1. NAFARROAKO FORU KOMUNITATEA
1.1. XEDAPEN OROKORRAK
1.1.1. Foru legeak eta legegintzako foru dekretuak
33/2022 FORU LEGEA, azaroaren 28koa, aldatzen duena Pertsona Fisikoen Errentaren gaineko Zergari buruzko testu bategina onesten duen ekainaren 2ko 4/2008 Legegintzako Foru Dekretua.
NAFARROAKO FORU KOMUNITATEKO LEHENDAKARIA NAIZEN HONEK.
Aditzera ematen dut Nafarroako Parlamentuak onetsi duela honako:
FORU LEGEA, ALDATZEN DUENA PERTSONA FISIKOEN ERRENTAREN GAINEKO ZERGARI BURUZKO TESTU BATEGINA ONESTEN DUEN EKAINAREN 2KO 4/2008 LEGEGINTZAKO FORU DEKRETUA.
HITZAURREA
2020ko martxoaren 14an alarma egoera deklaratu zenetik COVID-19ak eragindako osasun krisia kudeatzeko, Nafarroako Foru Komunitateak zenbait salbuespenezko eta premiazko tributu-neurri hartu ditu, aipatu osasun krisiak eragindako kalteak arintze aldera, Hitzarmen Ekonomikoaren arabera aitorturiko tributuen arloko eskumenak baliatuta. Neurri horiek aldaketak eragin dituzte Pertsona Fisikoen Errentaren gaineko Zergaren araubidean, horien helburu nagusia izanik errenta ertain eta baxuen trataera hobetzea.
Erregaien eta elektrizitatearen handizkako merkatuko prezioen igoera, Ukrainako gerraren ondorioz areagotu egin dena, aurrekaririk gabeko gurpil inflazionista eragiten ari da, eta horrek arazoak sortzen dizkie batez ere erosahalmen txikiagoa duten eta egungo krisiak gehien kaltetzen dituen errentei.
Egoera horri aurre egiteko eta prezioen igoerak eta horrek dakarren inflazioak errenta baxuenetan eragiten dituen ondorioak arintzeko xedez, proposatzen da PFEZaren araubidean kuota osoan egiteko aparteko kenkari bat jasotzea, 2022ko zergaldian aplikatuko dena.
Hala, kenkariaren zenbateko finko bat ezartzen da banakako aitorpenentzat, 540 eurokoa, 18.000 eurotik beherako lan etekin garbiak eta/edo enpresa-jardueren ondoriozko etekin garbiak aitortzen dituztenentzat. Zenbateko horretatik aurrera, 35.000 euro arteko lan etekin garbiak edo enpresa-jardueren ondoriozko etekin garbiak aitortzen dituztenentzat muga horretarainoko errentarekiko alderantziz proportzionala den ehuneko bat aplikatuko da. Baterako aitorpenetan, kenkaria 900 eurokoa izanen da 30.000 eurotik beherako lan etekin garbiak eta/edo enpresa-jardueren ondoriozko etekin garbiak aitortzen dituztenentzat, eta zenbateko horretatik aurrerako eta 53.000 eurorainoko errentei muga horretarainoko errentarekiko alderantziz proportzionala den ehuneko bat aplikatuko zaie. Hala ere, kenkaria ez da aplikatuko 4.000 eurotik gorako bestelako errentak jasotzen badituzte.
Kenkaria ez da aplikatuko 2.000 eurotik gorako bestelako errentak jasoz gero.
Hori dela eta, proposatzen da Pertsona Fisikoen Errentaren Gaineko Zergari buruzko testu bategina onesten duen ekainaren 2ko 4/2008 Legegintzako Foru Dekretua aldatzea. Hona testua:
Artikulu bakarra.–Aldatu egiten da Pertsona Fisikoen Errentaren Gaineko Zergari buruzko Testu Bategina onesten duen ekainaren 2ko 4/2008 Legegintzako Foru Dekretua, xedapen gehigarri berri bat erantsiz; honako testu hau izanen du xedapen berriak:
"Hirurogeita seigarren xedapen gehigarria.–2022rako aparteko kenkaria lan etekinak eta/edo enpresa-jardueren ondoriozko etekinak jasotzen dituzten subjektu pasiboentzat.
1. Lan etekinak eta/edo enpresa-jardueren ondoriozko etekinak jasotzen dituen subjektu pasiboak, familia-unitate bateko kide ez bada, honako zenbateko hauek kendu ahalko ditu kuota osotik 2022an:
a) 2022an 18.000 euro edo gutxiagoko lan etekin garbiak eta/edo enpresa-jardueren ondoriozko etekinak jaso dituen subjektu pasiboak: 540 euro.
b) 2022an 18.000 eurotik gorako lan etekin garbiak eta/edo enpresa-jardueren ondoriozko etekinak jaso dituen subjektu pasiboak: 540 euro ken eragiketa honen emaitza: etekin garbi horien zenbatekoa ken 18.000 euro, eta horren emaitza bider 0,032.
1. apartatuan ezarritako kenkaria ezin izanen da aplikatu subjektu pasiboaren gainerako errentak, salbuetsiak barne, 2.000 eurotik gorakoak badira.
2. Lan etekinak eta/edo enpresa-jardueren ondoriozko etekinak jasotzen dituen subjektu pasiboa familia-unitate bateko kide bada, kenkaria aplikatuko da soilik VI. tituluan arauturiko baterako tributazioa aukeratuz gero, eta honela zehaztuko da familia-unitate osoarentzat:
a) Familia-unitateak 2022an 30.000 euro edo gutxiagoko lan etekin garbiak eta/edo enpresa-jardueren ondoriozko etekin garbiak jaso baditu: 900 euro.
b) Familia-unitateak 2022an 30.000 eurotik gorako lan etekin garbiak eta/edo enpresa-jardueren ondoriozko etekin garbiak jaso baditu: 900 euro ken eragiketa honen emaitza: etekin garbi horien zenbatekoa ken 30.000 euro, eta horren emaitza bider 0,039.
2. apartatuan ezarritako kenkaria ezin izanen da aplikatu familia-unitatearen gainerako errentak, salbuetsiak barne, 4.000 eurotik gorakoak badira.
3. Xedapen honetan arauturiko kenkaria egiteko, lan etekin garbiak eta enpresa-jardueren ondoriozko etekin garbiak zehazterakoan aintzat hartuko dira salbuetsitako errentak.
4. Xedapen honetan araututako kenkaria ez da bateragarria izanen Nafarroako Foru Komunitatean Ukrainako gerraren ondorio ekonomiko eta sozialei erantzuteko premiazko neurriak hartzeari buruzko apirilaren 13ko 1/2022 Foru Lege-dekretuaren 26. artikuluan araututako energia-krisiaren ondoriozko inpaktu ekonomikoa arintzeko aparteko kenkariarekin".
AZKEN XEDAPEN BAKARRA
Foru lege honek indarra hartuko du Nafarroako Aldizkari Ofizialean argitara eman eta biharamunean.
Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta Estatuko Aldizkari Ofizialera igor dadila agintzen dut eta herritar eta agintariei bete eta betearaz dezatela manatzen diet.
Iruñean, 2022ko azaroaren 28an.–Nafarroako Foru Komunitateko lehendakaria, María Chivite Navascués.
Iragarkiaren kodea: F2216045
