Iragarkia

56. ALDIZKARIA - 2022ko martxoaren 18a

3. ESTATUKO ADMINISTRAZIOA

GARRAIOETAKO, MUGIKORTASUNEKO ETA HIRI AGENDAKO MINISTERIOA

Eraikuntza proiektu honek ukitutako ondasun eta eskubideak okupatu aurreko aktak egiteko deialdia: “Lodosako lotunea lotune oso bihurtzea. AP-68 autobidea. 164+200 k.p.”. Nafarroako eta Errioxako probintziak. 95-NA-9910 gakoa

Errepideen Zuzendaritza Nagusiak 2021eko azaroaren 26an emandako ebazpenaren bidez onetsi zen “Lodosako lotunea lotune oso bihurtzea. AP-68 autobidea. 164 +200 k.p.” izeneko eraikuntza proiektua, Nafarroako eta Errioxako probintzietan, 95-NA-9910 gakoarekin.

2021eko abenduaren 14ko ebazpen osagarri baten bidez Estatuaren Errioxako Errepide Barrutiari agindua eman zitzaion onetsitako eraikuntza proiektuak ukitutako ondasun eta eskubideen nahitaezko desjabetze espedientea irekitzeko, nahitaezko desjabetzeari buruzko 1954ko abenduaren 16ko presako prozedura ere kontuan hartuz, hala badagokio.

Errepideen Zuzendaritza Nagusiak 2021eko otsailaren 16an emandako Ebazpenaren bidez, onetsi zen jendaurreko informazioari buruzko espedientea eta behin betiko, trazadura proiektu gisa, “Lodosako lotunea lotune oso bihurtzea. AP-68 autobidea. 164 +200 k.p.” izeneko eraikuntza proiektua. Proiektua behin-behinean onesteko 2020ko uztailaren 29ko ebazpenean presako izaera duela deklaratu ondoren (2020ko abuztuaren 15eko Estatuko Aldizkari Ofiziala), eta Errepideei buruzko irailaren 29ko 37/2015 Legearen 12.2 artikuluan aurreikusitakoarekin bat (azaroaren 8ko 18/2018 Errege Lege-dekretuaren bidez aldatua), 2021eko otsailaren 16an emandako behin betiko onespenak berekin dakar ondasunen onura publikoa eta presaz okupatu beharra deklaratzea, zerbitzuak aldatzea eta eskuratzea desjabetzearen helburuei dagozkien eskubideak, aldi baterako okupaziokoak edo zortasunak ezarri edo aldatzekoak.

Horrenbestez, barrutik honek, Nahitaezko Desjabetzeari buruzko Legearen 98. artikuluak emandako ahalmenak erabiliz eta lege horren 52. artikuluko 2. eta 3. arauetan adierazitakoarekin bat, erabaki du dei egitea ondoko zerrendan ageri diren jabeei, okupatu aurreko aktak jasotzeko ekitaldira; zerrenda ikusgai dago Lodosako (Nafarroa) eta Ausejoko (Errioxa) udal iragarki-tauletan, Estatuaren Errioxako Errepide Barrutian eta Garraioetako, Mugikortasuneko eta Hiri Agendako Ministerioaren egoitza elektronikoan (https://www.mitma.gob.es/el-ministerio/participacion-publica) Ekitaldi hori toki hauetan eginen da:

Udal-mugartea: Lodosa (Nafarroa).

Tokia: Lodosako udaletxea (erabilera anitzeko aretoa). Ancha kalea 1 31580 Lodosa, Nafarroa.

Udal-mugartea: Ausejo (Errioxa).

Tokia: Ausejoko udaletxea. Cava kalea 3 26513 Ausejo, Errioxa.

Era berean, arestian aipatutako bideez gain, interesdunei hitzorduaren berri emanen zaie banakako zitazioaren bidez eta dagokion iragarkia argitaratuta Errioxako, Nafarroako eta Estatuko aldizkari ofizialetan eta Diario de la Rioja eta Diario de Navarra egunkarietan.

Ekitaldi horretara agertu beharko dute ukitutako ondasun eta eskubideen titularrek, beraiek edo behar bezala baimendutako haien ordezkariek, jabetza tituluaren egiaztagiriak, Jabetza Erregistroaren ohar soila eta ondasun higiezinen gaineko zergaren azken ordainagiria aldean dituztela edo, errentamenduen kasuan, kontratua eta azken sei hilabeteetako ordainagiriak; horrez gain, perituak eta notarioa ere eramaten ahalko dituzte, haiek ordainduta.

Esan beharra dago argitalpen hau egiten dela jendaurreko informazioaren tramitearen ondorioetarako ere, Nahitaezko Desjabetzeari buruzko Legearen 17.2, 18. eta 19.2 artikuluetan aurreikusita bezala, Nahitaezko Desjabetzeari buruzko Legearen Erregelamenduaren 56.2 artikuluarekin bat etorriz, interesdunek idatziz alegazioak aurkez ditzaten organismo honetan, 15 eguneko epean, soilik zuzentzeko presako okupazioak ukitutako ondasunen zerrenda egitean gertatu diren balizko akatsak.

Lurzatien planoak eta interesdunen eta ukitutako ondasunen zerrenda kontsultatzen ahalko dira arestian aipatutako udaletako bulegoetan eta Estatuaren Errioxako Errepide Barrutiko bulegoetan (Duques de Nájera kalea 49-1.a - 26071 Logroño. Errioxa).

Administrazio Publikoen Administrazio Prozedura Erkideari buruzko urriaren 1eko 39/2015 Legearen 83.2 artikulua betez, aipatutako agiriak eskura egonen dira web-orri honen parte-hartze publikorako atalean:

https://www.mitma.gob.es/el-ministerio/participacion-publica

Logroñon, 2022ko otsailaren 24an.–Estatuaren Errioxako Errepide Barrutiko ingeniari burua, J. Enrique García Garrido.

Iragarkiaren kodea: E2203178