1. NAFARROAKO FORU KOMUNITATEA
1.7. BESTELAKOAK
219E/2022 EBAZPENA, uztailaren 4koa, Ekonomia Zirkularraren eta Klima Aldaketaren Zerbitzuko zuzendariak emana, zeinaren bidez ukatzen baita Berriozarko udal-mugartean hondakin arriskutsuak eta ez-arriskutsuak kudeatzeko dagoen instalazio baten ingurumen baimen integratuan ezarritako funtzionamendu baldintzei dagokienez eskatutako aldaketa. Jardueraren titularra Emausko Trapuketariak Fundazioa da.
Instalazio horrek badu ingurumen baimen integratua, Ingurumeneko eta Lurraldearen Antolamenduko zuzendari nagusiaren apirilaren 4ko 206E/2018 Ebazpenaren bidez emana.
2021eko maiatzaren 25ean, titularrak ingurumen baimen integratuan ezarritako baldintzak aldatzea eskatu zuen; zehazki, eskatu zuen instalazioan kudeatzen diren hondakinen zerrendan sartzea pila-hondakinak eta aparatu elektriko eta elektronikoen hondakinak, zeinak urtarrilaren 19ko 27/2021 Errege Dekretuan adierazten baitira. Errege dekretu horrek bi hauek aldatu zituen: otsailaren 1eko 106/2008 Errege Dekretua, pilen, metagailuen eta horien hondakinen ingurumen kudeaketari buruzkoa, eta otsailaren 20ko 110/2015 Errege Dekretua, aparatu elektrikoen hondakinei buruzkoa.
Ekonomia Zirkularraren eta Klima Aldaketaren Zerbitzuak aurkeztutako eskaera aztertu du, eta ondorioztatu du ezin dela eskaera onartu; izan ere, instalazioaren ingurumen baimen integratuan ageri denez, instalazioak ez du aparatu elektriko eta elektronikoen hondakinak kudeatzeko prozesuetarako irekiera-baimenik, eta prozesu horiek beharko lituzke halako hondakinak kudeatu ahal izateko.
Ebazpen proposamena instalazioaren titularrari entzunaldia emateko tramitean egon da hogeita hamar egunez, eta hark ez du proposamenaren aurkako alegaziorik aurkeztu.
Adierazitakoari jarraikiz, eta Ingurumeneko zuzendari nagusiak azaroaren 8an emandako 107/2019 Ebazpenaren bidez eskuordeturik ditudan eskumenak erabiliz,
EBAZTEN DUT:
Lehena.–Ukatzea Berriozarko udal-mugartean hondakin arriskutsuak eta ez-arriskutsuak kudeatzeko dagoen instalazio baten ingurumen baimen integratuan ezarritako funtzionamendu baldintzei dagokienez eskatutako aldaketa. Jardueraren titularra Emausko Trapuketariak Fundazioa da.
Bigarrena.–Ebazpen hau Nafarroako Aldizkari Ofizialean argitaratzea.
Hirugarrena.–Ebazpen honek ez du administrazio bidea amaitzen, eta interesdunek, administrazio publikoek izan ezik, gora jotzeko errekurtsoa jar dezakete, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.
Laugarrena.–Ebazpen hau Emausko Trapuketariak Fundaziora eta Berriozarko Udalera igortzea, behar diren ondorioak izan ditzan.
Iruñean, 2022ko uztailaren 4an.–Ekonomia Zirkularraren eta Klima Aldaketaren Zerbitzuko zuzendaria, Pedro Zuazo Onagoitia.
Iragarkiaren kodea: F2209797
