Iragarkia

208. ALDIZKARIA - 2022ko urriaren 20a

1. NAFARROAKO FORU KOMUNITATEA

1.7. BESTELAKOAK

1801/2022 EBAZPENA, 2022ko irailaren 20koa, Nafarroako Unibertsitate Publikoko errektoreak emana, Nafarroako Unibertsitate Publikoaren Batxilergoko XIII. Eztabaida Lehiaketa egiteko deialdia onetsi eta dagokion gastua baimentzen duena.

Nafarroako Unibertsitate Publikoak kultura sustatzeko eta bultzatzeko garatutako politikaren barnean, eta Nafarroako Unibertsitate Publikoak eta Nafarroako Parlamentuak sinatutako lankidetza-hitzarmenaren emaitza gisa, Unibertsitate Proiekzioko, Kulturako eta Dibulgazioko Errektoreordetzak Nafarroako Unibertsitate Publikoaren Batxilergoko XIII. Eztabaida Lehiaketarako deialdia egitea proposatu du. Nafarroako Foru Komunitatean Batxilergoko ikasketak ematen dituzten ikastetxeek hartuko dute parte lehiaketan.

Aholkularitza Juridikoaren txostena ikusirik.

Ekonomia Gaietarako Zerbitzuaren txostena ikusirik.

Kontu-hartzailetzak aldeko fiskalizazioa eginda.

Unibertsitate Proiekzioko, Kulturako eta Dibulgazioko errektoreordeak proposaturik.

Nafarroako Unibertsitate Publikoaren Estatutuen 40. artikuluaren babesean eman zaizkidan eskumenak erabiliz,

EBAZTEN DUT:

Lehenbizikoa.–Ebazpen honek sortzen duen gastua baimentzea, 4.177,18 euro guztira; gastu horretatik 1.677,18 euro 2022ko gastuen aurrekontuko 30.5200.3065/0610/480.08 partidaren kargura ordainduko dira, sarietarako, eta 2.500 euro 2022ko gastuen aurrekontuko 30.5200.3065/0610/141.09 partidaren kargura, epaimahaikideei ordaintzeko.

Bigarrena.–Batxilergoko XIII. Eztabaida Lehiaketa egiteko deialdia onestea, baita I. eranskinean jaso diren oinarriak ere.

Hirugarrena.–Ebazpen hau aditzera ematea Unibertsitate Proiekzioko, Kulturako eta Dibulgazioko errektoreordeari, kontu-hartzaileari eta Kontabilitate Atalari.

Laugarrena.–Deialdia Nafarroako Unibertsitate Publikoaren baliabide elektronikoetan eta Nafarroako Aldizkari Ofizialean argitaratzea. Era berean, Nafarroan Batxilergoa ematen duten ikastetxeen artean deialdia ahalik eta gehiena hedatzen saiatuko da Unibertsitate Zabalpenaren Atala.

Bosgarrena.–Ebazpen honen aurka interesdunek berraztertzeko errekurtsoa jar dezakete Nafarroako Unibertsitate Publikoko errektorearen aurrean, hilabeteko epean, edo, bestela, administrazioarekiko auzi-errekurtsoa maila bereko Nafarroako Auzitegietan, bi hilabeteko epean, Nafarroako Aldizkari Ofizialean argitaratu eta biharamunetik kontatzen hasita.

Iruñean, 2022ko irailaren 20an.–Errektorea, Ramón Gonzalo García.

I. ERANSKINA

Batxilergoko XIII. Eztabaida Lehiaketarako Deialdiaren Oinarriak (2022-2023 ikasturtea)

Lehenbizikoa.–Deialdiaren xedea.

Deialdi honen helburua da Batxilergoko XIII. Eztabaida Lehiaketa arautzea, baita sariak emateko prozedura ere, publizitate, objektibotasun eta lehiakortasun printzipioen arabera.

Bigarrena.–Gaia eta noiz eginen den.

1. Antolatzaileek 2022ko urriaren 3an emanen dute jakitera zein gai izanen duen Batxilergoko XIII. Eztabaida Lehiaketak. Webgune honetan adieraziko da:

http://www.unavarra.es/cultura/unibertsitateko-eztabaida/batxilergoko-lehiaketa?languageId=100001

2. Batxilergoko XIII. Eztabaida Lehiaketa 2022ko urriaren 14an eta 15ean eginen da. Lehiaketa Nafarroako Unibertsitate Publikoan eta Nafarroako Parlamentuan egiten da, betiere osasun inguruabarrek horretarako aukera ematen badute. Nolanahi ere, Unibertsitate Proiekzioko, Kulturako eta Dibulgazioko errektoreordeak aukera du eztabaidak egiteko beste toki batzuk hautatzeko.

3. Urriaren 7an eta 8an aldez aurretiko prestakuntza-saio bat edo batzuk eginen dira parte hartuko duten taldeei lehiaketari buruz dauzkaten zalantza guztiak argitzeko.

Hirugarrena.–Sariak.

Sari nagusia: tableta elektroniko bat taldeko kide bakoitzarentzat.

Bigarren saria: liburu elektronikoen irakurgailu bat taldeko kide bakoitzarentzat.

Gauzazko sariak dira, eta konturako sarrera bat aplikatu behar zaie, Pertsona Fisikoen Errentaren Gaineko Zergaren Arautegiaren 88. artikuluaren arabera. Ez dago konturako sarrerarik egiteko betebeharrik, baldin eta sarien merkatuaren balioa edo kostua 300 eurotik gorakoa ez bada.

Aktan jasoko den epaimahaiaren balorazioarekin bat etorriz, Unibertsitate Proiekzioko, Kulturako eta Dibulgazioko errektoreordeak sariak emateari buruzko behin betiko ebazpena onetsi eta sariak emanen ditu 2022ko urriaren 15ean, eztabaida guztiak bukatu eta gero.

Laugarrena.–Izen-ematea eta hizkuntza.

1. Lehiaketan parte hartu nahi duten ikastetxeek webgune honetan dagoen inprimakia bete behar dute 2022ko irailaren 30eko 14:30 baino lehen: http://www.unavarra.es/cultura/unibertsitateko-eztabaida/batxilergoko-lehiaketa?languageId=100001

2. NUPek 16 ikastetxe onartuko ditu gehienez gaztelaniazko taldean, eta 4 euskarazkoan. Izena emandako ordenaren arabera hautatuko dira ikastetxeak. Izena ematen duten ikastetxeetako 4rekin gehienez ere, talde bat osatuko da lehiaketa osoa euskaraz egiteko. Euskaraz lehiatzeko 3 edo 4 ikastetxek izena ematen ez badute eta euskarazko talde bat osatzeko modurik ez badago, postu horiek gaztelaniazko lehiaketari gehituko zaizkio.

3. Izena emanez gero, parte-hartzaileek espresuki onartzen dute Batxilergoko XIII. Eztabaida Lehiaketan egiten diren argazkien eta bideoen irudi eskubide guztiak NUPi lagatzea.

Bosgarrena.–Konfidentzialtasuna.

Parte-hartzaileen datuak fitxategi automatizatu batean sartuko dira, eta aurtengo deialdia kudeatzea da fitxategi horren helburu bakarra.

Seigarrena.–Oinarriak onartzea.

"Batxilergoko XIII. Eztabaida Lehiaketa" izenekoan parte hartzeak berarekin dakar oinarriak ezagutu eta onartzea.

Zazpigarrena.–Araudia.

Batxilergoko XIII. Eztabaida Lehiaketaren Araudian ezarritakoaren arabera eginen da eztabaida lehiaketa hau, eta araudi horrek, era berean, G-9 Taldearen Unibertsitateko Eztabaida Ligaren Araudia izanen du oinarri. Azken hori 2014ko azaroaren 10ean onetsi eta 2017ko abenduaren 20an aldatu zen, eta hemen dago kontsultatzeko: http://www.unavarra.es/cultura/unibertsitateko-eztabaida/batxilergoko-lehiaketa?languageId=100001

Zortzigarrena.–Epaimahaia.

Unibertsitate Proiekzioko, Kulturako eta Dibulgazioko errektoreordeak izendatuko ditu epaimahaiko kideak.

Bederatzigarrena - Argitalpena.

Oinarri hauek Nafarroako Unibertsitate Publikoaren bitarteko elektronikoetan eta Nafarroako Aldizkari Ofizialean argitaratuko dira.

Hamargarrena - Errekurtsoak.

Deialdi honen oinarrien aurka, eta deialdi honen ondorioz sariak behin betikoz emateari buruzko ebazpenaren aurka, zilegi da aukerako berraztertze-errekurtsoa jartzea, Nafarroako Unibertsitate Publikoko errektorearen aurrean, hilabeteko epean, edo administrazioarekiko auzi-errekurtsoa maila bereko Nafarroako Auzitegietan, bi hilabeteko epean. Epeok dagokion argitalpena egin eta biharamunetik aurrera hasiko dira kontatzen.

II. ERANSKINA

Batxilergoko XIII. Eztabaida Lehiaketaren Araudia (2022-2023 ikasturtea)

I. TITULUA

Aplikazio eremua

1. artikulua.

Nafarroako Unibertsitate Publikoko Batxilergoko XIII. Eztabaida Lehiaketan aplikatuko da araudi hau.

2. artikulua.

Araudi honek zehatz-mehatz arautu gabeko alderdiak Batxilergoko XIII. Eztabaida Lehiaketako deialdiaren oinarriak izeneko dokumentuan jasoko dira idatziz.

3. artikulua.

Nafarroako Unibertsitate Publikoko Batxilergoko XIII. Eztabaida Lehiaketan parte hartzeak berekin dakar arautegi hau ontzat ematea eta bere arauei men egitea.

II. TITULUA

Parte hartzeko baldintzak

4. artikulua.

Batxilergoko ikasketak ematen dituzten Nafarroako ikastetxeek edukiko dute Batxilergoko XIII. Eztabaida Lehiaketa egiteko deialdian (2022-2023 ikasturtekoan) parte hartzeko aukera. Ikastetxe bakoitzak talde bakar batekin hartuko du parte, eta talde hori 2022-2023 ikasturtean Batxilergoko 2. ikasmailan dauden ikasleek osatuko dute.

III. TITULUA

Gaia eta data

5. artikulua.

Antolatzaileek 2022ko urriaren 3an emanen dute jakitera zein gai izanen duen Batxilergoko XIII. Eztabaida Lehiaketak. Webgune honetan adieraziko da: http://www.unavarra.es/cultura/unibertsitateko-eztabaida/batxilergoko-lehiaketa?languageId=100001

6. artikulua.

2022ko urriaren 14an eta 15ean eginen da Nafarroako Unibertsitate Publikoko Batxilergoko XIII. Eztabaida Lehiaketa.

IV. TITULUA

Antolamendua

7. artikulua. Lehiaketaren Zuzendaritza.

1. Osaera: pertsona bakarreko organoa da, eta Unibertsitateko komunitateko kide bat izan behar da nahitaez.

2. Eginkizunak: batetik, araudi hau behar bezala betetzen dela zaintzea; bestetik, arauak ez betetzeagatik edo jokabide desegokiak izateagatik ezar daitezkeen zigorren berri ematea parte-hartzaileei; eta, azkenik, araudi honetan jasotzen diren zigorrak aplikatzea.

3. Funtzionamendu araudia: lehiaketaren zuzendariak bere eskumeneko erabakiak hartuko ditu Lehiaketa Batzordeari txostenik eskatu beharrik gabe. Azken horrek ebatziko ditu zuzendariaren erabakien kontra aurkezten diren erreklamazioak, halakorik aurkeztu bada.

8. artikulua. Lehiaketa Batzordea.

1. Osaera: lehiaketaren epaileek osatuko dute batzordea, eta lehiaketaren zuzendaria izanen da batzordeburua, zeinak kalitateko botoa izanen baitu berdinketa izanez gero. Eginkizunak: batetik, araudi hau behar bezala betetzen dela zaintzea; bestetik, aurkezten zaizkien erreklamazioak ebaztea, eta aretoko arbitroak ezartzen dituen zigorren aplikazioari buruzko auziak eta lehiaketako gorabeherei buruzko erreklamazioak ebaztea; eta, azkenik, araudi hau interpretatzea eta araudi honetan arautu gabeko gorabeherak konpontzea.

2. Funtzionamendu araudia: batzordeko kideen botoen gehiengoz hartuko dira erabakiak, horien berri eman gabe betiere, eta akta batean jasoko dira, zeina Lehiaketa Batzordeko kide guztiek sinatuko baitute. Erabakien aurka ez da zilegi apelazioa.

9. artikulua. Epaimahaia.

1. Osaera: gutxienez bi epaile eta epaile nagusi bat izanen dira epaimahaiko kideak, eta bakoitia izanen da kasu guztietan kide kopurua. Antolatzaileek gonbidatutako pertsonak eta Unibertsitateko komunitateko kideak izan daitezke epaimahaikide. Epaimahai bat egonen da areto bakoitzean. Epaimahaiak elkarren artean independenteak izanen dira. Epaimahaikideek ez dute loturarik eduki behar baloratzen dituzten taldeekin. Aurtengo eta iazko Batxilergoko Eztabaida Lehiaketako prestatzaileak ezin dira epaile izan prestatu dituzten taldeak lehiatzen direnean.

2. Eginkizunak: oro har, eztabaidak baloratzea eta, bereziki, parte-hartzeak eta interpelazioak, bai eta puntualtasuna eta araudi honetan jasotako gainerako alderdiak ere. Aretoko arbitroak jakinaraziko du talderen batek edo talderen bateko kideak ez dituela eztabaida egiteko arauak bete, baita aretoan gertatu den eta arbitroak ezagutu ez duen edozein oker ere.

3. Funtzionamendu araudia: Epaimahaiko kideen botoen gehiengoz hartuko dira erabakiak, eta bakoitia izanen da kasu guztietan boto kopurua. Epaimahaikide bakoitzak epailearen aktan adierazi behar du bere erabakia, eta eztabaidaren aktan, berriz, organoaren erabakia. Epaile bakoitzaren akta bere izenik gabe argitaratuko da.

10. artikulua. Aretoko arbitrajea

1. Osaera: eztabaidak egiteko aretoetan arbitro lanetan aritzen direnek osatuko dute.

2. Eginkizunak: taldeetako kideak etorri diren edo ez eta puntual iritsi diren edo ez kontrolatzea, aretoan denak ongi funtzionatzen duela egiaztatzea, hizketaldietan kronometroarekin denbora neurtzea, eztabaidetan arauak betetzen ez badira epaimahaikideei zigorrak proposatzea eta jakinaraztea, eta talderen batek edo taldeetako kideren batek arauak betetzen ez baditu edo epaimahaikideak ohartu gabe aretoan irregulartasunen bat gertatzen bada horren berri ematea.

3. Funtzionamendu araudia: aretoko arbitroak bere kabuz hartuko ditu erabakiak, eta zigortzeko modukotzat jotzen duen jokabideaz ohartarazi eta berehala jakinaraziko die epaimahaikideei, ozenki, behar den publizitatea emateko. Berehala jakinaraztea ezinezkoa bada, eztabaida bukatu eta gero ematen ahalko die epaimahaikideei gertatukoaren berri. Bere erabakien aurka zilegi dira errekurtsoak, Lehiaketa Batzordearen aurrean.

V. TITULUA

Dokumentazio ofiziala

11. artikulua.

Epailearen akta: epaimahaikide bakoitzak taldeei ematen dizkien kalifikazioak jasoko dira dokumentu honetan. Araudi honen III. eranskineko ereduari segitu behar dio, eta akta egiten duen epaileak sinatu behar du.

12. artikulua.

Eztabaida akta: epaimahaiaren azken erabakia jasoko da dokumentu honetan, bai eta taldeei aplikatu zaizkien zigorrak eta erantsi beharreko oharrak ere. Epaile nagusiak eta aretoko arbitroak sinatu behar dute. Araudi honen IV. eranskineko ereduari segitu behar dio.

13. artikulua.

Lehiaketaren akta: Sailkapena jasoko da dokumentu honetan. Lehiaketa Zuzendaritzak egin behar du, eta organo horren izenpea edukiko du. Araudi honen V. eranskineko ereduari segitu behar dio.

14. artikulua.

Lehiaketa Batzordearen akta: Lehiaketa Batzordeari aurkeztu zaizkion erreklamazioei buruz zer erabaki hartu dituen jasoko da dokumentu honetan. Batzordekideek egin eta sinatuko dute, eta erreklamazioa daukan orria erantsiko zaio. Lehiaketa Batzordearen aktak araudi honen VI. eranskineko ereduari segituko dio.

15. artikulua.

Lehiaketa-koadroa: zozketa eginen da zein talde lehiatuko diren, zer egunetan, zer ordutan eta non zehazteko. Beraz, datu horiek eta sailkapen-etapei eta finalei dagozkienak jasoko dira lehiaketa-koadroan. Argitaratu eginen da, eta, beharrezkoa izanez gero, espresuki jakinaraziko da.

VI. TITULUA

Taldeak

16. artikulua.

Gutxienez hiru kide eta gehienez bost edukiko ditu talde bakoitzak. Kideetako bat kapitaina izanen da. Bere taldea ordezkatuko du arbitroen eta epaimahaiaren aurrean, eta aukera izanen du mintzatzeko txandetan hitz egiteko eta epaimahaiari kexak aurkezteko. Inor ezin da talde bat baino gehiagotakoa izan.

17. artikulua.

Talde bakoitzak 2 hizlari izendatuko ditu gutxienez ere, eta zozketan suertatu zaien jarreraren alde mintzatuko dira, txanda eskemaren arabera. Eztabaidak irauten duen bitartean, taldeko kideak ezinen dira komunikatu, ez hitzez ez keinuz; oharrak erabiliko dituzte horretarako. Aipatu beharra dago taldeko kideek dagokien eginkizuna alda dezaketela eztabaida batetik bestera.

VII. TITULUA

Eztabaidaren garapena

18. artikulua.

Eztabaida hasi baino minutu batzuk lehenago, zozketa eginen da lehiaketa-koadroa zehazteko. Hona hemen zer fase izanen dituen lehiaketak eta nolako ordenan eginen diren:

1. Aurkezpena taldeen aretoan: eztabaidatu behar duten taldeak erabaki diren orduetan azaldu beharko dira eztabaida egiteko aretoan, eta bertaratu direla jakinaraziko diote aretoko arbitroari. Lehiaketa-koadroan argitaratuko dira norgehiagoka bakoitza hasteko orduak. Eztabaida hasteko orduan, bi taldeak aurkeztu direla eta puntual iritsi direla baieztatuko da.

2. Eztabaidaren aurkezpena: arbitroak labur-labur aurkeztuko ditu gaia, epaimahaikideak eta taldeak zein taldekideak; gero, lehiaketaren zuzendariak adierazi dizkion gauzen berri emanen du; eta, azkenik, taldeetako kapitainei deituko die zozketa egiteko eta, hala, eztabaidetan aldeko edo kontrako jarrera izan behar duten zehazteko.

3. Jarreren zozketa: taldeetako kapitainek jarreren zozketan hartuko dute parte. Aldeko edo kontrako jarrera ausaz esleitzen dela ziurtatuko duen sistema bat erabiliko da zozketa egiteko. Zozketaren emaitzaren arabera zehaztuko da taldeak aretoan non kokatuko diren: aldeko taldea epaimahaiaren ezkerrean eseriko da beti; kontrakoa, aldiz, eskuinean.

4. Eztabaidaren prestakuntza: zozketa egin eta gero, taldeek 4 minutu edukiko dituzte eztabaida prestatzeko.

5. Mintzaldien jakinarazpena: talde bakoitzak idatziz jakinaraziko dio aretoko arbitroari, horretarako ematen den euskarrian, taldeko zein kidek parte hartuko duten eztabaidan, mintzatzeko txandetan. Taldekideen esleipenean profil hauek zehaztu behar dira: kapitaina, hizlariak eta ikertzaileak. Zilegi izanen da eginkizun guztiak aldatzea eztabaida bakoitzean; ez, ordea, eztabaidatzen ari diren bitartean.

6. Kronometroa eztabaidak irauten duen bitartean: aretoko arbitroa kronometratzen hasiko da taldeko kapitaina edo hizlaria mintzatzen hasten diren unean, eta ez du kronometroa geldituko hark bere hitzaldia bukatu arte. Txanda bakoitzak aldez aurretik finkatuta dagoen iraupen jarraitu hau izanen du:

–Sarrera: 4 minutu.

–Lehen gezurtatzea: 5 minutu.

–Bigarren gezurtatzea: 5 minutu.

–Ondorioa: 3 minutu.

7. Materialak eta zerbitzuak: taldeek beharrezkoa jotzen duten materiala erabiltzen ahalko dute beren jarrera defendatzeko, baldin eta lehiaketaren funtzionamendu egokiari traba egiten ez badio, eta dauden instalazioekin bateragarria bada. Arau orokor gisa, erabiltzaileek ezin izanen dute partekatu beren pantaila, eta kameraren bidez erakutsi beharko dituzte egokitzat jotzen dituzten dokumentuak. Hertsiki debekatuta dago komunikazio-sistema elektroniko edo telematikoak erabiltzea eztabaidan, taldea esku hartzeko erabiltzen ari denaz bestelakoak.

8. Mintzaldiak: Txanda bakoitzean taldekide batek baino ez du izanen hitz egiteko aukera: kapitaina, hizlaria. Mintzaldia txanda koadro honen arabera eginen dute:

–Sarrera. Aldeko taldea.

–Sarrera. Aurkako taldea.

–Lehen gezurtatzea. Aldeko taldea.

–Lehen gezurtatzea. Aurkako taldea.

–Bigarren gezurtatzea. Aldeko taldea.

–Bigarren gezurtatzea. Aurkako taldea.

–Ondorioa. Aurkako taldea.

–Ondorioa. Aldeko taldea.

9. Interpelazioak:

a. Ezin da interpelaziorik egin ez sarreretan, ez ondorioetan, ezta gezurtatzeen lehenbiziko minutuan eta azkenekoan ere, etenik gabeko aldi babestutzat hartzen baitira.

b. Mintzatzen ari ez diren taldekideek aukera izanen dute aurkako taldeko kapitainari edo hizlariari hitza eskatu eta galdera bat edo baieztapen bat egiteko.

c. Gehienez ere 15 segundo izanen ditu interperlazio bakoitzeko, eta denbora tarte hori txandaren iraupenari dagokio.

d. Aldi babesturen batean norbaitek hitza eskatzen badu (eskua altxatzen badu), zigor bat jarriko zaio automatikoki.

e. Hizketan ari ez den taldekide batek galdera bat egiteko zain dagoenean ikusiko balu denbora azkeneko minutuan sartzen dela, hitza eskatzeari utzi beharko dio (eskua jaitsi beharko du) azkeneko minutu babestuan, eta ez zaio zigorrik jarriko.

f. Hizlari batek azkeneko minutu babestua hasi baino segundo batzuk lehenago erabakitzen badu hitza ematea, galdera egin nahi duenak 15 segundo izanen ditu gehienez galdera egiteko, eta ez zaio zigorrik jarriko.

g. Antolatzaileak aretoak ematen dituen aukeren arabera erabaki eta jakinaraziko du nola eskatu behar zaion hitza aurkako taldeari bere mintzatzeko txandan dagoenean.

10. Erreklamazioak: epaimahaiak, interpelazio zuzenean, edo taldeko kapitainak, hitza eskatuz (eskua altxatuz) aretoko arbitroari, aukera izanen dute parte-hartzaileei eskatzeko egiazta ditzatela beren mintzatzeko txandetan eta interpelazioetan emandako datuak. Datua aipatu den txanda amaitu eta gero aurkeztuko da erreklamazio hori, edo, bestela, eztabaida bukatu eta ondorengo 10 minutuetan. Erreklamazioa egin eta gero, erantzun behar duen taldeak 10 minutu edukiko ditu datua egiazkoa dela frogatzeko epaimahaiaren aurrean, eta aretoan dauden gainerakoekin partekatu beharko du datua.

11. Epaimahaiaren aparteko bilera, deliberatzeko: epaimahaiak aparteko bilera batean deliberatuko du, eztabaida bukatu eta gero, horretarako ezarria den denboran. Epaimahaiko kide bakoitzak bere kabuz eta besteen iritzia jakin gabe beteko du deliberazio akta. Aktak eta emaitzen sailkapena jendaurrean jarriko dira. Kontsultatzeko moduan jartzen diren aktetan ez da agertuko zein epailek bete dituen, eta artxibatu eginen dira, behar izanez gero kontsultatzeko.

12. Epaimahaiko kideen botoen gehiengoa lortzen duen taldeak irabaziko du eztabaida-lehiaketa.

13. Emaitzen jakinarazpena: epaimahaiak deliberatu eta gero, epaimahaiaren emaitza orokorra argitaratuko da eztabaidaren webgunean.

VIII. TITULUA

Zigorrak

19. artikulua. Abisuak.

1. Abisu batek 0,5 puntu kenduko dizkio taldeari eztabaida horretan izan duen batez besteko azken kalifikaziotik. Honako ekintza hauek dira abisuak jasotzeko arrazoi:

a. Mintzatzeko ezarri den denbora baino geroago bukatzea mintzaldia: 5etik gora segundo geroago.

b. Mintzatzeko ezarri den denbora baino lehenago bukatzea mintzaldia: 15 eta 30 segundo bitarte lehenago.

c. Babestutako denboran interpelazioak egitea, edo interpelazioek 16 segundo baino gehiago eta gehienez ere 25 segundo irautea.

d. Taldeko kideek beren artean hitz egitea.

2. Aretoko arbitro aritzen den pertsonari dagokio zigorraren aplikazioa zehaztea, baita zigorra eta hura eragin duen ekintza eztabaidaren aktan jasotzea ere.

20. artikulua. Hutsegite arinak.

1. Hutsegite arin batek 1,5 puntu kenduko dizkio taldeari eztabaida horretan izan duen batez besteko azken kalifikaziotik. Honako ekintza hauek dira hutsegite arinak:

a. Gehienez ere 5 minutuko atzerapenez agertzea, dela talde osoa, dela ezarritako gutxieneko taldekide kopurua.

b. Interpelazioak eginez hizlariari moztea, hitz egiteko txandan egon ez arren.

c. Interpelazioak 25 segundotik gora luzatzea, eta gehienez 45 segundo.

d. Mintzatzeko ezarri den denbora baino lehenago bukatzea: 31 segundo eta minutu bat bitarte lehenago.

2. Aretoko arbitro aritzen den pertsonari dagokio zigorraren aplikazioa zehaztea, baita zigorra eta hura eragin duen ekintza eztabaidaren aktan jasotzea ere.

21. artikulua. Hutsegite larriak.

1. Hutsegite arin batek 3 puntu kenduko dizkio taldeari eztabaida horretan izan duen batez besteko azken kalifikaziotik. Honako ekintza hauek dira hutsegite larriak:

a. 5 minututik 15 minutura bitarteko atzerapenez agertzea, dela talde osoa, dela ezarritako gutxieneko taldekide kopurua.

b. Talde baten izenean hizlari bakar batek hartzea hitza.

c. Mintzatzeko ezarri den denbora baino minutu bat lehenago bukatzea.

d. Interpelazioak 45 segundotik gora luzatzea.

e. Eztabaidan jarrera desegokia izatea aurkako taldearekin, epaimahaiarekin, ikus-entzuleekin edo antolatzaileekin. Hitz iraingarriak erabiltzea mintzaldian edo interpelazioan, edozeini zuzentzen zaizkiola ere.

2. Aretoko arbitro aritzen den pertsonari eta lehiaketaren zuzendaritzari dagokie zigorraren aplikazioa zehaztea, zigorraren aplikazioa zehaztea, baita zigorra eta hura eragin duen ekintza eztabaidaren aktan jasotzea ere.

22. artikulua. Lehiaketatik kanpo uzteko arrazoiak.

1. Parte hartzen ari den talde bat kanporatzen bada, taldea eztabaidatik behin betiko kanporatua geratuko da. Honako ekintza hauek dira taldea kanporatzeko arrazoi:

a. 15 minutu baino gehiagoko atzerapenez agertzea, dela talde osoa, dela ezarritako gutxieneko taldekide kopurua. Kasu honetan, aurkeztu den taldea izanen da eztabaidaren irabazlea, aurkako taldea ez agertzeagatik.

b. Txapelketan behin eta berriz jarrera desegokiak izatea edo hitz eta keinu oldarkorrak erabiltzea, edozeini zuzentzen zaizkiola ere.

2. Aretoko arbitroari dagokio zigorra behin-behinean ezartzea eta lehiaketaren zuzendariari jakinaraztea, zigor hori berrets edo ezets dezan, zuzendariak baitauka kanporatzea betearazteko eskumena.

3. Lehiaketaren zuzendariak zigorrei buruzko erabakien berri emanen die kaltetuei, bai eta haiek ordezkatzen duten taldeari ere, bere arduradunen edo ordezkarien bidez, idatziz nahiz ahoz, egokien jotzen duen moduan.

4. Ezarritako zigorrak eztabaidaren aktan jasoko dira.

IX. TITULUA

Erreklamazioak

23. artikulua.

Erreklamazioak idatziz nahiz ahoz helaraziko zaizkio erabakia hartu duen organoaren nagusi hierarkikoari, eta, beharrezkoa bada, idatzizko berrespena emanen da. Lehiaketa Batzordeari zuzentzen zaizkion erreklamazioak idatziz egin beharko dira, eta araudi honen VII. eranskinean ezartzen den ereduaren arabera aurkeztuko dira.

24. artikulua.

Lehiaketaren gai orokorren bati buruzko erreklamazioak lehiaketaren zuzendariari bidaliko zaizkio, eta hark, beharrezkoa bada, Lehiaketa Batzordeko bilerarako deia eginen du.

X. TITULUA

Puntuazio sistema eta berdinketa hausteko sistema

25. artikulua.

Jarraitu beharreko puntuazio sistemak honako zerrenda honetan jaso diren itemak hartuko ditu kontuan. Item bakoitzak ponderazio jakin bat izanen du, baloratzen duenak eztabaidan duen garrantziaren arabera. Hau izanen da puntuazio sistema:

1. Zure ustez, nor da eztabaidaren irabazlea?: 10 puntu.

2. Sarrerarik onena: 3 puntu.

3. Lehenbiziko gezurtatzerik onena: 3 puntu.

4. Bigarren gezurtatzerik onena: 3 puntu.

5. Ondoriorik onena: 3 puntu.

6. Inprobisazioa, argumentuaren kalitatea eta ebidentzien erabilgarritasuna eta zorroztasuna: 3 puntu.

7. Ideiak modu ordenatu, argi, interesgarri eta errazean adierazteko gaitasuna: 2 puntu.

8. Talde jarrera: 2 puntu.

9. Adierazkortasuna, ikus-kontaktua eta naturaltasuna: 2 puntu.

10. Tokian, kanpo baliabideekin eta aurkakoaren aurrean moldatzeko gaitasuna: 2 puntu.

11. Hitzaldiari egokitutako hizkera, arintasuna eta ematen diren erantzunak: 2 puntu.

26. artikulua.

Epaimahaiko kideen botoen gehiengoa lortzen duen taldeak irabaziko du eztabaida-lehiaketa. Epaimahaikideak emandako puntuazio orokorra kalkulatzeko, taldeak item bakoitzean ateratzen dituen puntuak batuko dira. Balioespenaren ondoren puntuaziorik altuena lortu duen taldea joko du irabazletzat epaimahaikide bakoitzak.

27. artikulua.

Lehiaketako puntuazio orokorra honela kalkulatuko da: lehenik, epaimahaikideek talde bakoitzari eman dizkioten puntuak batu behar dira; gero, emaitza zati epaimahaiak dituen kideen kopurua eginen da, eta, azkenik, taldeei ezarri zaizkien zigorrei dagozkien puntuak kenduko zaizkio lortzen den zenbakiari.

28. artikulua.

Talderen batek aurkaririk ez badu, dela beste taldea bertaratu ez delako, dela kanporatu dutelako, aurkeztu den taldea izanen da eztabaida horren irabazlea.

29. artikulua.

Sailkapenerako, honako irizpide hauek hartuko dira kontuan, ordena honetan:

1. Eztabaida erlatibo gehien irabazi duena.

2. Puntu erlatibo gehien erdietsi duena.

3. Epaimahaikideen eskutik aldeko boto erlatibo gehien jaso duena.

4. Puntu gutxien galdu duena (abisuak + arinak + larriak).

5. Bi talderen arteko aurrez aurreko eztabaida irabazi duena.

6. Lehiaketa Batzordearen erabaki arrazoitua.

III. Eranskina.–Epailearen akta.

IV. Eranskina.–Eztabaidaren akta.

V. Eranskina.–Txapelketaren akta.

VI. Eranskina.–Lehiaketa batzordearen ebazpena.

VII. Eranskina.–Lehiaketa batzordearentzako eskabidea.

Deskargatu III. eranskinetik VII.era bitarteko eranskinak (DOC).

Iragarkiaren kodea: F2213059