zer baldintzatan lagunduko duten doktoretza ondoko ikertzaileek eta prestakuntzaldian dauden ikertzaileek irakasle lanean, 36/2009 Foru Dekretuan eta Nafarroako Unibertsitate Publikoko ikertzaileak kontratatzeko Arautegian (Gobernu Kontseiluaren 2017ko maiatzaren 3ko Erabakiaren bidez onetsitakoan) ezarritakoarekin bat etorriz.
2. Araudi honen bidez, ikertzaileak irakasle lanean has daitezen bultzatu nahi da. Xedea da ikertzaileek unibertsitateko prestakuntza osoa eskuratzea, bai ikerketaren arloan bai irakasle lanari dagozkion alderdietan. Irakasle lanaren ikuspegitik, ikertzaileak irakaskuntzaren eduki eta metodologietan ahalik eta prestakuntza zabalena lortzea izanen da helburua, beti Nafarroako Unibertsitate Publikoan ematen den irakaskuntzaren kalitatea bermatuz.
3. Araudi hau doktoretza ondoko eta prestakuntzaldiko ikertzaile guztiei aplikatuko zaie, baldin eta Nafarroako Unibertsitate Publikoarekin kontratu harremana badute.
4. Irakasle lanean laguntzea baimen akademiko administratibo bat da, beharrezkoa Nafarroako Unibertsitate Publikoarekin kontratu harremana duten ikertzaileek aukera izan dezaten graduko, masterreko eta doktoretzako titulazioetan irakasle lanean laguntzeko. Irakasle lanean egiten ahal dituzten orduen gehieneko kopurua kontratuan ezarritakoa izanen da, edo, subsidiarioki, aplikatzekoa den araudian ezarritakoa.
5. Irakasle lanean laguntzean ikertzaileen kontratuetan jasotako aginduak errespetatu behar dira, bai eta kontratu horiei bidea ematen dieten deialdietan jasotakoak ere, eta, orobat, kasuan kasuko egoerari aplikatzekoa zaion araudian ezarritakoak, bai doktoreentzat bai prestakuntzaldian daudenentzat.
6. Irakasle lanean laguntzean ezin izanen da oztopatu interesdunaren kontratuaren xede den ikerketa-jarduera, eta ezin izanen da hutsaldu kontratuaren ikerketarako helburua, eta, hala badagokio, prestakuntzakoa.
7. Irakasle lanean laguntzea borondatezkoa izanen da, salbu eta deialdiak edo kontratuak derrigorrezko gisa ezartzen badu.
8. Ikertzaile horien irakasle lana IAPan islatuko da, banaka, izen eta guzti. Hori hala izanik ere, ikertzaileak ez dira zenbatuko sailaren irakaskuntza-ahalmena kalkulatzeko plantillaren beharrak baloratzeko orduan; ondorio horretarako, ikertzaileen irakaskuntza-ahalmena zero izanen da.
9. Irakasle lanean parte hartzeak ez du eskubiderik emanen inolako ordainsaririk jasotzeko, ezta lanaldia aldatzeko ere.
2. artikulua. Prestakuntzaldiko ikertzaileak (doktore ez direnak). Aplikatzeko eremua eta mugak
1. Irakasle lana Nafarroako Unibertsitate Publikoko irakasle baten tutoretza eta ardura pean eginen dute ikertzaileek.
2. Graduko eta masterreko irakasgaietan lagunduko dute.
3. Prestakuntzaldian dauden ikertzaileak ez dira inola ere irakasgaiak edo gaiak koordinatzeko arduradun izanen. Era berean, ez dira epaimahaietako kide izanen, eta ez dituzte aktak sinatuko.
4. Irakasle lanean laguntzeko esleitzen ahal zaien gehieneko ordu kopuruak ezin izanen du gainditu irakasgai bateko irakaskuntza-mandatuaren % 50, eta inola ere ez ditu gaindituko aplikatzekoa den araudian ezarritako gehieneko kopuruak.
5. Prestakuntzaldian dauden ikertzaileek egindako irakasle lana IAPan jasoko da honako arau hauei jarraikiz:
a) Irakasle lanean laguntzen den lehen urtean, irakaskuntza-jarduera osoa bai prestakuntzaldian dagoen ikertzailearen IAPan bai irakasle lanaren tutoretza egiten ari den irakaslearen IAPan jasoko da. Batera egin beharko dute irakaskuntza-jarduera osoa. 1. motako irakasle lankidetzat joko dira.
b) Irakasle lanean laguntzen den bigarren urtean, irakaskuntza-jarduera osoa prestakuntzaldian dagoen ikertzailearen IAPan jasoko da. Irakasle lanaren tutore den irakaslearen IAPan prestakuntzaldiko ikertzaileari esleitutako irakaskuntza-jardueraren % 50 jasoko da. Batera egin beharko dute irakaskuntza-jarduera osoaren erdia gutxienez. 2. motako irakasle lankidetzat joko dira.
c) Irakasle lanean laguntzen den hirugarren urtean, irakaskuntza-jarduera prestakuntzaldian dagoen ikertzailearen IAPan jasoko da soilik. 3. motako irakasle lankidetzat joko dira.
d) Irakasle lanean laguntzen den lehenbiziko urtetik harago, ikertzaileak 1. motako irakasle lankidetzat jotzen ahalko dira baldin eta berez osasunerako arriskutsuak diren eta, ondorioz, irakaslea etengabe bertan egotea eskatzen duten irakasgaietan laguntzen ari badira. Halakoetan, irakasle lanean laguntzeko eskaerarekin batera, egoera hori arrazoitzen duen txosten bat aurkeztuko da.
e) NUPeko ikastegi misto bati atxikitako ikertzaileak aurreko arauetatik kanpo geldituko dira. Halakoetan, irakaskuntza-jarduera osoa irakasle lanaren tutoretza egiten ari den irakaslearen IAPan jasoko da. Prestakuntzaldiko ikertzaileak gehienez 120 orduz laguntzen ahalko du irakasle lanean –60 orduz gehienez ikasturte bakoitzean–, eta irakaslearekin batera egin beharko du irakaskuntza-jarduera osoa. Beste erakunde batzuei atxikitako ikertzaileek ere aukera izanen dute baldintza hauekin bat egiteko, baldin eta haien harremana arautzen duen hitzarmen espezifikoan berariaz adierazten bada hori. Ikertzaile horiek irakasle lanean emandako laguntza Sailak akreditatuko du, eta idazkari nagusiak ziurtatuko.
f) 1. edo 2. motako irakasle lankide bat irakasle kontratu bat izatera pasatzen bada, irakasletzat joko da ikasturte osoan, eta, kasu horretan, irakasle lankide gisa emandako laguntza osoa amaierako irakasle figurari egotziko zaio, kontuan hartu gabe ikasturte horretako irakasle arduradunaren irakaskuntza-jarduera.
3. artikulua. Ikertzaileak (doktoreak). Aplikatzeko eremua eta mugak.
Honako hauek hartzen dira doktoretza ondoko ikertzailetzat:
–Doktore titulua eskatzen duen kontratua duten ikertzaileak.
–Doktore titulua duten ikertzaileak, nahiz eta haien kontratuak halakorik ez eskatu; kasu horretan, beharrezkoa izanen da gutxienez bi ikasturtez aritu izatea irakasle lanean laguntzen.
1. Graduko, masterreko eta doktoretzako irakasgaietan laguntzen ahalko dute.
2. Aukera izanen dute irakasgaiak edo gaiak koordinatzeko arduradun izateko, bai eta epaimahaikide izateko eta aktak sinatzeko ere.
3. Ikertzaile horien irakasle lana IAPan islatuko da, banaka, izena eta guzti.
4. artikulua. Prozedura.
1. Prestakuntzaldiko ikertzaileek saileko irakasle baten bitartez eskatu beharko dute irakasle lanean laguntzea. Horretarako, inprimaki normalizatua aurkeztuko dute, eta hauek sinatu behar dute: eskaera egiten duen ikertzaileak, laguntzaren edo kontratuaren ardura duen irakasleak, irakasle lanean emandako laguntzaren ardura duen irakasleak eta irakaskuntza emanen den saileko zuzendariak.
2. Ikertzaile doktoreek saileko irakasle baten bitartez eskatu beharko dute irakasle lanean laguntzea; saileko irakasle hori ikertzailearen berme-emailea izanen da. Horretarako, inprimaki normalizatua aurkeztuko dute, eta hauek sinatu behar dute: eskaera egiten duen ikertzaileak, ikertzaileari bermea ematen dion irakasleak eta irakaskuntza emanen den saileko zuzendariak.
3. Saileko Kontseiluak eskaera onetsiko du edo ez, eta ez badu onesten, erantzuna arrazoitu beharko du. Behin onetsi ondoren, dagokion Laguntza Administratiboko Unitateak inprimaki sinatua igorriko dio irakasleen gaietan eskumena duen errektoreordeari, eta horrek irakasle lanean laguntzeko egindako eskaera baimenduko du edo ez, eta, beharrezkoa bada, dagokion ziurtagiria eginen du. Ezezkoa ematen badu, ezezkoa emateko erabakia interesdunari jakinaraziko zaio, behar bezala arrazoituta.
4. Irakasle lanean laguntzeko baimenak seihileko baterako edo ikasturte baterako ematen ahalko dira, eta aldi bererako berritzeko aukera egonen da.
5. Irakasle lanaren ardura duen irakasleak eskatuko du prestakuntzaldian dauden ikertzaileek irakasle lanean laguntzeko baimenak berritzeko. Horretarako, saileko zuzendariari inprimaki normalizatua aurkeztuko dio, honako hauek sinatua: eskatzaileak, laguntzaren edo kontratuaren ardura duen irakasleak eta irakasle lanean emandako laguntzaren ardura duen irakasleak.
6. Ikertzaile doktoreek irakasle lanean laguntzeko baimenak berritzeko, berriz, irakasle berme-emaileak eskatuko du, inprimaki normalizatua aurkeztuz, eskatzaileak eta ikertzaileari bermea ematen dion irakasleak sinatua.
7. Saileko Kontseiluak ez ditu berritzeko eskaerak onetsi behar, baina haien berri eman behar zaio. Saileko zuzendariak berritzeko eskaerak baimendu ondoren, administrazio-zerbitzuek irakasleen gaietan eskumena duen errektoreordeari jakinaraziko dizkiote.
8. Irakasle lanean laguntzeko aldia amaituko da ikertzailea lotzen duen kontratua amaitzen denean. Kontratua ikasturte baten seihilekoa amaitu baino lehen bukatuko bada, irakasle lanean laguntzeko baimena berritzea zilegi izanen da soilik kontratua amaitzeko geratzen den denbora tartea seihilekoaren erdia baino handiagoa bada.
9. Irakasleen gaietan eskumena duen errektoreordeak bertan behera uzten ahalko du irakasle lanean laguntzeko baimena, dagokion sailak aldez aurretik txostena eginda, eta irakaskuntza behar bezala emanen dela bermatuko du.
10. Edozein arrazoirengatik irakasle lanean emandako laguntza eteten bada, laguntzaren tutoretza egiten duen irakasleak bere gain hartu beharko du emateko falta den irakaskuntza.
Xedapen iragankorra.
Araudi hau onetsi aurretik irakasle lanean parte hartu duten ikertzaileak (doktore ez direnak) lehen, bigarren edo hirugarren urtekotzat jotzen ahalko dira araudi hau indarrean sartzen denetik, sailak erabakitzen duenaren arabera.
Azken xedapenetan lehena.–Gaikuntza.
Irakasleen gaietan eskumena duen errektoreordeari gaikuntza ematen zaio prozedura hau garatzeko eta aplikatzeko behar diren ebazpenak eman ditzan.
Azken xedapenetan bigarrena.–Indarra hartzea.
Araudi honek 2022ko irailaren 1ean hartuko du indarra.
Xedapen indargabetzailea.
Araudi hau indarrean sartzen denetik aurrera, indargabetua geldituko da ikertzaileek NUPeko irakasle lanean laguntzea arautzen duen prozedura, Gobernu Kontseiluak 2018ko maiatzaren 30ean onetsi zuena.
Iragarkiaren kodea: F2206020
