Iragarkia

26. ALDIZKARIA - 2022ko otsailaren 4a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

186E/2021 EBAZPENA, abenduaren 28koa, Turismo, Merkataritza eta Kontsumoko zuzendari nagusiak emana, zeinaren bidez onesten baita artisautza enpresen elkarteentzako dirulaguntzen deialdia, Nafarroako artisautza sektorea sustatze aldera. DDBN identifikazioa: 603060.

Nafarroako Turismoaren Plan Estrategikoak (2018-2025) eta Txikizkako Merkataritza Hurbila Bultzatzeko Planak (2018-2020) Nafarroan artisautza zeharka sustatzeko neurriak jasotzen dituzte, zehazki, turismo jarduera sustatzeko, lurraldean oinarritutako artisautzaren garapena babestuz, eta eremu turistikoetan merkataritza eta artisautza sustatzeko, hurrenez hurren.

Turismo, Merkataritza eta Kontsumo Zuzendaritza Nagusiaren ustez, egokia da merkataritza, turismoa eta artisautza elkarren osagarri izan daitezen formulak sustatzea, artisautza jasangarrirako bide berriak esploratzeko, turismorantz dibertsifikatuz.

Horregatik, funtsezkotzat jotzen du artisautzaren sektorean asoziazionismoa babestea eta artisautza enpresek egindako produktuen banaketa komertziala bultzatzea, interes sektorialak eta interes turistikoak bateratzen dituzten berariazko ekitaldi ekonomikoak antolatuz. Era berean, beharrezkotzat jotzen du sektoreko ETE-ek prestakuntza espezializatua sustatzea artisautza lanbideetan eta gaitasun digitalen arloan.

Deialdi honetan aurreikusitako dirulaguntzak norgehiagokako araubideari jarraikiz ematen dira, eta, hortaz, diruz lagungarria den jarduketa mota bakoitzari kasuan kasuko baremoak aplikatu eta horren araberakoa izanen da dirulaguntzak emateko hurrenkera.

Adierazitakoarekin bat, eta erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak,

EBAZTEN DUT:

1. Artisautza enpresen elkarteei dirulaguntzak emateko deialdia onestea, Nafarroako artisautza sektorea sustatzeko.

2. Deialdiaren oinarri arautzaileak onestea. Ebazpen honen eranskinean jaso dira.

3. 30.000 euroko gastua baimentzea deialdi honen ondoriozko konpromisoak betetzeko; 2022ko gastuen aurrekontuan gaituko den partidaren kargura finantzatuko da, zehazki indarreko gastu aurrekontuko “830001-83130-4819-432104. Artisautzako dirulaguntzak. Azokak eta ekitaldiak” partidaren baliokidearen kargura, baldin eta kreditu egokia eta behar adinakoa badago.

Laguntzak emateko eta ordaintzeko, kreditu egokia eta behar adinakoa izan beharko da 2022rako Nafarroako Aurrekontu Orokorretan.

4. Ebazpen hau eta eranskina Nafarroako Aldizkari Ofizialean argitaratzea.

5. Deialdi honen kontra, gora jotzeko errekurtsoa aurkezten ahalko zaio Garapen Ekonomiko eta Enpresarialeko kontseilariari, argitaratu eta biharamunetik hasita hilabeteko epean.

Iruñean, 2021eko abenduaren 28an.–Turismo, Merkataritza eta Kontsumoko zuzendari nagusia, Maitena Ezkutari Artieda.

ERANSKINA

DEIALDIA, ARTISAUTZA ENPRESEN ELKARTEEI DIRULAGUNTZAK EMATEKO, NAFARROAKO ARTISAUTZA SEKTOREA SUSTATZE ALDERA. OINARRI ARAUTZAILEAK

1. oinarria. Xedea.

Artisautza enpresen elkarteei dirulaguntzak emateko araubidea arautzea da oinarri arautzaile hauen xedea, elkarte horiek artisautza azokak eta sariketak antolatzeko egiten dituzten jarduketei dagokienez.

Era berean, artisautza enpresen lanbide trebakuntza sustatu nahi da, sektoreko langileen prestakuntza espezializatua sustatuz, egiten dituzten artisautza lanetan nahiz gaitasun digitalen garapenari loturik, jarduera ekonomikoko sektore guztietako ETE-etan izaten ari den eraldaketa digitaleko prozesuan sar daitezen laguntzeko.

Deialdiaren helburu nagusia artisautza enpresen elkarteei laguntzea da, Garapen Ekonomikorako kontseilariaren abenduaren 1eko 89E/2017 Foru Agindu bidez onetsitako Nafarroako Artisautzako Lanbideen Zerrendan sartutako artisautza lanbideren batean egindako produktuak sustatzeko, prestatzeko eta merkaturatzeko jarduerak hobetze aldera.

2. oinarria. Aurrekontuko zuzkidura.

Deialdi honen ondoriozko konpromisoei erantzuteko 30.000 euroko kreditua baimendu da, honela zehaztuta, diruz laguntzen ahal diren jarduketa moten arabera:

Kreditu erabilgarria gelditzen bada jarduketa mota bateko eskaera guztiei erantzun ondoan, beste jarduketa motako eskaerei erantzuteko erabiliko da.

3. oinarria. Jarduketa diruz lagungarriak egiteko epea.

Jarduketa diruz lagungarriak 2021eko azaroaren 3tik 2022ko azaroaren 10era bitarte egin, fakturatu eta ordaindu behar dira, bi egun horiek barne.

4. oinarria. Erakunde onuradunak eta erakunde onuradun izatea egiaztatzeko modua.

1. Betebehar orokor hauek betetzen dituzten artisautza enpresen elkarteak izan daitezke onuradun:

1.1. Ez egotea erakunde onuraduna izateko ezarritako debeku egoera batean, jarraikiz Dirulaguntzei buruzko azaroaren 9ko 11/2005 Foru Legearen 13. artikuluari.

Dirulaguntza eskatzeak berekin dakar baimena ematea organo emaileak zuzenean eskura ditzan erakunde eskatzaileak tributu betebeharrak eta Gizarte Segurantzarekikoak egunean dituela frogatzen duten ziurtagiri telematikoak. Interesdunak horri uko egiten badio berariaz eskabidean, berak aurkeztu beharko ditu betebehar horietan egunean dagoela frogatzen duten ziurtagiriak.

1.2. Inolako administrazio zehapen irmorik edo kondena epai irmorik betetzen ez egotea sexu edo genero diskriminaziotzat hartutako lan praktikak egiteagatik edo onartzeagatik, eta ez egotea arrazoi horiek direla-eta ezarritako epai edo zehapen bat betetzeko zain.

2. Gainera, berariazko beharkizun hau bete beharko dute:

Artisautza enpresen elkarteek ordezkaritza izan behar dute Nafarroako Artisautza Kontseiluan, bat etorriz, batetik, Industria eta Teknologia, Merkataritza, Turismo eta Laneko kontseilariak urriaren 17an emandako 109/2002 Foru Aginduarekin, zeinaren bidez Artisautzaren Aholku Kontseiluko kideak izendatu baitziren, eta, bestetik, Nafarroako artisautza sektorea antolatu eta garatzeari buruzko ekainaren 17ko 188/1988 Foru Dekretuarekin.

Beharkizun hori betetzen dela Nafarroako Artisautzaren Kontseiluko idazkariak egiaztatuko du, deialdiaren organo kudeatzaileak hala eskatuta.

3. Arestian adierazitako betekizunak eskabidea aurkezten duten egunean bete behar dituzte eskatzaileek.

5. oinarria. Ekintza diruz lagungarriak eta laguntzaren zenbatekoa.

1. Honako jarduketa hauek dira diruz lagungarriak:

1.1 Artisautza azoken antolaketa, honako baldintza hauek betetzen badituzte:

–Nafarroako toki erakundeetan egitea.

–Gutxienez 10 enpresa erakusketarik parte hartzea.

–Parte hartzen duten enpresek baldintza hauek bete beharko dituzte:

• Artisautza erregistro ofizial batean aitorturik eta izena emanda egotea, eta kasuan kasuko egiaztagiria indarrean edukitzea.
• Egunean izatea Gizarte Segurantzarekiko betebeharrak.
• Alta hartuta egotea Langile Autonomoen Araubide Berezian edo Gizarte Segurantzako Araubide Orokorrean; elkarte antolatzaileak eska litzakeen hileko ordainagiriak aurkeztu beharko dira, kasuan-kasuan.

–Nafarroako Artisautza Enpresen Erregistroan izena emanda dauden enpresei gorde beharko zaie azokan erabilgarri dauden tokien %50 gutxienez. Salbuespen gisa, erakunde antolatzaileak ehuneko txikiagoa onartzen ahalko du, behar bezala justifikatzen badu.

–Dibertsitatea eta aniztasuna sustatu beharko dira parte hartzen duten artisautza lanbideen artean.

–Honako hauek izanen dira parte hartuko duten artisautza lanbideak: ondasun artistikoak eta elikagaiez besteko kontsumo ondasunak sortu, ekoitzi, eraldatu, konpondu eta zaharberritzeko artisautza jarduera bat egiten duten enpresek gauzatzen dituztenak.

–Azokak bi egun iraun beharko du gutxienez. Goiz eta arratsalde hartuko da egun oso gisa, eta goiz edo arratsalde egun erdi gisa.

–Elkarte antolatzaileak azokari dagokion informazioa zabaldu eta igorri behar die Nafarroako Artisautza Enpresen Erregistroan izena emanda dauden enpresa guztiei. Diruz lagundutako jarduketak egin direla justifikatzean frogatu beharko da betekizun hori bete dela.

–Elkarte antolatzaileak inkesta bat eman beharko die azokan parte hartzen duten enpresei, haien balorazioaren berri edukitzeko.

–Elkarte antolatzaileak jarduketa egitean indarrean dauden segurtasuneko araudi, protokolo eta osasun neurri guztiak bete beharko ditu.

–Azokan parte hartuko duten enpresak aukeratzeko, objektibotasuna eta gardentasuna izanen dira irizpide, eta hori horrela, produktuen kalitatea, erakustokiaren itxura, eskarmentua, lan-ibilbidea eta antzeko beste alderdi batzuk baloratu ahal izanen dira.

1.2. Prestakuntza ikastaroen antolaketa.

Zehazki, honako ikastaro hauen antolaketa izanen da diruz lagungarria:

–Prestakuntza eta trebakuntza teknikoko ikastaroak, Nafarroako artisautzako lanbideen errepertorioan aipatzen diren lanbideetako baten hobekuntza profesionala helburu dutenak; baimendutako zentro ofizialek edo horretarako kualifikatutako enpresa edo profesionalek antolatu edo eman beharko dituzte, eta lagundu beharko dute artisau lanetan aritzeko lanbide gaitasunak hobetzen.

–Trebakuntza digitalerako prestakuntza ikastaroak, beharrezkoak direnak informazioaren eta komunikazioaren teknologiako tresna berriak erabiltzeko; esaterako, xede dutenak sare sozialak erabiltzea, online salmenta edo online marketina egitea, etab.

Prestakuntza ikastaroek baldintza hauek bete behar dituzte:

–Gutxienez 4 pertsona bertaratuko dira.

–Ikastaroaren iraupena 3 ordukoa izanen da, gutxienez.

–Ikastaroak Nafarroako Artisautza Erregistroan izena emanda dauden artisautza enpresei zuzenduak izanen dira, eta haiei guztiei eskainiko zaizkie; izan ere, ezin zaizkie elkarte antolatzailea osatzen duten enpresei soilik eskaini.

–Elkarte antolatzaileak hainbat baldintza ezartzen ahalko ditu ikastaroetan parte hartzeko, elkarteko kide ez diren enpresentzat.

–Ikastaroetan parte hartzen duten enpresa guztiek Nafarroako Artisautza Enpresen Erregistroan izena emanda egon behar dute, eta hori egiaztatzen duen txartela indarrean izan behar dute prestakuntza ikastaroa egiten duten bitartean.

2. Gastu diruz lagungarriak.

2.1. Azokak antolatzeari dagokionez:

Diruz laguntzen ahalko dira ezinbesteko kanpo gastuak, zuzeneko lotura dutenak artisautza azokak antolatzeko behar diren ekintzekin.

Halakotzat hartuko dira antolaketari, muntaketari, komunikazioari edo publizitateari dagozkien gastuak, eta, zehazki, honako hauek:

–Azokaren antolaketari, koordinazioari eta informazioaren berri emateari lotutako gastuak, parte hartzen duten enpresak hautatzekoak eta azoka garatzeko administrazio publikoekin zein entitate pribatuekin egin beharreko jarduketa guztien kontratazio-lanek eragindako gastuak. Kontzeptu honen kontura onartuko da, gehienez ere, aurkeztu eta gauzatutako azken aurrekontuan ageri den kopuruaren %20, gainerako kontzeptu diruz lagungarrien gainetik, eta ez da goranzko desbideratzerik onartuko hasieran aurkeztuko aurrekontuaren eta azkenean gauzatutakoaren artean.

–Komunikazio eta publizitate gastuak, sustapen materialen diseinua barne.

–Azokaren dinamizazioa, parte hartzeko lantegiak, erakustaldiak, musika animazioa eta abar.

–Beharrezko instalazioak alokatzea, eta horiek muntatu eta desmuntatzea.

–Bide publikoa okupatzeagatik ordaindu beharreko tasak, edo azoka egiteko beharrezko diren beste batzuk.

–Elektrizitate kontsumoa.

–Azokak hartzen duen eremuaren garbiketa-lanak.

–Segurtasuna instalazioetan.

–Erakustoki, saltoki edo standetan erabilitako olana, eguzki-oihal, binilo edo antzekoak inprimatu eta errotulatzeko gastuak; zehazki, diseinuari, ekoizpenari eta inprimatze prozesuei edo antzekoei dagozkien gastuak onartuko dira, bai eta lan horiek egiteko euskarria edo materiala erostekoak ere.

–Instalazioak zaintzeko eta mantentzeko lanak.

–Azoketarako beharrezkoak eta esklusiboak diren aseguruak kontratatzea.

–Balio erantsiaren gaineko zerga, erakunde onuradunak berreskuratu edo konpentsatu ezin duenean soilik.

2.2. –Prestakuntza ikastaroak antolatzeari dagokionez:

Diruz laguntzen ahalko dira prestakuntza ikastaroak antolatzeko beharrezkoak diren kanpo gastuak; zehazki, honako hauek:

–Irakasleen, prestatzaileen eta hizlarien ordainsariak.

–Irakasleen joan-etorria, ostatatzea eta mantenua.

–Jardueraren sustapena, publizitatea eta kanpo hedapena.

–Ikastaroak gauzatzeko erabiltzen diren ondasun kontsumigarriak.

–Jardueretan erabiltzen diren ikasmateriala eta bestelako materialak editatu edo erostea.

–Prestakuntzan erabilitako ikasgela, lantegi eta gainerako eremuen alokairua.

–Balio erantsiaren gaineko zerga, erakunde onuradunak berreskuratu edo konpentsatu ezin duenean soilik.

3. Diruz lagungarriak ez diren gastuak.

Honako gastu hauek ez dira diruz lagungarriak:

–Erakunde antolatzaileko langileei dagozkien gastuak eta erakunde eskatzailearen ohiko funtzionamendutik eratorritakoak (fotokopiak, posta, telefonoa, bulegoko materiala eta abar).

–Sariak eta zozketak.

–Otorduak, aperitiboak edo antzekoak.

–Boluntarioekin lotutako gastuak.

–Ekitaldi instituzionalekin lotutako gastuak.

–Ekitaldira gonbidatutako pertsonen gastuak, salbu ekitaldiaren jarduera, lantegi edo erakustaldi baterako gonbidatzen badira.

–Opariak.

–Erakunde antolatzaileari lotutako enpresen edo pertsonen bidez egindako gastuak, 7. oinarrian ezarritakoaren arabera berariaz onargarriak direnak salbu.

–Higiezinen edo lokalen amortizatze eta mantentze lanen gastuak.

4. Dirulaguntzaren zenbatekoa kalkulatzeko, ondotik zehazten diren ehunekoak aplikatu behar dira gastu diruz lagungarriaren gainean, betiere gehieneko zenbateko hauek aintzat hartuta, jarduketa motaren arabera:

6. oinarria. Eskaerak aurkezteko epea eta modua.

1. Eskaerak aurkezteko epea.

Deialdia Nafarroako Aldizkari Ofizialean argitaratu eta biharamunean hasiko da, eta 2022ko martxoaren 1ean amaituko, egun hori barne.

2. Eskaerak aurkezteko modua.

Eskaerak telematika bidez aurkeztuko dira ezinbestean, Nafarroako Gobernuaren Interneteko atariandagoen zerbitzuen katalogoaren berariazko fitxaren bidez (https://www.navarra.es/eu/comercio-y-artesania/ayudas-y-subvenciones, aurrerantzean, laguntzaren fitxa); fitxa horretan, Nafarroako Foru Komunitateko Administrazioko Erregistro Orokor Elektronikoan sartzeko lotura izanen da.

3. Eskaerak laguntzaren fitxan ageri den inprimakia erabiliz eginen dira, eta Turismo, Merkataritza eta Kontsumo Zuzendaritza Nagusiari zuzenduta.

4. Laguntzak eskatzeko erantsi behar den dokumentazioa eskaneaturik aurkeztu behar da, agiri bereizietan eta behar bezala identifikatuetan. Hauxe da:

4.1. Erakunde eskatzailearen gaineko dokumentazioa.

a) Erantzukizunpeko adierazpen bat, frogatzeko 4 oinarrian eskatutako baldintza orokorrak betetzen direla.

b) Erantzukizunpeko adierazpen bat, jasotako beste dirulaguntza batzuei eta de minimis laguntzei buruzkoa (13. oinarrian aipatzen dira).

Eskabide inprimakiak bi erantzukizunpeko adierazpen horiek ditu.

c) Transferentzia bidez kobratzeko eskabidea, Ekonomia eta Ogasun Departamentuari zuzendua (Diruzaintza Atala), baldin enpresa eskatzaileak lehenbizikoz kobratzen baditu laguntzak, edo abonatzeko kontua aldatu nahi izanez gero.

4.2. Jarduketa diruz lagungarriei buruzko dokumentazioa.

4.2.1. Artisautza azokak antolatzeko, dokumentazio hau aurkeztu beharko da:

a) Memoria xehatua, honako atal hauei buruzko informazioa jasoko duena:

–Azokaren datak, iraupena, ordutegia, kokapena eta izena.

–Jardueren programa eta dinamizazio jarduketen deskribapena.

–Komunikazio eta sustapen plana.

–Azokan parte hartzeko oinarriak.

–Informazio xehatua, 8.2.1. oinarriko baremoaren 1., 2. eta 3. balorazio irizpideak aplikatu ahal izateko.

b) Hala badagokio, 8.2.1 oinarriko 4. irizpidea aplikatzeko eskatzen den toki erakundearen ziurtagiria.

c) Aurrekontu xehatua, diru-sarrerak eta gastuak zehatz-mehatz deskribatuta.

Aurreikusitako gastuak: Aurrekontuak edo proformako fakturak aurkeztu beharko dira, egin beharreko jarduketenak; ez dira inoiz onartuko eskatzailearen uste edo balorazioetan oinarritzen diren gastu zenbatespenak.

Aurreikusitako diru-sarrerak: Azokaren diru-sarreren eta finantzaketaren aurreikuspena aurkeztu beharko da.

4.2.2. Prestakuntza ikastaroak antolatzeko, dokumentazio hau aurkeztu beharko da:

Prestakuntza ikastaro bakoitzeko, memoria xehatu bat aurkeztuko da, eta bertan, honako atal hauei buruzko informazioa jasoko da:

–Ikastaroaren izenburua.

–Programa, deskribapena, edukiak eta aurreikusitako helburuak.

–Iraupena.

–Erabili beharreko metodologia eta prestakuntzak duen erabilgarritasunaren justifikazioa, artisautza produktua egiteko prozesuari edo enpresako arloren baten eraldaketa digitalari loturik.

–Bertaratutako kideen kopurua.

–Irakasleak edo hizlariak, eta haien lanbide-prestakuntza.

–Ikastaroa gauzatzeko behar diren baliabide materialak.

–Gastuen deskribapen xehakatua.

–Diru-sarreren deskribapen xehatua.

–Informazio xehatua, 8.2.2. oinarrian ezarritako baremoaren balorazio irizpide guztiak aplikatu ahal izateko.

4.2.3. Gastu diruz lagungarriaren zenbatekoa 12.000 eurotik gorakoa bada (aholkularitzako edo laguntza enpresek ekipamendu ondasunen hornidura edo zerbitzu emate bat egiten duten kasuetan), eskatzaileak frogatu beharko du hornitzailea efizientzia eta ekonomia irizpideei jarraituz aukeratu dela. Horretarako, gutxienez hiru eskaintza aurkeztu, eta aukeratutako eskaintza hautatu izana justifikatu beharko du eskaera inprimakiko «Hornitzailea aukeratzeko justifikazioa» apartatuan.

Eskatzaileak ez dira beharturik egonen hiru eskaintzak aurkeztera, baldin eta gastu diruz lagungarrien ezaugarri bereziengatik merkatuan behar adina hornitzaile edo zerbitzu-emaile ez badaude edo dirulaguntza eskatu baino lehen egin bada gastua. Edonola ere, alderdi horiek aipatu inprimakian frogatu beharko dira.

Eskaintza merkeena hautatzen ez bada, eta, laguntza kudeatzen duen organoaren ustez, justifikazioa nahikoa ez bada, eskaintza merkeenaren zenbatekoa baizik ez da diruz lagunduko.

5. Baremoen balorazio irizpideak aplikatzeko behar diren agiriak.

Zortzigarren oinarrian ezarritako balorazio irizpideak aplikatzen direla justifikatzeko egiaztagiriak zehaztuta daude oinarri horretan, eta nahitaez aurkeztu beharko dira dirulaguntza eskaerarekin batera; egiaztagiri horiek eskaerak aurkezteko epetik kanpo aurkezten badira ez dira baloratuko.

6. Eskaerak betebehar horiek betetzen ez baditu edo osorik ez badago, eskatzaileari eskatuko zaio 10 egun balioduneko epean zuzentzeko, eta ohartaraziko zaio ezen, hala egin ezean, eskaera bertan behera uzten duela ulertuko dela eta espedientea artxibatzeko ebazpena emanen dela.

7. oinarria. Azpikontratazioa eta lotutako enpresekiko harremana.

1. Dirulaguntzaren xedeko gastuaren zenbatekoaren %50era arteko azpikontratazioa egin daiteke. Ondorio horietarako, ulertuko da azpikontratazioa egiten dela erakunde onuradun batek hirugarrenekin hitzartzen duenean diruz lagundutako jarduketa osoa edo haren zati bat gauzatzea, nahiz eta berak egiten ahal dituen jarduerak izan, horretarako baliabideak dituelako.

Ezin izanen da azpikontratatu, inola ere ez, diruz lagundutako jardueraren kostua garestitzen duten eta haren edukiari baliorik eransten ez dioten jarduketarik.

2. Ez da inola ere onartuko erakunde onuradunak itunak egitea diruz lagundutako jardueren exekuzioa uzteko, osorik edo partez, berarekin lotura duten pertsonen edo entitateen esku, salbu eta inguruabar hauek gertatzen badira:

–Kontratazioa merkatuko baldintza normaletan egitea. Hori justifikatzeko, beste bi eskaintza aurkeztu beharko dira.

–Aurretik, dirulaguntza ematen duen organoaren baimena lortzea. Horretarako, laguntza eskaeran inguruabar hori adierazi beharko da.

–Azokarako aurreikusitako gastu osoaren %20 ez gainditzea.

–Ez da onartuko kostuak garestitzea industria mozkina aplikatzeagatik edo beste arrazoi batzuengatik.

–Apartatu honetan xedatutakoaren ondorioetarako, “lotutako enpresa” izanen dira Dirulaguntzei buruzko Lege Orokorraren Erregelamenduaren 68.2 artikuluan ezarritako loturaren bat dutenak (erregelamendua uztailaren 21eko 887/2006 Errege Dekretuaren bidez onetsi zen).

Azokako dinamizazio edo erakustaldi jarduketen gastuak salbuesten ahalko dira, baldin eta aldez aurretik horren berri ematen bazaio organo kudeatzaileari eta haren oniritzia jasotzen bada.

8. oinarria. Dirulaguntzak emateko irizpideak.

1. Laguntza hauek norgehiagokako prozedura erabiliz emanen dira.

Aurkeztutako eskabideak diruz lagungarria den jarduketa motaren arabera sailkatuko dira lehenengo, eta gero, mota horietako bakoitzean aurkeztutako eskabideak konparatuko dira, horien artean lehentasun hurrenkera bat ezartzeko, oinarri honetan ezarritako balorazio irizpideen arabera.

Laguntzen zenbatekoa kalkulatzeko, balorazio handiena eskuratzen duten eskaerei 5. oinarrian ezarritako laguntza-intentsitatea aplikatuko zaie, jarduketa mota bakoitzerako aurrekontuan erabilgarri dagoen kreditua agortu arte.

Aurrekontuetan behar adina diru ez egoteagatik kontuan hartzen ez diren eskaerak ezetsitzat joko dira. Hala ere, eskatzaileren bati ezin bazaio osorik eman dagokion laguntza, kreditu aski ez dagoelako, 10 eguneko epea emanen zaio adierazteko ados dagoela dirulaguntza txikiagoa jasotzearekin. Berariaz uko eginez gero, hurrengo eskatzailearengana joko da, lehentasun hurrenkerari jarraikiz.

2. Diruz lagungarria den jarduera mota bakoitzaren barruan dirulaguntza emateko lehentasun hurrenkera ezartzeko, jarraian adierazitako baremoak aplikatuko dira.

2.1. Artisautza azoken baremoa.

a) Balorazio irizpideak.

b) Balorazio irizpideak aplikatzeko aurkeztu behar diren agiriak.

Azokaren memoriaren dokumentuak 1., 2. eta 3. irizpideak aplikatzeko beharrezkoa den informazioa jaso beharko du, eta 4. irizpidea egiaztatzeko, toki erakundeko Idazkaritzak emandako ziurtagiri bat aurkeztuko da, honako hauek zehaztu eta egiaztatuko dituena: azokan zertan parte hartuko duen, azokarekin duen konpromiso maila, toki erakundeak azokaren garapena bultzatzeko eginen dituen jarduketak eta, hala badagokio, azokara bideratuko duen zenbateko ekonomikoa.

c) Puntu berdinketa izanez gero, irizpide hauek aplikatuko dira bata bestearen atzetik:

–Azoka eginen den eguna, lehenengo egiten direnei lehentasuna emanez.

–Erakunde eskatzaileari lotutako enpresen kopurua, lehentasuna emanez halako enpresa gehien dituenari, betiere deialdia Nafarroako Aldizkari Ofizialean argitaratzen den egunean Nafarroako Artisautza Enpresen Erregistroan behar bezala izena emanda badaude. Horretarako, beharrezkoa izanez gero, lotutako enpresen kopuruari buruzko erantzukizunpeko adierazpena eskatuko da, eta enpresa horien guztien zerrenda.

2.2. Prestakuntza ikastaroen baremoa.

a) Balorazio irizpideak.

b) Balorazio irizpideak aplikatzeko aurkeztu behar diren agiriak.

Prestakuntza ikastaroaren memoriari dagokion dokumentuak lehen aipatutako irizpideak aplikatzeko beharrezkoa den informazioa jaso beharko du.

c) Puntu berdinketa izanez gero, irizpide hauek aplikatuko dira bata bestearen atzetik:

–Lehentasuna emanen zaie eskabidea aurkezten den egunean aurreratuen dauden ekintzei.

–Lehentasuna emanen zaie 3., 1. eta 2. irizpideetan puntu gehien lortu duten eskabideei, hurrenez hurren.

9. oinarria. Laguntzak emateko prozedura.

1. Laguntzak kudeatzen dituen organoak, hots, Turismoa eta Merkataritza Antolatu eta Sustatzeko Zerbitzuak, aurreko oinarrian ezarritako balorazio irizpideei jarraituz ebaluatuko ditu eskaerak, eta organo eskudunari ebazpen proposamena igorriko dio, non adieraziko baita erakunde onuradunek dirulaguntza lortzeko betebehar guztiak betetzen dituztela.

2. Dirulaguntzak emateari buruz ebazteko eskumena Turismo, Merkataritza eta Kontsumoko zuzendari nagusiari dagokio.

Ebazpenean honako hauek jasoko dira gutxienez:

a) Onuradunen zerrenda jarduketa bakoitzeko, 8. oinarriaren arabera lortutako puntuazioaren hurrenkeran, eta laguntzaren zenbatekoa.

b) Ezetsi beharreko eskaeren zerrenda, arrazoiak emanik. Haien artean, aurrekontuko baliabideen mugengatik baztertu direnak ere jasoko dira.

Ebazpena gehienez ere hiru hilabeteko epean eman eta jakinaraziko da, eskaerak aurkezteko epea bukatzen denetik hasita.

Ezarritako gehieneko epea bukatzen bada berariazko ebazpenik eman eta jakinarazi gabe, eskaerak administrazio isiltasunez ezetsitzat jotzen ahalko dira. Hala ere, organo eskuduna behartua dago laguntzak onartu edo ukatzeko berariazko ebazpena eman eta jakinaraztera, oinarri hauetan xedatutakoari jarraikiz.

Dirulaguntzak emateko edo ukatzeko ebazpenen aurka, esanbidezkoak edo isilbidezkoak izan, enpresa eskatzaileek zilegi izanen dute gora jotzeko errekurtsoa jartzea, Garapen Ekonomiko eta Enpresarialeko kontseilariari zuzendua, administrazio prozedura erkideari buruzko legerian xedatutakoari jarraikiz.

10. oinarria. Jarduketen justifikazioa.

1. Justifikazioa aurkezteko epea.

Edozein unetan aurkeztuko da egindako jarduketen justifikazioa, dirulaguntza ematen duen ebazpena jakinarazi ondoren, eta, beranduenez, 2022ko azaroaren 10ean, egun hori barne.

Bi justifikazio partzial aurkezten ahalko dira diruz lagungarria den aldian egindako jarduketengatik, edo justifikazio bakar bat.

2. Justifikazioa aurkezteko modua.

Justifikazioa telematikoki aurkeztuko da, laguntzaren fitxan eskuragarri dagoen berariazko inprimakia erabiliz. Fitxa horretan, Nafarroako Foru Komunitateko Administrazioaren dirulaguntzak justifikatzeko erregistrorako esteka bat egonen da, eta Turismo, Merkataritza eta Kontsumo Zuzendaritza Nagusira bideratuko da.

3. Egindako jarduketak justifikatzeko agiriak eskaneatuta aurkeztu beharko dira, dokumentu bereizietan eta behar bezala identifikatuta.

a) Artisautza azoken kasuan:

–Amaierako memoria, deskribatu beharko dituena egindako jarduketak eta hasierako proiektuaren aldean izandako desbideratzeak; halaber, elkarte antolatzaileak egindako amaierako balorazio bat jaso beharko du.

–Erabilitako hautapen prozesuaren memoria: artisautza enpresa eta artisau eskatzaileen zerrenda, horietatik onartu eta baztertutakoak, eta azken hautapen horren motibazioa.

–Parte hartu duten enpresen balorazio-inkestak.

b) Prestakuntza ikastaroen kasuan:

–Egindako ikastaro bakoitzaren gauzatze eta ebaluazio memoria, informazio zehatza ematen duena 6. oinarri arautzailean eskatutako alderdi guztiei buruz.

–Bertaratuen eta dagozkien artisautza lantegien zerrenda, eta, hala badagokio, kide diren artisauen elkartea.

c) Fakturen zerrenda, laguntzaren fitxan ezarritako ereduaren araberakoa, Excel formatuan.

d) Diruz lagundutako jarduera guztiei dagozkien fakturen kopia; fakturak fakturazio betebeharrak arautzen dituen erregelamenduaren araberakoak izanen dira, eta, betiere, dirulaguntzaren erakunde onuradunaren izenean jaulki beharko dira.

e) Diruz lagundutako jarduketak ordaindu izana justifikatzeko banku agiriak. Eskudirutan egindako ordainketak edo hartze-agiriak ez dira onartuko.

f) Diruz lagundutako ikastaro bakoitzarekin lotura duen sustapeneko, publizitateko eta komunikazioko material guztiaren ale bat, irrati iragarkiak, liburuxkak, bestelako iragarkiak, webguneetan txertatuta dagoen informaziorako loturak, eta antzekoak.

g) Jarduketek dirulaguntza jaso dutela jakinarazteko publizitate betebeharrak (12. oinarrian ezarritakoak) bete izanaren froga grafikoa.

h) Jarduketa bakoitzerako lortutako diru-sarreren eta dirulaguntzen aitorpena. Zehazki, azokan parte hartu duten enpresek ordaindutako inskripzio kuoten, toki erakundeen dirulaguntzen eta bestelako diru-sarrera edo babesletzaren bidez lortutako diru-sarrerak zehaztuko dira; prestakuntza ikastaroak antolatuz gero, parte-hartzaileen inskripzio kuoten bidez lortutako diru-sarrerak adieraziko dira.

11. oinarria. Dirulaguntzaren ordainketa.

Frogagiriak aztertuta, Turismoa eta Merkataritza Antolatu eta Sustatzeko Zerbitzuak ordainketa egiteko ebazpenaren proposamena igorriko dio Turismo, Merkataritza eta Kontsumo Zuzendaritza Nagusiari, eta, horrekin batera, onuradunek dirulaguntza kobratzeko eskubidea ematen duten betebehar guztiak betetzen dituztela frogatzen duen txostena.

Ordainketa bakarra edo bi ordainketa eginen dira, elkarte onuradunak aurkeztutako justifikazioen arabera, eta 2022ko abenduaren 31 baino lehen emanen dira betiere.

12. oinarria. Onuradunen betebeharrak eta horiek ez betetzearen ondorioak.

1. Dirulaguntzen onuradun diren erakundeek betebehar hauek izanen dituzte:

a) Dirulaguntzaren esleipena jakinarazi eta hilabeteko epean, telematikoki aurkeztea dirulaguntzen onuradunen gardentasun betebeharrari buruzko adierazpena, irailaren 11ko 59/2013 Foru Dekretuan arautua, laguntzen fitxan eskura dagoen ereduaren araberakoa.

b) Diruz lagundutako jarduketak oinarri hauetan ezarritako epeetan egin, fakturatu, ordaindu eta justifikatzea.

c) Laguntzak kudeatzen dituen organoari jakinaraztea emandako dirulaguntzari uko egiten zaiola, baldin eta diruz lagundutako jarduketaren bat ez bada gauzatu behar diruz lagungarria den aldian.

d) Diruz lagundutako ekintzetan egin gogo diren funtsezko aldaketen berri ematea Turismoa eta Merkataritza Antolatu eta Sustatzeko Zerbitzuari, haiek gauzatu baino lehen. Zerbitzu horrek baimendu beharko du edozein aldaketa garrantzitsu, eta eskatzen zaizkion aldaketak baimenduko ditu baldin eta behar bezala justifikatuta badaude eta bermatzen bada betetzen direla bai dirulaguntzaren xedea, bai diruz laguntzen diren ekintzen helburuak.

e) Dirulaguntza jasotzen duen ekintzaren gaineko informazio eta publizitate guztietan (irratiko iragarkiak edo aurkezpenak barne) Nafarroako Gobernuaren dirulaguntza duela adierazi beharko da. Publizitate euskarri guztietan “Nafarroako Gobernuak diruz lagundutako jarduketa” aipamena sartu beharko da.

f) Ez da erabiliko emakumeak diskriminatzen dituen irudirik eta mezurik jarduketetan, publizitate euskarrietan, webguneetan, online marketinean eta diruz lagundutako jarduerak zabaltzeko materialetan; emakumeen eta gizonen berdintasuna eta rolen pluraltasuna sustatuko da, eta hizkera inklusiboa erabiliko da. Halaber, ez da hizkera sexistarik erabiliko diruz lagundutako jardueraren gainean prestatzen den dokumentazio guztian.

2. Oinarri arautzaile hauetan edo Dirulaguntzei buruzko Foru Legean ezarritako betebeharren bat bete ezean, onartutako dirulaguntza jasotzeko eskubidea galtzen ahalko da, edo, hala badagokio, diru hori itzuli beharko da, foru lege horren 35. artikuluan xedatutakoarekin bat.

Halaber, aurreko betebeharretako bat hein batean betetzen ez bada, berriz ere zehazten ahalko da ordaindu beharreko dirulaguntzaren zenbatekoa, proportzionaltasun printzipioari jarraikiz, edo, zein den kasua, dagokion zenbatekoa itzuli beharko da.

Zehazki:

a) 12.1.a) oinarrian ezarritako gardentasun betebeharra duten onuradunek 59/2013 Foru Dekretuaren 4.1 artikuluan eskatutako informazioa aurkezteko betebeharrari dagokionez:

–Informazioa epez kanpo aurkezten badu, baina 2022ko azaroaren 10era bitarte (egun hori barne), ordaindu beharreko dirulaguntza %10 murriztuko da, eta, aurkeztu ezean, dirulaguntza kobratzeko eskubidea galdu duela deklaratuko da.

–Onuradunak informazioa emateko betebehar hori betetzen ez badu, ez zaio emandako dirulaguntza ordainduko, eta dirulaguntza kobratzeko eskubidea galdu duela deklaratuko da.

b) Egindako jarduketen justifikazioa aurkezten bada 2022ko azaroaren 10etik aurrera (egun hori barne):

–2022ko azaroaren 18a baino lehen justifikatzen bada (egun hori barne), ordaindu beharreko guztizko dirulaguntza %10 gutxituko da.

–2022ko azaroaren 18tik aurrera aurkezten bada, galduko da jarduketa horietarako eman zen dirulaguntza kobratzeko eskubidea.

c) Dirulaguntza zer jarduketetarako eman eta horiek aurreikusitako prezioan baino merkeago gauzatzen badira, eta oinarri honen 1.c) apartatuan ezarritako komunikazioa egin ezean, dirulaguntza honela gutxituko da:

–Diruz lagundutako jarduketaren %50etik %75era bitarteko prezioan egiten bada, azken justifikazioren araberako dirulaguntza %50 murriztuko da.

–Diruz lagundutako jarduketaren %50etik beherako prezioan egiten bada, azken justifikazioaren araberako dirulaguntza kobratzeko eskubidea galdu dela deklaratuko da.

d) Dirulaguntzaren xedeko jarduketetan ez badira betetzen publizitate betebeharrak, ez da onartuko publizitate-euskarri horiei dagokion gasturik.

e) Azoka edo prestakuntza ikastaro batean ez bada aipatzen jarduketa horrek Nafarroako Gobernuaren laguntza duela, publizitateari buruzko betebeharra ez dela bete ulertuko da, eta ez da onartuko jarduketa horri dagokion gastu osoa ordurako egin bada, edo, bidezko bada, galdu eginen da azoka edo ikastaro horretarako onartutako dirulaguntza osoa kobratzeko eskubidea.

13. oinarria. Dirulaguntzaren bateragarritasuna eta de minimis laguntzen izaera.

1. Dirulaguntza hauek bateraezinak dira Garapen Ekonomiko eta Enpresarialeko Departamentuak jarduketa beretarako ematen dituen bestelako dirulaguntzekin.

Hala ere, bateragarriak dira helburu berarekin Nafarroako Foru Komunitateko Administrazioko gainerako departamentuek, Espainiako zein atzerriko beste administrazio publiko batzuek edo beste edozein entitate publiko edo pribatuk edota partikularrek ematen dituzten laguntzekin.

Edonola ere, jarduketa bererako jasotzen diren dirulaguntzek ezin izanen dute inolaz ere gainditu gauzatutako jarduketaren kostua, dela dirulaguntza soilaz, dela beste laguntzei, diru-sarrerei edo diruz lagundutako jarduketaren berariazko baliabide propioei batuta, eta erakunde onuradunak ezin izanen du inolako irabazirik eduki.

2. Deialdi honetako dirulaguntzak “de minimis” laguntzak dira, Europako Batzordearen 2013ko abenduaren 18ko 1407/2013 (EB) Erregelamenduan xedatutakoaren arabera. Erregelamendu horren xedea da Europar Batasunaren Funtzionamenduari buruzko Tratatuaren 107. eta 108. artikuluak “de minimis” laguntzei aplikatzeko modua zehaztea (L 352. Europar Batasunaren Aldizkari Ofiziala, 2013ko abenduaren 24koa).

Erregelamendu horrekin bat, enpresa bakar bati hiru zergaldiko edozein alditan emandako “de minimis” laguntza guztien batura ezin da 200.000 eurotik gorakoa izan. Aipatu erregelamenduaren 2.2 artikuluan ezarrita dago enpresa bakarraren definizioa.

Horretarako, interesdunek kasuan kasuko zerga ekitaldian eta aurreko bi zerga ekitaldietan hartutako bestelako de minimis laguntzak aitortu beharko dituzte eskaera egiteko inprimakian.

14. oinarria. Emandako dirulaguntzen publizitatea.

Turismoa eta Merkataritza Antolatu eta Sustatzeko Zerbitzuak jendaurrean jarriko ditu emandako dirulaguntzak Ogasuneko Ministerioaren Dirulaguntzen Datu Base Nazionalaren bitartez (http://www.pap.minhafp.gob.es/bdnstrans/GE/eu/index), honako hauek adierazita: deialdia, laguntza zein aurrekontu kredituri egotzi zaion, onuradunak eta emandako diru kopurua.

Halaber, laguntzaren fitxan argitaratuko dira deialdi honen emaitzak.

15. oinarria. Oinarri arautzaile hauen aurkako errekurtsoa.

Oinarri arautzaile hauen aurka gora jotzeko errekurtsoa jartzen ahal dute interesdunek, Garapen Ekonomiko eta Enpresarialeko kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik zenbatuta.

Iragarkiaren kodea: F2118276